2 Reyes
19 Keman tekiuaj Ezequías kikakik nejon, niman kitsayanak itasal, motalilij tasal tein teajuayotia uan kalakito ichan Jehová. 2 Satepan kinauatij Eliaquim, Sebná uan akin kinixyekanayaj tiopixkamej maj motalilikan tasal tein teajuayotia uan maj kiitatij tanauatijkej* Isaías akin katka iokichpil Amoz. Eliaquim taixyekanaya ichan tekiuaj uan Sebná katka itajkuilojkauj tekiuaj. 3 Yejuan kiluijkej Isaías: “Yejua nejin tein kijtoua Ezequías: ‘Axkan semi timotekipachojtokej porin techuijuikaltijkej* uan techpinaujtijkej. Timoajsij kemej se siuat akin yolitia ikonetsin, sayoj ke amo taxikouaok para kiyolitis. 4 Akin tekiuajti Asiria kiualtitanik rabsaqué* maj kikejkeloki Dios akin nochipa yoltok. Xa toDios Jehová kikakik nochi tein kijtojkej uan kintatsakuiltis. Yejua ika xiktataujti toDios Jehová para maj techpaleui akin timokauajok itech nejin tal’”.
5 Keman itakeualuan Ezequías kiitatoj Isaías, 6 Isaías kiniluij: “Xiakan xikiluitij namoteko: ‘Yejua nejin tein kijtoua Jehová: “Maj amo mitsmojmoujtikan itakeualuan akin tekiuajti Asiria. Yejuan kijtojkej miak taman tein ika nechuijuikaltijkej. 7 Nikchiuati maj teisa kinemili. Kitekakilis ke mochiujtok teisa uan mokepas ialtepeuj. Uan nikchiuas maj ompa kimiktikan ika machete tein ojkan tenej”’”.*
8 Keman rabsaqué kimatik ke tekiuaj de Asiria uan isoldados amo yetoyajok Lakís, mokepak uan kiajsito kinteuijtok akin nemiaj Libná. 9 Tekiuaj Senaquerib kiluijkej ke Tirhacá akin tekiuajtia Etiopía yaya kiteuiti. Yejua ika tekiuaj Senaquerib oksepa kintitanik seki takamej maj kiitatij Ezequías. Yejua kinnauatij nejin: 10 “Xiakan xikitatij Ezequías akin tekiuajti Judá uan xikiluikan: ‘Amo xikneltokili moDios akin iuan titakuaujtamati keman mitsiluia ke nejua amo nimoaxkatilis Jerusalén. 11 Tejua tikmattok nochi tein tekiuanij de Asiria kinchiuilijkej akin nemiaj itech altepemej tein kinixpolojkej. ¿Uan timoluia ke tejua timakisas? 12 Nion se tatadios* uelik kinpaleuij akin nemiaj itech altepemej tein nouejkaujtatuan kinixpolojkej. Kuali tikmati ke ixpoliujkej akin nemiaj Gozán, Harán, Rézef uan akin kayomej Edén akin nemiaj Tel-Asar. 13 Kuali tikmati tein kipanok akin tekiuajtia Hamat, akin tekiuajtia Arpad uan akin tekiuajtiaj itech uejueyi xolalmej tein pouiaj Sefarvaim, Hená uan Ivá’”.
14 Tekiuaj Ezequías kileroj amamej tein kimakakej takamej akin tekiuaj Senaquerib kintitanik. Satepan pankisak ichan Jehová uan kinixtemato nejon amamej iixpan Jehová. 15 Uan Ezequías peuak kitataujtia Jehová: “ToDios Jehová* akin titokotsyetok tapani* den querubines. Sayoj tejua yekmelauj tiDios itech nochi taltikpak. Tejua tikchijchiuak iluikak uan taltikpak. 16 ¡Jehová, nimitstataujtia xinechkaki! ¡Jehová, nimitstataujtia xiualtachia! NoDios akin nochipa tiyoltok, xikaki nochi tein kijtoj Senaquerib para mitsixnamikis. 17 Jehová, nochin tekiuanij de Asiria yekmelauj kinixpolojkej akin nemiaj itech seki altepemej uan kitamiixpolojkej inintaluan. 18 Kinchichinouilijkej inintatadiosuan porin yejuan amo yekmelauj katkaj dioses, ta sayoj kinchijchiujkaj ika kouit uan tet, yejua ika uelik kinixpolojkej. 19 Yejua ika toDios Jehová, nimitstataujtia xitechmakixti para maj amo teyi techchiuili akin tekiuajti Asiria. Ijkon nochin akin nemij itech okseki altepemej kimatiskej ke sayoj tejua Jehová yekmelauj tiDios”.
20 Isaías iokichpil Amoz tanauatij maj kiluitij Ezequías: “Yejua nejin tein kijtoua Jehová ininDios israelitas: ‘Nimitskakik keman tinechtataujtij uan tinechiluij tein kijtoj Senaquerib akin tekiuajti Asiria. 21 Yejua nejin tein nejua Jehová nikiluia ke kipanoti:
“Sion kemej yeskia se ichpoch akin mitsixtopeua, mitskejkeloua.
Jerusalén kemej yeskia se ichpoch akin mokuauiuika keman mitsita.
22 ¿Akoni timoluia ke tikixnamikik uan tikuijuikaltij?
¿Akoni timoluia ke tiktsatsajtsilij
uan tikitak kemej yeskia amo teyi chiujkej?
¡Ijkon tikchiuilij ininDios israelitas akin senkis chipauak!
23 Tikinualtitanik seki takamej para maj nechixnamikikij nejua Jehová uan tikijtoj:
‘Nipankisas hasta tepekuapan ika nochi nocarros tein nikui para nitateuis,
nias Líbano uan niajsis hasta kampa okachi uejka.
Nikintekis cedrojkoujmej tein okachi uejueykej.
Nikintekis tein okachi kuali enebrojkoujmej.
Nikalakis koujtaj kampa okachi takualtsinkan, nikalakis hasta kampa okachi uejka.
24 Nitachkuas para nikixtis at uan nitayis at tein onkak itech okse altepet.
Nikinuatsas nochi in ameyalmej tein onkak Egipto keman ompa ninejnemis’.
25 ¿Xe amo tikmatik? Nejua kemanya nikixtalij nejin.
Uejkaujya nikixtalijka tein nikchiuas, uan axkan nikchiuatia.
Tikinixpolos uejueyi xolalmej kampa tatsaktok ika uejueyi tepamit,
tikxitinis tepamit uan sayoj montontentos tet.
26 Akin ompa nemij amo uelis mopaleuiskej,
mojkakalakiskej uan kinpinaujtiskej.
Mochiuaskej kemej xiuit tein niman kuetaui.
Mochiuaskej kemej xiuit tein moskaltia kalkuako tein kiuatsa tonalejekat.
27 Nejua kuali nikmati nochi tein tikchiua:
keman timotalia, keman tikisa, keman tikalaki uan keman tikualantok nouan,
28 porin nikakini ke semi tikualantok nouan uan semi titakuejmolchiujtok.
Yejua ika nimitsyekatsoltokilis se gancho uan nimitstentalilis se lazo*
para ika nimitstsakuilis kemej kinchiuaj caballos, uan nimitskepas kampa tiualeuak”.
29 ”’Uan tejua Ezequías tikmatis ke yekmelauj tein nimitsiluia keman mochiuas nejin: itech nejin xiuit uan okse nankikuaskej trigo tein iselti mochiuas, sayoj ke keman panos nejon ome xiuit nankitokaskej trigo uan uvas uan nankikuaskej tein mochiuas. 30 Akin nemij Judá uan makisaskej yeskij kemej koujmej tein kitemakaj miak takilot porin uejkatan toktokej. 31 De Jerusalén kisaskej akin amo kinmiktijkej uan de tepet Sion kisaskej akin makiskej. Jehová akin kinixyekana iangeluan kitelneki kichiuas nejon.
32 ”’Yejua nejin tein nejua Jehová nikijtoua ke kipanoti akin tekiuajti Asiria:
“Amo kalakis itech nejin ueyi xolal,
amo kintamotilis nion se flecha akin nikan nemij,
nion kikuis se escudo para mopaleuis keman kinixnamikis,
nion kimontontemas tal para desde ompa kitamotas tepamit tein kiyoualoua ueyi xolal”.
33 Nejua Jehová no nikijtoua: “Mokepas de kampa ualeuak,
Amo kalakis itech nejin ueyi xolal.
34 Nikinpaleuis uan nikinmakixtis akin nemij itech nejin ueyi xolal.
Ijkon nikchiuas para maj moueyitali notokay uan para nikelnamikis tein nikiluij notekitikauj David”’”.
35 Nejon youak, iángel Jehová yajki kampa soldados asirios kitalijkaj ininkaltsitsin* uan kinmiktij 185 mil soldados. Akin mostika kualkan meujkej kinitakej nochin mikemej. 36 Yejua ika, Senaquerib akin tekiuajtia Asiria mokepak Nínive uan ompa mokauak. 37 Se tonal, Senaquerib yajki itech kali kampa kiueyichiuayaj itatadios Nisroc. Uan keman tankuaijkatoya iixpan itatadios, Adramélec uan Sarézer akin katkaj ikoneuan kimiktijkej ika machete tein ojkan tenej. Satepan cholojkej uan yajkej Ararat. Uan Esar-Hadón akin no katka iokichpil Senaquerib peuak tekiuajti.