Hebreos

9 Keman Dios achto motenkauak, kiixtalij keniuj israelitas monekia kiueyichiuaskej uan no kiixtalij se takenkal kampa kiueyichiuaskiaj nikan taltikpak. 2 Nejin takenkal ojkan xeliujtoya. Itech yekinika cuarto yetoya tauilketsaloni, mesa uan pantsin tein kitaliayaj iixpan Dios; nejon cuarto moixmatia kemej Yektik. 3 Sayoj ke, oksekopa den ueyi tasal yetoya okse cuarto tein moixmatia kemej Okachi Yektik. 4 Ompa yetoya se tekolkaxit* tachijchiuj ika oro uan yetoya tatiochiualkaxon* tein kitamitalilijkej oro. Kaxonijtik yetoya se komit tachijchiuj ika oro tein kipiaya maná, itakouj Aarón tein seliak uan patauak temej kampa ijkuiliujtoyaj itanauatiluan Dios.* 5 Itech nejon kaxon yetoyaj ome querubines tein kiyekauilijtoyaj ika ininajtapaluan ipantsak* kaxon. Sayoj ke axkan amo uelis tikmelauaskej nochi nejin.

6 Keman motamichijchiuak nochi nejin, tiopixkamej peuak miakpa kalakij itech yekinika cuarto para kichiuaskej tekit tein ika kiueyichiuaj Dios. 7 Sayoj ke itech ojpatika cuarto tayekankatiopixkat iselti kalaki sayoj sepa itech xiuit, uan nochipa kiuika esti tein kitemaka para maj kitapojpoluilikan itajtakoluan uan maj kintapojpoluikan akin motajtakolmakakej porin amo kimatij toni kuali yetok uan toni amo. 8 Ijkon, Dios ika ichikaualis kijtoua ke ojti tein teajxitia kampa Okachi Yektik ayamo tapotoya keman ijkatoyaok yekinika takenkal. 9 Nejin takenkal kiixnextia tein axkan mochiujtok uan hasta axkan kisentokaj kimaktiliaj Dios tapialmej uan seki taman. Maski ijkon, nejin amo kipaleuia akin kiueyichiua Dios maj senkis amo teyi kiyolkuejmolo. 10 Nejon tein kimaktiliaj Dios sayoj takual, tayil uan miak taman kemej mopajpakaj uan tapajpakaj ijkon kemej kijtouaya tanauatil. Nejin tanauatilmej kiixtaliayaj para seki taman tein onkak nikan taltikpak uan monekia se kitakamatis hasta tonal keman ixyetok moyektalis nochi.

11 Sayoj ke, Cristo mochiuakya tayekankatiopixkat uan tikselijtokejya tatiochiualismej. Keman mochiuak tayekankatiopixkat, kalakik itech takenkal tein okachi tayekantok uan tein okachi kuali, tein amo akin kimachijchiuak uan amo poui nikan taltikpak. 12 Yejua kalakik sayoj sepa kampa Okachi Yektik uan amo keman oksepa kalakis, sayoj ke amo kiuikak ininesyo chivos uan kuakuejmej, ta kiuikak iesyo, uan techmakixtij nochipaya. 13 Tiopixkamej kikuij ininesyo chivos uan kuakuejmej uan ika kinajtseluiaj ikoujnexyo se kuakouej* akin mopitsotilijkej, uan nejon kichiua maj chipaujkej iixpan Dios. 14 Sayoj ke iesyo Cristo okachi tapaleuia, porin kichipaua totalnamikilis* para maj amo techyolkuejmolo tein achto tikchiujkej tein amo kipia ipatiuj uan ijkon uelis tikueyichiuaskej Dios akin nochipa yoltok. Porin Dios ika ichikaualis* kiyekanak Cristo uan yejua motemaktij kemej se taman tein amo kipia tajtakol.

15 Yejua ika, Cristo tetajtouia itech se yankuik taman tein Dios motenkauak. Ijkon akin kinnotskej ueliskej kiseliskej tatiochiualismej tein uejkauaskej nochipaya ijkon kemej Dios motenkauak. Nejin ueli mochiua porin yejua momikilij uan ijkon taxtauak uan kinmakixtij akin kichiujkej tajtakolmej keman monekia kitakamatiskej tein Dios achto motenkaujka. 16 Porin keman se takat motenkaua iuan Dios, moneki mikis takat akin motenkauak, 17 porin tein se motenkaua amo tapaleuia hasta keman aksa* miki* uan amo kipia ipatiuj keman yoltokok akin motenkauak. 18 Yejua ika, para tapaleuiskia tein achto Dios motenkauak monekia mimilauis esti. 19 Porin satepan ke Moisés kinmatiltij israelitas nochi tanauatilmej, kikuik ininesyo kuakuejmej uan chivos uan at, ipantojmiyo ichkat chichiltik tein petani uan xiujtsitsin uan kiajtseluij amatajkuilol* uan nochin israelitas, 20 uan kijtoj: “Yejua nejin esti tein ika moixtalia tein Dios motenkaua uan tein namechnauatij xiktakamatikan”. 21 Ika esti no kiajtseluij takenkal uan nochi tein mokuia keman kiueyichiuayaj Dios. 22 Kemaj, iTanauatil Moisés kijtoua ke miak taman mochipaua ika esti, uan komo amo mimilaui esti, Dios amo uelis tetapojpoluis.

23 Yejua ika, tein kiixnextia tein onkak ne iluikak monekik maj ijkon mochipaua, sayoj ke para mochipauas tein onkak ne iluikak moneki motemaktis tein okachi kuali. 24 Porin Cristo amo kalakik kampa Okachi Yektik tein aksa kimachijchiuak, tein kiixnextia tein yekmelauj Okachi Yektik, ta kalakik ne iluikak. Yejua ika axkan yetok iixpan Dios uan techtajtouia. 25 Tayekankatiopixkat kalakia xijxiujtika kampa Okachi Yektik uan kiuikaya iesyo se tapial, sayoj ke Cristo amo moneki miakpa motemaktijtos. 26 Komo ijkon yeskia, monekiskia miakpa tajyouis desde keman peuak yolij akin nemij nikan taltikpak. Sayoj ke, itech nejin tonalmej* keman tatamitiya, monextij sayoj sepa uan amo kemanok monextis. Ijkon kiixpolos tajtakol porin motemaktij. 27 Nochin sayoj sepa momikiliskej uan satepan Dios kiixtalis tein kinnamiki kiseliskej, 28 no ijkon Cristo sayoj sepa motemaktij para kinkixtilis inintajtakoluan miakej, uan keman oksepa monextis amo monekisok kiixpolos tajtakol, uan kiitaskej akin semi kichixtokej* para maj kinmakixti.