Jonás
2 Keman Jonás yetoya iijtik ueyi pescado* kitataujtij iDios Jehová. 2 Yejua kijtoj:
“Keman semi nitajyouijtoya, nimitstataujtij Jehová uan tejua tinechnankilij.
Keman yaya nimikitia* nimitstsajtsilij xinechpaleui
uan tejua tinechkakik.
3 Keman tinechpantamotak aijtik,
at nechpankalakijtiajki hasta kampa okachi uejkatan.
At tein tikchiuak maj semi moajkotatamota nechuiuikaya.
4 Uan nikijtoj: ‘¡Uejka tinechtitanik!
Amo uelis oksepa nikitas templo kampa timitsueyichiuaj’.
5 At nechtilantiajki uan yaya nimikitia;
nipankalakito hasta kampa okachi uejkatan.
Nimokuaijilpij* ika xiuit tein onkak aijtik.
6 Nipankalakik hasta tatsintan, hasta kampa peuaj tepemej.*
Nikmachilij kemej yeskia nitoktoyaya uan amo keman nikisaskiaok.
Sayoj ke noDios Jehová, kemej yeskia tinechkixtij de miketekoch.
7 Keman yaya nimikitia, nimitselnamikik Jehová.
Uan desde templo kampa tinemi, tikakik nonetataujtil.
8 Akin kinueyichiuaj tatadiosmej* tein amo tapaleuiaj kikauaj Dios akin nochipa kintasojta.
9 Sayoj ke kemej nejua nimotasojkamati, nimitsinmaktilis tapialmej.
Nikchiuas nochi tein nimotenkauak.
Jehová, tejua tinechmakixtia”.
10 Satepan, Jehová kinauatij ueyi pescado* maj kijsota Jonás atenoj.