Hebreos
4 Dios techiluia ke uelisok techkauas maj iuan timoseuikan, yejua ika maj timoyekpiakan,* amokan tikpolojtij nejon tatiochiualis. 2 Porin tejuan no techixmatiltijkej kuali tanauatilmej,* ijkon kemej yejuan; sayoj ke yejuan amo kitakamatkej, yejua ika amo kinpaleuij, porin amo semi takuaujtamatkej kemej akin kemaj tatakamatkej. 3 Sayoj ke akin titakuaujtamatij kemaj techkaua maj iuan timoseuikan. Tikmatij nejin porin yejua kijtoj “Yejua ika, keman semi nikualantoya nimotenkauak: ‘Amo nikinkauas maj nouan moseuikan’”, maski kitamichiujkaya nochi desde keman peuak yolij akin nemij nikan taltikpak. 4 Porin itech se tajkuilol yejua kijtoj tein mochiuak itech chikometika tonal: “Uan Dios moseuij itech chikometika tonal uan amo tachijchiuakok”. 5 Uan no kijtoua: “Amo nikinkauas maj nouan moseuikan”.
6 Akin yekinika kinixmatiltijkej kuali tanauatilmej amo kinkauak maj iuan moseuikan porin amo tatakamatkej. Sayoj ke poliuijok maj sekin iuan moseuikan, 7 yejua ika oksepa kiixtalia se tonal keman kijtoua “axkan”, tel miak xiujmej satepan itech se salmo tein David kijkuiloj. Ijkon kemej yekin moijtoj: “Komo axkan namejuan nankitajtolkakij, amo xiyoltakuaujkej”. 8 Porin komo Josué kinuikaskia kampa yekmelauj ueliskia moseuiskej, satepan Dios amo ika tajtoskia okse tonal. 9 Yejua ika mokauaok se tonal* keman moseuiskej itekitikauan Dios. 10 Porin akin Dios kikauak maj iuan moseui amo no teyi kichiuaok, ijkon kemej Dios moseuij satepan ke tachijchiuak.
11 Yejua ika, maj tikchiuakan nochi tein tiueliskej para maj Dios techkaua maj iuan timoseuikan, para maj amo akin peua amo tatakamati kemej yejuan. 12 Porin itajtol Dios yoltok uan semi chikauak. Okachi tateki ke se machete tein ojkan tenej.* Keman kalaki kinextia kemej se moita* uan tein se kipia se iyolijtik,* kixeloua omit* uan tein kiijtipia omit, uan ueli kinextia* tein se kiyolnemilia uan tein se kiyolnejneki. 13 Uan nion akin uan nion teyi ueli motatia* iixpan Dios, ta iixpan nochi ualnestok uan nochi kiita. Uan iixpan yejua monekis titanankiliskej.
14 Toueyi tayekankatiopixkat yejua Jesús, iKoneuj Dios, uan yejua kalakikya* ne iluikak; yejua ika maj tiksentokakan tikteixmatiltikan ke iuan titakuaujtamatij. 15 Porin tikpiaj se tayekankatiopixkat akin ueli techajsikamati* uan kimati ke titajtakolejkej, porin kijyouij nochi ijkon kemej tejuan, sayoj ke yejua amo motajtakolmakak. 16 Yejua ika, maj timotokikan kampa tokotsyetok Dios akin kitemaka itatiochiualis tein amo technamiki uan maj amo teyi techtsakuili maj tiktataujtikan. Uan ijkon Dios uelis techiknelis uan techmakas itatiochiualis tein amo technamiki itech hora keman okachi monekis maj techpaleuikan.