2 Reyes
17 Keman Acaz 12 xiujmejya tekiuajtitoya ompa Judá, Hosea iokichpil Elá peuak tekiuajti itech xolal Israel. Hosea nemia Samaria uan tekiuajtik chiknaui xiuit. 2 Kichiuaya tein Jehová amo kiyolpaktia, sayoj ke amo semi tajtakolchiuak kemej akin achto tekiuajtikaj ompa Israel. 3 Salmanasar akin tekiuajtia Asiria pankisak kiteuito Hosea uan Hosea peuak kitekitilia Salmanasar. No peuak kimaka tomin tein kiixtalijka maj kimaka. 4 Sayoj ke akin tekiuajtia Asiria kimatik ke Hosea kinemilijtoya kiixnamikis porin kintitanka seki takamej maj yakan Egipto para maj kiluitij tekiuaj So maj kipaleui. Hosea amo no kiuikiliayaok tomin tein kiixtalijka maj kimaka ijkon kemej kichiujtiualaya xijxiujtika. Yejua ika, akin tekiuajtia Asiria kiilpij* uan kitsakuak.
5 Akin tekiuajtia Asiria kinuikak nochin isoldados uan kalakkej itech xolal Israel. Ajsikej Samaria, kiyoualojkej uan eyi xiuit ompa mokaujkej. 6 Keman Hosea chiknaui xiuitya tekiuajtitoya, akin tekiuajtia Asiria moaxkatilij Samaria. Kinuikak Asiria nochin akin nemiaj itech xolal Israel uan kintitanik maj chanchiuatij Halá uan Habor tein yetok tanakastan den ueyiat Gozán. No kintitanik maj chanchiuatij itech uejueyi xolalmej kampa nemiaj medos.
7 Akin nemiaj itech xolal Israel kinpanok nejon porin kichiujkej tein ininDios Jehová amo kiyolpaktia, maski yejua kinkixtijka de Egipto uan kinpaleuijka maj amo kintajyouiltianiok faraón akin ompa tekiuajtia. Yejuan kinueyichiuayaj* tatadiosmej* 8 uan kichiuayaj ijkon kemej akin nemiaj itech altepemej akin Jehová kintalkuilijka para maj israelitas ompa neminij. Uan no kichiuayaj tein kiixtalijkaj akin achto tekiuajtikaj itech xolal Israel.
9 Israelitas kichiuayaj miak taman tein ininDios Jehová amo kiyolpaktia. Itech nochi uejueyi xolalmej tachijchiuayaj kampa yeski kampa ueliskiaj kinueyichiuaskej tatadiosmej, desde uejkapan kalmej kampa tajpiayaj hasta uejueyi xolalmej kampa tatsaktoya ika uejueyi tepamit.* 10 Uan itech tepetsitsin uan inintampa uejueyi koujmej kinkejketsayaj temej uan koujmej para taueyichiuaskej.* 11 Uan kampa tachijchiujkaj para taueyichiuaskej kinchichinouiliayaj tatadiosmej tapialmej uan okseki taman.* Kichiuayaj ijkon kemej akin nemiaj itech altepemej akin Jehová kintalkuilijka para maj israelitas ompa neminij. Kichiuayaj tein tel amo kuali para kikualantiskej Jehová.
12 Israelitas kinueyichiuayaj tatadiosmej tein Jehová semi kitajyaltiayaj* maski yejua kinnauatijka maj amo kinueyichiuanij. 13 Jehová miakpa kintitanik itanauatijkauan* uan takamej akin kinitaltiaya teisa para maj kinnejmachtitij akin nemiaj Israel uan Judá. Yejua kiniluiaya: “¡Amo xikchiuakanok tein amo kuali uan oksepa xinechueyichiuakan! Xiktakamatikan tein namechnauatia uan tein nikixtalia. Nochi nejin ijkuiliujtok itech tanauatil tein nikinmakak namouejkaujtatuan uan nikiniluij notanauatijkauan maj namechmatiltikan”. 14 Sayoj ke yejuan amo takakkej, ta kisentokakej kichiujkej tein amo kuali ijkon kemej kichiujkaj ininuejkaujtatuan akin amo takuaujtamatkaj iuan ininDios Jehová. 15 Amo kichiuayaj tein Dios tanauatia nion tein kintajtanijka ininuejkaujtatuan maj kichiuanij. Uan amo no kikakiaj tein kinnejmachtiaya. Kisentokayaj kinueyichiuayaj tatadiosmej tein nion tepitsin tapaleuiaj uan yejua ika no mochiujkej kemej yejuan. Kichiujkej ijkon kemej kichiuayaj akin nemiaj itech okseki altepemej maski Jehová kiniluijka maj amo kichiuanij kemej yejuan.
16 Nion tepitsin kitakamatiaj itanauatiluan ininDios Jehová. Kinchijchiujkej ome kuakuejkonemej de oro uan no kiketskej se kouit para taueyichiuaskej. Motankuaketskej uan kiueyichiujkej tonaltsin, metsti uan sitalimej uan no kiueyichiujkej Baal. 17 Uan no, ininokichpipiluan uan ininsiuapipiluan kinchichinouilijkej tatadiosmej, mochiujkej adivinos uan kitemouayaj maj teisa kinmatilti toni panos satepan. Kisentokayaj kichiuayaj* tein Jehová amo kiyolpaktia para kikualantiskej.
18 Akin nemiaj itech xolal Israel kitelkualantijkej Jehová, yejua ika kinixtopeuak uan kikauak maj kinuikanij okseko. Sayoj kikauak maj ikoneuan Judá kisentokanij neminij itech tal tein kinmakaka.
19 Uan nion akin nemiaj Judá kitakamatkej tein ininDios Jehová tanauatijka, ta yejuan no kichiujkej kemej akin nemiaj itech xolal Israel. 20 Jehová kinixtopeuak nochin israelitas, kinpinaujtij uan kikauak maj tachtekinij kintajyouiltianij. Satepan kinkixtij den tal tein kinmakaka uan kikauak maj okseko kinuikanij. 21 Dios amo kikauakok maj ikoneuan David kinixyekananijok akin nemiaj itech xolal Israel, uan israelitas kiixtalijkej maj tekiuajti Jeroboán iokichpil Nebat. Sayoj ke Jeroboán kichiuak maj yejuan tajtakolchiuanij uan maj amo kiueyichiuanijok Jehová. 22 Uan akin nemiaj itech xolal Israel kisentokayaj tajtakolchiuayaj ijkon kemej tajtakolchiujka Jeroboán. Kisentokayaj kichiuayaj tein amo kuali. 23 Yejua ika Jehová kikauak maj okseko kinuikanij. Mochiuak ijkon kemej kiniluijka itanauatijkauan maj kitematiltikan. Yejua ika, akin nemiaj itech xolal Israel kinuikakej Asiria uan ompa nemijok hasta axkan.
24 Akin tekiuajtia Asiria kinuikak miakej maj chanchiuatij itech uejueyi xolalmej tein pouiaj Samaria kampa achto nemiaj israelitas. Kinuikak de Babilonia, de Cutá, de Avá, de Hamat uan de Sefarvaim. Mokaltalijkej itech uejueyi xolalmej tein pouiaj Samaria. 25 Keman mokaltalitoj Samaria amo kiueyichiuayaj* Jehová. Yejua ika Jehová kintitanilij leones uan nejon leones kinmiktijkej sekin. 26 Yejua ika kintitankej seki takamej maj kiluitij akin tekiuajtia Asiria: “Akin tikintitanik maj chanchiuatij itech uejueyi xolalmej tein pouij Samaria amo kiixmatij Dios akin ompa kiueyichiuayaj nion kimatij keniuj kiueyichiuayaj. Yejua ika, nejon Dios kintitaniliani leones uan nejon leones miakej kinmiktijtokej, porin amo akin kiixmati Dios akin ompa kiueyichiuayaj”.
27 Keman akin tekiuajtia Asiria kikakik nejon, tanauatij: “Xikiluikan semej tiopixkamej akin nankiualkuikej maj mokepa uan maj oksepa ompa chanchiuati. Xiktitanikan para maj kinmachti akin ompa nemij keniuj kiueyichiuaskej nejon Dios”. 28 Yejua ika, semej tiopixkamej akin kiuikakaj de Samaria mokepak uan chanchiuato Betel. Yejua peuak kinmachtia akin nemiaj Samaria keniuj monekia kiueyichiuaskej* Jehová.
29 Sayoj ke akin kinuikakej maj chanchiuatij Samaria uan itech uejueyi xolalmej tein ompa pouiaj mochijchiuilijkej tatadios* tein ipa kiueyichiuayaj itech ininaltepeuj. Nejon tatadiosmej kintalitoj itech kalmej tein samaritanos kinchijchiujkaj kampa ipa yayaj taueyichiuatij. Nochin akin kinuikakaj maj ompa chanchiuatij kichiujkej nejon. 30 Akin ualeuayaj Babilonia mochijchiuilijkej tatadios Sucot-Benot, akin ualeuayaj Cut mochijchiuilijkej tatadios Nergal, akin ualeuayaj Hamat mochijchiuilijkej tatadios Asimá 31 uan akin ualeuayaj Avá mochijchiuilijkej tatadios Nibhaz uan Tartac. Akin ualeuayaj Sefarvaim kinchichinouayaj ininkoneuan para kiueyichiuaskej Adramélec uan Anamélec. Nejin tatadiosmej kinueyichiuayaj ompa Sefarvaim. 32 Maski kiueyichiuayaj Jehová, kinixtalijkej seki takamej para maj tekitikan kemej tiopixkamej kampa taueyichiuayaj. Nejon tiopixkamej tekitiaj itech kalmej tein samaritanos kinchijchiujkaj kampa ipa yayaj taueyichiuatij. 33 Akin kinuikakej maj chanchiuatij Samaria kiueyichiuayaj Jehová, sayoj ke no kinueyichiuayaj tatadiosmej tein kinueyichiuayaj itech altepemej kampa ualeujkaj.
34 Hasta axkan kinueyichiuaj inintatadiosuan. Nion semej akin ompa nemi kiueyichiua Jehová nion kitakamati tein kiixtalia. Amo no kitakamatij Tanauatil nion tein Jehová kinnauatij ikoneuan Jacob maj kichiuakan. Yejua kitokaypatak Jacob uan kitalilij Israel. 35 Keman Jehová motenkauak iniuan israelitas ke kintiochiuaskia komo kitakamatiaj, kinnauatij: “Amo xikinueyichiuakan tatadiosmej, amo ximotankuaketsakan ininixpan, amo xikintekitilikan nion xikinmaktilikan miak taman, 36 ta nejua Jehová moneki nanechueyichiuaskej, nejua noixpan moneki namotankuaketsaskej uan nejua moneki nanechmaktiliskej miak taman, porin nejua namechkixtij de Egipto ika noueyi chikaualis. 37 Nochipa moneki nankichiuaskej tein nitanauatia uan tein nikixtalia. Nochipa moneki nankitakamatiskej nochi tanauatilmej tein namechijkuilouilij uan amo xikinueyichiuakan tatadiosmej. 38 Amo xikelkauakan tein nimotenkauak namouan, uan amo xikinueyichiuakan tatadiosmej. 39 Moneki nejua namoDios Jehová nanechueyichiuaskej, porin nejua namechpaleuis maj amo teyi namechchiuilikan nochin akin namechtauelitaj”.
40 Sayoj ke akin kinuikakej maj chanchiuatij Samaria uan itech uejueyi xolalmej tein ompa pouiaj amo tatakamatkej, ta kisentokakej kinueyichiujkej inintatadiosuan. 41 Kiueyichiuayaj Jehová, sayoj ke no kinueyichiuayaj tatadiosmej tein kinchijchiujkaj. Hasta axkan, ininkoneuan uan ininixuiuan kichiuajok tein kichiuayaj ininuejkaujtatuan.