ÉXODO

1 Keman Jacob, akin no monotsaya Israel, yajki Egipto, sejse ikoneuj kinuikak ichankauan. Yejuan nejin ikoneuan Jacob: 2 Rubén, Simeón, Leví uan Judá; 3 Isacar, Zabulón uan Benjamín; 4 Dan, Neftalí, Gad uan Aser. 5 Nochin ichankauan Jacob katkaj 70. Uan José yetoyaya Egipto. 6 Satepan José momikilij uan no momikilijkej nochin iikniuan uan nochin akin nemiaj itech nejon tonalmej. 7 Israelitas kinpiakej miakej ininkoneuan uan peuak tel ijsiujka momiakiliaj. Kemej tel miakej katkaj sentakuikej itech nejon tal, yejua ika akin nemiaj Egipto peuak kintelmouiliaj.

8 Satepan, okse tekiuaj akin amo kiixmatia José peuak taixyekana Egipto. 9 Uan kiniluij akin ompa kayomej: “¡Xikitakan! Israelitas okachi miakej uan okachi chikaujkej ke tejuan. 10 Maj kuali tiknemilikan toni tikinchiuiliskej para maj amo momiakilikanok. Porin komo akin techtauelitaj techteuikij, iniuan mokuiskej, no techteuiskej uan yaskej”.

11 Yejua ika kinixtalijkej seki takamej akin kinixyekanayaj takeualmej para maj kinteltekitiltianij. Uan kinchijchiualtijkej uejueyi xolalmej Pitom uan Raamsés, kampa tekiuaj kisentiliaya tatok uan okseki taman tein iaxka. 12 Sayoj ke, ijkon kemej okachi kintajyouiltiayaj okachi momiakiliayaj uan sentakuiaj itech nejon tal. Yejua ika akin katkaj de Egipto kintelmouiliayaj israelitas. 13 Yejua ika kinteltekitiltiayaj uan kintajyouiltiayaj. 14 Fiero kinchiujkej porin kinteltekitiltiayaj. Kinchiualtiayaj maj kimanelokan sokit uan maj kichijchiuakan tabiques, uan kinchiualtiayaj nochi tataman tekit kampa tatokayaj. Fiero kintajyouiltijkej uan kinchiualtijkej miak taman tekit.

15 Satepan, tekiuaj akin taixyekanaya Egipto iniuan tajtoj ome parteras. Yejuan monotsayaj Sifrá uan Pua uan kinixmatiaj kemej hebreas.* 16 Yejua kiniluij: “Keman nankinpaleuiskej siuamej hebreas maj tayolitikan, xikchiuakan nejin: komo kipiaj se okichpil xikmiktikan, sayoj ke komo siuapil amo xikmiktikan”. 17 Sayoj ke Sifrá uan Pua kimojkatokayaj toTajtsin Dios. Yejua ika amo kichiujkej tein tekiuaj kinnauatijka uan amo kinmiktiayaj okichpipiltsitsin. 18 Satepan, tekiuaj kinnotsak uan kiniluij: “¿Keyej amo nankinmiktijtokej okichpipil?”. 19 Yejuan kinankilijkej: “Siuamej hebreas amo kemej siuamej de Egipto. Yejuan chikaujkej uan achto ke tiajsiskej, ipa tayolitijkejya”.

20 Yejua ika Dios kintatiochiuij Sifrá uan Pua, uan israelitas kisentokakej momiakilijkej uan akin nemiaj Egipto kintelmouiliayaj. 21 Satepan, kemej Sifrá uan Pua kimojkatokakej toTajtsin Dios, yejua kichiuak maj kinpiakan konemej. 22 Tekiuaj kinnauatij nochin akin katkaj de Egipto: “Xikinnaltamotatij itech ueyiat Nilo nochin okichpipil hebreos tein yekin yolkej, sayoj siuapipil amo xikinmiktikan”.

2 Itech nejon tonalmej, se takat akin katka ichankauj Leví monamiktij iuan se siuatsin akin no katka ichankauj Leví. 2 Siuatsin mokokoxkatalij uan kipiak se okichpiltsin. Kemej kiitak ke tel kuakualtsin katka, kitatij* eyi metsti. 3 Keman amo uelik kitatijok, kikuik se chikiuit, kitalilij chapopote,* ompa kikalakij okichpiltsin uan kitalij tatenoj den ueyiat Nilo, kampa onkaya miak akat. 4 Sayoj ke se siuapil akin katka iikniuj okichpiltsin kiuejkaitstoya.

5 Uan iichpoch tekiuaj akin taixyekanaya Egipto maltito* itech ueyiat Nilo. Keman siuamej akin kitekitiliayaj nenentoyaj tatenoj den ueyiat, yejua kiitak chikiuit tein yetoya akatsalan, uan nimantsin kinauatij se itakeual maj kiualkuili. 6 Keman kitapoj chikiuit, kiitak ke ompa yetoya nejon pilitsin uan chokatoya. Yejua kiiknelij uan kijtoj: “Nejin konetsin hebreo”.* 7 Uan iikniuj okichpiltsin kitajtanij* iichpoch tekiuaj: “¿Tikneki maj niktemoti se siuatsin hebrea para maj mitschichitili nejin pilitsin?”. 8 Uan ichpoch kinankilij: “¡Kemaj, xiktemoti!”. Uan siuapil nimantsin kitemoto imomaj okichpiltsin. 9 Iichpoch tekiuaj kiluij nejon siuatsin: “Xikuika nejin okichpiltsin uan xinechchichitili uan nimitstaxtauis”. Uan siuatsin kiuikak uan kichichitij. 10 Keman okichpiltsin moskaltij, siuatsin kimakato iichpoch tekiuaj uan yejua kiiskaltij kemej iokichpil. Uan kitokaytij Moisés* porin kijtoj ke kikixtijka den at.

11 Satepan, keman Moisés ueyiya katka, kinitato iikniuan akin kinteltekitiltiayaj, uan kiitak ke se takat de Egipto kimagatoya* se hebreo. 12 Yejua ika sentatachiak, uan kemej amo akin kiitak, kimiktij takat de Egipto uan kixalpachoj.

13 Mostika, oksepa kinitato iikniuan uan kiitak ke ome hebreos moteuijtoyaj. Yejua ika kiluij akin tapeualtijka: “¿Keyej tikteuijtok mokniuj?”. 14 Yejua kinankilij: “¿Akoni mitsixtalij kemej totaixyekankauj uan tojuez? ¿Tiknemilia tinechmiktis kemej tikmiktij takat akin nikan kayot?”. Uan Moisés momoujtij uan kinemilij: “¡Kimatkejya tein nikchiuak!”.

15 Keman tekiuaj kimatik, kimiktisnekik Moisés. Sayoj ke yejua choloj uan nemito Madián. Keman ompa ajsik, motalito kampa atakuiaj. 16 Akin katka tiopixkat ompa Madián kinpiaya chikome isiuapipiluan. Uan yejuan kikixtitoj at uan kipexontijkej* kampa atayiaj itapialuan inintat. 17 Sayoj ke seki takamej akin kinyekpiayaj ichkamej* ajsikej ompa uan kineualtijkej. Nejon takamej ipa ijkon kichiuayaj. Keman Moisés kiitak nejon, moketsak uan kinpaleuito nejon siuamej uan kinatiltij tapialmej. 18 Inintat nejon siuamej katka Reuel.* Keman yejuan ajsikej ichan, yejua kiniluij: “¡Tel niman nanejkokej!”. 19 Yejuan kiluijkej: “Se takat de Egipto techpaleuij keman ichkatajpianij techkuejmolojtoyaj. Hasta techkixtilij at uan kinatiltij tapialmej”. 20 Uan Reuel kiniluij isiuapipiluan: “¿Uan kani yetok? ¿Keyej nankiualkaujteujkej? Xiknotsatij para maj takuaki touan”. 21 Satepan, Moisés kijtoj ke kemaj mokauaskia ichan Reuel, uan yejua kimakak isiuapil, Ziporá, para maj iuan monamikti. 22 Satepan, Ziporá kipiak se okichpil, uan Moisés kitokaytij Guersom,* porin kijtoj: “Ninemi itech nejin tal kampa amo nikayot”.

23 Panokej miak tonalmej uan tekiuaj akin taixyekanaya Egipto momikilij. Sayoj ke israelitas kisentokayaj moyolkokojtoyaj porin kinteltekitiltiayaj. Uan kitsajtsiliayaj toTajtsin Dios maj kinpaleui. 24 Satepan, Dios kikakik keniuj tayokolchokayaj uan kielnamikik* tein motenkaujka iniuan Abrahán, Isaac uan Jacob. 25 Yejua ika, Dios kiitak keniuj israelitas tajyouijtoyaj uan kiniknelij.

3 Moisés kinyekpiaya iichkauan* imontat, Jetró, akin katka tiopixkat ompa Madián. Se tonal, keman kinnemiltijtoya ichkamej tanakastankopa den taluakyan, ajsik hasta Horeb. Horeb katka tepet tein Dios kijitak.* 2 Uan iángel Jehová monextij iixpan itech se tit* tein kisaya de se kouit tein uitsyoj. Keman Moisés kiyekitak, kiitak ke nejon kouit xotatoya sayoj ke amo tataya. 3 Yejua ika Moisés kijtoj: “¡Amo keman nikitstoya teisa ijkon! Nimotokiti para nikyekitas keyej ne kouit amo tata”. 4 Keman Jehová kiitak ke Moisés motokijtoya, kinotsak desde kouit tein uitsyoj uan kiluij: “¡Moisés! ¡Moisés!”. Uan yejua kinankilij: “Nikan nietok”. 5 Dios kiluij: “Amo ximotokiok. Ximokixtili motekakuan porin tiijkatok itech tal tein nimoxelouilij”.

6 Uan no kiluij: “Nejua niiDios mopaj, niiDios Abrahán, Isaac uan Jacob”. Uan Moisés moixtsakuak porin kimouiliaya kiitas toTajtsin Dios. 7 Jehová no kiluij: “Nikitani keniuj tel tajyouiaj nokoneuan israelitas ompa Egipto. Uan nikakini keniuj motsajtsiliaj porin fiero kinchiuaj. Kuali nikmati tein kijyouijtokej. 8 Yejua ika nitemoti para nikinmakixtis uan para nikinkixtis de nejon tal. Nikinuikati itech se kuali tal, kampa taueyika uan moteltachiua.* Ompa nemij akin kinixmatij kemej cananeos, hititas, amorreos, perizitas, heveos uan jebuseos. 9 Xikita, nikakini keniuj tayokoltsajtsij israelitas. No nikitani keniuj tel tajyouiaj porin ompa Egipto kinteltekitiltiaj. 10 Yejua ika nimitstitaniti xikitati tekiuaj akin taixyekana Egipto. Tejua tikinkixtis nokoneuan israelitas de ompa”.

11 Sayoj ke Moisés kiluij toTajtsin Dios: “Nejua amo teyi nichiujkej. Yejua ika amo uelis nias nikitatiuj tekiuaj uan nikinkixtis israelitas de Egipto”. 12 Uan yejua kinankilij: “Nejua nimitspaleuis. Uan para tikyekmatis ke nejua nimitstitantok, nimitsyekiluia nejin: keman tikinkixtis israelitas de Egipto, nochin namejuan nanualaskej itech nejin tepet uan nanechueyichiuaskej, nejua akin yekmelauj niDios”.

13 Sayoj ke Moisés kiluij toTajtsin Dios: “Maj tikijtokan ke nikinitati israelitas uan nikiniluia: ‘IninDios namouejkaujtatuan nechualtitanik maj namechitaki’. Komo yejuan nechtajtaniaj* keniuj timonotsa, ¿toni maj nikinilui?”. 14 Yejua ika Dios kinankilij Moisés: “Nejua nimochiuas tein niknekis* nimochiuas”.* Uan no kiluij: “Yejua nejin tein moneki tikiniluis israelitas: ‘Akin monotsa “Nejua nimochiuas” nechualtitanik maj namechitaki’”. 15 Dios oksepa kiluij Moisés:

“Yejua nejin tein moneki tikiniluis israelitas: ‘Jehová, ininDios namouejkaujtatuan, Abrahán, Isaac uan Jacob nechualtitanik maj namechitaki’. Ijkon nimonotsas nochipaya, uan ijkon nechixmatiskej* nochin akin yoltiaskej. 16 Uan axkan xiouj, xikinsentili taixyekananij israelitas uan xikinilui: ‘Jehová, ininDios namouejkaujtatuan, Abrahán, Isaac uan Jacob monextij noixpan uan kijtoj: “Xikyekmatikan ke nejua namechitani uan nikitani tein namechchiuilijtokej ompa Egipto. 17 Yejua ika, namechyekiluia ke namechmakixtiti para maj amo namechtajyouiltikanok. Namechuikas itech tal kampa nemij cananeos, hititas, amorreos, perizitas, heveos uan jebuseos, kampa moteltachiua”ʼ.*

18 ”Yejuan mitskakiskej. Uan tejua uan taixyekananij israelitas nankiitatiuij tekiuaj akin taixyekana Egipto uan moneki nankiluiskej: ‘Jehová, Dios akin tikueyichiuaj tejuan tihebreos,* touan tajtoj. Yejua ika, timitstataujtiaj xitechkaua maj tiakan eyi tonal ne taluakyan para tikmaktiliskej toDios Jehová seki tapialmej’. 19 Sayoj ke nejua nikyekmattok ke tekiuaj sayoj namechkauas xiakan komo se kichikaujkauia. 20 Yejua ika, ika nochikaualis nikchiuas uejueyi taman ompa Egipto uan ijkon nikintatsakuiltis akin ompa nemij. Satepan, tekiuaj namechkauas xiakan. 21 No nikchiuas maj akin nemij Egipto kuali namechitakan. Uan keman nanyaskej, nankiuikaskej miak taman. 22 Sejse siuatsin moneki kitajtanis ivecina uan siuatsin akin nemis ichan miak taman tachijchiuj ika plata, oro uan no tasal.* Uan nejon nankintaliliskej namookichpipiluan uan namosiuapipiluan. Namejuan nankinkuilijteuaskej nochi tein kipiaj akin nemij Egipto”.

4 Sayoj ke Moisés kinankilij Dios: “¿Uan toni nikchiua komo amo nechneltokiliaj nion nechkakij? Porin kijtoskej ‘Jehová amo monextij moixpan’”. 2 Uan Jehová kitajtanij:* “¿Toni tikitskijtok?”. Moisés kinankilij: “Se topil”. 3 Dios kiluij: “Xiktamota talpan”. Uan keman kitamotak, in topil mokepak se kouat. Uan Moisés moajchiujtiuetsik. 4 Uan Jehová kiluij: “Xikuitapilkitski”. Yejua ika, Moisés kikitskij uan kouat mokepak se topil. 5 Uan Dios kiluij: “Ijkon yejuan kimatiskej ke Jehová, ininDios ininuejkaujtatuan, Abrahán, Isaac uan Jacob monextij moixpan”.

6 Uan Jehová no kiluij: “¿Uelis timomakalakis itech bolsa tein kipia motasal?”.* Uan Moisés momakalakij itech itasal uan keman momakixtij, imay kipiaya se pitsotik kokolis* tein monotsa lepra. ¡Mapochiktiak! 7 Satepan Dios kiluij: “Oksepa ximomakalaki itech motasal”. Uan Moisés oksepa momakalakij uan keman momakixtij mapajtikaya. 8 Dios kiluij: “Komo amo mitsneltokiliaj uan amo kichiuaj cuenta yekinika milagro, kichiuaskej cuenta okse milagro. 9 Komo tikchiuakya nejin ome milagros uan kisentokaj amo mitskakij, xikixti tepitsin at den ueyiat Nilo uan xiktoyaua talpan. Nejon at tein tiktoyauas mokepas esti”.

10 Uan Moisés kiluij Jehová: “Jehová, maj nimitsilui teisa. Nejua ipa amo keman niyektajtouani, nion achto nion desde keman peuak nouan titajtoua. Yolik nitajtoua uan nimotentsajtsakuilia”. 11 Jehová kitajtanij: “¿Akoni kichijchiuilij itenoj in takat? ¿Akoni ueli kichiua maj aksa* amo ueli tajto oso maj amo ueli takaki? ¿Akoni ueli kichiua maj aksa tachia oso maj amo tachia? Sayoj nejua Jehová ueli nikchiua nejon. 12 Uan axkan xiouj. Nejua nimitspaleuis keman titajtos uan nimitsiluis* tein moneki tikijtos”. 13 Sayoj ke Moisés kinankilij: “Jehová, nimitstataujtia xiktitani okse, akin tejua tiknekis”. 14 Uan Jehová semi kualanik iuan Moisés uan kiluij: “Mokniuj Aarón* kuali tajtoua. Ualajtokya mitsnamikiki uan semi yolpakis keman mitsitas. 15 Xiktapoui nochi tein nimitsiluij uan xikilui tein moneki kijtos. Nejua namechpaleuis keman nantajtoskej uan namechiluis tein moneki nankichiuaskej. 16 Tejua tikiluis Aarón tein nejua nikijtos* uan yejua kiniluis oksekin tein tejua tikiniluiskia. 17 Uan no, tikuikas nejin topil tein ika tikchiuas milagros”.

18 Yejua ika Moisés mokepak kampa yetoya imontat akin monotsaya Jetró, uan kiluij: “Nikneki nimokepas Egipto para nikitas ox nemijok nokniuan”. Uan Jetró kiluij Moisés: “Kuali yetok, kualtsin xiouj”. 19 Satepan, Jehová kiluij Moisés ompa Madián: “Ximokepa Egipto porin momikilijkejya nochin akin kinekiaj mitsmiktiskej”.

20 Uan Moisés kitejkoltij isiuatsin uan iokichpipiluan itech se burro, uan peuak mokepa Egipto. No kiuikaya topil tein toTajtsin Dios kiluijka maj kiuika. 21 Uan Jehová kiluij Moisés: “Keman oksepa tietos Egipto, ika chikaualis tein nimitsmakak xikchiua milagros iixpan tekiuaj akin ompa taixyekana. Sayoj ke nikauas maj tekiuaj amo takaki uan amo kinkauas israelitas maj yakan. 22 Xikilui tekiuaj: ‘Yejua nejin tein kijtoua Jehová: “Nochin israelitas kemej yeskia se nookichpil, akin tayekana. 23 Yejua ika nimitsiluia: xikaua maj nookichpil kisa de nikan para maj nechueyichiua. Sayoj ke komo amo tikaua maj youi, nikmiktiti mookichpil akin tayekana”’”.

24 Uan keman nejnentoyaj para ajsiskej kampa yaya mokauatij nejon youak, Jehová iuan monamikik uan kimiktisnekia. 25 Satepan Ziporá kikuik se tet tein tenej uan kitekik* iokichpil. Uan kichiuak maj inakayotsin tein kitekilijka uetsini imetsko uan kijtoj: “Nejin esti kinextia ke tinotakatsin”. 26 Uan Dios kikauak maj youi. Uan kemej kitekik* ikonetsin, Ziporá kijtoj “nejin esti kinextia ke tinotakatsin”.

27 Uan Jehová kiluij Aarón: “Xiknamikiti Moisés taluakyan”. Yejua ika, Aarón yajki uan kiajsito Moisés itech tepet tein Dios kijitak,* kitajpaloj uan kimakak se beso.* 28 Uan Moisés kitapouij Aarón nochi tein Jehová kiluijka. No kitapouij nochi milagros tein kinauatij maj kichiuani. 29 Satepan, Moisés uan Aarón mosentilitoj iniuan taixyekananij israelitas. 30 Aarón kintapouij nochi tein Jehová kiluijka Moisés uan yejua kichiuak milagros ininixpan nochin. 31 Yejua ika kineltokilijkej. Uan keman israelitas kimatkej ke Jehová kinekia kinpaleuis uan ke kiitaka keniuj tajyouijtoyaj, motankuaketskej uan moixpilojkej hasta talpan.

5 Satepan, Moisés uan Aarón kiitatoj tekiuaj akin taixyekanaya Egipto uan kiluijkej: “Yejua nejin tein kijtoua Jehová, ininDios israelitas: ‘Xikinkaua nokoneuan israelitas maj kisakan de nikan, para maj nechiluichiuitij ne taluakyan’”. 2 Sayoj ke tekiuaj kinnankilij: “¿Toni chiujkej nejon Jehová para maj niktakamati uan maj nikinkaua israelitas maj kisakan? Amo nikixmati Jehová uan nion nikinkauas maj kisakan”. 3 Uan yejuan kiluijkej: “Dios akin tikueyichiuaj tejuan tihebreos* touan tajtoj. Timitstataujtiaj xitechkaua maj tiakan eyi tonal ne taluakyan, para tikmaktiliskej toDios Jehová seki tapialmej. Komo amo, kichiuas maj tikokolispeuakan* oso maj techmiktikan akin techtauelitaj”. 4 Sayoj ke tekiuaj kinnankilij Moisés uan Aarón: “¿Keyej nankinekij maj israelitas amo tekitikanok? ¡Xiakan xitekititij!”. 5 Uan no kiniluij: “Xikitakan, tel miakej tekititokej. Uan namejuan nankinekij nankintsakuiliskej”.

6 Nejon tonal, tekiuaj kinnauatij akin kinixyekanayaj takeualmej uan akin kinpaleuiayaj: 7 “Amo xikinmakakanok sakat tein uakik para kichijchiuaskej tabiques. Maj yejuan mokuilitij. 8 Uan moneki nankinchijchiualtiskej tabiques tein ipa kichijchiuayaj. Maj amo poliui nion se tabique. Yejuan seki tatsiuinij uan yejua ika kijtojtinemij: ‘¡Tiasnekij! ¡Tiknekij tikmaktiliskej toDios seki tapialmej!’. 9 Okachiok xikintekitiltikan uan xikyekitakan maj yekmelauj tekitikan, para amo horajtiskej kikaktoskej tein amo melauj”.

10 Yejua ika akin kinixyekanayaj takeualmej uan akin kinpaleuiayaj kiniluitoj israelitas: “Yejua nejin tein kijtoj tekiuaj: ‘Amo namechmakasok sakat. 11 Namejuan ximotemolitij, uan xikchijchiuakan tabiques tein ipa nankichijchiuaj’”. 12 Yejua ika israelitas kitemotoj sakat itech nochi Egipto. 13 Uan akin kinixyekanayaj takeualmej kinijsiuiltiayaj uan kiniluiayaj: “Nanochin moneki nankitamichijchiuaskej tabiques tein ipa nankichijchiuayaj sejse tonal, kemej ijkuak namechmakayaj sakat”. 14 Uan no, kinmagakej* seki israelitas akin kinixyekanayaj takeualmej. Nejin israelitas kinixtalijkaj para maj kinitakan okseki israelitas. Uan kintajtanijkej:* “¿Keyej amo nankichijchiujkej nion yalua nion axkan tabiques tein ipa nankichijchiuayaj?”.

15 Uan israelitas akin kinixyekanayaj okseki israelitas kiluitoj tekiuaj: “¿Keyej ijkon titechchiua? 16 Amo techmakajok sakat, sayoj ke kisentokaj techiluiaj: ‘¡Xikchijchiuakan tabiques!’. Uan amo sayoj nejon, ta no techmagaj* maski inintajtakol motakeualuan”. 17 Sayoj ke yejua kinnankilij: “¡Nantatsiuinij! ¡Sayoj nantatsiujkayetokej! Yejua ika nankijtouaj: ‘Tiasnekij. Tiknekij tikmaktiliskej Jehová seki tapialmej’. 18 ¡Xiakan xitekititij! Amo namechmakaskej sakat, uan moneki nankichijchiuaskej tabiques tein ipa nankichijchiuayaj”.

19 Yejua ika israelitas akin kinixyekanayaj okseki israelitas semi motekipachojkej, porin kinnauatijkaj ke monekia kichijchiuaskej tabiques tein ipa kichijchiuayaj sejse tonal. 20 Keman yejuan kiskej, iniuan moitakej Moisés uan Aarón, akin kinchixtoyaj.* 21 Nimantsin kiniluijkej Moisés uan Aarón: “Maj Jehová kiita tein nankichiujkej uan maj namechtatsakuilti, porin nankichiujkej maj tekiuaj uan itakeualuan techtauelitakan,* uan kemej yeskia nankimaakijkej se machete tein ojkan tenej* para maj techmiktikan”. 22 Uan Moisés kiluij Jehová: “Jehová, ¿keyej tikintajyouiltia israelitas? ¿Keyej tinechualtitanik nikan? 23 Desde ke nikitako tekiuaj para nikiluis tein tinechnauatij, yejua okachi fiero kinchiuani israelitas uan tejua amo tikinmakixtijtok”.

6 Yejua ika Jehová kinankilij Moisés: “Axkan tikitati tein nikchiuiliti tekiuaj akin taixyekana Egipto. Ika nochikaualis nikchiuas maj namechkaua xikisakan, uan keman kiitas nochikaualis namechkixtis de kampa taixyekana maski amo kinekis”.

2 Uan Dios kiluij Moisés: “Nejua niJehová. 3 Nejua miakpa nikinnextilij Abrahán, Isaac uan Jacob ke nejua niDios akin nikpia nochi chikaualis, sayoj ke notokay Jehová amo senkis nikinixmatiltij. 4 No nimotenkauak iniuan ke nikinmakaskia tal tein poui Canaán, kampa nenkej maski amo ompa kayomej. 5 Nejua nikakini keniuj israelitas tayokolchokaj. Akin nemij Egipto semi kintajyouiltiaj. Uan amo nikelkaujtok tein nimotenkauak iniuan ininuejkaujtatuan.

6 ”Yejua ika xikinilui israelitas: ‘Nejua niJehová, uan nikchiuas maj amo namechteltekitiltikanok nion maj namechtajyouiltikanok. Ika nochikaualis namechmakixtis uan nikintatsakuiltis akin nemij Egipto. 7 Uan nanyeskij nannoaxkauan uan niyeski namoDios. Namejuan nankiyekmatiskej ke nejua niJehová namoDios, akin kichiuas maj amo namechtajyouiltikanok. 8 Namechuikas hasta itech tal tein nimotenkauak nikinmakas Abrahán, Isaac uan Jacob, uan namechmakas namejuan. Nejua niJehováʼ”.

9 Satepan, Moisés kinmatiltij israelitas nejin, sayoj ke amo kikakkej porin tayokoxtoyaj uan semi kintajyouiltijtoyaj.

10 Uan Jehová kiluij Moisés: 11 “Xikiluiti tekiuaj akin taixyekana Egipto maj kinkaua maj kisakan israelitas”. 12 Sayoj ke Moisés kinankilij Jehová: “Sayoj ke israelitas amo nechkakij. Uan kemej amo niyektajtoua, tekiuaj ipa amo no nechkakis”. 13 Maski ijkon, Jehová oksepa kiniluij Moisés uan Aarón tein monekia kiniluiskej israelitas uan tekiuaj, para kinkixtiskej de Egipto.

14 Yejuan nejin takamej akin kinixyekanayaj ininchankauan. Ikoneuan Rubén katkaj Hanok, Palú, Hezrón uan Carmí. Yejuan nejin ichankauan Rubén, iokichpil Israel akin tayekanaya.

15 Ikoneuan Simeón katkaj Jemuel, Jamín, Ohad, Jakín, Zóhar uan Shaúl. Shaúl katka iokichpil se siuat de Canaán. Yejuan nejin ichankauan Simeón.

16 Yejua nejin inintokay ikoneuan Leví, uan ininfamilias: Guersón, Cohat uan Merarí. Leví nemik 137 xiujmej.

17 Ikoneuan Guersón uan inintokay ininfamilias katkaj Libní uan Simeí.

18 Ikoneuan Cohat katkaj Amram, Izhar, Hebrón uan Uziel. Cohat nemik 133 xiujmej.

19 Ikoneuan Merarí katkaj Mahlí uan Musí.

Yejuan nejin katkaj ichankauan Leví uan ininkoneuan.

20 Uan Amram monamiktij iuan Jokébed, akin katka ipariente itat. Satepan Jokébed kipiak Aarón uan Moisés. Amram nemik 137 xiujmej.

21 Ikoneuan Izhar katkaj Coré, Néfeg uan Zicrí.

22 Ikoneuan Uziel katkaj Misael, Elzafán uan Sitrí.

23 Uan Aarón monamiktij iuan Eliseba. Eliseba katka isiuapil Aminadab uan iikniuj Nahsón. Satepan, Eliseba kinpiak Nadab, Abihú, Eleazar uan Itamar.

24 Ikoneuan Coré katkaj Asir, Elcaná uan Abiasaf. Yejuan nejin katkaj ichankauan Coré.

25 Uan Eleazar, iokichpil Aarón monamiktij iuan semej isiuapipiluan Putiel. Satepan kipiak se iokichpil akin monotsaya Finehás.

Yejuan nejin takamej akin kinixyekanayaj ichankauan Leví, xejxeliujtokej por familias.

26 Jehová kiniluij Aarón uan Moisés: “Xikinkixtikan israelitas de Egipto uan maj kualtsin xejxeliujtiakan”. 27 Yejuan nejin Moisés uan Aarón akin kinojnotsatoj tekiuaj akin taixyekanaya Egipto para kinkixtiskej israelitas de ompa.

28 Keman Jehová kinojnotsak Moisés ompa Egipto, 29 Jehová kiluij: “Nejua niJehová. Xikilui tekiuaj akin taixyekana Egipto nochi tein nimitsiluijtok”. 30 Uan Moisés kiluij Jehová: “Sayoj ke, kemej amo ueli niyektajtoua, tekiuaj ipa amo nechkakis”.

7 Yejua ika Jehová kiluij Moisés: “Xikita, nimitsmakatok tanauatil kemej tein nejua nikpia para xikitati tekiuaj akin taixyekana Egipto. Uan mokniuj Aarón kijtos tein tejua tikijtoskia. 2 Tejua tikiluis mokniuj Aarón nochi tein nimitsnauatis, uan yejua tajtos iuan tekiuaj. Uan tekiuaj kinkauas israelitas maj kisakan de nejin tal. 3 Nejua nikauas maj tekiuaj amo takaki uan nikchiuas miak taman tein amo keman mochiuani itech nochi Egipto. 4 Sayoj ke tekiuaj amo namechkakis. Yejua ika nikinnextilis nochikaualis uan nikinteltatsakuiltis akin nemij Egipto, para nikinkixtis de ompa nokoneuan israelitas, akin tel miakej. 5 Uan akin ompa nemij kiyekmatiskej ke nejua niJehová keman nikinnextilis nochikaualis uan nikinkixtis israelitas de ompa”. 6 Moisés uan Aarón kichiujkej tein Jehová kinnauatijka. Kichiujkej ijkon kemej kiniluijka. 7 Keman kinojnotsatoj tekiuaj, Moisés kipiaya 80 xiujmej uan Aarón kipiaya 83.

8 Uan Jehová kiniluij Moisés uan Aarón: 9 “Komo tekiuaj namechiluia ‘Xikchiuakan se milagro’, tejua tikiluis Aarón ‘Xikui motopil uan xiktamota iixpan tekiuaj’. Uan topil mokepas se ueyi kouat”. 10 Uan Moisés uan Aarón kiitatoj tekiuaj uan kichiujkej ijkon kemej Jehová kinnauatijka. Uan Aarón kitamotak itopil iixpan tekiuaj uan ininixpan itakeualuan, uan in topil mokepak se ueyi kouat. 11 Sayoj ke tekiuaj kinnotsak tamatinij uan naualmej, uan tiopixkanaualmej de Egipto no kichiujkej* tein Aarón kichiuak. 12 Sejse kitamotak talpan itopil uan nochin mokepkej uejueyi kouamej. Sayoj ke, itopil Aarón kintoloj okseki kouamej. 13 Maski ijkon, tekiuaj amo kinekik kinkakis Moisés uan Aarón, ijkon kemej Jehová kijtojka.

14 Uan Jehová kiluij Moisés: “Tekiuaj amo kineki kinkauas israelitas maj kisakan. Tel yoltakuauak. 15 Mosta kualkan xikitati tekiuaj. Yejua yati ueyiat Nilo, yejua ika xikchiati atenoj kampa uelis iuan timonamikis. Uan xikuika motopil tein mokepka se kouat. 16 Moneki tikiluis tekiuaj: ‘Jehová, Dios akin tikueyichiuaj tejuan tihebreos,* nechualtitanik maj nimitsiluiki: “Xikinkaua nokoneuan israelitas maj kisakan de nikan, para maj nechueyichiuatij taluakyan”. Sayoj ke hasta axkan amo titakakini. 17 Yejua nejin tein kijtoua Jehová: “Ika nejin tikmatis ke nejua niJehová: nikuitekiti ueyiat Nilo ika nejin topil uan at mokepas esti. 18 Pescados* mikiskej, tatsojyayas uan akin nemij Egipto amo uelis tayiskej nejon at”’”.

19 Satepan, Jehová kinauatij Moisés: “Xikilui Aarón: ‘Xikui motopil uan ximomamelaua para maj nochi at tein onkak Egipto mokepa esti, uejueyi amej, at tein kiojtiaj,* kampa ataj uan kampa kisentiliaj atʼ. Onkas esti itech nochi tal Egipto, hasta itech tapalkamej de kouit uan de tet”. 20 Nimantsin Moisés uan Aarón kichiujkej nochi tein Jehová kinnauatijka. Aarón kiajokuik itopil uan kiuitekik ueyiat Nilo iixpan tekiuaj uan itakeualuan. Uan at mokepak esti. 21 Pescados* mikkej, peuak tatsojyaya uan akin nemiaj Egipto amo uelikok tayikej at de ompa. Onkaya esti itech nochi Egipto.

22 Sayoj ke tiopixkanaualmej de Egipto no kichiujkej* nejon. Uan tekiuaj kisentokak amo kinekik kinkakis Moisés uan Aarón, ijkon kemej Jehová kijtojka. 23 Uan tekiuaj mokepak ichan uan amo kichiuak cuenta nejon. 24 Kemej akin nemiaj Egipto amo ueliaj tayiaj at den ueyiat Nilo, peuak tachkuaj tanakastankopa den ueyiat para kitemoskej at. 25 Uan satepan ke Jehová kichiuak maj ueyiat Nilo mokepa esti, panok chikome tonal.

8 Uan Jehová kinauatij Moisés: “Xikitati tekiuaj akin taixyekana Egipto uan xikilui: ‘Yejua nejin tein Jehová kijtoua: “Xikinkaua nokoneuan israelitas maj kisakan para maj nechueyichiuatij. 2 Komo tiksentoka amo tikinkaua maj kisakan, nikchiuati maj sentakuikan kalamej itech nochi tal kampa titaixyekana. 3 Itech ueyiat Nilo tentoskej kalamej uan ualkijkisaskej de ompa. Kalakiskej mochan, mocuarto uan mocama. No kalakiskej ininchan motakeualuan uan ininchan nochin akin tikinixyekana, kalakiskej kampa tikmaneloua harina uan kampa tipanchiua. 4 Uan kalamej mitssenkuiskej tejua, akin tikinixyekana uan nochin motakeualuan”’”.

5 Satepan, Jehová kinauatij Moisés: “Xikilui Aarón: ‘Ximomamelaua ika motopil para maj kalamej kisakan den uejueyi amej, kampa kiojtiaj at den ueyiat Nilo uan kampa ataj, uan maj sentakuikan itech nochi Egipto’”. 6 Uan Aarón momamelauak para maj kalamej ualkijkisakan de nochin amej, uan maj sentakuikan itech nochi Egipto. 7 Sayoj ke, tiopixkanaualmej no kichiujkej* nejon, uan no kichiujkej maj kisanij kalamej uan maj sentakuinij itech nochi Egipto. 8 Uan tekiuaj kinnotsak Moisés uan Aarón uan kiniluij: “Xiktataujtikan Jehová maj techinajchiuili kalamej, porin axkan nikneki nikinkauasya namokniuan maj kimaktilitij Jehová tapialmej”. 9 Uan Moisés kiluij tekiuaj: “Tejua uelis tinechiluis kemanian tikneki maj niktataujti Dios maj namechinajchiuili kalamej tejua, motakeualuan uan akin tikinixyekana, para maj amo yetokanok itech mokaluan. Kalamej sayoj mokauaskej itech ueyiat Nilo”. 10 Tekiuaj kinankilij: “Mosta”. Yejua ika Moisés kiluij: “Para tikmatis ke amo akin kemej toDios Jehová, mochiuas kemej tikijtoua. 11 Dios namechinajchiuilis kalamej tejua, motakeualuan uan akin tikinixyekana, uan amo yetoskejok itech mokaluan. Kalamej sayoj mokauaskej itech ueyiat Nilo”.

12 Yejua ika, Moisés uan Aarón kikaujteujkej tekiuaj, uan Moisés kitataujtij Jehová maj kinixpolo kalamej tein kititanilijka tekiuaj. 13 Uan Jehová kichiuak tein Moisés tajtanik, uan kalamej peuak mikij itech kalmej, kalixpan uan kampa tatokaj. 14 Akin nemiaj Egipto peuak kinsejsentiliaj uan tel miakkan kinmontontenkej. Uan itech nochi Egipto peuak tatsojyaya. 15 Keman tekiuaj kiitak ke amo onkayajok kalamej, amo kinekik kinkakis Moisés uan Aarón, ijkon kemej Jehová kijtojka.

16 Uan Jehová kinauatij Moisés: “Xikilui Aarón: ‘Ximomamelaua uan xikuiteki tal ika motopil, uan talnex mokepas pisilmoyomej tein momoyauaskej itech nochi Egiptoʼ”. 17 Uan yejuan ijkon kichiujkej. Aarón momamelauak uan kiuitekik tal ika itopil, uan talnex mokepak pisilmoyomej itech nochi Egipto uan peuak kintitipitsaj nochin akin ompa nemiaj uan tapialmej. 18 Tiopixkanaualmej no kinekkej kinchiuaskej* pisilmoyomej, sayoj ke amo uelkej. Uan pisilmoyomej kintitipitsayaj nochin uan no kintitipitsayaj tapialmej. 19 Yejua ika tiopixkanaualmej kiluijkej tekiuaj: “¡Nejin kichiuak* Dios!”. Sayoj ke tekiuaj kisentokak amo kinekik kinkakis, ijkon kemej Jehová kijtojka.

20 Uan Jehová kinauatij Moisés: “Mosta, kualkan ximeua uan xiknamikiti tekiuaj. Yejua yati ueyiat, uan moneki tikiluis nejin: ‘Yejua nejin tein Jehová kijtoj: “Xikinkaua nokoneuan israelitas maj kisakan para maj nechueyichiuatij. 21 Sayoj ke komo amo tikinkaua maj kisakan, nimitstitaniliti moyomej* tejua, motakeualuan uan akin tikinixyekana, uan kalakiskej itech mokaluan. Moyomej tentoskej itech nochin kalmej de Egipto uan hasta talpan, uan sentakuiskej. 22 Nejon tonal nikchiuas maj amo kalakikan itech tal tein poui Gosén, kampa nemij nokoneuan israelitas. Ompa amo ajsiskej moyomej, uan ijkon tikmatis ke nejua Jehová nikan nietok itech nejin tal. 23 Nikchiuas maj moita akonimej nokoneuan uan akonimej tikinixyekana tejua. Nejin mochiuas mosta”’”.

24 Uan yejua nejon tein Jehová kichiuak. Tentiualayaj tel miak moyomej uan kalakitoj ichan tekiuaj, ininchan itakeualuan uan itech nochi Egipto. Fiero tachiujkej. 25 Satepan, tekiuaj kinnotsak Moisés uan Aarón uan kiniluij: “Xikmaktilitij tapialmej namoDios, sayoj ke nikan Egipto”. 26 Sayoj ke Moisés kinankilij: “Amo uelis tikchiuaskej nejon. Nikan Egipto tel amo kiuelitaskiaj maj tikinmiktikan tapialmej para tikmaktiliskej toDios Jehová. Komo kiitaskiaj ke tikinmiktijtokej tapialmej, techtetemaskiaj.* 27 Yejua ika, tiatij eyi tonal ne taluakyan uan ompa tikmaktiliskej toDios Jehová seki tapialmej, ijkon kemej yejua techiluij”.

28 Yejua ika tekiuaj kijtoj: “Namechkauas xiakan taluakyan para xikmaktilitij tapialmej namoDios Jehová. Sayoj ke amo uejka xiakan. Uan xiktataujtikan namoDios maj techinajchiuili moyomej”. 29 Moisés kinankilij: “Niati, uan niktataujtis Jehová maj mosta namechinajchiuili moyomej tejua, motakeualuan uan akin tikinixyekana. Sayoj ke amo oksepa xitechkajkayaua* uan xitechkaua maj tikisakan para tikmaktiliskej tapialmej Jehová”. 30 Uan Moisés kikaujteuak tekiuaj uan kitataujtij Jehová. 31 Uan Jehová kichiuak tein Moisés kitajtanij. Yejua ika Dios kinajchiuilij moyomej tekiuaj, itakeualuan uan akin kinixyekanaya. Amo mokauak nion se moyot. 32 Sayoj ke tekiuaj oksepa amo kinekik takakis uan amo kinkauak israelitas maj kisakan.

9 Yejua ika Jehová kinauatij Moisés: “Xikiluiti tekiuaj akin taixyekana Egipto: ‘Yejua nejin tein kijtoj Jehová, Dios akin tikueyichiuaj tejuan tihebreos:* “Xikinkaua nokoneuan israelitas maj kisakan para maj nechueyichiuatij. 2 Sayoj ke komo tiksentoka tikintsakuilia uan amo tikinkaua, 3 xikyekmati ke Jehová kinmiktiti motapialuan ika ichikaualis. Caballos, burros, camellos, kuakuejmej uan ichkamej* fiero kokoliskuiskej. 4 Sayoj ke Jehová kinyekpias inintapialuan israelitas uan amo mikis nion se, uan sayoj inintapialuan akin nemij Egipto mikiskej”ʼ”. 5 Uan no, Jehová kiixtalij kemanian mochiuaskia nejon. Kijtoj: “Mosta Jehová kichiuas nejin”.

6 Uan yejua nejon tein Jehová kichiuak mostika. Peuak mikij nochi inintapialuan akin nemiaj Egipto, sayoj ke amo mikik nion se inintapial israelitas. 7 Keman tekiuaj kintitanik itakeualuan maj kiitatij toni mochiujtoya, kiitakej ke nion se inintapial israelitas mikka. Maski ijkon, tekiuaj amo kinkauak israelitas maj kisanij porin kisentokaya yoltakuauak.

8 Satepan Jehová kiniluij Moisés uan Aarón: “Xikuikan koujnex ika namomauan uan maj Moisés kiajkopixo* iixpan tekiuaj. 9 Uan nejon koujnex momoyauas itech nochi Egipto. Uan keman inintech uetsis takamej uan tapialmej, kinkisas kokomej tein temalouaskej”.

10 Yejua ika kikuikej koujnex uan moketsatoj iixpan tekiuaj. Uan Moisés kiajkopixoj,* uan keman inintech uetsik takamej uan tapialmej, kinkisak kokomej tein temalojkej. 11 Tiopixkanaualmej amo uelik kiitatoj Moisés porin no kinkisak kokomej kemej nochin akin nemiaj Egipto. 12 Sayoj ke Jehová kikauak maj tekiuaj oksepa amo takaki, ijkon kemej Jehová kiluijka Moisés.

13 Uan Jehová kiluij Moisés: “Mosta, kualkan ximeua uan xiknamikiti tekiuaj uan xikilui: ‘Yejua nejin tein kijtoj Jehová, Dios akin tikueyichiuaj tejuan tihebreos: “Xikinkaua nokoneuan israelitas maj kisakan para maj nechueyichiuatij. 14 Porin nimitstatsakuiltiti tejua, motakeualuan uan akin tikinixyekana para tikmatis ke amo akin kemej nejua itech nochi taltikpak. 15 Nejua ueliskiaya nikuis nochikaualis para nimitsmiktis ika se kokolis* tejua uan akin tikinixyekana, uan axkan amo tiyoltoskiaok. 16 Sayoj ke nimitskaujtok xiyolto para nimitsnextilis nochikaualis, uan para moteixmatiltis notokay itech nochi taltikpak. 17 Tiksentoka timoueyimati* uan amo tikinkaua nokoneuan maj kisakan. 18 Yejua ika mosta kemej nejin hora, nikchiuati maj fiero tesiui kemej amo keman mochiuani nikan Egipto. 19 Yejua ika xitanauati maj kinkalakikan kaltampa nochin motapialuan uan nochi tein tikpia ne kalampa. Komo aksa* oso se tapial mokaua kalampa, tesiuit kimiktis”ʼ”.

20 Nochin itakeualuan tekiuaj akin kineltokakej tein Jehová kijtoj, nimantsin kinkalakijkej inintapialuan uan inintakeualuan. 21 Sayoj ke akin amo kineltokakej tein Jehová kijtoj, kinkaujkej ixtauat inintakeualuan uan inintapialuan.

22 Uan Jehová kiluij Moisés: “Ximomaajokui para maj tesiui itech nochi Egipto. Uetsis tesiuit ininpanko takamej uan tapialmej, uan kampa xiujtaj uan koujtaj”. 23 Uan Moisés kiajkoketsak itopil uan Jehová kichiuak maj tatitikuini uan maj tesiui, uan kichiuak maj ualpanuetsi tit.* Uan Jehová kichiuak maj kisentoka tesiui itech nochi Egipto. 24 Tesiuik uan uetsik tit, uan moitaya kemej yeskia tapepetania. Amo keman fiero tesiujtoya ompa Egipto. 25 Tesiuit kitamij nochi tein onkaya ompa Egipto, kinmiktij nochin akin yetoyaj kalampa uan tapialmej tein amo kinkalakijkaj. Kitamij nochi xiuit uan nochin koujmej tein onkayaj. 26 Sayoj amo tesiuik itech tal tein poui Gosén kampa nemiaj israelitas.

27 Yejua ika tekiuaj tanauatij maj kinnotsakan Moisés uan Aarón uan kiniluij: “Axkan nikitakya ke nitajtakoj. Jehová kichiua tein kuali yetok, sayoj ke nejua uan akin nikinixyekana tikchiujtokej tein amo kuali. 28 Xiktataujtikan Jehová maj kichiua maj amo tatitikuiniok nion maj tesiuiok. Uan namechkauas xikisakan uan amo namechtsakuilisok”. 29 Moisés kinankilij: “Niman keman nikisas den ueyi xolal nimomaajokuis uan niktataujtis Jehová. Uan para tikmatis ke taltikpak iaxka Jehová, amo tatitikuinisok nion tesiuisok. 30 Sayoj ke nejua nikmattokya ke nion ijkuak nankimojkatokaskej Jehová Dios, tejua uan motakeualuan”.

31 Nochi tatok tein monotsa lino uan cebada tamik, porin cebada chikaujtoyaya uan lino xochiojtoyaya. 32 Sayoj ke nochi tataman trigo amo poliuik porin chikauaya satepan. 33 Keman Moisés kisak den ueyi xolal kampa yetoya tekiuaj, momaajokuik uan kitataujtij Jehová, uan amo tatitikuinikok, amo no tesiuik nion kiouikok. 34 Keman tekiuaj kiitak ke nochi panokaya, oksepa amo kinekik takakis, uan itakeualuan no ijkon kichiujkej. 35 Uan tekiuaj kisentokak amo takakik uan amo kinkauak israelitas maj kisakan, ijkon kemej Jehová kijtojka itechkopa Moisés.

10 Uan Jehová kiluij Moisés: “Xikitati tekiuaj akin taixyekana Egipto, porin nikauak maj yejua uan itakeualuan moyoltakuaualtikan para maj tekiuaj kiita milagros tein nikchiuati. 2 No nikauak maj moyoltakuaualtikan, para uelis tikintapouis mokoneuan uan moixuiuan keniuj nikintatsakuiltij akin nemij Egipto, uan toni milagros nikchiuak ompa. Uan namejuan nankiyekmatiskej ke nejua niJehová”.

3 Yejua ika Moisés uan Aarón kiitatoj tekiuaj uan kiluijkej: “Yejua nejin tein kijtoj Jehová, Dios akin tikueyichiuaj tejuan tihebreos:* ‘¿Hasta kemanian tinechixnamiktos? Xikinkaua nokoneuan israelitas maj kisakan para maj nechueyichiuatij. 4 Porin komo tiksentoka amo tikinkaua maj kisakan, mosta nikinualkuiti chapolimej itech nochi tal kampa titaixyekana. 5 Tentoskej talpan uan nion moitas tal. Kitamiskej tein tesiuit kikauak uan kikuaskej nochin koujmej tein moskaltijtokej. 6 Tentoskej itech mokaluan, ininchan motakeualuan uan itech nochin kalmej de Egipto. Motatuan uan moueyitatuan amo keman kiitanij tein mochiuati’”. Uan mokepteuak uan kikaujteuak tekiuaj.

7 Satepan, itakeualuan tekiuaj kiluijkej: “¿Hasta kemanian kitemojtos ne takat maj techpano tein amo kuali? Xikinkauaya maj kiueyichiuatij ininDios Jehová. ¿Ayamo tikita ke nikan Egipto tatamikya?”. 8 Yejua ika tekiuaj oksepa kinnotsak Moisés uan Aarón uan kiniluij: “Xiakan xikueyichiuatij namoDios Jehová. Sayoj ke ¿akonimej mero yatij namouan?”. 9 Uan Moisés kiluij: “Kemej tikchiuilitij se iluit Jehová, tikinuikatij tookichpipiluan, tosiuapipiluan, tatajtsitsin akin touan nemij, toichkauan* uan tokuakuejuan”. 10 Sayoj ke tekiuaj kinnankilij: “¿Namoluiaj ke namechkauati xikisakan namejuan uan namokoneuan? Komo panoskia nejon, ¡moyekitaskia ke Jehová namechpaleuijtok! Nikyekitstok ke nankichiuasnekij teisa tein amo kuali. 11 ¡Amo mochiuas tein nankinekij! Sayoj takamej uelis kiueyichiuatiuij Jehová, porin yejua nejon tein nanechtajtanijkaj”. Uan nimantsin kinkixtijkej de ichan tekiuaj.

12 Uan Jehová kiluij Moisés: “Ximomamelaua para maj chapolimej temikij itech nochi Egipto uan maj kitamikan nochi xiuit uan koujmej tein tesiuit kikauak”. 13 Nimantsin, Moisés kiajokuik itopil uan momamelauak, uan Jehová kichiuak maj nochin tonal uan nochi youal taejekato itech nochi Egipto. Nejin ejekat ualeuaya kampa ualkisa tonaltsin. Mostika, nejon ejekat kinualkuik chapolimej. 14 Uan chapolimej sentakuikej itech nochi Egipto uan kampa yeski kalakitoj. Fiero motachiuak. Amo keman onkatoyaj tel miakej chapolimej uan amo keman ijkon onkaskej. 15 Kemej sentakuikej itech nochi Egipto, hasta tamitatileuik.* Kitamikuajkej nochi xiuit uan koujmej uan nochi koujtakilot tein tesiuit kikaujka. Kintamimakuajkej nochin koujmej uan amo mokauak nion se xiuit itech nochi Egipto.

16 Nimantsin tekiuaj kinnotsak Moisés uan Aarón uan kiniluij: “Nikixnamiktok namoDios Jehová uan no namejuan. 17 Namechtataujtia xinechtapojpoluikan sayoj axkan, uan xiktataujtikan namoDios Jehová maj amo techtatsakuiltiok porin timikitij”. 18 Yejua ika, yejuan kiskej de kampa yetoya tekiuaj uan Moisés kitataujtij Jehová. 19 Uan Jehová kichiuak maj ejekat mokepa uan maj chikauak taejeka oksekopa. Nejin ejekat ualeuaya kampa pankalaki tonaltsin. Uan kinuikak chapolimej uan kintamotato itech mar Rojo. Amo mokauak nion se chapolin itech nochi Egipto. 20 Sayoj ke Jehová kikauak maj tekiuaj amo takaki uan yejua amo kinkauak israelitas maj kisakan.

21 Satepan, Jehová kiluij Moisés: “Ximomaajokui para maj tatayouayantia itech nochi Egipto. Tel fiero tatayouayantias”. 22 Moisés nimantsin momaajokuik, uan eyi tonal fiero tatayouayantiak itech nochi Egipto. 23 Akin katkaj de Egipto amo ueliaj moitayaj uan eyi tonal mokaujkej kampa yetoyaj. Sayoj ke kampa nemiaj israelitas tatanestoya. 24 Tekiuaj kinotsak Moisés uan kiluij: “Xiakan xikueyichiuatij Jehová. Hasta namokoneuan no uelis yaskej namouan. Sayoj ke amo xikinuikakan ichkamej nion kuakuejmej”. 25 Sayoj ke Moisés kinankilij: “Tejua no titechmakas* tapialmej para tikchichinouiliskej toDios Jehová. 26 No tikinuikatij totapialuan. Amo tikauaskej nion se, porin seki tikuitij para tikueyichiuaskej toDios Jehová. Uan sayoj tikmatiskej katiyejua tikmaktiliskej Jehová keman ompa tiajsiskej”. 27 Sayoj ke Jehová kikauak maj tekiuaj oksepa amo kineki takakis, uan amo kinkauak maj kisakan. 28 Uan tekiuaj kiluij Moisés: “¡Xikisa de nikan! Amo keman oksepa xinechitaki, porin komo oksepa timoixketsaki, timikis”. 29 Uan Moisés kiluij: “Kuali yetok. Amo keman oksepa nimitsitakiuj”.

11 Uan Jehová kiluij Moisés: “Oksepa niktatsakuiltiti tekiuaj akin taixyekana Egipto uan akin ompa nemij. Satepan, yejua namechkauas xikisakan. Tein melauj namechtokas.* 2 Axkan xikinilui nochin israelitas, takamej uan siuamej, maj kintajtanikan ininvecinos miak taman tachijchiuj ika plata uan oro”. 3 Jehová kichiuak maj akin nemiaj Egipto kuali kinitakan israelitas. Hasta Moisés semi kitakachiuayaj itech nochi Egipto, itakeualuan tekiuaj uan akin katkaj de Egipto.

4 Moisés kiluij tekiuaj: “Yejua nejin tein Jehová kijtoj: ‘Kemej tajkoyouan, nipanoti itech nochi Egipto. 5 Nochin konemej akin tayekanaj de Egipto mikiskej. Mikis iokichpil tekiuaj* uan hasta iokichpil siuat akin kitakuecholia iteko. No mikiskej nochin tapialmej tein achto yolkej. 6 Mokakis keniuj eliuis tayokolchokaj itech nochi Egipto, kemej amo keman mokaktoya uan amo kemanok mokakis. 7 Sayoj ke nion se itskuinti kinuajuis israelitas nion inintapialuan. Ijkon nankimatiskej ke Jehová kinpaleuia israelitas uan amo kinpaleuia akin kayomej Egiptoʼ. 8 Uan nochin motakeualuan nechitakiuij uan motankuaketsaskej noixpan uan kijtoskej: ‘Xikisa tejua uan nochin akin mitstakamatijʼ. Satepan, nikisas”. Keman Moisés kitamiijtoj nochi nejon, kikaujteuak tekiuaj uan semi kualantiajki.

9 Uan Jehová kiluij Moisés: “Tekiuaj amo namechkakis. Ijkon panos para okachi nikchiuas milagros itech nochi Egipto”. 10 Moisés uan Aarón kichiujkaj nochi milagros iixpan tekiuaj, sayoj ke Jehová kikauak maj tekiuaj amo takaki uan maj amo kinkaua israelitas maj kisakan de Egipto.

12 Uan Jehová kiniluij Moisés uan Aarón ompa Egipto: 2 “Itech nejin metsti peuas xiuit itech namocalendario. 3 Xikiniluikan nochin israelitas: ‘Itech tonal 10 de nejin metsti, sejse familia moneki kikuis se ichkatsin,* se ichkatsin itech sejse kali. 4 Sayoj ke komo namochan amo namiakej para nankitamiskej se ichkatsin, moneki nankiuantiskej* namovecino uan maj takuati namochan. Xikixejekokan kanachimej nankinyoleuatij uan ox ajsis para nochin. 5 Tapial moneki yeski ueuet, kuali yetos uan kipias se xiuit. Uelis nankikuiskej se ichkatsin oso se chivojkonet. 6 Moneki nankipixtoskej hasta tonal 14 de nejin metsti, uan keman tapoyaujtosya, nochin israelitas moneki kimiktiskej. 7 Uan iesyo nejon ichkatsin moneki nankikuijkuiltiskej itech kaltenkouit, ajko uan tajtanakastan den kali kampa nankikuaskej.

8 ”ʼMoneki nankikuaskej tapialtsin nejon youak. Moneki nankiteuatsaskej uan nankikuaskej ika pantsin tein amo kipia levadura uan kilit tein chichik. 9 Amo xikuakan nion se cacho xoxouik nion tamolontil.* Nochi xikteuatsakan, hasta itsontekon, imetsuan uan nochi tein kipia iijtik. 10 Amo ximokauilikan nion teyi para mostika. Komo mokaua tepitsin nakat moneki nankitatiskej* nochi. 11 Keman nankikuaskej, xitajkoilpitokanya,* ximetsaktokanya namotekakuan uan ximaaktokanya namotopil. Uan no moneki nantakuajtiuetsiskej. Nejin yejua iluit tein monotsa Pascua para tikueyitaliskej Jehová. 12 Nejin youak nipanoti itech nochi altepet uan nikinmiktis nochin konemej akin tayekanaj de Egipto. No nikinmiktis tapialmej tein achto yolkej. Nikinpinaujtiti nochin dioses de Egipto. Nejua niJehová. 13 Esti kinextis kali kampa nanyetoskej. Keman nikitas esti sayoj nipanotikisas uan amo teyi namechpanos keman nikintatsakuiltis akin nemij Egipto.

14 ”ʼNamejuan moneki nankielnamikiskej nejin tonal uan nankichiuiliskej se iluit Jehová. Namokoneuan akin yoltiaskej no moneki kichiuaskej nejon. Desde axkan nikixtalia nejin tanauatil. 15 Chikome tonal moneki nankikuaskej pantsin tein amo kipia levadura. Yejua ika, desde yekinika tonal moneki nankikixtiskej de namochan harinajtix tein kipia levadura, porin akin kikuas teisa tein kipia levadura itech nejon chikome tonal moneki mikis.* 16 Yekinika tonal uan chikometika tonal moneki namosentiliskej para nankiueyichiuaskej Dios. Itech nejon tonalmej amo xikchiuakan nion se tekit. Sayoj uelis namochijchiuiliskej tein nankikuaskej.

17 ”ʼNamejuan moneki nankichiuaskej iluit keman nankikuaskej pantsin tein amo kisamaualtiaj,* porin nejin tonal namechkixtiti nanochin de Egipto. Namokoneuan akin yoltiaskej no moneki kielnamikiskej nejin tonal. Desde axkan nikixtalia nejin tanauatil. 18 Itech metsti abib* moneki nankikuaskej pantsin tein amo kipia levadura. Nankikuaskej desde tiotakpa den tonal 14 hasta tiotakpa den tonal 21. 19 Chikome tonal amo xikpiakan namochan harinajtix tein kipia levadura. Akin kikuas teisa tein kipia levadura moneki mikis,* yeski israelita oso okseko kayot. 20 Amo xikuakan nion teyi tein kipia levadura. Namochan sayoj xikuakan pantsin tein amo kipia levaduraʼ”.

21 Uan Moisés nimantsin kinnotsak nochin taixyekananij israelitas uan kiniluij: “Nanochin xiakan uan xikuitij sejse tapialtsin tein yekin moskaltijtok* para namochankauan, uan xikmiktikan tein nankikuiskej para Pascua. 22 No xikmakuikan seki xiujtsitsin,* xikajakikan itech esti tein nankisentiliskej itech se tapalkat, uan xikuijkuiltikan itech kaltenkouit, ajko uan tajtanakastan. Maj amo akin kisa de ichan hasta maj tanesi. 23 Keman Jehová panos para kintatsakuiltis akin nemij Egipto uan kiitas esti itech kaltenkouit, Jehová sayoj panotikisas. Amo kimiktis nion se akin yetos namochan.

24 ”Namejuan moneki nankielnamikiskej nejin tonal. Desde axkan, namejuan uan namokoneuan moneki nankichiuaskej nejin. 25 Uan keman nankalakiskej itech tal tein Jehová motenkauak namechmakas, moneki nankisentokaskej naniluichiuaskej nejin tonal. 26 Keman namokoneuan namechtajtaniskej* ‘¿Keyej naniluichiuaj?’, 27 moneki nankinnankiliskej ‘Nejin tapialtsin tikmiktiliaj Jehová para tikueyitaliskej itech Pascua. Yejua sayoj panotikisak ininchan israelitas ompa Egipto uan kinmakixtij tochankauan keman kintatsakuiltij akin ompa nemiaj’”.

Uan nochin motankuaketskej uan moixpilojkej hasta talpan. 28 Israelitas kichiujkej nochi tein Jehová kinnauatijka Moisés uan Aarón. Kichiujkej ijkon kemej yejua kijtojka.

29 Uan tajkoyouan Jehová kinmijmiktij nochin konemej akin tayekanayaj de Egipto. Kimiktij iokichpil tekiuaj uan hasta iokichpil akin tsaktoya. No kinmijmiktij nochin tapialmej tein achto yolkej. 30 Nejon youak meujkej tekiuaj, itakeualuan uan nochin akin kayomej Egipto, uan mokakik keniuj eliuis tayokolchokayaj itech nochi Egipto, porin itech nochin kalmej momikilijka se ininkoneuj. 31 Nejon youak, tekiuaj nimantsin kinnotsak Moisés uan Aarón uan kiniluij: “¡Xiakanya! Amo touan xietokanok namejuan uan okseki israelitas. Xikueyichiuatij Jehová ijkon kemej nankijtojkej. 32 No xikinuikakan namoichkauan uan namokuakuejuan, ijkon kemej nankijtojkej. Uan no xiktajtanikan Dios maj nechpaleui”.

33 Uan akin katkaj de Egipto peuak kintataujtiaj israelitas maj niman kisakan. Kiniluiayaj: “¡Komo amo nanyouij, tinochin timikitij!”. 34 Yejua ika israelitas kikuikej harinajtix uan tapalkamej tein kipijpikkaj ika inintasal,* uan mokechmamaltijkej. Nejon harinajtix amo kipiaya levadura uan itech nejon tapalkamej kimanelouayaj harina. 35 Uan no, israelitas kichiujkej tein Moisés kiniluijka: kintajtanijkej akin katkaj de Egipto miak taman tachijchiuj ika plata, oro uan no tasal. 36 Jehová kichiuak maj akin nemiaj Egipto kuali kinitakan israelitas, yejua ika kinmakakej nochi tein kintajtanijkej. Uan israelitas kinkuilijteujkej nochi tein kipiayaj.

37 Uan israelitas kiskej de Ramesés para ajsiskej Sucot. Katkaj kemej 600 mil takamej,* uan no yayaj konemej. 38 No kintojtokateujkej* tel miakej.* Kinuikakej tel miak ichkamej, chivos uan kuakuejmej. 39 Peuak kichijchiuaj taxkaltsitsin tein amo kipiaya levadura ika harinajtix tein kikuiteujkaj. Taxkaltsitsin amo kipiaya levadura porin ijsiujka kinkixtijkej de Egipto uan amo horajtikej motachijchiuiskej.

40 Keman israelitas kiskej de Egipto, kiuikayajya ompa 430 xiujmej. 41 Itech tonal keman ajsik nejon 430 xiujmej, nochin akin iaxkauan Jehová kiskej de Egipto. Keman kiskej kualtsin xejxeliujtiayaj. 42 Nejin se youak tein yejuan kielnamikiskej porin ijkuak, Jehová kinkixtij de Egipto. Nochin israelitas uan ininkoneuan akin yoltiaskej moneki kielnamikiskej nejin youak para kiueyitaliskej Jehová.

43 Uan Jehová kiniluij Moisés uan Aarón: “Yejua nejin tein nikixtalia maj mochiua itech Pascua. Nion se akin amo israelita uelis kikuas tapialtsin tein kimiktiaj itech Pascua. 44 Komo aksa* kikouak se takat para maj itakeual, moneki kitekis.* Sayoj ijkon, nejon takeual no uelis kikuas tapialtsin. 45 Amo no uelis kikuaskej akin sayoj mokaltalitoj namotalpan nion akin tetekitiliaj. 46 Moneki nankikuaskej ichkatsin sayoj itech se kali. Amo xikixtikan nion tepitsin nakat kalixpan uan amo no xikpostekilikan nion se iomiyo. 47 Nochin israelitas moneki iluichiuaskej. 48 Komo se akin amo israelita nemi namouan, uan no kineki kichiuas Pascua para kiueyitalis Jehová, nochin takamej akin nemij ichan moneki motekiskej.* Sayoj ijkon, uelis motokis para iluitis uan yeski kemej se israelita. Nion se takat akin amo kitekinij* uelis kikuas tapialtsin tein kimiktiaj itech Pascua. 49 Tein monekis kichiuas se israelita no yejua tein monekis kichiuas akin amo israelita uan nemi namouan”.

50 Yejua ika nochin israelitas kichiujkej nochi tein Jehová kinnauatijka Moisés uan Aarón. Kichiujkej ijkon kemej kijtojka. 51 Nejon tonal, Jehová kinkixtij israelitas de Egipto uan kualtsin xejxeliujtiayaj.

13 Jehová no kiluij Moisés: 2 “Xinechinxelouili nochin okichpipil israelitas akin tayekanaj. Okichpil israelita akin tayekana uan tapialueuet tein achto yoli, noaxkauan”.

3 Uan Moisés kiniluij israelitas: “Xikelnamikikan nejin tonal keman nankiskej de Egipto, kampa namechteltekitiltiayaj, porin Jehová namechkixtij de nikan ika ichikaualis. Yejua ika amo xikuakan nion teyi tein kipia levadura. 4 Nankisatij nejin tonal itech metsti abib.* 5 Jehová motenkauak iniuan mouejkaujtatuan ke mitsmakaskia inintal akin kinixmatij kemej cananeos, hititas, amorreos, heveos uan jebuseos, kampa moteltachiua.* Keman ompa mitsajxitis, xijxiujtika monekis tikelnamikis nejin tonal. 6 Chikome tonal moneki tikuas pantsin tein amo kipia levadura, uan itech chikometika tonal mochiuas se iluit para tikueyitalis Jehová. 7 Moneki tikuas pantsin tein amo kipia levadura nejon chikome tonal. Amo xikpia nion teyi tein kipia levadura uan itech nochi motal amo xikpia harinajtix tein kipia levadura. 8 Uan nejon tonal moneki tikiluis mokoneuj: ‘Nikchiua nejin para nikelnamikis keniuj Jehová nechkixtij de Egipto’. 9 Nejin iluit yeski kemej se taman tein ijkuiliujtos momako uan moixkuako. Mitselnamiktis ke moneki ika titajtos itanauatil Jehová. No mitselnamiktis ke Jehová mitskixtij de Egipto ika ichikaualis. 10 Xijxiujtika moneki tikchiuas nejin tein Dios kiixtalij itech tonal tein kijtoj.

11 ”Keman Jehová mitsajxitis itech inintal cananeos, tein mitsiluij tejua uan mouejkaujtatuan ke mitsmakaskia, 12 moneki tikxelouilis Jehová nochin okichpipil akin tayekanaj uan nochin tapialueuetkej tein achto yolkej. Nochin iaxkauan Jehová. 13 Se burro tein achto yolis moneki tikmakixtis. Uan para tikmakixtis moneki titaxtauas ika se ichkat.* Komo amo titaxtaua moneki tikechpostekis. No moneki titaxtauas para tikinmakixtis nochin mookichpipiluan akin tayekanaj.

14 ”Komo se tonal mokoneuj mitstajtania* ‘¿Keyej tikchiua nejin?’, moneki tikiluis ‘Jehová ika ichikaualis techkixtij de Egipto kampa techteltekitiltiayaj. 15 Kemej tekiuaj akin taixyekanaya Egipto amo techkauaya maj tikisakan, Jehová kinmijmiktij nochin konemej akin tayekanayaj de Egipto uan nochin tapialmej tein achto yolkaj. Yejua ika tikmiktiliaj Jehová nochin tapialueuetkej tein achto yolij uan titaxtauaj para tikinmakixtiskej tookichpipiluan akin tayekanajʼ. 16 Uan nejin iluit yeski kemej se taman tein ijkuiliujtos momako uan moixkuako, porin Jehová techkixtij de Egipto ika ichikaualis”.

17 Uan keman tekiuaj kinkauak israelitas maj kisakan, Dios amo kinuikak itech ojti tein panoua kampa nemij akin kinixmatij kemej filisteos, maski okachi amo uejka katka. Dios ijkon kichiuak porin kijtoj: “Keman kiitaskej ke monekis tateuiskej, xa kinemiliskej maj amo kisanij uan mokepaskej Egipto”. 18 Yejua ika, Dios kichiuak maj israelitas yanij itech taluakyan tanakastan den mar Rojo. Keman yejuan kiskej de Egipto kualtsin xejxeliujtiayaj kemej soldados. 19 Moisés kiuikak iomiyouan José porin José kiniluijka ikoneuan Israel nejin: “Xikyekmatikan ke Dios namechpaleuikiuj. Xinechyekiluikan ke nankiuikaskej noomiyouan”. 20 Uan israelitas kiskej de Sucot uan kinkejketskej ininkaltsitsin* ompa Ezam, kampa peuaya taluakyan.

21 Jehová kinyekantiaya. Tonayan kinyekantiaya ika se mixti uan youak kinyekantiaya ika se tit* tein kintauilijtiaya. Ijkon uelia nejnemiaj tonayan uan youak. 22 Tonayan nejon mixti amo kinkauaya uan de youak nejon tit nochipa iniuan yetoya.

14 Jehová kiluij Moisés: 2 “Xikinilui israelitas maj mokepakan uan maj kinkejketsakan ininkaltsitsin* tanakastan de Pihahirot, tatajko de Migdol uan mar, kampa uelis kiitaskej Baal-Zefón. Maj kintajtalikan ininkaltsitsin amo uejka de Baal-Zefón, martenoj. 3 Satepan, tekiuaj akin taixyekana Egipto kijtos: ‘Israelitas mopolojkej uan amo kimatij kani yaskej. Amo uelis kisaskej den taluakyan’. 4 Uan nejua nikauas maj tekiuaj amo takaki uan kintokatias, sayoj ke nejua nikinixpolos tekiuaj uan nochin isoldados para nimoueyitalis. Ijkon, akin nemij Egipto kiyekmatiskej ke nejua niJehová”. Yejua ika, israelitas kichiujkej kemej kiniluijkej.

5 Satepan, kiluijkej tekiuaj ke israelitas yajkajya. Uan nimantsin, yejua uan itakeualuan moyolnemilijkej uan kijtojkej: “¿Keyej tikinkaujkej totakeualuan maj kisakan?”. 6 Yejua ika tekiuaj tanauatij maj kintsikokan icarros tein kikuia keman tateuiaya uan kinkuiteuak isoldados. 7 Kinuikak 600 carros tein okachi kuali chijchiujtoyaj uan nochin okseki carros tein kipiaya. Itech sejse carro yayaj soldados. 8 Uan Jehová kikauak maj tekiuaj akin taixyekanaya Egipto amo takaki, uan yejua kintemojtiajki israelitas. Uan israelitas kualtsin kistiayaj uan amo teyi moliayaj. 9 Uan akin nemiaj Egipto kintokatiajkej. Israelitas yetoyaj martenoj, tanakastan de Pihahirot, amo uejka de Baal-Zefón. Keman israelitas ompa yetoyaj, nochin icaballos uan icarros tekiuaj, takamej akin yayaj itech caballos uan isoldados motokijtiayaj.

10 Keman tekiuaj okachi kinajsitoyaya, israelitas moixajokkej uan kiitakej ke kintokatiualayaj. Yejuan fiero momoujtijkej, yejua ika peuak kitsajtsiliaj Jehová maj kinpaleui. 11 Kiluijkej Moisés: “Titechualkuik nikan kampa tauaktok maj timikikij, ¡majya amo takaujtok ne Egipto para ompa techtokaskej!* ¿Keyej ijkon titechchiuak? ¿Keyej titechkixtij de Egipto? 12 Ipa timitsiluijkajya nejon keman ompa tietoyaj. Timitsiluijkej: ‘Amo xitechkuejmolojto, xitechkaua maj tiksentokakan tikintekitilikan’. Okachi kuali yeskia nejon ke timikiskej nikan kampa tauaktok”. 13 Sayoj ke Moisés kiniluij: “Amo ximouikan. Amo teyi ximoluikan uan xikitakan keniuj Jehová namechmakixtia axkan. Porin ne takamej akin axkan nankinitaj, amo kemanok nankinitaskej. 14 Jehová tateuis por namejuan, uan namejuan amo teyi nankichiuaskej”.*

15 Uan Jehová kiluij Moisés: “¿Keyej tinechtsajtsilijtok maj namechpaleui? Xikinilui israelitas maj motaololouilikan. 16 Uan tejua, xikajokui motopil uan ika xiknexti mar para maj motajkoxelo. Ijkon israelitas uelis panoskej kampa tauaktos. 17 Uan nejua nikauas maj akin nemij Egipto amo takakikan, maj nalkalakikan uan maj kintokatiakan. Nikinixpoloti tekiuaj, nochin isoldados, icarros uan akin youij itech caballos para nimoueyitalis. 18 Uan akin nemij Egipto kiyekmatiskej ke nejua niJehová keman nimoueyitalis uan nikinixpolos tekiuaj, icarros uan akin youij itech caballos”.

19 Uan iángel toTajtsin Dios tein kinyekantiaya israelitas motalito taikampa, uan mixti tein yetoya ininixpan no motalito taikampa uan ompa mokauak. 20 Mixti motalij tatajko den israelitas uan de akin kintokatiayaj. Sekopa tayouayan katka uan oksekopa tatanestoya. Yejua ika nochi youal amo uelik kinajsitoj israelitas.

21 Uan Moisés momamelauak uan kinextij mar uan Jehová kichiuak maj nochi youal chikauak taejekato. Nejin ejekat ualeuaya kampa ualkisa tonaltsin. Mar ojkan moxeloj uan tatajko tauaktoya. 22 Uan israelitas kipanauijkej mar tatajkoyampa kampa tauaktoya. At motsakuilij tajtanakastan uan moitaya kemej ome uejueyi tepamit. 23 Uan tekiuaj uan akin iuan yayaj kintokateujkej. Nochin caballos, carros uan akin yayaj itech caballos kintokatiajkej itech mar. 24 Keman yaya tanesitiya,* Jehová kinnalitak akin katkaj de Egipto desde tit* uan mixti, uan kichiuak maj eliuis momoujtikan. 25 Kichiuak maj llantas kojkopinikan uan amo ueliaok kinyekuikayaj carros. Yejuan kijtouayaj: “¡Maj ticholokan, porin Jehová techteuijtok para kinpaleuis israelitas!”.

26 Uan Jehová kiluij Moisés: “Ximomamelaua uan xiknexti mar para maj at mosentili uan maj ininpan uetsi takamej de Egipto, carros uan akin youij itech caballos”. 27 Nimantsin Moisés momamelauak, uan keman yaya tanesitiya, at oksepa mosentilij. Takamej de Egipto cholosnekiaj, sayoj ke Jehová kichiuak maj kinuika in at. 28 Uan keman at oksepa mosentilij, ininpan uetsik carros, akin yayaj itech caballos uan nochin isoldados tekiuaj akin kintokatiayaj israelitas itech mar. Amo momakixtij nion se.

29 Sayoj ke israelitas nejnenkej kampa tauaktoya uan kipanauijkej mar. Uan at motsakuilij tajtanakastan uan moitaya kemej ome uejueyi tepamit. 30 Ijkon Jehová kinmakixtij israelitas nejon tonal, uan yejuan kinitakej akin katkaj de Egipto mikemejya ompa martenoj. 31 Israelitas no kiitakej keniuj Jehová kikuik ichikaualis para kinixpolos akin katkaj de Egipto. Yejua ika peuak kimojkatokaj Jehová uan takuaujtamatij iuan Jehová uan iuan Moisés, akin katka itekitikauj.

15 Nejon tonal, Moisés uan israelitas peuak kicantarouiliaj Jehová ijkuin:

“Nicantarouiliti Jehová porin okachi moueyitalij.

Caballo uan akin yaya ipanko kitamotak itech mar.

 2 Jah* nechchikaua uan nechpaleuia. Yejua nechmakixtia.

Yejua noDios uan nejua nikteixmatiltis. Yejua iDios nopaj, uan nejua nikueyitalis.

 3 Jehová kemej se soldado akin semi chikauak. Yejua monotsa Jehová.

 5 At tein motatamotaya ininpan uetsik uan kemej se tet pankalakkej hasta taijtik.

 9 Akin techtauelita kijtoj: ‘¡Nikintokatias! ¡Nikinajsitiuj!

¡Nikinkuilis tein kipiaj uan nikuikas nochi tein niknekis!

¡Nikixtis nomachete tein ojkan tenej* uan nikinchiuilis tein niknekis!ʼ.

11 Jehová, amo moajsi nion se dios kemej tejua.

Tejua senkis tichipauak. Nion se dios kemej tejua.

Moneki se mitsmojkatokas, uan mitsnamiki maj mitsueyitalikan ika tatsotson. Tikchiua uejueyi taman tein se kimojkaita.

12 Tikmelauak moyekmay, uan tal kintoloj.

Nochin akin nemij Canaán amo yeskijok yolchikaujkej.

16 Mouiskej uan fiero mojkakalakiskej.

18 Jehová taixyekanas kemej tekiuaj nochipaya.

20 Uan Míriam kikuik se tambortsin* uan nochin siuamej kitojtokatiajkej* uan kitsilinijtiayaj tambortsitsin uan mijtotijtiayaj. Míriam katka iikniuj Aarón uan kitematiltiaya tein Dios kijtoua. 21 Míriam cantarojtiaya uan kinnankilijtiaya takamej ijkuin:

“Xicantarouilikan Jehová porin okachi moueyitalij.

Caballo uan akin yaya ipanko kitamotak itech mar”.

22 Satepan, keman israelitas yetoyajok itech mar Rojo, Moisés kinkuiteuak. Yajkej itech taluakyan kampa motanotsa Sur. Nejnenkej eyi tonal uan amo kiajsikej at. 23 Uan ajsitoj Mará,* sayoj ke amo uelik tayikej at tein ompa onkaya porin chichik katka. Yejua ika, ompa motanotsak Mará. 24 Uan peuak kijijtouaj Moisés. Kijtouayaj: “¿Toni titayitij?”. 25 Moisés kitataujtij Jehová maj kipaleui uan Jehová kinextilij se koujtsin. Keman Moisés kitamotak itech at, in at amo chichikok katka.

Ompa Dios kinmakak se tanauatil uan kinnextilij tein monekia kichiuaskej. Dios kinekia kimatis ox kitakamatiskiaj. 26 Kiniluij: “Komo kuali nanechtajtolkakij nejua namoDios Jehová, uan nankichiuaj tein nikita ke kuali yetok, uan komo kuali nankikakij tein namechnauatia uan nankichiuaj nochi tein nikixtalia, amo namechtitanilis nion se kokolis* tein nikintitanilij akin nemiaj Egipto; porin nejua Jehová, nikchiuas xipaktokan”.

27 Satepan ajsitoj Elim, kampa onkaya 12 ameyalmej* uan 70 palmajkoujmej. Uan ompaka kinkejketskej ininkaltsitsin.*

16 Satepan kiskej de Elim uan nochin israelitas ajsitoj itech taluakyan kampa motanotsa Sin, tatajko de Elim uan Sinaí. Ajsikej itech metsti ziv,* tonal 15, se metsti satepan ke kiskej de Egipto.

2 Itech taluakyan nochin israelitas peujkej kinijijtouaj Moisés uan Aarón. 3 Yejuan kiniluiayaj: “¡Okachi kuali maj Jehová techmiktiani ne Egipto! Ompa tikuayaj nakat uan pantsin hasta tiixuiaj. Sayoj ke namejuan nantechualkuikej nikan kampa tauaktok para maj tinochin timayanmikikan”.

4 Uan Jehová kiluij Moisés: “Nikchiuati maj panxini tein nankikuaskej, uan nochin moneki kisaskej mojmostaj uan kiololoskej tein kikuaskej. Ijkon nikitas ox kichiuaj tein nikinnauatia. 5 Sayoj ke itech chikuasentika tonal, maj kiololotij tein kikuaskej ome tonal uan maj kichijchiuakan”.

6 Yejua ika Moisés uan Aarón kiniluijkej nochin israelitas: “Tiotakpa nankiyekmatiskej ke Jehová namechkixtij de Egipto. 7 Uan kualkampa nankiitaskej iueyi chikaualis Jehová, porin Jehová kikakini keniuj nankijijtouaj. ¿Keyej nantechijijtojtokej, ta tejuan amo teyi tichiuanimej?”. 8 Moisés no kijtoj: “Keman Jehová namechmakas nakat tiotakpa, uan keman namechmakas pantsin kualkampa hasta nanixuiskej, nankiitaskej ke Jehová kikakini keniuj nankijijtouaj. Tejuan amo teyi tichiuanimej. Amo tejuan nantechijijtojtokej, ta tein melauj nankijijtojtokej Jehová”.

9 Uan Moisés kiluij Aarón: “Xikinilui nochin israelitas: ‘Ximosentilikij nikan, porin Jehová kikakini keniuj nankijijtouaj’”. 10 Niman keman Aarón tamitajtoj, israelitas moixkepkej uan tachiakej kampa yetoya taluakyan, uan iueyi chikaualis Jehová monextij itech se mixti.

11 Jehová no kiluij Moisés: 12 “Nikakini tein israelitas kijtojtinemij. Xikinilui: ‘Keman tapoyaujtosya nankikuaskej nakat, uan kualkampa nankikuaskej pantsin hasta nanixuiskej. Uan nankiyekmatiskej ke nejua niJehová namoDios’”.

13 Yejua ika nejon tiotak ejkokej tel miak totomej* uan temitoj kampa yetoyaj ininkaltsitsin* israelitas, uan kualkampa ajuachtaj katka tatenoj de kampa nemiaj. 14 Keman ajuach pankisak kemej mixti, tein mokauak talpan katka kemej xinachtsitsin tein ixtentoya kemej sekti. 15 Kemej israelitas amo kimatiaj toni katka, keman kiitakej peuak motajtaniaj: “¿Toni ne?”. Moisés kiniluij: “Nejin yejua tein Jehová namechmakatok para nankikuaskej. 16 Yejua nejin tein Jehová tanauatij: ‘Nanochin xikololokan tein uelis nankikuaskej. Xikuikan se tamachiuj tein monotsa omer* para sejse akin nemi namochan’”. 17 Uan yejua nejon tein kichiujkej israelitas. Sekin kiololojkej miak uan sekin amo miak. 18 Keman kitamachiuayaj ika omer, akin kisentilij miak, amo kipiak okachi ke tein kipolouaya, uan akin kisentilij tepitsin, amo teyi kipoloj. Sejse kiololouaya tein kikuaskia.

19 Uan Moisés kiniluij: “Maj amo akaj kikaua nion tepitsin para mostika”. 20 Sayoj ke amo kichiujkej tein Moisés kiniluij. Keman sekin kikaujkej tepitsin hasta mostika, okuilouak uan peuak tsojyaya. Yejua ika Moisés kualanik iniuan. 21 Kuajkualkampa, sejse kiololouaya tein yaya kikuati. Keman peuaya tonaya, tein mokauaya patia.

22 Itech chikuasentika tonal kiololojkej tein kikuaskiaj ome tonal. Sejse kiololoj ome tamachiuj tein monotsa omer. Yejua ika taixyekananij israelitas kinauatikoj Moisés. 23 Uan yejua kiniluij: “Yejua nejin tein Jehová kijtoj. Mosta amo xikchiuakan nion se tekit, porin tonal sábado xeliujtok para Jehová. Yejua ika xikyokxitikan uan xikmolontikan* tein monekis. Tein mokauas, uelis nankikuiskej hasta mostika”. 24 Yejua ika, kikuikej tein mokauak hasta mostika, ijkon kemej Moisés tanauatijka, uan amo okuilouak nion tsojyayak. 25 Uan Moisés kiniluij: “Xikuakan axkan, porin axkan sábado xeliujtok para Jehová. Komo axkan nankitemotij amo nankiajsiskej. 26 Nankiololoskej chikuasen tonal, sayoj ke itech tonal sábado, amo teyi onkas”. 27 Maski ijkon, itech tonal sábado, sekin kitemotoj, sayoj ke amo teyi kiajsikej.

28 Yejua ika Jehová kiluij Moisés: “¿Hasta kemanian nankichiuaskejya tein namechiluia uan tein namechnauatia? 29 Xikelnamikikan ke Jehová namechmakatok tonal sábado para ximoseuikan. Yejua ika itech chikuasentika tonal namechmaka tein nankikuaskej ome tonal. Uan itech chikometika tonal nochin moneki mokauaskej kampa yetokej; maj amo akin kisa de ompa”. 30 Yejua ika israelitas moseuijkej itech tonal sábado.

31 Nejon takual, israelitas kitokaytijkej maná.* Istak katka kemej iteyo cilantro uan uelik katka kemej pantsin ika nekti.* 32 Uan Moisés kijtoj: “Yejua nejin tein Jehová tanauatij: ‘Xikuikan se omer de maná uan xikxelokan, para maj nochin akin yoltiaskej kiitakan takual tein ika namechtamakak itech taluakyan keman namechkixtij de Egipto’”. 33 Yejua ika Moisés kiluij Aarón: “Xikui se kontsin, xiktemili se omer de maná uan xiktali iixpan Jehová para maj kiitakan nochin akin yoltiaskej”. 34 Uan ijkon kemej Jehová kinauatij Moisés, Aarón kitalij iixpan tatiochiualkaxon* para maj ompa yeto. 35 Israelitas kikuajkej maná 40 xiujmej, hasta keman ajsikej itech se xolal kampa nemiaj oksekin. Kikuajkej maná hasta keman ajsikej kampa peua tal tein poui Canaán. 36 Majtakti tamachiuj tein monotsa omer yejua se tamachiuj tein monotsa efá.*

17 Nochin israelitas kiskej den taluakyan kampa motanotsa Sin. Mokaltalijtiayaj ijkon kemej Jehová kinnauatiaya. Uan keman yetoyaj kampa motanotsa Refidim, amo onkaya at tein ueliskia tayiskej.

2 Yejua ika peujkej kualanij iuan Moisés uan kiluiaj: “¡Xitechmaka at porin tiamikij!”. Sayoj ke Moisés kinnankilij: “¿Keyej nankualanij nouan? ¿Keyej nankisentokaj nankiyejyekouaj Jehová?”. 3 Sayoj ke ompa nochin tel amikiaj. Yejua ika peujkej kijijtouaj Moisés uan kiluiaj: “¿Keyej titechkixtij de Egipto? Tejuan, tokoneuan uan totapialuan timikitij. ¿Yejua nejon tein tiknekia?”. 4 Yejua ika, Moisés kitataujtij Jehová maj kipaleui uan kiluij: “¿Toni maj nikchiua? ¡Tepitsin poliui para nechtetemaskej!”.*

5 Uan Jehová kiluij Moisés: “Xitayekanteua uan xikinuika seki taixyekananij israelitas, uan no ximaaktiuj topil tein ika tikuitekik ueyiat Nilo. 6 Nejua nietos itech tepejxit ompa Horeb. Tejua moneki tikuitekis tepejxit, uan kisas at para maj nochin atikan”. Yejua nejon tein Moisés kichiuak ininixpan taixyekananij israelitas. 7 Yejua ika ompa tatokaytij Masá* uan Meribá,* porin israelitas iuan kualankaj Moisés uan porin kiyejyekojkaj Jehová keman kijtojkej: “¿Touan yetok Jehová oso amo?”.

8 Uan akin kinixmatij kemej amalequitas yajkej Refidim uan kinteuitoj israelitas. 9 Yejua ika Moisés kiluij Josué: “Xikinkuiteua seki takamej uan ximoteuitij iniuan amalequitas. Mosta nietos tepekuapan uan nimaaktos topil tein toTajtsin Dios nechiluij maj nikuika”. 10 Uan Josué kichiuak ijkon kemej kiluijka Moisés uan moteuito iniuan amalequitas. Uan Moisés, Aarón uan Hur pankiskej tepekuapan.

11 Keman Moisés maajkoijkaya, israelitas tataniaj; sayoj ke keman momatemouiaya, amalequitas tataniaj. 12 Keman Moisés makoujtik, kiuikilijkej se tet para maj ompa motali, uan yejua ompa motalij. Uan Aarón uan Hur moketskej inajnakastan para kimapaleuiskej. Ijkon Moisés maajkoijkaya hasta ke pankalakik tonaltsin. 13 Ijkon, Josué kintanik amalequitas.

14 Uan Jehová kiluij Moisés: “Xikijkuilo nejin itech amatajkuilol para maj moelnamiki uan oksepa xikilui Josué: ‘Nikintamiixpoloti amalequitas uan amo akinok kinelnamikis’”. 15 Uan Moisés kichijchiuak se altar uan kitokaytij Jehová-Nisí 16 keman kijtoj: “Kemej amalequitas kiixnamikij Jah uan amo kinekij maj taixyekana, Jehová kinteuijtos yejuan uan nochin ininkoneuan akin yoltiaskej”.

18 Jetró, tiopixkat ompa Madián akin katka imontat Moisés, kimatik keniuj Dios kipaleuijka Moisés uan israelitas. No kimatik keniuj Jehová kinkixtijka israelitas de Egipto. 2 Moisés kititanka isiuatsin, Ziporá, maj mokepa ichan. Uan Jetró kiyekpixtoya yejua 3 uan ome iokichpipiluan. Se monotsaya Guersom.* Moisés ijkon kitokaytij porin kijtoj: “Ninemi itech nejin tal kampa amo nikayot”. 4 Uan okse kitokaytij Eliezer,* porin kijtoj: “IDios nopaj nechpaleuia. Yejua nechmakixtij para maj tekiuaj akin taixyekanaya Egipto amo nechmikti”.

5 Yejua ika Jetró, Ziporá uan iokichpipiluan kiajsitoj Moisés itech taluakyan, amo uejka den tepet tein Dios kijitak.* 6 Uan Jetró tanauatij maj kiluitij Moisés nejin: “Nejua niajtok iuan mosiuatsin uan mookichpipiluan timitsitatij”. 7 Moisés nimantsin kinamikito imontat, moixpiloj uan kimakak se beso.* Satepan ke motajpalojkej, kalakkej kalijtik.

8 Moisés kitapouij imontat nochi tein Jehová kichiuilij tekiuaj uan akin nemiaj Egipto para kinpaleuis israelitas. No kitapouij nochi kuejmolmej tein kipanokej itech ojti uan keniuj Jehová kinmakixtijka. 9 Jetró semi mouelitak keman kimatik nochi tein kuali tein Jehová kichiujka keman kinkixtij israelitas de Egipto. 10 Uan Jetró kijtoj: “Maj kiueyitalikan Jehová, akin namechmakixtij ompa Egipto uan namechpaleuij para maj tekiuaj amo teyi namechchiuili, uan kinkixtij nochin israelitas de Egipto para maj amo kintajyouiltikanok. 11 Axkan nikmati ke Jehová okachi ueyichiujkej ke nochin okseki dioses. Porin yejua kinpaleuij israelitas keman akin nemiaj Egipto moueyimatkej* uan kintajyouiltijkej”. 12 Uan Jetró, imontat Moisés, kiuikak se tapialtsin para kichichinouilis Dios uan no kiuikilij okseki tapialtsitsin para kimaktilis. Uan Aarón uan nochin taixyekananij israelitas takuatoj iuan imontat Moisés iixpan toTajtsin Dios.

13 Mostika, Moisés motalij kemej ipa para kinpaleuis israelitas kemej juez. Desde kualkan hasta tiotak, yejuan yayaj kiitatij Moisés. 14 Keman imontat Moisés kiitak nochi tein kichiuaya, kitajtanij:* “¿Keyej tikchiujtok nejin? ¿Keyej moselti timotalia nikan uan nochin mitsitakij desde kualkan hasta tiotak?”. 15 Moisés kinankilij imontat: “Porin kimatisnekij toni kijtoua Dios. 16 Keman omen kipiaj se kuejmol, nechixpantilikij. Uan nejua moneki nikitas akoni kichiujtok tein kuali uan nikinmatiltis tein toTajtsin Dios kiixtalia uan tein tanauatia”.

17 Imontat Moisés kiluij: “Amo kuali yetok tein tikchiujtok. 18 Timosioujtiti tejua uan akin nikan mouan yetokej. Moneki tikchiuas tel miak tekit uan amo uelis tikchiuas moselti. 19 Nimitsiluiti tein uelis tikchiuas, uan Dios mitstatiochiuis. Tejua tikiluis toTajtsin Dios tein israelitas kiluiskiaj uan moneki tikixpantilis toTajtsin Dios kuejmolmej tein kipiaj. 20 Uan moneki tikiniluis toni kiixtalia Dios uan toni tanauatia, keniuj moneki nemiskej uan toni moneki kichiuaskej. 21 Moneki tikinijitas* seki takamej akin kuali taixejekouaj uan kimojkatokaj Dios, maj takuaujtamachmej uan maj amo xijxikuimej.* Moneki tikinixtalis sekin maj kinixyekanakan mil, sekin maj kinixyekanakan cien, sekin cincuenta uan sekin majtakti. 22 Yejuan moneki kiitaskej toni mochiuas keman kinixpantiliskej teisa. Tein ouij mitsixpantiliskej tejua, sayoj ke tein amo ouij yejuan kiitaskej. Xikaua maj mitspaleuikan uan ijkon amo tikpiasok miak tekit. 23 Komo tikchiua nejin uan Dios ijkon kineki,* amo tisiouis uan keman mokepaskej ininchan amo akin motekipachojtias”.

24 Moisés kitajtolkakik imontat uan nimantsin kichiuak nochi tein kiluijka. 25 Kinijitak* seki takamej itech nochi Israel akin kuali taixejekouayaj uan kinixtalij maj taixyekanakan: sekin maj kinixyekanakan mil, sekin maj kinixyekanakan cien, sekin cincuenta uan sekin majtakti. 26 Yejuan kiixejekouayaj toni mochiuaskia keman kinixpantiliayaj teisa. Tein ouij kiixpantiliayaj Moisés, sayoj ke tein amo ouij yejuan kiitayaj. 27 Satepan Moisés monauatij iuan imontat, uan imontat mokepak ichan.

19 Ome metsti satepan ke israelitas kiskej de Egipto, ajsikej itech taluakyan Sinaí. 2 Kiskej de Refidim, ajsikej itech taluakyan Sinaí uan ompa kinkejketskej ininkaltsitsin* tepeixpan.

3 Uan Moisés pankisak tajtoto iuan toTajtsin Dios. Itech tepet, Jehová kiualnotsak uan kiluij: “Yejua nejin tein moneki tikiniluis israelitas, ikoneuan Jacob: 4 ‘Namejuan nankiyekitakej tein nikinchiuilij akin nemiaj Egipto. Namechualkuik nikan kemej se águila kinuika ipiluan itech iajtapaluan. 5 Uan axkan, komo nankichiuaj nochi tein namechnauatia uan tein nimotenkauati namouan, de nochin akin nemij itech taltikpak sayoj namejuan okachi namechtasojtas, porin nochi taltikpak noaxka. 6 Nanyeskij tekiuanij uan tiopixkamej, nanpouiskej itech se altepet tein nimoxelouilij’. Nochi nejon moneki tikiniluis israelitas”.

7 Uan Moisés temok, kinsentilij taixyekananij israelitas uan kiniluij nochi tein Jehová kinauatijka. 8 Satepan, nochin israelitas tanankilijkej: “Tikchiuatij nochi tein Jehová kijtoj”. Nimantsin, Moisés kiluito Jehová tein nochin kijtojkej. 9 Uan Jehová kiluij Moisés: “Xikita, nimitsitakiuj uan nimitsualnojnotsas desde kampa tatileujtos, para maj nochin kikakikan tein nimitsiluis uan para maj nochipa no mouan takuaujtamatikan”. Uan Moisés kimatiltij Jehová tein nochin kijtojkaj.

10 Jehová kiluij Moisés: “Xikinitati israelitas uan xikinilui maj axkan uan mosta mochipauakan para nechueyichiuaskej, uan yejuan moneki kipakaskej inintasal.* 11 Uan para uipta maj yetokanya kemej moneki, porin ijkuak, nejua Jehová, niualpantemos itech tepet Sinaí ininixpan nochin. 12 Moneki tiktalis se lindero tepetsintan uan tikiniluis israelitas: ‘Amo xipankisakan itech tepet nion ximonalketsakan nepaka. Akin kitalis se imets itech tepet moneki nankimiktiskej. 13 Sayoj ke amo xikitskikan, ta moneki nankitetemaskej* oso nankimotaskej.* Amo importa ox tapial oso takat, maj miki’. Sayoj ke, keman mokakis ke tapitsaj,* uelis motokiskejya”.

14 Satepan, Moisés temok den tepet uan peuak kiniluia israelitas maj mochipauakan para kiueyichiuaskej Dios, uan yejuan kipakkej inintasal. 15 Moisés kiniluij: “Xikchiuakan tein moneki para uipta kuali nanyetoskejya. Amo ximotekakan iuan namosiuatsin”.

16 Uiptika kualkan tatitikuinik uan tapepetanik. Fiero tatileuik itech tepet uan mokakia ke chikauak tapitsayaj. Nochin akin ompa yetoyaj peuak uiuiyokaj. 17 Uan Moisés kichiuak maj nochin kisakan de kampa yetoyaj ininkaltsitsin para kikakiskej tein toTajtsin Dios kiniluiskia, uan yejuan mokejketskej tepetsintan. 18 Tepet Sinaí tamipopokaya, porin Jehová ompa ualpantemoka itech tit.* Pokti kisaya kemej tikotaj uan nochin tepet chikauak mooliniaya. 19 Keman mokakia ke okachi chikauak tapitsayaj, Moisés tajtouaya uan toTajtsin Dios kinankiliaya.

20 Jehová ualpantemok itech tepet Sinaí, ikuapan tepet. Uan Jehová kiluij Moisés maj pankisani ompa, uan Moisés pankisak. 21 Jehová kinauatij Moisés: “Xipantemo uan xikinnejmachtiti israelitas maj amo moteltokikan para nechitaskej nejua, Jehová, porin komo ijkon kichiuaj, miakej mikiskej. 22 Uan no, nejua Jehová, nikneki xikinilui takamej akin nechtekitiliaj kemej tiopixkamej, maj mochipauakan para nechueyichiuaskej, para maj nejua Jehová amo nikinmikti”. 23 Moisés kiluij Jehová: “Israelitas amo uelis pankisaskej itech tepet Sinaí porin ipa titechnejmachtijya keman tinechiluij: ‘Xiktali se lindero tepetsintan uan xinechxelouili’”. 24 Sayoj ke Jehová kiluij: “Xitemo uan xikuiti Aarón. Sayoj ke amo xikinkaua maj tiopixkamej nion oksekin nalpanokan para pankisaskej uan nechitaskej nejua Jehová, para maj amo nikinmikti”. 25 Yejua ika Moisés temok uan kiniluij israelitas tein Dios kijtoj.

20 Uan Dios tanauatij nejin:

2 “Nejua nimoDios Jehová, akin mitskixtij de Egipto, kampa mitsteltekitiltiayaj. 3 Sayoj xinechueyichiua nejua, amo xikinueyichiua okseki dioses.

4 ”Amo ximochijchiuili nion se tatadios,* nion okse taman tein tamatis kemej teisa tein yetok iluikak, itech taltikpak oso itech at para tikueyichiuas. 5 Amo ximoixpilo ininixpan nion ximokaua maj mitstanejnektikan para xikinueyichiua, porin nejua Jehová nimoDios nitanauatia maj sayoj nejua nechueyichiuakan. Uan komo aksa nechtauelita, nikaua maj ikoneuan, iixuiuan uan ininkoneuan iixuiuan tajyouikan por tajtakol tein yejua kichiuas. 6 Sayoj ke komo aksa nechtasojta uan kichiua tein nitanauatia, nochipa nikintasojtas nochin ikoneuan akin yoltiaskej, tel miak xiujmej tein nion ueli se kipoua.

7 ”Amo xikauilmati* itokay moDios Jehová, porin xikyekmati ke Jehová kitatsakuiltis akin kiauilmatis itokay.

8 ”Xikelnamiki ke tonal sábado xeliujtok para nejua. 9 Uelis titekitis chikuasen tonal uan tikchiuas nochi mochiualis. 10 Sayoj ke itech chikometika tonal amo xikchiuakan nion se tekit, tejua, mokoneuan, motakeualuan, motapialuan nion akin okseko kayomej uan nemij mouan. Tonal sábado xeliujtok para nejua Jehová. 11 Porin nejua Jehová, itech chikuasen tonal nikchijchiuak iluikak, taltikpak, mar uan nochi tein onkak. Sayoj ke itech chikometika tonal peuak nimoseuia. Yejua ika, nejua Jehová niktiochiuak tonal sábado uan nimoxelouilij.

12 ”Xiktakachiua* mopaj uan momaj. Ijkon uejkaua tiyoltos itech tal tein nejua Jehová moDios nimitsmakas.

13 ”Amo xitemikti.

14 ”Amo xiauilnemi.

15 ”Amo xitachteki.

16 ”Komo mitsnotsaj para xikijtoti tein mokniuj kichiuak, amo xiktakajkayauili.

17 ”Amo xikixnejneki ichan mokniuj. Amo xikixnejneki isiuatsin, itakeualuan, ikuakouej, iburro uan nion teyi tein iaxka”.

18 Uan nochin israelitas kiitakej uan kikakkej keniuj tatitikuinia, tapepetania, tapitsayaj* uan keniuj popokaya tepet. Yejua ika nochin peuak uiuiyokaj uan amo motokijkej. 19 Yejua ika kiluijkej Moisés: “Tejua xitechnojnotsa uan tejuan timitskakiskej, sayoj ke maj amo technojnotsa Dios porin uelis timikiskej”. 20 Uan Moisés kiniluij: “Amo ximouikan, porin toTajtsin Dios namechitako para nochipa xikmojkatokakan uan amo xitajtakokan”. 21 Yejua ika israelitas amo motokijkej, sayoj ke Moisés motokij itech mixti kampa yetoya toTajtsin Dios.

22 Uan Jehová kiluij Moisés: “Yejua nejin tein moneki tikiniluis israelitas: ‘Namejuan nankiyekitakej ke namechnojnotsak desde iluikak. 23 Amo ximochijchiuilikan tatadiosmej* ika plata oso ika oro para nankinueyichiuaskej, porin sayoj nejua moneki nanechueyichiuaskej. 24 Xinechchijchiuilikan se altar ika tal. Ompa nanechinmaktiliskej namoichkauan* uan namokuakuejuan. Seki nankichichinoskej uan okseki nanechinmaktiliskej para tisentakuaskej.* Kampa nikixtalis maj nechueyichiuakan,* ompa namechajsitiuj uan namechtatiochiuis. 25 Komo nanechchijchiuiliaj se altar ika tet, amo xiktajtapanakan nejon tet ika se tepos.* Porin komo ijkon nankichiuaj, amo nikitasok ke chipauak. 26 Amo no xikchijchiuilikan escalones noaltar. Ijkon amo monekis nantejkoskej* uan amo moitas namonakayo tatampa de namotasal’.*

21 ”Uan no, moneki tikinmatiltis nejin tanauatilmej:

2 ”Komo tikoua se takeual hebreo,* yejua mitstekitilis chikuasen xiuit, sayoj ke itech chikometika xiuit moneki tikauas maj youi uan amo teyi taxtauas. 3 Komo ejkok iselti, yas iselti, sayoj ke komo ejkok iuan isiuatsin, no iuan yas. 4 Komo iteko kinamiktia iuan se siuatsin uan kinpiaj konemej, siuatsin uan konemej yeskij iaxkauan iteko. Yejua ika takeual yas iselti. 5 Sayoj ke, komo takeual miakpa kijtoua ‘Amo nikneki nias porin niktasojta noteko, nosiuatsin uan nokoneuan’, 6 iteko kinakastalis itech puerta oso itech kaltenkouit uan kinakaskoyonis. Uan toTajtsin Dios kiitas keman kichiuas nejin.* Ijkon, nejon takeual kitekitilis iteko hasta ke momikilis.

7 ”Komo se takat kinamaka isiuapil, nejon siuapil amo kikauaskej maj youi kemej kimajkauaj se takat akin no kinamakakej. 8 Komo akin kikouak nejon siuapil amo kikui kemej okse isiuatsin* porin amo kiuelita uan kinamakiltia okse takat, amo uelis kinamakiltis akin amo israelita, porin sayoj ika mauiltij nejon siuapil. 9 Komo kinamiktia iuan iokichpil, yejua moneki kiitas kemej se isiuapil. 10 Komo motemolia okse isiuatsin, moneki kisentokas kimakas tein kikuas, tein motalilis uan iuan motekas. 11 Komo amo kineki kichiuas nejin eyi taman, siuatsin uelis yas uan amo teyi taxtauas.

12 ”Akin kikokos aksa* uan kimiktis, moneki mikis. 13 Sayoj ke komo amo kinekia kimiktis uan toTajtsin Dios kikaua maj pano, akin temiktij uelis cholos kampa nimitsiluis. 14 Akin tel kualanis iuan iikniuj uan kimiktis porin ijkon kinemilij, moneki mikis maski tikixtitiuj de noaltar. 15 Akin kimagas* itat oso inan moneki mikis.

16 ”Komo se takat kiichteki aksa uan kinamaka oso kiajxiliaj ke kipixtok, nejon takat moneki mikis.

17 ”Akin kiuijuikaltis* itat oso inan, moneki mikis.

18 ”Komo seki takamej moteuiaj uan semej kimaga* okse takat ika se tet oso ika mayit* uan amo miki sayoj ke moneki petauetstos, moneki mochiuas nejin: 19 komo ueli meua uan ueli kisa uan nejnemi ika se topil, takat akin kikokoj amo teyi kichiuiliskej; sayoj ke moneki kiixtauilis tonalmej tein amo tekitis hasta maj kuali pajti akin kikokoj.

20 ”Komo se takat kimaga* itakeual ika se kouit uan kimiktia, nejon takat moneki kitatsakuiltiskej. 21 Sayoj ke, komo nejon takeual taxikoua se oso ome tonal uan momikilia, iteko amo teyi kichiuiliskej porin yejua kikouak ika itomin.

22 ”Komo seki takamej moteuijtokej uan kikokouaj se siuatsin akin kokoxkayetok uan yejua ika kipia ikonetsin achto ke ajsis tonal, yejua nejin tein moneki mochiuas: komo amo miki* yejua nion ikonetsin, akin kikokoj moneki taxtauas. Moneki kiixtauas tein tajtanis itakatsin siuatsin uan jueces. 23 Sayoj ke komo semej miki, akin tekokoj no moneki mikis. 24 Akin teixpitsinis maj no kiixpitsinikan, akin tetanpixos maj no kitanpixokan,* akin temakokos maj no kimakokokan, akin temetskokos maj no kimetskokokan, 25 akin techichinos maj no kichichinokan, akin tekokos maj no kikokokan uan akin temagas maj no kimagakan.

26 ”Komo se takat kiixpitsinia itakeual, moneki kikauas maj youi porin kiixpitsinij. 27 Uan komo kimaga uan kitankixtia itakeual, moneki kikauas maj youi porin kitankixtij.

28 ”Komo se kuakouej kicuernojuia se takatsin oso se siuatsin uan kimiktia, kuakouej moneki kitetemaskej* hasta maj miki uan amo kikuaskej. Sayoj ke akin iaxka kuakouej amo teyi kichiuiliskej. 29 Uan komo kuakouej ipa tacuernojuiani uan akin iaxka amo kitsakuak maski ipa kiluijkajya, uan kuakouej kimiktia se takatsin oso se siuatsin, kuakouej moneki kitetemaskej* uan no moneki kimiktiskej akin iaxka. 30 Komo akin iaxka kuakouej kitajtaniaj maj taxtaua para momakixtis, moneki taxtauas tein kitajtaniskej. 31 No ijkon moneki kichiuiliskej akin iaxka kuakouej komo kicuernojuia se okichpiltsin oso se siuapiltsin. 32 Uan komo kuakouej kicuernojuia se takeual, akin iaxka kuakouej moneki kimakas iteko takeual 30 platajtomin,* uan kuakouej moneki kitetemaskej* hasta maj miki.

33 ”Komo se takat kitentapoua se ueyi talkoyok* oso kiichkua uan amo kitentsakua, uan se kuakouej oso se burro ompa pankalaki, 34 nejon takat* moneki kiixtauas tapial tein mikik. Moneki kiixtauilis akin iaxka tapial, uan nejon tapial miket yeski iaxka. 35 Komo ikuakouej se takat kiteuia ikuakouej okse takat uan kimiktia, yejuan moneki kinamakaskej kuakouej tein tateuij uan motatajkouiskej tomin. No moneki motatajkouiskej kuakouej miket. 36 Oso komo kimatiajya ke ipa tacuernojuijkaya, sayoj ke akin iaxka kuakouej amo kitsakuak, moneki taxtauas ika okse kuakouej, uan kuakouej miket yeski iaxka.

22 ”Komo se takat kiichteki se kuakouej oso se ichkat* uan kimiktia oso kinamaka, moneki taxtauas. Komo kiichteki se kuakouej moneki kikepas makuil kuakuejmej, komo kiichteki se ichkat moneki kikepas naui ichkamej.

2 ”(Komo kiixajsij se tachtekkej kalaktok techan youak uan kimagaj* uan kimiktiaj, akin kimiktij amo kitatsakuiltiskej. 3 Sayoj ke komo nochi nejin panoua keman ipa tanesikya, akin kimiktij moneki kitatsakuiltiskej).

”Tachtekkej moneki taxtauas. Komo amo teyi kipia, moneki kinamakaskej para kiixtauas nochi tein kiichtekik. 4 Komo kiajxiliaj yoltokok kuakouej, burro oso ichkat, tachtekkej moneki kitemakas ome tapialmej.

5 ”Komo aksa* kinuika itapialuan maj takuatij italpan oso kampa kitoktok uvas uan kinkaua maj kalakitij tetalpan uan tatamiaj, moneki taxtauas. Moneki kitemakas tein okachi kuali tein mochiuas italpan oso uvas tein kitekis.

6 ”Komo aksa tatikuiltia uan tataj* koujtsitsin uan hasta tatok tein ijilpitok, tatok tein ayamo kitekij oso nochi tein onkak itech nejon tal, akin tatikuiltij moneki kiixtauas nochi tein tatak.

7 ”Komo se takat kimaka okse takat itomin oso okse taman para maj kipiali sayoj ke kalakij ichan uan kiichtekiliaj, komo kiajsij akin tachtekik, moneki kiixtauas okse achiok. 8 Sayoj ke komo amo kiajsij, akin kitachtekitoj moneki kiuikaskej iniuan jueces para maj toTajtsin Dios kinexti ox yejua mokuilij. 9 Keman aksa kijtos ke okse kikuilij teisa, uelis yeski se kuakouej, se burro, se ichkat, se tasal* oso okse taman tein kipoloj, nejon omen moneki yaskej iniuan jueces para maj toTajtsin Dios kinexti akoni iaxka tein poliuik. Dios kinextis akoni kichiuak tein amo kuali, uan yejua moneki kimakas okse takat okse achiok.

10 ”Yejua nejin tein moneki mochiuas komo se takat kiluia okse maj kiyekpiali se burro, se kuakouej, se ichkat oso okse tapial uan nejon tapial miki, motelkojkokoua oso kiuikaj uan amo akin kiita toni panok. 11 Akin kipixtoya tapial moneki kijtos itokaykopa Jehová ke yejua amo teyi kichiuilij. Akin iaxka tapial moneki kineltokilis nejon takat, uan yejua amo monekis kikepilis nion teyi. 12 Sayoj ke komo kiichtekiliaj tapial,* moneki kikepilis akin iaxka katka. 13 Uan komo se tekuani kikokototsak nejon tapial, nejon takat moneki kiualkuis tapial takokotots. Amo teyi monekis kikepas komo ijkon panoua.

14 ”Komo aksa kitaneuilia okse takat se tapial uan nejon tapial motelkojkokoua oso miki uan akin iaxka amo kiita, takat akin taneuik tapial moneki taxtauas. 15 Sayoj ke komo akin iaxka tapial kiita tein panok, akin taneuik amo moneki kiixtauas nion teyi. Komo taxtaujka para maj kitaneujtikan, amo teyi kitemakasok.

16 ”Komo se takat kikajkayaua se ichpoch* akin amo kijtantokej uan iuan moteka, nejon takat moneki kitemakas tein kitemakaj keman taijtanij para uelis iuan monamiktis. 17 Komo tetat amo kineki kitemakas isiuapil, takat akin kikajkayauak ichpoch ipa moneki taxtauas.

18 ”Moneki tikmiktis se siuat akin tenaualuia.

19 ”Akin motekas iuan se tapial* moneki mikis.

20 ”Akin kimaktilis tapialmej okseki dioses, moneki mikis. Sayoj Jehová moneki kimaktiliskej tapialmej.

21 ”Amo ika ximauilti nion xiktajyouilti akin amo israelita uan nemi mouan, porin namejuan no nanenkej Egipto, kampa amo nankayomej.

22 ”Amo xiktajyouiltikan akin amo nemiok itakatsin nion akin amo kinpiaok itatuan.* 23 Komo tikintajyouiltia uan yejuan nechtataujtiaj maj nikinpaleui, xikyekmati ke nejua nikinkakis. 24 Uan nitelkualanis namouan uan nikchiuas maj namechmiktikan akin namechtauelitaj. Namosiuauan amo kipiaskejok inintakauj uan namokoneuan amo kipiaskejok inintat.

25 ”Komo tiktaneujtia tomin se israelita akin pobre,* amo xikchiua kemej akin ipa tetaneujtia tomin.* Amo xiktajtani okachi para tiktanilis.

26 ”Komo mokniuj mitskauilia ipantaken para kinextis ke yekmelauj mitskepilis tein tiktaneujtij, moneki tikepilis ipantaken achto ke tapoyauis. 27 Porin sayoj yejua nejon tein kipia para mopankentis. ¿Toni mokentis keman kochitiuj? Keman nechtataujtis maj nikpaleui, xikyekmati ke nikakis porin niteiknelia.*

28 ”Amo xikuijuikalti* Dios nion xikuijuikalti se akin mitsixyekana.

29 ”Tein tiktokas motelchiuas uan no tiktelpias vino uan aceite. Amo xiknenemilijto ox tinechmaktilis nejon. Xinechmaktili mokoneuj akin tayekana. 30 Yejua nejin tein moneki tikchiuas iuan mokuakouej uan moichkauj: maj iuan yeto inan chikome tonal, sayoj ke itech chikueyitika tonal tinechmaktilis.

31 ”Namejuan moneki nankinextiskej ke nanxeliujtokej para nejua. Uan komo nankiajsij se tapial tein se tekuani kikokototsak, amo xikuakan. Xikintamotilikan itskuimej.

23 ”Amo xikijtojtinemi teisa tein amo melauj. Amo xitetakajkayauili para tikpaleuis akin amo yolkuali. 2 Amo xikchiua tein amo kuali sayoj porin miakej ijkon kichiuaj, uan keman tietos ininixpan jueces amo xitakajkayaua sayoj para tikinyolpaktis miakej. 3 Keman mitsuikiliskej se pobre para maj moyektali ikuejmol, amo xikpaleui sayoj porin pobre.

4 ”Komo tikajsi se kuakouej oso se burro tein kipoloj akin mitstauelita, moneki tikepilis. 5 Komo tikita ke iburro akin mitstauelita mopechiltij itamamal, amo ompa xikaua. Moneki tikpaleuis nejon takat maj kiajchiuili tamamal.

6 ”Keman kiitstoskej kuejmol tein kipias se pobre, amo ximokalaki para maj kiixtalikan tein amo kuali.

7 ”Amo ximokalaki keman kitakajkayauilijtoskej aksa,* nion xikchiua maj kimiktikan akin amo teyi kichiujtok nion akin kichiua tein kuali yetok, porin amo ijkon nikauas akin kichiua tein amo kuali.

8 ”Amo xikuili tein mitsmakas akin kineki mitstaxtauis para xitakajkayaua, porin nejon kichiua maj amo yektanemiliok akin yektanemiliaya uan uelis kichiuas maj takajkayaua akin yolkuali.

9 ”Amo xiktajyouilti akin amo israelita uan nemi mouan. Namejuan nankimatij keniuj se nemi kampa amo se kayot, porin namejuan no nanenkej Egipto, kampa amo nankayomej.

10 ”Titatokas uan tiktekis tein tiktokas chikuasen xiuit. 11 Sayoj ke itech chikometika xiuit amo xitatoka, ta xikixseui motal. Tein mochiuas itech nejon xiuit kikuaskej pobres, uan tein yejuan kikauaskej kikuaskej koujtajtapialmej. No ijkon moneki tikauas uvajkouit uan olivojkouit tein tiktoktos.

12 ”Titekitis chikuasen tonal, sayoj ke itech chikometika tonal amo titekitis para maj mokuakouej uan moburro moseuikan, uan para maj moyolkuikan motakeualuan uan akin amo israelitas.

13 ”Kuali xikakikan nochi tein namechiluij uan xikchiuakan. Amo xikinteneuakan okseki dioses. Amo xikintenkuitokan.

14 ”Sejse xiuit expa tinechiluichiuis. 15 Tikchiuas iluit keman tikuas pantsin tein amo kisamaualtiaj,* ijkon kemej nimitsnauatij. Tikuas nejon pantsin chikome tonal itech metsti abib* kemej nikixtalij, porin ijkuak tikisak de Egipto. Nochin akin nechueyichiuakiuij moneki kiualkuiskej teisa. 16 No tikchiuas iluit keman peuas tiktekis tein mochiuak* motalpan, tein yekinika chikauayak. Uan no keman tamis xiuit, tikchiuas iluit keman tiktamitekisya nochi tein mochiuak* porin titeltekitik. 17 Expa xiuit, nochin takamej moneki nechueyichiuakiuij nejua, namoTeko Jehová.

18 ”Keman tinechmaktilis se tapial, amo xiktemaka esti uan teisa tein kipia levadura. Uan amo ximokauili hasta mostika imantecayo se tapial tein tinechmaktilis keman tinechiluichiuis.

19 ”Tikuikas ichan moDios Jehová tein achto chikauayas motalpan uan tein okachi kuali.

”Amo xikmolonti* se chivojkonet ika ileche inan.

20 ”Niktitaniti se ángel maj mitsyekantiuj para maj mitsyekpia itech ojti uan maj mitsajxiti kampa nikixtalij xiajsi. 21 Kuali xikaki tein mitsiluis uan xikchiua. Amo xikixnamiki porin amo mitstapojpoluis, porin nochi tein kichiua, kichiua notokaykopa.* 22 Sayoj ke, komo senkis tiktakamati ángel uan tikchiua nochi tein nikijtos, nikintauelitas akin mitstauelitaskej uan nikinixnamikis akin mitsixnamikiskej. 23 Porin noángel mitsyekantias uan mitsuikas kampa nemij akin kinixmatij kemej amorreos, hititas, perizitas, cananeos, heveos uan jebuseos, uan nejua nikintamiixpolos. 24 Amo ximoixpilo ininixpan inindioses nion ximokaua maj mitstanejnektikan para xikinueyichiua. Uan amo no xikchiua tein yejuan kichiuaj, ta moneki tikinixpolos inintatadiosuan* uan tiktatapatsas tet tein kikejketsaj para ika taueyichiuaskej. 25 Moneki nankitekitiliskej namoDios Jehová, uan yejua namechtatiochiuis uan namechmakas tein nankikuaskej uan tein nantayiskej. Amo nikauas maj namechkui nion se kokolis.* 26 Kampa tinemi nion se siuat piluetsis uan nochin siuamej uelis kinpiaskej konemej. Nejua nikchiuas uejkaua xinemi.

27 ”Achto ke tejua tiajsis yejuan ipa nechmouilijtoskejya. Uan nikchiuas maj nochin akin mitsteuisnekiskej amo kimatikan toni kichiuaskej. Uan no nikchiuas maj nochin akin mitstauelitaj cholojteuakan moixpan porin tikintanis. 28 Achto ke tiajsis nikchiuas maj mosenkauakan* uan nikinkixtis heveos, cananeos uan hititas. 29 Amo nikinkixtis itech sayoj se xiuit, porin komo ijkon nikchiuaskia taseltijkan yeskia, koujtajtapialmej momiakiliskiaj uan teisa mitschiuiliskiaj. 30 Yolik nikinkixtijtias hasta ximomiakilikan uan xikuikan tal kampa yejuan nemij.

31 ”Nikchiuas maj motal peua desde mar Rojo hasta mar Mediterráneo* uan desde taluakyan hasta ueyiat Éufrates, porin nikchiuas xikintanikan akin ompa nemij, uan tejua tikinkixtis de ompa. 32 Amo teyi ximotenkaua iniuan nion ximotenkaua tikinueyichiuas inindioses. 33 Maj amo nemikan mouan, para maj amo kichiuakan xinechixnamiki. Komo tikinueyichiuaskia inindioses, tel amo kuali tinemiskia”.

24 Uan Jehová kiluij Moisés: “Xipankisa itech tepet tejua, Aarón, Nadab, Abihú uan 70 taixyekananij israelitas uan ximoixpilokan desde uejka. 2 Sayoj tejua Moisés, uelis timotokis kampa nietok nejua Jehová. Oksekin maj amo motokikan uan israelitas maj amo mouan pankisakan”.

3 Uan Moisés kiniluito israelitas nochi tein Jehová kiluij uan nochi tein kinauatij. Uan nochin tanankilijkej ijkuin: “Ika miak pakilis tikchiuaskej nochi tein Jehová kijtoj”. 4 Uan Moisés kijkuiloj nochi tein Jehová kijtojka. Kualkan meuak uan tepetsintan kichijchiuak se altar. No kinkejketsak 12 temej porin katkaj 12 uejueyi kalyetonij israelitas. 5 Satepan kinijitak* seki telpochmej israelitas. Yejuan kichichinouilijkej Jehová seki tapialmej uan kimaktilijkej seki kuakuejmej para sentakuaskej iuan.* 6 Uan de nochi esti tein kisak, Moisés kisentilij tajko itech seki uejueyi kaxit uan tajko kipijpisuij itech altar. 7 Satepan, kikuik amatajkuilol kampa ijkuiliujtoya tein nochin kijtojkej ke kichiuaskiaj, uan chikauak kinlerouilij. Satepan yejuan kijtojkej: “Ika miak pakilis tikchiuaskej nochi tein Jehová kijtoj uan titatakamatiskej”. 8 Uan Moisés kinpijpisuilij esti israelitas uan kiniluij: “Ika nejin esti moixtalia tein Jehová motenkaua namouan ijkon kemej yekin nankikakkej”.

9 Moisés, Aarón, Nadab, Abihú uan 70 taixyekananij israelitas pankiskej itech tepet 10 uan kiitakej ininDios israelitas. Kampa ijkatoya moitaya kemej tet tein monotsa zafiro, chipaktsin kemej iluikak keman takistok. 11 Uan yejua amo teyi kinchiuilij nejin taixyekananij israelitas. ToTajtsin Dios kinnextilij ichikaualis, uan takuajkej uan tatayikej.

12 Uan Jehová kiluij Moisés: “Xipankisa hasta kampa nietok, itech nejin tepet, uan ompa ximokaua. Nimitsmakati lajas kampa nikijkuiloti tanauatilmej para nikinmachtis israelitas”. 13 Yejua ika Moisés uan Josué, akin kipaleuiaya, peujkej pankisaj itech tepet. Uan Moisés kisentokak pankisa itech tepet tein toTajtsin Dios kijitak.* 14 Sayoj ke kiniluijteuak taixyekananij: “Nikan xitechchiakan hasta maj timokepakan. Aarón uan Hur namouan mokauaj, yejua ika komo nankipiaj se kuejmol uelis nankiniluiskej yejuan”. 15 Uan Moisés pankisak itech tepet uan tel mixtaj katka.

16 Iueyi chikaualis Jehová yetoya itech tepet Sinaí, uan chikuasen tonal tel mixtaj katka ompa. Itech chikometika tonal, yejua kiualnotsak Moisés desde mixti. 17 Israelitas kiitayaj ke iueyi chikaualis Jehová moitaya tepekuapan kemej se ueyi tit.* 18 Uan Moisés pankistiajki itech tepet uan poliujtiajki itech mixti, uan ompa mokauak 40 tonalmej.

25 Uan Jehová kiluij Moisés: 2 “Xikinilui israelitas maj nechualkuilikan nochi tein kinekiskej nechmakaskej. Xikuikan tein kiualkuiskej nochin akin kinekiskej kitemakaskej ika nochi ininyolo. 3 Yejua nejin tein moneki nankikuiskej: oro, plata, cobre, 4 hilo azul, morado, chichiltik, lino tein tel kuali, chivojtsonti, 5 ipankuetaxyo ichkaueuet* tein chichiltikya, ipankuetaxyo foca uan acaciajkouit. 6 No xikuikan aceite para candilmej uan chokil tein ajuiyak tein monotsa bálsamo. Nejin ika kichijchiuaskej aceite para kixeloskej tein noaxka uan para kopal tein ajuiyak. 7 Uan no xikuikan tetsitsin tein moixmatij kemej ónice uan okseki tetsitsin para kitaliliskej koton tein kiluiaj efod* uan bolsita tein yas iyolixpan tiopixkat. 8 Yejuan moneki nechchijchiuiliskej se kaltsin kampa nechueyichiuaskej uan nejua ninemis iniuan. 9 Moneki nankichijchiuaskej nejin kaltsin uan nochi tein kipias, ijkon kemej nimitsnextiliti.

10 ”Moneki nankichijchiuaskej se kaxontsin de acaciajkouit. Maj kipia makuil cuarta* de ueyak, eyi cuarta* de patauak uan eyi cuarta de uejkapan. 11 Uan moneki tiktamitalilis oro tein okachi kuali taijtik uan tapani. Uan no, sentatenoj de ikuapan tatiochiualkaxon xikualtsintili ika oro. 12 Xikatili oro uan xikchijchiua naui rueditas, uan xiktalili ajkotsin de imetsuan tatiochiualkaxon: sekopa ome rueditas uan oksekopa no ome. 13 No moneki tikchijchiuas seki kouit tein ueueyak uan tiktamitalilis oro. Moneki yeski acaciajkouit. 14 Nejon koujmej moneki tikinkajkalakis itech rueditas tein kipias inajnakastan tatiochiualkaxon para kiuikaskej. 15 Nejon koujmej moneki nochipa aktoskej itech rueditas tein kipias tatiochiualkaxon. Amo xikixtilikan. 16 Uan taijtik den tatiochiualkaxon moneki tikalakis lajas tein nimitsmakati.

17 ”Uan no, moneki tikchijchiuas ipantsak tatiochiualkaxon ika oro tein okachi kuali. Maj kipia makuil cuarta de ueyak uan eyi cuarta de patauak. 18 Ika se martillo moneki tikchijchiuas ome querubines de oro. Tikintalis tajtatenoj de ipantsak, 19 se querubín yetos sekopa uan okse oksekopa. 20 Nejon querubines moneki kiajoktoskej ininajtapaluan uan ika kiyekauilijtoskej ipantsak tatiochiualkaxon. Moneki moixnamiktoskej uan ixpilkatoskej. 21 Tiktalilis ipantsak tatiochiualkaxon uan ompa tikalakis lajas tein nimitsmakati. 22 Ompa nimonextis uan nitajtos mouan desde ipantsak tatiochiualkaxon, kampa yetokej ome querubines. Desde ompa nimitsmatiltis nochi tein nikneki maj israelitas kichiuakan.

23 ”No moneki tikchijchiuas se mesa ika acaciajkouit, tein kipias naui cuarta de ueyak, ome cuarta de patauak uan eyi cuarta de uejkapan. 24 Moneki tiktamitalilis oro tein okachi kuali uan sentatenoj tikualtsintilis ika oro. 25 Tikyoualoltis se tablita tein patauak chikome centímetros,* uan sentatenoj de nejon tablita no tikualtsintilis ika oro. 26 Ika oro no tikchijchiuilis naui rueditas uan tiktalilis kampa pepechiujtoskej naui imetsuan mesa. 27 Nejon rueditas moneki tiktalis tanitsin* den tablita para ompa kinkajkalakiskej koujmej tein ika kiuikaskej mesa. 28 Nejon koujmej moneki tikchijchiuas ika acaciajkouit uan tiktamitalilis oro.

29 ”Uan no, tikchijchiuas platos, copas, uan seki komit uan uejueyi kaxit tein ika kipantekaskej vino itech altar para kimaktiliskej Dios. Moneki tikchijchiuas ika oro tein okachi kuali. 30 Uan itech mesa, nochipa tiktalis pantsin tein yetos noixpan.

31 ”Tikchijchiuas se tauilketsaloni ika oro tein okachi kuali. Ika se martillo moneki tikchijchiujtias uan tiktalilis tein ika moketsas. Tatajkoyampa ijkatos kemej se koujtsin uan kipias imauan, seki taman kemej xiujtsitsin,* bolitas* uan xochimej. Maj mosenkuito ika sayoj se ueyi cacho oro. 32 Tauilketsaloni kipias chikuasen imauan: sekopa kipias eyi uan oksekopa no eyi. 33 Sekopa, sejse imay kipias eyi taman tein tamati kemej ixochiyo almendro, eyi bolitas uan eyi xochit. Yas se almendrojxochit, se bolita uan se xochit uan ijkon motojtokatiaskej. Itech imauan tein kipias oksekopa no ijkon yeski. Ijkon chijchiujtoskej chikuasen imauan tauilketsaloni. 34 Uan koujtsin tein ijkatos tatajkoyampa kipias naui taman tein tamatis kemej ixochiyo almendro, naui bolitas uan naui xochit. Yas se almendrojxochit, se bolita uan se xochit uan ijkon motojtokatiaskej. 35 Tanitsin* de kampa kisaskej yekinika ome imauan tauilketsaloni kipias se bolita, uan ijkon yeski tanitsin de kampa kisaj okseki imauan. Ijkon yeskij chikuasen imauan tein kisaskej den koujtsin tein ijkatos tatajkoyampa. 36 Bolitas, imauan uan nochi tauilketsaloni chijchiujtos ika sayoj se ueyi cacho oro. Ika se martillo moneki tikchijchiujtias. 37 Tikchijchiuilis chikome candilmej. Keman kinxotaltiskej tauiskej taixpan. 38 Pinzas uan tapalkatsitsin para mechas tein tataskejya moneki chijchiujtoskej ika oro. 39 Moneki tikchijchiuas ika oro tauilketsaloni uan nochi tein mokuis para in tauilketsaloni. Tikuis 34 kilos* de oro tein okachi kuali. 40 Xikyekita maj mochijchiua ijkon kemej nimitsnextilij itech nejin tepet.

26 ”Tikchijchiuas kaltsin kampa nechueyichiuaskej ika majtakti tasal.* Maj chijchiujto ika linojtamalin tein tel kuali, hilo azul, morado uan chichiltik. Itech nejon tasal tikmaijtsomas seki querubines. 2 Sejse tasal kipias 12 metros uan ome cuarta* de ueyak uan chikueyi cuarta* de patauak. Nochin kipiaskej sayoj se tamachiuj. 3 Tikinijtsomas majmakuil tasal para maj mosenkuitokan. Ijkon mochiuaskej ome uejueyi tasal. 4 Ika hilo azul tikijtsomilis seki tamalin itempan se ueyi tasal, uan no ijkon tikchiuas itempan okse ueyi tasal para ompa uelis tikinsalos. 5 Yeskij 50 itempan se ueyi tasal uan 50 itempan okse. Ijkon nochi tamalin tein tikijtsomilis sejse ueyi tasal moixnamiktoskej kampa mosalos. 6 Tikchijchiuas 50 ganchitos ika oro uan ika tikintajtakuiltis ome uejueyi tasal. Ijkon, ueyi tasal para kaltsin mosenkuitos.

7 ”Uan no, tikchijchiuas 11 tasalmej ika chivojtsonti para no tikpantalilis kaltsin. 8 Sejse tasal kipias 13 metros uan 35 centímetros* de ueyak uan chikueyi cuarta* de patauak. Nochin kipiaskej sayoj se tamachiuj. 9 Tikinijtsomas makuil tasal para maj mosenkuito, uan no tikinijtsomas okseki chikuasen tasal. Uan chikuasentika tasal tein mokauas taixpankopa den kaltsin tikelpachos. 10 Tikijtsomilis 50 tamalin itempan sejse ueyi tasal, kampa mosaloskej nejon ome uejueyi tasal. 11 Tikchijchiuas 50 ganchitos ika cobre uan tiktakuiltis itech nejon 50 tamalin tein kipias sejse ueyi tasal para mosentiliskej. Ijkon, yeski sayoj se ueyi tasal. 12 Tasal tein mokauas tatenoj pilkatos. Tajko den tasal tein mokauas tatenoj pilkatos taikampa. 13 Tein pilkatos sekopa uan oksekopa moneki yeski okachi ueyak ke linojtasal, ome cuarta.* Ijkon, kaltsin tamipantsaktos.

14 ”No tikpantalilis kaltsin ipankuetaxyo ichkaueuet* tein chichiltikya. Uan tiktamipantsakuas ika ipankuetaxyo foca.

15 ”Tikchijchiuas seki taman tein tamatis kemej ventanas tein ueueyak para kaltsin. Yeskij de acaciajkouit uan tikinkejketsas. 16 Sejse kipias naui metro uan ome cuarta* de ueyak uan eyi cuarta* de patauak. 17 Kipiaskej ome ininmetsuan* tein mokuitoskej. Ijkon moneki tikinchijchiuas nochin ventanas tein kipias kaltsin. 18 Tikinchijchiuas 20 ventanas tein yaskej sekopa. Keman tikalakis mokauaskej moopochmakopa.

19 ”No tikinchijchiuas ika plata 40 metstapechmej tein yaskej tatsintan de 20 ventanas: itsintan sejse ventana kipias ome metstapechmej kampa tikinmetskajkalakis. 20 Tikinchijchiuas 20 ventanas tein yaskej oksekopa. Keman tikalakis mokauaskej moyekmakopa. 21 No tikchijchiuas ika plata 40 metstapechmej: itsintan sejse ventana kipias ome metstapechmej. 22 Taikankopa den kaltsin, tein mokauas kampa ika pankalaki tonaltsin, kiuikas chikuasen ventanas. 23 Uan no, tikchijchiuas omeok tein yetoskej itech sejse esquina taikankopa den kaltsin kemej kalikximej. 24 Nejin kalikximej tein yetoskej itech sejse esquina ixome yeskij desde tatsintan hasta ajko. Mokuanamikitiuij kampa yetos yekinika ruedita. 25 Yeskij chikueyi ventanas tein kipiaskej 16 metstapechmej de plata: itsintan sejse ventana kipias ome metstapechmej.

26 ”Ika acaciajkouit tikchijchiuas makuil koujmej tein tikinixtapaltalis, para maj ventanas tein kipias kaltsin sekopa amo moxelokan. 27 No tikchijchiuas makuil koujmej para maj amo moxelokan ventanas tein yetoskej oksekopa, uan makuil para tein yetoskej taikankopa den kaltsin. 28 Kouit tein tikixtapaltalis tatajko, peuas se esquina uan tamitiuj hasta itech okse esquina.

29 ”In ventanas tikintamitalilis oro uan tikinchijchiuilis seki rueditas kampa tikinkajkalakis koujmej. Nejon koujmej no tikintamitalilis oro. 30 Moneki tikchijchiuas kaltsin ijkon kemej nimitsnextilij itech nejin tepet.

31 ”Tikchijchiuas se cortina ika hilo azul, morado, chichiltik uan ika linojtamalin tein tel kuali. Itech nejon cortina tikmaijtsomas seki querubines. 32 Tikpilos itech naui kalikximej de acaciajkouit tein tiktamitalilis oro. Ganchos tein ika pilkatoskej yeskij de oro uan kalikximej ijkatoskej itech naui metstapechmej de plata. 33 Tikpilos cortina tatampa den ganchitos, uan tiknalkalakitiuj tatiochiualkaxon* taikan den cortina. Nejon cortina kixelos cuarto tein monotsa Santo uan tein monotsa Santísimo. 34 Tiktalilis ipantsak tatiochiualkaxon tein yetos itech Santísimo.

35 ”Oksekopa den cortina tiktalis mesa. Taixpan den mesa tiktalis tauilketsaloni. Keman tikalakis, mesa yetos moyekmakopa uan tauilketsaloni moopochmakopa. 36 Para ikalakyan kaltsin tikchijchiuilis se cortina ika hilo azul, morado, chichiltik uan ika linojtamalin tein tel kuali. 37 Uan para tikpilos nejin cortina tikchijchiuas makuil kalikximej de acaciajkouit tein tiktamitalilis oro. Tikchijchiuas ganchos de oro uan tikatilis cobre para tikchijchiuas makuil metstapechmej.

27 ”Tikchijchiuas in altar ika acaciajkouit. Yeski cuadrado uan kipias ome metro uan se cuarta* de ueyak uan no ijkon de patauak, uan kipias chikuasen cuarta* de uejkapan. 2 Uan no, itech sejse esquina tikchijchiuilis se cuerno. Nejon cuernos mokuitoskej iuan altar. Uan altar tiktamitalilis cobre. 3 No tikchijchiuas cubetas para ompa tiktemas koujnex,* uan no tikchijchiuas palas, uejueyi kaxit, teposmej tein tenpijpitstikej* para nakat uan tapalkamej para tekol. Nochi nejon tikchijchiuas ika cobre. 4 Tikintajtalis varillas de cobre uan tikchijchiuas kemej se malla. Uan itech sejse esquina tiktalilis naui rueditas tachijchiuj ika cobre. 5 Nejon malla tikalakis itech altar. Tiktalis tani* de itempan uan maj tamiti tatajko. 6 Uan no, tikchijchiuas seki kouit tein ueueyak uan tiktamitalilis cobre. Moneki yeski acaciajkouit. 7 Keman kiuikaskej altar, moneki kinkajkalakiskej nejon koujmej itech rueditas tein yetoskej tajtanakastan. 8 In altar yeski kemej se ueyi caja uan chijchiujtos ika tablones. Moneki chijchiujtos ijkon kemej nimitsnextilij itech nejin tepet.

9 ”Kalampa den kaltsin kampa nechueyichiuaskej no moneki titatsakuas. Kampa tikalakis, moopochmakopa kipias cortinas tachijchiuj ika linojtamalin tein tel kuali, uan kipias 44 metros uan tajko* de ueyak. 10 Tikinkejketsas 20 postes de cobre uan 20 metstapechmej no de cobre, kampa tikinmetskajkalakis. Ganchos tein kipiaskej nejon postes uan rueditas chijchiujtoskej ika plata. 11 Kampa tikalakis, moyekmakopa no yetoskej seki cortinas uan kipias 44 metros uan tajko de ueyak. Tikinkejketsas 20 postes uan tikinkajkalakis itech 20 metstapechmej no de cobre. Nejon postes no kipiaskej ganchos uan rueditas tein chijchiujtoskej ika plata. 12 Taikankopa den kaltsin no yetoskej seki cortinas tein kipias 22 metros uan se cuarta* de patauak. No tikinkejketsas majtakti postes itech majtakti metstapechmej. 13 Uan kampa ika ualkisa tonaltsin, kipias 22 metros uan se cuarta de patauak. 14 Taixpankopa den kaltsin, sekopa yetos se cortina tein kipias chikuasen metro uan eyi cuarta.* Yetos itech eyi postes tein ijijkatoskej itech eyi metstapechmej. 15 Uan oksekopa no yetos se cortina tein kipias chikuasen metro uan eyi cuarta. Yetos itech eyi postes tein ijijkatoskej itech eyi metstapechmej.

16 ”Kampa tikalakis para tipanos kampa yetos kaltsin, maj kipia se cortina tein kipias chikueyi metro uan naui cuarta* de ueyak. Nejon cortina chijchiujtos ika hilo azul, morado, chichiltik uan linojtamalin tein tel kuali. Kampa tikalakis ijijkatoskej naui postes itech naui metstapechmej. 17 Nochin postes tein ijijkatoskej kalampa uan kiyoualoskej kaltsin, kipiaskej rueditas uan ganchos de plata, sayoj ke sejse metstapech yeski de cobre. 18 Kampa tatsaktos kipias 44 metros uan tajko de ueyak, 22 metros uan se cuarta de patauak uan ome metro uan se cuarta de uejkapan. Cortinas tein ika tatsaktos chijchiujtoskej ika linojtamalin tein tel kuali, uan metstapechmej yeskij de cobre. 19 Uan nochi tein mokuis itech tekit tein mochiuas itech kaltsin, yeskij de cobre. Uan clavos tein talpan toktoskej para kitsikoskej cortinas den kaltsin uan tein ika tatsakuaskej kalixpan, no yeskij de cobre.

20 ”Uan no, xikinnauati israelitas maj mitsualkuilikan yekaceite de itakilo olivojkouit para maj candilmej nochipa tauijtokan. 21 Aarón uan ikoneuan kiitaskej maj xotatokan candilmej iixpan Jehová desde tiotak hasta kualkan. Nejon candilmej yetoskej itech kaltsin oksekopa den cortina, tanakastan den tatiochiualkaxon.* Desde axkan nikixtalia nejin tanauatil tein israelitas moneki nochipa kichiuaskej ijkon kemej yoltiaskej.

28 ”Xiknotsa mokniuj Aarón uan ikoneuan, Nadab uan Abihú, Eleazar uan Itamar uan xikinxelo de nochin israelitas para maj nechtekitilikan kemej tiopixkamej. 2 Tikchijchiuilis mokniuj Aarón tasal* tein kikuis kemej tiopixkat, para maj kualtsin moita uan maj kitakachiuakan.* 3 Iniuan titajtos akin nejua nikchiujtok maj tel kuali tamachijchiuakan, uan tikiniluis maj kichijchiuakan itasal Aarón tein kinextis ke xeliujtok para nejua. Ijkon uelis nechtekitilis kemej tiopixkat.

4 ”Yejua nejin tasal tein kichijchiuaskej: se bolsita tein yas iyolixpan, se koton tein kiluiaj efod,* se tasal makojkotoltik, se tasal tajkitil tein kipias cuadros uan maueueyak, se tasal tein mokuayoualouilis uan se tein ika motajkoilpis.* Kichijchiuaskej tasal tein kikuiskej Aarón uan ikoneuan para nechtekitiliskej kemej tiopixkamej. 5 Nejon kuali tamachijchiuanij kikuiskej oro, hilo azul, morado, chichiltik uan lino tein tel kuali.

6 ”Kichijchiuaskej koton ika oro, hilo azul, morado, chichiltik uan linojtamalin tein tel kuali. Uan moneki ijtsontos kemej se tajmach. 7 Chijchiujtos ika ome tasal tein monamikiskej uan ijtsontos iajkolko. 8 Cinturón* tein tajkitil ijtsontos itech koton uan ika motajkotilintis. No moneki chijchiujtos ika oro, hilo azul, morado, chichiltik uan linojtamalin tein tel kuali.

9 ”Tikuis ome tetsitsin tein moixmatij kemej ónice uan tikintektias para ompa tikijkuilos inintokay ikoneuan Israel. 10 Itech se tetsin tikijkuilos chikuasen tokaymej, uan itech okse tikijkuilos okseki chikuasen tokaymej ijkon kemej yoltiajkej. 11 Se tamachijchiujkej kijkuilos inintokay ikoneuan Israel itech nejon ome tetsitsin, ijkon kemej kitekij teisa para kichijchiuaskej se sello. Kampa tikinkajkalakis nejon tetsitsin chijchiujtos ika oro. 12 Tikintalis nejon ome tetsitsin iajkolko tiopixkat, itech ikoton para maj kinelnamikikan ikoneuan Israel. Aarón kiuikas iajkolko nejon tokaymej iixpan Jehová para maj kinelnamikikan israelitas. 13 Ika oro tikchijchiuas kampa aktoskej tetsitsin 14 uan no tikchijchiuas ome tamalin ika oro tein okachi kuali. Uan tiktsikos nejon tamalin itech oro kampa aktoskej tetsitsin.

15 ”Maj se akin tajtsoma kichijchiua in bolsita tein mokuis para nankimatiskej tein Dios kiixtalis. Ijkon kemej koton, moneki chijchiujtos ika oro, hilo azul, morado, chichiltik uan linojtamalin tein tel kuali. 16 Keman tikelpachos, mokauas cuadrado uan kipias se cuarta* de ueyak uan se cuarta de patauak. 17 Tiktejtekpanas tetsitsin itech naui filas uan tikchijchiuilis kampa aktoskej. Yekinika tekpantoskej eyi tetsitsin: rubí, topacio uan esmeralda. 18 Itech ojpatika fila tekpantoskej turquesa, zafiro uan jaspe. 19 Itech expatika fila tekpantoskej léshem,* ágata uan amatista. 20 Uan itech naujpatika fila tekpantoskej crisólito, ónice uan jade. Kampa aktoskej nochin tetsitsin chijchiujtos ika oro. 21 Itech nejon tetsitsin ijkuiliujtoskej inintokay 12 ikoneuan Israel. Sejse tokayit kiixnextis semej den 12 uejueyi kalyetonij. Sejse tetsin kitektiaskej para itech kijkuiloskej se tokayit, ijkon kemej kitekij teisa para kichijchiuaskej se sello.

22 ”No moneki tikchijchiuas seki tamalin para bolsita. Nejon tamalin chijchiujtos ika oro tein okachi kuali. 23 In bolsita tikchijchiuilis ome anillos de oro uan tiktalis itech ome esquinas tein kipias ajko. 24 Uan tikalakis nejon ome tamalin de oro itech nejon ome anillos. 25 Moneki tikalakis ipuntas nejon ome tamalin itech oro tein yetos iajkolko, uan ijkon bolsita mokauas taixpankopa. 26 Uan no, tikchijchiuas ome anillos de oro uan tiktalis itech ome esquinas tein kipias tani.* Nejon anillos yetoskej taikankopa den bolsita uan mokuiltiskej itech koton. 27 No tikchijchiuas ome anillos de oro tein yas taixpankopa den koton. Tiktalis tani de iajkolko, kampa ika monamikis koton, ajkotsin de kampa yetos cinturón tein tajkitil. 28 Para maj bolsita amo moolini, anillos tein kipias motakuiltiskej itech anillos tein kipias in koton ika se tamalin azul. Ijkon in bolsita kuali yetos tapani den koton, ajkotsin de kampa yetos cinturón tein tajkitil.

29 ”Keman Aarón kalakis itech cuarto tein monotsa Santo, moneki kiuikas iyolixpan in bolsita tein mokuis para nankimatiskej tein Dios kiixtalis. Ompa ijkuiliujtos inintokay ikoneuan Israel para maj Jehová nochipa kinelnamiki. 30 Itech bolsita tikalakis Urim uan Tumim.* Aarón moneki kiuikas iyolixpan keman yetos iixpan Jehová. Nochipa moneki kiuikas iyolixpan nejin para kiniluis israelitas tein Dios kiixtalis keman yetos iixpan Jehová.

31 ”Tikchijchiuas tasal tein makojkotoltik tein yas tatampa den koton. Nejon tasal sayoj chijchiujtos ika hilo azul. 32 Moneki kechtapotos, uan se akin tajkiti kitenijtsomas para maj amo tsayani. Kechtapotos kemej se teposkoton tein kikui se soldado. 33 Tikchijchiuas seki bolitas kemej yeskia granadas ika hilo azul, morado uan chichiltik, uan tikyoualoltis nochi itempan tasal tein makojkotoltik. Tajtatajko den granadas yaskej campanitas. 34 Itech nochi itempan tasal tein makojkotoltik tiktajtalijtias se campanita de oro uan se granada, se campanita de oro uan se granada. 35 Aarón moneki motalilis nejin tasal para uelis nechtekitilis kemej tiopixkat. Keman kalakis iixpan Jehová, itech kaltsin kampa nechueyichiuaskej uan keman kisas moneki tsitsilikatias campanitas, para maj amo miki.

36 ”Ika oro tein okachi kuali no tikchijchiuas se tepos kanauak tein miliktik. Uan kemej se sello, tiktektias uan tikijkuilouilis nejin: ‘Jehová senkis chipauak’. 37 Ika se tamalin azul tiktsikos nejon tepos kanauak itech tasal tein mokuayoualouilis, uan moneki mokauas taixpankopa. 38 Aarón kiuikas iixkuako uan yejua tanankilis komo aksa* amo kikui kemej moneki tein xeliujtok para Dios, porin israelitas kixeloskej nochi nejin para kimaktiliskej Dios. Tepos kanauak moneki nochipa kiuikas iixkuako, para maj Jehová kuali kinita.

39 ”Ika lino tein tel kuali, tikchijchiuas se tasal tajkitil tein kipias cuadros uan maueueyak, se tasal tein mokuayoualouilis, uan no tein ika motajkoilpis* tein no tajkitil.

40 ”No tikinchijchiuilis ikoneuan Aarón inintasal tein maueueyak, tein ika motajkoilpiskej* uan tasal tein mokuayoualouiliskej para maj kualtsin moitakan uan maj kintakachiuakan.* 41 Tikintalilis mokniuj Aarón uan ikoneuan. Tikintekilis aceite, tikinixtalis kemej tiopixkamej uan tinechinxelouilis. Uan ijkon nechtekitiliskej kemej tiopixkamej. 42 Uan no, ika lino tikinchijchiuilis tatampa calzon. Moneki kinpikis desde inintajkoyan hasta ininkesko. 43 Aarón uan ikoneuan moneki motaliliskej keman kalakiskej itech kaltsin kampa nechueyichiuaskej oso keman motokiskej para tekitiskej itech altar tein yetok kampa taxeliujtok. Ijkon amo motajtakolmakaskej uan amo monekis mikiskej. Desde axkan nikixtalia nejin tanauatil tein moneki kichiuas yejua uan ikoneuan.

29 ”Yejua nejin tein moneki tikchiuas para tikinxelos uan ijkon uelis nechtekitiliskej kemej tiopixkamej: xikui se kuakouej tein yekin moskaltijtok uan ome ichkaueuetkej* tein kuajkualmej. 2 Xikchijchiua seki pantsin, seki pantsin tein ijtikoyoktik tachijchiuj ika aceite uan seki taxkaltsitsin tein kajkanauak tein tikojxilis aceite. Nochi nejin xikchijchiua ika harina de trigo tein okachi kuali uan amo xiktalili levadura. 3 Xikintali itech se chikiuit uan xinechmaktili iuan kuakouej uan ome ichkaueuetkej.

4 ”Tikinuikas Aarón uan ikoneuan ikalakyan kaltsin kampa nechueyichiuaskej uan tikinpajpakas. 5 Satepan, tiktalilis Aarón in tasal* tein maueueyak, tasal tein makojkotoltik, koton tein kiluiaj efod* uan bolsita tein yas iyolixpan. Uan tiktajkotilintis ika cinturón* tein tajkitil tein kipias in koton. 6 Tikuayoualouilis se tasal uan itech nejon tasal tikixkuatalilis tepos kanauak tein kinextis ke Dios kixeloj. 7 Uan tikuatekilis aceite para tikixtalis kemej tiopixkat.

8 ”Tikiniluis ikoneuan maj motokikan, tikintalilis tasal tein maueueyak 9 uan tikintajkoilpis* Aarón uan ikoneuan, uan no tikinkuayoualouilis se tasal. Yejuan uan ininkoneuan yeskij tiopixkamej. Desde axkan nikixtalia nejin tanauatil. Ijkon moneki tikinixtalis Aarón uan ikoneuan para maj nechtekitilikan kemej tiopixkamej.

10 ”Uan tikuikas kuakouej taixpan den kaltsin, uan Aarón uan ikoneuan kitaliskej ininmay ikuako in kuakouej. 11 Xikmikti in tapial iixpan Jehová, ikalakyan kaltsin. 12 Ika momajpil xikui tepitsin iesyo uan xiktalili cuernos tein kipias altar. Uan esti tein mokauas xiktoyaua itsintan altar. 13 Xikui nochi imantecayo tein kipias ipoxko uan tein kipias itech ieltapach. No xikui ome iriñones uan imantecayo, uan nochi nejin tikchichinos itech altar para maj popoka. 14 Sayoj ke inakayo, ipankuetaxyo uan ikuit tikuikas uejka den kaltsitsin* uan tiktatis.* Tiktemaktis nejin kuakouej porin tajtakolejkej.

15 ”No tikuis se ichkaueuet, uan Aarón uan ikoneuan kitaliskej ininmay ikuako ichkaueuet. 16 Xikmikti in tapial uan xikpijpisui iesyo ikejkespan altar. 17 Xikojkotona, xikpajpaka ikuitaxkol* uan imetsuan, uan kualtsin xiktajtali iuan itsontekon. 18 Uan tiktamichichinos itech altar para maj popoka. Nejin ichkaueuet tiktamichichinouilis Jehová uan Jehová semi kiajuiyakmatis.*

19 ”Satepan, tikuis okse ichkaueuet, uan Aarón uan ikoneuan kitaliskej ininmay ikuako ichkaueuet. 20 Xikmikti in tapial, xikui tepitsin iesyo uan xikinnakastalili Aarón uan ikoneuan. Moneki yeski itech ininnakas tein yetok ininyekmakopa. No xikintalili tepitsin esti itech ininmajpil uan ininikxipil tein okachi tomauak tein kipiaj ininyekmakopa. Xikpijpisui esti ikejkespan altar. 21 Uan tikuis tepitsin esti tein yetos itech altar uan tepitsin aceite tein ika kixelouaj tein noaxka, uan tikpijpisuilis Aarón uan ikoneuan uan inintasal. Ijkon, Aarón uan ikoneuan xeliujtoskej para nejua uan ika nejon tasal uelis nechtekitiliskej.

22 ”Uan xikixtili nochi imantecayo ichkaueuet, manteca tein kipia itech ikuitapil, ipoxko uan ieltapach. Xikixtili ome iriñones uan imantecayo, uan no iyekmets, porin nejin se ichkaueuet tein motemaka para kinixtaliskej tiopixkamej. 23 Uan no, den chikiuit tein yetok iixpan Jehová uan kipia pantsin tein amo kipia levadura, xikui se pantsin tein youaltik, se pantsin tein ijtikoyoktik tachijchiuj ika aceite uan se taxkaltsin tein kanauak. 24 Xikinmatalili Aarón uan ikoneuan nochi nejin uan xikmauiuika iixpan Jehová para tikmaktilis. 25 Satepan, oksepa tikuis nochi tein tikinmatalilij uan tikchichinos itech altar, kampa yetos tapial tein chichinaujtos. Tikchichinouilis Jehová uan Jehová semi kiajuiyakmatis.

26 ”Uan den ichkaueuet tein tiktemakas para tikixtalis Aarón kemej tiopixkat, xikui iyolixpan uan xikmauiuika iixpan Jehová para tikmaktilis. Nejin yeski moaxka. 27 De nejon ichkaueuet tein tiktemakas para tikinixtalis kemej tiopixkamej Aarón uan ikoneuan, xikxelo iyolixpan uan imets tein tikmauiuikas iixpan Dios. 28 Nejin yeski ininaxka Aarón uan ikoneuan. Desde axkan nikixtalia maj nochin israelitas kitemakakan nejin porin ixyetok para tiopixkamej. Yejua tein israelitas kixelouiliskej Jehová keman kimaktiliskej se tapial para sentakuaskej iuan.*

29 ”Tasal tein kikuis Aarón kemej tiopixkat, satepan kikuiskej ikoneuan keman kinkuatekiliskej aceite uan kinixtaliskej kemej tiopixkamej. 30 Ikoneuj Aarón akin kiixpatas kemej tayekankatiopixkat uan kalakis itech kaltsin para kitekitilis Dios kampa taxeloj, motalilis nejon tasal chikome tonal.

31 ”Tikuis inakayo ichkaueuet tein tiktemakas para tikinixtalis tiopixkamej uan tikmolontis* kampa Dios taxeloj. 32 Aarón uan ikoneuan kikuaskej ichkaueuet uan pantsin tein yetok itech chikiuit. Moneki kikuaskej ikalakyan kaltsin. 33 Nochi nejin kimaktilijkej Dios para maj kiixpolo inintajtakoluan keman kinixtalijkej kemej tiopixkamej uan keman kinxelojkej para Dios. Yejuan kikuaskej nejon. Sayoj ke amo akinok* uelis kikuas porin xeliujtok. 34 Komo mostika kualkan mokauaok tepitsin nakat uan pantsin, moneki tiktatis* nochi. Amo akin moneki kikuas, porin xeliujtok.

35 ”Ijkon tikchiuas iuan Aarón uan ikoneuan, kemej nimitsnauatij. Mitskuilis chikome tonal para tikinixtalis kemej tiopixkamej. 36 Sejse tonal tiktemakas se kuakouej porin tajtakolejkej para maj nikixpolo inintajtakoluan, uan ijkon tikixtilis tajtakol in altar. Uan no, moneki tiktekas aceite itech altar, uan nejon kinextis ke sayoj mokuis para nanechueyichiuaskej. 37 Tikuis chikome tonal para ijkon tikchipauas altar, uan tinechxelouilis uan yeski noaxkaya. Akin tekitis itech altar moneki maj chipauak.

38 ”Yejua nejin tein moneki tiktemakas itech altar. Sejse tonal moneki tiktemakas ome ichkaueuetkej tein kipiaskej se xiuit. 39 Se ichkaueuet tiktemakas kualkan uan okse keman tapoyaujtosya. 40 Keman tiktemakas ichkaueuet kualkan, no iuan tiktemakas se kilo harina tein okachi kuali. Nejon harina tikmanelos ika se litro aceite de itakilo olivojkouit. Uan no tikpantekas itech altar se litro vino para tikmaktilis Dios. 41 Iuan ichkaueuet tein tiktemakas keman tapoyaujtosya no tiktemakas harina uan vino kemej tein tiktemakas kualkan. Nochi nejin tikchichinouilis Jehová uan yejua semi kiajuiyakmatis. 42 Nejin moneki nankichichinouiliskej Jehová mojmostaj ikalakyan kaltsin. Uan namokoneuan akin nemiskej satepan no moneki ijkon kichiuaskej. Ompa nimonextis namoixpan para mouan nitajtos.

43 ”Ompa nimonextis ininixpan israelitas, uan noueyi chikaualis taxelos ompa. 44 Nikxelos kaltsin uan altar. Uan Aarón uan ikoneuan nikinxelos para maj nechtekitilikan kemej tiopixkamej. 45 Nejua ninemis iniuan israelitas uan niyeski ininDios. 46 Uan yejuan kiyekmatiskej ke nejua niJehová, ininDios akin kinkixtij de Egipto para ninemis iniuan. Nejua niJehová, ininDios.

30 ”Tikchijchiuas se altar ika acaciajkouit para ompa tapopochuiskej. 2 Yeski cuadrado uan kipias ome cuarta* de ueyak, ome cuarta de patauak uan naui cuarta* de uejkapan. Nejon altar uan cuernos tein kipias mosenkuitoskej ika sayoj se kouit. 3 Tiktalilis oro tein okachi kuali tapani, inajnakastan uan cuernos. Sentatenoj de ikuapan altar tikualtsintilis ika oro. 4 Tanitsin* de itenoj tiktalilis seki rueditas de oro. Sekopa kipias ome uan oksekopa no kipias ome. Ompa kinkajkalakiskej koujmej tein ika kiuikaskej. 5 Xikchijchiua seki kouit tein ueueyak uan xiktamitalili oro. Moneki yeski acaciajkouit. 6 Tiktalis in altar taixpan den cortina, oksekopa den tatiochiualkaxon.* Moneki yetos taixpan den tatiochiualkaxon uan ipantsak, kampa nimonextis moixpan.

7 ”Aarón tapopochuis itech altar ika kopal tein ajuiyak. Tapopochuijtos mostaj kualkan keman kintekilijtos aceite candilmej. 8 Uan keman Aarón kinxotaltis candilmej keman tapoyaujtosya, no tapopochuis. Desde axkan in kopal mojmostaj kichichinouiliskej Jehová. 9 Amo xikchichinokan itech altar okse taman kopal nion ompa xikchichinokan tapialmej nion tatok. Amo no xikpantekakan vino ompa. 10 Xijxiujtika, Aarón moneki kikuis tepitsin iesyo tapial tein kitemakas para maj Dios kiixpolo inintajtakoluan, uan kitalilis cuernos tein kipia altar. Kichiuas nejon para kikixtilis tajtakol in altar. Desde axkan moneki kichiuas nejon sayoj sepa itech xiuit. Jehová moxelouilij altar”.

11 Uan Jehová kiluij Moisés: 12 “Nochipa keman tikinpouas takamej israelitas, sejse moneki kimakas Jehová se taxtauil para maj kisentoka nemi. Ijkon amo kinpanos nion teyi tein amo kuali keman kinijkuiloskej. 13 Nochin akin tikinijkuilos moneki kitemakaskej chikuasen gramo* plata. Moneki tikuis pesa tein kikuij kampa Dios taxeloj para tiktamachiuas plata. Nejon pesa kipia 12 gramos.* Kimakaskej Jehová chikuasen gramo plata. 14 Akin kijkuiloskej uan kipias 20 xiujmej oso okachi, kimakas Jehová nejon plata. 15 Nochin moneki kimakaskej Jehová chikuasen gramo plata para kisentokaskej nemiskej. Tominpianij moneki kitemakaskej chikuasen gramo uan pobres no moneki kitemakaskej chikuasen gramo. 16 Tikuis tomin tein israelitas kitemakaskej para kisentokaskej nemiskej, uan nejon tomin mokuis para tekit tein mochiuas itech kaltsin kampa nantaueyichiuaskej. Nejon tomin tapaleuis maj Jehová kinelnamiki israelitas uan uelis nankisentokaskej nanemiskej”.

17 Uan Jehová no kiluij Moisés: 18 “Xikchijchiua se paila uan xikchijchiuili kampa ijkatos. Maj nochi chijchiujto ika cobre. Xiktali tatajko den kaltsin uan den altar, uan xikpexonti* ika at. 19 Aarón uan ikoneuan ompa momajtekiskej uan mometspajpakaskej. 20 Moneki mopajpakaskej ika nejon at keman kalakiskej itech kaltsin, keman motokiskej itech altar para tekitiskej uan para kichichinouiliskej Jehová tein kimaktiliskej. Ijkon amo mikiskej. 21 Moneki momajtekiskej uan mometspajpakaskej para amo mikiskej. Desde axkan Aarón uan ikoneuan moneki kichiuaskej nejin”.

22 Jehová no kiluij Moisés: 23 “Xiksentili seki taman tein okachi kuali uan tein kualtsin ajuiyak: chikuasen kilo de chokil tein takuauayakya tein monotsa mirra, eyi kilo canela, eyi kilo akat tein ajuiyak tein monotsa cálamo, 24 uan chikuasen kilo de okse taman canela.* Moneki tiktamachiuas ika pesa tein kikuij kampa nitaxeloj. No xikui eyi litro uan tajko* aceite de itakilo olivojkouit. 25 Tiksentilis nochi nejin uan tikchijchiuas se kuali aceite. Moneki tel kuali chijchiujtos. Nejon aceite ika tikxelos tein noaxka.

26 ”Tiktalilis tepitsin de nejon aceite in kaltsin, tatiochiualkaxon, 27 mesa uan nochi tein ompa mokuis, tauilketsaloni uan nochi tein mokuis para in tauilketsaloni, altar kampa tapopochuiskej, 28 altar kampa kichichinoskej tein nechmaktiliskej uan nochi tein ompa mokuis, uan no tiktalilis aceite in paila uan kampa ijkatos. 29 Moneki tinechxelouilis nochi nejon uan yeski noaxkaya. Akin kikuis moneki maj chipauak. 30 Ika nejon aceite tikinixtalis uan tikinxelos Aarón uan ikoneuan para maj nechtekitilikan kemej tiopixkamej.

31 ”No tikiniluis israelitas: ‘Desde axkan nejin aceite xeliujtos sayoj para nejua. 32 Maj amo akin motalili, uan amo ximochijchiuilikan se aceite kemej nejin. Nejon aceite noaxka uan nochipa moneki ijkon nankiitaskej. 33 Akin kichijchiuas se aceite kemej nejin tein kualtsin ajuiyak uan kitalilis akin amo tiopixkat, moneki mikisʼ”.

34 Uan Jehová kiluij Moisés: “Xiksentili nochi nejin uan maj sayoj se itamachiuj: chokil tein monotsa estacte, kopal tein monotsa uña, chokil tein monotsa gálbano uan istak kopal tein amo tamanelol. 35 Ika nochi nejin xikchijchiua tein ika tapopochuiskej. Amo xikmanelo ika okseki taman porin noaxka. Kualtsin xikchijchiua uan xiktalili istat. 36 Xikui tepitsin uan xikuecho hasta maj mokaua polvito. Xiktali tepitsin de nejon polvito taixpan den tatiochiualkaxon tein yetos itech kaltsin, kampa nimonextis moixpan. Nejon xeliujtos sayoj para nejua uan moneki ijkon nankiitaskej. 37 Ika nochi nejin amo ximochijchiuilikan tein ika nantapopochuiskej. Nejin iaxka Jehová uan nochipa moneki ijkon nankiitaskej. 38 Akin mochijchiuilis se taman kemej nejin para kijnektos, moneki mikis”.

31 Uan Jehová kiluij Moisés: 2 “Xikita, nikijitak* Bezalel, ichankauj Judá. Yejua iokichpil Urí uan iixuiuj Hur. 3 Nikpaleuis ika nochikaualis para maj tamatkej, maj nochi kiajsikamati uan maj kimati keniuj kimachijchiuas tein yeski. 4 Ijkon uelis kinemilis keniuj kualtsin tachijchiuas, keniuj kikuis oro, plata uan cobre, 5 keniuj kitejtekis tet uan kitajtalis kampa moneki yas, uan uelis kichijchiuas tein yeski ika kouit. 6 Nikixtalij Oholiab para maj kipaleui Bezalel. Oholiab iokichpil Ahisamac uan ichankauj Dan. Uan nikchiuas maj akin kuali tamachijchiuaj okachi kuali tamachijchiuakan, para maj kichijchiuakan nochi tein nimitsnauatij. 7 Kichijchiuaskej kaltsin kampa nechueyichiuaskej, tatiochiualkaxon* uan ipantsak, nochi tein mokuis itech kaltsin, 8 mesa uan nochi tein ompa mokuis, tauilketsaloni tachijchiuj ika oro tein okachi kuali uan nochi tein mokuis para in tauilketsaloni, altar kampa tapopochuiskej, 9 altar kampa kichichinoskej tein kimaktiliskej Dios uan nochi tein ompa mokuis, paila uan kampa ijkatos, 10 tasal* tein kualtsin tajkitil, tasal tein kikuis Aarón kemej tiopixkat uan tasal tein kikuiskej ikoneuan para tekitiskej kemej tiopixkamej, 11 aceite para kixeloskej tein noaxka uan kopal tein ajuiyak tein mokuis itech kaltsin. Yejuan kichiuaskej nochi tein nimitsnauatij”.

12 Uan Jehová no kiluij Moisés: 13 “Xikinilui israelitas: ‘Moneki nankichiuaskej tein namechnauatij xikchiuakan itech tonal sábado, porin nejon tonal nimoxelouilij. Yejua nejon tein okachi moneki nankitayekanaltiskej, porin desde axkan nejon kinextia tein timotenkaujkej. Nejon namechelnamiktis ke nejua Jehová, namechxelojtok. 14 Moneki nankichiuaskej tein namechnauatij xikchiuakan itech tonal sábado, porin nejon tonal xeliujtok para nejua uan ijkon moneki nankiitaskej. Akin amo kichiuas tein namechnauatij moneki mikis. Akin tekitis nejon tonal moneki kimiktiskej. 15 Uelis nantekitiskej chikuasen tonal, sayoj ke chikometika tonal amo xikchiuakan nion se tekit porin sábado. Jehová moxelouilijya nejon tonal. Akin tekitis itech tonal sábado, moneki mikis. 16 Israelitas moneki kichiuaskej itech tonal sábado tein nitanauatij. Moneki moseuiskej nejon tonal yejuan uan nochin ininkoneuan akin yoltiaskej. Desde axkan ijkon nimotenkaua iniuan. 17 Desde axkan, tonal sábado kinextia tein nimotenkauak iniuan israelitas, porin nejua Jehová nikchijchiuak iluikak uan taltikpak itech chikuasen tonal, uan itech chikometika tonal amo nitekitikok uan nimoseuij’”.

18 Uan niman keman tamitajtoj iuan Moisés itech tepet Sinaí, Dios kimakak ome lajas kampa tajkuiloj ika ichikaualis.*

32 Israelitas kiitakej ke Moisés uejkaujkaya uan amo temouaya den tepet. Yejua ika nochin kiajsitoj Aarón uan kiluijkej: “Xitechchijchiuili se tatadios* tein techyekantias, porin amo tikmatij toni kipanok Moisés, akin techkixtij de Egipto”. 2 Yejua ika Aarón kiniluij: “Xikinnakaskixtilikan ininpipiloluan de oro tein kipiaj namosiuauan, namookichpipiluan uan namosiuapipiluan uan xinechualkuilikan”. 3 Uan nochin monakaskixtilijkej ininpipiloluan uan kiuikilijkej Aarón. 4 Kikuik nejon oro, kitektiajki ika se tepos* uan kichijchiuak se tatadios* tein tamatia kemej se kuakuejkonet. Uan yejuan peuak kijtouaj: “Yejua nejin toDios, akin techkixtij de Egipto”.

5 Keman Aarón kiitak nejon, kichijchiuak se altar iixpan kuakuejkonet uan kijtoj: “Mosta tikchiuaskej se iluit para tikueyitaliskej Jehová”. 6 Yejua ika mostika, kualkan meujkej uan peuak kichichinouaj tapialmej para kitemaktiskej. No kitemaktijkej tapialmej para sentakuaskej iuan Dios.* Satepan, israelitas takuajkej uan tatayikej, uan moyolpaktijkej.

7 Uan Jehová kiluij Moisés: “Xitemo porin israelitas akin tikinkixtij de Egipto, kichiujtokej tein tel amo kuali. 8 ¡Tel niman kielkaujkej tein nikinnauatij! Mochijchiuilijkej se tatadios* tein tamati kemej se kuakuejkonet, moixpilojtokej iixpan uan kimaktilijtokej tapialmej, uan kijtojtokej: ‘Yejua nejin toDios, akin techkixtij de Egipto’”. 9 Uan Jehová no kiluij Moisés: “Nikitani ke israelitas tel amo takakij. 10 Yejua ika xinechkaua maj nikinixpolo porin nitelkualantok, uan nikchiuas maj de mokoneuan kisa se ueyi altepet”.

11 Uan Moisés kitataujtij Jehová: “NoDios Jehová, ¿keyej titelkualani uan hasta tikneki tikinixpolos mokoneuan israelitas? Tejua tikuik moueyi chikaualis para tikinkixtis de Egipto. 12 Komo tikinixpoloua, akin nemij Egipto kijtoskej: ‘IninDios kinkixtij para kinchiuilis tein amo kuali. Kinekia kinmiktis itech tepemej uan kintamiixpolos’. Amo xikualantook, xikyeknemili tein tikchiuasneki uan amo xikinixpolo mokoneuan israelitas. 13 Xikinelnamiki motekitikauan Abrahán, Isaac uan Israel. Tejua tikinyekiluij motokaykopa: ‘Nikchiuas maj namokoneuan tel miakej kemej sitalimej tein yetokej iluikak uan nikinmakas nochi nejin tal tein nikijitak* para maj nochipa ininaxka’”.

14 Uan Jehová kiyeknemilij tein yaya kichiuati uan amo kinixpolojok israelitas.

15 Satepan, Moisés mokepak uan temok den tepet uan maaktiaya ome lajas kampa Dios tajkuilojka. Itech sejse laja tajkuiliujtoya nochin ojkan. 16 Dios kinchijchiuak nejon lajas uan kintektiajki para itech kijkuilos itanauatiluan. 17 Uan Josué peuak kikaki keniuj israelitas eliuis ajkotsajtsiaj, uan kiluij Moisés: “Mokaki majya moteuijtokej”. 18 Sayoj ke Moisés kinankilij:

19 Niman keman Moisés motokij kampa yetoyaj israelitas uan kiitak kuakuejkonet uan keniuj mijtotijtoyaj, fiero kualanik, kintamotak ompa tepetsintan ome lajas tein maaktiaya uan kintamitapanak. 20 Uan kikuik kuakuejkonet tein kichijchiujkaj, kitatij* uan kitamikuechoj. Satepan, nejon kitamotak itech at uan kiniluij israelitas maj tayikan nejon at. 21 Uan Moisés kiluij Aarón: “¿Keyej tikchiuak maj israelitas ueyi tajtakokan?”. 22 Aarón kinankilij: “Amo xikualani tejuatsin. Tikmattokya ke nejin israelitas ipa kichiuaj tein amo kuali. 23 Yejuan nechiluijkej: ‘Xitechchijchiuili se tatadios* tein techyekantias, porin amo tikmatij toni kipanok Moisés, akin techkixtij de Egipto’. 24 Yejua ika nikiniluij: ‘Komo nankipiaj teisa de oro, ximokixtilikan uan xinechualkuilikanʼ. Uan niktikotamotak oro uan kisak nejin kuakuejkonet”.

25 Uan Moisés kiitak ke nochin fiero kichiujtoyaj porin Aarón kinkauak. Yejua ika akin kintauelitayaj kinkejkelouayaj. 26 Uan Moisés moketsato tatenoj de kampa kinkejketskaj ininkaltsitsin* uan kiniluij: “¡Akin kitakamatis Jehová maj nechajsiki!”. Uan nochin akin kinixmatij kemej levitas kiajsitoj. 27 Uan kiniluij: “Yejua nejin tein kijtoua toDios Jehová: ‘Nanochin xikuikan namomachete tein ojkan tenej,* xipanotiakan itech nochi kaltsitsin uan xikinmiktijtiakan namokniuan, namovecinos uan namotasojikniuan’”. 28 Levitas kichiujkej tein Moisés kiniluij uan nejon tonal kinmiktijkej kemej eyi mil takamej. 29 Uan Moisés kiniluij: “Ximoxelokan axkan para nankitekitiliskej Jehová, porin nanochin nankitakamatkej uan nankinmiktijkej namokoneuan uan namokniuan. Yejua ika, yejua namechtatiochiuiti axkan”.

30 Mostika, Moisés kiniluij nochin: “Namejuan nankichiujkej se ueyi tajtakol. Yejua ika nipankisati itech tepet niktataujtiti Jehová uan ijkon xa namechtapojpoluis”. 31 Uan Moisés oksepa pankisak uan kiluij Jehová: “¡Israelitas kichiujkej se tel ueyi tajtakol! ¡Mochijchiuilijkej se tatadios* de oro! 32 Sayoj ke komo tikneki, xikintapojpolui. Komo amo, nimitstataujtia xikixpolo notokay itech amatajkuilol kampa tikijkuiloj”. 33 Sayoj ke Jehová kinankilij Moisés: “Nikixpolos de noamatajkuilol akin kichiua tein amo kuali uan ijkon nechixnamiki. 34 Axkan xiouj uan xikinuika kampa nimitsiluij. Xikita, noángel mitsyekantias, uan itech tonal keman nikitas tein kichiujkej, nikintatsakuiltis porin tajtakolchiujkej”. 35 Uan Jehová peuak kintatsakuiltia israelitas porin kinauatijkaj Aarón maj kinchijchiuili se kuakuejkonet.

33 Jehová no kiluij Moisés: “Xiksentoka xiouj iniuan akin tikinkixtij de Egipto. Xiouj itech tal tein nikinyekiluij Abrahán, Isaac uan Jacob ke nikinmakaskia ikoneuan. 2 Niktitaniti se ángel maj mitsyekantiuj uan nikinkixtis akin kinixmatij kemej cananeos, amorreos, hititas, perizitas, heveos uan jebuseos. 3 Xipankisa itech se tal kampa moteltachiua.* Sayoj ke nejua amo nias namouan, porin tel amo nantakakij uan ueliskia namechtamimiktis itech ojti”.

4 Keman israelitas kikakkej ke tein Dios kijtojka amo kuali katka para yejuan, motayokoltijkej, uan amo akin mochijchiuak. 5 Uan Jehová kiluij Moisés: “Xikinilui israelitas: ‘Namejuan tel amo nantakakij. Nimantsin ueliskia namechtamimiktis. Yejua ika amo ximotalilikan tein ika namochijchiuaj hasta maj niknemili toni namechchiuilitiʼ”. 6 Yejua ika itech tepet Horeb, israelitas mokixtilijkej tein motalilijkaj para kualtsin moitaskej uan amo kemanok motalilijkej.

7 Uan Moisés kiketsato ikaltsin* nepakatsin de kampa yetoyaj ininkaltsitsin israelitas. Uan kiixtalij maj itech nejon kaltsin mosentilikan. Nochin akin kinekiaj kimatiskej toni kiixtaliaya Jehová, yayaj ompa. 8 Nochipa keman Moisés yaya itech nejon kaltsin, nochin kisayaj ininkaltenoj uan kiixtokayaj Moisés hasta ke kalakia itech nejon kaltsin. 9 Niman keman Moisés kalakia, mixti temouaya uan motaliaya ikalakyan kaltsin uan Dios tajtouaya iuan. 10 Keman kiitayaj mixti tein motaliaya ikalakyan kaltsin kampa Moisés yetoya, nochin moixpilouayaj ininkalixpan. 11 Uan Jehová kinojnotsaya Moisés ijkon kemej se takat tajtoua iuan okse. Keman Moisés mokepaya kampa yetoyaj okseki kaltsitsin, Josué mokauaya itech kaltsin kampa Dios tajtouaya iuan Moisés. Josué katka iokichpil Nun uan kipaleuiaya Moisés.

12 Uan Moisés kiluij Jehová: “Tinechiluijtok ‘Xikinixyekana israelitas’. Sayoj ke amo tinechiluijtok akoni tikiluiti maj nouan youi. Uan no tinechiluij ‘Kuali nimitsixmati* uan no tinechyolpaktiaʼ. 13 Komo nimitsyolpaktia, nimitstataujtia xinechnextili keniuj titamati, para maj nimitsyekixmati uan maj niksentoka nimitsyolpakti. Xikelnamiki ke nochin nejin mokoneuan”. 14 Yejua ika Dios kinankilij: “Nejua nias mouan uan nikchiuas maj amo teyi mitstekipacho”. 15 Uan Moisés kiluij: “Komo amo tias touan, nikan xitechkaua. 16 ¿Keniuj kimatiskej oksekin ke nejua uan nochin israelitas timitsyolpaktiaj? Komo touan tiouj, amo tiyeskij kemej oksekin akin nemij itech taltikpak”.

17 Jehová kiluij Moisés: “No nikchiuas nejin tein tinechtajtania, porin tinechyolpaktia uan kuali nimitsixmati”. 18 Moisés kinankilij: “Nimitstataujtia, xinechkaua maj nikita keniuj tiknextia mochikaualis”. 19 Uan Dios kiluij: “Nikchiuas xikita ke nitelyolkuali uan nimitsixmatiltis notokay, Jehová. Uan nikpaleuis akin nejua niknekis nikpaleuis, uan nikiknelis akin nejua niknekis nikiknelis”. 20 Sayoj ke kiluij: “Amo uelis tinechixitas, porin nion se takat uelis yoltos komo nechita”.

21 Uan no, Jehová kiluij: “Nikan kampa nietok yetok se ueyi tet. Ompa ximoketsa 22 uan keman nipanotos uan niknextijtias nochikaualis, nimitskalakis itech se tekoyok uan nimitsixtsakuas ika nomay hasta maj nipano. 23 Satepan nimomaijkuanis uan tinechpanitas. Sayoj ke amo uelis tinechixitas”.

34 Uan Jehová kiluij Moisés: “Xikalaxo ome tet kemej tein nimitsmakaka. Ompa nikijkuiloti tein nikijkuilojka itech lajas tein tikintamitapanak. 2 Xikchiua tein moneki para mosta kualkan tipankisas itech tepet Sinaí uan tinechitakiuj tepekuapan. 3 Maj amo akin pankisa mouan uan maj amo akin nenento itech nochin tepet. Nion ichkamej* oso kuakuejmej uelis takuajtinemiskej tepetsintan”.

4 Yejua ika Moisés kinalaxoj ome lajas kemej tein Dios kimakaka. Mostika, kualkantsin meuak uan pankisak itech tepet Sinaí, ijkon kemej Jehová kinauatijka. Maaktiaya nejon ome lajas. 5 Uan Jehová pantemok itech mixti uan mokauak iuan Moisés, uan Jehová kiteixmatiltij itokay. 6 Jehová panotiajki iixpan uan kijtojtiajki: “Jehová, Jehová, yejua se Dios akin teiknelia uan yolkuali, amo niman kualani,* nochipa tetasojta uan nochipa kijtoua tein melauj.* 7 Nochipa kintasojta ikoneuan tel miak xiujmej tein nion ueli se kipoua. Kitapojpoluia akin kichiua tein amo kuali, akin amo tatakamati uan akin tajtakolchiua. Sayoj ke kitatsakuiltia akin kinamiki maj kitatsakuiltikan, amo ijkon kikaua. Uan akin kichiua tein amo kuali kikaua maj ikoneuan, iixuiuan uan ikoneuan iixuiuan tajyouikan por tajtakol tein yejua kichiua”.

8 Nimantsin Moisés motankuaketsak uan moixpiloj hasta talpan. 9 Uan kijtoj: “Jehová, komo nimitsyolpaktia touan xiouj. Nimitstataujtia Jehová, touan xiouj maski tel amo titakakij. Xitechtapojpolui porin tikchiujkej tein amo kuali uan titajtakolchiujkej, uan xitechita kemej mokoneuan”. 10 Uan Dios kinankilij: “Nimotenkauati namouan nejin: nikchiuati uejueyi taman tein nochin kimojkaitaskej, tein amo keman mochiuani itech nochi taltikpak uan amo akin kiitani. Uan itech xolalmej kampa nanemiskej kiitaskej tein kichiua Jehová, porin nikchiuati se taman tein nochin kimojkaitaskej para namechpaleuis.

11 ”Kuali xikaki nochi tein nimitsnauatiti yekintsin. Nimitsyekantias uan nikinkixtis akin kinixmatij kemej amorreos, cananeos, hititas, perizitas, heveos uan jebuseos. 12 Amo ximotenkaua nion teyi iniuan akin nemij itech tal kampa tiajsiti, porin nejon uelis kichiuas tel amo kuali xinemi. 13 Moneki nankixitiniskej ininaltares, nankitatapatsaskej tet tein kikejketskej para ika taueyichiuaskej, uan nankintamotaskej koujmej tein ika taueyichiuaj.* 14 Amo ximoixpilo iixpan okse dios, porin Jehová tanauatia maj sayoj yejua kiueyichiuakan. Kemaj, yejua se Dios akin tanauatia maj sayoj yejua kiueyichiuakan. 15 Amo ximotenkaua nion teyi iniuan akin nemij itech nejon tal, porin keman kinueyichiuaskej inintatadiosuan* uan kinmaktiliskej miak taman, namechyoleuaskej uan namejuan nankikuaskej nejon. 16 Uan mookichpipiluan tikinnamiktis iniuan ininsiuapipiluan, uan nejon siuamej kinueyichiuaskej inintatadiosuan* uan kichiuaskej maj namookichpipiluan no ijkon kichiuakan.

17 ”Amo xikinchijchiua tatadiosmej.*

18 ”Moneki tikchiuas iluit keman tikuas pantsin tein amo kisamaualtiaj,* ijkon kemej nimitsnauatij. Tikuas nejon pantsin chikome tonal itech metsti abib* kemej nikixtalij, porin itech metsti abib tikisak de Egipto.

19 ”Nochin okichpipil akin tayekanaj noaxkauan. No noaxkauan tapialueuetkej tein achto yolij, kemej kuakuejmej uan ichkamej. 20 Se burro tein achto yoli moneki tikmakixtis. Uan para tikmakixtis moneki titaxtauas ika se ichkat. Sayoj ke komo amo titaxtaua moneki tikechpostekis. No moneki titaxtauas para tikinmakixtis nochin mookichpipiluan akin tayekanaj. Nochin akin nechueyichiuakiuij moneki kiualkuiskej teisa.

21 ”Titekitis chikuasen tonal, sayoj ke itech chikometika tonal timoseuis, hasta itech tonalmej keman tayuntajuiaj oso kisentiliaj tatok.

22 ”Tikchiuas iluit keman peuas tiktekis tein mochiuak* uan tikmaktilis Dios trigo tein yekinika chikauaya. Uan no keman tamis xiuit, tikchiuas iluit keman tiktamitekisya nochi tein mochiuak.*

23 ”Expa xiuit, nochin takamej kiueyichiuatiuij moTeko Jehová, ininDios israelitas. 24 Porin nimitsyekantias uan nikinkixtis akin nemij itech xolalmej kampa tias uan nikchiuas maj okachi ueyia motal. Amo akin kinekis mitskuilis motal keman tias tikitatiuj moDios Jehová expa xiuit.

25 ”Keman tinechmaktilis se tapial, amo xiktemaka esti uan teisa tein kipia levadura. Maj amo akin mokauili hasta mostika tein mokauas den tapialtsin tein kimiktiskej itech iluit tein monotsa Pascua.

26 ”Tikuikas ichan moDios Jehová tein achto chikauayas motalpan uan tein okachi kuali.

”Amo xikmolonti* se chivojkonet ika ileche inan”.

27 Uan Jehová no kiluij Moisés: “Xikijkuilo tein nimitsiluijtok, porin ika nejon nimotenkaujtok se taman mouan uan iniuan israelitas”. 28 Uan Moisés mokauak ompa iuan Jehová 40 tonalmej. Amo kikuaj nion teyi uan amo no tayik at. Uan Dios* kijkuiloj itech ome lajas nejon tein motenkauak. Ompa kijkuiloj Majtakti Tanauatilmej.*

29 Satepan, Moisés temok den tepet Sinaí uan maaktiaya ome lajas kampa Dios tajkuilojka. Kemej tajtojka iuan Dios, ixpepetakaya,* sayoj ke yejua amo kimatia. 30 Keman Aarón uan nochin israelitas kiitakej ke Moisés ixpepetakaya, amo kinekkej motokiskej iuan porin moujkej.

31 Sayoj ke Moisés kinnotsak, uan Aarón uan nochin taixyekananij israelitas kiajsitoj, uan yejua iniuan tajtoj. 32 Satepan kiajsitoj nochin israelitas. Uan Moisés kinmatiltij nochi tanauatilmej tein Jehová kimakaka itech tepet Sinaí. 33 Keman Moisés tamitajtouaya iniuan israelitas, moixtsakuaya ika se tasal.* 34 Sayoj ke keman Moisés yaya kiitati Jehová para iuan tajtos, moixkixtiliaya nejon tasal hasta ke kisaya. Keman kisaya, kiniluiaya israelitas tein kinauatijka. 35 Israelitas kiitayaj ke Moisés ixpepetakaya. Uan Moisés oksepa moixtsakuaya ika nejon tasal uan ijkon mokauiliaya hasta ke oksepa yaya kinojnotsati Dios.

35 Satepan, Moisés kinsentilij nochin israelitas uan kiniluij: “Yejua nejin tein Jehová tanauatij: 2 uelis nantekitiskej chikuasen tonal, sayoj ke chikometika tonal xeliujtok para Dios uan ijkon moneki nankiitaskej. Tonal sábado ixyetok para namoseuiskej uan nankiueyitaliskej Jehová. Akin tekitis itech tonal sábado, moneki mikis. 3 Amo xitaxotaltikan* namochan itech tonal sábado”.

4 Uan Moisés kiniluij nochin israelitas: “Yejua nejin tein Jehová tanauatij: 5 ‘Xiksentilikan tein nankimakaskej Jehová. Akin kinekis kimakas Jehová teisa ika nochi iyolo maj kiualkui oro, plata, cobre, 6 hilo azul, morado, chichiltik, lino tein tel kuali, chivojtsonti, 7 ipankuetaxyo ichkaueuet* tein chichiltikya, ipankuetaxyo foca uan acaciajkouit. 8 No xiksentilikan aceite para candilmej uan chokil tein ajuiyak tein monotsa bálsamo. Nejin ika kichijchiuaskej aceite para kixeloskej tein iaxka Dios uan para kopal tein ajuiyak. 9 Uan no xiksentilikan tetsitsin tein moixmatij kemej ónice uan okseki tetsitsin para kitaliliskej koton tein kiluiaj efod* uan bolsita tein kipias iyolixpan tiopixkat.

10 ”’Maj ualakan nochin akin kuali tamachijchiuaj uan maj kichijchiuakan nochi tein Jehová tanauatij: 11 ikaltsin uan tein ika pantsaktos, ganchitos, seki taman tein tamatis kemej ventanas tein ueueyak, koujmej tein kinixtapaltaliskej, kalikximej uan ininmetstapechuan; 12 tatiochiualkaxon,* koujmej tein ika kiuikaskej uan ipantsak, uan cortina tein taxelos kalijtik; 13 mesa uan koujmej tein ika kiuikaskej, nochi tein mokuis itech mesa uan pantsin tein ompa kitaliskej; 14 tauilketsaloni uan tein mokuis para in tauilketsaloni, candilmej tein kipias uan aceite tein ika taxotatos; 15 altar kampa tapopochuiskej uan koujmej tein ika kiuikaskej; aceite para kixeloskej tein iaxka Dios uan kopal tein ajuiyak; cortina tein yas ikalakyan kaltsin; 16 altar kampa kichichinoskej tein kimaktiliskej Dios, malla tachijchiuj ika cobre tein kipias altar, koujmej tein ika kiuikaskej uan nochi tein mokuis itech altar; paila uan kampa ijkatos; 17 cortinas tein ika tatsaktos kalampa, postes kampa kintakuiltiskej uan ininmetstapechuan; cortina tein yas kampa kalakiskej para panoskej kampa yetos kaltsin; 18 clavos tein talpan toktoskej para kitsikoskej cortinas den kaltsin uan tein yetoskej kalampa uan mekat tein ika tajtalpiskej,* 19 tasal* tein kualtsin tajkitil tein kikuiskej akin ompa tekitiskej, tasal tein kikuis Aarón kemej tiopixkat uan tasal tein kikuiskej ikoneuan para tekitiskej kemej tiopixkamej’”.

20 Uan satepan ke Moisés kinnojnotsak, nochin israelitas yajkej. 21 Uan nochin akin kinekkej tapaleuiskej ika nochi ininyolo, peuak kiuikaj miak taman para Jehová. Nochi nejon mokuiskia para kichijchiuaskej kaltsin uan nochi tein mokuis para ompa taueyichiuaskej uan para kichijchiuaskej tasal tein kikuiskej tiopixkamej. 22 Uan takamej uan siuamej kisentokakej kitemakakej ika nochi ininyolo nejin: ganchitos, pipilolmej, anillos uan okseki taman tein motaliliayaj. No kiuikakej okseki taman tachijchiuj ika oro. Nochin kimaktilijkej* Jehová nejon oro. 23 Uan nochin akin kipiayaj hilo azul, morado, chichiltik, lino tein tel kuali, chivojtsonti, ipankuetaxyo ichkaueuet tein chichiltikya uan ipankuetaxyo foca, no kiuikakej. 24 Nochin akin kinekiaj kimakaskej Jehová plata uan cobre kiuikakej. Uan nochin akin kipiayaj acaciajkouit tein mokuiskia no kiuikakej.

25 Nochin siuamej akin kuali tamachijchiuayaj kichijchiujkej hilo azul, morado, chichiltik uan lino tein tel kuali, uan kiuikakej. 26 Uan nochin siuamej akin kuali tamachijchiuayaj, ika nochi ininyolo kichijchiujkej hilo ika chivojtsonti.

27 Uan no, taixyekananij israelitas kiuikakej tetsitsin tein moixmatij kemej ónice uan okseki tetsitsin. Nochi nejon tetsitsin kitaliliskiaj ikoton tiopixkat uan bolsita tein kipiaskia iyolixpan. 28 No kiuikakej chokil tein ajuiyak tein monotsa bálsamo uan aceite. Nejon aceite mokuiskia para candilmej, para kixeloskej tein iaxka Dios uan para kopal tein ajuiyak. 29 Nochin takamej uan siuamej akin kinekkej kitemakaskej teisa ika nochi ininyolo, kiuikakej tein mokuiskia itech tekit tein Jehová kinauatijka Moisés maj kichiuakan. Israelitas kimaktilijkej Jehová nochi nejon.

30 Uan Moisés kiniluij israelitas: “Xikitakan, Jehová kijitak* Bezalel, ichankauj Judá. Yejua iokichpil Urí uan iixuiuj Hur. 31 Kipaleuij ika ichikaualis para maj tamatkej, maj nochi kiajsikamati uan maj kimati keniuj kimachijchiuas tein yeski. 32 Ijkon uelis kinemilis keniuj kualtsin tachijchiuas, keniuj kikuis oro, plata uan cobre, 33 keniuj kitejtekis tet uan kitajtalis kampa moneki yas, uan uelis kichijchiuas miak taman tein kualtsin ika kouit. 34 Uan kichiuak maj Oholiab tel ueli tamachti. Oholiab iokichpil Ahisamac uan ichankauj Dan. 35 Kichiuak maj kuali tamachijchiuakan, maj tajmachchiuakan, maj tajtsomakan ika hilo azul, morado, chichiltik uan lino tein tel kuali uan maj kuali tajkitikan. Nejin takamej kimachijchiuaskej tein yeski uan kuali kinemiliskej keniuj kualtsin tachijchiuaskej.

36 ”Bezalel, Oholiab uan nochin takamej akin kuali tamachijchiuaj, kichijchiuaskej nochi tein monekis para in kaltsin kampa taueyichiuaskej, ijkon kemej Jehová tanauatij. Jehová kichiuak maj kimatikan keniuj okachi kuali tamachijchiuaskej”.

2 Uan Moisés kinnotsak Bezalel, Oholiab uan nochin takamej akin Jehová kichiuak maj okachi kuali tamachijchiuakan. Yejuan kinekkej tekitiskej ika nochi ininyolo. 3 Uan Moisés kinmakak nejon takamej nochi tein israelitas kitemakakaj para in kaltsin kampa taueyichiuaskej. Sayoj ke mostaj kualkan israelitas kisentokayaj kitemakayaj miak taman.

4 Keman peujkajya tachijchiuaj para in kaltsin, nochin akin kuali tamachijchiuayaj peuak ajsij kampa yetoya Moisés. 5 Uan kiluijkej: “Nochin kiualkuitokej tel miak, okachi ke tein moneki para tekit tein Jehová tanauatij maj mochiua”. 6 Yejua ika Moisés tanauatij maj teiluitij nejin: “Amo teyi xikualkuikanok para mochijchiuas kaltsin”. Ijkon kintsakuilijkej israelitas uan amo teyi kiuikakejok. 7 Yetoyaya nochi tein monekia para maj mochiua tekit. Tein melauj, onkaya okachi ke tein monekia.

8 Uan nochin kuali tamachijchiuanij kichijchiujkej kaltsin ika majtakti tasal.* Kichijchiujkej ika linojtamalin tein tel kuali, hilo azul, morado uan chichiltik. Itech nejon tasal, Bezalel* kimaijtsomak seki querubines. 9 Sejse tasal kipiaya 12 metros uan ome cuarta* de ueyak uan chikueyi cuarta* de patauak. Nochin kipiayaj sayoj se tamachiuj. 10 Uan kinijtsomak makuil tasal para maj mosenkuito uan no ijkon kinijtsomak okseki makuil tasal. 11 Satepan, ika hilo azul kijtsomilij seki tamalin itempan se ueyi tasal, uan no ijkon kichiuak itempan okse para ompa ueliskia kinsalos. 12 Katkaj 50 tamalin itempan se ueyi tasal uan 50 itempan okse, kampa kinsaloskia. Ijkon, nochi tamalin tein kijtsomilij sejse ueyi tasal moixnamiktoskiaj. 13 Satepan, kichijchiuak 50 ganchitos ika oro uan ika kintajtakuiltij ome uejueyi tasal. Ijkon, ueyi tasal para kaltsin mosenkuitoya.

14 No kichijchiuak 11 tasalmej ika chivojtsonti para no kipantalilis kaltsin. 15 Sejse tasal kipiaya 13 metros uan 35 centímetros* de ueyak uan chikueyi cuarta* de patauak. Nochin kipiayaj sayoj se tamachiuj. 16 Kinijtsomak makuil tasal para maj mosenkuito, uan no kinijtsomak okseki chikuasen tasal. 17 Satepan kijtsomilij 50 tamalin itempan sejse ueyi tasal, kampa mosalouayaj nejon ome uejueyi tasal. 18 Kichijchiuak 50 ganchitos ika cobre uan kintakuiltij itech ome uejueyi tasal uan kinsentilij. Ijkon, ueyi tasal para kaltsin mosenkuitoya.

19 Ika ipankuetaxyo ichkaueuet* tein chichiltikya no kichijchiuak tein kipantaliliskia kaltsin, uan ika ipankuetaxyo foca kichijchiuak okse para kitamipantsakuas.

20 Uan kichijchiuak seki taman tein tamatia kemej ventanas tein ueueyak para kaltsin. Katkaj de acaciajkouit. Nejon ventanas kinkejketsaskiaj. 21 Sejse kipiaya naui metro uan ome cuarta* de ueyak uan eyi cuarta* de patauak. 22 Kipiayaj ome ininmetsuan* tein mokuitoyaj. Ijkon kichijchiuak nochin ventanas tein kipiaskia kaltsin. 23 Kichijchiuak 20 ventanas tein yaskiaj sekopa. Keman kalakiskiaj mokauaskiaj ininopochmakopa. 24 No kichijchiuak ika plata 40 metstapechmej tein yaskiaj tatsintan de 20 ventanas: itsintan sejse ventana kipiaskia ome metstapechmej kampa kinmetskajkalakiskia. 25 Uan kichijchiuak 20 ventanas tein yaskiaj oksekopa. Keman kalakiskiaj mokauaskiaj ininyekmakopa. 26 No kichijchiuak ika plata 40 metstapechmej: itsintan sejse ventana kipiaya ome metstapechmej.

27 Para taikankopa den kaltsin, tein mokauaskia kampa ika pankalaki tonaltsin, kichijchiuak chikuasen ventanas. 28 Uan no, kichijchiuak omeok tein yetoskiaj itech sejse esquina taikankopa den kaltsin kemej kalikximej. 29 Nejin kalikximej tein yetoskiaj itech sejse esquina ixome katkaj desde tatsintan hasta ajko. Mokuanamikiskiaj kampa yetoskia yekinika ruedita. 30 Katkaj chikueyi ventanas tein kipiayaj 16 metstapechmej de plata: itsintan sejse ventana kipiaya ome metstapechmej.

31 Ika acaciajkouit no kichijchiuak makuil koujmej tein kinixtapaltaliskia, para maj ventanas tein kipiaskia kaltsin sekopa amo moxelokan. 32 Kichijchiuak makuil koujmej para maj amo moxelokan ventanas tein yetoskiaj oksekopa, uan makuil para tein yetoskiaj taikankopa den kaltsin. 33 Kouit tein kiixtapaltaliskia tatajko, peuaskia se esquina uan tamiskia hasta itech okse esquina. 34 In ventanas kintamitalilij oro uan kinchijchiuilij seki rueditas kampa kinkajkalakiskiaj koujmej. Nejon koujmej no kintamitalilij oro.

35 Kichijchiuak se cortina ika hilo azul, morado, chichiltik uan ika linojtamalin tein tel kuali. Itech nejon cortina kimaijtsomak seki querubines. 36 Uan kichijchiuak naui kalikximej de acaciajkouit uan kintamitalilij oro. No kichijchiuak ganchos de oro uan naui metstapechmej de plata kampa ijkatoskiaj kalikximej. 37 Para ikalakyan kaltsin kichijchiuilij se cortina ika hilo azul, morado, chichiltik uan ika linojtamalin tein tel kuali. 38 Uan no kichijchiuak makuil kalikximej uan iganchos. Kitamitalilij oro ikuapan kalikximej uan irueditas, sayoj ke makuil ininmetstapechuan katkaj de cobre.

37 Satepan, Bezalel kichijchiuak tatiochiualkaxon* ika acaciajkouit. Kipiaya makuil cuarta* de ueyak, eyi cuarta* de patauak uan eyi cuarta de uejkapan. 2 Yejua kitamitalilij oro tein okachi kuali taijtik uan tapani. Uan sentatenoj de ikuapan tatiochiualkaxon kikualtsintilij ika oro. 3 Satepan kiatilij oro uan kichijchiuak naui rueditas, uan kitalilij ajkotsin de imetsuan tatiochiualkaxon: sekopa ome rueditas uan oksekopa no ome. 4 Uan no kichijchiuak seki kouit tein ueueyak uan kitamitalilij oro. Katka acaciajkouit. 5 Uan nejon koujmej kinkajkalakij itech rueditas tein yetoyaj inajnakastan tatiochiualkaxon para kiuikaskej.

6 Uan no, kichijchiuak ipantsak tatiochiualkaxon ika oro tein okachi kuali. Kipiaya makuil cuarta de ueyak uan eyi cuarta de patauak. 7 Uan ika se martillo kichijchiuak ome querubines de oro. Kintalij tajtatenoj de ipantsak, 8 se querubín kitalij sekopa uan okse oksekopa. Kinchijchiuak querubines uan kintalij tajtatenoj de ipantsak. 9 Nejon ome querubines kiajoktoyaj ininajtapaluan uan ika kiyekauilijtoyaj ipantsak tatiochiualkaxon. Moixnamiktoyaj uan ixpilkatoyaj.

10 Kichijchiuak mesa ika acaciajkouit. Kipiaya naui cuarta de ueyak, ome cuarta de patauak uan eyi cuarta de uejkapan. 11 Kitamitalilij oro tein okachi kuali uan sentatenoj kikualtsintilij ika oro. 12 No kiyoualoltij se tablita tein patauak chikome centímetros,* uan sentatenoj de nejon tablita no kikualtsintilij ika oro. 13 Uan no, kiatilij oro uan kichijchiuak naui rueditas uan kitalilij kampa pepechiujtoyaj naui imetsuan mesa. 14 Rueditas yetoyaj tanitsin* den tablita. Ompa kinkajkalakiskiaj koujmej tein ika kiuikaskiaj mesa. 15 Uan kichijchiuak seki kouit tein ueueyak para ika kiuikaskej mesa uan kitamitalilij oro. Katka acaciajkouit. 16 Uan no, ika oro tein okachi kuali kichijchiuak tapalkamej tein yetoskiaj itech mesa: platos, copas, uejueyi kaxit uan seki komit tein ika kipantekaskiaj vino itech altar para kimaktiliskej Dios.

17 Satepan kichijchiuak tauilketsaloni ika oro tein okachi kuali. Ika se martillo kichijchiujtiajki uan kitalilij tein ika moketsaskia. Tatajkoyampa ijkatoya kemej se koujtsin uan kipiaya seki taman kemej xiujtsitsin,* bolitas* uan xochimej. Mosenkuitoya ika sayoj se ueyi cacho oro. 18 Tauilketsaloni kipiaya chikuasen imauan: sekopa kipiaya eyi uan oksekopa no eyi. 19 Sekopa, sejse imay kipiaya eyi taman tein tamatia kemej ixochiyo almendro, eyi bolitas uan eyi xochit. Yaya se almendrojxochit, se bolita uan se xochit uan ijkon motojtokatiayaj. Itech imauan tein kipiaya oksekopa no ijkon katka. Ijkon chijchiujtoyaj chikuasen imauan tauilketsaloni. 20 Uan koujtsin tein ijkatoya tatajkoyampa kipiaya naui taman tein tamatia kemej ixochiyo almendro, naui bolitas uan naui xochit. Yaya se almendrojxochit, se bolita uan se xochit uan ijkon motojtokatiayaj. 21 Tanitsin* de kampa kisayaj yekinika ome imauan tauilketsaloni kipiaya se bolita, uan ijkon katka tanitsin de kampa kisayaj okseki imauan. Ijkon katkaj chikuasen imauan tein kisayaj den koujtsin tein ijkatoya tatajkoyampa. 22 Bolitas, imauan uan nochi tauilketsaloni chijchiujtoya ika sayoj se ueyi cacho oro. Ika se martillo kichijchiujtiajkej. 23 Satepan, ika oro kichijchiuak chikome candilmej, pinzas uan tapalkatsitsin para mechas tein tataskejya. 24 Ika oro kichijchiuak tauilketsaloni uan nochi tein mokuiskia para in tauilketsaloni. Kikuik 34 kilos* de oro tein okachi kuali.

25 No kichijchiuak in altar ika acaciajkouit para ompa tapopochuiskej. Katka cuadrado uan kipiaya ome cuarta de ueyak, ome cuarta de patauak uan naui cuarta de uejkapan. Altar uan cuernos tein kipiaya mosenkuitoyaj ika sayoj se kouit. 26 Kitalilij oro tein okachi kuali tapani, inajnakastan uan cuernos. Uan no, sentatenoj de ikuapan altar kikualtsintilij ika oro. 27 Tanitsin* de itenoj kitalilij seki rueditas de oro. Sekopa kipiaya ome uan oksekopa no kipiaya ome. Ompa kinkajkalakiskiaj koujmej tein ika kiuikaskiaj. 28 Satepan kichijchiuak seki kouit tein ueueyak uan kitamitalilij oro. Katka acaciajkouit. 29 Uan no kichijchiuak aceite tein ika kixeloskej tein iaxka Dios uan kopal tein ajuiyak tein amo tamanelol. Aceite uan kopal tel kuali chijchiujtoyaj.

38 Uan no, ika acaciajkouit kichijchiuak altar kampa kichichinoskej tein kimaktiliskej Dios. Katka cuadrado uan kipiaya ome metro uan se cuarta* de ueyak uan no ijkon de patauak, uan kipiaya chikuasen cuarta* de uejkapan. 2 Itech sejse esquina kichijchiuilij se cuerno. Altar uan cuernos tein kipiaya mosenkuitoyaj ika sayoj se kouit. Uan kitamitalilij cobre in altar. 3 Satepan kichijchiuak nochi tein mokuiskia itech altar: cubetas, palas, uejueyi kaxit, teposmej tein tenpijpitstikej* para nakat uan tapalkamej para tekol. Kichijchiuak nochi nejin ika cobre. 4 Uan no, kintajtalij varillas de cobre uan kichijchiuak kemej se malla uan kikalakij itech altar. Kitalij tani* de itempan uan tamito tatajko. 5 No kiatilij tepos uan kichijchiuak naui rueditas tein yaskiaj itech naui esquinas. Kintalij nejon rueditas kampa tamia malla para ompa kikajkalakiskiaj seki kouit tein ueueyak. 6 Satepan, kichijchiuak kouit tein ueueyak uan kitamitalilij cobre. Katka acaciajkouit. 7 Uan kinkajkalakij nejon koujmej itech rueditas tein yetoyaj tajtanakastan den altar para ika kiuikaskej. In altar katka kemej se ueyi caja uan chijchiujtoya ika tablones.

8 Uan ika cobre kichijchiuak paila uan kampa ijkatoskia. Kichijchiuak ika cobre tein siuamej kikuiaj para ika moixitaskej.* Nejon siuamej tekitiaj ikalakyan kaltsin kampa kiueyichiuayaj Dios ijkon kemej ixyetoya.

9 Uan tatsakuak kalampa den kaltsin. Kampa kalakiskiaj, ininopochmakopa yetoyaj cortinas tachijchiuj ika linojtamalin tein tel kuali, uan kipiaya 44 metros uan tajko* de ueyak. 10 Kinkejketsak 20 postes de cobre uan 20 metstapechmej no de cobre, kampa kinmetskajkalakiskia. Ganchos tein kipiaya nejon postes uan rueditas chijchiujtoyaj ika plata. 11 Kampa kalakiskiaj, ininyekmakopa no yetoyaj seki cortinas tein kipiaya 44 metros uan tajko de ueyak. Ijijkatoyaj 20 postes uan 20 metstapechmej de cobre. Nejon postes no kipiayaj ganchos uan rueditas tein chijchiujtoyaj ika plata. 12 Sayoj ke, taikankopa den kaltsin, cortinas kipiayaj 22 metros uan se cuarta* de patauak. Ijijkatoyaj majtakti postes itech majtakti metstapechmej. Nejon postes no kipiayaj ganchos uan rueditas tein chijchiujtoyaj ika plata. 13 Kampa ika ualkisa tonaltsin, kipiaya 22 metros uan se cuarta de patauak. 14 Taixpankopa den kaltsin, sekopa yetoya se cortina tein kipiaya chikuasen metro uan eyi cuarta.* Yetoya itech eyi postes tein ijijkatoyaj itech eyi metstapechmej. 15 Uan oksekopa yetoya se cortina tein kipiaya chikuasen metro uan eyi cuarta. Yetoya itech eyi postes tein ijijkatoyaj itech eyi metstapechmej. 16 Nochin cortinas tein ika tatsaktoya kalampa chijchiujtoyaj ika linojtamalin tein tel kuali. 17 Metstapechmej katkaj de cobre, ganchos uan rueditas katkaj de plata. No kitamitalilij plata ikuapan postes. Nochin postes tein ijijkatoyaj kalampa kipiayaj rueditas de plata.

18 Cortina tein yetoya kampa kalakiaj para panoskej kampa yetoya kaltsin, chijchiujtoya ika hilo azul, morado, chichiltik uan linojtamalin tein tel kuali. Kipiaya chikueyi metro uan naui cuarta de ueyak. Uan kipiaya ome metro uan se cuarta de uejkapan, ijkon kemej cortinas tein ika tatsaktoya kalampa. 19 Naui postes tein ijijkatoyaj uan naui metstapechmej chijchiujtoyaj ika cobre. Ganchos uan rueditas tein kipiayaj nejon postes chijchiujtoyaj ika plata uan ininkuapan kitamitalilij plata. 20 Nochin clavos tein talpan toktoyaj para kitsikoskej cortinas den kaltsin uan tein yetoyaj kalampa, katkaj de cobre.

21 Moisés tanauatij maj kijkuilokan nochi tein mokuik para kichijchiuaskej kaltsin kampa yetoskia tatiochiualkaxon.* Akin kinixmatij kemej levitas kijkuilojkej nochi nejon uan kinixyekanak Itamar, iokichpil tiopixkat Aarón. 22 Bezalel kichiuak nochi tein Jehová kinauatijka Moisés. Bezalel katka iokichpil Urí uan iixuiuj Hur, ichankauj Judá. 23 Iuan yetoya Oholiab, akin tamachijchiuaya, tajtsomaya uan tajkitia ika hilo azul, morado, chichiltik uan lino tein tel kuali. Oholiab katka iokichpil Ahisamac uan ichankauj Dan.

24 Oro tein mokuik para tachijchiuaskej kampa Dios taxeloj yejua tein kimaktilijkej Dios uan kimauiuikakej iixpan. Katka mil kilos,* tein kitamachiujkej ika pesa tein kikuiaj kampa Dios taxeloj. 25 Plata tein kiuikakej takamej akin kinijkuilojkaj katka 3,440 kilos,* tein kitamachiujkej ika pesa tein kikuiaj kampa Dios taxeloj. 26 Sejse takat akin kijkuilojkej uan kipiaya 20 xiujmej oso okachi, kiuikak chikuasen gramo* de plata. Kikuikej pesa tein kikuiaj kampa Dios taxeloj para kitamachiuaskej nejon plata. Katkaj 603,550* takamej.

27 Kiatilijkej 3,420 kilos* de plata uan ika kichijchiujkej imetstapech sejse ventana tein kipiaya kaltsin. Uan no ika kinchijchiujkej metstapechmej tein yetoyaj kampa pilkatoya cortina tein taxelouaya kalijtik. Ika nejon 3,420 kilos kinchijchiujkej 100 metstapechmej. Sejse metstapech kipiaya 34 kilos ika 200 gramos. 28 Uan ika 20 kilos de plata, yejua kinchijchiuak ganchos para kalikximej, kintamitalilij plata ininkuapan nejon kalikximej uan kinsentilij.

29 Cobre tein kitemakakej ajsik 2,420 kilos.* 30 Ika nochi nejin cobre, kichijchiuak imetstapech sejse kalikxit tein yetoya ikalakyan kaltsin, altar uan varillas tein kipiaya, nochi tein mokuiskia itech altar, 31 ininmetstapech postes tein ijijkatoyaj kalampa uan kiyoualouayaj kaltsin, ininmetstapech postes tein ijijkatoyaj kampa kalakiaj para panoskej kampa yetoya kaltsin, clavos tein talpan toktoyaj para kitsikoskej cortinas den kaltsin uan clavos tein yetoyaj kalampa.

39 Ika hilo azul, morado uan chichiltik, yejuan kichijchiujkej tasal* tein kualtsin tajkitil, tein kikuiskej akin tekitiskej kampa Dios taxeloj. No kichijchiujkej tasal tein kikuis Aarón kemej tiopixkat, ijkon kemej Jehová kinauatijka Moisés.

2 Bezalel kichijchiuak koton tein kiluiaj efod* ika oro, hilo azul, morado, chichiltik uan linojtamalin tein tel kuali. 3 Ika martillo kitejteuijkej oro hasta ke kualtsin kanauayak. Uan yejua kitetejtekik nejon oro tel pijpitsaktik kemej hilo para kiijkitis iuan hilo azul, morado, chichiltik uan lino tein tel kuali. Koton ijtsontoya kemej se tajmach. 4 Kichijchiujkej ika ome tasal tein monamikiaj uan ijtsontoya iajkolko. 5 Uan cinturón* tajkitil tein ijtsontoya itech koton para ika motajkotilintis, no chijchiujtoya ika oro, hilo azul, morado, chichiltik uan linojtamalin tein tel kuali, ijkon kemej Jehová kinauatijka Moisés.

6 Uan tetsitsin tein moixmatij kemej ónice kinkajkalakijkej itech oro. Kintektiajkej nejon tetsitsin para itech kijkuiloskej inintokay ikoneuan Israel, ijkon kemej kitekij teisa para kichijchiuaskej se sello. 7 Uan yejua kintalij iajkolko tiopixkat, itech ikoton para maj kinelnamikikan ikoneuan Israel, ijkon kemej Jehová kinauatijka Moisés. 8 Uan kichijchiuak bolsita tein kipiaya iyolixpan. Ijkon kemej koton, no chijchiujtoya ika oro, hilo azul, morado, chichiltik uan linojtamalin tein tel kuali. 9 Keman kikelpachouayaj, mokauaya cuadrado uan kipiaya se cuarta* de ueyak uan se cuarta de patauak. 10 Kintejtekpankej tetsitsin itech naui filas. Yekinika tekpantoyaj eyi tetsitsin: rubí, topacio uan esmeralda. 11 Itech ojpatika fila tekpantoyaj turquesa, zafiro uan jaspe. 12 Itech expatika fila tekpantoyaj léshem,* ágata uan amatista. 13 Uan itech naujpatika fila tekpantoyaj crisólito, ónice uan jade. Kampa aktoyaj nochin tetsitsin chijchiujtoya ika oro. 14 Itech nejon tetsitsin ijkuiliujtoyaj inintokay 12 ikoneuan Israel. Sejse tokayit kiixnextiaya semej den 12 uejueyi kalyetonij. Sejse tetsin kitektiajkej para itech tajkuiloskej, ijkon kemej kitekij teisa para kichijchiuaskej se sello.

15 Uan kichijchiujkej seki tamalin para bolsita. Nejon tamalin chijchiujtoya ika oro tein okachi kuali. 16 Ika oro kichijchiujkej kampa aktoskiaj tetsitsin uan ome anillos. Kintalijkej nejon ome anillos itech ome esquinas tein kipia ajko den bolsita. 17 Satepan kikalakijkej ome tamalin de oro itech ome anillos. 18 Uan kikalakijkej ipuntas nejon ome tamalin itech oro tein yetoya iajkolko, uan ijkon bolsita mokauak taixpankopa. 19 Satepan kichijchiujkej ome anillos de oro uan kitalijkej itech ome esquinas tein kipia tani.* Nejon anillos kintalijkej taikankopa den bolsita uan mokuiltiayaj itech koton. 20 No kichijchiujkej ome anillos de oro uan kintalijkej taixpankopa den koton. Kitalijkej tani de iajkolko, kampa ika monamikia koton, ajkotsin de kampa yetoya cinturón tein tajkitil. 21 Uan anillos tein kipiaya bolsita kitakuiltijkej itech anillos tein kipiaya in koton ika se tamalin azul. Ijkon in bolsita kuali yetoya tapani den koton, ajkotsin den cinturón tein tajkitil, ijkon kemej Jehová kinauatijka Moisés.

22 No kichijchiuak tasal tein makojkotoltik tein yaya tatampa den koton. Nejon tasal tajkitil chijchiujtoya nochi ika hilo azul. 23 Kechtapotoya kemej se teposkoton tein kikui se soldado. Uan kampa kechtapotoya kitenijtsonkej para maj amo tsayani. 24 Uan itech itempan tasal tein makojkotoltik, kichijchiuilijkej seki bolitas kemej yeskia granadas ika hilo azul tein kimalinkaj iuan hilo morado uan chichiltik. 25 Ika oro tein okachi kuali no kichijchiujkej seki campanitas uan kintalijkej itempan tasal iuan granadas. Tajtatajko den granadas kitalijkej campanitas. 26 Kitalijkej se campanita uan se granada, se campanita uan se granada. Ijkon kintajtalijtiajkej itech nochi itempan tasal tein makojkotoltik tein kikuiaj akin tekitiaj kemej tiopixkamej. Kichijchiujkej nochi nejon ijkon kemej Jehová kinauatijka Moisés.

27 Ika lino tein tel kuali, kichijchiujkej tasal tein tajkitil tein kikuiskiaj Aarón uan ikoneuan, 28 uan no tasal tein mokuayoualouiliskiaj. Ika linojtamalin tein tel kuali no kichijchiujkej tatampa calzon tein motaliliskiaj. 29 Uan tein ika motajkoilpiskiaj* kichijchiujkej ika linojtamalin tein tel kuali, hilo azul, morado uan chichiltik. Kichijchiujkej nochi nejon ijkon kemej Jehová kinauatijka Moisés.

30 Uan ika oro tein okachi kuali kichijchiujkej se tepos kanauak tein miliktik tein kinextiaya ke Dios kixeloj tiopixkat. Uan kemej se sello, kitektiajkej uan kijkuilouilijkej nejin: “Jehová senkis chipauak”. 31 Uan nejon tepos kanauak kitalilijkej se tamalin azul para kitsikoskej itech tasal tein mokuayoualouilis, ijkon kemej Jehová kinauatijka Moisés.

32 Ijkon kitamichijchiujkej nochi tein monekia para in kaltsin kampa kiueyichiuaskiaj Dios. Israelitas kichiujkej nochi tein Jehová kinauatijka Moisés. Kichiujkej ijkon kemej kijtojka.

33 Uan kiuikilijkej Moisés nochi tein ika kiketsaskiaj in kaltsin, uejueyi tasal uan nochi tein mokuiskia: ganchitos, ventanas, koujmej tein kinixtapaltaliskiaj, kalikximej uan metstapechmej; 34 ipankuetaxyo ichkaueuet* tein chichiltikya, ipankuetaxyo foca uan cortina tein taxelos kalijtik; 35 tatiochiualkaxon* uan koujmej tein ika kiuikaskej, uan ipantsak; 36 mesa uan nochi tein ompa mokuis uan pantsin tein ompa kitaliskej; 37 tauilketsaloni tachijchiuj ika oro tein okachi kuali, icandiluan tein tekpantoyaj, nochi tein mokuis para in tauilketsaloni uan aceite para taxotatos; 38 altar tachijchiuj ika oro, aceite tein ika kixeloskej tein iaxka Dios, kopal tein ajuiyak uan cortina para ikalakyan kaltsin; 39 altar uan malla tachijchiuj ika cobre, koujmej tein ika kiuikaskej, nochi tein mokuis itech altar, paila uan kampa ijkatos; 40 cortinas tein ika tatsaktos kalampa, postes uan ininmetstapechuan, cortina tein yas kampa kalakiskej para panoskej kampa yetok kaltsin, mekat tein ika tajtalpiskej,* clavos uan nochi tein mokuiskia itech tekit tein mochiuas itech kaltsin; 41 tasal tein kualtsin tajkitil tein kikuiskej akin ompa tekitiskej, tasal tein kikuis Aarón kemej tiopixkat uan tasal tein kikuiskej ikoneuan para tekitiskej kemej tiopixkamej.

42 Israelitas kichiujkej nochi tekit tein monekia, ijkon kemej Jehová kinauatijka Moisés. 43 Keman Moisés kiyekitak tekit tein kichiujkaj, kiitak ke kichiujkaj ijkon kemej Jehová tanauatijka. Uan Moisés kintiochiuak.

40 Uan Jehová kiluij Moisés: 2 “Itech tonal keman peua metsti abib* moneki tiketsas kaltsin kampa nechueyichiuaskej. 3 Ompa moneki tikalakis tatiochiualkaxon* uan tiktalis taikan den cortina para maj amo moita. 4 No moneki tikalakis mesa uan tiktajtalis tein yas tapani, tikalakis tauilketsaloni uan tikinxotaltis candilmej. 5 Uan taixpan den tatiochiualkaxon tiktalis altar tachijchiuj ika oro kampa tapopochuiskej, uan tiktalis cortina ikalakyan kaltsin.

6 ”Moneki tiktalis altar kampa kichichinoskej tein nechmaktiliskej taixpan de ikalakyan kaltsin. 7 Uan moneki tiktalis paila tatajko den kaltsin uan altar, uan tikpexontis* ika at. 8 No moneki titatsakuas kalampa den kaltsin ika cortinas, uan tiktalis cortina tein yas kampa kalakiskej para panoskej kampa yetok kaltsin. 9 Moneki tikuis aceite tein ika kixelouaj tein noaxka uan tikpijpisuilis in kaltsin uan nochi tein ompa yetok. Uan moneki tikxelos in kaltsin uan nochi tein ompa mokuis uan yeski noaxkaya. 10 No moneki tiktalilis aceite in altar kampa kichichinoskej tein nechmaktiliskej uan nochi tein ompa mokuis. Uan moneki tinechxelouilis in altar uan yeski noaxkaya. 11 Uan no, moneki tiktalilis aceite in paila uan kampa ijkatos uan tinechxelouilis.

12 ”Moneki tikiluis Aarón uan ikoneuan maj motokikan ikalakyan kaltsin uan moneki tikinpajpakas. 13 Moneki tiktalilis Aarón tasal* tein kikuis kemej tiopixkat, tikuatekilis aceite uan tikxelos para maj nechtekitili kemej tiopixkat. 14 Satepan, moneki tikiniluis ikoneuan maj motokikan uan no moneki tikintalilis tasal tein maueueyak. 15 Tikinixtalis kemej tiopixkamej ika aceite ijkon kemej tikixtalij Aarón. Nejon kinextis ke desde axkan yejuan uan ininkoneuan akin yoltiaskej yeskij tiopixkamej”.

16 Moisés kichiuak nochi tein Jehová kinauatijka. Kichiuak ijkon kemej kijtojka.

17 Kiketskej kaltsin itech tonal keman peuak metsti abib,* keman ajsitoyaya se xiuit desde ke kiskej Egipto. 18 Keman peuak kiketsaj kaltsin, Moisés kintalij metstapechmej uan ompa kinkejketsak seki taman tein tamatia kemej ventanas. Kintalij kampa monekia yaskej koujmej tein ixtapalyetoskiaj uan kinkejketsak kalikximej. 19 Kiixpatauak tasal uan kipantalilij kaltsin uan sentapani kitalij tein ika pantsaktoskia, ijkon kemej Jehová kinauatijka.

20 Satepan kikuik lajas kampa Dios tajkuiloj uan kintalij taijtik den tatiochiualkaxon. Kinkajkalakij koujmej tein ika kiuikaskiaj tatiochiualkaxon uan kitalilij ipantsak. 21 No kikalakij tatiochiualkaxon itech kaltsin uan kitalij cortina tein taxelouaya kalijtik. Ijkon in tatiochiualkaxon amo moitaya, ijkon kemej Jehová kinauatijka.

22 Uan iyekmakopa, oksekopa den cortina, kitalito mesa 23 uan ompa kinnepanoj pantsitsin iixpan Jehová, ijkon kemej Jehová kinauatijka.

24 Kikalakij tauilketsaloni itech kaltsin uan kitalij taixpan den mesa. Keman kalakia, tauilketsaloni mokauaya iopochmakopa. 25 No kinxotaltij candilmej iixpan Jehová, ijkon kemej Jehová kinauatijka.

26 Satepan kikalakij altar tachijchiuj ika oro uan kitalij taixpan den cortina, 27 para ompa tapopochuiskej ika kopal tein ajuiyak, ijkon kemej Jehová kinauatijka.

28 Uan no kitalij cortina ikalakyan kaltsin.

29 Taixpan de ikalakyan kaltsin kitalij altar kampa kichichinoskej tapialmej uan trigo oso okseki xinach para kimaktiliskej Dios, ijkon kemej Jehová kinauatijka.

30 Uan kitalij paila tatajko den kaltsin uan altar, uan kipexontij* ika at. 31 Moisés, Aarón uan ikoneuan ompa momajtekijkej uan mometspajpakkej. 32 Nochipa keman kalakiaj itech kaltsin oso motokiayaj itech altar para tekitiskej, mopajpakayaj, ijkon kemej Jehová kinauatijka Moisés.

33 Satepan kintalij cortinas tein kiyoualojtoyaj kaltsin uan altar, uan kitalij cortina tein yaya kampa kalakiskiaj.

Uan Moisés matamik tekit. 34 Uan mixti kikemik kaltsin uan iueyi chikaualis Jehová yetoya itech nochi in kaltsin. 35 Moisés amo uelia kalakia porin mixti ompa yetoya, uan iueyi chikaualis Jehová yetoya itech nochi in kaltsin.

36 Keman mixti tein yetoya ajko den kaltsin pankisaya, israelitas motakuijkuiliayaj uan kitojtokatiayaj* mixti. Ijkon kichiujkej keman yajtinemiaj taluakyan. 37 Sayoj ke komo mixti amo pankisaya, ompa mokauayaj uan mochiayaj hasta keman mixti pankisaskia. 38 Nochin israelitas kiitayaj ke mixti tein Jehová kitaliaya yetoya ajko den kaltsin tonayan, uan de youak kiitayaj ke yetoya se tit.*