NÚMEROS

1 Itech tonal keman peua metsti ziv,* se xiuit satepan ke israelitas kiskej de Egipto, Jehová tajtoj iuan Moisés itech kaltsin kampa taueyichiuayaj.* Yetoyaj itech tal kampa tauaktok uan motanotsa Sinaí. Yejua nejin tein kiluij: 2 “Xikinpouakan nochin israelitas. Xikinijkuilojtiakan sejse itech se kali uan sejse ueyi familia. Xikijkuilokan inintokay nochin takamej. 3 Tejua uan Aarón moneki nankinijkuiloskej nochin akin kipiaskej 20 xiujmej oso kipanauiskejya, akin uelisya yeskij soldados.

4 ”Xikuikakan se takat akin taixyekana itech ueyi familia kampa poui. 5 Yejua nejin inintokay takamej akin namechpaleuiskej: de ikoneuan Rubén, Elizur iokichpil Sedeur; 6 de ikoneuan Simeón, namechpaleuis Selumiel iokichpil Zurisadái; 7 de ikoneuan Judá, namechpaleuis Nahsón iokichpil Aminadab; 8 de ikoneuan Isacar, namechpaleuis Netanel iokichpil Zuar; 9 de ikoneuan Zabulón, namechpaleuis Eliab iokichpil Helón; 10 de ikoneuan Efraín, se iokichpil José, namechpaleuis Elisamá iokichpil Amihud, uan de ikoneuan Manasés, okse iokichpil José, namechpaleuis Gamaliel iokichpil Pedahzur; 11 de ikoneuan Benjamín, namechpaleuis Abidán iokichpil Guideoní; 12 de ikoneuan Dan, namechpaleuis Ahiézer iokichpil Amisadái; 13 de ikoneuan Aser, namechpaleuis Paguiel iokichpil Ocrán; 14 de ikoneuan Gad, namechpaleuis Eliasaf iokichpil Deuel; 15 de ikoneuan Neftalí, namechpaleuis Ahirá iokichpil Enán. 16 Yejuan nejin takamej akin nankinuikaskej. Yejuan taixyekanaj itech ueyi familia kampa pouij, akin kinixyekanaj mil takamej”.

17 Moisés uan Aarón kinnotskej nejon takamej akin Dios kinixtalijka. 18 Uan itech nejon tonal keman peua metsti ziv,* kinsentilijkej nochin israelitas para kinijkuiloskej takamej akin kipiayaj 20 xiujmej oso kipanauiayajya. Kinijkuilojtiajkej sejse itech se kali uan sejse ueyi familia, 19 ijkon kemej Jehová kinauatijka Moisés. Kinijkuiloj itech tal kampa tauaktok uan motanotsa Sinaí.

20 Kijkuilojkej inintokay ikoneuan Rubén, iokichpil Israel akin tayekanaya. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 21 Kinijkuilojkej 46,500 akin katkaj ikoneuan Rubén.

22 Kijkuilojkej inintokay ikoneuan Simeón. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 23 Kinijkuilojkej 59,300 akin katkaj ikoneuan Simeón.

24 Kijkuilojkej inintokay ikoneuan Gad. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 25 Kinijkuilojkej 45,650 akin katkaj ikoneuan Gad.

26 Kijkuilojkej inintokay ikoneuan Judá. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 27 Kinijkuilojkej 74,600 akin katkaj ikoneuan Judá.

28 Kijkuilojkej inintokay ikoneuan Isacar. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 29 Kinijkuilojkej 54,400 akin katkaj ikoneuan Isacar.

30 Kijkuilojkej inintokay ikoneuan Zabulón. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 31 Kinijkuilojkej 57,400 akin katkaj ikoneuan Zabulón.

32 Kijkuilojkej inintokay ikoneuan Efraín, iokichpil José. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 33 Kinijkuilojkej 40,500 akin katkaj ikoneuan Efraín.

34 Kijkuilojkej inintokay ikoneuan Manasés. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 35 Kinijkuilojkej 32,200 akin katkaj ikoneuan Manasés.

36 Kijkuilojkej inintokay ikoneuan Benjamín. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 37 Kinijkuilojkej 35,400 akin katkaj ikoneuan Benjamín.

38 Kijkuilojkej inintokay ikoneuan Dan. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 39 Kinijkuilojkej 62,700 akin katkaj ikoneuan Dan.

40 Kijkuilojkej inintokay ikoneuan Aser. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 41 Kinijkuilojkej 41,500 akin katkaj ikoneuan Aser.

42 Kijkuilojkej inintokay ikoneuan Neftalí. Kinijkuilojtiajkej sejse itech se kali uan sejse ueyi familia. Kinpoujkej nochin takamej akin kipiayaj 20 xiujmej oso kipanauiayajya, akin ueliskiaya yeskij soldados. 43 Kinijkuilojkej 53,400 akin katkaj ikoneuan Neftalí.

44 Nochin nejin kinijkuilojkej Moisés, Aarón uan 12 taixyekananij. Nejin 12 takamej taixyekanayaj itech ueyi familia kampa pouiaj. 45 Kinijkuilojkej nochin israelitas akin kipiayaj 20 xiujmej oso kipanauiayajya, akin ueliskiaya yeskij soldados. Kinijkuilojtiajkej nochin itech sejse ueyi familia. 46 Nochin akin kinijkuilojkej katkaj seiscientos tres mil quinientos cincuenta.

47 Sayoj ke ikoneuan Leví, akin kinixmatij kemej levitas, amo iniuan kinijkuilojkej. 48 Jehová kiluij Moisés: 49 “Sayoj ikoneuan Leví amo xikinijkuilo; amo xikinpoua iniuan okseki israelitas. 50 Moneki tikinixtalis levitas para maj kiyekpiakan kaltsin kampa yetok tatiochiualkaxon,* nochi tein kipia uan nochi tein ompa mokui. Yejuan kiuikaskej kaltsin uan nochi tein ompa mokui, tekitiskej ompa uan mokaltaliskej tajtanakastan. 51 Keman monekis kiuikaskej okseko in kaltsin, levitas moneki kiuejueloskej. Uan keman monekis oksepa kiketsaskej, no yejuan moneki kichiuaskej. Amo akin yeski* uelis motokis, porin mikis.

52 ”Sejse israelita moneki kiketsas ikaltsin* kampa kiixtalijkej, ijkon kemej xejxeliujtokej ejeyi uejueyi kalyetonij. 53 Uan levitas moneki kinkejketsaskej ininkaltsitsin tajtanakastan den kaltsin kampa yetok tatiochiualkaxon, para maj amo nikualani iniuan israelitas. Levitas kiyekpiaskej* in kaltsin”.

54 Israelitas kichiujkej nochi tein Jehová kinauatijka Moisés. Kichiujkej ijkon kemej yejua kijtojka.

2 Uan Jehová kiniluij Moisés uan Aarón: 2 “Israelitas moneki kinkejketsaskej ininkaltsitsin* kampa moixtalij, ijkon kemej xejxeliujtokej ejeyi uejueyi kalyetonij. Sejse moneki motalitiuj kampa yetok tein kinextia kani moneki yaskej ichankauan iuejkaujtat. Moneki kinkejketsaskej ininkaltsitsin tajtanakastan den kaltsin kampa taueyichiuaj,* maj ompaka ixkeptokan.

3 ”Kampa ika ualkisa tonaltsin, motajtaliskej eyi uejueyi kalyetonij uan ompa yetoskej ikoneuan Judá. Xejxeliujtoskej kemej moixtalij. Akin kinixyekanas ikoneuan Judá yeski Nahsón iokichpil Aminadab. 4 Iniuan ijkuiliujtokej 74,600 soldados. 5 Ininnakastan yaskej ikoneuan Isacar; kinixyekanas Netanel iokichpil Zuar. 6 Iniuan ijkuiliujtokej 54,400 soldados. 7 Oksekopa yaskej ikoneuan Zabulón; kinixyekanas Eliab iokichpil Helón. 8 Iniuan ijkuiliujtokej 57,400 soldados.

9 ”Ijkuiliujtokej ciento ochenta y seis mil cuatrocientos soldados akin yetokej iniuan ikoneuan Judá. Yejuan moneki tayekanteuaskej keman israelitas okseko yaskej.

10 ”Sekopa* motajtaliskej eyi uejueyi kalyetonij uan ompa yetoskej ikoneuan Rubén. Xejxeliujtoskej kemej moixtalij. Akin kinixyekanas ikoneuan Rubén yeski Elizur iokichpil Sedeur. 11 Iniuan ijkuiliujtokej 46,500 soldados. 12 Ininnakastan yaskej ikoneuan Simeón; kinixyekanas Selumiel iokichpil Zurisadái. 13 Iniuan ijkuiliujtokej 59,300 soldados. 14 Oksekopa yaskej ikoneuan Gad; kinixyekanas Eliasaf iokichpil Reuel. 15 Iniuan ijkuiliujtokej 45,650 soldados.

16 ”Ijkuiliujtokej ciento cincuenta y un mil cuatrocientos cincuenta soldados akin yetokej iniuan ikoneuan Rubén. Yejuan moneki kintojtokaskej* ikoneuan Judá keman israelitas okseko yaskej.

17 ”Keman monekis kiuikaskej okseko in kaltsin kampa taueyichiuaj, akin kinixmatij kemej levitas moneki yaskej tatajko de nochin.

”Moneki yaskej ijkon kemej kintajtaliaj ininkaltsitsin, ijkon kemej xejxeliujtokej ejeyi uejueyi kalyetonij.

18 ”Kampa ika pankalaki tonaltsin, motajtaliskej eyi uejueyi kalyetonij uan ompa yetoskej ikoneuan Efraín. Xejxeliujtoskej kemej moixtalij. Akin kinixyekanas ikoneuan Efraín yeski Elisamá iokichpil Amihud. 19 Iniuan ijkuiliujtokej 40,500 soldados. 20 Ininnakastan yaskej ikoneuan Manasés; kinixyekanas Gamaliel iokichpil Pedahzur. 21 Iniuan ijkuiliujtokej 32,200 soldados. 22 Oksekopa yaskej ikoneuan Benjamín; kinixyekanas Abidán iokichpil Guideoní. 23 Iniuan ijkuiliujtokej 35,400 soldados.

24 ”Ijkuiliujtokej ciento ocho mil cien soldados akin yetokej iniuan ikoneuan Efraín. Yejuan moneki kintojtokaskej* ikoneuan Rubén keman israelitas okseko yaskej.

25 ”Oksekopa* motajtaliskej eyi uejueyi kalyetonij uan ompa yetoskej ikoneuan Dan. Xejxeliujtoskej kemej moixtalij. Akin kinixyekanas ikoneuan Dan yeski Ahiézer iokichpil Amisadái. 26 Iniuan ijkuiliujtokej 62,700 soldados. 27 Ininnakastan yaskej ikoneuan Aser; kinixyekanas Paguiel iokichpil Ocrán. 28 Iniuan ijkuiliujtokej 41,500 soldados. 29 Oksekopa yaskej ikoneuan Neftalí; kinixyekanas Ahirá iokichpil Enán. 30 Iniuan ijkuiliujtokej 53,400 soldados.

31 ”Ijkuiliujtokej ciento cincuenta y siete mil seiscientos takamej akin yetokej iniuan ikoneuan Dan. Yejuan yaskej hasta taikan keman israelitas okseko yaskej, ijkon kemej xejxeliujtokej ejeyi uejueyi kalyetonij”.

32 Yejuan nejin takamej israelitas akin kinijkuilojkej itech sejse ueyi familia. Katkaj seiscientos tres mil quinientos cincuenta soldados. 33 Sayoj ke levitas amo kinijkuilojkej iniuan okseki israelitas, ijkon kemej Jehová kinauatijka Moisés. 34 Israelitas kichiujkej nochi tein Jehová kinauatijka Moisés. Kintajtaliayaj ininkaltsitsin uan motaololouiliayaj ijkon kemej xejxeliujtoyaj ejeyi uejueyi kalyetonij, sejse kali uan sejse ueyi familia.

3 Yejuan nejin katkaj ichankauan Aarón uan Moisés keman Jehová tajtoj iuan Moisés itech tepet Sinaí. 2 Yejua nejin inintokay ikoneuan Aarón: Nadab akin tayekanaya, Abihú, Eleazar uan Itamar. 3 Yejuan nejin katkaj ikoneuan Aarón, akin kinixtalijkaj para tekitiskej kemej tiopixkamej. 4 Sayoj ke, Nadab uan Abihú mikkej iixpan Jehová itech tal kampa tauaktok uan motanotsa Sinaí. Mikkej porin amo tapopochuijkej iixpan Jehová kemej yejua tanauatijka. Yejuan amo kinpiayaj okichpipil. Uan Eleazar uan Itamar kisentokakej tekitikej kemej tiopixkamej iuan inintat, Aarón.

5 Uan Jehová kiluij Moisés: 6 “Xikinilui nochin ikoneuan Leví, akin kinixmatij kemej levitas, maj motokikan uan maj yetokan iixpan tiopixkat Aarón, uan yejuan kipaleuiskej. 7 Moneki kichiuaskej tataman tekit itech kaltsin kampa nechueyichiuaj.* Ijkon kichiuaskej para kipaleuiskej Aarón uan kinpaleuiskej israelitas. 8 Moneki kiitaskej nochi tein yetok itech kaltsin uan kichiuaskej tataman tekit tein ompa ixyetok maj mochiua. Ijkon kinpaleuiskej israelitas. 9 Xikinxelo levitas para Aarón uan ikoneuan. Yejuan kinxelojkej uan kintemaktijkej para kipaleuiskej Aarón. 10 Moneki tikinixtalis Aarón uan ikoneuan para maj tekitikan kemej tiopixkamej. Amo akin yeski* uelis motokis, porin mikis”.

11 Jehová no kiluij Moisés: 12 “Nimoinxelouilia levitas. Ijkon israelitas amo monekis nechinmakaskej ininkoneuan akin tayekanaj. Nochin levitas yeskij noaxkauan. 13 Porin nochin okichpipil akin tayekanaj noaxkauan. Keman nikinmiktij nochin konemej akin tayekanayaj de Egipto, nimoinxelouilij nochin ininkoneuan israelitas akin tayekanaj uan inintapialuan tein achto yolij. Yeskij noaxkauan. Nejua niJehová”.

14 Jehová oksepa iuan tajtoj Moisés itech tal kampa tauaktok uan motanotsa Sinaí uan kiluij: 15 “Xikinijkuilo ikoneuan Leví, itech sejse ueyi familia uan itech sejse kali. Moneki tikinijkuilos nochin takamej uan okichpipil akin kipiaskej se metsti oso kipanauiskejya”. 16 Uan Moisés kinijkuiloj ijkon kemej Jehová kinauatijka. 17 Yejua nejin inintokay ikoneuan Leví: Guersón, Cohat uan Merarí.

18 Uan yejua nejin katka inintokay ikoneuan Guersón uan ininfamilias: Libní uan Simeí.

19 Ikoneuan Cohat uan ininfamilias katkaj Amram, Izhar, Hebrón uan Uziel.

20 Ikoneuan Merarí uan ininfamilias katkaj Mahlí uan Musí.

Yejuan nejin uejueyi familias tein kiskej de ikoneuan Leví.

21 Guersón katka ininuejkaujtat akin kinixmatiaj kemej libnitas uan simeítas. Yejuan nejin akin kinixmatiaj kemej guersonitas. 22 Okichpipil uan takamej akin kinijkuilojkej uan kipiayaj se metsti oso kipanauiayajya, katkaj 7,500. 23 Guersonitas kintajtalijkej ininkaltsitsin* taikankopa den kaltsin kampa taueyichiuayaj, kampa ika pankalaki tonaltsin. 24 Akin kinixyekanaya guersonitas katka Eliasaf, iokichpil Lael. 25 Ikoneuan Guersón monekia kiyekpiaskej kaltsin kampa taueyichiuayaj, tein ika pantsaktoya, cortina tein kipiaya ikalakyan kaltsin, 26 cortinas tein ika tatsaktoya kampa yetoya kaltsin uan altar, cortina tein yetoya kampa kalakiaj, mekat uan nochi tein ompa mokuia.

27 Cohat katka ininuejkaujtat akin kinixmatiaj kemej amramitas, izharitas, hebronitas uan uzielitas. Yejuan nejin akin kinixmatiaj kemej cohatitas. 28 Takamej uan okichpipil akin kipiayaj se metsti oso kipanauiayajya, katkaj 8,600. Yejuan monekia tachiaskej kampa Dios taxeloj. 29 Cohatitas kintajtaliayaj ininkaltsitsin sekopa* den kaltsin kampa taueyichiuayaj. 30 Akin kinixyekanaya cohatitas katka Elizafán, iokichpil Uziel. 31 Yejuan monekia kiyekpiaskej tatiochiualkaxon,* mesa, tauilketsaloni, ome altares, nochi tein mokuia para tekitiskej kampa Dios taxeloj, cortina tein taxelouaya kalijtik uan nochi tein ompa mokuia.

32 Akin kinsenixyekanaya levitas katka Eleazar iokichpil tiopixkat Aarón. Yejua kiitaya nochi tein kichiuayaj akin tekitiaj itech kaltsin.

33 Merarí katka ininuejkaujtat akin kinixmatiaj kemej mahlitas uan musitas. Yejuan nejin akin kiskej de ikoneuan Merarí. 34 Okichpipil uan takamej akin kinijkuilojkej uan kipiayaj se metsti oso kipanauiayajya, katkaj 6,200. 35 Akin kinixyekanaya ichankauan Merarí katka Zuriel, iokichpil Abihail. Yejuan kintajtaliayaj ininkaltsitsin oksekopa* den kaltsin kampa taueyichiuayaj. 36 Ikoneuan Merarí monekia kiyekpiaskej ventanas tein ueueyak, koujmej tein kinixtapaltaliayaj, kalikximej, metstapechmej, nochi tein mokuia para kaltsin uan monekia kiitaskej nochi tekit tein monekia mochiuas. 37 No monekia kiyekpiaskej postes tein yetoyaj kalampa uan ininmetstapechuan, clavos uan mekat.

38 Taixpankopa den kaltsin kampa taueyichiuayaj, kampa ika ualkisa tonaltsin, kintalijkaj ininkaltsitsin Moisés uan Aarón uan ikoneuan. Yejuan monekia kiyekpiaskej tein onkaya kampa Dios taxeloj. Ijkon kinpaleuiayaj israelitas. Amo akin yeski* uelis motokis, porin mikis.

39 Nochin okichpipil uan takamej levitas akin kipiayaj se metsti oso kipanauiayajya, katkaj 22 mil. Moisés uan Aarón kinijkuilojtiajkej itech sejse familia porin Jehová kinnauatij.

40 Uan Jehová kiluij Moisés: “Xikinijkuilo nochin ininokichpipiluan israelitas akin tayekanaj, akin kipiaskej se metsti oso kipanauiskejya. Xikinpoua uan xikijkuilo inintokay. 41 Moneki tinechinxelouilis levitas. Ijkon israelitas amo monekis nechinmakaskej ininkoneuan akin tayekanaj. Nejua niJehová. No xinechinxelouili inintapialuan levitas. Ijkon israelitas amo monekis nechinmakaskej inintapialuan tein achto yolij”. 42 Uan Moisés kinijkuiloj nochin ininkoneuan israelitas akin tayekanaj, ijkon kemej Jehová kinauatijka. 43 Nochin okichpipil uan takamej akin kinijkuilojkej uan kipiayaj se metsti oso kipanauiayajya, katkaj 22,273.

44 Jehová no kiluij Moisés: 45 “Xinechinxelouili levitas. Ijkon israelitas amo monekis nechinmakaskej ininkoneuan akin tayekanaj. No xinechinxelouili inintapialuan levitas. Ijkon israelitas amo monekis nechinmakaskej inintapialuan. Levitas moneki yeskij noaxkauan. Nejua niJehová. 46 Ininkoneuan israelitas akin tayekanaj okachi miakej ke levitas. Kemej panokej 273, moneki taxtauaskej para kinmakixtiskej. 47 Por sejse takat moneki tikuis 57 gramos* de plata. Xikui pesa tein kikuij kampa nitaxeloj para tiktamachiuas plata. Nejon pesa kipia 12 gramos.* 48 Nejon tomin moneki tikinmakas Aarón uan ikoneuan para maj makisakan nejon 273 israelitas”. 49 Uan Moisés kikuik tomin tein kimakakej por nejon 273 israelitas. 50 Yejua nejin tomin tein kimakakej por ininkoneuan israelitas akin tayekanayaj: 15 kilos uan tajko* de plata. Kikuikej pesa tein kikuij kampa Dios taxeloj para kitamachiuaskej plata. 51 Uan Moisés kinmakak nejon tomin Aarón uan ikoneuan, kemej Jehová kiluijka. Moisés kichiuak ijkon kemej Jehová kinauatijka.

4 Uan Jehová kiniluij Moisés uan Aarón: 2 “Xikinpouakan ikoneuan Cohat, akin ininuejkaujtat Leví. Xikinijkuilokan itech sejse kali uan sejse ueyi familia, 3 nochin akin kipiaj 30 hasta 50 xiujmej uan ixyetok maj tekitikan itech kaltsin kampa nantaueyichiuaj.*

4 ”Yejua nejin tein kichiuaskej ikoneuan Cohat itech kaltsin. Sayoj yejuan moneki kichiuaskej. 5 Keman israelitas okseko yaskej, Aarón uan ikoneuan kalakiskej, kitemouiskej cortina tein taxeloua kalijtik uan kipantaliliskej tatiochiualkaxon.* 6 Satepan kipantsakuaskej ika ipankuetaxyo foca, kipantaliliskej se tasal azul, uan kitaliliskej koujmej para kiuikaskej.

7 ”Mesa kampa kitaliaj pantsin tein kimaktiliaj Dios, no kipantaliliskej se tasal azul. Uan ompa kitaliskej platos, copas, uejueyi kaxit uan seki komit para vino tein kitemaktiaj. Pantsin tein kimaktiliaj Dios moneki nochipa yetos itech mesa. 8 Uan kipantaliliskej nochi nejin se tasal chichiltik. No kipantsakuaskej ika ipankuetaxyo foca uan kitaliliskej koujmej para kiuikaskej in mesa. 9 Satepan, kikuiskej se tasal azul uan kipantaliliskej in tauilketsaloni, candilmej, pinzas, tapalkatsitsin para mechas tein tataskejya uan nochi tapalkamej para in aceite tein kitekiliaj candilmej. 10 Kipikiskej tauilketsaloni uan nochi tein mokui para in tauilketsaloni ika ipankuetaxyo foca. Satepan kitaliskej itech se tabla para kiuikaskej. 11 Uan altar tachijchiuj ika oro kipantaliliskej se tasal azul. No kipantsakuaskej ika ipankuetaxyo foca uan kitaliliskej koujmej para kiuikaskej. 12 Uan nochi tein kikuij para tekitiskej kampa Dios taxeloj, kitaliskej itech se tasal azul, kiixtsakuaskej ika ipankuetaxyo foca uan kitaliskej itech se tabla para ika kiuikaskej.

13 ”Moneki kikixtiskej koujnex* tein mosentilis itech altar, uan kipantaliliskej in altar se moradojtasal. 14 Ompa kitaliskej nochi tein kikuij keman tekitij itech altar: tapalkamej para tekol, teposmej tein tenpijpitstikej para nakat, palas, uejueyi kaxit uan nochi tein ompa mokui. Moneki kipantsakuaskej ika ipankuetaxyo foca uan kitaliliskej koujmej para kiuikaskej.

15 ”Keman israelitas okseko yaskej, Aarón uan ikoneuan moneki kitamipantsakuaskej tein yetok kampa Dios taxeloj uan nochi tein ompa mokui. Satepan, ikoneuan Cohat kalakiskej para kiuikaskejya nochi. Sayoj ke maj amo kimatokakan,* porin mikiskej. Yejua nejin tein moneki kichiuaskej ikoneuan Cohat itech kaltsin kampa nantaueyichiuaj.

16 ”Eleazar, iokichpil tiopixkat Aarón, moneki kiitas maj nochipa onka aceite para maj taxotato, maj no onka kopal tein ajuiyak, harina tein kitemaktiaj mojmostaj uan aceite para kixeloskej tein noaxka. Yejua moneki kiyekpias nochi kaltsin uan tein ompa yetok, uan no moneki tachias kampa taxeliujtok uan tein ompa mokui”.

17 Jehová no kiniluij Moisés uan Aarón nejin: 18 “Amo xikauakan maj ixpoliuikan ikoneuan Cohat, akin ininuejkaujtat Leví. 19 Yejua ika, xikchiuakan nejin para maj amo mikikan keman motokiskej kampa yetok tein noaxka. Aarón uan ikoneuan kalakiskej uan kiniluiskej toni kichiuaskej uan toni kiuikaskej. 20 Keman yejuan kalakiskej, nion tepitsin moneki kiitaskej tein noaxka, porin komo kiitaj, mikiskej”.

21 Uan Jehová kiluij Moisés: 22 “Moneki kinpouaskej ikoneuan Guersón itech sejse ueyi familia uan itech sejse kali. 23 Moneki tikinijkuilos nochin akin kipiaj 30 hasta 50 xiujmej uan ixyetok maj tekitikan itech kaltsin kampa nantaueyichiuaj. 24 Yejua nejin tein moneki kiyekpiaskej uan kiuikaskej akin kinixmatij kemej guersonitas: 25 kiuikaskej tasal tein kipantaliliaj kaltsin, okse tasal tein no kipantaliliaj, ipankuetaxyo foca tein ika kitamipantsakuaj uan tein youi tatampa. No kiuikaskej cortina tein youi ikalakyan kaltsin, 26 cortinas tein ika tatsaktok kampa yetok kaltsin uan altar, cortina tein yetok kampa kalakij, mekat, nochi tein ompa mokui uan no moneki kiitaskej nochi tekit tein moneki mochiuas. Yejua nejin tekit tein kipiaj. 27 Aarón uan ikoneuan moneki kiitaskej nochi tekit tein kichiuaj guersonitas uan tein moneki kiuikaskej. Namejuan nankiniluiskej nochi tein moneki kiuikaskej; yejua nejon tekit tein kipiaskej. 28 Yejua nejin tekit tein moneki kichiuaskej guersonitas itech kaltsin kampa nantaueyichiuaj. Itamar, iokichpil tiopixkat Aarón kiitas nochi tekit tein yejuan kichiuaskej.

29 ”Tikinijkuilos ikoneuan Merarí itech sejse kali uan sejse ueyi familia. 30 Tikinijkuilos akin kipiaj 30 hasta 50 xiujmej, nochin akin ixyetok maj tekitikan itech kaltsin kampa nantaueyichiuaj. 31 Yejua nejin tekit tein yejuan kipiaj itech kaltsin: moneki kiuikaskej ventanas tein ika chijchiujtok kaltsin, koujmej tein kinixtapaltaliaj, kalikximej uan ininmetstapechuan, 32 postes tein youij kalampa uan ininmetstapechuan, clavos, mekat, nochi tein ompa yetok uan nochi tein ompa mokui. Namejuan nankiluiskej sejse toni moneki kiuikas. 33 Ijkon moneki tekitiskej ichankauan Merarí itech kaltsin kampa nantaueyichiuaj. Kinixyekanas Itamar, iokichpil tiopixkat Aarón”.

34 Moisés, Aarón uan taixyekananij israelitas kinijkuilojkej ichankauan Cohat itech sejse kali uan sejse ueyi familia. 35 Kinijkuilojkej nochin akin kipiayaj 30 hasta 50 xiujmej uan ixyetoya maj tekitikan itech kaltsin kampa taueyichiuayaj. 36 Nochin takamej akin kinijkuilojkej itech sejse kali katkaj 2,750. 37 Yejuan nejin ichankauan Cohat akin kinijkuilojkej, nochin akin tekitiaj itech kaltsin kampa taueyichiuayaj. Moisés uan Aarón kinijkuilojkej ijkon kemej Jehová kinauatijka Moisés.

38 Kinijkuilojkej ikoneuan Guersón itech sejse kali uan sejse ueyi familia. 39 Kinijkuilojkej nochin akin kipiayaj 30 hasta 50 xiujmej uan ixyetoya maj tekitikan itech kaltsin kampa taueyichiuayaj. 40 Nochin takamej akin kinijkuilojkej itech sejse kali uan sejse ueyi familia katkaj 2,630. 41 Yejuan nejin ichankauan Guersón akin kinijkuilojkej, nochin akin tekitiaj itech kaltsin kampa taueyichiuayaj. Moisés uan Aarón tanauatijkej maj kinijkuilokan ijkon kemej Jehová tanauatijka.

42 Kinijkuilojkej ikoneuan Merarí itech sejse kali uan sejse ueyi familia. 43 Kinijkuilojkej nochin akin kipiayaj 30 hasta 50 xiujmej uan ixyetoya maj tekitikan itech kaltsin kampa taueyichiuayaj. 44 Nochin takamej akin kinijkuilojkej itech sejse kali katkaj 3,200. 45 Yejuan nejin ichankauan Merarí. Moisés uan Aarón kinijkuilojkej ijkon kemej Jehová kinauatijka Moisés.

46 Moisés, Aarón uan taixyekananij israelitas kinijkuilojkej nochin akin kinixmatij kemej levitas itech sejse kali uan sejse ueyi familia. 47 Yejuan kipiayaj 30 hasta 50 xiujmej uan nochin kinixtalijkej maj tekitikan itech kaltsin kampa taueyichiuayaj uan maj tamamakan keman israelitas okseko yaskiaj. 48 Nochin takamej akin kinijkuilojkej katkaj 8,580. 49 Kinijkuilojkej ijkon kemej Jehová tanauatijka itechkopa Moisés. Kinijkuilojtiajkej ijkon kemej xejxeliujtoya tekit uan tein monekia kimamaskej. Kinijkuilojkej ijkon kemej Jehová kinauatijka Moisés.

5 Jehová oksepa iuan tajtoj Moisés uan kiluij: 2 “Xikinnauati israelitas maj kititanikan kampa amo kaltaj akin kipias nejin kokolis:* lepra oso akin kistos de inakayo* teisa kemej temal oso at. Uan no akin mopitsotilij por se miket.* 3 Yeski takat oso siuat moneki nankititaniskej kampa amo kaltaj. Moneki ompa yetos para maj amo tapitsotili kampa nanemij, porin nejua nietok namouan”. 4 Uan israelitas ijkon kichiujkej uan kintitankej, ijkon kemej Jehová kinauatijka Moisés.

5 Jehová kiluij Moisés: 6 “Xikinilui israelitas: ‘Komo se takat oso se siuat kichiua se tajtakol, kijtosneki ke amo kitakamattok Jehová uan moneki taxtauas. 7 Moneki kijtos toni tajtakol kichiuak uan kikepas nochi tein monekis uan kitemakas tepitsinok.* Moneki kimakas akin kichiuilij tein amo kuali. 8 Sayoj ke komo akin kichiuilijkej tein amo kuali momikilijya uan amo kipia se ichankauj akin uelis kitaxtauiskej, moneki kimakaskej Jehová uan nejon yeski iaxka tiopixkat. No kiuikilis tiopixkat se ichkaueuet* tein kitemakas para maj Dios kiixpolo itajtakol.

9 ”’Nochi tein israelitas kixelouiliskej Dios uan kiuikiliskej tiopixkat, moneki yeski para tiopixkat. 10 Yejua mokauilis tein sejse israelita kixelouilis Dios. Nochi tein kiuikiliskej tiopixkat, iaxka yeski’”.

11 Jehová no kiluij Moisés: 12 “Xikinilui israelitas: ‘Yejua nejin tein moneki mochiuas komo isiuauj se takat kichiua tein amo kuali uan kikajkayaua. 13 Komo motekak iuan okse takat uan itakauj amo kimati, oksekin amo no kimatij uan amo akin kiitak uan mopitsotilij, yejua nejin tein moneki mochiuas. 14 Komo itakauj chauati uan kinemilia ke isiuauj kikajkayauak iuan okse, yeski melauj oso amo, 15 takat moneki kiuikas isiuauj kampa yetok tiopixkat uan no kiuikas se kilo harina de cebada para kitemaktis por isiuauj. Maj amo kitekili aceite nion maj kitalili istak kopal, porin kitemaktia nejon harina porin chauati. Tein kitemaktis kinextis ox siuat yekmelauj kichiuak tein amo kuali.

16 ”’Tiopixkat kiluis siuat maj motoki uan maj moketsa iixpan Jehová. 17 Tiopixkat kitekas chipauakat itech se sokikomit. Kikuis talpan tepitsin tal tein onkak kampa yetok kaltsin kampa nantaueyichiuaj,* uan kipantemilis at. 18 Tiopixkat kiluis siuat maj moketsa iixpan Jehová uan kitojtomilis itson. No kitalis itech imauan harina tein takat kitemaktia porin chauati uan tein kinextia ox siuat kichiuak tein amo kuali. Uan tiopixkat kipias imako sokikomit tein kipia chichikat tein kichiua maj tepano tein amo kuali.

19 ”’Tiopixkat kiluis siuat maj kiyekijto tein melauj uan kiluis: “Komo desde ke timonamiktij amo timotekani iuan okse takat uan amo timopitsotiliani, amo teyi mitschiuilis nejin chichikat tein kichiua maj tepano tein amo kuali. 20 Sayoj ke, komo timopitsotilij uan timotekak iuan okse takat keman ipa timonamiktijkaya...”.* 21 Uan tiopixkat kiluis siuat maj kiyekijto ke komo motekak iuan okse, maj kipano tein amo kuali. Tiopixkat kiluis siuat nejin: “Maj Jehová kichiua maj oksekin mitsteneuakan keman kijtoskej maj kinpano tein amo kuali akin takajkayaujtokej. Komo melauj timotekak iuan okse, Jehová kichiuas maj mopox ueyia uan maj amo ueli xikinpia konemej. 22 Keman titayis nejin chichikat, mopox ueyias uan amo uelis tikinpias konemej”. Uan siuat moneki kijtos: “¡Maj ijkon mochiua! ¡Maj ijkon mochiua!”.*

23 ”’Uan tiopixkat moneki kiamatalis nejin tein amo kuali tein kijtoj maj pano uan kiixpolos tein kijkuiloj itech chichikat. 24 Kitayiltis siuat chichikat, uan keman tayis kijtikokos. 25 Tiopixkat moneki kikuis harina tein siuat kipias imako, kimauiuikas iixpan Jehová uan kiuikas kampa yetok altar. Nejon harina kitemaktiaj porin takat chauati. 26 Tiopixkat kikuis se tamatsol harina, uan nejon kiixnextis nochi tein kimaktilitij Dios. Kichichinos itech altar para maj popoka uan satepan kitayiltis siuat nejon at. 27 Komo mopitsotilij uan kikajkayauak itakatsin iuan okse, nejon at kijtikokos, ueyias ipox uan amo uelis kinpias konemej. Nejon siuat kiteneuaskej keman kijtoskej maj kipano tein amo kuali akin takajkayaujtos. 28 Sayoj ke komo siuat amo mopitsotiliani uan Dios kiita ke chipauak, amo teyi kipanos uan uelis mokokoxkatalis uan kinpias konemej.

29 ”’Yejua nejin tein moneki mochiuas keman se takat chauatis porin isiuauj kichiuak tein amo kuali uan mopitsotilij keman iuan yetoyaya, 30 oso komo se takat kinemilia ke isiuauj kikajkayauak iuan okse. Nejon takat moneki kiuikas isiuauj iixpan Jehová, uan tiopixkat kichiuas iuan siuat nochi tein kijtoua nejin tanauatil. 31 Takat amo teyi kichiuiliskej, sayoj ke komo siuat teisa kichiuak, yejua kemaj kitatsakuiltiskej’”.

6 Jehová no kiluij Moisés: 2 “Xikinilui israelitas: ‘Komo se takat oso se siuat motenkaua yeski se nazareo* uan xeliujtos sayoj para Jehová, 3 amo uelis tayis vino nion okseki tayil tein teuintij. Amo uelis tayis vino tein kixokoltiaj. Amo no uelis tayis okseki taman tein teuintij tein no kixokoltiaj. Maj amo tayi nion se taman tayil tein kichijchiuaj ika uvas, uan maj amo no kikua uvas tein yekin kitekij nion tein tauatsal. 4 Keman yeski nazareo, amo uelis kikuas nion teyi tein kisa de se uvajkouit, nion uva tein selikok nion ieuayo.

5 ”’Keman yeski nazareo ijkon kemej motenkauak, amo uelis motekilis itson. Moneki kikauas maj moskalti itson para kinextis ke xeliujtok para Jehová hasta maj tami nejon tonalmej. 6 Keman xeliujtos para Jehová maj amo motoki kampa yetos se miket. 7 Maski momikilis itat, inan, se iikniuj, maj amo mopitsotili porin itson kinextia ke xeliujtok para Dios.

8 ”’Keman yeski nazareo, nochi nejon tonalmej xeliujtos para Jehová. 9 Sayoj ke komo aksa* ijsiujkamiki inakastan uan kipitsotilia itson tein kinextia ke xeliujtok para Dios, moneki mokuaximas* itech chikometika tonal. Nejon tonal kijtoskej ke chipauakya. 10 Uan itech chikueyitika tonal moneki kitemakas ome palomas oso ome palomajkonemej. Kiuikilis tiopixkat ikalakyan kaltsin kampa taueyichiuaj.* 11 Se totot kitemakas porin tajtakolej uan okse para maj kichichinouilikan Dios. Kemej mopitsotilij por se miket, tiopixkat kimaktilis Dios nejin para maj kiixpolo itajtakol. Nejon tonal no moneki moxelos para Dios uan kikauas maj oksepa moskalti itson. 12 Moneki oksepa moxelos para Jehová uan yeski nazareo kemej kijtojka. Kiuikas se ichkaueuet* tein ayamo kiajxitia se xiuit porin kichiuak tein amo kuali. Sayoj ke tonalmej tein panokajya amo kipouaskej, porin mopitsotilij keman katka nazareo.

13 ”’Yejua nejin tein moneki kichiuas se nazareo. Keman tamisya tonalmej tein kiixtalis ke yeski nazareo, yas ikalakyan kaltsin kampa taueyichiuaj. 14 Ompa kiuikas tein kimaktilis Jehová: se ichkaueuet tein ayamo kiajxitia se xiuit para kichichinouiliskej, se ichkalamat tein ayamo kiajxitia se xiuit porin tajtakolej uan se ichkaueuet para sentakuaskej iuan Dios.* Nejon tapialmej moneki yeskij kuajkualmej. 15 Ika se chikiuit no moneki kiuikas seki pantsin tein ijtikoyoktik tachijchiuj ika aceite. Ompa no moneki kiuikas seki taxkaltsitsin tein kajkanauak tein kiojxilis aceite. Maj chijchiujto ika harina tein kuali uan maj amo kipia levadura. No moneki kiuikas trigo oso okseki xinach uan vino tein kitemaktis. 16 Tiopixkat kiuikas iixpan Jehová nochi nejin, uan kimaktilis tapial tein nazareo kitemaktia porin tajtakolej uan tein kitemaktia para kichichinouiliskej Dios. 17 Tiopixkat kimaktilis Jehová in ichkaueuet para iuan sentakuaskej. No kimaktilis chikiuit tein kipia pantsin uan taxkaltsitsin, trigo oso okseki xinach uan vino.

18 ”’Nejon nazareo moneki mokuaximas ikalakyan kaltsin kampa taueyichiuaj. Kikuis nejon tsonti tein mokauilijka keman katka nazareo, uan kitamotas kampa chichinaujtos tapial tein kitemaktijkej para sentakuaskej iuan Dios. 19 Uan tiopixkat kikuis iajkol ichkaueuet tein tamolontil,* se pantsin tein ijtikoyoktik tein yetos itech chikiuit uan se taxkaltsin tein kanauak. Kimatalilis nazareo satepan ke kikuaximaskej.* 20 Uan tiopixkat kimauiuikas iixpan Jehová para kimaktilis. Nejon xeliujtok para tiopixkat, ijkon kemej iyolixpan tapial tein kimauiuikaskej uan imets tapial tein israelitas kitemakaskej. Satepan, nazareo uelis tayis vino.

21 ”’Yejua nejin tein moneki kichiuas se nazareo akin motenkaua teisa: komo motenkaua kimakas Jehová okachi ke tein moneki kitemakas se nazareo, maj ijkon kichiua’”.

22 Uan Jehová kiluij Moisés: 23 “Xikinilui Aarón uan ikoneuan: ‘Ijkon moneki nankintajtaniliskej tein kuali israelitas. Xikiniluikan:

24 “Maj Jehová mitstatiochiui uan maj mitsyekpia.

25 Maj Jehová kinexti ke yolpaktok mouan uan maj mitspaleui.*

26 Maj Jehová kinexti ke mitstasojta uan maj mitsyolseui”’.

27 Uan yejuan moneki kikuiskej notokay keman kintajtaniliskej israelitas tein kuali para maj nikintatiochiui”.

7 Itech tonal keman Moisés kiketsak kaltsin kampa taueyichiuaskiaj,* kipijpisuilij* aceite uan kixeloj para Dios. No kipijpisuilij aceite nochi tein ompa yetoskia, altar uan nochi tein ompa mokuiskia. Satepan ke Moisés kichiuak nejin, 2 takamej israelitas akin kinixyekanayaj uejueyi familias kimaktilijkej Dios seki taman. Yejuan tapaleuijkej keman kinpoujkej nochin israelitas. 3 Nejin taixyekananij yajkej taixpan de nejon kaltsin uan kiuikilijkej Jehová nejin: chikuasen carretas tein pantsaktoyaj uan 12 kuakuejmej. Ojome taixyekananij kiuikakej se carreta uan ome kuakuejmej. 4 Jehová kiluij Moisés: 5 “Xikui nochi tein kiualkuiskej, porin mokuis para tekit tein mochiuas itech in kaltsin. Moneki tikinxejxelouilis akin kinixmatij kemej levitas; xikmaka sejse levita tein kikuis para tekitis”.

6 Uan Moisés kikuik carretas uan kuakuejmej tein kiuikakej, uan kinxejxelouilij levitas. 7 Ikoneuan Guersón kinmakak ome carretas uan naui kuakuejmej, tein kikuiskiaj para tekit tein monekia kichiuaskej, 8 uan ikoneuan Merarí kinmakak naui carretas uan chikueyi kuakuejmej, tein kikuiskiaj para tekit tein monekia kichiuaskej. Kinixyekanaya Itamar, iokichpil tiopixkat Aarón. 9 Sayoj ke ikoneuan Cohat amo teyi kinmakak, porin yejuan kikechmamayaj tein mokuia kampa Dios taxeloj.

10 Taixyekananij israelitas kitemaktijkej okseki taman keman kixelojkej in altar para Dios, itech tonal keman Moisés kipijpisuilij aceite. Keman taixyekananij kiuikakej iixpan altar tein kitemaktiskiaj, 11 Jehová kiluij Moisés: “Mostaj, sejse taixyekankej kiuikas tein kitemaktis para kixeloskej altar uan peuas kikuiskejya”.

12 Yekinika tonal, Nahsón kiuikak tein kitemaktiskia. Nahsón katka iokichpil Aminadab uan ichankauj Judá. 13 Para kitemaktis harina, kiuikak se plato tachijchiuj ika plata tein kipiaya se kilo uan tajko,* uan se ueyi kaxit tachijchiuj ika plata tein kipiaya 800 gramos.* Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj* ika harina tein kuali tein maneliujtoya ika aceite. 14 No kiuikak se copa tachijchiuj ika oro tein kipiaya 114 gramos* uan pexontoya ika kopal. 15 Para kichichinouiliskej Dios, kiuikak se kuakouej tein yekin moskaltijtoya, se ichkaueuet* uan se ichkatsin tein ayamo kiajxitiaya se xiuit. 16 No kiuikak se chivojkonet para kitemaktis porin tajtakolej. 17 Uan para sentakuaskej iuan Dios,* kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Nahsón, iokichpil Aminadab.

18 Ojpatika tonal, Netanel iokichpil Zuar, kiuikak tein kitemaktiskia. Yejua kinixyekanaya ikoneuan Isacar. 19 Para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 20 No kiuikak se copa tachijchiuj ika oro tein kipiaya 114 gramos uan pexontoya ika kopal. 21 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 22 No kiuikak se chivojkonet para kitemaktis porin tajtakolej. 23 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Netanel, iokichpil Zuar.

24 Expatika tonal, Eliab iokichpil Helón, akin kinixyekanaya ikoneuan Zabulón, 25 kiuikak tein kitemaktiskia: para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 26 No kiuikak se copa tachijchiuj ika oro tein kipiaya 114 gramos uan pexontoya ika kopal. 27 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 28 No kiuikak se chivojkonet para kitemaktis porin tajtakolej. 29 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Eliab, iokichpil Helón.

30 Naujpatika tonal, Elizur iokichpil Sedeur, akin kinixyekanaya ikoneuan Rubén, 31 kiuikak tein kitemaktiskia: para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 32 No kiuikak se copa tachijchiuj ika oro tein kipiaya 114 gramos uan pexontoya ika kopal. 33 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 34 No kiuikak se chivojkonet para kitemaktis porin tajtakolej. 35 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Elizur, iokichpil Sedeur.

36 Makuiltika tonal, Selumiel iokichpil Zurisadái, akin kinixyekanaya ikoneuan Simeón, 37 kiuikak tein kitemaktiskia: para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 38 No kiuikak se copa tachijchiuj ika oro tein kipiaya 114 gramos uan pexontoya ika kopal. 39 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 40 No kiuikak se chivojkonet para kitemaktis porin tajtakolej. 41 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Selumiel, iokichpil Zurisadái.

42 Chikuasentika tonal, Eliasaf iokichpil Deuel, akin kinixyekanaya ikoneuan Gad, 43 kiuikak tein kitemaktiskia: para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 44 No kiuikak se copa tachijchiuj ika oro tein kipiaya 114 gramos uan pexontoya ika kopal. 45 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 46 No kiuikak se chivojkonet para kitemaktis porin tajtakolej. 47 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Eliasaf, iokichpil Deuel.

48 Chikometika tonal, Elisamá iokichpil Amihud, akin kinixyekanaya ikoneuan Efraín, 49 kiuikak tein kitemaktiskia: para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 50 No kiuikak se copa tachijchiuj ika oro tein kipiaya 114 gramos uan pexontoya ika kopal. 51 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 52 No kiuikak se chivojkonet para kitemaktis porin tajtakolej. 53 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Elisamá, iokichpil Amihud.

54 Chikueyitika tonal, Gamaliel iokichpil Pedahzur, akin kinixyekanaya ikoneuan Manasés, 55 kiuikak tein kitemaktiskia: para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 56 No kiuikak se copa tachijchiuj ika oro tein kipiaya 114 gramos uan pexontoya ika kopal. 57 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 58 No kiuikak se chivojkonet para kitemaktis porin tajtakolej. 59 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Gamaliel, iokichpil Pedahzur.

60 Chiknauitika tonal, Abidán iokichpil Guideoní, akin kinixyekanaya ikoneuan Benjamín, 61 kiuikak tein kitemaktiskia: para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 62 No kiuikak se copa tachijchiuj ika oro tein kipiaya 114 gramos uan pexontoya ika kopal. 63 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 64 No kiuikak se chivojkonet para kitemaktis porin tajtakolej. 65 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Abidán, iokichpil Guideoní.

66 Majtaktika tonal, Ahiézer iokichpil Amisadái, akin kinixyekanaya ikoneuan Dan, 67 kiuikak tein kitemaktiskia: para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 68 No kiuikak se copa tachijchiuj ika oro tein kipiaya 114 gramos uan pexontoya ika kopal. 69 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 70 No kiuikak se chivojkonet para kitemaktis porin tajtakolej. 71 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Ahiézer, iokichpil Amisadái.

72 Tonal 11, Paguiel iokichpil Ocrán, akin kinixyekanaya ikoneuan Aser, 73 kiuikak tein kitemaktiskia: para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 74 No kiuikak se copa tachijchiuj ika oro tein kipiaya 114 gramos uan pexontoya ika kopal. 75 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 76 No kiuikak se chivojkonet para kitemaktis porin tajtakolej. 77 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Paguiel, iokichpil Ocrán.

78 Tonal 12, Ahirá iokichpil Enán, akin kinixyekanaya ikoneuan Neftalí, 79 kiuikak tein kitemaktiskia: para kitemaktis harina, kiuikak se plato tachijchiuj ika plata tein kipiaya se kilo uan tajko, uan se ueyi kaxit tachijchiuj ika plata tein kipiaya 800 gramos. Para kitamachiuaskej plata kikuikej pesa tein kikuiaj kampa Dios taxeloj. Plato uan ueyi kaxit pexontoyaj ika harina tein kuali tein maneliujtoya ika aceite. 80 No kiuikak se copa tachijchiuj ika oro tein kipiaya 114 gramos uan pexontoya ika kopal. 81 Para kichichinouiliskej Dios, kiuikak se kuakouej tein yekin moskaltijtoya, se ichkaueuet uan se ichkatsin tein ayamo kiajxitiaya se xiuit. 82 No kiuikak se chivojkonet para kitemaktis porin tajtakolej. 83 Uan para sentakuaskej iuan Dios, kinuikak ome kuakuejmej, makuil ichkaueuetkej, makuil chivos uan makuil ichkatsitsin tein kipiayaj se xiuit. Yejua nejin tein kitemaktij Ahirá, iokichpil Enán.

84 Yejua nejin tein kitemaktijkej taixyekananij israelitas keman Moisés kipijpisuilij aceite in altar uan kixeloj para Dios: 12 platos tachijchiuj ika plata, 12 uejueyi kaxit tachijchiuj ika plata uan 12 copas tachijchiuj ika oro 85 (sejse plato tachijchiuj ika plata kipiaya se kilo uan tajko, uan sejse ueyi kaxit kipiaya 800 gramos, yejua ika nochi in plata ajsia 27 kilos ika 360 gramos.* Kitamachiujkej plata ika pesa tein kikuiaj kampa Dios taxeloj; 86 sejse copa tachijchiuj ika oro kipiaya 114 gramos uan pexontoya ika kopal. Nochi in oro ajsia se kilo ika 368 gramos.* Kitamachiujkej oro ika pesa tein kikuiaj kampa Dios taxeloj). 87 Nochin tapialmej tein kitemaktijkej para kichichinouiliskej Dios katkaj 12 kuakuejmej, 12 ichkaueuetkej uan 12 ichkatsitsin tein kipiayaj se xiuit. No kitemaktijkej nochi harina tein kiuikakej. Uan kitemaktijkej 12 chivojkonemej porin tajtakolejkej. 88 Uan nochin tapialmej tein kitemaktijkej para sentakuaskej iuan Dios katkaj 24 kuakuejmej, 60 ichkaueuetkej, 60 chivos uan 60 ichkatsitsin tein kipiayaj se xiuit. Yejua nejin tein kitemaktijkej keman kixelojkej in altar para Dios satepan ke kipijpisuilijkej aceite.

89 Nochipa keman Moisés kalakia itech kaltsin kampa taueyichiuayaj para tajtos iuan Dios, kikakia ke ualtajtouaya desde ipantsak tatiochiualkaxon,* kampa yetoyaj ome querubines. Dios tajtouaya iuan.

8 Jehová iuan tajtoj Moisés uan kiluij: 2 “Xikilui Aarón: ‘Keman tikinxotaltis chikome candilmej, moneki tikintalis kemej tauiskej taixpan den tauilketsaloni’”. 3 Uan Aarón ijkon kichiuak: kinxotaltij candilmej para maj tauikan taixpan den tauilketsaloni, ijkon kemej Jehová kinauatijka Moisés. 4 Tauilketsaloni chijchiujtoya ika oro. Kichijchiujtiajkej ika se martillo desde koujtsin tein ijkatoya tatajkoyampa hasta xochimej. Kichijchiujkej ijkon kemej Jehová kinextilijka Moisés.

5 Jehová no kiluij Moisés: 6 “Xikinxelo akin kinixmatij kemej levitas uan xikinchipaua. 7 Ijkon moneki tikinchipauas: xikinpijpisuili at tein kiixpoloua tajtakol, uan yejuan moneki motamiximaskej* ika se navaja, kipakaskej inintasal uan ijkon yeskij chipaujkejya. 8 Yejuan kikuiskej se kuakouej tein yekin moskaltijtok uan harina tein kuali tein maneliujtos ika aceite. Uan tejua tikuis okse kuakouej para tiktemaktis porin tajtakolejkej. 9 Uan moneki tikinuikas levitas taixpan den kaltsin kampa taueyichiuaj* uan tikinsentilis nochin israelitas. 10 Keman tikinuikas levitas iixpan Jehová, israelitas moneki kitaliskej ininmauan inintech levitas. 11 Uan Aarón moneki kiniluis levitas maj mouiuikakan iixpan Jehová kemej kimauiuikaj teisa tein israelitas kimaktiliaj. Uan yejuan kichiuaskej tekit tein Jehová kinmakak.

12 ”Uan levitas kitaliskej ininmauan ininkuako kuakuejmej. Satepan xikmaktili Jehová se kuakouej porin tajtakolejkej uan okse xikchichinouili para maj kiixpolo inintajtakol levitas. 13 Uan tikinuikas levitas kampa yetokej Aarón uan ikoneuan, uan tikiniluis maj mouiuikakan iixpan Jehová kemej kimauiuikaj teisa tein kimaktiliaj. 14 Xikinxelo levitas uan yejuan yeskij noaxkauan. 15 Satepan, levitas kalakiskej para tekitiskej itech kaltsin kampa taueyichiuaj. Ijkon moneki tikinchipauas uan tikintemaktis kemej kimauiuikaj teisa tein kitemaktiaj. 16 Porin nechinxelouilijkej sayoj levitas uan nechinmakakej. Nimoinkuiliti levitas, uan ijkon israelitas amo monekis nechinmakaskej ininkoneuan akin tayekanaj. 17 Porin nochin okichpipil israelitas akin tayekanaj uan tapialueuetkej tein achto yolij, noaxkauan. Nimoinxelouilij itech tonal keman nikinmiktij nochin konemej akin tayekanayaj de Egipto uan nochin tapialmej tein achto yolkaj. 18 Nimoinkuiliti levitas, uan ijkon israelitas amo monekis nechinmakaskej ininkoneuan akin tayekanaj. 19 Uan nejua nikinxelos levitas uan nikintemakas para maj kinpaleuikan Aarón uan ikoneuan. Yejuan tekitiskej itech in kaltsin para kinpaleuiskej israelitas, uan kinpaleuiskej tiopixkamej keman nechtajtaniskej maj nikixpolo inintajtakoluan israelitas. Ijkon israelitas amo motokiskej itech kaltsin uan amo teyi kinpanos”.

20 Moisés, Aarón uan nochin israelitas kinchiuilijkej levitas nochi tein Jehová kinauatijka Moisés. 21 Uan levitas mochipaujkej uan mopakilijkej inintasal. Satepan, Aarón kiniluij levitas maj mouiuikakan iixpan Jehová kemej kimauiuikaj teisa tein kimaktiliaj. Uan Aarón kimaktilij Dios tein tapaleuiskia maj kiixpolo inintajtakoluan uan ijkon chipaujkejya yeskiaj. 22 Satepan levitas kalakkej itech kaltsin kampa taueyichiuayaj para tekitiskej, uan Aarón uan ikoneuan kinixyekanayaj. Kinchiuilijkej levitas nochi tein Jehová kinauatijka Moisés.

23 Jehová oksepa iuan tajtoj Moisés uan kiluij: 24 “Yejua nejin tein moneki mochiuas iniuan levitas: takamej akin kipiaskej 25 xiujmej oso kipanauiskejya, tekitiskej iniuan akin tekitij itech kaltsin kampa taueyichiuaj. 25 Sayoj ke keman kiajxitiskej 50 xiujmej, amo kichiuaskejok tekit tein kipiayaj. 26 Uelis kinpaleuiskej ininikniuan akin tekitiskej itech kaltsin, sayoj ke yejuan amo uelis ompa tekitiskej. Yejua nejin tein moneki tikchiuas iniuan levitas uan tikitas tein moneki kichiuaskej”.

9 Itech metsti abib,* se xiuit satepan ke israelitas kiskej de Egipto, Jehová tajtoj iuan Moisés itech tal kampa tauaktok uan motanotsa Sinaí uan kiluij: 2 “Itech tonal tein moixtalij, israelitas moneki kichijchiuaskej tapialtsin tein kimiktiliskej Dios itech iluit tein monotsa Pascua. 3 Moneki nankichijchiuaskej itech tonal tein moixtalij, itech tonal 14 de nejin metsti, keman tapoyaujtosya. Keman nankichijchiuaskej moneki nankichiujtiaskej nochi tein namechnauatij uan nikixtalij”.

4 Yejua ika Moisés kiniluij israelitas maj kichijchiuakan tapialtsin tein kimiktiliskej Dios itech Pascua. 5 Uan yejuan kichijchiujkej tapialtsin para Pascua itech metsti abib,* tonal 14 keman tapoyaujtoyaya. Yetoyaj itech tal kampa tauaktok uan motanotsa Sinaí. Israelitas kichiujkej nochi tein Jehová kinauatijka Moisés.

6 Sayoj ke seki takamej amo chipaujkej katkaj porin kimatokakaj* se miket, yejua ika amo ueliskia kichijchiuaskej tapialtsin para Pascua nejon tonal. Yejua ika, niman kinitatoj Moisés uan Aarón, 7 uan kiluijkej Moisés: “Amo tichipaujkej porin tikmatokakej se miket. Sayoj ke no tiknekiskiaj tikchijchiuiliskej uan tikmaktiliskej Jehová in tapialtsin iniuan nochin israelitas itech tonal tein ixyetok”. 8 Moisés kiniluij: “Ximochiakan tepitsin uan maj nikmatiti toni kijtoua Jehová ke uelis nankichiuaskej”.

9 Uan Jehová kiluij Moisés: 10 “Xikinilui israelitas: ‘Namejuan uan namokoneuan moneki nankichijchiuiliskej Jehová in tapialtsin para nankiueyitaliskej itech Pascua. Nejin moneki kichiuaskej hasta akin amo chipaujkej porin kimatokakej* se miket oso amo yetokej porin uejka paxalotoj. 11 Yejuan moneki kichijchiuaskej itech metsti ziv,* itech tonal 14 keman tapoyaujtosya. Maj kikuakan ika pantsin tein amo kipia levadura uan kilit tein chichik. 12 Maj amo mokauilikan nion teyi para mostika uan maj amo kipostekilikan nion se iomiyo in tapialtsin. Moneki kichijchiuaskej ijkon kemej kinnauatijkej. 13 Sayoj ke komo aksa* chipauak uan amo kanaj yajtok uan amo kichijchiua tapialtsin para Pascua, moneki kitatsakuiltiskej. Moneki mikis porin amo teyi kichijchiuilij Jehová itech tonal tein moixtalij.

14 ”ʼUan komo namouan nemi se akin amo israelita, yejua no moneki kichijchiuas tapialtsin itech Pascua para kiueyitalis Jehová. Keman kichijchiuas moneki kichiujtias nochi tein nitanauatij uan nikixtalij maj mochiua itech Pascua. Tein namechnauatijkej xikchiuakan namejuan, no yejua tein moneki kichiuaskej akin amo israelitas’”.

15 Itech tonal keman kiketskej kaltsin kampa kiueyichiuaskiaj Dios,* mixti kikemik kaltsin kampa yetoya tatiochiualkaxon.* Sayoj ke keman tayouak, tein moitaya kemej se tit* mokauak kalpani hasta keman tanesik. 16 Mojmostaj ijkon katka: mixti kikemia in kaltsin tonayan, uan de youak moitaya kemej tit. 17 Nochipa keman mixti pankisaya, israelitas nimantsin kisteuayaj, uan kampa motsakuiliaya mixti, ompa mokauayaj. 18 Keman Jehová tanauatiaya, israelitas moajchiuayaj, uan mokauayaj kampa Jehová tanauatiaya. Keman mixti yetoya itech kaltsin, yejuan no ompa mokauayaj. 19 Keman mixti amo mooliniaya miak tonalmej, israelitas kitakamatiaj Jehová uan amo kanaj yayaj. 20 Kemansa mixti mokauaya miak tonalmej itech kaltsin. Israelitas mokauayaj kampa Jehová tanauatiaya uan moajchiuayaj keman Jehová tanauatiaya. 21 Uan kemansa mixti motsakuiliaya sayoj se youal, uan keman pankisaya kualkampa, yejuan kisteuayaj. Keman mixti pankisaya, israelitas kisteuayaj maski katka youak oso tonayan. 22 Keman mixti yetoya itech kaltsin ome tonal, se metsti oso okachi, israelitas ompa mokauayaj uan amo kanaj yayaj. Sayoj ke komo mixti pankisaya, yejuan kisteuayaj. 23 Israelitas mokauayaj kampa Jehová tanauatiaya uan moajchiuayaj keman Jehová tanauatiaya. Kitakamatiaj Jehová uan kichiuayaj ijkon kemej Jehová kinauatiaya Moisés.

10 Uan Jehová kiluij Moisés: 2 “Ika se martillo ximochijchiuilikan ome trompetas de plata; ika xikinnotsa israelitas para maj mosentilikan uan para maj motaajokuilikan. 3 Keman kisenpitsaskej ome trompetas, nochin israelitas moneki mosentiliskej mouan ikalakyan kaltsin kampa nantaueyichiuaj.* 4 Komo sayoj kipitsaj se trompeta, sayoj mouan mosentiliskej akin kinixyekanaj mil takamej.

5 ”Keman mopapatas kemej kipitsaskej trompeta, moneki kisteuaskej akin kiketskej ininchan kampa ika ualkisa tonaltsin. 6 Keman oksepa tapitsaskej uan no mopapatas kemej kipitsaskej trompeta, moneki kisteuaskej akin kiketskej ininchan sekopa.* Ijkon moneki tapitsaskej keman kisteuaskej ejeyi uejueyi kalyetonij.

7 ”Keman nankinnotsaskej para maj mosentilikan, moneki nankipitsaskej trompetas, sayoj ke maj amo kakisti kemej ijkuak moneki nankisteuaskej. 8 Ikoneuan Aarón, akin tekitij kemej tiopixkamej, moneki kipitsaskej trompetas; desde axkan nikixtalia nejin tanauatil tein moneki nankitakamatiskej namejuan uan namokoneuan akin yoltiaskej.

9 ”Keman monekis namoteuiskej iniuan akin namechkuejmoloskej itech altepet kampa nanemiskej, moneki nankipitsaskej trompetas para maj mosentilikan soldados, uan namoDios Jehová namechkakis uan namechmakixtis.

10 ”Uan no, keman nanyolpaktoskej porin naniluititoskej uan keman peuas sejse metsti, moneki nankipitsaskej trompetas. Nantapitsaskej keman nankitemaktiskej tapialmej para nankichichinouiliskej Dios uan para iuan nansentakuaskej;* nejon namechpaleuis maj namechelnamiki. Nejua namoDios Jehová”.

11 Itech metsti ziv,* tonal 20, se xiuit satepan ke israelitas kiskej de Egipto, pankisak mixti tein yetoya itech kaltsin kampa yetoya tatiochiualkaxon.* 12 Yejua ika israelitas peujkej kisaj ijkon kemej ixyetoya maj kisakan. Yejuan yetoyaj itech tal kampa tauaktok uan motanotsa Sinaí, uan mixti motsakuilij itech tal kampa tauaktok uan motanotsa Parán. 13 Itech nejin tonal israelitas peujkej kisaj kemej Jehová kinauatijka Moisés.

14 Achto peuak kisaj eyi uejueyi kalyetonij kampa yetoyaj ikoneuan Judá. Kinixyekanaya Nahsón, iokichpil Aminadab. 15 Netanel iokichpil Zuar taixyekanaya kampa yetoyaj ikoneuan Isacar. 16 Uan Eliab iokichpil Helón taixyekanaya kampa yetoyaj ikoneuan Zabulón.

17 Keman kikojkopinkej kaltsin kampa taueyichiuayaj, kisteujkej ikoneuan Guersón uan ikoneuan Merarí. Yejuan ixyetoya kiuikaskej nochi in kaltsin.

18 Satepan, peuak kisaj eyi uejueyi kalyetonij kampa yetoyaj ikoneuan Rubén. Kinixyekanaya Elizur, iokichpil Sedeur. 19 Selumiel iokichpil Zurisadái taixyekanaya kampa yetoyaj ikoneuan Simeón. 20 Uan Eliasaf iokichpil Deuel taixyekanaya kampa yetoyaj ikoneuan Gad.

21 Satepan kiskej akin kinixmatiaj kemej cohatitas, akin kimamayaj tein mokuia kampa Dios taxeloj. Nochipa keman cohatitas ajsiskiaj, kaltsin monekia ijkatosya.

22 Satepan, peuak kisaj eyi uejueyi kalyetonij kampa yetoyaj ikoneuan Efraín. Kinixyekanaya Elisamá, iokichpil Amihud. 23 Gamaliel iokichpil Pedahzur taixyekanaya kampa yetoyaj ikoneuan Manasés. 24 Uan Abidán iokichpil Guideoní taixyekanaya kampa yetoyaj ikoneuan Benjamín.

25 Satepan, peuak kisaj eyi uejueyi kalyetonij kampa yetoyaj ikoneuan Dan. Yejuan yayaj hasta taikampa. Kinixyekanaya Ahiézer, iokichpil Amisadái. 26 Paguiel iokichpil Ocrán taixyekanaya kampa yetoyaj ikoneuan Aser. 27 Uan Ahirá iokichpil Enán taixyekanaya kampa yetoyaj ikoneuan Neftalí. 28 Ijkon xejxeliujtiayaj uan motojtokatiayaj* israelitas keman kisayaj uan yayaj okseko.

29 Uan Moisés kiluij icuñado, Hobab: “Tiatijya itech tal tein Jehová techiluij ke techmakati. Xiuiki uan kuali tietos touan, porin Jehová motenkauak kinmakas israelitas miak taman tein kuali”. Hobab katka iokichpil Reuel,* akin katka de Madián uan katka imontat Moisés. 30 Uan Hobab kinankilij: “Amo nias. Nimokepati kampa nikayot uan kampa yetokej nochankauan”. 31 Uan Moisés kiluij: “Nimitstataujtia, amo xitechkaua. Tejua tikixmati nejin tal kampa tauaktok uan tikmati kani uelis timokauaskej uan uelis titechiluis katin ojti tikuiskej. 32 Uan komo touan tiouj, nochi tein kuali tein Jehová techmakas, tejuan no timitsmakaskej”.

33 Yejuan kiskej den tepet tein Jehová kijitak uan nejnenkej eyi tonal. Tatiochiualkaxon tein iaxka Jehová kiuikayaj hasta taixpan nejon eyi tonal keman kitemojtinemiaj kani ueliskia moseuiskej. 34 Uan keman kisayaj de kampa mokaujkaj, mixti tein Jehová kitaliaya kinyekantiaya tonayan.

35 Nochipa keman kiuikayaj tatiochiualkaxon, Moisés kijtouaya: “Jehová, xitechyekantiuj uan xikchiua maj eliuis moxexelokan akin mitsixnamikij uan maj cholojteuakan akin mitstauelitaj”. 36 Uan keman motsakuiliayaj, kijtouaya: “Jehová, ximokaua iniuan israelitas. Yejuan tel miakej uan nion ueli se kinpoua”.

11 Uan israelitas peuak kualanij uan kijtouaj iixpan Jehová ke amo kiuelitayaj kemej yetoyaj. Keman Jehová kinkakik, tel kualanik uan Jehová kiualtitanik se tit.* Peuak taxota tatenoj de kampa yetoyaj nochin uan nejon tit kinmiktij sekin. 2 Keman israelitas peuak kitataujtiaj Moisés maj kinpaleui, yejua kitataujtij Jehová uan taseuik. 3 Uan kampa yetoyaj tatokaytijkej Taberá,* porin Jehová kinualtitanilij se tit tein kinchichinoj.

4 Uan miakej akin iniuan yetoyaj uan amo katkaj israelitas peuak kijtouaj ke kinekiaj yektakuaskej. Uan israelitas no peuak oksepa chokaj uan kijtouayaj: “¡Tikuasnekij nakat! 5 ¡Tiktelkuasnekij pescado tein techuantiaj Egipto, uan pepinos, sandías, cebollas uan ajos! 6 Amo titaxikouajok. Mostaj tikuajtokej sayoj maná”.

7 Maná katka kemej iteyo cilantro uan katka istak kemej chokil. 8 Nochin yayaj kiololotij uan kikuechouayaj itech metat oso kimoltayaj. Satepan kimanayaj oso ika kichijchiuayaj taxkaltsitsin, uan tsopek katka kemej se galleta ika aceite. 9 Uan de youak, keman uetsia ajuach kampa nemiaj, maná no xinia.

10 Moisés kikakik ke itech sejse kali chokayaj. Nochin yetoyaj ininkajkaltenoj. Uan Jehová tel kualanik, uan Moisés tel amo no kiuelitaya tein kichiujtoyaj. 11 Yejua ika Moisés kiluij Jehová: “¿Keyej tinechtajyouiltia? ¿Keyej tikualantok nouan? ¿Keyej tinechinsenkauilij? 12 Amo nejua nokoneuan, nejua amo nikinpiak. ¿Keyej tinechiluia maj nikinuika uan maj nikinnapalo kemej se takeual kinapaloua* se pilitsin? ¿Keyej moneki nejua nikinajxitis itech tal tein timotenkauak tikinmakas ininuejkaujtatuan? 13 ¿Kani nikuiti nakat para nikinmakas nochin? Porin kisentokaj nechchokilikij uan nechiluikij ‘¡Tikuasnekij nakat! 14 Noselti amo ueli nikinita, tel ouij. 15 Komo ijkon tinechchiuati, okachi kuali xinechmikti yekintsinya. Komo nimitsyolpaktia, amo xikaua maj okachi nitajyoui”.

16 Jehová kinankilij Moisés: “Xikinsentili 70 taixyekananij israelitas, akin tikmati ke kuali taixyekanaj uan kuali tekitij. Xikinuika itech kaltsin kampa nantaueyichiuaj* uan maj ompa mokauakan mouan. 17 Uan nejua niualpantemos uan nitajtos mouan. Nimitskuilis tepitsin de nochikaualis tein nimitsmakatok uan nikinmakas yejuan, uan yejuan mitspaleuiskej xikinita israelitas para amo moseltiok tikinitas. 18 Uan moneki tikiniluis israelitas: ‘Xikchiuakan tein monekis para mosta nanchipaujkejya nanyeskij, porin xikyekmatikan ke nankikuatij nakat, porin Jehová kikakik keniuj nanchokaj uan nankijtouaj: “¡Tikuasnekij nakat! Okachi kuali tietoyaj Egipto”. Jehová namechmakati nakat uan namejuan nankikuaskej. 19 Amo nankikuaskej nakat sayoj se tonal, nion ome, nion makuil, nion majtakti, nion sempoual, 20 ta se metsti, hasta maj namechyolajsi uan namechtajyalti. Porin nankiixtopeujkej Jehová, akin namouan yetok uan peuak nankichokiliaj uan nankijtouaj: “¿Keyej tikiskej de Egipto?”’”.

21 Uan Moisés kiluij: “Nietok iniuan 600 mil takamej,* ¡uan maski ijkon tikijtoua ‘Nikinmakatoti nakat se metsti’! 22 Komo nikinmiktiskia tel miak tapialmej, ipa amo kinajsiskia. Oso komo nikinkitskiskia nochin pescados, ipa amo no kinajsiskia”.

23 Uan Jehová kiluij Moisés: “¿Timoluia ke Jehová amo uelis kichiuas nejin? Yekintsin tikitas ox mochiua tein nikijtoua”.

24 Moisés kisak uan kiniluij israelitas tein Jehová kiluijka. Uan no kinsentilij 70 taixyekananij, uan kiniluij maj moketsakan tajtanakastan den kaltsin kampa taueyichiuayaj. 25 Uan Jehová ualpantemok itech se mixti uan tajtoj iuan Moisés, kikuilij tepitsin ichikaualis tein kimakatoya uan kinmakak nochin 70 taixyekananij. Uan nimantsin peuak kijtouaj tein Dios kinmatiltijka. Sayoj ke ijkuaksaj panok nejon.

26 Sayoj ke ome takamej akin monotsayaj Eldad uan Medad amo yajkaj kampa yetoya kaltsin kampa taueyichiuayaj. Uan kemej no pouiaj iniuan taixyekananij akin kinijkuilojkaj, Dios no peuak kinmaka ichikaualis. Yejua ika peuak kijtouaj kampa yetoyaj nochin kaltsitsin tein Dios kinmatiltijka. 27 Uan se okichpil motaloj kiluito Moisés: “¡Eldad uan Medad kijtojtokej tein Dios kinmatiltij!”. 28 Uan Josué, iokichpil Nun tanankilij uan kijtoj: “¡Tejuatsin Moisés, xikintakaualti!”. Josué kipaleuiaya Moisés desde ke okichpilok katka. 29 Sayoj ke Moisés kiluij: Amo teyi ximolui, ta nejua ipa niknekiskia maj Jehová kinmaka ichikaualis nochin israelitas uan maj Jehová kinmatilti teisa”. 30 Uan Moisés mokepak kampa yetoyaj kaltsitsin iniuan taixyekananij israelitas.

31 Uan Jehová kichiuak maj uiki se ejekat desde in mar uan kinualkuik tel miak totomej. Nejon ejekat kinkauato kampa yetoyaj ininkaltsitsin israelitas. Patantinemiaj talpantsin kemej se metro,* uan sentakuikej sesekopa, hasta kampa se ajsiskia komo se nejnemiskia kemej se tonal. 32 Yejua ika israelitas amo moseuijkej nochi nejon tonal, nochi youal uan hasta mostika nochin tonal kinkitskijtoyaj nejon totomej. Nochin kisentilijkej tein akiskia itech majtakti uejueyi chikiujmej* oso okachi. Uan peuak kinixtemaj tajtatenoj de kampa nemiaj. 33 Sayoj ke keman kikuajtoyajok nejon nakat, Jehová kualanik iniuan, uan Jehová kichiuak maj tel miakej mijmikikan.

34 Yejua ika ompa tatokaytijkej Quibrot-Hataavá,* porin ompa kintokkej akin kampetsmikiaj. 35 Israelitas kiskej de Quibrot-Hataavá uan yajkej Hazerot uan ompa mokaujkej.

12 Míriam uan Aarón peuak kijijtouaj Moisés porin monamiktijka iuan se siuatsin kayot Cus. 2 Yejuan kijtouayaj: “¿Jehová sayoj tajtoua iuan Moisés? Yejua no tajtouani touan”. Uan Jehová kinkaktoya. 3 Moisés katka tel yolyemanik.* Itech taltikpak amo moajsia okse kemej yejua.

4 Uan sepasan, Jehová kiniluij Moisés, Aarón uan Míriam: “Xiakan naneyin kampa yetok kaltsin kampa nechueyichiuaj”.* Uan yejuan yajkej. 5 Satepan, Jehová ualpantemok itech mixti, motalito ikalakyan kaltsin uan kinnotsak Aarón uan Míriam. Yejuan motokijkej. 6 Uan kiniluij: “Namechtataujtia, xikakikan tein namechiluiti. Komo namouan yetoskia se akin nikmatiltiskia tein nejua Jehová nikijtoua, nikchiuaskia maj kiita niakoni uan niknojnotsaskia keman kochtoskia. 7 ¡Sayoj ke amo ijkon nikchiua iuan notekitikauj Moisés! Nikauak maj yejua kinita nochin nokoneuan israelitas.* 8 Nitajtoua iuan kemej se takat tajtoua iuan okse, nikyeknojnotsa kemej uelis nechajsikamatis. Nejua Jehová, nimonextia iixpan. Yejua ika, ¿keyej namoixeuijkej nankijijtoskej notekitikauj Moisés?”.

9 Uan Jehová kualanik iniuan uan yajki. 10 Mixti moajchiuak den kaltsin. Uan Míriam kikemik pitsotik kokolis* tein monotsa lepra uan tamipochiktiak. Keman Aarón kiitak Míriam, kiitak ke kitamikenka lepra. 11 Nimantsin Aarón kiluij Moisés: “¡Nimitstataujtia tejuatsin! ¡Amo xitechtatsakuilti por nejin tajtakol! Amo tikuatamatij. 12 ¡Nimitstataujtia, amo xikaua maj Míriam mokaua kemej se konetsin tein yoli miket uan tajko palanikya!”. 13 Uan Moisés peuak kitataujtia Jehová: “¡NoDios, nimitstataujtia xikpajti!”.

14 Jehová kinankilij Moisés: “Komo itat kiixchijchaskia, nejon kipinaujtiskia chikome tonal. Maj yetoti uejka den kaltsitsin* chikome tonal uan satepan uelis mokepas”. 15 Yejua ika Míriam yetoto okseko chikome tonal uan nochin israelitas ompa mokaujkej hasta ke Míriam mokepak. 16 Satepan yajkej de Hazerot uan kintajtalijkej ininkaltsitsin itech tal kampa tauaktok uan motanotsa Parán.

13 Uan Jehová tajtoj iuan Moisés uan kiluij: 2 “Xikintitani seki takamej maj ichtakatachiatij Canaán, tal tein nikinmakati israelitas. Sejse takat moneki yeski taixyekankej itech ueyi kalyetonij kampa poui”.

3 Yejua ika Moisés kintitanik desde in tal kampa tauaktok uan motanotsa Parán, ijkon kemej Jehová kinauatijka. Nochin nejin takamej kinixyekanayaj israelitas. 4 Yejua nejin inintokay: Samúa iokichpil Zacur, akin kinixyekanaya ikoneuan Rubén; 5 Safat iokichpil Horí, akin kinixyekanaya ikoneuan Simeón; 6 Caleb iokichpil Jefuné, akin kinixyekanaya ikoneuan Judá; 7 Igal iokichpil José, akin kinixyekanaya ikoneuan Isacar; 8 Hosea iokichpil Nun, akin kinixyekanaya ikoneuan Efraín; 9 Paltí iokichpil Rafú, akin kinixyekanaya ikoneuan Benjamín; 10 Gadiel iokichpil Sodí, akin kinixyekanaya ikoneuan Zabulón; 11 Gaddí iokichpil Susí, akin kinixyekanaya ikoneuan José (oso ikoneuan Manasés). 12 Amiel iokichpil Guemalí, akin kinixyekanaya ikoneuan Dan; 13 Setur iokichpil Miguel, akin kinixyekanaya ikoneuan Aser; 14 Nahbí iokichpil Vofsí, akin kinixyekanaya ikoneuan Neftalí, 15 uan Gueuel iokichpil Makí, akin kinixyekanaya ikoneuan Gad. 16 Yejua nejin inintokay takamej akin Moisés kintitanik maj ichtakatachiatij. Uan Hosea iokichpil Nun, Moisés kitokaytij Josué.*

17 Keman Moisés yaya kintitanitiya maj tachiatij Canaán, kiniluij: “Xipankisakan hasta nanajsiskej kampa moixmati kemej Négueb, uan satepan xipankisakan hasta kampa yetokej tepemej. 18 Xikyekitakan tal, uan xikitakan ox akin ompa nemij chikaujkej oso amo, ox miakej oso amo miakej. 19 Xikitakan ox kualtsin nejon tal oso fiero, uan ox kuali tatsaktok ika tepamit kampa nemij oso senpanian. 20 Xikitatij ox motachiua oso amo mochiua nion teyi uan ox koujtaj oso amo. Amo ximouikan uan xikualkuikan seki taman tein ompa mochiua”. Itech nejon tonalmej chikaujtoyaya uvas.

21 Uan yejuan pankiskej uan tachiatoj desde tal kampa tauaktok uan motanotsa Zin hasta Rehob, amo uejka de Lebó-Hamat.* 22 Keman pankiskej hasta Négueb, ajsitoj Hebrón. Ompa nemiaj Ahimán, Sesái uan Talmái, akin kinixmatiaj kemej anaquim. Ueyi xolal Hebrón kichijchiujkaj chikome xiuit achto ke ueyi xolal Zoan tein yetok Egipto. 23 Keman ajsikej itech atauit* tein monotsa Escol, kitekkej seki uvas ika nochi imakoujyo uan monekik kikechmamaskej ika se kouit ome takamej; no kiuikakej seki granadas uan higos. 24 Kampa yetoyaj tatokaytijkej Escol,* porin israelitas ompa kitekkej uvas.

25 Takamej akin tachiatoj mokepkej satepan ke panokej 40 tonalmej. 26 Uan yajkej kampa yetoyaj Moisés, Aarón uan nochin israelitas ompa Cadés, itech tal kampa tauaktok uan motanotsa Parán. Uan kiniluijkej nochi tein kiitatoj uan kinnextilijkej tein kitekitoj. 27 Yejua nejin tein kitapouijkej Moisés: “Tiajkej kampa titechtitanik, uan tikitakej ke melauj moteltachiua.* Nikan yetok tein ompa mochiua. 28 Sayoj ke akin ompa nemij tel chikaujkej uan itech uejueyi xolalmej tajtatsaktok ika uejueyi tepamit. Ompa no tikinitakej akin kinixmatij kemej anaquim. 29 Amalequitas nemij ompa Négueb; hititas, jebuseos uan amorreos takuitokej kampa yetokej tepemej, uan cananeos nemij martenoj hasta kampa panoua ueyiat Jordán”.

30 Uan Caleb kinekik kintamatilis akin yetoyaj iixpan Moisés. Yejua ika kiniluij: “Maj tipankisakan yekintsin porin tikyekmatij ke tikintaniskej uan tikinkuiliskej nejon tal”. 31 Sayoj ke takamej akin iuan pankiskaj kijtojkej: “Amo uelis tipankisaskej uan tikinteuiskej, porin yejuan okachi chikaujkej ke tejuan”. 32 Uan yejuan kisentokakej kiniluijkej israelitas tein amo kuali tein kiitakej kampa tachiatoj. Kijtouayaj: “Kampa titachiatoj semi tamouilil, uan komo tiouij timikiskej. Uan nochin akin ompa nemij tel uejueykej. 33 Ompa tikinitakej nefilim,* ikoneuan Anac, uejueyi takamej tein ualeujkej den nefilim. Tejuan timoitayaj kemej chapolimej uan yejuan no ijkon techitayaj”.

14 Uan nochin israelitas peuak eliuis tsajtsij, uan chokatoyaj nochi youal. 2 Nochin peuak kinijijtouaj Moisés uan Aarón. Kijtouayaj: “¡Okachi kuali maj timikinij ompa Egipto! ¡Okachi kuali maj timikinij nikan kampa tauaktok! 3 ¿Keyej Jehová techualkuik nikan? ¿Sayoj para maj techmiktikan? Techinkuilijteuaskej tosiuauan uan tokoneuan. ¡Okachi kuali maj timokepakan Egipto!”. 4 Hasta moiluiayaj: “¡Maj tikixtalikan se akin techixyekanas uan maj timokepakan Egipto!”.

5 Yejua ika Moisés uan Aarón motankuaketskej uan moixpilojkej hasta talpan. Yejuan yetoyaj ininixpan nochin israelitas akin ompa mosentilijkaj. 6 Josué iokichpil Nun, uan Caleb iokichpil Jefuné, akin no yajkaj tachiatoj Canaán, kitsayankej inintasal 7 uan kiniluijkej nochin israelitas: “Kampa titachiatoj yekmelauj tel kuali tal. 8 Komo tikyolpaktiaj Jehová, yejua techajxitis ompa uan techmakas nejon tal kampa moteltachiua.* 9 Sayoj ke amo xikixnamikikan Jehová uan amo xikinmouilikan akin ompa nemij, porin tikintantiuetsiskej. Amo akaj kinpaleuiaok, uan Jehová touan yetok. Amo xikinmouilikan”.

10 Maski ijkon, nochin kijtouayaj maj kintetemakan.* Sayoj ke nochin israelitas kiitakej iueyi chikaualis Jehová tein monextij itech kaltsin kampa kiueyichiuayaj.*

11 Uan Jehová kiluij Moisés: “Nochin israelitas kiitanij nochi milagros tein nikchiuani. Maski ijkon, amo nechtakachiuaj* nion nouan takuaujtamatij. ¿Hasta kemanian ijkon kichiujtoskej? 12 Nikchiuati maj kinkui se fiero kokolis uan nikinixpoloti, uan nikchiuas maj de mokoneuan kisa se altepet tein okachi ueyi uan amo kintaniskej”.

13 Sayoj ke Moisés kiluij Jehová: “Ika mochikaualis tikinkixtij israelitas de Egipto. Komo tikinixpoloua, akin nemij Egipto kimatiskej 14 uan kiniluiskej akin nemij Canaán. Yejuan no kikakinij ke tejua Jehová iniuan tietok israelitas uan kemej yeskia mitsitanij. Tejua tiJehová, uan mixti tein tiktalia yetok kampa yejuan yetokej. Tonayan tejua tikinyekana itech mixti uan de youak tikinyekana itech tit.* 15 Komo tikinmiktijtiuetsi, akin kikakinij tein tikchiuani, kijtoskej nejin: 16 ‘Jehová amo uelik kinajxitij israelitas itech tal tein kiyekijtoj kinmakas, yejua ika kinmiktij itech tal kampa tauaktok uan amo teyi onkak’. 17 Yejua ika Jehová, nimitstataujtia xiknexti moueyi chikaualis, ijkon kemej timotenkauak keman tikijtoj: 18 ‘Jehová amo niman kualani* uan nochipa tetasojta. Kitapojpoluia akin kichiua tein amo kuali uan akin amo tatakamati. Sayoj ke kitatsakuiltia akin kinamiki maj kitatsakuiltikan, amo ijkon kikaua. Uan akin kichiua tein amo kuali kikaua maj ikoneuan, iixuiuan uan ininkoneuan iixuiuan tajyouikan por tajtakol tein yejua kichiua’. 19 Kemej nochipa semi titetasojta, nimitstataujtia xikintapojpolui, ijkon kemej ipa tikintapojpoluiani desde ke yetoyaj Egipto”.

20 Uan Jehová kiluij: “Nejua nikintapojpoluia, ijkon kemej tinechtajtanij. 21 Sayoj ke, ijkon kemej nejua Jehová yekmelauj niyoltok, nikyekijtoua ke itech nochi taltikpak moitas noueyi chikaualis. 22 Nochin kiitanij noueyi chikaualis uan milagros tein nikchiuak ompa Egipto uan itech tal kampa tauaktok. Maski ijkon sekin miakpa* nechyejyekouanij uan amo nechtakamatij. 23 Yejua ika amo keman kiitaskej tal tein nimotenkauak nikinmakas ininuejkaujtatuan. Nikijtojya, amo kiitas nejon tal nion se akin amo nechtakachiua. 24 Sayoj ke kemej notekitikauj Caleb amo kichiuak kemej oksekin uan nochipa senkis nechtakamatik, nejua nikajxitis itech tal kampa yajka uan ikoneuan nikinmakas nejon tal. 25 Amalequitas uan cananeos nemij itech tal tamanis,* yejua ika mosta ximokepakan kampa tauaktok uan amo teyi onkak uan xiakan itech ojti tein ajsi hasta mar Rojo”.

26 Uan Jehová kiniluij Moisés uan Aarón: 27 “Israelitas tel amo yolkualmej. ¿Hasta kemanian nechijijtojtoskej? Nikakini tein israelitas nechijtouilijtokej. 28 Xikinilui nejin: ‘¡Ijkon kemej nejua Jehová yekmelauj niyoltok, nikyekijtoua ke nikchiuas maj namechpano nochi tein namechkakilij! 29 Itech nejin tal kampa tauaktok namikiskej, nanochin akin nankipiaj 20 xiujmej oso nankipanauiajya uan namechijkuilojkej. Xikyekmatikan ke namikiskej nanochin akin nanechijijtojkej. 30 Sayoj Caleb iokichpil Jefuné uan Josué iokichpil Nun kalakiskej itech tal tein namechyekiluij ke namechmakas para ompa nanemiskej. Namejuan amo nankalakiskej.

31 ’”Uan namokoneuan, tein nankijtojkej ke namechinkuiliskiaj, yejuan nikinajxitis itech tal tein namejuan amo nankinekkej. Yejuan kualtsin nemiskej ompa. 32 Sayoj ke namejuan namikiskej itech nejin tal kampa tauaktok. 33 Uan namokoneuan monekis kinpiaskej ichkamej kampa tauaktok 40 xiujmej. Kemej namejuan nankichiujkej kemej se siuat akin monamaka, yejuan moneki taxtauaskej hasta xitamimikikan itech tal kampa tauaktok. 34 Namejuan nantachiatoj 40 tonalmej, yejua ika 40 xiujmej nantajyouijtoskej por namotajtakol. Cuarenta tonalmej yeskij cuarenta xiujmej; se xiuit por se tonal. Ijkon nankimatiskej tein panoua keman nechixnamikij.

35 ’”Nejua Jehová, nikijtojya tein nikinchiuiliti nochin nejin akin amo yolkualmej, akin mosentilijkej para nechixnamikiskej: nikan kampa tauaktok mikiskej uan tamiskej. 36 Takamej akin Moisés kintitanik maj kiitatij tal kichiujkej maj nochin kijijtokan Moisés, porin keman mokepkej kijtojkej tein amo kuali tein kiitakej. 37 Nejon takamej akin ijkon kichiujkej, kintatsakuiltiskej uan mikiskej iixpan Jehová. 38 Sayoj ke Josué iokichpil Nun uan Caleb iokichpil Jefuné, akin no tachiatoj itech nejon tal, amo mikiskej’”.

39 Moisés kiniluij nochin israelitas nejin, uan yejuan moteltayokoltijkej. 40 Uan no, kualkan meujkej uan kinekiaj pankisaskej hasta ikuapan tepet. Kijtojkej: “Nikan tietokejya para tipankisaskej kampa Jehová techiluij, porin titajtakojkej”. 41 Sayoj ke Moisés kiniluij: “¿Keyej amo nankitakamatij Jehová? Tein nankinemiliaj amo kuali kisas. 42 Amo xipankisakan, porin Jehová amo namechpaleuis, uan akin namechtauelitaj namechtaniskej. 43 Porin amalequitas uan cananeos namechualchixtokej para namechmiktiskej. Kemej amo nankitakamatkej Jehová, Jehová amo namechpaleuis”.

44 Maski ijkon, yejuan pankiskej hasta ikuapan tepet, sayoj ke tatiochiualkaxon* tein iaxka Jehová uan Moisés ompa mokaujkej, tatajko den kaltsitsin. 45 Uan amalequitas uan cananeos akin nemiaj itech nejon tepet temokej uan kinteuijkej, uan kinmoyaujtiajkej* hasta Hormá.

15 Jehová oksepa iuan tajtoj Moisés uan kiluij: 2 “Xikinilui israelitas: ‘Keman nanajsiskejya itech tal tein namechmakati para ompa xinemikan 3 nankimaktiliskej Jehová se kuakouej, se ichkat* oso se chivo. Uelis yeski para nankichichinouiliskej, nankitemaktiskej porin namotenkaujkej teisa, porin sayoj nankinekij nankitayokoliskej oso keman nankichiuaskej iluimej tein namechnauatij xikchiuakan. Nejin nankichichinouiliskej Jehová uan yejua semi kiajuiyakmatis.* 4 Akin kitemaktis nejon, no moneki kimaktilis Jehová teisa tachijchiuj ika se kilo harina tein kuali tein maneliujtos ika se litro aceite. 5 No moneki tikmaktilis Dios se litro vino iuan tapial tein tikchichinouilis oso iuan sejse ichkatsin. 6 Oso komo tiktemaktia se ichkaueuet, no moneki tiktemaktis teisa tachijchiuj ika ome kilo harina tein kuali tein maneliujtos ika panoua se litro aceite. 7 Uan moneki tiktemaktis panoua se litro vino uan tikchiuas maj popoka para maj Jehová semi kiajuiyakmati.

8 ”’Sayoj ke komo tikmaktiliti Jehová se kuakouej para tikchichinouilis, oso porin timotenkauak teisa oso para iuan nansentakuaskej,* 9 no moneki tiktemaktis teisa tachijchiuj ika eyi kilo uan tajko harina tein kuali tein maneliujtos ika ome litro aceite. 10 Uan no moneki tiktemaktis ome litro vino. Tikchichinouilis Jehová uan yejua semi kiajuiyakmatis. 11 Ijkon moneki tikchiuas keman tiktemaktis se kuakouej, se ichkaueuet, se ichkatsin oso se chivo. 12 Maski nankitemakaskej se tapial oso miakej, iuan sejse tapial moneki nankitemakaskej harina uan vino tein moneki kiuikas. 13 Nochin israelitas ijkon moneki kimaktiliskej Jehová tein kichichinouiliskej uan yejua semi kiajuiyakmatis.

14 ”’Komo se akin amo israelita kichichinouiliti Jehová teisa para maj semi kiajuiyakmati, no moneki kichiuas tein namejuan nankichiuaj. Uelis yeski se akin namouan yetoni seki tonalmej oso se akin uejkaujya namouan nemi. 15 Namejuan nanisraelitas uan akin amo israelitas nankipiaskej sayoj se tanauatil. Desde axkan, namejuan uan namokoneuan moneki nankichiuaskej tein nikixtalij. Jehová kichia maj nochin ijkon kichiuakan, hasta akin amo israelitas uan nemij namouan. 16 Tanauatil tein moneki nankitakamatiskej namejuan, no yejua tein moneki kitakamatiskej akin amo israelitas. Uan tein moixtalis mochiuas namouan no yejua tein moixtalis mochiuas iniuan’”.

17 Uan Jehová kiluij Moisés: 18 “Xikinilui israelitas: ‘Keman nanajsiskejya itech tal kampa namechajxititi 19 uan nankikuaskej tein ompa mochiua, moneki nankixeloskej tein nankimaktiliskej Jehová. 20 Keman nankikixtiskej harina den tatok tein yekinika chikauaya, moneki nankichijchiuaskej seki pantsin tein ijtikoyoktik. Nejon harina moneki yeski xaxakachtik. Moneki nankimaktiliskej Dios ijkon kemej nankimaktiliaj tein kisa kampa nankichipauaj tatok. 21 Namejuan uan namokoneuan akin yoltiaskej moneki nankimakaskej Jehová teisa tachijchiuj ika harina tein xaxakachtik. Nejon harina moneki yeski den tatok tein yekinika chikauaya.

22 ”’Sayoj ke, maj tikijtokan ke nanochin namopolouaj uan amo nankitakamatij nochi nejin tanauatilmej tein Jehová kimakak Moisés. 23 Nochi nejin Jehová kiluij Moisés maj namechnauati. Desde tonal keman Jehová kijtoj nejin, namechnauatij para xiktakamatikan namejuan uan namokoneuan akin yoltiaskej. 24 Komo namopolojkej uan amo akin kimatik, sayoj ke satepan momati, nanochin moneki nankitemaktiskej se kuakouej tein yekin moskaltijtok para kichichinouiliskej Jehová uan yejua semi kiajuiyakmatis. Iuan no moneki nankitemaktiskej harina uan vino, uan nankichiuaskej kemej ipa mochiua. No moneki nankitemaktiskej se chivojkonet porin nantajtakolejkej. 25 Uan tiopixkat kitemaktis nochi nejin para maj Jehová kiixpolo inintajtakol israelitas porin mopolojkej. Uan Jehová kintapojpoluis porin kiuikilijkej tein kichichinouiliskej uan tein kimaktiliskej porin tajtakolejkej. 26 Dios kintapojpoluis nochin israelitas uan akin amo israelitas akin iniuan nemij, porin nochin mopolojkej.

27 ”’Akin kichiuas se tajtakol maski amo kinekia, moneki kiuikas se chivojlamat tein ayamo kiajxitia se xiuit para maj Dios kitapojpolui. 28 Uan tiopixkat kitemaktis nejin para maj ixpoliui itajtakol akin mopoloj uan kichiuak tein amo kuali iixpan Jehová, uan Dios kitapojpoluis. 29 Tein monekis kichiuas se israelita, no yejua tein monekis kichiuas akin amo israelita keman kichiuas tein amo kuali maski amo kinekia.

30 ”’Sayoj ke komo se israelita oso se akin amo israelita kichiua tein amo kuali porin ijkon kinemilij, kemej yeskia kiuijuikaltijtok* Jehová uan moneki mikis. 31 Kemej kiixtopeuak tein Jehová kijtoua uan amo kichiuak tein tanauatia, moneki mikis. Taxtauas porin yejua motemolij’”.

32 Keman israelitas yetoyaj itech tal kampa tauaktok, kiixajsitoj se takat tein kiololojtoya kouit itech tonal sábado keman moseuiayaj. 33 Akin kiitakej nejon takat, kiuikakej iuan Moisés, Aarón uan nochin israelitas. 34 Uan ompa kipixtoyaj porin ayamo kiixtaliayaj toni kichiuiliskiaj.

35 Uan Jehová kiluij Moisés: “Nejon takat moneki mikis. Nochin moneki kitetemaskej* kampa amo kaltaj”. 36 Yejua ika nochin kikixtijkej uan kitetenkej hasta ke mikik, ijkon kemej Jehová kinauatijka Moisés.

37 Jehová no kiluij Moisés nejin: 38 “Xikinilui israelitas: ‘Namejuan uan namokoneuan akin yoltiaskej moneki nankitentaliliskej namokuey seki hilitos. Uan no moneki nankitaliliskej se hilo azul ajkotsin den hilitos. 39 Moneki ijkon nankipiaskej namotasal. Ijkon keman nankiitaskej, nankielnamikiskej nochi tein Jehová namechnauatia uan nankitakamatiskej. Amo xikchiuakan tein nankiyolnejnekij nion tein nankiitaj uan nankiuelitaj, kemej kichiua se siuat akin monamaka iniuan takamej. 40 Tein namechiluijtok namechelnamiktis nochi tein namechnauatia uan ijkon nanechtakamatiskej uan nanxeliujtoskej para namoDios.* 41 Nejua namoDios Jehová, akin namechkixtij de Egipto para nankimatiskej ke nejua niDios. Nejua namoDios Jehová’”.

16 Uan Coré iokichpil Izhar, peuak mokui iuan Datán, Abiram, uan On. (Izhar katka iokichpil Cohat uan iixuiuj Leví. Datán uan Abiram katkaj iokichpipiluan Eliab, uan On katka iokichpil Pélez. Datán, Abiram uan On katkaj ichankauan Rubén). 2 Yejuan uan 250 taixyekananij israelitas kiixnamikkej Moisés. Nejon takamej kinixtalijkaj para maj tayolmajxitikan uan katkaj ueyichiuanimej. 3 Mosentilijkej, kinitatoj Moisés uan Aarón uan kiniluijkej: “¡Nantechyolajxitijkejya! Jehová kinijitak nochin israelitas uan yejua iniuan yetok. Nochin iaxkauan Jehová. ¿Keyej namomachiliaj ke okachi nanueyichiuanimej ke yejuan?”.

4 Keman Moisés kikakik nejin, nimantsin motankuaketsak uan moixpiloj hasta talpan. 5 Uan kiluij Coré uan akin iuan mokuikej: “Mosta kualkan Jehová kinextis akonimej iaxkauan, akonimej kinijitak uan akonimej uelis iuan motokiskej. Uan akin yejua kijitas uelis iuan motokis. 6 Xikchiuakan nejin: Coré uan nanochin akin iuan nanualajkej, xikuikan sejse tekolkaxit, 7 xiktalilikan tekol uan kopal uan xitapopochuikan iixpan Jehová mosta, uan Jehová kinextis akoni moxelouilij. Nanikoneuan Leví, ¡amo uelis ijkon nankisentokaskej!”.

8 Uan Moisés kiluij Coré: “Nanikoneuan Leví, namechtataujtia xinechkakikan. 9 ToDios* Jehová namechxeloj uan namechkauak iuan ximotokikan. Namechixtalij xitekitikan itech kaltsin kampa titaueyichiuaj* para nankinpaleuiskej israelitas. Nejon se ueyi tatiochiualis, ¿amo ijkon nankiitaj? 10 Uan hasta mitsijitak tejua uan nochin mokniuan akin no ikoneuan Leví para iuan ximotokikan. ¿No nankinekij nankinkuiliskej tekit tein kichiuaj tiopixkamej? 11 Yejua ika, tejua uan nochin akin mouan mosentilikoj nankiixnamiktokej Jehová. Uan no, ¿keyej nankijijtouaj Aarón? Yejua amo teyi kichiujtok”.

12 Satepan, Moisés kintatitauij Datán uan Abiram, iokichpipiluan Eliab, sayoj ke yejuan kijtojkej: “¡Amo tiaskej! 13 Tinemiaj kampa moteltachiua.* Ipa titechkixtijya de ompa para titechmiktis nikan kampa tauaktok uan amo teyi onkak. Fiero tein titechchiuilij. ¿Uan axkan no tikneki sayoj tejua titechixyekanas? 14 Tikijtoj ke titechajxitiskia itech se tal kampa moteltachiua* uan ke titechmakaskia se tal kampa onkak uvas. ¿Kani yetok nejon tal? ¿Tikneki maj timitstojtokakan* kemej yeskia amo titachiaj? ¡Amo tiaskej!”.

15 Uan Moisés tel kualanik uan kiluij Jehová: “Xikixtopeua harina tein mitsmaktiliskej. Nejua amo nikinkuilijtok nion se burro uan amo teyi nikinchiuiliani”.

16 Uan Moisés kiluij Coré: “Mosta xiakan iixpan Jehová tejua, akin mouan yetokej uan Aarón. 17 Sejse moneki kikuis se tekolkaxit, kitalilis kopal uan tapopochuis iixpan Jehová: yeskij 250. Uan tejua uan Aarón no nankiuikaskej sejse tekolkaxit”. 18 Uan nochin kikuikej sejse tekolkaxit, kitalilijkej tekol uan kopal, uan nochin mokejketsatoj ikalakyan kaltsin kampa taueyichiuayaj iniuan Moisés uan Aarón. 19 Keman Coré kinsentilij ikalakyan kaltsin nochin akin iuan yetoyaj para kinixnamikiskej, iueyi chikaualis Jehová monextij ininixpan nochin israelitas.

20 Uan Jehová kiniluij Moisés uan Aarón: 21 “Ximoajchiuakan uan xikinkauakan nejin takamej para maj yekintsin nikinmikti”. 22 Uan yejuan motankuaketskej uan moixpilojkej hasta talpan uan kijtojkej: “ToDios, tejua akin titechmaka tonemilis, ¿sayoj por itajtakol se takat tikualani iniuan nochin?”.

23 Uan Jehová kiluij Moisés: 24 “Xikinilui israelitas: ‘¡Ximoajchiuakan de ininchan Coré, Datán uan Abiram!’”.

25 Uan Moisés moketsak uan yajki iniuan taixyekananij israelitas kampa yetoyaj Datán uan Abiram. 26 Uan yejua kiniluij nochin: “Namechtataujtia, ximoajchiuakan de ininchan nejin takamej akin amo yolkualmej uan amo xikitskikan nion teyi tein ininaxka. Ijkon amo namechixpoloskej iniuan por tajtakol tein kichiujkej”. 27 Yejuan nimantsin moajchiujkej de ininchan Coré, Datán uan Abiram. Uan Datán uan Abiram kiskej uan mokaujkej ininkaltenoj iniuan ininsiuauan uan ininkoneuan, hasta pilimej.

28 Uan Moisés kijtoj: “Ijkon nanochin nankimatiskej ke Jehová nechtitanik maj nikchiua nochi nejin, amo porin nejua ijkon niknemilij: 29 komo yejuan mikij kemej ipa timikij uan kinpanoua kemej kinpanoua nochin, moitas ke Jehová amo nechtitanik; 30 sayoj ke, komo Jehová kinchiuilia se taman tein amo keman moitstok, moixtapoua tal, kintoloua yoltokej uan tamitij taltampa* yejuan uan nochi tein kipiaj, nankiyekmatiskej ke nejin takamej amo kitakachiujkej* Jehová”.

31 Keman tamitajtoj, nimantsin tal kampa ijkatoyaj ixtapanik, 32 takoyonik uan tal kintoloj yejuan uan akin nemiaj ininchan. No kintoloj nochin akin kipaleuiayaj Coré uan nochi tein kipiayaj. 33 Uan yejuan uan nochin akin kinpaleuiayaj pankalakitoj* yoltokej, uan tal kinpachoj uan ompa mikkej. 34 Nochin israelitas akin ompa yetoyaj, mojkakisteujkej keman chikauak tsajtsikej akin kintoloj tal. Uan kijtouayaj: “¡Tal no uelis techtolos!”. 35 Uan Jehová kiualtitanik se tit* uan kintamij nejon 250 takamej akin tapopochuijtoyaj.

36 Uan Jehová kiluij Moisés: 37 “Xikilui Eleazar iokichpil tiopixkat Aarón maj kikixtiti kampa taxotatok nochi tein kikuikej para tapopochuiskej, porin nejon xeliujtok. No xikilui maj uejka kitamotati tekol. 38 Nejin takamej mikkej porin tajtakojkej. Tekolkaxit tein sejse kikuik xeliujtokej porin yejuan ika tapopochuijkej iixpan Jehová. Yejua ika, xikinpajpatachokan hasta maj mochiuakan kemej lámina uan xiktamipantalilikan altar. Uan nejon moneki kintalnamiktis israelitas”. 39 Yejua ika tiopixkat Eleazar kikuik sejse tekolkaxit de cobre tein ika tapopochuijkej akin chichinaujkej. Kinpajpatachoj ika martillo hasta maj mochiuakan kemej lámina para kitamipantalilis in altar, 40 ijkon kemej Jehová kiluijka Moisés. Nejin kinelnamiktiaya israelitas ke akin amo yeskia ichankauj Aarón, amo ueliskia motokis para tapopochuis iixpan Jehová. No kinelnamiktiaya maj amo akin kichiua kemej Coré uan akin iuan mokuikej.

41 Mostika, nochin israelitas peuak kualanij uan kiniluiaj Moisés uan Aarón: “Namejuan nankinmiktijkej ikoneuan Jehová”. 42 Keman mosentilijkej uan kinitatoj Moisés uan Aarón, moixkepkej kampa yetoya kaltsin kampa taueyichiuayaj uan kiitakej ke mixti kitamikentoya, uan peuak monextia iueyi chikaualis Jehová.

43 Moisés uan Aarón motokijkej kampa yetoya in kaltsin, 44 uan Jehová kiluij Moisés: 45 “Tejua uan Aarón, xikinkauakan nochin israelitas para maj nikinixpolo yekintsin”. Uan yejuan motankuaketskej uan moixpilojkej hasta talpan. 46 Uan Moisés kiluij Aarón: “Xikui se tekolkaxit, xiktalili tekol tein yetok itech altar uan xiktalili kopal, uan niman xiouj kampa yetokej israelitas uan xitapopochui para maj ixpoliui inintajtakol, porin Jehová tel kualantok. ¡Mijmiktokejya!”. 47 Aarón nimantsin kikuik tekolkaxit, ijkon kemej Moisés kiluijka, uan tsikuintiajki kampa yetoyaj israelitas. ¡Sayoj ke peujkaya mijmikij israelitas porin Dios kintatsakuiltijtoya! Yejua ika kitalij kopal itech tekolkaxit uan peuak tapopochuia para maj Dios kiixpolo inintajtakol. 48 Uan ijkatoya tatajko de kampa tentoyaj mikemej uan kampa yetoyaj akin yoltoyaj. Uan amo akinok mikik. 49 Mikkej 14,700 aparte de tein mikkej porin mokuikej iuan Coré. 50 Aarón oksepa kiajsito Moisés ikalakyan kaltsin kampa taueyichiuayaj, satepan ke amo mijmiktoyajok.

17 Uan Jehová kiluij Moisés: 2 “Xikinilui israelitas maj kiualkuikan 12 koujmej. Akin kinixyekana sejse ueyi familia maj kiualkui se kouit. Xikijkuilo itokay sejse takat itech ikouj. 3 Xikijkuilo itokay Aarón itech kouit tein kiuikas akin kinixyekana ichankauan Leví, porin sejse taixyekankej sayoj kiuikas se kouit. 4 Xikintali nejon koujmej taijtik den kaltsin kampa nantaueyichiuaj,* taixpan den tatiochiualkaxon* kampa ipa nimonextia namoixpan. 5 Uan ikouj takat akin nikijitas xochiouas, uan nikchiuas maj israelitas amo nechijijtokanok nion maj namechijijtokanok namejuan”.

6 Yejua ika Moisés kiniluito israelitas nejon uan nochin taixyekananij kimakakej ininkouj. Sejse takat akin kiixyekanaya sejse ueyi familia kiuikak ikouj, uan katkaj 12. Uan ikouj Aarón no ompa yetoya. 7 Satepan Moisés kintalij koujmej iixpan Jehová itech kaltsin kampa yetoya tatiochiualkaxon.

8 Mostika, Moisés kalakito itech kaltsin kampa yetoya tatiochiualkaxon uan kiitak ke ikouj Aarón xochiojtoya. Nejon kouit kiuikaka Aarón, akin kinixyekanaya ichankauan Leví. Kipiaya kekepotsitsin, xochimej uan almendras tein chikauakya. 9 Uan Moisés kinkixtij nochin koujmej tein yetoyaj iixpan Jehová uan kinnextilij nochin israelitas. Yejuan kuali kiitakej uan sejse taixyekankej kikuik ikouj.

10 Satepan Jehová kiluij Moisés: “Oksepa xiktali ikouj Aarón taixpan den tatiochiualkaxon para kinnejmachtis akin kinekiskej taixnamikiskej. Ijkon amo nechijijtoskejok uan amo mikiskej”. 11 Moisés niman kichiuak nochi tein Jehová kinauatijka. Kichiuak ijkon kemej kiluijka.

12 Uan israelitas kiluijkej Moisés: “¡Timikitij! ¡Axkan kemaj timikitij! ¡Amo akin momakixtis! 13 ¡Akin motokis itech kaltsin kampa kiueyichiuaj Jehová mikis! ¿Keyej sayoj por nejon moneki timikiskej?”.

18 Uan Jehová kiluij Aarón: “Tejua, mookichpipiluan uan mochankauan namechtatsakuiltiskej komo aksa* kichiua tein amo moneki kampa Dios taxeloj. Uan tejua uan mookichpipiluan namechtatsakuiltiskej komo amo nankichiuaj kemej moneki tekit tein nankipiaj kemej tiopixkamej. 2 Uan no, xikinilui maj motokikan mokniuan akin no ikoneuan mouejkaujtat Leví, para maj mitspaleuikan uan maj namechtekitilikan tejua uan mokoneuan itech kaltsin* kampa yetok tatiochiualkaxon.* 3 Yejuan moneki kichiuaskej tekit tein tikinmakas uan nochi tein monekis mochiuas itech nejon kaltsin. Sayoj ke amo uelis motokiskej kampa yetok nochi tein mokui kampa Dios taxeloj nion itech altar, para amo namikiskej namejuan nion yejuan. 4 Yejuan mitspaleuiskej uan kichiuaskej nochi tein ixyetok kichiuaskej itech kaltsin. Uan amo akin yeski* uelis motokis namouan. 5 Namejuan moneki nankichiuaskej tekit tein ixyetok nankichiuaskej kampa Dios taxeloj uan itech altar, para maj amo okachiok nikualani iniuan israelitas. 6 Nejua nikinijitak namokniuan levitas para namechintayokolis. Yejuan yeskij iaxkauan Jehová uan kichiuaskej tekit itech kaltsin. 7 Tejua uan mokoneuan moneki nankiitaskej tekit tein kichiuaj tiopixkamej itech altar uan tein yetok taikan den cortina; namejuan moneki nankichiuaskej nochi nejon tekit. Namejuan nankipiaj tatiochiualis nantekitiskej kemej tiopixkamej. Amo akin yeski* uelis motokis, porin mikis”.

8 Jehová no kiluij Aarón: “Nejua nimitsixtalij xikita nochi tein nechmaktiliskej. Tein israelitas kixeloskej para nechmaktiliskej, namechmaka se parte tejua uan mokoneuan uan nochipa yeski namoaxka. 9 Keman israelitas kixeloskej teisa para nechchichinouiliskej, moaxka yeski se parte. No ijkon yeski keman nechmaktiliskej teisa tachijchiuj ika harina, keman nechmaktiliskej teisa porin tajtakolejkej oso porin kichiujkej tein amo kuali. Nikxeloj sayoj para tejua uan mokoneuan. 10 Moneki nankikuaskej kampa nitaxeloj. Moneki kikuaskej nochin takamej. Nejon xeliujtok uan moneki ijkon tikitas. 11 No nimitsmaka tein israelitas kitetayokoliskej, ijkon kemej ipa nimitsmaka tein kimauiuikaj uan nechmaktiliaj. Nimitsmaka tejua, mookichpipiluan uan mosiuapipiluan uan nochipa ijkon yeski. Nochin akin nemiskej mochan uan chipaujkej yeskij uelis kikuaskej.

12 ”Aceite, vino tein yankuik uan tatok tein okachi kuali, nochi nejon tein achto kikixtiskej uan kimaktiliskej Jehová, nimitsmaka tejua. 13 Tein yekinika chikauayas inintalpan uan kiuikiliskej Jehová, no yeski moaxka. Nochin akin nemiskej mochan uan chipaujkej yeskij uelis kikuaskej.

14 ”Nochi tein israelitas kixelouiliskej Dios para maj nochipa iaxka, moneki yeski moaxka.

15 ”Ininkoneuan israelitas akin tayekanaj uan tapialmej tein achto yolij tein kimaktiliskej Jehová, moneki yeskij moaxkauan. Sayoj ke, moneki tikauas maj taxtauakan para kimakixtiskej se konet tein tayekana uan se tapial tein achto yoli uan amo chipauak. 16 Moneki tikauas maj taxtauakan para kinmakixtiskej keman kipiaskej se metsti oso kipanauiskejya. Moneki kitemakaskej 57 gramos* de plata, tein kitamachiuaskej ika pesa tein kikuij kampa Dios taxeloj. Nejon pesa kipia 12 gramos.* 17 Sayoj ke amo xikaua maj kinmakixtikan tapialueuetkej tein achto yolij: kuakuejmej, ichkamej* uan chivos. Xeliujtokej para Dios. Moneki tikpijpisuis ininesyo itech altar uan tikchichinos ininmantekayo para maj popoka uan Jehová semi kiajuiyakmatis. 18 Uan nakat moaxka yeski, ijkon kemej iyolixpan tapial tein kimauiuikaskej uan iyekmets. 19 Nochi tein israelitas kixelouiliskej Jehová para kimaktiliskej, nimitsmaka se parte tejua, mookichpipiluan, mosiuapipiluan uan nochipa yeski namoaxka. Jehová motenkaua nejin mouan uan iniuan mokoneuan uan amo mopatas”.*

20 Jehová no kiluij Aarón: “Kampa nemiskej israelitas amo mitsmakaskej nion se tal tein uelis tikinkauilis mokoneuan keman timomikilis. Nejua nimitsyekpias uan nimitsmakas nochi tein mitspolos.

21 ”Xikita, nikinmakatok ikoneuan Leví se parte* de nochi tein kipixtiaskej israelitas, porin tekitij itech kaltsin kampa nantaueyichiuaj. 22 Israelitas amo uelisok motokiskej itech nejon kaltsin. Komo motokiaj, tajtakoskej uan mikiskej. 23 Sayoj levitas moneki tekitiskej itech kaltsin, uan yejuan tanankiliskej komo teisa amo mochiua kemej moneki. Desde axkan, ixyetok nejin para tejua uan nochin mokoneuan akin yoltiaskej: yejuan amo kipiaskej nion se tal kampa nemiskej israelitas. 24 Porin nikinmakatok levitas se parte* de nochi tein israelitas kimaktiliaj Jehová. Yejua ika nikijtojya: ‘Amo kinmakaskej nion se tal kampa nemiskej israelitas’”.

25 Uan Jehová kiluij Moisés: 26 “Xikinilui levitas: ‘Israelitas namechmakaskej se parte* ijkon kemej nikixtalij maj namechmakakan, uan namejuan no moneki nankimakaskej Jehová se parte* de nejon tein namechmakaskej. 27 Nejon moitas kemej yeskia nankitemakatoskiaj tatok, vino oso aceite tein nankikixtiskiaj namotalpan. 28 Keman israelitas namechmakaskej se parte,* namejuan no nankimakaskej Jehová se parte.* Nejon tein iaxka Jehová nankimakaskej tiopixkat Aarón. 29 Nochipa keman nankimakaskej teisa Jehová, nankixelouiliskej tein okachi kuali de nochi tein namechtayokoliskej’.

30 ”Uan moneki tikiniluis levitas: ‘Keman nankitemakaskej tein okachi kuali, tein mokauas nankiitaskej kemej yeskia tatok, vino oso aceite tein nankikixtiskiaj namotalpan. 31 Namejuan uan akin nemij namochan uelis nankikuaskej kampa yeski, porin yejua namotaxtauil por tekit tein nankichiuaj itech kaltsin kampa nantaueyichiuaj. 32 Amo nantajtakoskej komo nankitemakaj tein okachi kuali. Xikuikan kemej kinamiki tein israelitas kixelouiliaj Dios; komo amo ijkon nankichiuaj, namikiskej’”.

19 Jehová oksepa iniuan tajtoj Moisés uan Aarón uan kiniluij: 2 “Yejua nejin tein Jehová tanauatij: ‘Xikinilui israelitas maj mitsualkuilikan se kuakuejlamat chichiltik, tein kuali yetos uan amo teyi kipolos, uan tein amo keman kitekitiltianij. 3 Moneki nankimakaskej tiopixkat Eleazar, uan yejua kiuikas kampa amo kaltaj uan ompa kimiktiskej iixpan. 4 Uan tiopixkat Eleazar momajpilkalakis itech esti uan tapijpisuis chikome viaje kampa ika yetok ikalakyan kaltsin kampa taueyichiuaj.* 5 Nejon kuakouej kichichinoskej iixpan. Kichichinoskej ipankuetaxyo, inakayo, iesyo uan ikuit. 6 Uan tiopixkat kikuis cedrojkouit, seki xiujtsitsin* uan hilo chichiltik uan kitamotas kampa chichinaujtos kuakouej. 7 Tiopixkat kipakas itasal uan mopakas, uan satepan uelis kalakisya kampa nemij nochin, sayoj ke amo chipauak yeski hasta keman tapoyauis.

8 ”’Akin kichichinos kuakouej kipakas itasal uan mopakas, uan amo chipauak yeski hasta keman tapoyauis.

9 ”’Se takat akin chipauak kiololos koujnex tein kisas uan kikauatiuj kampa amo akin nemi uan tachipaujkan. Israelitas ompa kipiaskej, uan kitemiliskej at tein kikuiskej para maj Dios kinita ke chipaujkej. Nejon kuakouej kitemaktiaj porin tajtakolejkej. 10 Akin kiololos koujnex, moneki kipakas itasal uan amo chipauak yeski hasta keman tapoyauis.

”’Desde axkan nikixtalia nejin tanauatil tein moneki kitakamatiskej israelitas uan akin amo israelitas uan nemij iniuan. 11 Akin kikitskis se miket,* amo chipauak yeski chikome tonal. 12 Yejua moneki mochipauas uiptika ika nejon at, uan itech chikometika tonal chipauakya yeski. Sayoj ke komo amo mochipaua uiptika, amo chipauak yeski itech chikometika tonal. 13 Akin kikitskis se miket* uan amo mochipauas, kipitsotilis kaltsin kampa kiueyichiuaj Jehová uan moneki mikis. Kemej amo kipijpisuilianij at tein ika mochipauaj, Dios kiita ke amo chipauak.

14 ”’Yejua nejin tein moneki mochiuas komo aksa* momikilia kalijtik: akin kalakis itech nejon kali* uan akin ipa kalijtik yetos, amo chipauak yeski chikome tonal. 15 Komo se tapalkat amo tentsaktok,* amo chipauak yeski. 16 Akin yetos kampa amo kaltaj uan kikitskis se miket oso iomiyo, xa porin kimiktijkej oso mikik por okse taman, amo chipauak yeski chikome tonal. Oso komo tamatoka* kampa aksa toktok, amo no chipauak yeski chikome tonal. 17 Para chipauak yeski, moneki kikuiskej tepitsin koujnex tein kisak keman kichichinojkej kuakouej chichiltik. Kitemaskej itech se tapalkat uan kitekiliskej at de se ameyal. 18 Uan se takat akin chipauak kikuis seki xiujtsitsin,* kiajakis itech nejon at uan kipijpisuilis nejon kali, nochin tapalkamej uan akin ompa yetoyaj. No kipijpisuilis takat akin mopitsotilij porin kikitskij akin kimiktijkej oso iomiyo, kikitskij se akin mikik por okse taman oso tamatokak kampa aksa toktok. 19 Takat akin chipauak kipijpisuilis at akin amo chipauak uiptika uan itech chikometika tonal, uan itech chikometika tonal ixpoliuis itajtakol uan chipauakya yeski. Satepan akin amo chipauak katka kipakas itasal uan mopakas, uan keman tapoyauis chipauakya yeski.

20 ”’Sayoj ke akin mopitsotilij uan amo mochipaua, moneki kimiktiskej, porin kipitsotilij kampa kiueyichiuaj Jehová. Kemej amo kipijpisuilianij at tein ika mochipauaj, Dios kiita ke amo chipauak.

21 ”’Desde axkan yejuan moneki kichiuaskej nejin: akin tepijpisuilis at tein ika mochipauaj moneki kipakas itasal, uan akin mokuiltis at tein ika tachipauaj amo chipauak yeski hasta keman tapoyauis. 22 Tein yeski taman tein kikuis akin amo chipauak, amo no chipauak yeski, uan akin kimatokas nejon, amo chipauak yeski hasta keman tapoyauis’”.

20 Itech metsti abib,* nochin israelitas ajsikej itech tal kampa tauaktok uan motanotsa Zin uan mokaujkej Cadés. Ompa momikilij Míriam uan ompa kitokkej.

2 Ompa amo onkaya at para tayiskej, yejua ika mosentilijkej uan kinitatoj Moisés uan Aarón. 3 Kemej kualantoyaj peuak kiluiaj Moisés: “¡Majkan timikinij keman tokniuan mikkej iixpan Jehová! 4 ¿Keyej nankinualkuikej ikoneuan Jehová nikan kampa amo teyi onkak? ¿Para maj nikan timikikan iniuan totapialuan? 5 ¿Keyej nantechkixtijkej de Egipto uan nantechualkuikej nikan kampa tafierojkan? Nikan amo ueli se tatoka, amo onkak higojkouit, uvajkouit nion granadajkouit nion at para titayiskej”. 6 Uan Moisés uan Aarón moajchiujkej, yajkej ikalakyan kaltsin kampa taueyichiuayaj* uan motankuaketskej uan moixpilojkej hasta talpan. Uan iueyi chikaualis Jehová peuak monextia ininixpan.

7 Uan Jehová kiluij Moisés: 8 “Xikui motopil, uan tejua uan mokniuj Aarón xikinsentilikan nochin israelitas. Keman nochin namechitstoskej, xikiluikan tepejxit maj kikixti at. Kisas at uan nochin israelitas uan inintapialuan tayiskej”.

9 Yejua ika Moisés kikuik itopil tein yetoya iixpan Jehová ijkon kemej yejua kinauatijka. 10 Uan Moisés uan Aarón kinsentilijkej israelitas kampa yetoya tepejxit, uan Moisés kiniluij: “¡Namejuan akin amo nantakakij! Kemej nanteltajtantokej at, yekintsin tamechkixtilitij de nejin tepejxit”. 11 Keman kitamiijtoj nejon, Moisés kikuik itopil uan ojpa kiuitekik tepejxit, uan peuak kisa miak at. Uan israelitas uan inintapialuan peuak tayij.

12 Satepan, Jehová kiniluij Moisés uan Aarón: “Kemej amo nantakuaujtamatkej nouan nion nanechueyitalijkej ininixpan nochin israelitas, amo namejuan nankinajxitiskej itech tal tein nikinmakati”. 13 Yejua nejin at tein onkak ompa Meribá,* kampa israelitas kinajnankilijkej Jehová, yejua ika nejon tonal moueyitalij ininixpan nochin.

14 Desde Cadés, Moisés kintitanik seki takamej maj kiluitij tekiuaj akin taixyekanaya Edom: “Yejua nejin tein mokniuan israelitas kijtouaj: ‘Tejua tikmati nochi tein tikijyouianij. 15 Touejkaujtatuan yajkej Egipto uan ompa tinenkej miak xiujmej, uan akin ompa nemiaj techtajyouiltijkej tejuan uan touejkaujtatuan. 16 Hasta ke tiktsajtsilijkej Jehová uan yejua techkakik, kiualtitanik se ángel uan techkixtij de Egipto. Axkan tietokej Cadés, se ueyi xolal tein yetok motaltenoj. 17 Timitstataujtiaj xitechkaua maj tipanokan motalpan. Amo tipanoskej kampa tatokalaj nion kampa onkak uvas uan amo titayiskej at tein tikpia kampa titachkuak. Tikuiskej ueyi ojti* uan amo kanaj tichikokalakiskej hasta maj titamipanokan motalpan’”.

18 Sayoj ke tekiuaj de Edom kiluij: “Amo uelis nanpanoskej notalpan. Komo nanpanouaj, namechnamikitiuj ika nomachete tein ojkan tenej”.* 19 Uan israelitas kiluijkej: “Tiaskej itech ueyi ojti, uan komo tejuan oso totapialuan titayij moauj, timitsixtauiliskej. Sayoj tiknekij ompaka timoojtiskej”. 20 Sayoj ke yejua kiniluij: “Nikan amo nanpanoskej”. Uan tekiuaj kinnamikito iniuan tel miakej soldados akin tel kuali tateuiayaj. 21 Uan tekiuaj amo kinkauak israelitas maj panokan italpan. Yejua ika, oksekopa yajkej.

22 Nochin israelitas kiskej de Cadés uan ajsitoj itech tepet Hor. 23 Uan Jehová kiniluij Moisés uan Aarón itech tepet Hor, tein yetok tatenoj de Edom: 24 “Aarón momikiliti. Yejua amo ajsis itech tal tein nikinmakati israelitas, porin nanomen amo nankinekkej nankichiuaskej tein namechnauatij ompa Meribá, keman namechiluij xikixtikan at. 25 Xipankisa itech tepet Hor iuan Aarón uan iokichpil, Eleazar. 26 Xikixtili Aarón tasal tein kikui kemej tiopixkat uan xiktalili Eleazar. Uan Aarón ompa momikilis”.

27 Uan Moisés kichiuak nochi tein Jehová kinauatijka. Yejuan pankiskej itech tepet Hor uan nochin israelitas kinitstoyaj. 28 Uan Moisés kikixtilij Aarón itasal uan kitalilij iokichpil, Eleazar. Satepan Aarón momikilij ompa tepekuapan. Uan Moisés uan Eleazar temokej den tepet. 29 Keman nochin israelitas kimatkej ke Aarón momikilijka, nochin kichokilijkej se metsti.*

21 Yetoya se tekiuaj de Canaán akin nemia Négueb uan taixyekanaya ompa Arad. Keman yejua kimatik ke israelitas kikuikaj ojti Atarimkopa, kinteuito uan moinuikilij sekin. 2 Yejua ika israelitas motenkaujkej iuan Jehová: “Komo titechpaleuia maj tikintanikan akin techteuikoj, tikinixpoloskej uejueyi xolalmej kampa nemij”. 3 Uan Jehová kinkakik israelitas uan kinpaleuij maj kintaninij akin nemiaj Canaán. Kintamimiktijkej uan kinixpolojkej uejueyi xolalmej. Yejua ika ompa tatokaytijkej Hormá.*

4 Kiskej den tepet Hor uan kikuikej ojti tein ajsi hasta mar Rojo para tayoualoskej uan amo panoskej Edom. Sayoj ke israelitas amo kinekiajok yajtinemiskej. 5 Uan kisentokakej kinijijtojkej Dios uan Moisés. Kijtouayaj: “¿Keyej nantechkixtijkej de Egipto? ¿Sayoj para maj timikikan nikan kampa tauaktok? Amo onkak toni tikuaskej nion at, uan techyolajsikya* nejin maná,* tein tel amo uelik”. 6 Yejua ika Jehová kintitanilij seki kouamej, uan nejon kouamej kintipiniayaj israelitas, yejua ika miakej mikkej.

7 Uan israelitas kiitatoj Moisés uan kiluijkej: “Tikchiujkej se tajtakol porin tikijijtojkej Jehová uan no timitsijijtojkej. Xiktataujti Jehová maj techinajchiuili kouamej”. Uan Moisés kintajtouij israelitas. 8 Jehová kiluij Moisés: “Xikchijchiua se kouat kemej tein nikan yetokej uan xikajkotali itech se poste. Keman se kouat kitipinis aksa,* yejua moneki kiajkoitas kouat para amo mikis”. 9 Nimantsin, Moisés kichijchiuak se kouat de cobre uan kiajkotalij itech se poste. Keman se kouat kitipiniaya aksa uan yejua kiajkoitaya kouat, amo mikia.

10 Satepan, israelitas yajkej de ompa uan mokaltalijkej kampa motanotsa Obot. 11 Satepan kiskej de Obot uan mokaltalijkej ompa Iyé-Abarim, kampa amo teyi onkak. Nejon tal mokaua taixpan de Moab, kampa ika ualkisa tonaltsin. 12 Kiskej de ompa uan mokaltalijkej tanakastan den ueyiat* Zered. 13 Kiskej de ompa uan mokaltalijkej kampa ika panoua ueyiat Arnón, kampa amo teyi onkak. Itech nejon atauit tami inintal akin kinixmatij kemej amorreos. Arnón yetok tatenoj de Moab, yejua ika kinxeloua moabitas uan amorreos. 14 Yejua nejon ijkuiliujtok itech amatajkuilol kampa ika tajtoua keman Jehová kintanik akin kitauelitayaj. Ompa ika motajtoua “Vaheb, ompa Sufá, uan ataujmej tein ajsij Arnón. 15 Nejin ataujmej temouaj, panouaj kampa ika yetok Ar uan youij sentatenoj de Moab”.

16 Satepan yajkej kampa motanotsa Beer. Ompa yetok atekoch kampa Jehová kiluij Moisés: “Xikinsentili israelitas para maj nikinmaka at”.

17 Ijkuak, nochin israelitas cantarojkej ijkuin:

“¡Atekoch, xikixti at! ¡Xiknankilikan* namejuan!

Satepan kiskej den tal kampa amo teyi onkaya uan yajkej Mataná, 19 satepan yajkej Nahaliel uan de ompa yajkej Bamot. 20 Satepan yajkej hasta tal tamanis* tein yetok Moab, ajko de kampa motanotsa Pisgá, kampa moita Jesimón.*

21 Uan israelitas kintitankej seki takamej maj kiluitij Sehón, inintekiuaj amorreos: 22 “Xitechkaua maj tipanokan motalpan. Amo tichikokalakiskej uan amo tipanoskej kampa tatokalaj nion kampa onkak uvas. Amo titayiskej at tein tikpia kampa titachkuak. Tikuiskej ueyi ojti* hasta maj titamipanokan motalpan”. 23 Sayoj ke Sehón amo kinkauak maj israelitas panokan italpan, ta kinsentilij nochin isoldados uan kinnamikito itech tal kampa tauaktok. Ajsikej ompa Jáhaz uan peuak kinteuiaj israelitas. 24 Sayoj ke israelitas kintankej uan kinkuilijkej inintal desde ueyiat Arnón hasta ueyiat Jaboc, amo uejka de kampa nemij ammonitas, porin Jazer yetok inintaltenoj ammonitas.

25 Uan israelitas moinkuilijkej nochi nejin uejueyi xolalmej kampa nemiaj amorreos. No mokuilijkej Hesbón uan nochin xolaltsitsin tein ompa pouiaj. Uan mokaltalijkej ompa. 26 Porin Sehón, inintekiuaj amorreos nemia itech ueyi xolal Hesbón. Yejua moteuij iuan tekiuaj de Moab uan kitalkuilij hasta ueyiat Arnón. 27 Yejua ika, desde ijkuak miakej peuak kijtouaj nejin para takejkeloskej:

“Xiualakan nikan Hesbón.

Maj kichijchiuilikan iueyi xolal Sehón uan maj kuali chijchiujto.

28 Porin kisak se tit* de Hesbón, ixolal Sehón.

Kitamij Ar tein yetok Moab, kintamij akin taixyekanayaj itech tepetsitsin tein yetokej Arnón.

29 ¡Titekneltij Moab! ¡Namechixpolotij namejuan akin nankiueyichiuaj Kemós!

Yejua kichiua maj iokichpipiluan cholojtinemikan uan maj isiuapipiluan tamitij imako Sehón, inintekiuaj amorreos.

31 Yejua ika israelitas peuak nemij itech inintal amorreos. 32 Uan Moisés kintitanik seki takamej maj ichtakatachiatij ompa Jazer. Israelitas kinkuilijkej xolaltsitsin tein ompa pouiaj uan kinkixtijkej amorreos akin ompa nemiaj. 33 Satepan, israelitas oksekopa yajkej uan pankiskej itech ojti tein teajxitia hasta Basán. Uan tekiuaj Og, akin taixyekanaya ompa Basán, yajki iniuan nochin isoldados para kinteuitiuj israelitas kampa motanotsa Edréi. 34 Jehová kiluij Moisés: “Amo xikmouili, porin nimitspaleuiti xiktani yejua uan nochin isoldados, uan tikuilis ital. Tiktanis ijkon kemej tiktanik Sehón, inintekiuaj amorreos akin nemia Hesbón”. 35 Yejua ika kimiktijkej iniuan iokichpipiluan uan nochin isoldados. Kintamimiktijkej uan kintalkuilijkej.

22 Uan israelitas kiskej de ompa uan mokaltalijkej itech se tal kampa amo teyi onkak ompa Moab, oksekopa den ueyiat Jordán, taixpan de Jericó. 2 Balac iokichpil Zipor kimatik nochi tein israelitas kinchiuilijkaj akin kinixmatiaj kemej amorreos. 3 Uan akin nemiaj Moab tel moujkej porin israelitas katkaj miakej. Tein melauj, hasta mojkamikiaj. 4 Yejua ika kiniluijkej taixyekananij de Madián: “Axkan nejin israelitas tatamitij kampa tinemij ijkon kemej se kuakouej kitamia xiuit”.

Ijkuak, Balac iokichpil Zipor tekiuajtia ompa Moab. 5 Yejua kintitanik seki takamej maj kiitatij Balaam iokichpil Beor. Balaam yetoya ompa Petor, kampa yolik. Petor yetok tanakastan den ueyiat Éufrates. Kintitanik maj kiluitij: “Miakej kiskej de Egipto. Uan xikita, sentakuikejya uan axkan nemijya mero notaltenoj. 6 Nimitstataujtia xiuiki uan xitajtani maj kinpano tein amo kuali, porin yejuan okachi miakej ke tejuan. Xa uelis nikintanis uan nikinkixtis de noaltepeuj, porin kuali nikmati ke akin tiktajtanilia tein kuali, kipanoua tein kuali uan akin tiknejnekilia tein amo kuali, kipanoua tein amo kuali”.

7 Yejua ika taixyekananij de Moab uan de Madián yajkej uan kiuikakej tomin para kitaxtauiskej in adivino. Kiitatoj Balaam uan kiluijkej tein Balac tanauatij. 8 Uan yejua kiniluij: “Nikan ximokauakan nejin youak uan namechiluis tein Jehová nechiluis”. Yejua ika taixyekananij de Moab mokaujkej iuan Balaam.

9 Uan Dios kiluij Balaam: “¿Akonimej nejin takamej akin mouan yetokej?”. 10 Balaam kiluij toTajtsin Dios: “Balac iokichpil Zipor, akin tekiuajti Moab tatitanik maj nechiluikij: 11 ‘Akin kiskej de Egipto sentakuikejya. Nimitstataujtia xiuiki uan xitajtani maj kinpano tein amo kuali. Xa uelis nikinteuis uan nikinkixtis’”. 12 Sayoj ke Dios kiluij Balaam: “Amo xiouj iniuan. Amo xikintajtanili tein amo kuali, porin nejua nikinpaleuijtok”.

13 Balaam kualkan meuak uan kiniluij akin Balac kintitanka: “Ximokepakanya kampa nanemij, porin Jehová amo nechkaua maj namouan niouj”. 14 Uan nejon takamej mokepkej uan kiluitoj Balac: “Balaam amo kinekik touan ualas”.

15 Sayoj ke Balac oksepa kintitanik seki taixyekananij; okachi miakej katkaj uan okachi uejueyi chiuanimej. 16 Kiitatoj Balaam uan kiluijkej: “Yejua nejin tein techiluij Balac iokichpil Zipor: ‘Nimitstataujtia xiuiki uan maj amo teyi mitstsakuili. 17 Nimitsueyitalis uan nikchiuas tein yeski taman tein tinechtajtanis. Yejua ika xiuiki uan xitajtani maj israelitas kinpano tein amo kuali’”. 18 Uan Balaam kinnankilij itakeualuan Balac: “NoDios Jehová nechiluijya tein moneki nikchiuas. Yejua ika, maski Balac nechmakaskia ichan tein pexontos* de plata uan oro, amo uelis nikpatas nion tepitsin. 19 Sayoj ke namechtataujtia, no ximokauakan nikan nejin youak para maj nikmati toniok nechiluia Jehová”.

20 Uan nejon youak Dios kiluij Balaam: “Komo nejin takamej mitstemokoj, iniuan xiouj. Sayoj ke uelis tikijtos sayoj tein nejua nimitsiluis”. 21 Yejua ika Balaam kualkan meuak, kipejpechtij iburra uan iniuan yajki taixyekananij de Moab.

22 Sayoj ke Dios tel kualanik porin Balaam iniuan yajtoya, uan iángel Jehová moketsato tatajko ojti para maj amo pano. Balaam yaya itech iburra uan ome itakeualuan iuan yayaj. 23 Uan keman burra kiitak iángel Jehová tein ijkatoya tatajko ojti uan maaktoya se machete tein ojkan tenej,* sekopa yasnekik para nalkalakis xiuijtik. Sayoj ke Balaam peuak kiuijuiteki para maj mokepa. 24 Uan iángel Jehová moketsato kampa takopitsyan, tatajko de ome tepamit kampa toktoyaj uvas. 25 Keman burra kiitak iángel Jehová, peuak monetechoua itech tepamit uan kimetsnatskualtij Balaam, uan Balaam oksepa peuak kiuijuiteki.

26 Iángel Jehová yajki okachi taixpan uan moketsato kampa no tatsolan uan amo kanaj uelia se mokepaya. 27 Keman burra kiitak iángel Jehová, motamotak talpan. Yejua ika Balaam kualanik uan oksepa kiuijuitekik ika itopil. 28 Uan Jehová kichiuak maj burra tajtouani, uan burra kiluij Balaam: “Expaya tinechuijuitekik. ¿Toni nimitschiuilij?”. 29 Balaam kinankilij burra: “Tinechpinaujtij. ¡Komo nikpiaskia se machete* nimitsmiktijkaya!”. 30 Uan burra kiluij Balaam: “Ipa nejua nochipa nimitsuikatemi nopanko. ¿Kemansa ijkon nimitschiuani?”. Yejua kinankilij: “¡Amo!”. 31 Ijkuak, Jehová kichiuak maj Balaam kiitani iángel Jehová tein ijkatoya itech ojti uan maaktoya imachete. Uan Balaam nimantsin motankuaketsak uan moixpiloj hasta talpan.

32 Uan iángel Jehová kiluij: “Expaya tikuijuitekik moburra, ¿keyej? Xikita, nejua nimitstsakuiliko, porin tikchiujtok tein amo nikuelita. 33 In burra expa nechitak uan kinekik okseko yas. Komo amo ijkon kichiuaskia, nimitsmiktijkaya uan burra amo nikmiktiskia”. 34 Balaam kiluij iángel Jehová: “Nitajtakoj, porin amo nikmatia ke tejua tinechualchixtoya itech ojti. Komo amo tikuelita tein nikchiujtok, nimokepati”. 35 Uan iángel Jehová kiluij Balaam: “Xiouj iniuan nejon takamej. Sayoj ke uelis tikijtos sayoj tein nejua nimitsiluis”. Yejua ika Balaam yajki iniuan taixyekananij akin Balac kintitanka.

36 Keman Balac kimatik ke Balaam ajsikaya, nimantsin kinamikito itech ueyi xolal tein yetok Moab, tatenoj de Arnón kampa tami Moab. 37 Balac kiluij Balaam: “Nitanauatij maj mitskuitij. ¿Keyej amo tiualajtoya? ¿Timoluia ke amo uelis nimitsueyitalis?”. 38 Balaam kiluij Balac: “Nikan nietokya. Sayoj ke amo uelis nikijtos tein niknekis. Sayoj uelis nikijtos tein Dios nechiluis”.

39 Yejua ika Balaam yajki iuan Balac, uan ajsikej hasta Quiryat-Huzot. 40 Balac kinmiktij kuakuejmej uan ichkamej,* uan kimakak nakat Balaam uan taixyekananij akin iuan yetoyaj. 41 Kualkampa, Balac kikuiteuak Balaam uan kipankixtij hasta Bamot-Baal; desde ompa uelia kinpanitaya nochin israelitas.

23 Uan Balaam kiluij Balac: “Xikchijchiua nikan chikome altares uan xikinmikti chikome kuakuejmej uan chikome ichkaueuetkej”.* 2 Balac niman kichiuak tein Balaam kiluijka. Balac uan Balaam kitemaktijkej se kuakouej uan se ichkaueuet itech sejse altar. 3 Satepan, Balaam kiluij Balac: “Ximokaua nikan kampa chichinaujtokej tapialmej uan nejua niati. Xa Jehová nechiluis teisa. Nimitsiluis tein yeski taman tein nechmatiltis”. Uan Balaam yajki itech se loma.

4 Uan Dios kinojnotsak Balaam, uan Balaam kiluij: “Nikintejtekpanak chikome altares uan niktemaktij se kuakouej uan se ichkaueuet itech sejse altar”. 5 Jehová kiluij Balaam tein monekia kijtos uan kiluij: “Ximokepa kampa yetok Balac uan yejua nejin tein moneki tikijtos”. 6 Yejua ika Balaam mokepak uan kiitak ke Balac ijkatoya tanakastan de kampa chichinaujtoyaj tapialmej. Iuan yetoyaj nochin taixyekananij de Moab. 7 Uan Balaam kitematiltij nejin:

Yejua kijtoj: ‘Xiuiki uan xikintajtanili tein amo kuali ikoneuan Jacob.

Kemaj, xiuiki uan xitajtani maj kintatsakuiltikan ikoneuan Israel’.

 8 Amo uelis nikintajtanilis tein amo kuali akin Dios kintatiochiuijtok.

Amo uelis nitajtanis maj kintatsakuiltikan akin Jehová amo kijtojtok ke kintatsakuiltis.

11 Uan Balac kiluij Balaam: “¿Keyej tinechchiuilij nejin? Nimitsualkuik para xikintajtanili tein amo kuali akin nechkualantiaj uan amo tikchiuak nejon, ta sayoj titajtanik maj kinpano tein kuali”. 12 Yejua kinankilij: “Nimitsiluijya ke sayoj moneki nikijtos tein Jehová nechiluis”.

13 Balac kiluij: “Nimitstataujtia xiouj nouan okseko kampa no uelis tikinitas. Amo tikinitas nochin, sayoj sekin. Xikintajtanili tein amo kuali desde ompa”. 14 Yejua ika kiuikak itech tal kampa motanotsa Zofim, ikuapan Pisgá, uan kichijchiuak chikome altares uan kitemaktij se kuakouej uan se ichkaueuet itech sejse altar. 15 Uan Balaam kiluij Balac: “Ximokaua nikan kampa chichinaujtokej tapialmej uan nejua niouj nepa niknojnotsati Dios”. 16 Jehová kiluij Balaam tein monekia kijtos uan kiluij: “Ximokepa kampa yetok Balac uan yejua nejin tein moneki tikijtos”. 17 Yejua ika Balaam kiajsito Balac uan kiitak ke mochixtoya kampa yetoyaj tapialmej tein chichinaujtoyaj uan taixyekananij de Moab iuan yetoyaj. Balac kitajtanij: “¿Toni kijtoj Jehová?”. 18 Uan Balaam kitematiltij nejin:

“Ximoketsa Balac uan xikaki.

Xinechkaki, iokichpil Zipor.

Yejua nochipa kichiua tein kijtoua,

uan nochipa kichiua tein motenkaua.

22 Dios kinkixtij de Egipto.

Yejua kemej ikuaomiyouan se koujtajkuakouej tein kinpaleuia.

Axkan, keman kinitaskej uelis kijtoskej:

‘¡Xikitakan tein Dios kichiuak!’.

25 Uan Balac kiluij Balaam: “Komo amo ueli tikintajtanilia tein amo kuali, amo no xikintajtanili tein kuali”. 26 Balaam kinankilij Balac: “Ipa nimitsiluijkaya ke nikchiuaskia nochi tein Jehová nechiluiskia”.

27 Balac kiluij Balaam: “Nimitstataujtia, tiouij okseko. Xa ompa Dios kinekisya xikintajtanili tein amo kuali israelitas”. 28 Yejua ika Balac kiuikak Balaam ikuapan tepet Peor, kampa moita Jesimón.* 29 Uan Balaam kiluij Balac: “Xikchijchiua nikan chikome altares uan xikinmikti chikome kuakuejmej uan chikome ichkaueuetkej”. 30 Yejua ika Balac kichiuak nochi tein Balaam kiluijka, uan kitemaktij se kuakouej uan se ichkaueuet itech sejse altar.

24 Keman Balaam kiitak ke Jehová kinekia kintatiochiuis israelitas, amo kitemojok kimatis ox kinpanoskia tein amo kuali. Yejua ika tachiak itech tal kampa amo teyi onkak. 2 Balaam moixajokuik uan kiitak ke israelitas kualtsin xejxeliujtoyaj. Uan Dios kimakak Balaam ichikaualis. 3 Balaam kitematiltij nejin:

10 Uan Balac kualanik iuan Balaam. Yejua ika momatajtatsinij uan kiluij Balaam: “Nimitsnotsak para xikintajtanili tein amo kuali akin nechkualantiaj uan amo tikchiuak nejon, ta expaya sayoj tikintajtanilij tein kuali. 11 Xioujya mochan. Nejua niknekia nimitsueyitalis, sayoj ke Jehová amo kinekik maj nimitsueyitali”.

12 Balaam kiluij Balac: “Ipa nikiniluijkaya takamej akin tikintitanka nejin: 13 ‘Jehová nechiluijya tein moneki nikchiuas, uan maski Balac nechmakaskia ichan tein pexontos* de plata uan oro, amo uelis nikchiuas tein nejua niknekis, yeski kuali oso amo. Sayoj nikijtos tein Jehová nechiluis’. 14 Axkan nimokepati kampa ninemi. Sayoj ke achto xiuiki uan maj nimitsilui tein israelitas namechchiuiliskej satepan”.* 15 Yejua ika Balaam kitematiltij nejin:

20 Keman Balaam kinitak akin kinixmatij kemej amalequitas kisentokak tajtoj:

21 Keman kinitak akin kinixmatij kemej quenitas kisentokak tajtoj:

“Mochan amo teyi kipanoua uan yetok tepani.

22 Sayoj ke aksa* kinchichinos quenitas.*

Amo uejkaua akin nemij Asiria moinuikiliskej”.

23 Uan Balaam kisentokak tajtoj:

“¡Ay! Amo akin uelis makisas keman Dios kichiuas nejin.

Sayoj ke yejua no senkis kiixpoloskej”.

25 Uan Balaam uan Balac moxelojkej uan seseko yajkej.

25 Keman israelitas nemiaj ompa Sitim, peuak auilnemij iniuan siuamej de Moab. 2 Nejon siuamej kinyoleuayaj maj iniuan yakan keman kinmaktiliayaj teisa inindioses. Uan israelitas peuak kikuaj tein kitemaktiayaj uan peuak moixpilouaj ininixpan inindioses. 3 Israelitas no peuak kiueyichiuaj Baal tein kiueyichiuayaj ompa Peor, yejua ika Jehová kualanik iniuan. 4 Jehová kiluij Moisés: “Xikinkuiti nochin taixyekananij akin kichiujkej nejin tajtakol uan xikinkoujpampilo iixpan Jehová para maj nochin kinitakan, uan para maj Jehová amo kualantook iniuan israelitas”. 5 Uan Moisés kiniluij jueces: “Xikinmiktikan nochin takamej akin no kiueyichiujkej Baal ompa Peor”.

6 Sayoj ke mero nejon hora ixkisako se takat israelita iuan se siuat de Madián. Kiuikaya kampa yetoyaj iparientes uan panokej iixtenoj Moisés uan nochin israelitas. Ijkuak, nochin chokatoyaj ikalakyan kaltsin kampa taueyichiuayaj.* 7 Keman Finehás kiitak, nimantsin moketsak uan kikuik se lanza.* Finehás katka iokichpil Eleazar uan iixuiuj tiopixkat Aarón. 8 Uan kalakito itech ikaltsin* nejon takat israelita uan kintokilij lanza nochin omen hasta senpanok. Ijkon kichiuilij takat israelita, uan siuat kitokilij ipoxko.* Nejon hora motsakuilij kokolis* tein kinkuitoya israelitas. 9 Nejon kokolis kinmiktij 24 mil.

10 Uan Jehová kiluij Moisés: 11 “Finehás, iokichpil Eleazar uan iixuiuj tiopixkat Aarón, kichiuak maj amo nikualantook iniuan israelitas. Yejua amo kinkauak maj kiueyichiuakan okse dios, ta sayoj nejua. Yejua ika amo nikintamimiktij israelitas, maski kinamikia maj ijkon nikchiua porin nitanauatia maj sayoj nejua nechueyichiuakan. 12 Yejua ika xikilui ke nimotenkauati se taman iuan para maj kimati ke nechyolpaktia. 13 Nimotenkaua ke yejua uan ikoneuan nochipa yeskij tiopixkamej, porin yejua amo kinkauak israelitas maj kiueyichiuakan okse dios, ta sayoj nejua. Uan kemej kichiuak nejon, tapaleuij maj nikintapojpolui israelitas”.

14 Takat israelita akin kimiktijkej iuan siuat de Madián monotsaya Zimrí, iokichpil Salu. Zimrí katka se taixyekankej de ichankauan Simeón. 15 Uan siuat de Madián akin kimiktijkej monotsaya Cozbí, isiuapil Zur. Zur katka se taixyekankej de se ueyi familia ompa Madián.

16 Satepan Jehová kiluij Moisés: 17 “Xikinmiktikan nochin akin nemij Madián, 18 porin yejuan kuali kitemolijkej keniuj namechkajkayauaskej para xitaueyichiuakan ompa Peor. Uan no kikuikej Cozbí, isiuapil se taixyekankej ompa Madián, para xitajtakokan. Cozbí kimiktijkej itech tonal keman miakej israelitas kinkuik se kokolis porin nantaueyichiujkej ompa Peor”.

26 Satepan ke tamik kokolis,* Jehová kiniluij Moisés uan Eleazar, iokichpil tiopixkat Aarón: 2 “Xikinpouakan nochin israelitas itech sejse ueyi familia. Xikinijkuilokan nochin akin kipiaj 20 xiujmej oso kipanauiajya, akin uelisya yeskij soldados”. 3 Yejua ika, Moisés uan tiopixkat Eleazar kinnojnotskej israelitas itech tal kampa amo teyi onkak ompa Moab, kampa ika panoua ueyiat Jordán, taixpan de Jericó. Kiniluijkej: 4 “Xikinijkuilokan nochin akin kipiaj 20 xiujmej oso kipanauiajya, ijkon kemej Jehová kinauatij Moisés”.

Yejuan nejin ikoneuan Israel akin kiskej de Egipto. 5 Rubén, iokichpil Israel akin tayekanaya; yejuan nejin katkaj ikoneuan Rubén: Hanok, ininuejkaujtat akin kinixmatiaj kemej hanokitas; Palú, ininuejkaujtat paluitas; 6 Hezrón, ininuejkaujtat hezronitas, uan Carmí, ininuejkaujtat carmitas. 7 Yejuan nejin katkaj ikoneuan Rubén, uan kinijkuilojkej 43,730.

8 Iokichpil Palú katka Eliab. 9 Uan iokichpipiluan Eliab katkaj Nemuel, Datán uan Abiram. Yejuan nejin Datán uan Abiram akin kinixtalijkaj para maj kinyolmajxitikan israelitas. Yejuan kinixnamikkej Moisés uan Aarón iniuan akin kipaleuiayaj Coré. Tein melauj, kiixnamikkej Jehová.

10 Nejon tonal takoyonik uan tal kintoloj. Coré mikik iniuan akin kipaleuiayaj keman se tit* kintamij 250 takamej. Tein kinpanok kinnejmachtia oksekin. 11 Sayoj ke, ikoneuan Coré amo mikkej.

12 Yejuan nejin katkaj ikoneuan Simeón uan ininfamilias: Nemuel, ininuejkaujtat akin kinixmatiaj kemej nemuelitas; Jamín, ininuejkaujtat jaminitas; Jakín, ininuejkaujtat jakinitas; 13 Zérah, ininuejkaujtat zerahítas, uan Shaúl, ininuejkaujtat shaulitas. 14 Yejuan nejin katkaj ikoneuan Simeón. Katkaj 22,200.

15 Yejuan nejin katkaj ikoneuan Gad uan ininfamilias: Zefón, ininuejkaujtat akin kinixmatiaj kemej zefonitas; Haguí, ininuejkaujtat haguitas; Suní, ininuejkaujtat sunitas; 16 Ozní, ininuejkaujtat oznitas; Erí, ininuejkaujtat eritas; 17 Arod, ininuejkaujtat aroditas, uan Arelí, ininuejkaujtat arelitas. 18 Yejuan nejin katkaj ikoneuan Gad, uan kinijkuilojkej 40,500.

19 Ikoneuan Judá katkaj Er uan Onán. Sayoj ke Er uan Onán momikilijkej ompa Canaán. 20 Yejuan nejin katkaj ikoneuan Judá uan ininfamilias: Selá, ininuejkaujtat akin kinixmatiaj kemej selanitas; Pérez, ininuejkaujtat perezitas, uan Zérah, ininuejkaujtat zerahítas. 21 Uan yejuan nejin katkaj ikoneuan Pérez: Hezrón, ininuejkaujtat hezronitas, uan Hamul, ininuejkaujtat hamulitas. 22 Yejuan nejin katkaj ikoneuan Judá, uan kinijkuilojkej 76,500.

23 Yejuan nejin katkaj ikoneuan Isacar uan ininfamilias: Tolá, ininuejkaujtat akin kinixmatiaj kemej tolaítas; Puvá, ininuejkaujtat punitas; 24 Jasub, ininuejkaujtat jasubitas, uan Simrón, ininuejkaujtat simronitas. 25 Yejuan nejin katkaj ikoneuan Isacar, uan kinijkuilojkej 64,300.

26 Yejuan nejin katkaj ikoneuan Zabulón uan ininfamilias: Séred, ininuejkaujtat akin kinixmatiaj kemej sereditas; Elón, ininuejkaujtat elonitas, uan Jahleel, ininuejkaujtat jahleelitas. 27 Yejuan nejin katkaj ikoneuan Zabulón, uan kinijkuilojkej 60,500.

28 Ikoneuan José uan ininfamilias katkaj Manasés uan Efraín. 29 Yejuan nejin katkaj ikoneuan Manasés: Makir, ininuejkaujtat akin kinixmatiaj kemej makiritas; Makir katka itat Galaad; Galaad, ininuejkaujtat galaaditas. 30 Yejuan nejin katkaj ikoneuan Galaad: Yézer, ininuejkaujtat yezeritas; Hélec, ininuejkaujtat helequitas; 31 Asriel, ininuejkaujtat asrielitas; Siquem, ininuejkaujtat siquemitas; 32 Semidá, ininuejkaujtat semidaítas, uan Héfer, ininuejkaujtat heferitas. 33 Uan Zelofehad, iokichpil Héfer, amo kinpiak okichpipil, ta sayoj siuapipil. Yejuan monotsayaj: Mahlá, Noá, Hoglá, Milcá uan Tirzá. 34 Yejuan nejin katkaj ikoneuan Manasés, uan kinijkuilojkej 52,700.

35 Yejuan nejin katkaj ikoneuan Efraín uan ininfamilias: Sutélah, ininuejkaujtat akin kinixmatiaj kemej sutelahítas; Béker, ininuejkaujtat bekeritas, uan Tahán, ininuejkaujtat tahanitas. 36 Uan yejua nejin katka iokichpil Sutélah: Erán, ininuejkaujtat eranitas. 37 Yejuan nejin katkaj ikoneuan Efraín, uan kinijkuilojkej 32,500. Yejuan nejin katkaj ikoneuan José uan ininfamilias.

38 Yejuan nejin katkaj ikoneuan Benjamín uan ininfamilias: Bela, ininuejkaujtat akin kinixmatiaj kemej belaítas; Asbel, ininuejkaujtat asbelitas; Ahiram, ininuejkaujtat ahiramitas; 39 Sefufam, ininuejkaujtat sufamitas, uan Hufam, ininuejkaujtat hufamitas. 40 Ikoneuan Bela katkaj Ard uan Naamán: Ard, ininuejkaujtat arditas, uan Naamán, ininuejkaujtat naamitas. 41 Yejuan nejin katkaj ikoneuan Benjamín uan ininfamilias. Kinijkuilojkej 45,600.

42 Yejuan nejin katkaj ikoneuan Dan uan ininfamilias: Suham, ininuejkaujtat akin kinixmatiaj kemej suhamitas. Yejuan nejin katkaj ikoneuan Dan. 43 Nochin ikoneuan Suham akin kinijkuilojkej katkaj 64,400.

44 Yejuan nejin katkaj ikoneuan Aser uan ininfamilias: Imná, ininuejkaujtat akin kinixmatiaj kemej imnitas; Isví ininuejkaujtat isvitas, uan Berías, ininuejkaujtat beritas; 45 Ikoneuan Berías katkaj Héber uan Malkiel: Héber, ininuejkaujtat heberitas, uan Malkiel, ininuejkaujtat malkielitas. 46 Uan isiuapil Aser monotsaya Sérah. 47 Yejuan nejin katkaj ikoneuan Aser, uan kinijkuilojkej 53,400.

48 Yejuan nejin katkaj ikoneuan Neftalí uan ininfamilias: Jahzeel, ininuejkaujtat akin kinixmatiaj kemej jahzeelitas; Guní, ininuejkaujtat gunitas; 49 Jézer, ininuejkaujtat jezeritas, uan Silem, ininuejkaujtat silemitas. 50 Yejuan nejin katkaj ikoneuan Neftalí, uan kinijkuilojkej 45,400.

51 Nochin israelitas akin kinijkuilojkej katkaj seiscientos un mil setecientos treinta.

52 Satepan, Jehová kiluij Moisés: 53 “Moneki kinxejxelouiliskej tal nochin akin ijkuiliujtokej. 54 Kampa okachi miakej ijkuiliujtokej moneki tikinmakas okachi ueyi tal, uan kampa amo miakej, amo semi ueyi. 55 Sayoj ke moneki kitatamotaskej tetsitsin* keman kinxejxelouiliskej tal. Sejse familia moneki kintaxejxelouiliskej kampa kimakakej ininuejkaujtat. 56 Kitatamotaskej tetsitsin para kintaxejxelouiliskej nochin familias, kampa miakej yeskij uan kampa amo”.

57 Yejuan nejin katkaj ikoneuan Leví akin kinijkuilojkej uan ininfamilias: Guersón, ininuejkaujtat akin kinixmatiaj kemej guersonitas; Cohat, ininuejkaujtat cohatitas, uan Merarí, ininuejkaujtat meraritas. 58 Yejuan nejin katkaj ikoneuan Leví: libnitas, hebronitas, mahlitas, musitas uan coreítas.

Uan Cohat katka itat Amram. 59 Uan isiuatsin Amram monotsaya Jokébed. Yejua katka isiuapil Leví, tein kipiak iuan isiuatsin ompa Egipto. Jokébed uan Amram kipiakej Aarón, Moisés uan Míriam. 60 Uan Aarón kipiak Nadab, Abihú, Eleazar uan Itamar. 61 Sayoj ke Nadab uan Abihú mikkej porin amo tapopochuijkej iixpan Jehová kemej yejua tanauatijka.

62 Kinijkuilojkej 23 mil takamej uan okichpipil akin kipiayaj se metsti oso kipanauiayajya. Yejuan amo kinijkuilojkej iniuan okseki israelitas, porin amo kinmakaskiaj nion se tal iniuan.

63 Yejuan nejin nochin israelitas akin Moisés uan tiopixkat Eleazar kinijkuilojkej keman yetoyaj kampa amo teyi onkak ompa Moab, kampa ika panoua ueyiat Jordán, taixpan de Jericó. 64 Sayoj ke amo yetoyaok nion se israelita akin Moisés uan tiopixkat Aarón kijkuilojkaj itech tal kampa tauaktok uan motanotsa Sinaí. 65 Porin Jehová kiyekijtojka: “Mikiskej itech tal kampa tauaktok”. Yejua ika, amo yoltoyaok nion semej de nejon takamej; sayoj Caleb iokichpil Jefuné uan Josué iokichpil Nun.

27 Zelofehad akin katka ichankauj Manasés kinpiaya makuil isiuapipiluan, monotsayaj Mahlá, Noá, Hoglá, Milcá uan Tirzá. Itat Zelofehad katka Héfer uan iueyitat katka Galaad, iokichpil Makir. Itat Makir katka Manasés, iokichpil José. 2 Nejon siuapipil yajkej ikalakyan kaltsin kampa taueyichiuayaj* kinitatoj Moisés, tiopixkat Eleazar, taixyekananij uan nochin israelitas. Uan kijtojkej: 3 “Topaj momikilij keman tinentinemiaj kampa tauaktok uan amo teyi onkak, sayoj ke yejua amo kiixnamikik Jehová iniuan akin mokuikej iuan Coré. Momikilij por itajtakol uan amo kinpiak okichpipil. 4 Tel amo kuali yeskia maj ixpoliui itokay topaj sayoj porin amo kipiak nion se okichpil. Para maj ifamilia kisentoka, xitechmaka se tal kampa tikinmakas iikniuan”. 5 Yejua ika Moisés kiluito Jehová tein kinekiaj nejon siuapipil.

6 Uan Jehová kiluij Moisés nejin: 7 “Tein kijtouaj isiuapipiluan Zelofehad kuali yetok. Xikinmaka tal tein kimakaskiaj Zelofehad kampa kintaxelouiliskej iikniuan. 8 Uan xikinilui israelitas: ‘Komo se takat momikilia uan amo kipiak nion se iokichpil, ital moneki nankikauiliskej isiuapil. 9 Komo nejon takat amo kinpiak siuapipil, uan sayoj kinpia iikniuan takamej, ital nankinmakaskej yejuan. 10 Komo nejon takat amo kinpia iikniuan takamej, ital nankinmakaskej itiojuan, akin iikniuan itat. 11 Uan komo itat amo kinpia iikniuan takamej, nankimakaskej tal se akin okachi ipariente, uan iaxkaya yeski. Nejin tanauatil tein moixtalia moneki kitakamatiskej israelitas, ijkon kemej Jehová kinauatij Moisés’”.

12 Satepan Jehová kiluij Moisés: “Xipankisa itech nejin tepet tein yetok Abarim uan xikita tal tein nikinmakati israelitas. 13 Keman tikitasya, no timomikilis kemej mokniuj Aarón, 14 porin keman israelitas peuak nechnajnankiliaj ompa Zin, namejuan amo nankinekkej nanechtakamatiskej. Namechnauatijka xinechueyitalikan ininixpan israelitas keman namechmakak at ompa Meribá, sayoj ke amo ijkon nankichiujkej. Meribá yetok Cadés, itech tal kampa tauaktok uan motanotsa Zin”.

15 Uan Moisés kiluij Jehová: 16 “Maj Jehová, Dios akin techmaka tonemilis kiixtali se takat. 17 Yejua kinixyekanas israelitas itech nochi, uan yejuan kitojtokaskej* itech nochi tein kichiuaskej. Ijkon, ikoneuan Jehová amo yetoskej kemej ichkamej tein amo akin kinyekpia”. 18 Yejua ika Jehová kiluij Moisés: “Josué iokichpil Nun kuali tekiti. Xiktali momay itech. 19 Xikuika kampa yetok tiopixkat Eleazar uan nochin israelitas, uan moneki tikixtalis ininixpan nochin para maj yejua kinixyekana. 20 Moneki tikauilis se parte de motanauatil para maj nochin israelitas kitakamatikan. 21 Yejua kiitatiuj tiopixkat Eleazar uan tiopixkat kikuis Urim para kimatis tein Jehová kiixtalis. Yejua uan nochin israelitas nochipa tatakamatiskej keman kinnauatiskej teisa”.

22 Uan Moisés kichiuak nochi tein Jehová kinauatijka. Kiuikak Josué kampa yetoya tiopixkat Eleazar uan nochin israelitas, 23 kitalij imauan itech uan kiixtalij kemej taixyekankej, ijkon kemej Jehová kiluijka Moisés.

28 Uan Jehová kiluij Moisés: 2 “Xikinnauati israelitas nejin: ‘Xinechmaktilikan takual, amo nankielkaujtij. Tein nanechchichinouiliskej para maj nikajuiyakmati, moneki nanechmaktiliskej itech tonalmej tein nikixtalij’.

3 ”No xikinilui: ‘Yejua nejin tein nankichichinouiliskej Jehová mojmostaj: ome ichkatsitsin* tein kuali yetoskej uan kipiaskej se xiuit. 4 Se ichkatsin tiktemakas kualkan uan okse keman tapoyaujtosya. 5 Iuan sejse no tiktemakas se kilo harina tein kuali. Nejon harina tikmanelos ika se litro aceite de itakilo olivojkouit. 6 Nejin moneki tikchichinos mojmostaj, ijkon kemej moixtalij itech tepet Sinaí, uan Jehová semi kiajuiyakmatis. 7 Keman tiktemakas sejse ichkatsin, iuan no moneki tiktemaktis se litro vino. Xikteka vino kampa taxeliujtok para tikmaktilis Jehová. 8 Uan okse ichkatsin tiktemakas keman tapoyaujtosya. Iuan no tiktemakas harina uan vino kemej tein tiktemakas kualkan. Tikchichinouilis Jehová uan yejua semi kiajuiyakmatis.

9 ”’Sayoj ke tonal sábado nankitemakaskej ome ichkatsitsin tein kuajkualmej uan kipiaskej se xiuit. No nankitemakaskej ome kilo harina tein kuali uan vino. Nejon harina nankimaneloskej ika aceite. 10 Yejua nejin tein nankichichinouiliskej Dios itech tonal sábado, aparte de tein ipa nankichichinouiliskej mojmostaj uan vino tein iuan nankimaktiliskej.

11 ”’Keman peuas sejse metsti, nankichichinouiliskej Jehová ome kuakuejmej tein yekin moskaltijtokej, se ichkaueuet uan chikome ichkatsitsin tein kuajkualmej uan kipiaskej se xiuit. 12 Iuan sejse tapial no nankitemakaskej harina tein kuali tein nankimaneloskej ika aceite: eyi kilo uan tajko iuan sejse kuakouej, ome kilo iuan ichkaueuet, 13 uan se kilo harina iuan sejse ichkatsin. Nochi nejin nankichichinouiliskej Jehová uan yejua semi kiajuiyakmatis. 14 Iuan sejse tapial no nankitemakaskej vino: ome litro iuan sejse kuakouej, panoua se litro iuan ichkaueuet, uan se litro iuan sejse ichkatsin. Yejua nejin tein moneki nankichichinouiliskej mejmetstika. 15 Aparte de tein ipa nankichichinouiliskej Jehová mojmostaj uan vino tein iuan nankimaktiliskej, no nankitemaktiskej se chivojkonet porin nantajtakolejkej.

16 ”’Itech metsti abib,* tonal 14, mochiuas iluit tein monotsa Pascua para nankiueyitaliskej Jehová. 17 Uan itech tonal 15 de nejon metsti mochiuas se iluit. Chikome tonal nankikuajtoskej pantsin tein amo kipia levadura. 18 Yekinika tonal namosentiliskej para nankiueyichiuaskej Dios. Amo xikchiuakan nion se chikauak tekit. 19 Nankichichinouiliskej Jehová ome kuakuejmej tein yekin moskaltijtokej, se ichkaueuet uan chikome ichkatsitsin tein kipiaskej se xiuit. Moneki nankimaktiliskej tapialmej tein kuajkualmej. 20 Iuan sejse tapial no nankitemakaskej harina tein kuali tein nankimaneloskej ika aceite: eyi kilo uan tajko iuan sejse kuakouej, ome kilo iuan ichkaueuet, 21 uan se kilo harina iuan sejse ichkatsin. 22 No nankimaktiliskej Dios se chivo porin nantajtakolejkej para maj kiixpolo namotajtakoluan. 23 Nankitemakaskej nochi nejin aparte de tein ipa nankichichinouiliaj kualkampa. 24 Chikome tonal, mojmostaj nankitemaktiskej nochi kemej ipa. Nejon takual nankichichinouiliskej Jehová uan yejua semi kiajuiyakmatis. Moneki nankimaktiliskej aparte de tein ipa nankichichinouiliskej mojmostaj uan vino tein iuan nankimaktiliskej. 25 Itech chikometika tonal moneki namosentiliskej para nankiueyichiuaskej Dios. Amo xikchiuakan nion se chikauak tekit.

26 ”’Itech tonal keman nankitemaktiskej tein achto chikauayas, moneki namosentiliskej para nankiueyichiuaskej Jehová. Ijkuak, nankimaktiliskej yankuik trigo. Nejon yeski itech iluit tein nankichiuaskej para peuas nankitekiskejya tein mochiuak.* Amo xikchiuakan nion se chikauak tekit. 27 Nankitemaktiskej ome kuakuejmej tein yekin moskaltijtokej, se ichkaueuet uan chikome ichkatsitsin tein kipiaskej se xiuit. Nejin nankichichinouiliskej Jehová uan yejua semi kiajuiyakmatis. 28 Iuan sejse tapial no nankitemakaskej harina tein kuali tein nankimaneloskej ika aceite: eyi kilo uan tajko iuan sejse kuakouej, ome kilo iuan ichkaueuet, 29 uan se kilo harina iuan sejse ichkatsin. 30 No nankitemaktiskej se chivojkonet para maj Dios kiixpolo namotajtakoluan. 31 Nankitemaktiskej nochi nejin aparte de tein ipa nankichichinouiliskej Dios mojmostaj uan harina tein moneki kiuikas. Tapialmej moneki yeskij kuajkualmej uan keman nankitemaktiskej, no moneki kiuikas vino tein ixyetok.

29 ”’Uan itech tonal keman peuas metsti etanim,* moneki namosentiliskej para nankiueyichiuaskej Dios. Amo xikchiuakan nion se chikauak tekit. Nejon tonal moneki nankipitsaskej trompeta. 2 Nankitemaktiskej se kuakouej tein yekin moskaltijtok, se ichkaueuet* uan chikome ichkatsitsin tein kipiaskej se xiuit. Maj nochin kuajkualmej. Nejin nankichichinouiliskej Jehová uan yejua semi kiajuiyakmatis. 3 Iuan sejse tapial, no nankitemakaskej harina tein kuali tein maneliujtos ika aceite: eyi kilo uan tajko iuan kuakouej, ome kilo iuan ichkaueuet 4 uan se kilo harina iuan sejse ichkatsin. 5 No nankitemaktiskej se chivojkonet porin nantajtakolejkej para maj Dios kiixpolo namotajtakoluan. 6 Nankitemakaskej nejin aparte de tein nankichichinouiliaj mejmetstika iuan harina uan vino tein ixyetok iuan yas. No aparte de tein nankichichinouiliaj mojmostaj iuan harina uan vino tein ixyetok iuan yas. Nejin nankichichinouiliskej Jehová kemej ipa mochiua uan yejua semi kiajuiyakmatis.

7 ”’Uan itech tonal 10 de nejin metsti etanim,* moneki namosentiliskej para nankiueyichiuaskej Dios, uan moneki namotayokoltiskej por namotajtakoluan.* Amo xikchiuakan nion se chikauak tekit. 8 Nankitemaktiskej se kuakouej tein yekin moskaltijtok, se ichkaueuet uan chikome ichkatsitsin tein kipiaskej se xiuit. Maj nochin kuajkualmej. Nejin nankichichinouiliskej Jehová uan yejua semi kiajuiyakmatis. 9 Iuan sejse tapial, no nankitemakaskej harina tein kuali tein maneliujtos ika aceite: eyi kilo uan tajko iuan kuakouej, ome kilo iuan ichkaueuet 10 uan se kilo harina iuan sejse ichkatsin. 11 No nankitemaktiskej se chivojkonet porin nantajtakolejkej. Nochi nejin nankitemakaskej aparte de tein nankitemakaj porin nantajtakolejkej itech nejin tonal keman Dios kiixpolos namotajtakoluan. No aparte de tein nankichichinouiliaj Dios mojmostaj uan harina tein ixyetok iuan yas. Nochi nejon kiuikas vino.

12 ”’Uan itech tonal 15, metsti etanim,* moneki namosentiliskej para nankiueyichiuaskej Dios. Amo xikchiuakan nion se chikauak tekit. Moneki nankichiuaskej nejin iluit para nankiueyitaliskej Jehová chikome tonal. 13 Nankitemaktiskej 13 kuakuejmej tein yekin moskaltijtokej, ome ichkaueuetkej uan 14 ichkatsitsin tein kipiaskej se xiuit. Maj nochin kuajkualmej. Nejin nankichichinouiliskej Jehová uan yejua semi kiajuiyakmatis. 14 Iuan sejse tapial, no nankitemakaskej harina tein kuali tein maneliujtos ika aceite: eyi kilo uan tajko iuan sejse kuakouej, ome kilo iuan sejse ichkaueuet 15 uan se kilo harina iuan sejse ichkatsin. 16 No nankitemaktiskej se chivojkonet porin nantajtakolejkej, aparte de tein nankichichinouiliaj Dios mojmostaj uan harina uan vino tein ixyetok iuan yas.

17 ”’Itech ojpatika tonal nankitemaktiskej 12 kuakuejmej tein yekin moskaltijtokej, ome ichkaueuetkej uan 14 ichkatsitsin tein kipiaskej se xiuit. Maj nochin kuajkualmej. 18 No nankitemakaskej harina uan vino tein ixyetok iuan yas sejse kuakouej, sejse ichkaueuet uan sejse ichkatsin kemej ipa mochiua. 19 No nankitemaktiskej se chivojkonet porin nantajtakolejkej, aparte de tein nankichichinouiliaj Dios mojmostaj uan harina uan vino tein ixyetok iuan yas.

20 ”’Itech expatika tonal nankitemaktiskej 11 kuakuejmej, ome ichkaueuetkej uan 14 ichkatsitsin tein kipiaskej se xiuit. Maj nochin kuajkualmej. 21 No nankitemakaskej harina uan vino tein ixyetok iuan yas sejse kuakouej, sejse ichkaueuet uan sejse ichkatsin kemej ipa mochiua. 22 No nankitemaktiskej se chivo porin nantajtakolejkej, aparte de tein nankichichinouiliaj Dios mojmostaj uan harina uan vino tein ixyetok iuan yas.

23 ”’Itech naujpatika tonal nankitemaktiskej majtakti kuakuejmej, ome ichkaueuetkej uan 14 ichkatsitsin tein kipiaskej se xiuit. Maj nochin kuajkualmej. 24 No nankitemakaskej harina uan vino tein ixyetok iuan yas sejse kuakouej, sejse ichkaueuet uan sejse ichkatsin kemej ipa mochiua. 25 No nankitemaktiskej se chivojkonet porin nantajtakolejkej, aparte de tein nankichichinouiliaj Dios mojmostaj uan harina uan vino tein ixyetok iuan yas.

26 ”’Itech makuiltika tonal nankitemaktiskej chiknaui kuakuejmej, ome ichkaueuetkej uan 14 ichkatsitsin tein kipiaskej se xiuit. Maj nochin kuajkualmej. 27 No nankitemakaskej harina uan vino tein ixyetok iuan yas sejse kuakouej, sejse ichkaueuet uan sejse ichkatsin kemej ipa mochiua. 28 No nankitemaktiskej se chivo porin nantajtakolejkej, aparte de tein nankichichinouiliaj Dios mojmostaj uan harina uan vino tein ixyetok iuan yas.

29 ”’Itech chikuasentika tonal nankitemaktiskej chikueyi kuakuejmej, ome ichkaueuetkej uan 14 ichkatsitsin tein kipiaskej se xiuit. Maj nochin kuajkualmej. 30 No nankitemakaskej harina uan vino tein ixyetok iuan yas sejse kuakouej, sejse ichkaueuet uan sejse ichkatsin kemej ipa mochiua. 31 No nankitemaktiskej se chivo porin nantajtakolejkej, aparte de tein nankichichinouiliaj Dios mojmostaj uan harina uan vino tein ixyetok iuan yas.

32 ”’Uan itech chikometika tonal nankitemaktiskej chikome kuakuejmej, ome ichkaueuetkej uan 14 ichkatsitsin tein kipiaskej se xiuit. Maj nochin kuajkualmej. 33 No nankitemakaskej harina uan vino tein ixyetok iuan yas sejse kuakouej, sejse ichkaueuet uan sejse ichkatsin kemej ipa mochiua. 34 No nankitemaktiskej se chivo porin nantajtakolejkej, aparte de tein nankichichinouiliaj Dios mojmostaj uan harina uan vino tein ixyetok iuan yas.

35 ”’Itech chikueyitika tonal moneki namosentiliskej para nankiueyichiuaskej Dios. Amo xikchiuakan nion se chikauak tekit. 36 Nankitemaktiskej se kuakouej, se ichkaueuet uan chikome ichkatsitsin tein kipiaskej se xiuit. Maj nochin kuajkualmej. Nejin nankichichinouiliskej Jehová uan yejua semi kiajuiyakmatis. 37 No nankitemakaskej harina uan vino tein ixyetok iuan yas kuakouej, ichkaueuet uan sejse ichkatsin kemej ipa mochiua. 38 No nankitemaktiskej se chivo porin nantajtakolejkej, aparte de tein nankichichinouiliaj Dios mojmostaj uan harina uan vino tein ixyetok iuan yas.

39 ”’Yejua nejin tein moneki nankimaktiliskej Jehová itech iluimej tein namechiluij xikchiuakan. No nankimaktiliskej tapialmej para nankichichinouiliskej oso para iuan nansentakuaskej* uan harina uan vino. Uelis yeski porin namotenkauaj teisa oso sayoj porin nankinekij nankitayokoliskej’”. 40 Moisés kiniluij israelitas nochi tein Jehová kinauatijka.

30 Uan Moisés kiniluij takamej akin kinixyekanayaj uejueyi kalyetonij israelitas: “Yejua nejin tein Jehová tanauatij. 2 Komo se takat motenkaua teisa iuan Jehová oso kiyekijtoua iixpan ke amo kichiuas teisa, maj amo motenkepa. Moneki kichiuas nochi tein motenkauak.

3 ”Yejua nejin tein moneki mochiuas komo se ichpoch nemiok iuan itat uan motenkaua teisa iuan Jehová oso motenkaua ke amo kichiuas seki taman. 4 Komo itat kimati nejon uan amo teyi kiluia, moneki kichiuas nochi tein motenkauak. 5 Sayoj ke komo itech tonal keman itat kimati, kiluia maj amo kichiuaok tein kijtoj, amo monekisok kichiuas. Jehová kitapojpoluis porin itat amo kikauak maj kichiua tein motenkaujka.

6 ”Yejua nejin tein moneki mochiuas komo nejon ichpoch motenkauak teisa oso amo kiyeknemilij tein motenkauak keman iseltiok katka. Komo monamiktia 7 uan itakauj amo teyi kiluia itech tonal keman kimati nejon, moneki kichiuas nochi tein motenkauak. 8 Sayoj ke komo itakauj kiluia maj amo kichiua tein kijtoj itech tonal keman kimati, amo monekisok kichiuas, uan Jehová kitapojpoluis.

9 ”Sayoj ke komo se siuatsin akin momikilijya itakauj oso kikaujkej motenkaua teisa, yejua kemaj moneki kichiuas nochi tein motenkauak.

10 ”Uan yejua nejin tein moneki mochiuas komo se siuatsin akin monamiktijya motenkaua teisa oso motenkaua ke amo kichiuas seki taman. 11 Komo itakauj kimati sayoj ke amo teyi kiluia uan kikaua maj kichiua tein kijtoj, moneki kichiuas nochi tein motenkauak. 12 Sayoj ke komo itech tonal keman itakauj kimati, kiluia maj amo kichiua tein kijtoj, amo monekisok kichiuas tein motenkauak, uan Jehová kitapojpoluis. 13 Takat moneki kijtos ox kikauas maj isiuauj kichiua tein yeski taman tein motenkauak. 14 Sayoj ke komo panouaj tonalmej uan takat amo teyi kijtoua, kijtosneki ke kikaua maj isiuauj kichiua nochi tein motenkauak. Kemej amo teyi kijtoj keman kimatik, kinextia ke kikaua maj kichiua. 15 Sayoj ke komo panouaj seki tonalmej uan satepan kiluia isiuauj maj amo kichiua tein motenkauak, siuatsin motajtakolmakas, sayoj ke takat taxtauas porin amo kikauak maj isiuauj kichiua tein motenkaujka.

16 ”Yejua nejin tein moneki mochiuas keman se siuatsin motenkauas teisa, yeski se siuatsin akin nemiok iuan itat oso akin kipia itakauj. Yejua nejin tein Jehová kinauatij Moisés”.

31 Uan Jehová kiluij Moisés: 2 “Xikintaxtaualti akin kayomej Madián por nochi tein kinchiuilijkej israelitas. Satepan timomikilis uan mitstokaskej kemej mouejkaujtatuan”.

3 Yejua ika Moisés kiniluij israelitas: “Xikinmajmakakan seki takamej nochi tein monekis para tateuiskej. Moneki nankinteuiskej akin kayomej Madián para namomakepaskej ijkon kemej Jehová tanauatij. 4 De nochin uejueyi kalyetonij monekis nankintitaniskej mijmil takamej”. 5 Yejua ika, kinsentilijkej 12 mil takamej israelitas akin yaskiaj tateuitiuij. Itech sejse ueyi kalyetonij kiskej mil.

6 Uan Moisés kintitanik maj tateuitij nejon 12 mil takamej. Iniuan yaya tiopixkat Finehás, iokichpil Eleazar. Yejua kiuikaya tein mokuia kampa Dios taxeloj uan trompetas para ika tanauatiskej teisa. 7 Uan yejuan kinteuitoj akin nemiaj Madián, ijkon kemej Jehová kinauatijka Moisés, uan kinmiktijkej nochin takamej. 8 No kinmiktijkej makuil takamej akin tekiuajtiaj Madián: Eví, Réquem, Zur, Hur uan Reba. Uan no kimiktijkej Balaam iokichpil Beor. 9 Sayoj ke israelitas kinkitskijkej konemej uan siuamej de Madián uan moinuikilijkej. Uan no, moinkuilijkej inintapialuan uan nochi tein kipiayaj. 10 Kintikuiltijkej nochin uejueyi xolalmej kampa chanchiuayaj uan no tatikuiltijkej kampa mokaltalijtoyaj. 11 Kikuiteujkej nochi tein kipiayaj uan amo teyi kikaujkej, kinkuiteujkej tapialmej uan akin mokaujkaj. 12 Uan nochi nejon kiuikilijkej Moisés, tiopixkat Eleazar uan nochin israelitas. Yejuan yetoyaj itech se tal kampa amo teyi onkak ompa Moab, kampa ika panoua ueyiat Jordán, taixpan de Jericó.

13 Uan Moisés, tiopixkat Eleazar uan nochin taixyekananij israelitas kinnamikitoj nepakatsin de kampa mokaltalijtoyaj. 14 Sayoj ke Moisés tel kualanik iniuan takamej akin kinixyekanayaj mil soldados uan akin kinixyekanayaj cien. 15 Moisés kiniluij: “¿Keyej amo nankinmiktijkej siuamej? 16 Nejon siuamej kitajtolkakkej Balaam, uan kichiujkej maj israelitas kiixnamikinij Jehová uan maj kiueyichiuanij dios tein kiueyichiuaj ompa Peor. Nejon kichiuak maj Jehová kinkokoliskuilti nochin israelitas. 17 Yejua ika moneki nankinmiktiskej nochin okichpipil, uan no xikinmiktikan nochin siuamej akin motekanij iuan se takat. 18 Sayoj ke amo xikinmiktikan siuapipil akin amo motekanij iuan se takat. 19 Uan namejuan moneki nanyetoskej chikome tonal kampa amo kaltaj. Akin temiktij uan akin kikitskij se miket moneki mochipauas uiptika uan chikometika tonal satepan. Moneki nankichiuaskej nejon namejuan uan siuapipil akin nankinkuitoj. 20 Uan moneki nankichipauaskej tasal, tein yeski taman tachijchiuj ika ipankuetaxyo se tapial, nochi tein chijchiujtos ika chivojtsonti uan ika kouit”.

21 Uan tiopixkat Eleazar kiniluij soldados akin tateuitoj: “Yejua nejin tein Jehová kinauatij Moisés: 22 ‘Sayoj oro, plata, cobre, tepos, estaño uan plomo,* 23 nochi tein amo tata, moneki nankitikotaliskej uan chipauayas. Sayoj ke no moneki nankichipauaskej ika at tein mokui para maj Dios kiita ke teisa chipauak. Nochi tein tata moneki nankipakaskej ika nejon at. 24 Uan itech chikometika tonal moneki nankipakaskej namotasal uan nanchipaujkejya nanyeskij. Satepan uelis nanemiskejya iniuan nochin’”.

25 Uan Jehová kiluij Moisés nejin: 26 “Xikijkuilo nochi tein kikuitoj. No xikinijkuilo siuapipil uan tapialmej. Maj mitspaleui tiopixkat Eleazar uan akin taixyekanaj itech uejueyi familias. 27 Xiktajkoxelo tein kikuitoj: tajko xikinmaka soldados uan tajko israelitas. 28 De tein tikinmakas soldados akin tateuitoj, moneki tikinkuis seki siuapipil uan tapialmej kemej impuesto para Jehová. Xikinxejxelo de a 500, uan de sejse grupo tikuis se siuapil, se kuakouej, se burro uan se ichkat* oso chivo. 29 Tikuis nejon uan tikmakas tiopixkat Eleazar para maj kimaktili Jehová. 30 De tein tikinmakas israelitas, no moneki tikinkuis seki siuapipil uan tapialmej uan tikinmakas levitas, akin tekitij itech kaltsin kampa kiueyichiuaj Jehová.* Xikinxejxelo de a 50, uan de sejse grupo tikuis se siuapil, se kuakouej, se burro, se ichkat oso chivo uan se den okseki tapialmej”.

31 Moisés uan tiopixkat Eleazar kichiujkej nochi tein Jehová kinauatijka Moisés. 32 Uan tein mokauak de nochi tein kikuitoj akin tateuitoj katka 675 mil ichkamej uan chivos, 33 72 mil kuakuejmej 34 uan 61 mil burros. 35 Siuapipil akin amo motektoyaj iuan se takat katkaj 32 mil. 36 Soldados kinmakakej trescientos treinta y siete mil quinientos ichkamej uan chivos. 37 Uan kixelouilijkej Jehová kemej impuesto 675 ichkamej uan chivos. 38 Onkayaj 36 mil kuakuejmej, uan 72 kixelouilijkej Jehová. 39 No onkayaj 30,500 burros, uan 61 kixelouilijkej Jehová. 40 Uan onkayaj 16 mil siuapipil, uan 32 kixelouilijkej Jehová. 41 Uan Moisés kimakak tiopixkat Eleazar nochi nejon para maj kimaktili Jehová, ijkon kemej Jehová kinauatijka Moisés.

42 Uan inintajko israelitas tein Moisés kinxelouilij para kinmakas, 43 katkaj trescientos treinta y siete mil quinientos ichkamej uan chivos, 44 36 mil kuakuejmej, 45 30,500 burros, 46 uan 16 mil siuapipil. 47 De nochi nejon, Moisés kinxejxeloj de a 50, uan de sejse grupo kikuik se siuapil uan se tapial. Nochi nejon kinmakak levitas, akin tekitiaj itech kaltsin kampa kiueyichiuayaj Jehová. Moisés kichiuak ijkon kemej Jehová kinauatijka.

48 Uan takamej akin kinixyekanayaj soldados, akin kinixyekanayaj mil uan akin kinixyekanayaj cien kiitatoj Moisés 49 uan kiluijkej: “Tejuatsin, tikinpoujkejya soldados akin tomako yetokej uan amo poliui nion se. 50 Yejua ika xitechkaua maj tikmaktilikan Jehová tein timokuilitoj: tein tachijchiuj ika oro, pulseras tein motaliliaj ininmako uan ininmetsko, anillos,* pipilolmej uan okseki taman tein no motaliliaj. Tiknekij tikchiuaskej nejon para maj Jehová kiixpolo totajtakoluan”.

51 Uan Moisés uan tiopixkat Eleazar kikuikej nochi tein tachijchiuj ika oro tein kinuikilijkej. 52 Nochi in oro tein nejon taixyekananij kiuikakej para kimaktiliskej Jehová ajsik 191 kilos.* 53 Sejse soldado mokuilito miak taman kampa tateuito. 54 Moisés uan tiopixkat Eleazar kikuikej oro tein kinuikilijkej akin kinixyekanayaj mil uan cien soldados. Uan kikalakitoj itech kaltsin kampa taueyichiuayaj para maj israelitas kielnamikikan keniuj Jehová kinpaleuij.

32 Ikoneuan Rubén uan ikoneuan Gad kinpiayaj tel miak tapialmej. Yejuan kiitakej ke talmej tein pouiaj Jazer uan Galaad katkaj kuali talmej para kinpiaskej tapialmej. 2 Yejua ika kinitatoj Moisés, tiopixkat Eleazar uan taixyekananij israelitas uan kijtojkej: 3 “Tikitakej talmej tein pouij Atarot, Dibón, Jazer, Nimrá, Hesbón, Elealé, Sebam, Nebo uan Beón. 4 Nejon talmej tein Jehová kitekuilij para techmakas, kuali talmej para tikinpiaskej totapialuan, uan tejuan tikinpiaj miak tapialmej”. 5 Uan no kijtojkej: “Komo tikita ke kuali yetok, xitanauati maj techinmakakan nejin talmej. Xitechkaua maj timokauakan nikampa den ueyiat Jordán”.

6 Uan Moisés kiniluij ikoneuan Gad uan ikoneuan Rubén: “¿Nankinekij maj namokniuan tateuitij uan namejuan nikan namokauasnekij? 7 ¿Keyej nankinmojmoujtiaj israelitas para maj amo nalpanokan itech tal tein Jehová kinmakati? 8 Yejua nejon tein kichiujkej namotatuan keman tietoyaj Cadés-Barnea uan nikintitanik maj tachiatij itech nejon tal. 9 Keman pankiskej uan ajsikej itech atauit* tein monotsa Escol uan kiitakej tal, kinmojmoujtijkej israelitas para maj amo kalakikan itech tal tein Jehová yaya kinmakati. 10 Nejon tonal Jehová tel kualanik, yejua ika kiyekijtoj: 11 ‘Nochin akin kipiaj 20 xiujmej oso kipanauiajya uan kiskej de Egipto amo kiitaskej tal tein nikinyekiluij ke nikinmakas Abrahán, Isaac uan Jacob, porin amo senkis nechtakamatinij. 12 Kiitaskej nejon tal sayoj Caleb, iokichpil Jefuné ikoneuj Quenaz, uan Josué iokichpil Nun, porin yejuan senkis kitakamatinij Jehová’. 13 Uan Jehová tel kualanik iniuan israelitas, yejua ika kichiuak maj nentinemikan 40 xiujmej itech tal kampa tauaktok uan amo teyi onkak. Nentinenkej ompa hasta ke tankej nochin akin kichiujkaj tein Jehová kiita ke amo kuali. 14 Namejuan nantajtakolchiuanij, nankichiujtokej tein kichiujkej namotatuan, yejua ika Jehová okachiok kualani iniuan israelitas. 15 Komo namejuan nankikauaj, xikyekmatikan ke yejua oksepa namechkauas itech tal kampa tauaktok uan amo teyi onkak, uan nankichiuaskej maj nochin mikikan”.

16 Satepan, yejuan kiitatoj uan kiluijkej: “Xitechkaua maj tikinchijchiuakan corralmej de tet para totapialuan uan uejueyi xolalmej para tokoneuan. 17 Sayoj ke tejuan tikuikaskej tein ika titateuiaj uan tikinyekantiaskej israelitas hasta tikinajxitiskej kampa nemiskej. Sayoj ke tokoneuan mokauaskej itech uejueyi xolalmej kampa tatsaktok ika tepamit, uan ompa amo teyi kinchiuiliskej. 18 Amo timokepaskej tochan hasta maj nochin israelitas kipiakanya inintal. 19 Tejuan amo techmakaskej nion se tal ne oksekopa den ueyiat Jordán kampa yejuan kinmakaskej, porin ipa tikpiaskejya nikan”.

20 Moisés kinnankilij: “Komo ijkon, xikchiuakan nejin: Xikuikan tein ika nantateuiaj ijkon kemej Jehová kijtoj, 21 uan xikpanauikan ueyiat Jordán iixpan Jehová, uan yejua kinkixtis akin kitauelitaj. 22 Namejuan nankintakuiliskej akin ompa nemij porin Jehová namechpaleuis. Keman nankichiuaskej nejon, uelis namokepaskejya uan iixpan Jehová uan israelitas amo teyi nantauikaskejok. Uan nejin tal yeski namoaxka porin Jehová namechmakas. 23 Sayoj ke komo amo nankichiuaj nejon, nankiixnamiktoskej Jehová. Uan xikyekmatikan ke nantaxtauaskej por nejon tajtakol. 24 Uelis nankinchijchiuaskej uejueyi xolalmej para namokoneuan uan corralmej para namotapialuan, sayoj ke moneki nankichiuaskej tein namotenkaujkej”.

25 Ikoneuan Gad uan ikoneuan Rubén kiluijkej Moisés: “Tikchiuaskej ijkon kemej titechnauatia tejuatsin. 26 Tokoneuan, tosiuauan uan totapialuan mokauaskej nepa itech uejueyi xolalmej tein pouij Galaad, 27 sayoj ke nochin takamej tipanoskej oksekopa para titateuiskej namouan iixpan Jehová, ijkon kemej tikijtoua tejuatsin”.

28 Uan Moisés kiniluij tein monekia kichiuaskej tiopixkat Eleazar, Josué iokichpil Nun uan akin kinixyekanayaj uejueyi kalyetonij israelitas. 29 Moisés kiniluij: “Komo nochin takamej akin ikoneuan Gad uan ikoneuan Rubén kipanauiaj ueyiat Jordán namouan, tateuiaj iixpan Jehová uan nankintakuiliaj akin ompa nemij, moneki nankinmakaskej tal tein poui Galaad. 30 Sayoj ke komo yejuan amo youij namouan, monekis mokaltaliskej namouan itech tal tein poui Canaán”.

31 Uan ikoneuan Gad uan ikoneuan Rubén tanankilijkej: “Tikchiuaskej tein Jehová technauatia. 32 Tikuiskej tein ika titateuiskej uan tikpanauiskej ueyiat Jordán iixpan Jehová hasta tiajsiskej Canaán. Sayoj ke tal tein techmakaskej yetos itech nejin lado”. 33 Yejua ika Moisés kinmakak tal tein kinkuilijkaj amorreos kampa tekiuajtia Sehón uan tal tein poui Basán kampa tekiuajtia Og. Kinmakak ikoneuan Gad, ikoneuan Rubén uan seki* ikoneuan Manasés, iokichpil José. Kinmakak nochi nejon tal uan uejueyi xolalmej uan xolaltsitsin tein ompa pouiaj.

34 Uan ikoneuan Gad kinchijchiujkej* uejueyi xolalmej Dibón, Atarot, Aroer, 35 Atrot-Sofán, Jazer, Jogbehá, 36 Bet-Nimrá uan Bet-Harán. Kuali tatsakkej ika tepamit. No kinchijchiujkej corralmej de tet para inintapialuan. 37 Uan ikoneuan Rubén kinchijchiujkej uejueyi xolalmej Hesbón, Elealé, Quiryataim, 38 Nebo uan Baal-Meón (tein kinpatilijkej inintokay), uan no Sibmá. Yejuan peuak kintaliliaj okseki tokayit uejueyi xolalmej tein kinyekchijchiujkej.

39 Ikoneuan Makir iokichpil Manasés, kinteuitoj akin nemiaj Galaad uan kintakuilijkej, uan kinkixtijkej amorreos. 40 Yejua ika Moisés kinmakak ikoneuan Makir tal tein poui Galaad uan ompa mokaltalijkej. 41 Uan Jaír iokichpil Manasés kinteuito uan kintakuilij amorreos akin nemiaj itech xolaltsitsin, uan peuak tatokaytia Havot-Jaír.* 42 Uan Nóbah kinteuito uan kintakuilij akin nemiaj Quenat uan nochin xolaltsitsin tein ompa pouiaj, uan tatokaytij Nóbah kemej yejua monotsaya.

33 Nikan moijtoua kani panotiajkej israelitas satepan ke kiskej de Egipto. Kualtsin xejxeliujtiayaj uan kinixyekanayaj Moisés uan Aarón. 2 Moisés kijkuilojtiaya kani kisteuayaj ijkon kemej Jehová kinauatiaya. Nikan moijtoua kani kisayaj uan kani ajsiaj. 3 Kiskej de Ramesés itech metsti abib,* tonal 15. Se tonal satepan ke mochiuak iluit tein monotsa Pascua, israelitas kiskej de Egipto ininixtenoj akin ompa nemiaj uan amo teyi moluiayaj. 4 Ijkuak, akin nemiaj Egipto kintoktoyaj ininkoneuan akin tayekanayaj, akin Jehová kinmiktijka. Jehová kinpinaujtijka inindioses.

5 Israelitas kiskej de Ramesés uan mokaujtikiskej Sucot. 6 Uan kiskej de Sucot uan mokaujtikiskej Ezam, kampa peua tal kampa tauaktok. 7 Kiskej de Ezam, mokepkej uan yajkej para ajsiskej Pihahirot, desde kampa uelia kiitayaj Baal-Zefón, uan mokaujtikiskej amo uejka de Migdol. 8 Satepan kiskej de Pihahirot, kipanauijkej mar uan yajkej kampa tauaktok. Nejnenkej eyi tonal kampa motanotsa Ezam uan mokaujtikiskej Mará.

9 Kiskej de Mará uan ajsikej Elim. Ompa Elim onkaya 12 ameyalmej uan 70 palmajkoujmej, yejua ika ompa mokaujkej. 10 Uan kiskej de Elim uan mokaujtikiskej tanakastan den mar Rojo. 11 Satepan yajkej de ompa uan mokaujtikiskej itech tal kampa tauaktok uan motanotsa Sin. 12 Kiskej de ompa uan mokaujtikiskej Dofcá. 13 Satepan kiskej de Dofcá uan mokaujtikiskej Alús. 14 Kiskej de Alús uan mokaujtikiskej Refidim, kampa amo onkaya at para tayiskej. 15 Satepan kiskej de Refidim uan mokaujtikiskej itech tal kampa tauaktok uan motanotsa Sinaí.

16 Kiskej de Sinaí uan mokaujtikiskej Quibrot-Hataavá. 17 Kiskej de Quibrot-Hataavá uan mokaujtikiskej Hazerot. 18 Satepan kiskej de Hazerot uan mokaujtikiskej Ritmá. 19 Uan kiskej de Ritmá uan mokaujtikiskej Rimón-Pérez. 20 Kiskej de Rimón-Pérez uan mokaujtikiskej Libná. 21 Kiskej de Libná uan mokaujtikiskej Risá. 22 Satepan kiskej de Risá uan mokaujtikiskej Quehelatá. 23 Uan kiskej de Quehelatá uan mokaujtikiskej itech tepet Séfer.

24 Satepan kiskej den tepet Séfer uan mokaujtikiskej Haradá. 25 Kiskej de Haradá uan mokaujtikiskej Maquelot. 26 Uan kiskej de Maquelot uan mokaujtikiskej Táhat. 27 Satepan kiskej de Táhat uan mokaujtikiskej Taré. 28 Kiskej de Taré uan mokaujtikiskej Mitcá. 29 Satepan kiskej de Mitcá uan mokaujtikiskej Hasmoná. 30 Kiskej de Hasmoná uan mokaujtikiskej Moserot. 31 Uan kiskej de Moserot uan mokaujtikiskej Bene-Jaacán. 32 Kiskej de Bene-Jaacán uan mokaujtikiskej Hor-Haguidgad. 33 Uan kiskej de Hor-Haguidgad uan mokaujtikiskej Jotbatá. 34 Satepan kiskej de Jotbatá uan mokaujtikiskej Abroná. 35 Kiskej de Abroná uan mokaujtikiskej Ezión-Guéber. 36 Uan kiskej de Ezión-Guéber uan mokaujtikiskej itech tal kampa tauaktok uan motanotsa Zin, ompa Cadés.

37 Satepan kiskej de Cadés uan mokaujtikiskej itech tepet Hor, tein yetok tatenoj de Edom. 38 Uan tiopixkat Aarón pankisak itech tepet Hor porin Jehová ijkon kinauatijka uan ompa momikilij. Nejon panok 40 xiujmej satepan ke israelitas kiskej de Egipto, itech tonal keman peua metsti ab.* 39 Aarón kipiaya 123 xiujmej keman momikilij itech tepet Hor.

40 Tekiuaj de Canaán, akin nemia Négueb uan taixyekanaya ompa Arad kimatik ke israelitas ajsikaj ompa.

41 Satepan israelitas kiskej de tepet Hor uan mokaujtikiskej Zalmoná. 42 Kiskej de Zalmoná uan mokaujtikiskej Punón. 43 Uan kiskej de Punón uan mokaujtikiskej Obot. 44 Kiskej de Obot uan mokaujtikiskej Iyé-Abarim, tein yetok tatenoj de Moab. 45 Satepan kiskej de Iyim uan mokaujtikiskej Dibón-Gad. 46 Kiskej de Dibón-Gad uan mokaujtikiskej Almón-Diblataim. 47 Uan kiskej de Almón-Diblataim uan mokaujtikiskej kampa yetokej tepemej ompa Abarim, taixpan de Nebo. 48 Satepan kiskej de ompa uan mokaujtikiskej itech se tal kampa amo teyi onkak ompa Moab, kampa ika panoua ueyiat Jordán, taixpan de Jericó. 49 Mokaujtikiskej tatenoj den ueyiat Jordán. Kinkejketskej ininkaltsitsin desde Bet-Jesimot hasta Abel-Sitim, itech se tal kampa amo teyi onkak ompa Moab.

50 Keman yetoyaj itech tal kampa amo teyi onkak ompa Moab, kampa ika panoua ueyiat Jordán, taixpan de Jericó, Jehová kiluij Moisés: 51 “Xikinilui israelitas: ‘Nankipanauitij ueyiat Jordán uan nanajsitij itech tal tein poui Canaán. 52 Moneki nankinkixtiskej akin ompa nemij uan nankitatapatsaskej temej kampa chijchiujtok tein kiueyichiuaj. No moneki nankinixpoloskej nochi inintatadiosuan de tepos uan moneki nantauejueloskej kampa taueyichiuaj. 53 Nankikuiskej nejon tal uan ompa nanemiskej, porin xikyekmatikan ke namechmakas nejon tal. 54 Keman nankinxejxelouiliskej tal nochin familias, moneki nankitatamotaskej tetsitsin.* Kampa okachi miakej, moneki nankinmakaskej okachi ueyi tal uan kampa amo miakej, amo semi ueyi. Nejon tetsitsin kinextiskej kani kintocaros. Nochin namechxejxelouiliskej tal kampa kimakaskej namouejkaujtat.

55 ”’Sayoj ke komo amo nankinkixtiaj nochin akin ompa nemij, akin mokauaskej yeskij kemej tajsoltsin itech namoixtololo uan kemej uitsti tein namechkokojtos. Yejuan namechkuejmolojtoskej kampa nanemiskej. 56 Uan namechchiuilis namejuan tein niknemilijka nikinchiuilis yejuan’”.

34 Uan Jehová oksepa iuan tajtoj Moisés uan kiluij: 2 “Xikinnauati israelitas nejin: ‘Keman nanajsiskejya itech tal tein poui Canaán, nochi nejin tal yeski namoaxka, uan yejua nejin talmej tein iuan monamikis.

3 ”’Tanikopa* peuas desde tal kampa tauaktok uan motanotsa Zin, tein yetok tanakastan de Edom. Kampa ika ualkisa tonaltsin, namotal peuas kampa tami mar Salado.* 4 Temotias uan panos tanikopa* den ojti de Acrabim tein pankisa, kisentokas hasta Zin uan ajsis hasta tanikopa de Cadés-Barnea. Kisentokas hasta Hazar-Addar uan ajsis hasta Azmón. 5 De ompa yas hasta atauit* de Egipto uan tamitiuj hasta mar Grande.*

6 ”’Kampa ika pankalaki tonaltsin, namotal tamis sentatenoj den mar Grande.

7 ”’Ajkokopa* namotal peuas desde mar Grande hasta tepet Hor. 8 Den tepet Hor kisentokas hasta Lebó-Hamat* uan ajsitiuj hasta Zedad. 9 Uan kisentokas hasta Zifrón uan tamitiuj hasta Hazar-Enán. Nikan tamis namotal ajkokopa.

10 ”’Kampa ika ualkisa tonaltsin, namotal peuas desde Hazar-Enán hasta Sefam. 11 Kisentokas desde Sefam hasta Riblá, tein mokaua tanakastan de Ain, kampa ika ualkisa tonaltsin. De ompa temos sentatenoj den mar de Kinéret.* 12 Kisentokas hasta ueyiat Jordán uan tamitiuj hasta mar Salado. Yejua nejin yeski nochi namotal uan hasta kampa ajsis’”.

13 Yejua ika Moisés kinnauatij israelitas nejin: “Yejua nejin tal tein Jehová tanauatij maj kinmakakan akin pouij itech chiknaui uejueyi kalyetonij uan seki* ikoneuan Manasés. Nankitatamotaskej tetsitsin* para namoxejxelouiliskej. 14 Porin nochin ikoneuan Rubén uan nochin ikoneuan Gad uan seki ikoneuan Manasés kipiajya inintal 15 nikampa den ueyiat Jordán, tanakastan de Jericó, kampa ika ualkisa tonaltsin”.

16 Jehová oksepa iuan tajtoj Moisés uan kiluij: 17 “Tiopixkat Eleazar uan Josué iokichpil Nun namechxejxelouiliskej namotal. 18 Uan namechpaleuis se taixyekankej itech sejse ueyi kalyetonij para nankixejxeloskej tal. 19 Yejua nejin inintokay nejon taixyekananij: Caleb iokichpil Jefuné, akin kinixyekana ikoneuan Judá; 20 Semuel iokichpil Amihud, akin kinixyekana ikoneuan Simeón; 21 Elidad iokichpil Kislón, akin kinixyekana ikoneuan Benjamín; 22 Buquí iokichpil Joglí, akin kinixyekana ikoneuan Dan; 23 Haniel iokichpil Efod, akin kinixyekana ikoneuan Manasés, iokichpil José; 24 Quemuel iokichpil Siftán, akin kinixyekana ikoneuan Efraín, okse iokichpil José; 25 Elizafán iokichpil Parnac, akin kinixyekana ikoneuan Zabulón; 26 Paltiel iokichpil Azán, akin kinixyekana ikoneuan Isacar; 27 Ahihud iokichpil Selomí, akin kinixyekana ikoneuan Aser, 28 uan Pedahel iokichpil Amihud, akin kinixyekana ikoneuan Neftalí”. 29 Yejuan nejin takamej akin Jehová kinnauatij maj kinxejxelouilikan israelitas tal tein poui Canaán.

35 Keman yetoyaj itech tal kampa amo teyi onkak ompa Moab, kampa ika panoua ueyiat Jordán, taixpan de Jericó, Jehová no kiluij Moisés: 2 “Xikinilui israelitas ke keman kinmakaskej inintal, moneki kinmakaskej levitas seki uejueyi xolalmej kampa uelis nemiskej. No moneki kinmakaskej ixtauat tein kiyoualoua nejon uejueyi xolalmej. 3 Levitas nemiskej itech nejon uejueyi xolalmej, uan ixtauat yeski para ompa takuaskej inintapialuan uan para ompa kinpiaskej. 4 Itamachiuj nejon ixtauat tein tikinmakas yeski 445 metros* desde tepamit tein ika tatsaktok ueyi xolal. Nankitamachiuaskej desde sejse esquina para kalampa. 5 Itech nochi naui lados den ueyi xolal moneki nankitamachiuaskej 890 metros.* Ueyi xolal yetos tatajko. Nejon ixtauat yeski para kintamakaskej inintapialuan.

6 ”Chikuasen uejueyi xolalmej tein nankinmakaskej levitas yeski para ompa choloskej akin temiktiskej; no nankinmakaskej okseki 42 uejueyi xolalmej. 7 Nankinmakaskej levitas 48 uejueyi xolalmej iuan ixtauat tein kiyoualoua sejse ueyi xolal. 8 Uejueyi xolalmej tein nankinmakaskej levitas nankikuiskej de inintal israelitas. Kampa okachi miakej yeskij uan okachi ueyi tal kinmakaskej, kitemakaskej okachi; uan kampa amo miakej, amo semi miak kitemakaskej”.

9 Uan Jehová no kiluij Moisés: 10 “Xikinilui israelitas: ‘Nankipanauitij ueyiat Jordán uan nanajsitij itech tal tein poui Canaán. 11 Moneki nankixeloskej uejueyi xolalmej kampa uelis cholos uan niman ajsis akin temiktis maski amo kinekia. 12 Ompa uelis mopaleuis para maj amo kimikti akin kinamiki momakepas. Ijkon amo kimiktiskej achto ke kiuikaskej iniuan jueces. 13 Chikuasen uejueyi xolalmej tein nankitemakaskej yeskij para nejon. 14 Nankitemakaskej eyi uejueyi xolalmej nikampa den ueyiat Jordán, uan eyi uejueyi xolalmej itech tal tein poui Canaán. 15 Itech nejin chikuasen uejueyi xolalmej uelis mopaleuiskej israelitas uan akin amo israelitas uan nemij iniuan. Uelis ompa cholos akin temiktis maski amo kinekia.

16 ”’Sayoj ke akin kimagas aksa* ika se tepos uan mikis, akin temagak moneki mikis porin temiktij. 17 Uan komo kimaga ika se tet tein uelis ika kimiktis uan miki, akin temagak moneki mikis porin temiktij. 18 Uan komo kimaga ika se kouit tein uelis ika kimiktis uan miki, akin temagak moneki mikis porin temiktij.

19 ”’Akin kinamiki momakepas, kimiktis akin temiktij keman kiajsis. 20 Komo aksa kitopeua okse oso kitamotilia teisa para kikokos porin kitauelita uan kimiktia, yejua moneki mikis porin temiktij. 21 Oso komo kipuñetejuia porin kitauelita uan kimiktia, yejua moneki mikis porin temiktij. Akin kinamiki momakepas, kimiktis keman kiajsis.

22 ”’Sayoj ke akin kiualmiktia aksa porin kitopeuak oso kitamotilij teisa maski amo kinekia kikokos nion kitauelitaya, okse taman moneki mochiuas. 23 No ijkon yeski komo amo kiita uan kichiua maj itech uetsi se tet maski amo kitauelitaya nion kinekia kikokos, uan miki. 24 Jueces moneki mosentiliskej iuan akin kichiuak nejon uan iuan akin kinamiki momakepas, uan kiitaskej nochi nejin tanauatilmej para kimatiskej toni kiixtaliskej. 25 Uan jueces moneki kipaleuiskej akin temiktij uan oksepa kiuikaskej itech ueyi xolal kampa cholojka. Ijkon akin kinamiki momakepas amo kimiktis. Uan akin temiktij moneki ompa nemis hasta maj momikili tayekankatiopixkat, akin kiixtalijkej ika aceite tein xeliujtok para Dios.

26 ”’Sayoj ke komo akin temiktij kisa den ueyi xolal kampa mopaleuito 27 uan akin kinamiki momakepas kiajsi kalampa den ueyi xolal uan kimiktia, nejon takat amo kitatsakuiltiskej. 28 Porin akin temiktia moneki nemis itech ueyi xolal kampa mopaleuito hasta maj momikili tayekankatiopixkat. Sayoj hasta ijkuak, uelis mokepasya ichan. 29 Desde axkan, yejua nejin tein moneki nankiitaskej keman nankiixtaliskej tein monekis mochiuas kampa yeski nanemiskej.

30 ”’Akin kimiktis aksa porin ijkon kiixtalij uan sekin kiitakej uan kijtouaj tein kichiuak, moneki kimiktiskej. Amo uelis kimiktiskej komo sayoj se kiitak. 31 Amo akin uelis taxtauas para kimakixtis se temiktijkej akin kinamiki mikis, porin moneki mikis. 32 Akin mopaleuitiuj itech se ueyi xolal porin temiktij, moneki ompa mokauas hasta maj momikili tayekankatiopixkat. Amo akin uelis taxtauas para maj mokepa ichan achto.

33 ”’Amo xikpitsotilikan tal kampa nanemij, porin esti kipitsotilia in tal, uan tal kampa uetsik esti amo uelis yeski chipauak komo amo kimiktiaj* akin temiktij. 34 Amo xikpitsotilikan tal kampa nanemij uan nejua no ninemi, porin nejua Jehová ninemi iniuan israelitas’”.

36 Uan akin kinixyekanayaj ikoneuan Galaad, kinnojnotsatoj Moisés uan okseki taixyekananij israelitas. Itat Galaad katka Makir uan iueyitat katka Manasés, iokichpil José. 2 Yejuan kiluijkej: “Jehová mitsnauatij tejuatsin xiktatamota tetsitsin* para tikinxejxelouilis inintal israelitas. Uan Jehová mitsnauatij xikinmaka isiuapipiluan topariente Zelofehad tal tein iaxka yeskia. 3 Komo yejuan monamiktiaj iniuan takamej akin amo ikoneuan Manasés, inintal ininmako panos uan yejuanya mokauiliskej. Uan tejuan tikpoloskejya tal tein techkauilijteujkaj touejkaujtatuan. 4 Uan keman ejkos xiuit keman israelitas kimakixtiskej nochi,* inintal nejon siuamej mokauiliskejya akin amo ikoneuan Manasés uan amo uelisok techkepiliskej. Uan tikpoloskejya nejon tal tein techkauilijteujkaj touejkaujtatuan”.

5 Uan Jehová kinauatij Moisés maj kiniluij israelitas nejin: “Tein kijtouaj ikoneuan José melauj. 6 Yejua nejin tein Jehová tanauatij maj kichiuakan isiuapipiluan Zelofehad: ‘Yejuan uelis monamiktiskej iuan akin kinekiskej. Sayoj ke moneki monamiktiskej iuan se akin no ikoneuj Manasés. 7 Tal tein kinmakaskej uejueyi kalyetonij amo uelis momamakaskej, porin nochin israelitas moneki mokauiliskej tal tein kinkauilijteuaskej inintatuan. 8 Uan keman se siuapil no kimakaskej se tal iniuan nochin israelitas, moneki monamiktis iuan se takat akin pouis iniuan ichankauan itat. Ijkon, israelitas kisentokas yeski ininaxka tal tein kinkauiliskej ininuejkaujtatuan. 9 Tal tein kinmakaskej uejueyi kalyetonij amo uelis momamakaskej, porin nochin israelitas moneki mokauiliskej tal tein kinkauilijteuaskej’”.

10 Isiuapipiluan Zelofehad kichiujkej nochi tein Jehová kinauatijka Moisés. 11 Yejua ika Mahlá, Tirzá, Hoglá, Milcá uan Noá monamiktijkej iniuan ininokichpipiluan inintíos.* 12 Monamiktijkej iniuan takamej akin no katkaj ikoneuan Manasés, iokichpil José. Ijkon, inintalpan kisentokaskia yeski ininaxka ueyi kalyetonij kampa pouia inintat.

13 Yejua nejin tein Jehová kiixtalij uan kinnauatij israelitas maj kichiuakan. Nochi nejin kiluij Moisés itech se tal kampa amo teyi onkak ompa Moab, kampa ika panoua ueyiat Jordán, taixpan de Jericó.