3 Juan

1 Nejua nitayekankej,* nimitstajkuilouilia noknitsin Gayo; nimitstasojta ika nochi noyolo.

2 Noknitsin, niktataujtia Dios para xiksentoka kuali xieto uan xipakto, ijkon kemej axkan kuali tietok. 3 Porin semi niyolpakik keman tokniuan ualajkej uan kijtojkej* ke amo tikaua tamachtilis tein melauak, uan niyolpaki porin tiksentoka tinemi itech ojti tein melauak. 4 Amo onkak okse taman tein okachi nechyolpaktia* ke nikmatis ke nokoneuan kisentokaj nemij itech ojti tein melauak.

5 Noknitsin, tiknextijtok ke titakuaujtamach keman tikinpaleuia tokniuan, maski amo tikinixmati. 6 Yejuan kiniluijkej tokniuan itech nechikol keniuj titetasojta. Keman yaskejya, nimitstataujtia xikinmaka tein kinpolos itech ojti ijkon kemej kiyolpaktis Dios. 7 Porin moojketskej para kiteixmatiltiskej itokay Dios uan amo teyi kintajtanijkej akin amo taneltokaj. 8 Yejua ika, tejuan moneki kuali tikinseliskej tokniuan akin tekitij kemej yejuan, uan ijkon tisentapaleuiskej maj moteixmatilti tamachtilis tein melauak.

9 Nikintajkuilouilij tokniuan itech nechikol, sayoj ke Diótrefes, akin kiuelita taixyekantos, amo techtakachiua* uan kiixnamiki nochi tein tikijtouaj. 10 Yejua ika, komo niouj ompa, nikijtos tein amo kuali tein kichiujtok, ke semi techtakajkayauilijtinemi. Uan amo sayoj nejon, ta amo no kintakachiua* tokniuan nion kineki kinselis. Uan akin kemaj kinekij kinseliskej nejon tokniuan, yejua kitemoua kintsakuilis uan kinkixtis de nechikol.

11 Noknitsin, amo xikchiua kemej akin kichiuaj tein amo kuali, ta xikchiua kemej akin kichiuaj tein kuali. Akin kichiua tein kuali, Dios kiixyekana. Akin kichiua tein amo kuali amo kiixmati* Dios. 12 Nochin tokniuan kuali ika tajtouaj Demetrio, uan yejua no kichiua tein Dios kijtoua ke melauak. Tein melauj, tejuan no kuali ika titajtouaj uan tejua tikmati ke tein tikijtouaj melauak.

13 Niknekia nimitsiluis miak tamanok, sayoj ke amo niknekiok nimitstajkuilouilis, 14 porin nikchia amo uejkaua nimitsitas uan mouan nitajtos.

Xiyolseujto.

Akin kuali touan mouikaj mitstajpalouaj. Xinechintajpalouili sejse akin kuali iniuan timouikaj.