1 Pedro
4 Kemej Cristo tajyouij keman katka takat, namejuan no xitanemilikan ijkon kemej yejua tanemiliaya; porin akin tajyouia kikauakya tajtakol 2 para kichiuas tein Dios kineki keman yoltosok uan amo tein kinejnekij nikan taltikpak. 3 Porin achto, uejkauak nankichiujtinemiaj tein kinekij akin amo taneltokaj, uan nankichiujtinemiaj tein tetajyaltia uan amo nanixpinauayaj,* tel senka nankinejnekiaj nankichiuaskej tein amo kuali, nanteltayayaj tayil, semi naneliuistiaj itech iluimej, naniluichiuayaj sayoj para nantauanatiuij uan nankichiuayaj tein pitsotik keman nankinueyichiuayaj tatadiosmej.* 4 Yejuan amo kiajsikamatij keyej kemej yeskia amo namopankalakiajok itech sokiat kemej yejuan, uan amo nankichiuajok tein pitsotik, yejua ika semi namechijijtouaj. 5 Sayoj ke akin kichiuaj nejin, tanankiliskej iixpan akin kiixtalis tein kinnamiki kiseliskej akin yoltokej uan akin momikilijkejya. 6 Yejua ika no kinixmatiltijkej kuali tanauatilmej* akin momikilijkejya, porin maski kijtoskej tein kinnamiki kiseliskej sayoj kemej moitaj ijkon kemej oksekin, uelis moyekanaskej ika ichikaualis Dios.
7 Sayoj ke amo uejkaua nochi tatamis. Yejua ika, kuali xitalnamiktokan uan nochipa xikelnamiktokan ke motelneki namotataujtiskej. 8 Sayoj ke okachi tayekantok semi ximotasojtakan se iuan okse, porin akin tetasojta nochipa tetapojpoluia. 9 Kuali xikinselikan oksekin uan amo xikijtojtokan tein amo nankiuelitaj. 10 Dios namechmakak se tatiochiualis nansejsemej, yejua ika xikuikan para ika namopaleuiskej se iuan okse kemej kuali takeualmej akin kinpaleuiaj oksekin maj kiselikan itatiochiualis Dios tein amo technamiki tein monextia ika miak taman. 11 Komo aksa* tajtoua, maj tajto kemej akin kiteixmatiltia tein Dios kijtoua, uan komo aksa kinpaleuia oksekin, maj takuaujtamati itech chikaualis tein Dios kitemaka, para maj itech nochi kiueyitalikan Dios itechkopa Jesucristo. Dios kinamiki maj kiueyitalikan uan maj kipia chikaualis nochipaya. Maj ijkon mochiua.*
12 Nokniuantsitsin, axkan nankipanotokej ouijkayomej tein kemej yeskia tit,* amo xikmojkaitakan nejon, 13 ta xiksentokakan xiyolpakikan porin nankijyouiaj tein Cristo kijyouij, uan ijkon no semi nanyolpakiskej keman monextis ichikaualis uan ikualtsinyo. 14 Komo namechijijtouaj* porin nankitojtokaj Cristo, nanyolpakij porin ichikaualis Dios tein semi se kimojkaita namotech yetok.
15 Komo aksa tajyouia, maj amo tajyoui porin temiktia, tachteki, kichiua tein amo kuali oso mokalakia kampa amo itekiuj. 16 Sayoj ke komo aksa tajyouia porin kitojtoka Cristo, maj amo mopinaujmati, ta maj kisentoka kiueyitali Dios porin nemi kemej Cristo tamachtij. 17 Porin itech nejin tonalmej ixyetok maj peua moixtali tein kinnamiki kiseliskej akin pouij ichan Dios. Sayoj ke, komo achto touan peuaj, ¿keniuj tamitiuij akin amo kitakamatij ikuali tajtoluan Dios? 18 “Uan komo akin yolmelauak tekit kimakixtiaj, ¿toni kipanos akin amo yolkuali uan tajtakolchiujkej?”. 19 Yejua ika, akin tajyouijtokej porin kichiuaj tein Dios kineki, maj kisentokakan kichiuakan tein kuali uan maj iuan motemaktikan akin techchijchiuak porin uelis iuan titakuaujtamatiskej.