Deuteronomio
33 Yejua nejin tein Moisés, itekitikauj toTajtsin Dios, kintajtanilij israelitas achto ke momikiliskia. 2 Kijtoj:
“Jehová ualeuak desde Sinaí
uan desde Seír kintauilij.
Iueyi chikaualis petanik desde tepemej ompa Parán,
uan iuan yetoyaj tel miakej ángeles, tein nion ueli se kinpoua,*
iyekmakopa yetoyaj isoldados.
3 Yejua kintasojtak akin iuan pouij.
Akin timoinxelouilij yetokej momako.
Yejuan motalijkej moixpan;
peuak kikakij motajtoluan.
4 (Moisés techmakak se tanauatil
tein kipiaj ikoneuan Jacob).
5 Uan Dios mochiuak tekiuaj kampa yetok Jesurún,*
keman taixyekananij mosentilijkej
iniuan nochin israelitas.
6 Maj Rubén amo keman ixpoliui,
uan maj nochipa miakej iokichpipiluan”.
7 Yejua nejin tein kintajtanilij ikoneuan Judá:
“Jehová, xikaki tein mitsiluia Judá
uan xikchiua maj mokepa kampa yetokej iikniuan.
Ika ichikaualis kipaleuiani tein iaxka,
uan tejua xikpaleui keman moteuis iniuan akin kitauelitaj”.
8 Yejua nejin tein kintajtanilij ikoneuan Leví:
“NoDios, Tumim uan Urim iaxka akin amo mitskaua,
akin tikyejyekoj ompa Masá.
Tejua peuak tiknextilia mochikaualis ompa Meribá kampa kisak at,
9 tiknextilij takat akin amo kitekipachoj itatuan.
Kichiuak kemej yeskia amo kinpiaskia iikniuan
uan amo kinchiuak cuenta ikoneuan.
Porin yejua mitstakamatik
uan kichiuak tein timotenkauak iuan.
10 Maj yejuan kinextilikan Jacob tein tikixtalia
uan maj kimachtikan Israel tein titanauatia.
Maj mitstapopochuilikan
uan maj mitsmaktilikan miak taman itech moaltar.
11 Jehová, xikpaleui maj chikauak,
uan maj mitsyolpakti tein kichiuas.
Xikinkesposteki* akin kiixnamikij,
para maj amo moketsakanok akin kitauelitaj”.
12 Yejua nejin tein kintajtanilij ikoneuan Benjamín:
“Maj akin Jehová kitasojta kualtsin nemi iuan;
keman yejua kiyekpias nochin tonal,
yejua nemis iajkolpan”.
13 Yejua nejin tein kintajtanilij ikoneuan José:
“Maj Jehová kitiochiua ital
ika miak taman tein kuali tein kipia iluikak,
ika ajuach uan ika miak at taltampa.
14 Maj kipia nochi tein kuali tein tonaltsin kichikaualtia
uan tein kuali tein mochiua mejmetstika.
15 Maj kipia tein okachi kuali tein mochiua itech tepemej tein uejkaujya yetokej
uan nochi tein kuali tein onkak itech lomas tein amo poliuij.
16 Maj kipia nochi tein kuali tein mochiua itech tal uan nochi tein ompa onkak,
uan akin monextij itech kouit tein uitsyoj maj kitatiochiui.
Maj nochi nejin kipia* José,
akin kijitakej de iikniuan.
17 Chikauak kemej se kuakouej tein yekinika yoli,
icuernos kemej icuernos se koujtajkuakouej.
Ika kinsentopeuas akin nemij itech nochi xolalmej,
hasta kampa okachi uejka.
Nejin cuernos yejua tel miak miles isoldados Efraín,
uan miles isoldados Manasés”.
18 Yejua nejin tein kintajtanilij ikoneuan Zabulón:
“Maj Zabulón yolpaki kampa kisteua
uan maj Isacar yolpaki ikalijtik.
19 Yejuan kinyoleuaskej oksekin maj pankisakan itech tepet.
Tein ompa kimaktiliskej Dios kiyolpaktis.
Porin kikixtiskej tein kuali tein onkak itech mar
uan tein patiyoj tein toktok itech xal”.
20 Yejua nejin tein kintajtanilij ikoneuan Gad:
“Maj kitatiochiuikan akin kiueyiltia ital Gad.
Ompa yejua motochoua kemej se león,
para kimakotonas tein mokitskilij, kemaj, kikixtilis itsontekon.
21 Yejua mokuilis okachi kuali tal,
porin ompa kixelouilij akin kiixtalia tanauatilmej.
Taixyekananij mosentiliskej.
Yejua kichiuas iniuan nochin israelitas
tein Jehová kijtoua ke kuali yetok uan tein kiixtalia”.
22 Yejua nejin tein kintajtanilij ikoneuan Dan:
“Dan se leonkonet.
Pantsikuinis desde Basán”.
23 Yejua nejin tein kintajtanilij ikoneuan Neftalí:
“Neftalí yolpaki porin Jehová kuali kiita
uan yejua kiteltatiochiuijtok.
Xikui in tal tein yetok kampa pankalaki tonaltsin uan tanikopa”.*
24 Yejua nejin tein kintajtanilij ikoneuan Aser:
“Dios kichiuak maj Aser kinpia miakej ikoneuan.
Maj iikniuan kitasojtakan
uan maj mometsajaki itech aceite.
25 Tein ika titatsakua itech mopuertas chijchiujtok de tepos uan cobre,
uan nochipa kualtsin tinemis.
26 Amo akin kemej iDios Jesurún.
Desde iluikak mitspaleuia
uan yajtinemi itech mixti ika iueyi chikaualis.
27 Desde ne uejkaujya ueli se mopaleuia iuan Dios.
Yejua amo keman miki. Nochipa mitspaleuis para maj amo teyi mitspano.
Uan kinkixtis akin mitstauelitaj
uan mitsiluis: ‘¡Xikinixpolo!’.
28 Israel kualtsin nemis,
uan ikoneuan Jacob okseko nemiskej
itech se tal kampa onkas tataman tatok uan vino tein yankuik
kampa uetsis ajuach.
29 ¡Tiyolpaki tejua Israel!