Éxodo
33 Jehová no kiluij Moisés: “Xiksentoka xiouj iniuan akin tikinkixtij de Egipto. Xiouj itech tal tein nikinyekiluij Abrahán, Isaac uan Jacob ke nikinmakaskia ikoneuan. 2 Niktitaniti se ángel maj mitsyekantiuj uan nikinkixtis akin kinixmatij kemej cananeos, amorreos, hititas, perizitas, heveos uan jebuseos. 3 Xipankisa itech se tal kampa moteltachiua.* Sayoj ke nejua amo nias namouan, porin tel amo nantakakij uan ueliskia namechtamimiktis itech ojti”.
4 Keman israelitas kikakkej ke tein Dios kijtojka amo kuali katka para yejuan, motayokoltijkej, uan amo akin mochijchiuak. 5 Uan Jehová kiluij Moisés: “Xikinilui israelitas: ‘Namejuan tel amo nantakakij. Nimantsin ueliskia namechtamimiktis. Yejua ika amo ximotalilikan tein ika namochijchiuaj hasta maj niknemili toni namechchiuilitiʼ”. 6 Yejua ika itech tepet Horeb, israelitas mokixtilijkej tein motalilijkaj para kualtsin moitaskej uan amo kemanok motalilijkej.
7 Uan Moisés kiketsato ikaltsin* nepakatsin de kampa yetoyaj ininkaltsitsin israelitas. Uan kiixtalij maj itech nejon kaltsin mosentilikan. Nochin akin kinekiaj kimatiskej toni kiixtaliaya Jehová, yayaj ompa. 8 Nochipa keman Moisés yaya itech nejon kaltsin, nochin kisayaj ininkaltenoj uan kiixtokayaj Moisés hasta ke kalakia itech nejon kaltsin. 9 Niman keman Moisés kalakia, mixti temouaya uan motaliaya ikalakyan kaltsin uan Dios tajtouaya iuan. 10 Keman kiitayaj mixti tein motaliaya ikalakyan kaltsin kampa Moisés yetoya, nochin moixpilouayaj ininkalixpan. 11 Uan Jehová kinojnotsaya Moisés ijkon kemej se takat tajtoua iuan okse. Keman Moisés mokepaya kampa yetoyaj okseki kaltsitsin, Josué mokauaya itech kaltsin kampa Dios tajtouaya iuan Moisés. Josué katka iokichpil Nun uan kipaleuiaya Moisés.
12 Uan Moisés kiluij Jehová: “Tinechiluijtok ‘Xikinixyekana israelitas’. Sayoj ke amo tinechiluijtok akoni tikiluiti maj nouan youi. Uan no tinechiluij ‘Kuali nimitsixmati* uan no tinechyolpaktiaʼ. 13 Komo nimitsyolpaktia, nimitstataujtia xinechnextili keniuj titamati, para maj nimitsyekixmati uan maj niksentoka nimitsyolpakti. Xikelnamiki ke nochin nejin mokoneuan”. 14 Yejua ika Dios kinankilij: “Nejua nias mouan uan nikchiuas maj amo teyi mitstekipacho”. 15 Uan Moisés kiluij: “Komo amo tias touan, nikan xitechkaua. 16 ¿Keniuj kimatiskej oksekin ke nejua uan nochin israelitas timitsyolpaktiaj? Komo touan tiouj, amo tiyeskij kemej oksekin akin nemij itech taltikpak”.
17 Jehová kiluij Moisés: “No nikchiuas nejin tein tinechtajtania, porin tinechyolpaktia uan kuali nimitsixmati”. 18 Moisés kinankilij: “Nimitstataujtia, xinechkaua maj nikita keniuj tiknextia mochikaualis”. 19 Uan Dios kiluij: “Nikchiuas xikita ke nitelyolkuali uan nimitsixmatiltis notokay, Jehová. Uan nikpaleuis akin nejua niknekis nikpaleuis, uan nikiknelis akin nejua niknekis nikiknelis”. 20 Sayoj ke kiluij: “Amo uelis tinechixitas, porin nion se takat uelis yoltos komo nechita”.
21 Uan no, Jehová kiluij: “Nikan kampa nietok yetok se ueyi tet. Ompa ximoketsa 22 uan keman nipanotos uan niknextijtias nochikaualis, nimitskalakis itech se tekoyok uan nimitsixtsakuas ika nomay hasta maj nipano. 23 Satepan nimomaijkuanis uan tinechpanitas. Sayoj ke amo uelis tinechixitas”.