1 Pedro
3 No ijkon namejuan siuamej, ximokauakan maj namechixyekana namotakauj, uan ijkon komo sekin amo kitakamatij itajtol Dios, uelis nankintaneltoktiskej ika tein nankichiuaskej maski amo teyi nankiniluiskej, 2 porin kiitaskej ke nanchipaujkanemij uan nantatakachiuaj* ika nochi namoyolo. 3 Amo xiktayekanaltikan kualtsin namoitaskej, kemej namotsonilpiskej, namotaliliskej oro uan tasal tein semi patiyoj, 4 ta xiktayekanaltikan kualtsin namoitaskej namoyolijtik. Yejua ika, xiyolnejmachmej uan xiyolseujkanemikan uan ika nejon ximokualtsintilikan porin yejua nejon tein Dios okachi kipatiuita uan amo uejueliui. 5 Porin ne uejkauj ijkon mokualtsintiliayaj siuamej akin semi kitekitiliayaj* Dios uan iuan takuaujtamatiaj. Yejuan mokauayaj maj kinixyekanakan inintakauj, 6 ijkon kemej Sara kitakamatia Abrahán uan kiluiaya noteko. Namejuan nanisiuapipiluan, sayoj komo nankisentokaj nankichiuaj tein kuali uan amo teyi nankimouiliaj.
7 No ijkon namejuan takamej, xiksentokakan xinemikan iniuan namosiuauan uan xikinajsikamatikan.* Siuamej okachi amo chikaujkej ke namejuan uan tamatij kemej se tapalkat tein okachi niman uelis tapanis. Yejua ika xikinpatiuitakan, porin Dios no kiyolpaktij kichiuas maj yejuan no nemikan kemej namejuan. Porin komo amo ijkon nankichiuaj, Dios amo namechkakis keman nankitataujtiskej.
8 Okse tamanok, nochin xikpiakan sayoj se tanemilil uan xiteajsikamatikan, ximotasojtakan kemej yeskia naniknimej, ximoyoliknelikan uan xiyolyemankej. 9 Amo ximomakepakan nion xikinuijuikaltikan* akin namechuijuikaltiaj, ta xikinnejnekilikan tein kuali porin Dios namechnotsak para xikchiuakan nejon uan yejua namechtatiochiuis.
10 Porin “akin kineki kuali nemis uan yolpakis, maj motsakuili uan maj amo kijto tein amo kuali nion maj takajkayaua. 11 Maj amo kichiua tein amo kuali uan maj kichiua tein kuali; maj kitemo yolseujkanemis uan maj mochikaua kuali mouikas iniuan oksekin. 12 Porin Jehová* kinualitstok akin yolmelaujkej uan kinkaki keman chikauak motataujtiaj, sayoj ke Jehová* kinixnamiki akin kichiuaj tein amo kuali”.
13 Tein melauj, ¿akoni namechchiuilis tein amo kuali komo nankitelnekij nankichiuaskej tein kuali? 14 Sayoj ke, komo nantajyouiaj porin nankichiuaj tein kuali yetok, nanyolpakij. Maski ijkon, amo xikmouilikan tein yejuan kimouiliaj* nion ximotekipachokan. 15 Ta okachi kuali, itech namoyolo xiktakachiuakan Cristo kemej namoTekotsin. Nochipa xikmatikan keniuj nankinankiliskej akin namechtajtanis* keyej nantakuaujtamatij, sayoj ke keman nankinankiliskej xiyolnejmachmej uan xiktakachiuakan.*
16 Kemej nankitojtokaj Cristo xikchiuakan tein kuali para maj amo teyi namechyolkuejmolo. Ijkon akin namechijijtouaj uan namechijtouiliaj tein amo kuali mopinaujtiskej keman kiitaskej ke namejuan nankichiuaj tein kuali. 17 Porin komo Dios ijkon kineki uan kikaua, okachi kuali maj titajyouikan porin tikchiuaj tein kuali uan amo porin tikchiuaj tein amo kuali. 18 Porin Cristo momikilij sayoj sepa para kiixpolos tajtakol uan amo oksepaok monekis momikilis. Se akin yolmelauak motemakak para kinpaleuis akin amo yolmelaujkej, uan ijkon ueliskia namechpaleuis kuali ximouikakan iuan Dios. Kimiktijkej kemej takat, sayoj ke oksepa nemik kemej akin nemij ne iluikak. 19 Uan ijkon uelik kinnojnotsato amokuali ejekamej tein tsaktokej, 20 tein ne uejkauj amo tatakamatkej keman Noé nemia. Itech nejon tonalmej, Dios amo yolijsiuik keman kichijchiujtoyaj arca kampa sayoj sekin, tein melauj sayoj chikueyin,* momakixtijkej keman tetsaujkakiouik.
21 Uelis tikijtoskej ke tein panok itech nejon tonalmej tamati kemej ijkuak se moauia. Nejon axkan namechmakixtijtok porin nantakuaujtamatij iuan Jesucristo akin oksepa nemik. Se moauis amo kijtosneki se mokixtilis tein pitsotik tein totech yetok, ta se kitajtanis Dios maj amo teyi techyolkuejmolo. 22 Cristo yetok iyekmakopa Dios porin yajki iluikak, uan ángeles uan akin kipiaj tanauatil kitakamatij.