Romanos
9 Nejua niktojtoka Cristo uan amo nitakajkayaujtok, ta nikijtojtok tein melauak. Amo teyi nechyolkuejmoloua porin nechixyekana ichikaualis Dios. Amo nitakajkayaua keman nikijtoua 2 ke semi nitayokoya uan semi nimoyoltekipachojtok. 3 Porin niknekiskia maj nejua nechtatsakuiltikan uan amo nokniuan judíos, akin amo kitojtokaj Cristo, komo nejon kinpaleuiskia. 4 Yejuan israelitas akin Dios kinselij kemej ikoneuan uan kinueyitalij. Yejuan motenkaujkej ke kitekitiliskiaj, Dios kinmakak iTanauatil Moisés, kinkauak maj kiueyichiuakan uan yejua motenkauak ke kintatiochiuis. 5 Yejuan ininkoneuan touejkaujtatuan uan no ompa ualeuak Cristo. Maj nochipaya kiueyitalikan Dios, akin nochi kiixyekana. Maj ijkon mochiua.*
6 Sayoj ke, amo kijtosneki ke amo mochiujtok tein Dios motenkauak. Porin amo nochin ikoneuan Israel yekmelauj israelitas. 7 Maski yejuan ikoneuan Abrahán, iixpan Dios amo nochin yekmelauj ikoneuan Abrahán, ta ijkon kemej ijkuiliujtok: “Mokoneuan ualaskej itechkopa Isaac”. 8 Nejin kijtosneki ke ikoneuan Abrahán amo yekmelauj ikoneuan Dios, ta akin Dios kinijita* ijkon kemej motenkauak, yejuan nejon akin yekmelauj ikoneuan Abrahán. 9 Porin yejua nejin tein Dios motenkauak: “Okse xiuit, kemej itech nejin tonalmej niualas uan Sara kipias se okichpiltsin”. 10 No ijkon mochiuak keman Rebeca kinpiak ome okichpipil iuan touejkaujtat Isaac. 11 Keman yejuan ayamo yoliaj nion kichiujtoyaj tein kuali oso tein amo kuali, Dios achto kijtojkaya akoni kijitaskia. Porin Dios kijita akin kineki, uan amo kijita aksa* ika tein kichiua. 12 Yejua ika, kiluijkej Rebeca: “Akin tayekana kitekitilis akin xokoyot”. 13 Ijkon kemej ijkuiliujtok: “Niktasojtak Jacob, sayoj ke niktauelitak Esaú”.
14 Komo ijkon, ¿toni tikijtoskej? ¿Dios kichiua tein amo kuali yetok? ¡Amo! 15 Porin Dios kiluia Moisés: “Niktasojtas akin nejua niknekis niktasojtas, uan nikiknelis akin nejua niknekis nikiknelis”. 16 Yejua ika, Dios amo kijita* akin semi kineki maj kijitakan oso porin semi mochikaua,* ta porin Dios teiknelia. 17 Porin itech Tajkuilolamatsin, Dios kiluij akin tekiuajtia Egipto: “Nimitskaujtok xiyolto porin ijkon motech niknextis nochikaualis uan moteixmatiltis notokay itech nochi taltikpak”. 18 Yejua ika Dios kiiknelia akin yejua kineki, sayoj ke akin yejua kineki, kikaua maj yoltakuauaya.
19 Sayoj ke, tejua tinechiluis: “¿Keyej semi ouij se kiyolpaktis Dios? ¿Akoni uelis kiixnamikis tein Dios kiixtalijya?”. 20 Sayoj ke, ¿toni tichiujkej tejua para tiknajnankilis Dios? ¿Xe tapalkat tein kichijchiujkej uelis kiluis akin kichijchiuak “¿Keyej ijkuin tinechchijchiuak?”? 21 ¿Xe sokikonchiujkej amo kinamiki kichijchiuas se kualtsin tapalkat, uan ika nejon sokit no kichijchiuas se tapalkat tein mokuis mojmostaj? 22 Dios no ijkon kichiua. Yejua kiixtalij kinnextilis iueyi kualanyo akin amo yolkualmej uan kichiuas maj moixmati ichikaualis. Yejua no kinxikoj uan amo yolijsiuik iniuan akin kinnamikia maj kintatsakuilti uan katkaj kemej tapalkamej tein moneki kinixpoloskej. 23 Yejua kichiuak nejin para kinnextilis akin kinikneliskia ke semi moueyitalijtok. Yejuan katkaj kemej tapalkamej tein achtoya kiixtalij kinueyitalis. 24 Dios amo technotsak sayoj tejuan akin tijudíos, ta no kinnotsak akin amo judíos. 25 Mochiujtok kemej yejua kijtoj itech amatajkuilol Oseas: “Nikinnotsas kemej noxolal akin amo pouij itech noxolal, uan siuat akin amo niktasojtaya niknotsas ‘notasojtsin’. 26 Uan kampa nikiniluij ‘Namejuan amo nanpouij itech noxolal’, ompa no nikiniluis: ‘Nejua niDios akin nochipa yoltok uan namejuan nannokoneuan’”.
27 Yejua nejin tein Isaías chikauak kijtoj keman ika tajtoj Israel: “Maski israelitas yeskij tel miakej kemej xal tein onkak ueyiat, sayoj sekin momakixtiskej. 28 Porin Jehová* kichiuas tein kiixtalijtok nikan taltikpak, uan ijsiujka kitamichiuas”. 29 Uan kemej Isaías no kijtoj: “Komo Jehová,* akin kinixyekana iangeluan ne iluikak, amo kinkauaskia maj makisakan sekin, techpanoskia kemej kipanok Sodoma uan Gomorra”.
30 Komo ijkon, ¿toni tikijtoskej? Ke akin amo judíos takuaujtamatkej uan Dios kinitak ke yolmelaujkej, maski yejuan amo kitemojtoyaj maj kinitakan ke yolmelaujkej. 31 Sayoj ke maski israelitas kitemojtoyaj maj kinitakan ke yolmelaujkej keman kitakamatiskiaj tanauatil, amo uelik kitakamatkej. 32 ¿Keyej? Porin yejuan kinemilijkej ke tein kichiuaskiaj kinpaleuiskia maj kinitakan ke yolmelaujkej, uan amo porin takuaujtamatiskiaj. Ika mometstelojkej* “tet tein teuetsiltia”; 33 kemej ijkuiliujtok: “¡Xikitakan! Ompa Sion niktalia se tet tein kichiua maj uetsikan, uan se ueyi tet tein kintsakuilia ininojpan, sayoj ke akin itech takuaujtamatis amo mopinaujtis”.