1 Timoteo
4 Sayoj ke, Dios ika ichikaualis* kiyekijtoua ke satepan sekin kikauaskej tamachtilis tein tikneltokaj, porin kineltokaskej tein oksekin kijtoskej ke Dios kitematiltij uan no kineltokaskej inintamachtilis amokuali ejekamej. 2 Kikakiskej ininxolopijyo akin taixkajkayauaj, akin amo teyiok kinyolkuejmoloua porin inintalnamikilis* kemej yeskia kinchichinouilijkej ika se tepos. 3 Yejuan tanauatiaj maj amo se monamikti uan maj amo se kimajseua seki takual, sayoj ke Dios kichijchiuak nejin takual para maj akin takuaujtamatij uan kuali kiixmatij tein melauak kitasojkamatilikan keman kikuaskej. 4 Porin nochi tein Dios kichijchiuak semi kuali, uan amo teyi moneki se kiixtopeuas komo se kitasojkamati. 5 Takual mochipaua porin Dios kijtoua ke chipauak, uan porin tiktasojkamatij ika se netataujtil.
6 Keman tikiniluis tokniuan nejin, tiknextis ke kuali tiktekitilia Cristo Jesús, ke okachi timochikaujtiuj ika tajtolmej tein techpaleuiaj maj titakuaujtamatikan iuan Dios uan no itech in kuali tamachtilismej tein tikneltokatiuits. 7 Sayoj ke xikixtopeua tein amo melauak tein kitetapouiaj uan tein kiixnamiki Dios, kemej tein kitetapouiaj nanitajmej. Uan no, ximochikaua* tikueyichiuas Dios ika nochi moyolo. 8 Porin keman tikchikauaj tonakayo techpaleuia itech seki taman. Sayoj ke tikueyichiuaskej Dios ika nochi toyolo, techpaleuia itech nochi porin kuali tinemij axkan uan no kuali tinemiskej satepan. 9 Nejin tein nikijtojtok melauak uan kinamiki maj senkis se kineltoka. 10 Yejua ika semi titekititokej uan timochikaujtokej, porin titakuaujtamatij iuan se Dios akin nochipa yoltok, akin kimakixtia akin yeski, okachiok akin kitekitiliaj uan iuan takuaujtamatij.
11 Xiksentoka xitanauatijto uan xitamachtijto nejin. 12 Maj amo akin mitsixtopeua porin tiokichpilok, ta xikinnextili akin takuaujtamatij iuan Dios maj kichiuakan kemej tejua. Maj kiitakan keniuj titajtoua, keniuj tinemi, keniuj titetasojta, keniuj titakuaujtamati uan keniuj tichipaujkanemi. 13 Xiksentoka ximochikaua kuali titaixtajtoltis* sentaixpan, titayolmajxitis* uan titamachtis hasta keman niajsis. 14 Amo xikaua tatiochiualis tein tikpia uan tein tikselij keman tanauatianij* kijtojkaj tein tikchiuaskia uan keman oloch tayekananij kitalijkej ininmauan motech. 15 Xitanemili itech nejin; nochipa xikchiujtinemi* nejin para maj nochin kiitakan ke okachi titakuaujtamati. 16 Nochipa kuali xikita keniuj tinemi uan keniuj titamachtia. Xiksentoka xikchiua nejin porin ijkon timomakixtis tejua uan no akin mitskakij.