Filemón
1 Nejua Pablo, akin nitsaktok porin nitakuaujtamati iuan Cristo Jesús, nietok iuan tokniuj Timoteo. Nimitstajkuilouilia totekitikaiknitsin Filemón, 2 uan no tokniuj Apfia, Arquipo akin touan tekiti kemej se soldado, uan tokniuan akin mosentiliaj mochan:
3 Maj toTajtsin Dios uan toTekotsin Jesucristo namechmakakan tatiochiualis tein amo technamiki uan maj namechpaleuikan kuali ximouikakan iuan Dios.
4 Nochipa niktasojkamatilia noDios keman nimitselnamiki itech nonetataujtiluan, 5 porin nechiluianij ke titakuaujtamati uan ke semi tiktasojta toTekotsin Jesús uan nochin akin Dios moinxelouilij.* 6 Tejua uan okseki tokniuan nantakuaujtamatij, yejua ika niktataujtia Dios maj nejon mitspaleui xiktasojkamati nochi tatiochiualismej tein tikpiaj itechkopa Cristo. 7 Noknitsin, semi niyolpakik uan semi nechyolseuij nikmatis ke tikintasojta tokniuan, porin semi tikinyolchikauak akin Dios moinxelouilij.*
8 Yejua ika, maski nikpia tanauatil itokaykopa Cristo para nimitsnauatis xikchiua tein moneki tikchiuas, 9 okachi kuali nimitstataujtia porin nikmati ke titetasojta, porin nejua Pablo, nixiuejya* uan axkan no nitsaktok porin nitakuaujtamati iuan Cristo Jesús. 10 Nimitstataujtia xikpaleui Onésimo, akin mochiuako kemej nokonetsin nikan kampa nitsaktok. 11 Yejua achto amo mitspaleuij, sayoj ke axkan semi nechpaleuijtok nejua uan no mitspaleuis tejua. 12 Nimitstitanilia Onésimo, akin semi niktasojta.
13 Nikuelitaskia maj mokauaniok nouan para maj yejua kichiua tekit tein tejua tikchiuaskia nikan kampa nitsaktok porin nikteixmatiltia kuali tanauatilmej.* 14 Sayoj ke amo teyi nikchiuas komo amo tinechkaua. Uan komo tikchiuati nejin, amo nikneki xikchiua porin nimitsnauatia, ta porin yekmelauj tikneki. 15 Xa yejua ika mitskaujteuak seki tonalmej,* para uelis oksepa mouan yetos nochipaya, 16 amo sayoj kemej se takeual kemej achto katka, ta axkan no kemej se toknitsin. Nejua semi niktasojta, sayoj ke tejua okachi tiktasojtas kemej motakeual uan kemej se tokniuj. 17 Yejua ika, komo tinechita kemej motasojikniuj, kuali xikseli, kemej yeskia nejua tinechseliskia. 18 Uan no, komo mitschiuilij teisa oso mitstauikilia, nejua nimitskepilis. 19 Nejua Pablo, nikmaijkuiloua nejin: nejua nimitstaxtauis (maski tein melauj tejua tikmati ke okachi tinechtauikilia). 20 Kemaj noknitsin, porin tipouij iuan toTekotsin, ijkon xinechpaleui; xinechyolchikaua kemej se itatojtokakauj Cristo.
21 Nikyekmati ke tinechkakis, yejua ika nimitstajkuilouilia porin nikmati ke tikchiuas okachi ke tein nimitsiluia. 22 Uan no, niknekiskia xinechtemoli kani nimokauas, porin kemej nankitataujtijtokej Dios maj nechpaleui, nikchia oksepa namechitatiuj.
23 Epafras, akin no tsaktok porin takuaujtamati iuan Cristo Jesús, mitstajpaloua. 24 No mitstajpalouaj notekitikaikniuan Marcos, Aristarco, Demas uan Lucas.
25 Maj toTekotsin Jesucristo namechmaka itatiochiualis tein amo technamiki porin nankinextiaj se kuali tanemilil.