Hebreos
2 Yejua ika moneki okachi kuali titanemiliskej itech tein tikakkej uan amo kemej ipa timomattokej, para maj amo keman timoxelojtiakan. 2 Porin komo melauak tein ángeles kitematiltijkej, uan nochin akin kitapanauilijkej tanauatil uan amo tatakamatkej kintatsakuiltijkej kemej kinnamikia, 3 ¿keniuj timopaleuiskej komo tikitaj ke amo moneki nejin ueyi taman tein Dios kichiuak para techmakixtis? Porin toTekotsin yejua akin yekinika kiteixmatiltij uan akin kikakkej no kiteixmatiltijkej, 4 uan Dios no kiteixmatiltij ke melauak keman kichiuak milagros uan miak uejueyi taman tein se kimojkaita, uan keman kixejxeloj ichikaualis ijkon kemej kinekik.
5 Porin Dios amo kinixtalij ángeles maj taixyekanakan itech taltikpak tein yetos satepan, tein ika titajtojtokej. 6 Sayoj ke se takat kijtoj senteixtenoj: “¿Toni chiujkej takat oso siuat para tikinelnamiktos? ¿Oso toni chiujkej akin yolik kemej takat* para tikyekpias? 7 Tejua tikchiuak maj amo semi ueyichiujkej kemej ángeles; tejua tikueyitalij uan tiktakachiuak, uan tikixtalij maj kiixyekana tein tikmachijchiuak. 8 Nochi tiktalij imetstampa”. Keman Dios kitalij maj kiixyekana nochi, amo kikauak nion teyi maj amo yejua kiixyekana. Uan maski ayamo tikitaj ke yejua kiixyekana nochi, 9 tikitajya Jesús, akin Dios kichiuak maj amo semi ueyichiujkej kemej ángeles. Tikitaj ke Dios kiueyitalij uan kitakachiuak porin kimiktijkej. Jesús momikilij para kinpaleuis nochin porin Dios technextilij itatiochiualis tein amo technamiki.
10 Dios kichiua maj nochi onka uan nochi onkak para maj moueyitali. Yejua ika, para kinueyitalis ikoneuan akin miakej, Dios kiitak ke kuali yetoya kikauas maj Taixyekankej tajyoui. Ijkon yejua ueliskia kinmakixtis. 11 Porin Jesús uan akin kinxeloj kipiaj sayoj se inintat. Yejua ika amo mopinaujmati kijtos ke yejuan iikniuan 12 keman kijtoua: “Nikinixmatiltis nokniuan motokay; nimitsueyitalis ika tatsotson itech nechikol”. 13 No kijtoua: “Itech nitakuaujtamatis”. Uan oksepa kijtoua: “Nikan nietok iniuan konemej akin Jehová* nechinmakak”.
14 Yejua ika, ijkon kemej nejin “konemej” nemij nikan taltikpak,* yejua no nemiko nikan taltikpak, uan ijkon keman momikiliskia ueliskia kiixpolos in Amokuali, akin kipia tein ika uelis kichiuas maj se miki. 15 Jesús kinmakixtiko nochin akin nochipa temako moajsiaj porin mouiaj mikiskej. 16 Porin tein melauj, yejua amo ualaj kinpaleuiko ángeles, ta ikoneuan Abrahán. 17 Yejua ika, monekik mochiuas ijkon kemej “iikniuan” itech nochi, para uelis mochiuas se tayekankatiopixkat akin teiknelia uan tatakamati iixpan Dios, uan ijkon kimaktiliskia Dios tein tapaleuiskia maj oksepa ueli timouikakan iuan.* 18 Yejua kimati keniuj kinpaleuis akin kinyejyekojtokej porin no tajyouij keman kiyejyekojkej.