Romanos
10 Nokniuan, yekmelauj ika nochi noyolo nikneki uan semi niktataujtia Dios maj yejuan makisakan. 2 Porin uelis nikyekijtos ke yejuan semi chikauak kitekitiliaj Dios, sayoj ke amo yekmelauj kiajsikamatij tein Dios kineki. 3 Kemej amo kimatij toni Dios kiita ke kuali yetok, kichiuanij tein sayoj yejuan kiixtalianij. Yejua ika, amo kichiujkej tein Dios kijtoua ke kuali yetok. 4 Porin Cristo kichiuak maj amo tapaleuiok iTanauatil Moisés,* uan ijkon akin takuaujtamati, Dios kiita ke yolmelauak.
5 Moisés kijtoj ke akin kichiua tein kuali yetok ijkon kemej kijtoua Tanauatil, nemis porin kitakamati. 6 Sayoj ke Tajkuilolamatsin no kinextij ke akin takuaujtamati, Dios uelis kiitas ke yolmelauak. Kijtoua: “Amo ximoyolilui ‘¿Akoni pankisas iluikak?’, oso ¿akoni pankisas iluikak para kichiuas maj pantemo Cristo? 7 Amo no xikijto ‘¿Akoni pantemos itech ueyi ostok* tein uejkatan?’, oso ¿akoni pantemos para kichiuas maj Cristo oksepa nemi?”. 8 Sayoj ke, ¿toni kijtoua Tajkuilolamatsin? “Tajtol amo uejka yetok, itech motenoj uan itech moyolo”, tein kijtosneki, “tajtol” tein tejuan tikteixmatiltiaj uan tein se kineltoka porin se takuaujtamati. 9 Porin komo ika motenoj tikyekijtoua senteixtenoj ke Jesús yejua toTekotsin uan ika moyolo tiknextia ke titakuaujtamati ke Dios kichiuak maj oksepa nemi,* timakisas. 10 Para maj Dios mitsita ke tiyolmelauak, moneki titakuaujtamatis ika nochi moyolo,* uan para timakisas, moneki senteixtenoj tikteixmatiltis nejon.
11 Porin Tajkuilolamatsin kijtoua: “Nochin akin itech takuaujtamatiskej amo keman mopinaujtiskej”. 12 Porin judío no tamati kemej griego. Nochin kipiaj sayoj se ininTeko, akin semi kintatiochiuia nochin akin kiteneuaj. 13 Porin “akin kitataujtis Jehová* maj kipaleui uan kinotsas ika itokay, makisas”. 14 Sayoj ke, ¿keniuj kitataujtiskej komo amo iuan takuaujtamatij? ¿Uan keniuj iuan takuaujtamatiskej komo amo kiixmatij? ¿Uan keniuj kiixmatiskej komo amo akin kiteixmatiltia? 15 ¿Uan keniuj kiteixmatiltiskej komo amo kintitanij? Ijkon kemej ijkuiliujtok: “¡Semi kualtsitsin ininmetsuan akin kiteixmatiltiaj kuali tanauatilmej* tein ika tajtouaj tein kuali!”.
16 Sayoj ke amo nochin kineltokakej kuali tanauatilmej, porin Isaías kijtoua: “Jehová,* ¿akoni takuaujtamati itech tein tikteixmatiltiaj?”.* 17 Nejin kinextia ke aksa* takuaujtamati sayoj satepan ke kikaki tein kiixmatiltiaj, uan nejin kikaki keman aksa kiteixmatiltia Cristo. 18 Sayoj ke nejua nitajtani: ¿xe amo teyi namechiluijkej? Kemaj, porin “itech nochi taltikpak mokakik inintajtol, uan tein kiteixmatiltiayaj ajsik hasta kampa okachi uejka itech taltikpak”. 19 Sayoj ke nejua nitajtani: ¿xe israelitas amo kimatiaj? Yekinika, Moisés kijtoua: “Namechkuajkualantis porin nikintatiochiuiti akin amo israelitas. Nikchiuas semi xikualanikan porin nikintatiochiuiti akin kinitaj ke amo kuatamatij”. 20 Sayoj ke Isaías semi moyolchikaua uan kijtoua: “Akin amo nechtemouayaj nechajsikej. Akin amo noka tajtaniaj nechixmatkej”. 21 Sayoj ke, keman yejua ininka tajtoua israelitas kijtoua: “Nochin tonal nikintataujtijtoya maj nouan mokepakan akin amo tatakamatij uan yoltakuaujkej”.