Hebreos
1 Ne uejkauj, Dios miakpa kinnojnotsak touejkaujtatuan inintechkopa tanauatianij* uan no kikuik miak taman para kinnojnotsas. 2 Axkan, itech nejin tonalmej tein tamitijya, technojnotsak itechkopa iKoneuj, akin kikauilis nochi tein onkak uan akin itechkopa kichijchiuak tein onkak ne iluikak uan nikan taltikpak.* 3 Yejua kinextia ke Dios semi ueyichiujkej uan senkis tamati kemej yejua, uan kichikaujtok nochi tein onkak ika itajtol tein chikauak. Uan satepan ke techkixtilij totajtakoluan uan techchipauak, motalij iyekmakopa toUeyi Dios ne ajko. 4 Yejua ika mochiuako okachi ueyichiujkej ke ángeles, porin kimakakej okachi ueyi tanauatil* ke yejuan.
5 Dios amo kiluij okse ángel: “Tejua tinokoneuj; axkan nejua nimochiuako nimopaj”. Uan amo no kiluij okse ángel nejin: “Nejua niyeski niipopaj uan yejua yeski nokoneuj”. 6 Uan keman oksepa kiualtitanis iTayekankakoneuj nikan taltikpak, kijtoua: “Uan maj nochin iangeluan Dios motankuaketsakan iixpan”.*
7 Uan no, keman ininka tajtoua ángeles, kijtoua: “Yejua kichiua maj iangeluan semi chikaujkej,* uan itekitikauan kinchiua kemej tit”.* 8 Sayoj ke keman ika tajtoua iKoneuj, kijtoua: “Dios mitsmaka tanauatil* para titaixyekanas nochipaya, uan keman tiyeski tiTekiuaj, titaixyekanas kemej moneki. 9 Semi tikuelitak* tein kuali yetok uan tiktauelitak tein amo kuali.* Yejua ika Dios, moDios, mitsixtalij kemej tekiuaj ika aceite uan kichiuak okachi xiyolpaki ke okseki tekiuanij”. 10 No kijtoua: “NoTekotsin, keman peuak nochi, tejua tiktsineualtij taltikpak, uan iluikak tejua tikmachijchiuak. 11 Taltikpak uan iluikak ixpoliuiskej, sayoj ke tejua tiksentokas tinemis; ixpatiskej ijkon kemej se tasal 12 uan tikinkelpachos kemej se ueyak tasal, tikinixpatas kemej ijkuak se kiixpata se tasal. Sayoj ke tejua amo keman timopata, uan nochipa tinemis”.
13 Sayoj ke, Dios amo kiluij okse ángel: “Ximotali noyekmakopa hasta maj nikintali akin mitstauelitaj kemej mometstapech”. 14 Porin nochin ángeles* kitekitiliaj Dios uan yejuan akin Dios kinnauatia maj kinpaleuitij akin makisaskej.