DEUTERONOMIO

1 Yejua nejin tein Moisés kiniluij nochin israelitas keman yetoyaj tanakastan den ueyiat Jordán, itech se tal kampa amo teyi onkak. Nejon tal yetok taixpan de Suf, tatajko de Parán, Tófel, Labán, Hazerot uan Dizahab. 2 Se yas desde Horeb hasta Cadés-Barnea, teuikilia 11 tonalmej komo se kikui ojti tein ajsi hasta tepet Seír. 3 Itech tonal keman peuak metsti sebat,* 40 xiujmej satepan ke israelitas kiskej de Egipto, Moisés kiniluij nochi tein Jehová kinauatijka maj kiniluiani. 4 Nejin panok satepan ke yejua kitanik Sehón, inintekiuaj amorreos akin nemia ompa Hesbón. No satepan ke kitanik ompa Edréi tekiuaj Og, akin taixyekanaya ompa Basán uan nemia Astarot. 5 Ompa Moab, tanakastan den ueyiat Jordán, Moisés peuak kimelaua tanauatil tein Dios kimakaka. Kijtoj:

6 “ToDios Jehová techiluij nejin ompa Horeb: ‘Tel uejkauakya nanentokej itech nejin tepemej. 7 Xiakan itech tepemej kampa nemij amorreos. No xiakan itech nochi inintal cananeos tein yetok tanakastan: ompa Arabá, kampa tepeyoj, Sefelá, Négueb uan martenoj. Xiakan itech tepet Líbano uan xiajsikan hasta ueyiat Éufrates. 8 Xikitakan, uelis nankikuiskejya nejin tal. Xikalakikan uan xikinkuilikan tal tein Jehová motenkauak kinmakas namouejkaujtatuan Abrahán, Isaac uan Jacob, uan ininkoneuan’.

9 ”Uan ijkuak, nejua namechiluij: ‘Amo uelis namechuikas noselti. 10 ToDios Jehová kichiuak ximomiakilikan, uan axkan nantelmiakejya kemej sitalimej tein yetokej ne iluikak. 11 Maj Jehová ininDios namouejkaujtatuan, kichiua okachiok ximomiakilikan uan maj namechtatiochiui ijkon kemej motenkauak. 12 Amo uelis namechuikas noselti. Amo uelis namechpaleuis, porin tel miak namokuejmoluan uan nanteltateuiaj. 13 Xikinijitakan seki namokniuan akin tamatinij, kuali tanemiliaj uan kuali tekitij, uan nejua nikinixtalis kemej taixyekananij’. 14 Uan namejuan nanechnankilijkej: ‘Kuali yetok tein titechiluia maj tikchiuakan’. 15 Yejua ika nikinsentilij nejon taixyekananij, akin katkaj tamatinij uan kuali tekitiaj. Nikinmakak tanauatil para maj sekin kinixyekanakan mil, sekin cien, sekin cincuenta uan sekin majtakti. No nikinmakak tanauatil okseki taixyekananij.

16 ”Ijkuak, nikinnauatij jueces: ‘Keman ome israelitas namechitatiuij porin kipiaj se kuejmol, moneki nankiyektaliskej ininkuejmol kemej kijtoua tanauatil. No ijkon moneki nankichiuaskej keman se israelita kipias se kuejmol iuan se akin amo israelita uan nemi namouan. 17 Amo xitechichikouikan keman nankimelaujtoskej se kuejmol. Kemej nankikakiskej akin amo ueyichiujkej no ijkon xikakikan akin ueyichiujkej. Amo akin xikmouilikan, porin Dios namechixtalij kemej jueces. Uan komo amo ueli nankiyektaliaj se kuejmol, xinechixpantilikij uan nejua namechkakis’. 18 Ijkuak, namechiluij nochi tein monekia nankichiuaskej.

19 ”Uan tikiskej de Horeb uan tikpanauijkej nochi nejon ueyi tal kampa tauaktok uan tel tamouilil, tein namejuan nankiitakej keman tiajtoyaj para tiajsiskej itech tepemej kampa nemiaj amorreos. Yejua nejon tein technauatijka toDios Jehová. Satepan tiajsikej Cadés-Barnea. 20 Uan namechiluij: ‘Nanejkokejya itech nejin tepemej kampa nemij amorreos, tein toDios Jehová techmakas. 21 Xikitakan, toDios Jehová namechmakak nejin tal. Xipankisakan uan xikintakuilikan akin ompa nemij, ijkon kemej namechiluij Jehová ininDios namouejkaujtatuan. Ximoyolchikauakan uan amo ximojkamikikan’.

22 ”Sayoj ke nanochin nanechitakoj uan nanechiluijkej: ‘Maj tikintitanikan takamej maj tachiatij itech tal kampa tiajsitij. Keman mokepaskej maj techiluikan katin ojti tikuiskej uan keniuj moitaj uejueyi xolalmej kampa tiajsitij’. 23 Nikuelkakik tein nanechiluijkej, yejua ika nikinijitak 12 takamej. Sejse takat pouia itech sejse ueyi kalyetonij. 24 Yejuan yajkej uan pankiskej hasta kampa yetokej tepemej. Ajsikej hasta atauit* tein monotsa Escol uan tachiatoj itech nejon tal. 25 Kitekkej tein ompa mochiuaya uan techualkuilijkej. Keman ejkokej kijtojkej: ‘Tel kuali tal tein toDios Jehová techmakati’. 26 Sayoj ke namejuan amo nankinekkej nanpankisaskej nion nankichiuaskej tein toDios Jehová namechnauatij. 27 Namokalijtik nankijtojtoyaj tein amo nankiuelitayaj. Nankijtouayaj: ‘Jehová techtauelita, yejua ika techkixtij de Egipto para maj techmiktikan amorreos uan maj techtamiixpolokan. 28 Amo tiknekij tiaskej ompa. Tokniuan techmojmoujtijkej keman kijtojkej: “Akin ompa nemij okachi chikaujkej uan okachi uejkapantikej ke tejuan, uan ininxolaluan tel uejueyi uan tajtatsaktok ika tepamit tein ajsi hasta iluikak. Ompa tikinitakej ikoneuan Anac”’.

29 ”Yejua ika namechiluij: ‘Amo xikinmouilikan akin ompa nemij. 30 ToDios Jehová namechyekantias uan tateuis para namechpaleuis, ijkon kemej kichiuak namoixtenoj ompa Egipto. 31 Uan itech tal kampa tauaktok uan amo teyi onkak, nankiitakej keniuj toDios Jehová namechuikatinemik hasta ke nanejkokej nikan, ijkon kemej se takat kinapaloua ikonetsin’. 32 Sayoj ke maski yejua kichiuak nochi nejin, namejuan amo nantakuaujtamatkej iuan toDios Jehová. 33 Yejua namechyekantiaya itech ojti uan namechtemolijtiaya kani nankinkejketsaskej namokaltsitsin.* Youak monextiaya ika se tit* uan tonayan ika se mixti para namechnextilis katin ojti monekia nankikuiskej.

34 ”Itech nochi nejon tonalmej, Jehová kikakia nochi tein nankijtouayaj. Yejua ika kualanik uan kiyekijtoj: 35 ‘Nochin akin axkan nemij uan amo yolkualmej, amo kiitaskej kuali tal tein nimotenkauak nikinmakas namotatuan. 36 Sayoj Caleb iokichpil Jefuné, kiitas nejon tal. Uan nikmakas yejua uan ikoneuan tal kampa nentinemik, porin yejua senkis kitakamatini Jehová. 37 (Jehová hasta no kualanik nouan por namotajtakol uan nechiluij: “Tejua amo no tikalakis itech nejon tal. 38 Josué iokichpil Nun akin mitspaleuia, yejua kalakis itech nejon tal. Xikyolchikaua,* porin yejua kinixyekanas israelitas para maj mokuilikan nejon tal”). 39 Uan namokoneuan akin nankijtojkej ke namechinkuiliskiaj, akin axkan amo kimatij toni kuali uan toni amo kuali, yejuan kalakiskej itech nejon tal uan nikinmakas para maj ompa nemikan. 40 Uan namejuan ximokepakan uan xiakan itech tal kampa tauaktok, xikuikan ojti tein ajsi hasta mar Rojo’.

41 ”Uan namejuan nanechiluijkej: ‘Tikixnamikkej Jehová. ¡Axkan tipankisatij uan tikinteuitij akin techtauelitaj, ijkon kemej toDios Jehová technauatij!’. Yejua ika nanochin nankikuikej tein ika nantateuiaj uan nankinemilijkej ke amo ouij yeskia nanpankisaskej itech tepet. 42 Sayoj ke Jehová nechiluij: ‘Xikinilui: “Amo xipankisakan, porin nejua amo namechpaleuis. Komo nanpankisaj, namechtaniskej”’. 43 Yejua ika nitajtoj namouan, sayoj ke amo nanechkakkej. Amo nankitakamatkej Jehová uan namoixeuijkej nanpankisaskej itech tepet. 44 Uan amorreos akin nemiaj itech nejon tepet namechnamikitoj uan namechtokatiajkej kemej nekmej, uan namechmoyaujkej* ompa Seír uan nantamitoj hasta Hormá. 45 Yejua ika namokepkej uan peuak nanchokaj iixpan Jehová, sayoj ke Jehová amo namechkakik nion namechchiuak cuenta. 46 Yejua ika tel uejkauak nanenkej ompa Cadés.

2 ”Satepan, timokepkej uan tiajkej itech tal kampa tauaktok. Tikuikej ojti tein ajsi hasta mar Rojo, ijkon kemej Jehová nechiluijka. Miak tonalmej titayoualojtinemiaj amo uejka den tepet Seír. 2 Uan satepan Jehová nechiluij: 3 ‘Kemanya nantayoualojtinemij itech nejin tepet. Axkan xiakan ajkokopa.* 4 Uan xikinilui israelitas: “Nanpanoskej inintaltenoj namokniuan, ikoneuan Esaú, akin nemij ompa Seír. Yejuan namechmouiliskej, uan namejuan moneki kuali nankiitaskej toni nankichiuaj. 5 Amo xikinkuejmolokan,* porin amo namechmakas nion tepitsin de inintal, nion kampa nantaksaskej,* porin tepet Seír nikinmakak ikoneuan Esaú. 6 Namejuan moneki nankinkouiliskej tein nankikuaskej uan nankinixtauiliskej at tein nantayiskej. 7 Porin namoDios Jehová namechtatiochiuiani itech nochi tein nankichiuanij. Yejua kiitani nochi tein nankipanouanij itech nejin ueyi tal kampa tauaktok. Itech nejin 40 xiujmej, namoDios Jehová namouan yetoni uan amo teyi namechpolouani”’. 8 Uan tikinpanauijkej tokniuan, ikoneuan Esaú, akin nemij ompa Seír. Sayoj ke amo tikuikej ojti tein ajsi ompa Arabá, nion tipanokej Elat nion Ezión-Guéber.

”Tiajkej oksekopa uan tikuikej ojti tein teajxitia itech tal kampa amo teyi onkak ompa Moab. 9 Uan Jehová nechiluij: ‘Amo xikinkuejmolokan akin nemij Moab nion ximoteuikan iniuan. Amo namechmakas nion tepitsin de inintal, porin tal tein poui Ar nikinmakak ikoneuan Lot. 10 (Ompa nenkej akin kinixmatiaj kemej emim. Yejuan tel chikaujkej katkaj uan tel miakej. Uan no tel uejkapantikej katkaj kemej akin kinixmatiaj kemej anaquim. 11 Akin kinixmatiaj kemej refaím tamatiaj kemej anaquim, uan ompa Moab kinixmatiaj kemej emim. 12 Achto, ompa Seír nemiaj akin kinixmatiaj kemej horeos, sayoj ke ikoneuan Esaú kintakuilijkej, kintamiixpolojkej uan peuak ompa nemij, ijkon kemej israelitas kichiuatij itech tal tein Jehová kinmakati). 13 Axkan xiakan uan xikpanauikan ueyiat* Zered’. Yejua ika tikpanauijkej nejon ueyiat. 14 Techuikilij 38 xiujmej tinejnemiskej desde Cadés-Barnea hasta tikpanauiskej ueyiat Zered. Itech nochi nejon xiujmej, nochin soldados akin yetoyaj Cadés-Barnea momikilijtiajkej, ijkon kemej Jehová kinyekiluijka. 15 Jehová kikuik ichikaualis* para kinmiktijtias hasta ke tankej.

16 ”Niman keman tamimikkej nochin takamej akin katkaj soldados, 17 Jehová oksepa nouan tajtoj uan nechiluij: 18 ‘Axkan nanpanotij Moab, tein no monotsa Ar. 19 Keman nanajsitoskejya kampa nemij ammonitas, amo xikinkuejmolokan nion xikinpeualtikan. Amo namechmakas nion tepitsin de inintal, porin nikinmakak ikoneuan Lot. 20 Nejin tal no kiitayaj kemej inintal refaím. (Itech nejon tal nenkej refaím, uan ompa Ammón kinixmatiaj kemej zamzumim. 21 Yejuan tel chikaujkej katkaj uan tel miakej. Uan no tel uejkapantikej katkaj kemej anaquim. Sayoj ke Jehová kinpaleuij ammonitas para maj kinixpolouanij, uan yejuan kinkixtijkej de ompa uan kintakuilijkej. 22 Ijkon no kichiuak iniuan ikoneuan Esaú, akin axkan nemij ompa Seír, keman kinpaleuij maj kinixpolouanij horeos para ueliskia kintalkuiliskej, uan hasta axkan ompa nemij. 23 Akin kinixmatiaj kemej avim nemiaj itech xolaltsitsin tein ajsiaj hasta Gaza. Sayoj ke akin kinixmatiaj kemej caftorim, akin kiskej de Caftor,* kintamiixpolojkej uan kintakuilijkej).

24 ”’Xikpanauikan ueyiat* Arnón. Xikitakan, namechpaleuis xiktanikan Sehón, tekiuaj amorreo akin nemi Hesbón. Yejua ika peua xiktalkuilikan uan xikteuikan. 25 Desde axkan nikchiuas maj noyan* tel mojkamikikan akin kitekakiliskej tein nankichiuanij. Yejua ika moteltekipachoskej uan hasta uiuiyokaskej* keman nanajsitiaskejya’.

26 ”Uan keman tietoyaj itech tal kampa amo teyi onkak uan motanotsa Quedemot, nikintitanik seki takamej maj kiluitij tekiuaj Sehón akin nemia Hesbón ke amo tiknekiaj iuan timoteuiskej. Nikintitanik maj kiluitij nejin: 27 ‘Xitechkaua maj tipanokan motalpan. Amo kanaj tichikokalakiskej. 28 Sayoj tikuaskej uan titayiskej tein nantechnamakiltiskej. Sayoj xitechkaua maj ompaka tinejnemikan 29 hasta maj tikpanauikan ueyiat Jordán uan maj tiajsikan itech tal tein toDios Jehová techmakas. Ijkon techpaleuijkej ikoneuan Esaú akin nemij ompa Seír uan moabitas akin nemij ompa Ar’. 30 Sayoj ke tekiuaj Sehón akin nemia Hesbón amo techkauak maj tipanokan, porin toDios Jehová kikauak maj amo takaki uan maj yoltakuauak para maj tiktanikan. Uan yejua nejon tein mochiuak.

31 ”Uan Jehová nechiluij: ‘Xikita, namechpaleuiti xiktanikan Sehón uan xiktalkuilikan. Peua xikalakikan italpan’. 32 Keman Sehón uan nochin isoldados technamikitoj ompa Jáhaz para techteuiskej, 33 toDios Jehová techpaleuij maj tiktanikan uan tikmiktijkej yejua, ikoneuan uan nochin isoldados. 34 Nejon tonalmej timokuilijkej nochin uejueyi xolalmej kampa taixyekanaya uan tikinixpolojkej. No tikintamimiktijkej nochin takamej, siuamej uan konemej. Amo tikaujkej nion se. 35 Sayoj timokauilijkej inintapialuan uan nochi tein tikinkuilijkej itech nejon uejueyi xolalmej. 36 Timoinkuilijkej nochin xolalmej desde Aroer uan ueyi xolal tein yetok tatenoj den ueyiat Arnón hasta Galaad. Aroer yetok tanakastan den ueyiat Arnón. ToDios Jehová techpaleuij maj timoinkuilikan nochi nejon xolalmej. 37 Sayoj ke amo timotokijkej kampa nemij ammonitas nion tatenoj den ueyiat* Jaboc. Amo no timotokijkej itech uejueyi xolalmej tein yetokej itech tepemej uan nion kanaj kampa toDios Jehová technauatij maj amo timotokikan.

3 ”Uan oksekopa tiajkej uan tipankiskej itech ojti tein teajxitia hasta Basán. Uan tekiuaj Og, akin taixyekanaya ompa Basán, yajki iniuan nochin isoldados para techteuitiuj kampa motanotsa Edréi. 2 Yejua ika Jehová nechiluij: ‘Amo xikmouili, porin nimitspaleuiti xiktani yejua uan nochin isoldados, uan tikuilis ital. Tiktanis ijkon kemej tiktanik Sehón, inintekiuaj amorreos akin nemia Hesbón’. 3 Uan toDios Jehová no techpaleuij maj tiktanikan tekiuaj Og, akin taixyekanaya ompa Basán, uan nochin isoldados. Tikintamimiktijkej uan amo tikaujkej nion se. 4 Uan timokuilijkej nochin uejueyi xolalmej kampa taixyekanaya, amo tikinkauilijkej nion se. Katkaj 60 uejueyi xolalmej tein yetoyaj ompa Argob. Argob poui Basán kampa taixyekanaya Og. 5 Itech nochi nejin uejueyi xolalmej tajtatsaktoya ika uejueyi tepamit, kipiayaj puertas uan tein kiixtapaltaliayaj itech puertas para tatsakuaskej. Uan onkayaj tel miak xolaltsitsin. 6 Sayoj ke tikixpolojkej nochi, ijkon kemej tikchiujkej iuan tekiuaj Sehón akin nemia Hesbón. Tikinixpolojkej nochin uejueyi xolalmej uan tikinmiktijkej nochin takamej, siuamej uan konemej. 7 Uan timokauilijkej nochi inintapialuan uan nochi tein kipiayaj itech nejon uejueyi xolalmej.

8 ”Ijkuak, tikintalkuilijkej ome tekiuanij akin kinixyekanayaj amorreos uan yetoyaj tanakastan den ueyiat Jordán. Tikinkuilijkej desde ueyiat* Arnón hasta tepet Hermón. 9 (Ompa Sidón kiixmatiaj nejon tepet kemej Sirión uan amorreos kiixmatiaj kemej Senir). 10 Tikinkuilijkej nochin uejueyi xolalmej tein yetoyaj kampa tal tamanis,* nochi in tal tein poui Galaad uan nochi Basán hasta Salecá uan Edréi. Salecá uan Edréi pouij Basán kampa taixyekanaya tekiuaj Og. 11 Porin amo yetoyajok akin kinixmatiaj kemej refaím, sayoj mokauaya tekiuaj Og. Keman momikilij, kitalijkej itech se caja de tepos* uan yetokok ompa Rabá kampa nemij ammonitas. Nejon caja kipia naui metro* de ueyak uan se metro uan 80 centímetros* de patauak. 12 Ijkuak, tikuikej tal tein peua desde Aroer, tein yetok tanakastan den ueyiat Arnón. No tikuikej tajko tal kampa tepeyoj tein poui Galaad, uan uejueyi xolalmej tein ompa yetoyaj nikinmakak ikoneuan Rubén uan ikoneuan Gad. 13 Seki talmej tein mokauaya ompa Galaad uan nochi in tal tein poui Basán kampa taixyekanaya Og, nikinmakak seki* ikoneuan Manasés. Nochi in tal tein poui Argob, tein yetok Basán, kiixmatiaj kemej inintal refaím.

14 ”Jaír iokichpil Manasés kikuik nochi in tal tein poui Argob hasta inintaltenoj akin kinixmatij kemej guesuritas uan maacatitas. Uan xolaltsitsin tein ompa yetoyaj kintokaytij kemej yejua: Havot-Jaír.* Uan ijkon moixmatij hasta axkan. 15 Uan Makir nikmakak tal tein poui Galaad. 16 Uan ikoneuan Rubén uan ikoneuan Gad nikinmakak desde Galaad hasta tal tamanis kampa panoua ueyiat Arnón. Tatajko de nejon tal tamanis tami inintal uan ajsi hasta ueyiat Jaboc, inintaltenoj ammonitas. 17 No nikinmakak kampa moixmati kemej Arabá uan kampa panoua ueyiat Jordán uan sentatenoj, desde Kinéret* hasta mar tein yetok ompa Arabá. Nejin no moixmati kemej mar Salado* uan yetok tatsintan de Pisgá, kampa ika ualkisa tonaltsin.

18 ”Uan namechnauatij nejin: ‘ToDios Jehová namechmakak nejin tal para ximokuilikan. Nochin takamej akin nanyolchikaujkej nankikuiskej tein ika nantateuiaj, nankinyekantiaskej namokniuan israelitas uan nankipanauiskej ueyiat. 19 Sayoj namosiuauan, namokoneuan uan namotapialuan kisentokaskej nemiskej itech uejueyi xolalmej tein namechmakak. (Nejua kuali nikmati ke nankinpiaj miak tapialmej). 20 Ompa nemiskej hasta maj Jehová kinmaka namokniuan tal kampa kualtsin nemiskej, ijkon kemej namechmakak namejuan. Uan hasta maj yejuan no mokuilikanya tal tein toDios Jehová kinmakati oksekopa den ueyiat Jordán. Satepan, namejuan namokepaskejya uan nanemiskej itech tal kampa namechmajmakak’.

21 ”Ijkuak, niknauatij Josué: ‘Tikitakya tein toDios Jehová kinchiuilij nejin ome tekiuanij. Jehová no ijkon kinchiuilis tekiuanij akin yetoskej kampa nanpanoskej. 22 Amo xikinmouilikan, porin toDios Jehová tateuis para namechpaleuis’.

23 ”Ijkuak, niktataujtij Jehová uan nikiluij: 24 ‘NoUeyi Teko Jehová, peuakya tinechnextilia ke semi tiueyichiujkej uan tichikauak. Nion se dios ne iluikak nion nikan taltikpak kichiua miak taman tein se kimojkaita kemej tejua. 25 Nimitstataujtia, xinechkaua maj nipano para nikitas kuali tal oksekopa den ueyiat Jordán, tepemej kampa takualtsinkan uan Líbano’. 26 Sayoj ke Jehová tel kualantoyaok nouan por namotajtakol uan amo nechkakik, ta Jehová nechiluij: ‘¡Amo teyi xinechiluiok! Amo keman niknekiok nikakis nejon. 27 Xipankisa ikuapan Pisgá uan xitachia moixpankopa, moikankopa, moyekmakopa uan moopochmakopa. Ompa xikita nejon tal, porin amo tikpanauis nejin ueyiat Jordán. 28 Xikixtali Josué maj taixyekana uan xikyolchikaua, porin yejua kinixyekanas israelitas uan yejua kichiuas maj kiselikan tal tein tejua tikitati’. 29 Nochi nejin panok keman tinemiaj itech tal tamanis tein yetok taixpan de Bet-Peor.

4 ”Uan axkan ikoneuan Israel, xikakikan tein Dios kiixtalij uan tanauatij, tein namechmachtijtok xiktakamatikan. Komo ijkon nankichiuaj, nanyoltoskej uan nankikuiskej tal tein namechmakas Jehová, ininDios namouejkaujtatuan. 2 Amo xiktamajxitilikan nion xikuilikan nion teyi. Xiktakamatikan itanauatiluan toDios Jehová tein axkan namechnauatijtok xikchiuakan.

3 ”Namejuan nankiitakej tein Jehová kinchiuilij akin kiueyichiujkej Baal ompa Peor: toDios Jehová kinixpoloj nochin akin kiueyichiujkej. 4 Sayoj ke nanochin akin amo keman nankikauanij toDios Jehová, nanyoltokej axkan. 5 Xikitakan, namechnextilij tein Dios kiixtalij uan tanauatij, ijkon kemej noDios Jehová nechiluij, para xiktakamatikan keman nanemiskej itech tal tein namokuiliskej. 6 Moneki nankichiuaskej ijkon kemej yetok. Ijkon, akin kitekakiliskej tein namechnauatijkej, kiitaskej ke namejuan nantamatinij uan nanyektanemiliaj. Yejuan kijtoskej: ‘Akin nemij itech nejin ueyi altepet yekmelauj tamatinij uan yektanemiliaj’. 7 ToDios Jehová touan yetok uan nochipa techpaleuia keman tiknotsaj. Nion se xolal kipia se dios kemej yejua. 8 Itech nion se ueyi altepet kipiaj tanauatilmej kemej nochi nejin tein namechiluijtok axkan. Nejin tanauatilmej kinextiaj tein kuali yetok.

9 ”Sayoj ximoyekpia para amo tikelkauas nochi tein tikitani uan nochipa xikelnamikto. Uan no, moneki tikintapouis mokoneuan uan moixuiuan. 10 Keman tietoya iixpan toDios Jehová ompa Horeb, Jehová nechiluij: ‘Xikinsentili nochin para maj kikakikan tein nikijtoti. Ijkon, nochipa nechmojkatokaskej uan kinnextiliskej ininkoneuan maj no ijkon kichiuakan’.

11 ”Uan namosentilijkej uan nanijkatoyaj tepetsintan, uan nejon tepet xotatoya. Nejon tit* ajsia hasta iluikak. Tatayouayantiak, mixtaj katka uan tatileujtoya. 12 Uan Jehová peuak namechnojnotsa desde in tit. Nankikakiaj ke tajtouayaj sayoj ke amo akin nankiitayaj. 13 Uan yejua namechiluij tein motenkauak namouan, tein namechnauatij xikchiuakan: Majtakti Tanauatilmej.* Satepan kijkuiloj nejon itech ome lajas. 14 Nejon tonal, Jehová nechiluij maj namechmachti tein kiixtalij uan tein tanauatij. Nejon moneki nankichiuaskej itech tal kampa nanajsitij uan namokuilitij.

15 ”Uan kemej amo teyi nankiitakej keman Jehová namechnojnotsak desde in tit ompa Horeb, moneki namoyekpiaskej. 16 Ijkon amo namouejueloskej nion namochijchiuiliskej teisa para nankiueyichiuaskej tein kiixnextis se takat oso se siuat, 17 se tapial tein nemi talpan, se totot, 18 se okuilij tein moxoxolatsa oso tein tamatis kemej se pescado. 19 Uan keman nanajkotachiaskej uan nankiitaskej tonaltsin, metsti, sitalimej uan nochi tein onkak ne iluikak, amo ximokauakan maj namechtanejnektikan para xikinueyichiuakan. ToDios Jehová kichijchiuak nochi nejon para nochin akin nemij itech taltikpak. 20 Uan Jehová namechijitak namejuan uan namechkixtij de Egipto, kampa semi namechtajyouiltiayaj. Ompa nanyetoyaj kemej yeskia itech se horno. Namechkixtij para nanyeskij naniaxkauan, uan axkan nanikoneuanya.

21 ”Jehová kualanik nouan por namotajtakol uan nechyekiluij ke nejua amo nikpanauiskia ueyiat Jordán, nion nikalakiskia itech kuali tal tein toDios Jehová namechmakas. 22 Nejua nimomikiliti itech nejin tal. Amo nikpanauis ueyiat Jordán, sayoj namejuan nankipanauiskej uan namokuiliskej nejon kuali tal. 23 Ximoyekpiakan, amo xikelkauakan tein toDios Jehová motenkauak namouan, uan amo ximochijchiuilikan nion se taman para nankiueyichiuaskej, ijkon kemej toDios Jehová namechnauatij. 24 Porin toDios Jehová kemej se ueyi tit tein nochi kitamia. Yejua tanauatia maj sayoj yejua kiueyichiuakan.

25 ”Keman uejkaua nanemiskejya itech nejon tal uan nankinpiaskej namokoneuan uan namoixuiuan, amo ximochijchiuilikan teisa para nankiueyichiuaskej. Amo no xikchiuakan tein Jehová kijtoua ke amo kuali para nankikualantiskej. 26 Komo ijkon nankichiuaj, namechyekiluia ininixpan akin yetokej ne iluikak uan taltikpak ke ijsiujka nanixpoliuiskej. Amo nanyetoskejok itech tal tein namokuilitij keman nankipanauiskej ueyiat Jordán. Amo nanuejkauaskej ompa porin nantamiixpoliuiskej. 27 Jehová namechmoyauas* miakkan uan sayoj nansekimej namokauaskej itech altepemej kampa Jehová namechkauatiuj. 28 Ompa monekis nankinueyichiuaskej tiotsitsin* tein kinmachijchiujkej. Nejon tiotsitsin de kouit uan tet, amo tachiaj, amo takakij, amo takuaj nion tajnekuij.

29 ”Komo ompa oksepa tikneki tikueyichiuas toDios Jehová uan tiktajtania maj mitspaleui, yejua mitspaleuis. Sayoj ke moneki tiktemos ika nochi moyolo uan tiknextis ke yekmelauj tikneki tiktekitilis. 30 Keman titeltajyouijtos uan tikpanosya nochi nejin, timokepas iuan toDios Jehová uan tiktakamatis. 31 Porin toDios Jehová semi teiknelia. Yejua amo mitskauas, amo mitsixpolos uan amo kielkauas tein motenkauak iniuan mouejkaujtatuan.

32 ”Xitajtani toni panok ne uejkauj, achto ke tinemiskia, desde keman Dios kichijchiuak takat nikan taltikpak. Xitajtani desde kampa peua taltikpak hasta kampa tami. ¿Mochiuani teisa tein se kimojkaita kemej nejin? Amo keman mokakini maj pano teisa ijkon. 33 Itech nion se xolal kitenkakinij Dios, ijkon kemej tejua mitsnojnotsak itech se tit uan amo timikik. 34 Dios amo keman kinkixtiani tel miakej de se ueyi altepet para maj iaxkauan. Tejua tikyekitak tein toDios Jehová kichiuak para mitskixtis de Egipto. Yejua kintatsakuiltij sekin, kichiuak miak taman tein amo keman mochiujtoya, tateuij, kikuik iueyi chikaualis uan kichiuak miak taman tein temojmoujtij. 35 Tejua tikitak nochi nejin para tikmatis ke Jehová yejua yekmelauj Dios; amo moajsi okse Dios. 36 Mitsnojnotsak desde iluikak para tiyektakakis, uan nikan taltikpak mitsitaltij se ueyi tit uan tikakik tein mitsiluij desde ompa.

37 ”Kemej kintasojtak mouejkaujtatuan uan moinxelouilij ininkoneuan, mouan yetoya keman mitskixtij de Egipto ika iueyi chikaualis. 38 Kinkixtij akin nikan nemiaj maski okachi miakej katkaj uan tamouililmej para mitsmakas nejin tal, ijkon kemej axkan tikita. 39 Yejua ika axkan moneki tikmatis uan amo tikelkauas ke Jehová yejua yekmelauj Dios. Amo moajsi okse Dios ne iluikak nion nikan taltikpak. 40 Moneki tikchiuas tein Dios kiixtalij uan tanauatij kemej nimitsiluijtok axkan. Ijkon kualtsin tinemis tejua uan mokoneuan, uan uejkaua tietos itech tal tein toDios Jehová mitsmakatok”.

41 Ijkuak, Moisés kinxeloj eyi uejueyi xolalmej sekopa den ueyiat Jordán, kampa ualkisa tonaltsin. 42 Komo aksa* kimiktia iikniuj maski amo kinekia nion kitauelitaya, moneki cholos ompa para maj amo kimiktikan. 43 Ueyi xolal Bézer, tein yetok itech tal kampa amo teyi onkak uan tamanis* kinxelouilij ikoneuan Rubén; ueyi xolal Ramot tein poui Galaad, kinxelouilij ikoneuan Gad, uan Golán tein poui Basán, kinxelouilij ikoneuan Manasés.

44 Moisés kinmatiltij israelitas itanauatiluan Dios. 45 Yejua nejin tein Moisés kinelnamiktij uan kinnauatij israelitas satepan ke kiskej de Egipto. 46 Yetoyaj tanakastan den ueyiat Jordán, itech se tal tamanis taixpan de Bet-Peor. Ompa taixyekanaya Sehón, inintekiuaj amorreos akin nemia ompa Hesbón. Moisés uan israelitas kimiktijkej nejon tekiuaj satepan ke kiskej de Egipto. 47 Yejuan kitalkuilijkej Sehón uan no kitalkuilijkej tekiuaj Og akin taixyekanaya ompa Basán. Yejuan kinixyekanayaj amorreos uan yetoyaj tanakastan den ueyiat Jordán kampa ualkisa tonaltsin. 48 Israelitas motakuilijkej desde Aroer, tein yetok tanakastan den ueyiat* Arnón, hasta tepet Siyón, tein no monotsa Hermón. 49 No mokuilijkej nochi in tal tein moixmati kemej Arabá, tein yetok tanakastan den ueyiat Jordán hasta mar tein yetok ompa Arabá,* tatsintan de Pisgá.

5 Uan Moisés kinsentilij nochin israelitas uan kiniluij: “Nanikoneuan Israel, xikakikan tein Dios kiixtalij uan tanauatij tein axkan namechmatiltia. Moneki kuali namomachtiskej uan nankichiuaskej ijkon kemej yetok. 2 Ompa Horeb, toDios Jehová motenkauak touan se taman. 3 Jehová amo motenkauak iniuan touejkaujtatuan, ta touan, akin axkan nikan tietokej. 4 Keman nanyetoyaj itech tepet, Jehová namechnojnotsak desde in tit.* 5 Ijkuak, Jehová nouan tajtoj* uan nejua namechmatiltij tein Jehová kinekia namechiluis, porin namejuan nankimouiliayaj tit uan amo nanpankiskej itech tepet. Yejua kijtoj:

6 ”‘Nejua nimoDios Jehová, akin mitskixtij de Egipto, kampa mitsteltekitiltiayaj. 7 Sayoj nejua xinechueyichiua, amo keman xikinueyichiua okseki dioses para tinechixnamikis.

8 ”’Amo ximochijchiuili nion se tiotsin,* nion okse taman tein tamatis kemej teisa tein yetok iluikak, itech taltikpak oso itech at para tikueyichiuas. 9 Amo ximoixpilo ininixpan nion ximokaua maj mitstanejnektikan para tikinueyichiuas, porin nejua Jehová nimoDios nitanauatia maj sayoj nejua nechueyichiuakan. Uan komo aksa* nechtauelita, nikaua maj ikoneuan, iixuiuan uan ininkoneuan iixuiuan tajyouikan por tajtakol tein yejua kichiuas. 10 Sayoj ke komo aksa nechtasojta uan kichiua tein nitanauatia, nochipa nikintasojtas nochin ikoneuan akin yoltiaskej, tel miak xiujmej tein nion ueli se kipoua.

11 ”’Amo xikauilmati* itokay moDios Jehová, porin xikyekmati ke Jehová kitatsakuiltis akin kiauilmatis itokay.

12 ”’Ximoseui itech tonal sábado porin xeliujtok para Dios, ijkon kemej toDios Jehová mitsnauatij. 13 Uelis titekitis chikuasen tonal uan tikchiuas nochi mochiualis. 14 Sayoj ke itech chikometika tonal amo xikchiua nion se tekit, tejua, mokoneuan, motakeualuan, mokuakouej, moburro, nion se motapial uan nion akin okseko kayot uan nemi mouan. Ijkon motakeualuan no uelis moseuiskej kemej tejua. Tonal sábado xeliujtok para toDios Jehová. 15 Xikelnamiki keniuj mitsteltekitiltiayaj ompa Egipto uan ke toDios Jehová mitskixtij de ompa ika iueyi chikaualis. Yejua ika toDios Jehová mitsnauatij ximoseui itech tonal sábado.

16 ”’Xikpoujkaita mopaj uan momaj, ijkon kemej toDios Jehová mitsnauatij. Ijkon uejkaua tiyoltos uan kualtsin tinemis itech tal tein toDios Jehová mitsmakas.

17 ”’Amo xitemikti.

18 ”’Amo no xiauilnemi.

19 ”’Amo no xitachteki.

20 ”’Amo no xiktakajkayauili mokniuj.

21 ”’Amo no xikixnejneki isiuatsin mokniuj. Amo no xiktelixnejneki ichan, italpan, itakeual, ikuakouej, iburro uan nion teyi tein iaxka’.

22 ”Jehová namechnauatij nejin nanochin itech tepet. Chikauak tajtoj desde in tit, mixti uan kampa tatileujtoya, uan amo kiajxitilijok nion teyi. Uan yejua kijkuiloj itech ome lajas uan nechinmakak.

23 ”Sayoj ke, nochin taixyekananij israelitas nimantsin nechitatoj keman peuak nankikakij nejon tajtolmej desde kampa tatileujtoya, keman tepet xotatoya. 24 Namejuan nankijtojkej: ‘ToDios Jehová technextilij iueyi chikaualis uan ke semi ueyichiujkej, uan technojnotsak desde in tit. Axkan tikitakej ke Dios ueli tajtoua touan uan tiyoltokejok. 25 Amo tiknekij timikiskej, porin nejin ueyi tit uelis techtamis. Komo toDios Jehová kisentoka technojnotsa, timikiskej. 26 Amo akinok kikakini maj Dios akin nochipa yoltok ualtajto desde se tit uan maj amo miki. 27 Xikakiti nochi tein toDios Jehová kijtos, uan tejua titechmatiltis tein mitsiluis toDios Jehová. Tejuan tikakiskej uan titatakamatiskej’.

28 ”Uan Jehová kikakik tein nanechiluijkej, uan Jehová nechiluij: ‘Nikakik tein mitsiluijkej israelitas, uan kuali yetok nochi tein kijtouaj. 29 ¡Niknekiskia maj nochipa kinekikan nechmojkatokaskej uan maj kichiuakan nochi tein nitanauatia! ¡Ijkon nochipa kualtsin nemiskiaj yejuan uan ininkoneuan! 30 Xikiniluiti nejin: “Ximokepakan namochan”. 31 Sayoj ke tejua ximokaua nouan para maj nimitsilui nochi notanauatiluan uan tein nikixtalij maj mochiua. Xikinmatilti nochi nejon. Yejuan monekis kitakamatiskej keman nemiskejya itech tal tein nikinmakas para maj mokuilikan’. 32 Uan namejuan moneki nankiyekchiuaskej nochi ijkon kemej toDios Jehová namechnauatij. Amo xikixpanauikan nion se tanauatil. 33 Moneki nochipa nanemiskej ijkon kemej toDios Jehová namechnauatij para kualtsin nanyetoskej uan uejkaua nanyoltoskej itech tal tein nankikuiskej.

6 ”Yejua nejin tein toDios Jehová tanauatij uan kiixtalij. Nechiluij maj namechmachti nochi nejon para xikchiuakan keman nanajsiskej itech tal tein namokuilitij. 2 Namejuan, namokoneuan uan namoixuiuan nochipa xikmojkatokakan toDios Jehová uan xikchiuakan nochi tein namechiluia uan namechnauatia. Komo ijkon nankichiuaj uejkaua nanemiskej. 3 Ikoneuan Israel, xikakikan nejin uan xikchiuakan ijkon kemej yetok. Ijkon kualtsin nanemiskej uan namotelmiakiliskej itech tal kampa moteltachiua,* kemej namechyekiluij Jehová, ininDios namouejkaujtatuan.

4 ”Ikoneuj Israel, xikaki nejin. ToDios Jehová sayoj se Jehová. 5 Xiktasojta moDios Jehová ika nochi moyolo, ika nochi tein tiuelis* uan ika nochi mochikaualis.* 6 Nejin tein nimitsnauatijtok axkan moneki tikpias itech moyolo, 7 uan moneki miakpa tikinmachtis* mokoneuan uan ika titajtos keman timotalis mokalijtik, keman tinejnentos itech ojti, keman timotekas uan keman timeuas. 8 Kemej yeskia xikilpi* momako para tikelnamikis; kemej yeskia maj nesto moixkuako. 9 Xikijkuilo itech koujmej kampa pilkatokej mopuertas uan itech puertas tein kipia ueyi xolal kampa tinemi.

10 ”ToDios Jehová mitsajxitis itech tal tein kinyekiluij mouejkaujtatuan Abrahán, Isaac uan Jacob ke mitsmakaskia. Itech nejon tal yetokej uejueyi xolalmej tein kualtsitsin tein amo tejua tikinchijchiuak. 11 Ompa no onkakej kalmej tein kipiaj nochi tein kuali tein amo timotanilij, talkoyokmej para at tein amo tikinichkuak uan uvajkoujmej uan olivojkoujmej tein amo tikintokak. Keman tikuas nochi tein ompa onkak hasta tiixuis, 12 ximoyekpia para amo tikelkauas Jehová, akin mitskixtij de Egipto, kampa mitsteltekitiltiayaj. 13 Moneki tikmojkatokas toDios Jehová, tiktekitilis uan tikuis itokay keman timotenkauas teisa. 14 Amo xikinueyichiuakan okseki dioses tein kinueyichiuaj akin nemij itech xolalmej tein ompaka yetokej, 15 porin toDios Jehová, akin namouan yetok, tanauatia maj sayoj yejua kiueyichiuakan. Komo nankinueyichiuaj okseki dioses, toDios Jehová kualanis namouan uan namechtamiixpolos.

16 ”Amo xikyejyekokan toDios Jehová kemej nankichiujkej ompa Masá. 17 Moneki nankiyekchiuaskej tein namechnauatia toDios Jehová, tein namechelnamiktia uan tein kiixtalij xikchiuakan. 18 Xikchiua tein Jehová kiita ke kuali yetok. Ijkon kualtsin tinemis uan timokuilis kuali tal tein Jehová kinyekiluij mouejkaujtatuan ke kinmakaskia. 19 Tikinkixtis nochin akin mitstauelitaj, ijkon kemej Jehová motenkauak.

20 ”Satepan, keman mookichpil mitstajtanis:* ‘¿Keyej toDios Jehová namechelnamiktia uan kiixtalia xikchiuakan nochi nejin?’, 21 tejua tikiluis: ‘Tekiuaj akin taixyekanaya ompa Egipto techteltekitiltiaya, sayoj ke Jehová techkixtij de ompa ika ichikaualis. 22 Tikitakej keniuj Jehová semi tauejueloj ompa Egipto, kichiuak miak taman tein amo keman mochiujtoya, uan ika kintajyouiltij tekiuaj uan nochin akin nemiaj ichan. 23 Uan techkixtij de ompa para techualkuis nikan uan techmakas tal tein kinyekiluij touejkaujtatuan ke kinmakaskia. 24 Uan Jehová technauatij maj tiktakamatikan nochi nejin tein kiixtalij uan maj tikmojkatokakan toDios Jehová. Technauatij nejon para nochipa kuali tinemiskej uan tiksentokaskej tiyoltoskej kemej hasta axkan. 25 Komo tiktakamatij toDios Jehová uan tikyekchiuaj nochi nejin tein technauatijtok, yejua kiitas ke tein tikchiuaj kuali yetok’.

7 ”Keman toDios Jehová mitsajxitisya itech tal tein timokuiliti, yejua kinkixtijtias akin kinixmatij kemej hititas, guirgaseos, amorreos, cananeos, perizitas, heveos uan jebuseos. Yejuan okachi miakej uan okachi chikaujkej ke tejua. 2 ToDios Jehová mitspaleuis xikintani. Moneki tikintamiixpolos. Amo teyi ximotenkaua iniuan nion xikinikneli. 3 Amo iniuan ximonamikti. Amo no xikinnamikti mosiuapipiluan iniuan ininokichpipiluan nion xikinnamikti mookichpipiluan iniuan ininsiuapipiluan. 4 Porin yejuan kichiuaskej maj namokoneuan amo nechueyichiuakanok uan maj kinueyichiuakan okseki dioses. Komo ijkon kichiuaj, Jehová kualanis namouan uan sepasan namechixpolos.

5 ”Xikixpolokan tein ika taueyichiuaj: altares, tet tein kikejketskej, koujmej* uan xikinchichinokan inintiotsitsin.* 6 Porin namejuan nanxeliujtokej para toDios Jehová. Uan toDios Jehová namechijitak para xiiaxkauan, uan sayoj namejuan okachi namechtasojta, maski yetokej oksekin itech taltikpak.

7 ”Akin nemij itech okseki xolalmej okachi miakej katkaj ke namejuan. Maski ijkon Jehová namechtasojtak uan namechijitak namejuan, maski okachi amo namiakej nankatkaj. 8 Jehová namechijitak porin namechtasojtak uan para kichiuas tein kinyekiluij namouejkaujtatuan. Yejua ika Jehová kikuik ichikaualis para namechkixtis de Egipto kampa namechpiayaj, para amo xietonijok imako tekiuaj akin ompa taixyekanaya. 9 Namejuan nankiyekmatij ke toDios Jehová yejua yekmelauj Dios, akin ueli iuan se takuaujtamati. Yejua nochipa kintasojta uan kichiua tein motenkaua iniuan akin kitasojtaj uan kitakamatij itanauatiluan. Ijkon kichiua maski panoskej tel miak xiujmej. 10 Sayoj ke akin kitauelitaj kinixpolos. Nimantsin kintatsakuiltis uan kintaxtaualtis. 11 Yejua ika xikchiuakan tein tanauatia uan tein kiixtalia, tein axkan namechiluijtok xiktakamatikan.

12 ”Komo namejuan nankisentokaj nankikakij nejin tein toDios Jehová kiixtalij uan nankichiuaj, yejua kichiuas tein motenkauak uan nochipa namechtasojtas, ijkon kemej kinyekiluij namouejkaujtatuan. 13 Mitstasojtas uan mitstatiochiuis. Kemaj, kichiuas xikinpia miakej mokoneuan, maj moteltachiua motalpan, xiktelpia tatok, vino tein yankuik uan aceite. No kichiuas maj mokuakuejuan uan moichkauan* motelmiakilikan. Ijkon mitstatiochiuis itech tal tein kinyekiluij mouejkaujtatuan ke mitsmakaskia. 14 Amo moajsiskej oksekin akin kinteltatiochiuiskej kemej namejuan. Nochin takamej uan siuamej kinpiaskej ininkoneuan uan nochin namotapialuan kinpiaskej ininpiluan. 15 Jehová kichiuas xipakto uan amo mitstitanilis nion se kokolis* tein fiero tein tikitak ompa Egipto, ta kintitanilis nochin akin mitstauelitaskej. 16 Moneki tikintamiixpolos nochin akin nemij itech xolalmej tein toDios Jehová mitsmakas, amo xikinikneli. Amo no xikinueyichiua inindioses, porin nejon kichiuaskia tel amo kuali xinemi.

17 ”Amo ximoyolilui ‘Itech nejin xolalmej okachi miakej ke tejuan. Amo uelis nikintanis’. 18 Amo xikinmouili. Xikelnamiki tein toDios Jehová kichiuilij tekiuaj akin taixyekanaya Egipto uan nochi tein kichiuak ompa. 19 Xikelnamiki keniuj moixtenoj toDios Jehová kintatsakuiltij akin nemiaj Egipto. Kichiuak miak taman tein amo keman mochiujtoya uan kikuik iueyi chikaualis. Kichiuak nejon para mitskixtis de ompa. Yejua nejon tein toDios Jehová kinchiuilis nochin akin tikinmouilia. 20 ToDios Jehová kichiuas maj mojkamikikan.* Uan akin mokauaskej uan motatijtoskej,* mikiskej. 21 Maj amo mitsmoujtikan, porin toDios Jehová yetok mouan. Yejua semi ueyi uan kichiua miak taman tein se kimojkaita.

22 ”ToDios Jehová yolik kinkixtijtias akin nemij itech nejon xolalmej. Amo mitskauas sepasan xikinixpolo, porin komo ijkon tikchiuaskia koujtajtapialmej momiakiliskej uan teisa mitschiuiliskej. 23 ToDios Jehová mitspaleuis xikintani hasta maj tamiixpoliuikan. 24 Yejua mitspaleuis xikintani tekiuanij de ompa uan amo akinok kinelnamikis. Amo akin uelis mitstanis hasta ke tikintamiixpolos. 25 Moneki tikinchichinos inintiotsitsin. Amo xikixnejneki plata nion oro tein ika chijchiujtokej nion ximokuili, porin uelis mitstanejnektis. ToDios Jehová tel amo kiuelita nejon. 26 Amo xikuika mochan nion se taman tein Dios kiita ke pitsotik, para amo mitsixpolos iuan. Moneki senkis tiktajyalitas porin kiixpoloskej.

8 ”Nansejsemej moneki nankiyekchiuaskej nochi tein axkan namechnauatijtok. Ijkon, nanyoltoskej, namomiakiliskej, nanajsiskej uan namokuiliskej tal tein Jehová kinyekiluij namouejkaujtatuan ke kinmakaskia. 2 Xikelnamiki keniuj toDios Jehová nochipa mouan yaya keman tinentinemik nejin 40 xiujmej itech tal kampa tauaktok. Kichiuak ompa xinentinemi para ximoyolyemani uan para kiitas toni tikchiuaskia. Ijkon kimatiskia tein tikpiaya itech moyolo uan ox tikchiuaskia tein mitsnauatij. 3 Yejua ika kichiuak ximoyolyemani uan mitskauak ximayanto, uan mitstamakak ika maná tein nion tejua nion motatuan kiixmatiaj. Ijkon tikmatiskia ke amo sayoj ika takual* se yoltok, ta ika nochi tein kijtoua Jehová. 4 Itech nejin 40 xiujmej, motasal amo patik nion timetsposauayak.* 5 Tejua tikyekmati ke toDios Jehová mitsnextilijtoya keniuj tikyekchiuas tein mitsiluiaya, kemej se takat kimachtia ikonetsin.

6 ”Yejua ika, xinemi kemej toDios Jehová kineki uan xikmojkatoka, uan ijkon tikchiuas tein tanauatia. 7 Porin toDios Jehová mitsuikatok itech se kuali tal. Ompa miakkan motalojtok miak at, uan onkakej miak ameyalmej itech tal tamanis* uan itech tepemej. 8 Itech nejon tal mochiua trigo uan cebada, onkak uvajkouit, higojkouit uan granadajkouit, olivojkoujmej kampa kikixtiaj aceite uan no onkak nekti.* 9 Ompa no onkas miak taman tein tikuas uan amo teyi mitspolos, onkak tet tein kipia tepos uan tepemej kampa tikixtis cobre.

10 ”Keman titakuas uan tiixuitos, moneki tikueyitalis toDios Jehová porin mitsmakak in kuali tal. 11 Ximoyekpia para amo tikelkauas toDios Jehová uan nochipa xikchiua tein kiixtalij uan tanauatij, kemej nimitsiluijtok axkan. 12 Titakuas uan tiixuitos, tikchijchiuas kualtsitsin kalmej uan ompa tinemis. 13 Motapialuan momiakiliskej, miakias moplata uan oro uan tikpias tel miak taman uan amo teyi mitspolos. 14 Keman ijkon tinemis, amo ximoueyimati porin nejon kichiuas xikelkaua toDios Jehová, akin mitskixtij de Egipto kampa mitsteltekitiltiayaj. 15 ToDios mouan yaya keman tinentinemik itech ueyi tal kampa amo teyi onkak uan tel tamouilil, kampa onkakej kouamej uan alacranes uan kampa tauaktok uan amo onkak at. Yejua kichiuak maj kisa at de se ueyi tet, 16 uan itech nejon tal kampa amo teyi onkak mitstamakak ika maná, tein motatuan amo kiixmatkej. Kinekia ximoyolyemani uan kinekia kiitas toni tikchiuaskia, uan ijkon kualtsin tinemiskia satepan. 17 Komo timoyoliluia ‘Nochi tein nikpia, nejua nimotanilij porin niteltekitik’, 18 xikelnamiki ke toDios Jehová mitspaleuia xikpia miak taman, porin ijkon kichiua tein motenkauak iniuan mouejkaujtatuan, kemej tikita axkan.

19 ”Komo se tonal tikelkaua toDios Jehová uan tikinueyichiua okseki dioses uan timoixpiloua ininixpan, desde axkan nimitsyekiluia ke timikis. 20 Timikis ijkon kemej akin nemij itech altepemej tein Jehová kinixpolojtok, porin amo tiktakamatik tein toDios Jehová mitsnauatij.

9 ”Ikoneuj Israel, xikaki tein nimitsiluiti. Axkan tikpanauiti ueyiat Jordán para timokuilis se tal kampa nemij tel miakej uan tamouililmej. Timokuilis uejueyi xolalmej kampa tajtatsaktok ika uejueyi tepamit tein ajsi hasta iluikak. 2 Ompa nemij ikoneuan Anac akin semi chikaujkej uan uejkapantikej. Tikinixmattokya uan tiktekakiliani ke amo akin uelis kintanis. 3 Sayoj ke axkan moneki tikmatis ke toDios Jehová mitsyekantias keman tikpanauis ueyiat. Yejua kemej se ueyi tit* tein nochi kitamia uan kintamiixpolos. Ijkon kemej tiajsitias, yejua kichiuas maj amo teyi ueli kichiuakan. Ijkon ijsiujka tikinkixtis* uan tikinixpolos, kemej Jehová motenkauak mouan.

4 ”Keman toDios Jehová kinkixtis akin nemij itech nejon altepemej, amo xiknemili ‘Jehová nechejkoltij itech nejin tal para maj nimokuili porin niyolkuali’. Tein melauj Jehová kinkixtijtok akin ompa nemij porin amo yolkualmej. 5 Amo tikalakiti itech nejon tal porin tiyolkuali nion porin tiyolchipauak. ToDios Jehová kinkixtiti akin ompa nemij porin amo yolkualmej, uan no porin ijkon Jehová kichiuati tein kinyekiluij mouejkaujtatuan Abrahán, Isaac uan Jacob. 6 Yejua ika xikyekmati ke toDios Jehová amo mitsmakati nejin kuali tal porin tiyolkuali, ta nanochin tel amo nantakakij.

7 ”Xikelnamiki uan amo keman xikelkaua keniuj tikuajkualantij toDios Jehová itech tal kampa tauaktok. Desde keman tikisak de Egipto hasta ke nikan tiejkok, amo tiktakamatini Jehová. 8 Hasta keman tietoyaj ompa Horeb, namejuan nankikuajkualantijkej Jehová, uan Jehová tel kualanik namouan hasta yaya namechixpoloti. 9 Keman nipankisak itech tepet para nikuitiuj lajas kampa Jehová kijkuilojka tein motenkauak namouan, ompa nimokauak 40 tonalmej, uan amo teyi nikuaj nion nitayik at. 10 Uan Jehová nechmakak ome lajas kampa tajkuilojka ika ichikaualis.* Ompa ijkuiliujtoya nochi tein Jehová namechiluijka itech tepet, desde in tit, itech tonal keman namosentilijkej. 11 Keman panokej nejon 40 tonalmej, Jehová nechmakak nejon ome lajas kampa kijkuilojka tein motenkauak. 12 Uan Jehová nechiluij: ‘Xitemotiuetsi, porin mokniuan akin tikinkixtij de Egipto kichiujtokej tein tel amo kuali. Tel niman kielkaujkej tein nikinnauatij. Mochijchiuilijkej se tiotsin* de tepos’. 13 Satepan Jehová nechiluij: ‘Nikitani ke israelitas yekmelauj tel amo takakij. 14 Xinechkaua maj nikinixpolo uan maj amo akin kinelnamikiok, uan nikchiuas maj mokoneuan okachi miakej uan maj amo akin ueli kintani’.

15 ”Uan nimokepteuak uan nitemok den tepet keman xotatoya. Nimaaktiualaya ome lajas kampa Dios kijkuilojka tein motenkauak. 16 Keman nipantachiak, ¡nikitak ke nankiixnamiktoyaj toDios Jehová! Namochijchiuilijkaj se kuakuejkonet de tepos. Tel niman nankielkaujkaj tein Jehová namechnauatijka. 17 Yejua ika nikuik nejon ome lajas, nikintamotak talpan uan nikintamitapanak namoixpan. 18 Nimotankuaketsak uan nimoixpiloj hasta talpan iixpan Jehová, kemej ipa nikchiujtoya 40 tonalmej. Amo teyi nikuaj nion nitayik at porin nantajtakolchiujtoyaj. Nankichiujkaj tein Jehová kitauelita para nankikualantiskej. 19 Semi nimoujtoya porin Jehová tel kualantoya namouan uan yaya namechixpoloti. Sayoj ke ijkuak, Jehová no nechkakik.

20 ”Jehová tel kualantoya iuan Aarón, hasta yaya kiixpoloti, sayoj ke ijkuak no niktataujtij Dios para niktajtouis Aarón. 21 Yejua ika nikuik kuakuejkonet tein nankichijchiujkaj uan tein ika nantajtakojkej, niktikotamotak uan niktamikuechoj, uan satepan nikpixoto* itech at tein ualtemouaya den tepet.

22 ”Uan no, ompa Taberá, Masá uan Quibrot-Hataavá, no nankitelkualantijkej Jehová. 23 Keman Jehová namechiluij xikisakan de Cadés-Barnea, namechnauatij ‘Xipankisakan uan ximokuilikan tal tein namechmakati’. Sayoj ke namejuan amo nankinekkej nankikakiskej tein toDios Jehová namechiluijka, uan amo iuan nantakuaujtamatkej nion nankitakamatkej. 24 Namejuan amo nankitakamatinij Jehová desde keman namechixmatik.

25 ”Nimotankuaketsak uan nimoixpiloj hasta talpan iixpan Jehová 40 tonalmej. Ijkon nikchiuak porin Jehová kijtoj ke namechixpoloti. 26 Peuak nikteltataujtia Jehová: ‘NoUeyi Teko Jehová, amo xikinixpolo mokoneuan. Yejuan moaxkauan, akin tikinmakixtij ika moueyi chikaualis uan tikinkixtij de Egipto. 27 Xikinelnamiki motekitikauan Abrahán, Isaac uan Jacob. Xikintapojpolui israelitas porin tel amo takakij uan kichiuaj tein amo kuali. 28 Komo amo, akin nemij kampa titechkixtij kijtoskej: “Jehová amo uelik kinajxitij itech tal tein kiniluijka ke kinmakas, uan kemej kintauelitaya kinkixtij para kinmiktis itech tal kampa tauaktok”. 29 Yejuan mokoneuan uan moaxkauan, akin tikinkixtij ika moueyi chikaualis’.

10 ”Nejon tonal, Jehová nechiluij: ‘Xikalaxo ome tet kemej tein nimitsmakaka uan xipankisa itech tepet kampa nietok. No xikchijchiua se kaxontsin de kouit. 2 Ompa nikijkuiloti tein nikijkuilojka itech lajas tein tikintamitapanak, uan moneki tikinkalakis itech kaxontsinʼ. 3 Uan nikchijchiuak se kaxontsin ika acaciajkouit uan nikalaxoj ome tet kemej tein Dios nechmakaka. Satepan nipankisak itech tepet nimaaktiaya nejon ome lajas. 4 Uan Jehová oksepa kijkuiloj Majtakti Tanauatilmej,* tein namechiluijka desde in tit itech tepet, keman namosentilijkaj. Uan Jehová nechinmakak nejon lajas. 5 Satepan nimokepteuak uan nitemok den tepet. Nikinkalakij nejon lajas itech kaxontsin tein nikchijchiujka, ijkon kemej Jehová nechnauatijka, uan ompa yetokejok.

6 ”Satepan israelitas kiskej de Beerot Bene-Jaacán uan yajkej hasta Moserá. Ompa momikilij Aarón uan kitokkej. Uan iokichpil, Eleazar, peuak tekiti kemej tiopixkat. 7 Kiskej de ompa uan yajkej Gudgoda, uan de Gudgoda yajkej Jotbatá, kampa miakkan motalojtok at.

8 ”Ijkuak, Jehová kinxeloj ikoneuan Leví para maj kimamakan tatiochiualkaxon* tein iaxka Jehová. No kinxeloj para maj tekitikan iixpan Jehová uan para maj itokaykopa kintajtanilikan israelitas tein kuali. Uan ijkon kichiujtokej hasta axkan. 9 Yejua ika ikoneuan Leví amo kinmakakej nion se tal kemej kinmakakej ininikniuan. Jehová kinmakas nochi tein kinpolos, ijkon kemej toDios Jehová kiniluijka. 10 Uan nejua nimokauak itech tepet 40 tonalmej, kemej nikchiujka achto, uan ijkuak Jehová no nechkakik. Jehová amo kinekik mitsixpolos. 11 Uan Jehová nechiluij: ‘Xikisa de nikan uan xikinyekantiuj mokniuan para maj mokuilikan tal tein nikinyekiluij ininuejkaujtatuan ke nikinmakaskia’.

12 ”Uan axkan, ikoneuj Israel, ¿toni mitstajtanijtok toDios Jehová? Sayoj mitstajtania xikmojkatoka toDios Jehová, nochipa xinemi kemej yejua kineki, xiktasojta, xiktekitili toDios Jehová ika nochi moyolo uan ika nochi tein tiuelis,* 13 uan xikchiua tein tanauatia uan tein kiixtalia Jehová, kemej axkan nimitsiluijtok para kuali tinemis. 14 Iluikak iaxka toDios Jehová, hasta tein onkak okachi ajko. Uan taltikpak uan nochi tein nikan onkak no iaxka. 15 Sayoj ke Jehová sayoj kintasojtak mouejkaujtatuan, uan kemej axkan tikita, sayoj tejua mitsijitak porin ompa tiualeuak. Mitsijitak tejua, maski yetokej oksekin. 16 Axkan namejuan moneki namoyolchipauaskej uan nantakakiskejya. 17 Porin toDios Jehová okachi ueyichiujkej ke nochin okseki dioses uan ininTeko uejueyi chiuanimej. Yejua se Dios akin semi ueyi, tel chikauak uan kichiua miak taman tein se kimojkaita. Amo techichikouia nion kichiua kemej se juez akin kikaua maj kitaxtauikan para takajkayauas. 18 Yejua kiita maj amo kichichikouikan akin amo kinpiaok itatuan* uan akin amo nemiok itakatsin. Kitasojta akin amo israelita uan nemi namouan uan kimaka tein kikuas uan tein motalilis. 19 Namejuan no moneki nankitasojtaskej akin amo israelita uan nemi namouan porin namejuan no nanenkej Egipto, kampa amo nankayomej.

20 ”Moneki tikmojkatokas toDios Jehová. Moneki tiktekitilis uan amo keman tikauas, uan moneki tikuis itokay keman timotenkauas teisa. 21 Moneki yejua tikueyitalis. Yejua moDios, akin kichiuak miak taman tein se kimojkaita uan temojmoujtij. Tikitak keniuj kichiuak nochi nejon para mitspaleuis. 22 Keman mouejkaujtatuan temokej Egipto katkaj 70, uan axkan toDios Jehová kichiuakya maj tel miakej mokoneuan kemej sitalimej tein yetokej iluikak.

11 ”Xiktasojta toDios Jehová uan nochipa xiktakamati. Xikchiua tein tanauatia uan tein kiixtalia maj mochiua. 2 Axkan tejua nimitsnojnotstok, amo mokoneuan. Yejuan amo kimatij nion kiitanij keniuj toDios Jehová tetatsakuiltia nion ke semi ueyichiujkej uan ke tel chikauak. 3 Amo kiitakej milagros tein kichiuak nion tein kichiuilij tekiuaj akin taixyekanaya Egipto uan akin ompa nemiaj. 4 Mokoneuan amo no kiitakej tein Dios kinchiuilij soldados de Egipto, icaballos uan icarros tekiuaj. Amo kiitakej keman pankalakkej itech mar Rojo keman namechtokatiayaj uan Jehová kintamiixpoloj.* 5 Yejuan amo kiitakej keniuj Dios namechyekpiak itech tal kampa tauaktok hasta ke nanejkokej nikan. 6 Amo no kiitakej tein kinchiuilij Datán uan Abiram, ikoneuan Eliab, akin katka iixuiuj Rubén. Namoixtenoj takoyonik uan tal kintoloj yejuan, akin iniuan nemiaj, ininkaltsitsin,* nochin inintakeualuan uan nochin inintapialuan. 7 Sayoj ke namejuan kemaj nankiitakej nochi tein Jehová kichiuak ika iueyi chikaualis.

8 ”Xikchiuakan nochi tein namechnauatijtok axkan para nanyeskij nanyolchikaujkej uan nanajsiskej itech tal tein namokuiliskej. 9 Uan no para uejkaua nanemiskej itech tal tein Jehová kinyekiluij namouejkaujtatuan uan ininkoneuan ke kinmakaskia, kampa moteltachiua.*

10 ”Tal tein timokuiliti amo kemej tal ompa Egipto, kampa tikisak. Ompa monekia titeltekitis uan tikuia momets* para tikatekis motatok, ijkon kemej kichiuaj kampa kitokaj kilmej. 11 Kampa nanajsitij onkakej tepemej uan no tamanispan,* uan kualtsin kioui. 12 ToDios Jehová tachia itech nejon tal. ToDios Jehová nochipa kiitstok, desde ke peua se xiuit hasta ke tami.

13 ”Uan komo nankichiuaj tein Dios namechnauatia ijkon kemej namechiluijtok axkan, nankitasojtaj toDios Jehová uan nankitekitiliaj ika nochi namoyolo uan ika nochi tein nanuelij,* 14 yejua kichiuas* maj kioui keman moneki, maj mixkioui uan maj chikauak kioui, uan namejuan nankitekiskej tatok uan nankipiaskej vino tein yankuik uan aceite. 15 Uan kichiuas maj namotalpan onka xiuit para namotapialuan. No nankipiaskej miak taman tein nankikuaskej. 16 Ximoyekpiakan, amo ximokauakan maj namechtanejnektikan para nankinueyichiuaskej okseki dioses uan namoixpiloskej ininixpan. 17 Komo ijkon nankichiuaj, Jehová tel kualanis namouan uan kichiuas maj amo kioui, amo motachiuas namotalpan uan namejuan niman namikiskej itech kuali tal tein Jehová namechmakas.

18 ”Tein namechiluijtok moneki nankipiaskej itech namoyolo uan nankichiuaskej, uan moneki kemej yeskia nankiilpiskej* namomako para nankielnamikiskej uan kemej yeskia nestos namoixkuako. 19 Xikinmachtikan namokoneuan uan ika xitajtokan keman namotaliskej namokalijtik, keman nanejnentoskej itech ojti, keman namotekaskej uan keman nameuaskej. 20 Xikijkuilokan itech koujmej kampa pilkatokej namopuertas uan itech puertas tein kipiaj uejueyi xolalmej kampa nanemij. 21 Komo ijkon nankichiuaj, namejuan uan namokoneuan uejkaua nanemiskej itech tal tein Jehová kinyekiluij namouejkaujtatuan ke kinmakaskia. Nochipa nanemiskej ompa ijkon kemej iluikak uan taltikpak nochipa yetokej.

22 ”Xiktasojtakan toDios Jehová, nochipa xinemikan kemej kineki uan amo keman xikauakan. Komo nankichiuaj nochi tein namechnauatijtok, 23 Jehová kinkixtis akin nemij itech nochi nejon altepemej kampa nanajsitij. Uan namejuan nankintakuiliskej akin nemij itech uejueyi altepemej kampa okachi miakej. 24 Tal kampa nankitaliskej se namomets namoaxka yeski. Namotal peuas desde tal kampa tauaktok hasta Líbano, uan desde ueyiat Éufrates hasta mar Grande.* 25 Nankintaniskej nochin akin namechixnamikiskej. ToDios Jehová kichiuas maj nochin akin nemij kampa nanpanotiaskej mojkamikikan, ijkon kemej yejua namechyekiluij.

26 ”Axkan xikitakan toni nankinekij: maj namechpano tein kuali oso tein amo kuali. 27 Namechpanos tein kuali komo nankichiuaj tein tanauatia toDios Jehová, ijkon kemej namechiluijtok axkan. 28 Uan namechpanos tein amo kuali komo amo nankichiuaj tein toDios Jehová tanauatia, komo amo nankinekij nanemiskej kemej namechnauatijtok axkan uan komo nankinueyichiuaj dioses tein ayamo nankinixmatij.

29 ”Keman toDios Jehová mitsajxitis itech tal tein mitsmakati, itech tepet Guerizim moneki tikijtos tein kuali tein mitspanos komo titatakamati, uan itech tepet Ebal tein amo kuali tein mitspanos komo amo titatakamati. 30 Nejon tepemej yetokej oksekopa den ueyiat Jordán, kampa pankalaki tonaltsin. Yetokej itech inintal cananeos akin nemij ompa Arabá, taixpan de Guilgal, tanakastan den uejueyi koujmej tein onkakej ompa Moré. 31 Nankipanauitij ueyiat Jordán para nankalakiskej itech tal tein toDios Jehová namechmakas. Keman namokuiliskej uan ompa nanemiskejya, 32 moneki nankiyekchiuaskej nochi tein Dios kiixtalij uan tanauatij, tein axkan namechiluijtok.

12 ”Yejua nejin tein Dios kiixtalij uan tanauatij, tein namejuan moneki nochipa nankiyekchiuaskej keman nanemiskej itech tal tein namechmakas Jehová, ininDios namouejkaujtatuan. 2 Keman nankintakuiliskej akin ompa nemij, moneki nantauejueloskej kampa kinueyichiuaj inindioses, maski yetoskej itech uejueyi tepemej, itech lomas oso itsintan se ueyi kouit. 3 Xikixpolokan tein ika taueyichiuaj: altares, tet tein kikejketskej, inintiotsitsin* uan xikinchichinokan koujmej tein ika taueyichiuaj.* Ijkon amo akinok kinelnamikis.

4 ”Amo xikueyichiuakan toDios Jehová kemej yejuan kinueyichiuaj inindioses. 5 Kampa nemiskej nochin namokniuan, toDios Jehová kiixtalis se lugar kampa kiueyichiuaskej uan yeski ichan; ompa xikueyichiuatij. 6 Ompa nankiuikaskej tein nankimaktiliskej, uan no tein nankichichinouiliskej, namodiezmo,* tein nankimaktiliskej porin namotenkaujkej teisa, tein nankinekiskej nankitayokoliskej, kuakuejmej, ichkamej* uan chivos tein achto yolij uan tein yeski taman tein nankinekiskej nankimakaskej. 7 Namejuan uan akin nemij namochan nantakuaskej ompa iixpan toDios Jehová, uan nanyolpakiskej por nochi tein nankichiuanij, porin toDios Jehová namechtatiochiuiani.

8 ”Amo xikchiuakan tein axkan tikchiujtokej nikan. Sejse kichiua tein kiita ke kuali yetok, 9 porin ayamo nanajsij itech tal tein toDios Jehová namechmakas kampa kualtsin nanemiskej. 10 Keman nankipanauiskej ueyiat Jordán uan nanemiskej itech tal tein toDios Jehová namechmakas, yejua kichiuas maj amo namechkuejmolokan akin namechtauelitaj uan ompaka nemij, uan amo teyi namechpanos. 11 Nankiuikaskej nochi tein namechnauatijtok kampa toDios Jehová kiixtalis maj kiueyichiuakan: tein nankimaktiliskej, uan no tein nankichichinouiliskej, namodiezmo, tein nankimaktiliskej porin namotenkaujkej teisa iuan Jehová uan tein yeski taman tein nankinekiskej nankimakaskej. 12 Nanyolpakiskej iixpan toDios Jehová, namejuan uan namookichpipiluan, namosiuapipiluan uan namotakeualuan. No namouan yolpakiskej ikoneuan Leví akin nemiskej itech namoxolal, porin yejuan amo kinmakakej nion se tal kemej namejuan. 13 Ximoyekpiakan para amo nankichichinouiliskej nion se tapial kampa namejuan nankinekiskej. 14 Moneki nankichichinouiliskej Jehová sayoj kampa yejua kiixtalis, kampa nemij namokniuan. Ompa moneki nankichiuaskej nochi tein namechnauatijtok.

15 ”Nochipa keman tiknekis, kampa tinemis uelis tikmiktis se motapial uan tikuas nakat, ijkon kemej toDios Jehová mitstatiochiuijtos. Akin Dios kiita ke amo chipauak uan akin chipauak uelis kikuas, ijkon kemej tikua se masat. 16 Sayoj ke amo xikua iesyo; moneki tiktoyauas talpan kemej yeskia at. 17 Kampa tinemis amo uelis tikuas nion titayis tein tikxelos* de motatok, vino tein yankuik nion aceite. Amo no uelis tikuas kuakuejmej, ichkamej uan chivos tein achto yolij, nion tein tikmaktilis Dios porin timotenkauak teisa, nion tein tiknekis tiktayokolis nion tein yeski taman tein tikmakas. 18 Moneki tikuas nochi nejin iixpan toDios Jehová kampa kiixtalis toDios Jehová. Ompa tikuas tejua uan mookichpil, mosiuapil, motakeualuan uan ikoneuan Leví akin nemiskej itech moxolal. Tiyolpakis iixpan toDios Jehová por nochi tein tikchiuani. 19 Amo xikinelkaua ikoneuan Leví keman tinemis itech tal tein Dios mitsmakas.

20 ”Keman toDios Jehová kichiuas maj okachi ueyia motal ijkon kemej mitsyekiluij, uan tikuasnekis nakat, uelis tikuas keman tiknekis. 21 Komo uejka mokaua kampa toDios Jehová kiixtalia maj kiueyichiuakan, uelis tikmiktis se kuakouej, se ichkat oso se chivo tein Jehová mitsmakak. Moneki tikchiuas ijkon kemej nimitsnauatij uan moneki tikuas kampa tinemis keman tiknekis. 22 Uelis tikuas ijkon kemej tikua se masat. Akin amo chipauak uan akin chipauak uelis kikuas. 23 Senkis xikixtali amo tikuas esti, porin esti kichiua maj se yolto. Yejua ika amo xikua nakat tein esyoj. 24 Amo xikua. Moneki tiktoyauas talpan kemej yeskia at. 25 Amo xikua esti, para kualtsin tinemis tejua uan mokoneuan, porin tikchiujtok tein Jehová kiita ke kuali yetok. 26 Keman tias kampa Jehová kiixtalis, xikuika sayoj tein tikxelouilij uan moaxka, uan tein tikmaktilis porin timotenkauak teisa. 27 Uan itech ialtar toDios Jehová tikchichinouilis nakat uan esti tein tikmaktilis. Uan ininesyo okseki tapialmej tein tiktemaktis no moneki tiktoyauas tatsintan de ialtar toDios Jehová, sayoj ke nakat uelis tikuas.

28 ”Xikchiua nochi tein nimitsnauatijtok, amo xikixpanaui nion se tanauatil. Ijkon nochipa kualtsin tinemis tejua uan mokoneuan, porin tikchiujtok tein toDios Jehová kiita ke kuali yetok.

29 ”ToDios Jehová kinixpolos akin nemij itech tal tein timokuiliti uan ompa tinemis. 30 Sayoj ke satepan, ximoyekpia para amo tikchiuas tein yejuan kichiuayaj. Amo xitajtani keniuj kinueyichiuayaj inindioses, para amo no ijkon tikchiuas. 31 Amo ijkon xikueyichiua toDios Jehová, porin keman yejuan kinueyichiuaj inindioses kichiuaj tein pitsotik tein Jehová tel amo kiuelita. Hasta kinchichinouaj ininkoneuan para kinmaktiliskej inindioses. 32 Xikchiuakan nochi tein namechnauatijtok, amo xikixpanauikan nion se tanauatil. Amo xiktamajxitilikan nion xikuilikan nion teyi.

13 ”Xa nesis akin kijtos ke yejua se tanauatijkej* oso kijtos ke kikochitak* tein panos satepan, uan xa namechiluis ke nesiti oso mochiuati teisa tein se kimojkaita. 2 Uan xa melauj nesis oso mochiuas nejon tein kijtoj. Uan xa no namechiluis iuan xikinueyichiuakan okseki dioses tein amo nankinixmatij. 3 Amo xikakikan tein namechiluis, porin toDios Jehová kiitasneki toni nankichiuaj. Ijkon kimatis ox nankitasojtaj Jehová ika nochi namoyolo uan ika nochi tein nanuelij.* 4 Moneki nankiueyichiuaskej toDios Jehová uan nankimojkatokaskej; moneki nankitakamatiskej itanauatiluan uan nankitajtolkakiskej; moneki nankitekitiliskej uan amo keman nankikauaskej. 5 Sayoj ke nejon tanauatijkej oso akin kikochitak tein panos satepan moneki mikis, porin kinekia kichiuas xikixnamikikan namoDios Jehová, akin namechkixtij de Egipto kampa namechteltekitiltiayaj. Yejua kitemouaya amo xinemikanok kemej toDios Jehová namechnauatij. Moneki nankiixpoloskej tein amo kuali kampa nanemij.

6 ”Xa se mokniuj, mookichpil, mosiuapil, mosiuatsin oso se akin tel kuali iuan timouika kitemos mitskajkayauas, uan mitsichtakailuis ‘Maj tikinueyichiuatij okseki dioses’. Nejon dioses nion tejua nion mouejkaujtatuan nankinixmatij, 7 tein kinueyichiuaj akin nemij uejka oso motaltenoj. 8 Amo ximokaua maj mitstanejnekti uan nion xikaki. Amo no xikikneli nion xiktemo tikpaleuis. 9 Moneki tikmiktis. Moneki tejua peuas tiktetemas* uan satepan nochin moneki kitetemaskej. 10 Moneki tiktetemas hasta maj miki, porin kinekia kichiuas xikaua toDios Jehová akin mitskixtij de Egipto, kampa mitsteltekitiltiayaj. 11 Uan nochin israelitas kimatiskej nejon uan mouiskej, uan amo akinok kichiuas se taman tein tel amo kuali kemej nejon.

12 ”Keman tinemisya itech se ueyi xolal tein toDios Jehová mitsmakas, xa tiktekakilis nejin: 13 ‘Kampa nanemij yetokej seki takamej akin amo yolkualmej akin kinekij kichiuaskej xikauakan Dios, uan kijtojtinemij xikinueyichiuatij okseki dioses tein amo nankinixmatij’. 14 Moneki kuali titatsintokas uan tiktemos tikyekmatis toni mochiujtok. Uan komo melauj mochiuak nejon tein tel pitsotik, 15 moneki tikuis moespada* uan tikinmiktis akin nemij itech nejon ueyi xolal. Xikixpolo ueyi xolal uan nochi tein ompa onkak uan no tapialmej. 16 Satepan moneki tiksentilis tatajko den plaza nochi tein patiyoj tein ompa kipiayaj. Moneki tiktikuiltis ueyi xolal, uan nochi tein tiksentilij tikmaktilis toDios Jehová. Amo keman oksepa kiyekchijchiuaskej nejon ueyi xolal, sayoj tentos tet. 17 Amo ximokuili nion teyi tein ixyetok maj ixpoliui.* Ijkon Jehová amo kualantosok, mitsiknelis uan kichiuas maj mokoneuan momiakilikan, ijkon kemej kinyekiluij mouejkaujtatuan. 18 Moneki tiktakamatis* toDios Jehová uan tikchiuas nochi tein axkan nimitsnauatijtok, uan ijkon tikchiuas nochi tein toDios Jehová kiita ke kuali yetok.

14 ”Namejuan nanikoneuan toDios Jehová. Amo ximotejtekikan nion ximoixkuaximakan* keman aksa* momikilis. 2 Porin namejuan nanxeliujtokej para toDios Jehová. Uan Jehová namechijitak para xiiaxkauan, uan sayoj namejuan okachi namechtasojta, maski yetokej oksekin itech taltikpak.

3 ”Amo xikuakan nion teyi tein Dios kiita ke pitsotik. 4 Yejua nejin tapialmej tein uelis nankinkuaskej: kuakouej, ichkat,* chivo, 5 tataman masat,* chivo tein nemi itech tepet uan ichkat tein nemi tepejxit. 6 Uelis nankikuaskej tein yeski tapial tein istimaxaltik uan tein kikixtia tein kikua uan oksepa kikuajkua. 7 Sayoj ke amo xikinkuakan nejin tapialmej tein oksepa takuajkuaj oso istimaxaltikej: camello, tochij uan damán,* porin oksepa takuajkuaj sayoj ke amo istimaxaltikej. Dios kinita ke amo chipaujkej uan namejuan no moneki ijkon nankinitaskej. 8 Amo no xikuakan pitsot, porin istimaxaltik sayoj ke amo oksepa takuajkua. Dios kiita ke amo chipauak. Amo xikuakan ininnakayo nejin tapialmej nion xikinmatokakan* komo mikkejya.

9 ”Yejua nejin okuiltsitsin tein nemij itech at uan uelis nankinkuaskej: tein kipiaj kemej yeskia ajtapaltsitsin uan pantitikiltikej. 10 Sayoj ke amo xikuakan nion se okuiltsin tein amo kipia ajtapaltsitsin nion pantitikiltik. Dios kinita ke amo chipaujkej.

11 ”Uelis nankikuaskej tein yeski totot tein Dios kiita ke chipauak. 12 Sayoj ke amo xikinkuakan nejin: águila uan águila tein kinkitskia pescados, tsojpilot tein cafentik, 13 chichil kuixij, tiltik kuixij uan nochi tataman kuixij, 14 nochi tataman cuervo, 15 avestruz, lechuza, gaviota, nochi tataman halcón, 16 koujxajxaka* tein tsikitsin uan tein ueyi, ueyi pato tein monotsa cisne, 17 pelícano, tsojpilot, tiltik totot tein kinkitskia pescados, 18 cigüeña, nochi tataman garza, tototsin tein tatemoua kampa tapitsokan* uan tsinaka. 19 Nochi tataman okuiltsitsin tein ajtapalejkej uan olochnemij amo no chipaujkej. Amo xikinkuakan. 20 Uelis nankikuaskej tein yeski okuiltsin tein patani tein Dios kiita ke chipauak.

21 ”Komo tikajsi se tapial miket, amo xikua. Uelis tikmakas se akin okseko kayot uan nemi itech moxolal, uan yejua uelis kikuas, oso uelis tiknamakiltis se akin amo israelita. Porin tejua tixeliujtok para toDios Jehová.

”Amo xikmolonti* se chivojkonet ika ileche inan.

22 ”Xijxiujtika, moneki tiktemakas se parte* de nochi motatok tein mochiuas motalpan. 23 Tikuas uan titayis iixpan toDios Jehová se parte* de motatok, vino tein yankuik, aceite uan kuakuejmej, ichkamej uan chivos tein achto yolij. Tikuas kampa yejua kiixtalis maj kiueyichiuakan. Nejon mitspaleuis nochipa xikmojkatoka toDios Jehová.

24 ”Xa kampa toDios Jehová kiixtalis maj kiueyichiuakan tel uejka mokauas uan moneki uejkaua tinejnemis. Uan kemej toDios Jehová mitstatiochiuis, amo uelis tikuikas nochi porin tel miak yeski. 25 Uelis tiknamakas uan tikuikas tomin kampa toDios Jehová kiixtalis. 26 Uan ompa uelis tikouas tein tiknekis: kuakuejmej, ichkamej, chivos, vino, uan okseki tayil tein teuintij uan okseki taman tein tiknekis. Ompa titakuas iixpan toDios Jehová uan tiyolpakis tejua uan akin nemij mochan. 27 Uan amo xikinelkaua ikoneuan Leví akin nemij itech moueyi xolal, porin yejuan amo kinmakakej nion se tal kemej tejua.

28 ”Ejeyi xiujtika, moneki tikualkuis se parte* de nochi tein mochiuas motalpan uan tiksentilis itech moueyi xolal. Moneki yeski tein mochiuas itech expatika xiuit. 29 Uan ikoneuj Leví, akin amo israelita, akin amo kinpiaok itatuan* uan akin amo nemiok itakatsin uan nemij itech moueyi xolal, ualaskej uan takuaskej hasta ixuiskej. Ijkon, toDios Jehová mitstatiochiuis itech nochi tein tikchiuas.

15 ”Chijchikometika xiuit amo titajtanisok maj mitskepilikan* tein mitstauikiliaj. 2 Moneki mochiuas nejin: akin kitauikiliaj amo tajtanisok maj kitakepikan. Amo monekisok kitajtanis maj kitakepi se iikniuj porin Jehová tanauatij ke amo akin tauikaok. 3 Akin amo israelita uelis tiktajtanis maj mitskepili tein mitstauikilia, sayoj ke mokniuj amo. 4 Maski ijkon, amo akin moneki yeski pobre, porin xikyekmatikan ke Jehová namechtatiochiuis itech tal tein toDios Jehová namechmakas. 5 Ijkon yeski sayoj komo nankikakij nochi tein namechnauatia toDios Jehová, uan nankitakamatij nochi itanauatiluan tein axkan namechmakatok. 6 Porin toDios Jehová namechtatiochiuis ijkon kemej motenkauak. Nankintaneujtiskej tomin akin nemij itech miak altepemej, sayoj ke namejuan amo monekis nantaneuiskej. Uan nankinchiualtiskej tein nankinekiskej akin nemij itech miak altepemej, sayoj ke yejuan amo teyi uelis namechchiualtiskej.

7 ”Keman tinemisya itech tal tein toDios Jehová mitsmakas uan itech moueyi xolal nemis se mokniuj pobre, xikikneli uan amo xitsotsokat. 8 Ika miak pakilis moneki tiktaneujtis mokniuj tein kipolos. 9 Keman ajsitosya chikometika xiuit, amo xiknemili amo tikpaleuis mokniuj pobre uan amo teyi tikmakas, porin itech nejon xiuit amo monekisok mitstakepis. Tel amo kuali yeskia ijkon ximolui. Komo mokniuj kitsajtsilia Jehová uan kiluia tein tikchiujtok, Dios kiitas ke tikchiujtok se tajtakol. 10 Moneki tikmakas tein tikpias ika nochi moyolo uan amo tiktauelmakas, uan ijkon toDios Jehová, kitiochiuas motekiuj uan nochi tein tikchiuas. 11 Porin kampa tinemis nochipa onkaskej pobres. Yejua ika nimitsnauatijtok nochipa xikpaleui mokniuj pobre akin tajyouijtok uan xikmaka nochi tein kipolos.

12 ”Komo mitsnamakiltijkej se mokniuj hebreo,* yeski takat oso siuat uan mitstekitiliani chikuasen xiuit, itech chikometika xiuit moneki tikauas maj youi. 13 Uan keman tikmajkauas moneki tikmakas teisa, amo xikaua maj ijkon youi. 14 Maj amo mitsyolkoko tikmakas seki chivos uan ichkamej,* seki taman tein tiktokas, vino uan aceite. Moneki tikmakas ijkon kemej toDios Jehová mitstatiochiuijtos. 15 Xikelnamiki ke tejua tietoya temako ompa Egipto uan ke toDios Jehová mitsmakixtij. Yejua ika axkan nimitsnauatijtok nejin.

16 ”Sayoj ke xa mitsiluis ke amo kineki mitskauas porin mitstasojta tejua uan akin nemij mochan, uan porin kiuelitak mitstekitilis. 17 Komo ijkon panoua, xiktoki itech puerta, ompa xiknakastali uan xiknakaskoyoni, uan yejua mitstekitilis hasta ke momikilis. No ijkon xikchiua komo siuat uan kineki mokauas mouan. 18 Keman tikauas maj youi amo xiknemili ke titapoloua. Itech chikuasen xiuit yejua kichiuak tekit tein kichiuaskiaj ome takeualmej, uan toDios Jehová mitstatiochiuiani itech nochi tein tikchiuani.

19 ”Moneki tikxelouilis toDios Jehová nochi tapialueuetkej tein achto yolij: kuakuejmej, ichkamej uan chivos. Amo xikintekitilti mokuakuejuan tein achto yolij nion xikinpanxima moichkauan uan mochivos tein achto yolij. 20 Xijxiujtika moneki nankinkuaskej iixpan toDios Jehová tejua uan akin nemij mochan. Nankikuaskej kampa Jehová kiixtalis. 21 Sayoj ke komo metskoxoj, amo tachia oso amo yekkuali por okse taman, amo xikmaktili toDios Jehová. 22 Moneki tikuas itech moueyi xolal. Uelis kikuas akin Dios kiita ke amo chipauak uan akin chipauak, ijkon kemej tikua se masat. 23 Sayoj ke amo xikua iesyo; moneki tiktoyauas talpan kemej yeskia at.

16 ”Xikelnamiki ke itech metsti abib,* moneki tikchiuas iluit tein monotsa Pascua para tikueyitalis toDios Jehová, porin itech nejon metsti toDios Jehová mitskixtij de Egipto keman youak katka. 2 Uan keman tiktemaktis tapialtsin para Pascua, moneki tikmaktilis toDios Jehová kuakuejmej, ichkamej* uan chivos kampa Jehová kiixtalis maj kiueyichiuakan. 3 Amo xikua nejon iuan teisa tein kipias levadura. Chikome tonal moneki tikuas pantsin tein amo kipias levadura kemej ijkuak ijsiujka tikisteuak de Egipto. Nejon mitselnamiktis tein tikijyouij Egipto uan amo keman tikelkauas keniuj tikisak de ompa. 4 Itech nochi nejon chikome tonal, amo kanaj xikpia harinajtix tein kipia levadura. Uan tapialtsin tein tiktemaktis tiotakpa itech yekinika tonal, maj amo mokaua nion teyi de inakayo para mostika. 5 Amo uelis tiktemaktis tapialtsin para Pascua itech tein yeski xolal tein toDios Jehová mitsmakas. 6 Moneki tiktemaktis kampa toDios Jehová kiixtalis maj kiueyichiuakan. Moneki tikmiktis tapialtsin para Pascua niman keman pankalakis tonaltsin, kemej tikchiuak itech tonal keman tikisak de Egipto. 7 Xikchijchiua tapialtsin uan xikua kampa toDios Jehová kiixtalis, uan mostika kualkan uelis timokepas mochan. 8 Chikuasen tonal moneki tikuas pantsin tein amo kipias levadura, uan itech chikometika tonal namosentiliskej para nankiueyichiuaskej toDios Jehová. Amo xitekiti nejon tonal.

9 ”Desde tonal keman peuas tiktekis motatok, moneki tikpouas chikome semanas. 10 Satepan moneki tikchiuas iluit para toDios Jehová keman peuas tiktekis tein mochiuak* motalpan. Ijkuak, tiktayokolis toDios Jehová tein tiknekis, ijkon kemej yejua mitstatiochiuijtos. 11 Uan kampa toDios Jehová kiixtalis maj kiueyichiuakan, xiyolpaki iixpan toDios Jehová. Maj no yolpaki mookichpil, mosiuapil uan motakeual. No akin nemiskej itech moxolal, kemej se ikoneuj Leví, se akin amo israelita, akin amo kinpiaok itatuan* uan akin amo nemiok itakatsin. 12 Xikelnamiki keniuj mitsteltekitiltiayaj ompa Egipto, yejua ika xikchiua nochi nejin tein Dios kiixtalij.

13 ”Chikome tonal moneki tikchiuas iluit itech sakakaltsitsin, keman tiksentilisya nochi motatok, aceite uan vino. 14 Keman tikchiuas nejin iluit, xiyolpaki tejua, mookichpil, mosiuapil uan motakeual. Maj no yolpakikan akin nemij itech moxolal, kemej se ikoneuj Leví, se akin amo israelita, akin amo kinpiaok itatuan uan akin amo nemiok itakatsin. 15 Chikome tonal tiiluichiuas para tikueyitalis toDios Jehová. Tikchiuas nejon iluit kampa Jehová kiixtalis, porin toDios Jehová mitstatiochiuis itech nochi tein tikchiuas uan kichiuas maj moteltachiua motalpan, uan tejua titelyolpakis.

16 ”Expa xiuit, nochin takamej moneki kiueyichiuatiuij toDios Jehová kampa yejua kiixtalis. Yeski itech nejin eyi iluimej: keman tikuas pantsin tein amo kipia levadura, keman peuas tiktekis tein mochiuak uan keman mochiuas iluit itech sakakaltsitsin. Nochin akin kiueyichiuatiuij Jehová moneki kiuikiliskej teisa. 17 ToDios Jehová semi mitstatiochiuijtos, yejua ika no moneki tikmakas miak taman.

18 ”Itech sejse ueyi xolal tein toDios Jehová mitsmakas, moneki tikinixtalis jueces uan taixyekananij. Uan yejuan moneki kiyektaliskej ininkuejmoluan israelitas kemej kijtoua tanauatil. 19 Amo xikpata tein kijtoua tanauatil nion xitechichikoui keman tikmelaujtos se kuejmol. Amo no xikaua maj mitstaxtauikan para titakajkayauas, porin nejon kichiua maj amo yektanemiliok akin yektanemiliaya uan uelis kichiuas maj takajkayaua akin yolkuali. 20 Sayoj moneki tiktemos maj mochiua tein kuali. Ijkon tiksentokas tinemis uan timokuilis tal tein toDios Jehová mitsmakas.

21 ”Amo xiktoka nion se taman kouit para ika titaueyichiuas* kampa tikchijchiuilis ialtar toDios Jehová.

22 ”Amo no xiketsa se tet para ika titaueyichiuas. ToDios Jehová kitauelita nejon.

17 ”Komo se kuakouej oso se ichkat* mokokoua oso amo yekkuali, amo xikmaktili toDios Jehová. ToDios Jehová tel amo kiuelita nejon.

2 ”Itech se ueyi xolal tein toDios Jehová mitsmakas, xa se takat oso se siuat kichiuas tein toDios Jehová kiita ke amo kuali uan amo kichiuas tein motenkauak iuan. 3 Xa kinueyichiuas okseki dioses uan moixpilos ininixpan oso moixpilos iixpan tonaltsin, metsti oso nochi tein onkak ne iluikak. Nejua amo nitanauatijtok maj mochiua nejon. 4 Keman mitsmatiltiskej nejin oso tiktekakilis, moneki tiktemos tikyekmatis toni mochiujtok. Uan komo melauj mochiuak tein tel amo kuali ompa Israel, 5 moneki tikuikas ikalakyan ueyi xolal nejon takat oso siuat. Moneki kitetemaskej* hasta maj miki porin kichiuak tein amo kuali. 6 Sayoj uelis kimiktiskej aksa* komo omen oso eyin kiitakej uan kijtouaj tein kichiuak. Amo uelis kimiktiskej komo sayoj se kiitak. 7 Akin kiitakej yejuan moneki peuas kitetemaskej uan satepan nochin moneki kitetemaskej. Moneki tikixpolos tein amo kuali kampa tinemi.

8 ”Komo itech se ueyi xolal onkak se kuejmol tein amo ueli tikyektalia porin tel ouij, moneki tias kampa toDios Jehová kiixtalis. Uelis yeski komo aksa temiktij, oso porin sekin moteteluiliaj, moteuijkej oso kipiaj okse kuejmol. 9 Xiouj kampa yetoskej tiopixkamej levitas uan juez akin tekititos nejon tonalmej uan xikinixpantili kuejmol, uan yejuan mitsiluiskej toni kiixtaliskej. 10 Moneki tikchiuas ijkon kemej mitsiluiskej kampa Jehová kiixtalis. Amo xikixpanaui nion se taman tein mitsnauatiskej. 11 Moneki tikchiuas ijkon kemej kijtoua tanauatil tein mitsnextiliskej uan tein kiixtaliskej. Senkis xiktakamati nochi tein mitsnauatiskej. 12 Moneki mikis akin moueyimatis uan amo kinekis kikakis juez nion tiopixkat akin kitekitilijtos toDios Jehová. Moneki tikixpolos de Israel tein amo kuali. 13 Uan nochin israelitas kimatiskej nejon uan mouiskej, uan amo akinok moueyimatis.

14 ”Keman timokuilis uan tinemisya itech tal tein toDios Jehová mitsmakas, xa tikijtos nejin: ‘Maj tikixtalikan se tekiuaj para maj techixyekana, kemej itech okseki altepemej’. 15 Komo panoua nejon, moneki tikixtalis akin toDios Jehová kijitas. Moneki yeski se mokniuj israelita. Amo uelis tikixtalis kemej tekiuaj akin amo israelita. 16 Akin yeski tekiuaj amo uelis kinsentilis miak caballos. Amo no uelis kintitanis Egipto seki israelitas para maj kinkouatij okseki caballos, porin Jehová namechiluij: ‘Amo keman ximokepakan Egipto’. 17 Maj amo no kinpia miakej siuamej, porin nejon kichiuas maj kikaua Dios. Maj amo no kisentili tel miak plata uan oro. 18 Keman peuas taixyekanasya, moneki kimaijkuilos nejin tanauatilmej para yejua. Kikuis amatajkuilol tein kipiaj tiopixkamej levitas para ompa kiitstias.

19 ”Yejua mokauilis nejin amatajkuilol uan moneki mojmostaj kileros. Ijkon kimatis keniuj kimojkatokas toDios Jehová uan kichiuas nochi tein tanauatia uan tein kiixtalia. 20 Komo kileroua, amo kinemilis ke okachi ueyichiujkej ke iikniuan uan amo kiixpanauis nion se tanauatil. Ijkon, yejua uan ikoneuan kinixyekanaskej israelitas tel miak xiujmej.

18 ”Tiopixkamej levitas uan nochin ikoneuan Leví amo kinmakaskej nion se tal kemej kinmakaskej israelitas. Yejuan kikuaskej tepitsin de nochi tein israelitas kichichinouiliaj Jehová. Yejua nejon tein ininaxka. 2 Yejua ika amo kinmakaskej nion se tal kemej ininikniuan. Jehová kinmakas nochi tein kinpolos ijkon kemej kiniluij.

3 ”Yejua nejin tein israelitas kinmakaskej tiopixkamej. Akin kitemaktis se kuakouej oso se ichkat,* moneki kimakas tiopixkat iajkol tapial, ikamachal uan ipox. 4 Moneki tikmakas tein yekinika tikixtis de motatok, vino tein yankuik uan de moaceite. No moneki tikmakas inintojmiyo motapialuan tein yekinika tikinkixtilis. 5 ToDios Jehová kinijitak nochin ikoneuan Leví para maj nochipa kitekitilikan Jehová kemej tiopixkamej.

6 ”Sayoj ke, xa se levita kisas den ueyi xolal kampa nemia uan kinekis yas kampa Jehová kiixtalis maj kiueyichiuakan. 7 Komo youi, uelis ompa kitekitilis toDios Jehová kemej nochin iikniuan levitas, akin ompa yetokej iixpan Jehová. 8 Yejua no kimakaskej tein kikuas ijkon kemej akin ompa tekititoskej, maski kipias tomin porin kinamakak tein kikauilijkej iuejkaujtatuan.

9 ”Keman tiajsis itech tal tein toDios Jehová mitsmakas, amo xikchiua nion se taman tein tetajyaltij tein kichiuaj akin nemij itech nejon altepemej. 10 Maj amo akin kichichino se ikoneuj, maj amo akin mochiua adivino nion maj kikui magia. Maj amo akin kitemo tein kimatiltis toni panos satepan nion maj tenaualui. 11 Maj amo akin kitemo akin kinnojnotsa mikemej oso se adivino, uan maj amo akin tajto iniuan mikemej. 12 Porin Jehová amo kineki kiitas akin kichiua nejin, uan toDios Jehová kinkixtiti akin nemij itech nejon altepemej porin kichiuaj nejon tein tetajyaltij. 13 Moneki nochipa tiktakamatis toDios Jehová.

14 ”Porin akin nemij itech altepemej tein namokuilitij, kintajtolkakiaj naualmej uan adivinos, sayoj ke toDios Jehová amo namechkaua xikchiuakan nejon. 15 ToDios Jehová kiixtalis se tanauatijkej* kemej nejua uan yeski semej namokniuan. Moneki nankikakiskej. 16 Yejua nejon tein nankitajtanijkej toDios Jehová ompa Horeb itech tonal keman namosentilijkej. Nankijtojkej: ‘Maj amo technojnotsa toDios Jehová nion maj oksepa tikitakan nejin ueyi tit,* porin uelis timikiskej’. 17 Uan Jehová nechiluij: ‘Tein kijtouaj kuali yetok. 18 Nikixtalis semej ininikniuan para maj kinmatilti tein nikijtoua kemej tejua tikchiua, uan nikiluis tein moneki kijtos. Yejua kiniluis nochi tein niknauatis. 19 Uan niktatsakuiltis akin amo kikakis tein yejua kijtos notokaykopa.

20 ”’Komo se tanauatijkej moixeuia kijtos notokaykopa teisa tein amo niknauatijtok oso kijtoua teisa inintokaykopa okseki dioses, moneki mikis. 21 Sayoj ke xa timoyoliluis: “¿Keniuj tikmatiskej ke Jehová amo kijtoj nejon?”. 22 Komo kijtoua teisa itokaykopa Jehová uan amo mochiua, kijtosneki ke Jehová amo kiluij nejon. Yejua kijtoj porin moueyimati. Amo xikmouili’.

19 ”ToDios Jehová kinixpolos akin nemij itech tal tein toDios Jehová mitsmakas. Tikintakuilis uan tinemis itech ininxolaluan uan ininchan. 2 Itech nejon tal tein toDios Jehová mitsmakas, moneki tikxelos eyi uejueyi xolalmej. 3 Tal tein toDios Jehová mitsmakas moneki exkan tikxelos, uan itech sejse parte mokauas se ueyi xolal. Uan moneki tikyekchijchiuas ojmej para uelis ompa cholos akin temiktis.

4 ”Yejua nejin tein moneki kichiuas akin temiktis: komo kimiktia iikniuj maski amo kinekia nion kitauelitaya, 5 moneki cholos itech semej nejin xolalmej para maj amo kimiktikan. Xa kojkouiti iuan iikniuj uan kuakopini ihacha keman kitejtektok kouit, uan itech uetsiti iikniuj uan kimiktia. 6 Komo ueyi xolal uejka yetok, akin kinamiki momakepas xa kitokatias porin tel kualantos, kiajsitiuj uan kimiktis. Sayoj ke amo kinamikia maj kimiktikan porin amo kitauelitaya iikniuj. 7 Yejua ika nimitsnauatia: ‘Xikinxelo eyi uejueyi xolalmej’.

8 ”ToDios Jehová kichiuas maj okachi ueyia motal ijkon kemej kinyekiluij mouejkaujtatuan, uan mitsmakas nochi tal tein motenkauak kinmakas. 9 Ijkon yeski komo tiktasojta toDios Jehová uan nochipa tinemi kemej kineki, ijkon kemej axkan nimitsnauatijtok. Keman motal yeski okachi ueyi, moneki tikxelos okseki eyi uejueyi xolalmej. 10 Ijkon, amo kimiktiskej akin amo teyi kichiujtok itech tal tein toDios Jehová mitsmakas, uan amo mitstatsakuiltiskej.

11 ”Sayoj ke, yejua nejin tein moneki mochiuas komo se takat kitauelita iikniuj, kiixtalia kimagas uan kimiktia, uan choloua itech semej nejin xolalmej. 12 Taixyekananij den ueyi xolal kampa nemia, moneki kititaniskej aksa* maj kikuiti uan maj kikauiliti akin kinamiki momakepas, uan yejua kimiktis. 13 Amo xikikneli. Xikixpolo de Israel akin kimiktis se akin amo teyi kichiujtok. Komo ijkon tikchiua kualtsin tinemis.

14 ”Itech tal tein toDios Jehová mitsmakas, amo xikolini ilinderos movecino tein kitalijkej mouejkaujtatuan.

15 ”Amo uelis kitatsakuiltiskej aksa komo sayoj se kijtoua ke kichiuak teisa tein amo kuali oso se tajtakol. Sayoj uelis kitatsakuiltiskej komo omen oso eyin kiitakej uan kijtouaj tein kichiuak. 16 Komo aksa kitakajkayauilia okse uan kijtoua ke amo kitakamatik se tanauatil, 17 nochin omen moneki yaskej iixpan Jehová. Kinitatiuij tiopixkamej uan jueces akin tekititoskej nejon tonalmej. 18 Jueces moneki kiyekmatiskej toni mochiuak, uan komo nejon takat kitakajkayauilijtok iikniuj uan kipantijtok teisa tein amo kichiuak, 19 moneki nankichiuiliskej tein kiixtalijtoya kichiuilis iikniuj. Moneki tikixpolos tein amo kuali kampa tinemi. 20 Oksekin kimatiskej uan mouiskej, uan amo akinok kichiuas se taman tein tel amo kuali kemej nejon. 21 Amo akin xikikneli: akin temiktis maj no kimiktikan, akin teixpitsinis maj no kiixpitsinikan, akin tetanpixos maj no kitanpixokan,* akin temakokos maj no kimakokokan uan akin temetskokos maj no kimetskokokan.

20 ”Komo tikinteuiti akin mitstauelitaj uan tikita ke yejuan kinpiaj okachi caballos uan carros, uan ke ininsoldados okachi miakej ke namejuan, amo xikinmouili, porin toDios Jehová akin mitskixtij de Egipto mouan yetok. 2 Achto ke peuas namoteuiskej, tiopixkat moneki motokis uan kinnojnotsas soldados. 3 Moneki kiniluis: ‘Xikakikan namejuan israelitas. Namoteuitijya iniuan akin namechtauelitaj. Ximoyolchikauakan, amo xiuiuiyokakan* uan amo xikinmouilikan, 4 porin toDios Jehová namouan youi. Yejua kinixpolos akin namechtauelitaj uan namechmakixtis’.

5 ”Taixyekananij no moneki kiniluiskej soldados: ‘Akin yankuixtok mochijchiuilij se kali uan ayamo ompa nemi, maj mokepa ichan, porin uelis kimiktiskej uan okse kikuis. 6 Oso akin kitokak uvas uan ayamo kiteki, maj mokepa ichan, porin uelis kimiktiskej uan okse kitekis. 7 Oso akin kijtanikya se siuat uan ayamo iuan monamiktia, maj mokepa ichan, porin uelis kimiktiskej uan okse iuan monamiktis’. 8 Taixyekananij no moneki kiniluiskej soldados: ‘Akin moui uan kinemilia ke tapoloti, maj mokepa ichan, para amo kichiuas maj okseki soldados no mouikan’. 9 Keman nejon taixyekananij tamitajtoskej, moneki kinixtaliskej seki takamej para maj kinixyekanakan soldados.

10 ”Keman tiajsis itech se ueyi xolal para tikintakuilis akin ompa nemij, achto moneki tikiniluis toni moneki kichiuaskej para amo tikinteuis. 11 Komo kijtouaj ke kichiuaskej tein tikiniluia uan mitskauaj xikalaki, nochin akin ompa nemij mitstekitiliskej uan kichiuaskej tein tikinnauatis. 12 Sayoj ke komo amo kinekij uan mitsixnamikij, moneki tikyoualos ueyi xolal para maj amo akin kisa. 13 Uan toDios Jehová mitspaleuis xikintani, uan moneki tikinmiktis nochin takamej akin ompa nemiskej. 14 Sayoj ke uelis timoinkauilis siuamej, konemej, tapialmej uan nochi tein onkas itech ueyi xolal. No tikinkuilis nochi tein kipiaskej akin mitstauelitaj. ToDios Jehová mitsmaka nochi nejon.

15 ”Ijkon tikchiuas itech nochin uejueyi xolalmej tein tel uejka yetokej, uan amo pouij itech altepemej kampa nanajsitij. 16 Sayoj ke akin nemiskej itech xolalmej tein toDios Jehová mitsmakas, moneki tikintamimiktis. Amo xikaua nion se. 17 Moneki tikintamiixpolos nochin akin kinixmatij kemej hititas, amorreos, cananeos, perizitas, heveos uan jebuseos, ijkon kemej toDios Jehová mitsnauatij. 18 Ijkon amo namechnextiliskej tein pitsotik tein yejuan kichiuaj keman kinueyichiuaj inindioses. Komo no nankichiuaskiaj nejon, nankiixnamiktoskiaj toDios Jehová.

19 ”Komo tikyoualoua se ueyi xolal para timokuilis uan miak tonalmejya tikinteuijtok akin ompa nemij, amo xikintamota koujmej tein ompa onkaskej. Uelis tikuas inintakilo sayoj ke amo xikintamota. Amo monekiskia tikchiuilis se kouit tein tikchiuiliskia se takat akin iuan timoteuijtok. 20 Sayoj uelis tikintamotas koujmej tein tikmati ke amo teyi kitemakaj para se kikuas. Tikuis nejon koujmej para ika titatsakuas itech nochi nejon ueyi xolal hasta ke tikintakuilis.

21 ”Yejua nejin tein moneki mochiuas itech tal tein toDios Jehová mitsmakas. Komo kiajsij se akin kimiktijkej uan amo kimatij akoni kimiktij, 2 taixyekananij uan jueces moneki kisaskej uan kiitaskej katin ueyi xolal okachi amo uejka yetok de kampa kiajsikej miket. 3 Uan taixyekananij de nejon ueyi xolal moneki kikuiskej se kuakouej tein ayamo taskaltiani, amo kitekitiltianij uan amo keman tayuntajuiani. 4 Moneki temoskej uan kiuikaskej kuakouej itech se atauit* kampa motalojtok miak at uan kampa amo tayuntajuianij nion tatokanij. Ompa moneki kikechpostekiskej kuakouej.

5 ”Uan tiopixkamej levitas motokiskej, porin toDios Jehová kinijitak para maj kitekitilikan uan para maj itokaykopa Jehová kintajtanilikan tein kuali oksekin. Keman aksa* kiteuiskej oso kimiktiskej, tiopixkamej kijtoskej keniuj moyektalis nejon kuejmol. 6 Uan nochin taixyekananij den ueyi xolal tein okachi amo uejka yetok den miket, moneki momajtekiskej mero kampa yetos kuakouej tein kimiktijkej. 7 Uan moneki kijtoskej: ‘Tejuan amo tikmiktijkej nejin takat nion tikitakej tein panok. 8 ToDios Jehová, amo xitechtajtakolti tejuan timokoneuan akin titechmakixtij. Uan amo xitechtaxtaualti tejuan tiisraelitas por nejin takat akin kimiktijkej maski amo teyi kichiujtoya’. Ijkon yejuan amo kintatsakuiltiskej. 9 Komo nankichiuaj tein Jehová kiita ke kuali yetok, amo namechtatsakuiltiskej porin kimiktijkej nejon takat akin amo teyi kichiujtoya.

10 ”Komo iniuan timoteuiti akin mitstauelitaj uan toDios Jehová mitspaleuia xikintani uan tikinkuiteua, 11 uan tikita ke ompa youi se siuat kuakualtsin uan tikixuelita uan tikneki iuan timonamiktis, 12 uelis tikuikas mochan. Nejon siuat moneki mokuaximas,* moistitekis, 13 moneki mopatilis tasal tein motalilij keman kikuiteujkej uan nemis mochan. Yejua kichokilis itat uan inan se metsti. Satepan uelis iuan timotekas, uan yejua yeski mosiuatsin. 14 Sayoj ke komo amo tiyolpakiok iuan, moneki tikauas maj youi kampa yejua kinekis. Sayoj ke amo uelis tiknamakas nion tiktajyouiltis, porin tikauilchiuak.

15 ”Yejua nejin tein moneki kichiuas se takat akin kinpia ome siuamej uan okachi kitasojta se. Komo nejon takat kinpiak okichpipil iniuan nochin omen, sayoj ke tayekana iokichpil siuat akin amo semi kitasojta, moneki kichiuas kemej kinamiki. 16 Itech tonal keman kintaxejxelouilis ikoneuan, amo uelis kimakas iokichpil siuat akin okachi kitasojta tein kinamiki kimakas akin tayekana. 17 Keman kixejxelos nochi tein kipias, moneki kimakas tein kinamiki iokichpil siuat akin amo semi kitasojta, porin yejua tayekana. Moneki kimakas se achiok ke tein kinmakas okseki ikoneuan. Kimakas tein kinamiki porin achto yolik.

18 ”Yejua nejin tein moneki mochiuas komo se takat kipia se iokichpil akin amo takaki uan taixnamiki, amo kitakamati itat nion inan. Uan maski yejuan kitemouanij kipaleuiskej, amo kineki kinkakis. 19 Itatuan moneki kikitskiskej uan kiuikaskej ikalakyan ueyi xolal kampa nemi. 20 Uan moneki kiniluiskej taixyekananij akin ompa mosentiliaj: ‘Tookichpil amo takaki, taixnamiki uan amo kineki techtakamatis. Tel kampets uan tel tauana’. 21 Uan nochin takamej de nejon ueyi xolal moneki kitetemaskej* hasta maj miki. Ijkon moneki tikixpolos tein amo kuali kampa tinemi uan nochin israelitas kimatiskej nejon uan mouiskej.

22 ”Yejua nejin tein moneki mochiuas komo se takat kichiua se tajtakol uan kinamiki maj kimiktikan. Keman kimiktiskej uan kikoujpampiloskej, 23 maj amo pilkato nochi youal. Maj kitokakan nejon tonal. Porin Dios kiita kemej teisa tein tetajyaltij akin kikoujpampilouaj. Komo amo tiktoka nejon tonal, tikpitsotilis tal tein toDios Jehová mitsmakas.

22 ”Komo tikajsi se kuakouej oso se ichkat* tein kipoloj mokniuj, amo xikchiua kemej yeskia amo tikita. Moneki tikuikilis mokniuj. 2 Sayoj ke komo uejka nemi oso amo tikixmati, moneki tikuikas in tapial mochan, uan ompa tikpias hasta maj mokniuj kitemoti. Uan moneki tikepilis. 3 No ijkon moneki tikchiuas komo tikajsi iburro, itasal, oso tein yeski taman tein mokniuj kipolos. Amo xikchiua kemej yeskia amo tikita.

4 ”Komo tikita ke iburro mokniuj oso ikuakouej uetsi itech ojti, amo xikchiua kemej yeskia amo tikita. Moneki tikpaleuis mokniuj maj ueli kiketsa.

5 ”Se siuat maj amo motalili tasal de se takat, uan se takat maj amo motalili tasal de se siuat, porin Jehová amo kineki kiitas akin kichiua nejin.

6 ”Komo itech ojti tikajsi se totot kinpachojtok ipiluan oso ipiotetsitsin, yeski itech se kouit oso talpan, amo xikuika tenan uan ipiluan. 7 Uelis tikinuikas ipiluan, sayoj ke xikajkaua in tenan. Ijkon xikchiua para kualtsin tinemis uan uejkaua tiyoltos.

8 ”Komo tikchijchiua se kali, moneki titatsakuas sentatenoj kalpani. Ijkon, komo aksa* panuetsi uan miki, amo yeski itajtakol nion akin de mochan.

9 ”Keman tiktokas uvas amo xiktoka okse taman xinach. Komo tiktoka okseki taman, nochi tein mochiuas moneki tiktemakas kampa kiueyichiuaj Dios.

10 ”Amo xikinsentali se kuakouej uan se burro para maj tayuntajuikan.

11 ”Amo ximotalili se tasal tein tajkitil ika itojmiyo ichkat uan ika lino.

12 Moneki tiktenpilouilis motasal tein timopankentia seki taman para tikualtsintilis. Xiktentalili itech naui puntas tein kipia.

13 ”Yejua nejin tein moneki mochiuas komo se takat monamiktia iuan se siuat uan iuan moteka, sayoj ke satepan kitauelita. 14 Uan komo no kichiua maj amo kuali kiitakan siuat porin kijtouilia ke keman iuan motekak, momakak cuenta ke ipa motekkaya iuan se takat, 15 itatuan nejon ichpoch moneki yaskej ikalakyan ueyi xolal. Kinuikiliskej taixyekananij tein kinextis ke ininsiuapil ayamo motekaya iuan se takat. 16 Uan itat ichpoch moneki kiniluis taixyekananij: ‘Nejua nikmakak nosiuapil nejin takat, sayoj ke axkan kitauelita, 17 uan axkan kijtouilia ke ipa motekkaya iuan okse takat. Sayoj ke nikan yetok tein kinextia ke nosiuapil amo motektoya iuan okse takat’. Uan yejuan kiixpatauaskej tasal ininixpan taixyekananij. 18 Uan taixyekananij den ueyi xolal kikitskiskej in takat uan kitatsakuiltiskej. 19 Kitajtaniskej maj kitemaka se kilo ika 140 gramos* de plata, uan nejon plata kimakaskej itat in ichpoch, porin nejon takat kichiuak maj amo kuali ika tajtokan se ichpoch israelita. Nejon ichpoch kisentokas yetos iuan nejon takat. Uan takat amo keman uelis kikauas.

20 ”Sayoj ke, yejua nejin tein moneki mochiuas komo melauj tein takat kijtoua, uan ichpoch amo kipia nion teyi para kinextis ke amo motektoya iuan se takat. 21 Moneki kiuikaskej ichpoch ikaltenoj itat, uan takamej akin nemij itech ueyi xolal moneki kitetemaskej* hasta maj miki. Kemej motekak iuan se takat keman nemiaok iuan itat, kichiuak se taman tein tepinaujtij itech tal tein poui Israel. Ijkon moneki tikixpolos tein amo kuali kampa tinemi.

22 ”Komo kiajsitij se takat uetstok iuan se tesiuauj, takat uan siuat moneki mikiskej. Ijkon moneki tikixpolos de Israel tein amo kuali.

23 ”Yejua nejin tein moneki mochiuas komo se ichpoch* ixyetokya monamiktis iuan se takat, sayoj ke okse takat kiajsi itech ueyi xolal uan iuan moteka. 24 Namejuan moneki nankinuikaskej nochin omen ikalakyan nejon ueyi xolal uan nankintetemaskej hasta maj mikikan. Ichpoch moneki nankimiktiskej porin amo motsajtsilij uan takat porin kiauilchiuak se tesiuauj. Ijkon moneki tikixpolos tein amo kuali kampa tinemi.

25 ”Sayoj ke komo takat kiajsi ichpoch kampa amo kaltaj uan ika mauiltia,* sayoj takat moneki mikis; 26 ichpoch amo teyi xikchiuilikan. Amo moneki mikis porin amo tajtakolchiuak. Panoua kemej ijkuak se takat kimiktia iikniuj. 27 Porin takat kiajsik ichpoch kampa amo kaltaj uan yejua motsajtsilij, sayoj ke amo akin uelik kipaleuij.

28 ”Yejua nejin tein moneki mochiuas komo se takat kiajsi se ichpoch akin iseltiok, kikitskia uan iuan moteka uan aksa kinita. 29 Nejon takat akin iuan motekak moneki kimakas itat ichpoch 570 gramos* de plata uan iuan monamiktis nejon ichpoch. Kemej kiauilchiuak, amo keman uelis kikauas.

30 ”Nion se takat uelis kikuis itakpanan, para amo kipinaujtis itat.

23 ”Nion se takat akin moxamanilij tein kipia ikestsalan* oso mokixtilij tein ika moxixa* uelis kichiuas nochi tein kichiua se israelita akin kiueyichiua Jehová.

2 ”Nion se akin yolik porin itatuan auilnenkej uelis kichiuas nochi tein kichiua se israelita akin kiueyichiua Jehová. Ikoneuan amo uelis kichiuaskej nochi tein kichiua se israelita akin kiueyichiua Jehová.

3 ”Nion se ammonita oso moabita uelis kichiuas nochi tein kichiua se israelita akin kiueyichiua Jehová. Ininkoneuan amo keman uelis kichiuaskej nochi tein kichiua se israelita akin kiueyichiua Jehová. 4 Amo uelis kichiuaskej nejon porin keman tikistiaya de Egipto amo mitsmakakej tein tikuaskia uan tein titayiskia. Uan no porin kitaxtauijkej Balaam iokichpil Beor, akin yetoya Petor ompa Mesopotamia, para maj tajtani maj mitspano tein amo kuali. 5 Sayoj ke toDios Jehová amo kichiuak tein tajtanik Balaam, ta toDios Jehová kichiuak maj mitspano tein kuali, porin toDios Jehová mitstasojtaya. 6 Amo keman xikchiua nion teyi tein kinpaleuis maj kualtsin nemikan.

7 ”Amo xikintauelita ikoneuan Edom, porin mokniuan.

”Amo xikintauelita akin kayomej Egipto, porin ompa titepalnemia. 8 Ininixuiuan ininkoneuan uelisya kichiuaskej nochi tein kichiuaj israelitas akin kiueyichiuaj Jehová.

9 ”Keman nansenyetoskej kampa nankintajtaliskej namokaltsitsin* para nankinteuiskej akin namechtauelitaj, amo ximopitsotilikan. 10 Komo se takat mopitsotilia porin de youak kisa ixinachyo* kampa moxixa,* moneki kisas uan yas kampa amo kaltaj uan ompa mokauas. 11 Keman tiotakis moneki mopakas uan keman tapoyauisya uelisya mokepas. 12 Moneki tikixtalis se lugar kampa amo kaltaj uan ompa tias baño. 13 No moneki tikpias se palita. Uan keman tias baño, moneki titachkuas uan tiktalpachos kuitat. 14 Porin toDios Jehová yetok mouan para mitsmakixtis uan para mitspaleuis xikintani akin mitstauelitaj. Maj amo yeto nion teyi tein pitsotik kampa tikintajtalis kaltsitsin. Ijkon, Dios amo kiitas ke tikchiujtok teisa tein tepinaujtij uan kisentokas mouan yetos.

15 ”Komo se takeual akin yetok temako kicholuia iteko uan mitsitati, amo xiktemakti iuan iteko. 16 Yejua uelis nemis kampa kinekis, itech semej xolalmej kampa namejuan nanemij. Amo xiktajyouilti.

17 ”Nion se siuat oso takat israelita moneki monamakas para auilnemis kampa taueyichiuaj. 18 Akin auilnemi amo uelis kiuikas ichan toDios Jehová tomin para kichiuas tein motenkauak, porin nejon tomin ika monamakak. ToDios Jehová kiita ke pitsotik nejon.

19 ”Komo tiktaneujtia mokniuj tomin, takual oso okse taman, amo xiktajtani maj mitsmaka okachi, ta sayoj tein tiktaneujtij. 20 Uelis tiktajtanis okachi akin amo israelita, sayoj ke mokniuj amo. Ijkon, toDios Jehová mitstatiochiuis itech nochi tein tikchiuas keman tinemis itech tal tein timokuiliti.

21 ”Komo timotenkaua teisa iuan toDios Jehová, niman xikchiua. Porin xikyekmati ke toDios Jehová mitstajtanis xikchiua, uan komo amo tikchiua, nejon yeski se tajtakol. 22 Sayoj ke, komo amo teyi timotenkaua amo tikchiuas nion se tajtakol. 23 Moneki tikchiuas tein tikijtoua uan tein timotenkaua. Tein timotenkaua kemej yeskia teisa tein tiktayokolia toDios Jehová.

24 ”Komo tikalaki kampa mokniuj kitoktok uvas, uelis tikuas uvas hasta tiixuis, sayoj ke amo ximouikili itech momorral nion se.

25 ”Komo tikalaki kampa mokniuj kitoktok trigo, uelis tikmatekis tein chikauakya, sayoj ke amo xikteki ika se tepos.

24 ”Komo se takat monamiktia iuan se siuat, sayoj ke satepan amo kinekiok iuan yetos porin kiita ke kichiujtok teisa tein tepinaujtij, takat moneki kijkuilos se amat kampa kinextis ke kikauakya. Nejon amat moneki kimakas uan kiluis maj youi. 2 Satepan ke nejon siuat yas, uelis monamiktis iuan okse takat. 3 Xa uelis panos ke nejon takat satepan kitauelitas, kijkuilos se amat kampa kinextis ke kikauakya, kimakas uan kiluis maj youi. Oso xa nejon takat momikilis. 4 Komo panoua nejon, yekinika takat akin iuan monamiktijka uan kitokak, amo uelis oksepa iuan monamiktis satepan ke siuat mopitsotilij, porin Jehová tel amo kiuelita nejon. Amo xikchiua se tajtakol kemej nejon itech tal tein toDios Jehová mitsmakas.

5 ”Komo se takat yekin monamiktij, se xiuit amo uelis yeski soldado nion kimakaskej okse tekit. Moneki mokauas ichan uan kiyolpaktis isiuatsin.

6 ”Keman aksa* tetaneujtis teisa, maj amo mokauili metat nion metamayit hasta maj kitakepikan, porin akin taneui amo kipias toni ika kichijchiuas tein kikuas para yoltos.

7 ”Komo aksa kiichteki, kitajyouiltia uan kinamaka se iikniuj israelita, akin kichiuas nejon moneki mikis. Moneki tikixpolos tein amo kuali kampa tinemi.

8 ”Keman onkas pitsotik kokolis* tein monotsa lepra,* xikchiuakan nochi tein namechiluiskej tiopixkamej levitas. Xikchiuakan nochi tein nikinnauatij. 9 Xikelnamikikan tein toDios Jehová kichiuilij Míriam itech ojti, keman nankistiayaj de Egipto.

10 ”Komo tiktaneujtia teisa mokniuj, amo xikalaki ichan para timokuilis tein mitsiluij ke mitsmakas para kinextis ke mitstakepis. 11 Moneki timochias kalampa uan maj yejua kikixti tein mitsmakas. 12 Uan komo pobre, amo ximokauili hasta mostika ipantaken tein mitsmakas. 13 Moneki tikepilis tein mitsmakas niman keman pankalakis tonaltsin. Uan keman kochitiujya kipias tein mokentis uan kitajtanis Dios maj mitstatiochiui, uan toDios Jehová kiitas ke tikchiujtok tein kuali yetok.

14 ”Amo teyi xikuili se tetekitilijkej akin tajyouijtok uan pobre, uelis yeski se mokniuj oso se akin amo israelita uan nemi itech moueyi xolal. 15 Moneki tiktaxtauis nejon tonal achto ke pankalakis tonaltsin porin tajyouijtok. Komo amo tiktaxtauia, amo kipias toni kikuas uan yejua kitsajtsilis Jehová uan tejua tikchiujtos se tajtakol.

16 ”Tetatmej amo moneki mikiskej komo ininkoneuan tajtakolchiuaj, uan konemej amo no moneki mikiskej komo inintatuan tajtakolchiuaj. Akin tajtakolchiuas yejua moneki mikis.

17 ”Keman tikyektalis ikuejmol se akin amo israelita oso akin amo kinpiaok itatuan,* xikchiua kemej kijtoua tanauatil. Uan komo tiktaneujtia teisa akin amo nemiok itakatsin, amo ximokauili ipantaken hasta maj mitskepili tein tiktaneujtij. 18 Xikelnamiki ke tejua tietoya temako ompa Egipto uan ke toDios Jehová mitskixtij de ompa. Yejua ika nimitsnauatijtok nejin.

19 ”Keman tiktekis tein mochiuak motalpan uan tikelkauas se tamamal tein ilpitok,* amo xikuitiok. Ompa xikauaya para maj kikui akin amo israelita uan nemi mouan, akin amo kinpiaok itatuan uan akin amo nemiok itakatsin. Ijkon toDios Jehová mitstatiochiuis itech nochi tein tikchiuas.

20 ”Keman tiktsetselos olivojkouit para maj uetsi itakilo, sayoj sepa ijkon xikchiua. Tein mokauas yeski para akin amo israelita uan nemi mouan, akin amo kinpiaok itatuan uan akin amo nemiok itakatsin.

21 ”Keman tiktekis uvas, amo xikuitiok tein mokauas. Nejon yeski para akin amo israelita uan nemi mouan, akin amo kinpiaok itatuan uan akin amo nemiok itakatsin. 22 Xikelnamiki ke tejua tietoya temako ompa Egipto. Yejua ika nimitsnauatijtok nejin.

25 ”Keman omen kipiaskej se kuejmol, uelis kinitatiuij jueces. Yejuan kiitaskej nochi tein panok uan kiixejekoskej akoni kipia tajtakol. 2 Komo akin kipia tajtakol kinamiki maj kiuijuitekikan, juez tanauatis maj kiixakatapachokan uan maj kiuijuitekikan iixtenoj. Kiitaskej toni kichiuak para kiixtaliskej kanachpa kiuijuitekiskej. 3 Sayoj uelis kiuijuitekiskej hasta cuarentajpa. Komo mapanoskiaj, kipinaujtiskiaj teixtenoj.

4 ”Amo xiktenilpi* kuakouej keman ipan tajtaksatok* trigo.

5 ”Komo seki iknimej amo ueuejka nemij uan semej momikilia uan amo kipiak nion se okichpil, yejua nejin tein moneki mochiuas. Isiuatsin sayoj uelis monamiktis iuan se akin ichankauj takat akin momikilij. Icuñado moneki iuan monamiktis. 6 Okichpil tein achto kipias kiitaskej kemej ikoneuj takat akin momikilij, para maj itokay amo ixpoliui de Israel.

7 ”Sayoj ke komo nejon takat amo kineki iuan monamiktis, siuatsin moneki kinitatiuj taixyekananij ikalakyan ueyi xolal uan kiniluis: ‘Nocuñado amo kineki nouan monamiktis kemej ixyetok maj mochiua. Amo kineki tapaleuis maj itokay iikniuj amo ixpoliui de Israel’. 8 Taixyekananij de nejon ueyi xolal moneki kinotsaskej nejon takat uan iuan tajtoskej. Komo yejua kisentoka kijtoua ke amo kineki monamiktis iuan, 9 nejon siuatsin moneki motokis kampa yetok. Uan ininixtenoj taixyekananij moneki kikixtilis itekak icuñado, kiixchijchas uan kijtos: ‘Yejua nejin tein moneki se kichiuilis takat akin amo kineki kipias se konet para iikniuj’. 10 Desde ijkuak, ompa Israel ijkon kinixmatiskej ichankauan: kampa nemi akin kikixtilijkej itekak.

11 ”Komo ome takamej moteuiaj uan isiuauj semej nejon takamej mokalakia para kipaleuis itakauj uan kikitskia ikestsalan okse takat, 12 moneki tikmakotonas nejon siuat. Amo xikikneli.

13 ”Amo xikpia itech momorral ome taman pesas de tet, se ueyi uan se tsikitsin. 14 Amo xikpia mochan ome tataman chikiuit tein ika titatamachiua, se ueyi uan se tsikitsin. 15 Nochipa moneki tikpias pesas uan chikiuit tein ajsitok tatamachiuaj, para uejkaua tiyoltos itech tal tein toDios Jehová mitsmakas. 16 Porin toDios Jehová amo kineki kiitas akin ijkon takajkayaua.

17 ”Xikelnamikikan tein namechchiuilijkej ikoneuan Amalec itech ojti, keman nankistiayaj de Egipto. 18 Keman namejuan nantelsioujtoyaj, yejuan namechnamikitoj uan kinteuijkej nochin akin mokaujtiayaj taikan. Amo kimojkatokakej Dios. 19 ToDios Jehová kichiuas maj amo mitskuejmolokan akin nemiskej tatenoj den tal tein toDios Jehová mitsmakas. Ijkuak, moneki tikintamiixpolos ikoneuan Amalec uan amo akinok kinelnamikis. Amo xikelkaua tikchiuas nejin.

26 ”Yejua nejin tein moneki tikchiuas keman tikuisya tal tein toDios Jehová mitsmakati uan ompa tinemisya. 2 Moneki tikuis tatok tein yekinika chikauayas itech tal tein toDios Jehová mitsmakas. Uan tikalakis nejon tatok itech se chikiuit uan tias kampa toDios Jehová kiixtalis maj kiueyichiuakan. 3 Moneki tikitatiuj tiopixkat akin tekititos nejon tonalmej uan tikiluis: ‘Ijkon kemej Jehová kinyekiluij touejkaujtatuan ke techmakaskia nejin tal, axkan nikanya ninemi. Yejua ika niktasojkamatiliko toDios Jehová’.

4 ”Uan tiopixkat kikuis chikiuit tein tikuikas uan kitalis taixpan de ialtar toDios Jehová. 5 Uan tejua moneki tikijtos iixpan toDios Jehová: ‘Nouejkaujtat katka arameo uan miakkan nentinemia.* Yejua temok Egipto para ompa nemis maski amo ompa kayot katka, uan amo miakej katkaj ichankauan. Sayoj ke ompa ikoneuan motelmiakilijkej uan tel chikaujkej katkaj. 6 Sayoj ke akin nemiaj Egipto peuak semi techtekitiltiaj uan techtajyouiltiaj. 7 Yejua ika peuak tiktataujtiaj maj techpaleui Jehová, ininDios touejkaujtatuan, uan Jehová techkakik uan kiitak keniuj titajyouiayaj uan nochi tein techchiuiliayaj. 8 Satepan, Jehová kikuik iueyi chikaualis, kichiuak miak taman tein temojmoujtij uan tein amo keman mochiujtoya para techkixtis de Egipto. 9 Techualkuik nikan uan techmakak nejin tal kampa moteltachiua.* 10 Axkan nikualkui tatok tein yekinika chikauayak itech tal tein Jehová nechmakak’.

”Uan moneki tiktalis iixpan toDios Jehová uan timoixpilos iixpan toDios Jehová. 11 Uan tiyolpakis iuan levita uan akin amo israelita uan nemi namouan, porin toDios Jehová mitsmakak miak taman tein kuali tejua uan akin nemij mochan.

12 ”Itech expatika xiuit, keman tiktamitekis nochi tein mochiuak motalpan uan tikxelosya diezmo,* moneki tikinmakas levitas uan akin amo israelitas, no akin amo kinpiajok inintatuan* uan akin amo nemiok inintakatsin. Yejuan takuaskej hasta ixuiskej itech moueyi xolal. 13 Uan tikijtos iixpan toDios Jehová: ‘Nikixtij de nochan tein nikxeloj uan nikinmakak levitas uan akin amo israelitas, no akin amo kinpiajok inintatuan uan akin amo nemiok inintakatsin, ijkon kemej tinechnauatij. Niktakamatini nochi motanauatiluan uan amo nikixpanauiani nion se. 14 Amo nikuaj nion teyi tein nikxeloj keman nikchokilijtoya se akin momikilij uan amo nikmatokak* nejon keman amo nichipauak katka. Amo no nikinmaktiliani mikemej nion tepitsin. Nikchiuani nochi tein nechiluiani noDios Jehová uan nikchiuani nochi tein tinechnauatiani. 15 Yejua ika, xikita desde iluikak, kampa titaxeloj para tinemis, uan xikintatiochiui mokoneuan israelitas uan xiktiochiua tal tein titechmakak, nejin tal kampa moteltachiua,* ijkon kemej tikinyekiluij touejkaujtatuan’.

16 ”Axkan toDios Jehová mitsnauatijtok xikchiua nochi tein kiixtalij uan tanauatij. Moneki tiktakamatis ika nochi moyolo uan ika nochi tein tiuelis.* 17 Axkan Jehová mitsyekiluia ke yeski moDios komo tinemi kemej kineki, tikchiua tein tanauatia uan tein kiixtalia uan tiktajtolkaki. 18 Uan axkan tejua no tikyekiluij Jehová ke tiyeski iaxka, akin okachi kitasojta, ijkon kemej yejua motenkauak mouan. No tikyekiluij ke tikchiuas nochi tein tanauatia. 19 Yejua kijtoj ke kichiuas okachi xiueyichiujkej ke nochin akin nemij itech okseki altepemej akin yejua kinchijchiuak. Uan komo tiknextia ke tixeliujtok para toDios Jehová yejua kichiuas tein motenkauak uan kichiuas maj miakkan mitsixmatikan uan xiueyichiujkej”.

27 Uan keman Moisés yetoya iniuan taixyekananij, kinnauatij nochin israelitas nejin: “Xikchiuakan nochi tein namechiluijtok axkan. 2 Uan itech tonal keman nankipanauiskej ueyiat Jordán uan nanajsiskej itech tal tein toDios Jehová namechmakas, xiksentilikan uejueyi tet uan xikintamitalilikan tenex. 3 Xikijkuilokan itech nejon temej nochi nejin tanauatilmej. Ijkon, nankalakiskej itech tal tein toDios Jehová namechmakas, se tal kampa moteltachiua* ijkon kemej namechyekiluij Jehová, ininDios namouejkaujtatuan. 4 Keman nankipanauiskejya ueyiat Jordán, moneki nankisentiliskej nejin temej itech tepet Ebal uan nankitamitaliliskej tenex, ijkon kemej namechnauatijtok axkan. 5 Ompa no moneki tikchijchiuilis toDios Jehová se altar ika tet. Amo xikui se tepos para tiktajtapanas nejon tet. 6 Xikchijchiuili ialtar toDios Jehová ika tet tein ajajsitok. Ompa tikchichinouilis toDios Jehová tein tikmaktilis. 7 Moneki tikmaktilis tapialmej para iuan nansentakuaskej* ompa, uan tiyolpakis iixpan toDios Jehová. 8 Kuali xikijkuilo itech temej nochi nejin tanauatilmej”.

9 Moisés uan tiopixkamej levitas kiniluijkej nochin israelitas: “Ikoneuan Israel, amo teyi xikijtokan uan xitakakikan. Axkan toDios Jehová namechxeloj para xiiaxkauan. 10 Moneki nankitajtolkakiskej toDios Jehová uan nankichiuaskej tein kiixtalia uan tein tanauatia, ijkon kemej axkan namechiluijtok”.

11 Nejon tonal, Moisés kinnauatij israelitas: 12 “Keman nankipanauiskejya ueyiat Jordán, ikoneuan Simeón, Leví, Judá, Isacar, José uan Benjamín yaskej itech tepet Guerizim para kijtoskej tein kuali tein kinpanos komo tatakamatij. 13 Uan ikoneuan Rubén, Gad, Aser, Zabulón, Dan, uan Neftalí yaskej itech tepet Ebal para kijtoskej tein amo kuali tein kinpanos komo amo tatakamatij. 14 Uan levitas chikauak kiniluiskej nochin israelitas nejin:

15 ”‘Maj Dios kitatsakuilti akin kichijchiuas uan kitatis* se tiotsin* de tepos. Jehová kitajyaltia nejon tein kimachijchiuaj akin ika tekitij kouit uan tepos’. (Uan nochin kijtoskej ‘¡Maj ijkon mochiua!ʼ).*

16 ”‘Maj Dios kitatsakuilti akin amo kipoujkaitas itat oso inan’. (Uan nochin kijtoskej ‘¡Maj ijkon mochiua!’).

17 ”‘Maj Dios kitatsakuilti akin kiolinis linderos tein kinextiaj kani tami ital ivecino’. (Uan nochin kijtoskej ‘¡Maj ijkon mochiua!’).

18 ”‘Maj Dios kitatsakuilti akin kichiuas maj se akin amo tachia mopolo itech ojti’. (Uan nochin kijtoskej ‘¡Maj ijkon mochiua!’).

19 ”‘Maj Dios kitatsakuilti akin ika mauiltis se akin amo israelita, akin amo kinpiaok itatuan* uan akin amo nemiok itakatsin’. (Uan nochin kijtoskej ‘¡Maj ijkon mochiua!’).

20 ”‘Maj Dios kitatsakuilti akin motekas iuan itakpanan, porin nejon kipinaujtia itat’. (Uan nochin kijtoskej ‘¡Maj ijkon mochiua!’).

21 ”‘Maj Dios kitatsakuilti akin motekas iuan se tapial’.* (Uan nochin kijtoskej ‘¡Maj ijkon mochiua!’).

22 ”‘Maj Dios kitatsakuilti akin motekas iuan iikniuj siuat, maski yeski isiuapil itat oso isiuapil inan’. (Uan nochin kijtoskej ‘¡Maj ijkon mochiua!’).

23 ”‘Maj Dios kitatsakuilti akin motekas iuan imonanʼ. (Uan nochin kijtoskej ‘¡Maj ijkon mochiua!’).

24 ”‘Maj Dios kitatsakuilti akin kiichtakachias iikniuj para kimiktisʼ. (Uan nochin kijtoskej ‘¡Maj ijkon mochiua!’).

25 ”‘Maj Dios kitatsakuilti akin kiselis tomin para maj kimiktikan* akin amo teyi kichiujtokʼ. (Uan nochin kijtoskej ‘¡Maj ijkon mochiua!’).

26 ”‘Maj Dios kitatsakuilti akin kiauilmatis nejin tanauatilmej uan amo kitakamatis’. (Uan nochin kijtoskej ‘¡Maj ijkon mochiua!’).

28 ”Uan komo yekmelauj tiktajtolkaki toDios Jehová uan tikyekchiua nochi tein tanauatia kemej axkan nimitsiluijtok, toDios Jehová kichiuas okachi xiueyichiujkej ke nochin akin nemij itech okseki altepemej. 2 Komo nochipa tiktajtolkaki toDios Jehová, yejua mitsteltatiochiuis uan tikpias miak taman tein kuali:

3 ”Mitstatiochiuis itech ueyi xolal uan kampa tatokalaj.

4 ”Tikinpias miakej mokoneuan, moteltachiuas motalpan uan motelmiakiliskej mokuakuejuan uan moichkauan.*

5 ”Mochikiuj uan kampa tikatilia harina nochipa pexontos.*

6 ”Mitstatiochiuis itech nochi tein tikchiuas.

7 ”Jehová kichiuas xikintani akin mitstauelitaj. Yejuan mosenkuiskej para mitsteuiskej, sayoj ke amo mitstaniskej, ta eliuis chocholoskej. 8 Jehová kichiuas xiksentili tel miak tatok uan nochi tein tikchiuas kuali kisas. Xikyekmati ke toDios Jehová mitstatiochiuis keman tinemis itech tal tein mitsmakas. 9 Komo tiksentoka tikchiua tein toDios Jehová tanauatia uan tinemi kemej yejua kineki, Jehová mitsxelos para nochipa xiiaxka, ijkon kemej mitsyekiluij. 10 Nochin akin nemij itech okseki xolalmej mitsixmatiskej ika itokay Jehová, uan mitsmouiliskej.

11 ”Jehová kichiuas xikinpia tel miakej mokoneuan uan tel miak tapialmej. No kichiuas maj moteltachiua itech tal tein Jehová kinyekiluij mouejkaujtatuan ke mitsmakaskia. 12 Jehová kitapos iluikak, kampa kipia miak taman tein kuali, uan kichiuas maj kioui keman moneki uan para kuali kisas nochi tein tikchiuas. Tejua tikintaneujtis tomin akin nemij itech miak altepemej, sayoj ke tejua amo monekis titaneuis. 13 Komo tiksentoka tikchiua tein toDios Jehová tanauatia kemej axkan nimitsiluijtok, Jehová mitsueyitalis uan amo kikauas maj oksekin mitsixyekanakan, nochipa titatanis uan amo keman titapolos. 14 Amo xikixpanaui nion se tanauatil tein axkan nimitsiluijtok, uan amo xikinueyichiua okseki dioses.

15 ”Sayoj ke komo amo tiktajtolkaki toDios Jehová uan amo tikyekchiua nochi tein tanauatia uan tein kiixtalia, mitspanos nochi nejin tein amo kuali uan amo teyi uelis tikchiuas:

16 ”Titajyouis itech ueyi xolal uan kampa tatokalaj.

17 ”Mochikiuj uan kampa tikatilia harina amo keman kipias nion teyi.

18 ”Amo tikinpias konemej, amo motachiuas motalpan uan amo no tikinpias kuakuejmej nion ichkamej.

19 ”Amo kuali kisas nion teyi tein tikchiuas.

20 ”Jehová kichiuas maj amo mitskisa nion teyi tein tikixtalis. Kichiuas ximojkamikto uan mitstatsakuiltis hasta ke mitsixpolojtiuetsis uan amo tietosok. Mitspanos nejon komo tikchiua tein amo kuali uan tikaua.* 21 Jehová kichiuas maj mitskui se kokolis* uan amo tipajtis hasta mitsmiktis, uan amo tinemisok itech tal tein timokuiliti. 22 Jehová kichiuas maj mitskui tuberculosis, chikauak totonik uan xitamiposauaya.* Kichiuas maj totonik mitsijyomikti, maj mitsteuikan akin mitstauelitaj, maj chikauak tonalejeka uan maj tachauisyoua. Mitspanos nochi nejin hasta ke timikis. 23 Kichiuas maj tel amo kioui uan maj tel tauakto.* 24 Jehová kichiuas maj amo kioui, ta maj sayoj uetsi talnex uan xal hasta xiixpoliui. 25 Jehová kichiuas maj mitstanikan akin mitstauelitaj. Namoolochkuiskej para tikinteuitiuj, sayoj ke kemej mitstaniskej eliuis ticholos, uan nochin akin nemij itech okseki altepemej momoujtiskej keman kiitaskej tein mitspanotok. 26 Keman timikisya, nochin totomej uan koujtajtapialmej mitskuaskej uan amo akin kinmojmoujtis.

27 ”Jehová mitstatsakuiltis uan kichiuas xikpia kokomej kemej tein kinkui ompa Egipto uan maj mitskisa kokomej motsintan,* xisauati uan xitelajuayoua, uan amo tipajtisok. 28 Jehová kichiuas xikuatapolo, amo xitachia uan nion xikmati toni tikchiuas. 29 Timanentinemis tajkotonal, kemej manentinemi akin amo tachia, uan amo kuali kisas nion teyi tein tikchiuas; mitskajkayauaskej uan miakpa mitstachtekiskej, uan amo akin mitspaleuis. 30 Tikijtanis se siuat para iuan timonamiktis, sayoj ke okse takat ika mauiltis.* Tikchijchiuas se kali, sayoj ke amo ompa tinemis. Tiktokas uvas, sayoj ke amo tikuas keman takis. 31 Moixtenoj kimiktiskej mokuakouej, sayoj ke tejua amo tikuas. Moixtenoj mitsichtekiliskej moburro uan amo tikajsisok. Akin mitstauelitaj mokuiliskej moichkauan uan amo akin mitspaleuis. 32 Tikitas keniuj mookichpipiluan uan mosiuapipiluan kintemakaj okseko uan nochipa tikintemojtos, sayoj ke amo teyi uelis tikchiuas. 33 Nochi tein mochiuas motalpan uan tein tikpias, kikuaskej oksekin akin amo tikinixmati. Nochipa mitskajkayauaskej uan mitstajyouiltiskej. 34 Tikuatapolosnekis keman tikitas nochi nejin.

35 ”Jehová mitstatsakuiltis uan kichiuas xikpia kokomej motankuako uan mokesko. Mitstamikemis desde mometsko hasta mokuako. Mitstelkokos uan amo tipajtisok. 36 Jehová mitsuikas tejua uan tekiuaj akin tikixtalis itech okse altepet kampa amo tiixmati nion mouejkaujtatuan ixmatkej. Ompa tikinueyichiuas okseki tiotsitsin,* tein chijchiujtokej ika kouit uan tet. 37 Uan akin nemiskej kampa Jehová mitskauatiuj, mouiskej, mitsuetskiliskej uan mitstenkuitoskej.

38 ”Tiktokas miak xinach, sayoj ke amo miak tiksentilis porin chapolimej tatamiskej. 39 Tiktokas uvas uan mochiuas, sayoj ke amo titayis vino nion tiksentilis nion teyi porin ijkochimej kitamikuaskej. 40 Itech nochi motalpan tikpias olivojkouit, sayoj ke kemej xinis itakilo, amo tikpias aceite para timoojxilis. 41 Tikinpias okichpipil uan siuapipil, sayoj ke mitsinkuiliskej uan kinuikaskej temako. 42 Temikiuij miakej chapolimej uan kitamikuaskej nochin koujmej uan tein mochiuas motalpan. 43 Akin amo israelita uan nemi mouan tatantias, uan tejua titapolojtias. 44 Yejua mitstaneujtis tomin, sayoj ke tejua amo tikpias para tiktaneujtis. Yejua yeski ueyichiujkej uan mitsixyekanas.

45 ”ToDios Jehová kichiuas maj mitspano nochi nejin tein amo kuali, hasta ke tiixpoliuis uan amo teyi uelis tikchiuas. Ijkon yeski porin amo tikakik nion tikchiuak tein mitsnauatij uan kiixtalij. 46 Uan nochipa tikijyouis nochi nejin tejua uan mokoneuan, uan nejon kinextis toni panoua keman amo se tatakamati. 47 Ijkon mitspanos porin keman tikpiaya miak taman uan amo teyi mitspolouaya, amo mitsyolpaktij tiktekitilis toDios Jehová. 48 Jehová kichiuas maj mitsteuitij akin mitstauelitaj uan tikintekitilis. Keman tikintekitilijtos timayantos, tiamiktos, amo tikpias tein timotalilis uan amo teyi tikpias. Mitsteltekitiltiskej hasta ke mitsixpoloskej.

49 ”Jehová kintitanis maj mitsteuitij akin tel uejka nemij, akin kayomej oksekopa den taltikpak uan tajtouaj okse tajtol tein amo tikixmati. Yejuan sepasan mitsteuitiuij, ijkon kemej se águila sepasan kikitskia se tapialtsin. 50 Yejuan tel amo yolkualmej yeskij uan amo kinikneliskej akin xiuejkejya nion akin pilimejok. 51 Kinkuaskej motapialuan uan tein mochiuas motalpan hasta ke tiixpoliuis. Amo mitskauiliskej motatok nion vino tein yankuik nion aceite nion mokuakuejuan nion moichkauan, hasta ke mitsixpoloskej. 52 Kinyoualoskej uejueyi xolalmej kampa tinemis, uan amo mitskauaskej xikisa hasta maj xitini uejueyi tepamit tein ika tajtatsaktok, tein tiknemilia ke uelis mitspaleuis. Kinyoualoskej nochi nejon uejueyi xolalmej tein yetokej itech tal tein toDios Jehová mitsmakak. 53 Uan ijkuak, monekis tikinkuas mookichpipiluan uan mosiuapipiluan tein toDios Jehová mitsinmakak. Tikchiuas nejon porin akin mitstauelitaj amo mitskauaskej xikisa uan mitstajyouiltiskej.

54 ”Hasta takat akin okachi kualtakat uan kuali nemi, amo kiiknelis iikniuj nion isiuatsin akin kitasojta nion ikoneuan tein mokauaskejok. 55 Amo kinuantis nion tepitsin keman kinkuajtos ikoneuan. Amo kipiasok nion teyi porin akin mitstauelitaj amo akin kikauaskej maj kisa den ueyi xolal uan semi tetajyouiltiskej. 56 Uan siuat akin kualtakat uan kuali nemi akin amo keman kinemilij kitalis se imets talpan porin amo teyi kipolouaya, amo kiiknelis itakatsin akin kitasojta nion iokichpil nion isiuapil. 57 Amo kinuantis keman kinkuas ikoneuan nion placenta tein kisas keman yolis se ikonetsin, ta kiichtakakuas. Kichiuas nejon porin akin mitstauelitaj amo mitskauaskej xikisa den ueyi xolal uan mitstajyouiltiskej.

58 ”Yejua nejin panos komo amo tiktakamati nochi tanauatilmej tein nikan ijkuiliujtok, uan komo amo tikueyitalia* itokay toDios Jehová tein semi ueyi uan se kimojkaita. 59 Jehová kichiuas maj mitspano tejua uan mokoneuan miak taman tein amo kuali uan tein uejkauas. No kichiuas maj namechkui kokolismej tein uejkaua namechtajyouiltis. 60 Yejua kichiuas maj mitskui nochi kokolismej tein kinkui akin nemij Egipto, tein tikmouiliaya maj mitskui uan amo tipajtisok. 61 Uan Jehová hasta kichiuas maj mitskui okseki kokolismej oso maj mitstajyouilti okse taman tein amo ijkuiliujtok itech itanauatil. Mitspanos nejon hasta ke tiixpoliuis. 62 Maski nantelmiakejya nankatkaj kemej sitalimej tein yetokej ne iluikak, tel amo namiakejok namokauaskej, porin amo nankitajtolkakkej toDios Jehová.

63 ”Uan ijkon kemej Jehová kiyolpaktij kichiuas kualtsin xinemikan uan ximomiakilikan, Jehová no kiyolpaktis namechtamiixpolos. Uan amo nanyetoskejok itech tal tein amo uejkaua namechmakati.

64 ”Jehová namechmoyauas* itech nochi altepemej, desde kampa peua taltikpak hasta kampa tami. Ompa monekis tikinueyichiuas tiotsitsin tein chijchiujtoskej ika kouit uan tet, tein nion tejua nion mouejkaujtatuan nankinixmatij. 65 Itech nejon altepemej amo tiyolseujtos uan nion kanaj uelis timoseuis. Keman ompa tietos, Jehová kichiuas ximotekipachojto, xiixkoujti uan amo xikchia nion teyi tein kuali. 66 Kampa yeski kinekiskej mitsmiktiskej. Nochi youal uan nochin tonal timoujtinemis uan amo tikmatis ox timakisas. 67 Kemej timojkamiktos uan tikitas miak taman tein mitsmojmoujtis, keman tanesis tikijtos ‘¡Majkan tayouakya yeskia!’ uan keman tayouas tikijtos ‘¡Majkan tanesiskiaya!’. 68 Xikyekmatikan ke Jehová kichiuas ximokepakan Egipto itech barco, kampa namechiluijka ke amo keman namokepaskiajok. Keman ompa nanyetoskej, nankinekiskej maj namechkouakan akin namechtauelitaj para nankintekitiliskej, sayoj ke amo akin namechkouas”.

29 Yejua nejin tein Jehová kinauatij Moisés maj motenkaua iniuan israelitas ompa Moab. Nejin mouika iuan tein Dios ipa motenkaujka iniuan israelitas ompa Horeb.

2 Uan Moisés kinsentilij nochin israelitas uan kiniluij: “Namejuan nankiitakej nochi tein Jehová kichiuilij tekiuaj akin taixyekanaya Egipto, itakeualuan uan nochin akin ompa nemiaj. 3 Nankiitakej keniuj kintatsakuiltij akin nemiaj Egipto uan keniuj kichiuak miak taman tein amo keman mochiujtoya. 4 Sayoj ke hasta axkan, Jehová amo namechkauani xikajsikamatikan toni yekmelauj kijtosneki tein nankiitakej uan tein nankikakkej. 5 ‘Itech nejin 40 xiujmej tein namechixyekanak itech tal kampa tauaktok, namotasal uan namotekak amo patik. 6 Amo nankikuajkej pantsin uan amo nantayikej vino nion okseki tayil tein teuintij. Sayoj ke namechmakak tein monekia para xikmatikan ke nejua namoDios Jehová’. 7 Satepan nanejkokej nikan, uan tekiuaj Sehón akin nemia ompa Hesbón, uan tekiuaj Og akin taixyekanaya ompa Basán techteuikoj, sayoj ke tikintankej. 8 Tikintalkuilijkej uan tikinmakakej nejon tal ikoneuan Rubén, ikoneuan Gad uan seki* ikoneuan Manasés. 9 Yejua ika, para maj kuali kisa nochi tein nankichiuaskej, xikchiuakan tein timotenkauatij.

10 ”Axkan nanochin nikan nanyetokej iixpan toDios Jehová: taixyekananij, uejueyi chiuanimej, nochin takamej israelitas, 11 namokoneuan, namosiuauan, akin amo israelitas uan namouan nemij, desde akin kojkoui hasta akin asaka. 12 Nikan nanyetokej para nankiyekijtoskej iixpan toDios Jehová ke nankichiuaskej tein axkan namotenkaujtokej iuan toDios Jehová. 13 Nanyeskij naniaxkauan uan yejua yeski namoDios, ijkon kemej namechyekiluij namejuan uan namouejkaujtatuan Abrahán, Isaac uan Jacob.

14 ”Amo sayoj namouan nimotenkaujtok nejin tein nankiyekijtojkej ke nankichiuaskej. 15 Nimotenkaujtok iniuan akin axkan touan yetokej iixpan toDios Jehová, uan iniuan akin amo nikan yetokej. 16 (Porin namejuan nankimatij keniuj tinemiaj ompa Egipto uan keniuj tipanotiajkej itech miak altepemej hasta ke tiejkokej nikan. 17 Uan namejuan nankiitayaj tein pitsotik tein ompa kipiayaj uan inintiotsitsin* tein tetajyaltiaj,* tein chijchiujtoyaj ika kouit, tet, plata uan oro). 18 Amo xikauakan maj nion se takat, se siuat, oso se familia tein nikan yetokej kikaua toDios Jehová uan maj kinueyichiua nejon tiotsitsin. Akin ijkon kichiuas yeski kemej inaluayo se kouit tein chichik uan tepajuia.

19 ”Sayoj ke xa moajsis se akin kikakis tein axkan nankiyekijtokej uan moueyimatis. Yejua ika kinemilis ke maski kisentokas kichiuas tein yejua kinekis amo teyi kipanos. Uan nejon tein kichiuas no kinuejuelos oksekin. 20 Jehová amo kinekis kitapojpoluis. Jehová tel kualanis iuan uan kipanos nochi tein amo kuali tein nikan ijkuiliujtok, uan Jehová kichiuas maj amo akin kielnamikiok. 21 Jehová kichiuas maj amo yetook iniuan nochin israelitas. Uan kichiuas maj kipano nochi tein amo kuali tein ijkuiliujtok itech itanauatil porin amo kichiuak tein motenkauak.

22 ”Mokoneuan akin yoliskej satepan uan akin amo israelitas uan uejka ualeuaskej kiitaskej ke Jehová semi tauejueloj itech nejin tal. 23 Kiitaskej ke kichiuak maj itech nejin tal ualpantepeui tet tein xotatiualaj,* istat uan tit.* Yejua ika amo ueli tatokaj, amo teyi ixua uan amo taselia. Kiitaskej ke mochiuak kemej Sodoma, Gomorra, Admá uan Zeboyim, uejueyi xolalmej tein Jehová kinixpoloj porin tel kualantoya. 24 Yejuan uan akin nemij itech okseki altepemej motajtaniskej:* ‘¿Keyej Jehová ijkon kichiuilij nejin tal? ¿Toni kitelkualantij?’. 25 Uan kinnankiliskej: ‘Panok nejon porin amo kichiujkej tein motenkaujkej iuan Jehová, ininDios ininuejkaujtatuan. Amo kichiujkej tein yejua kiixtalij keman kinkixtij de Egipto. 26 Peuak kinueyichiuaj okseki dioses uan moixpilouaj ininixpan. Nejon dioses amo kinixmatiaj uan kiniluijka maj amo kinueyichiuakan. 27 Uan Jehová tel kualanik uan kichiuak maj kinpano nochi tein amo kuali tein nikan ijkuiliujtok. 28 Yejua ika, kemej Jehová tel kualantoya kinkixtij de kampa nemiaj uan kinuikak itech okse tal, kampa kisentokaj nemij hasta axkan’.

29 ”ToDios Jehová kimati tein amo akinok kimati. Yejua techmatiltia tein moneki tikmatiskej tejuan uan tokoneuan nochipaya, para maj tiktakamatikan nochi nejin tanauatilmej.

30 ”Nimitskauak xikita toni tiknekia maj mitspano: tein kuali oso tein amo kuali. Keman mitspanosya nochi tein nimitsiluij, tikelnamikis itech nochin altepemej kampa toDios Jehová mitskauatiuj. 2 Uan komo tejua uan mokoneuan oksepa nankiueyichiuaj toDios Jehová uan nankitakamatij ika nochi namoyolo uan ika nochi tein nanuelij,* ijkon kemej namechnauatijtok axkan, 3 toDios Jehová kichiuas ximokepakan, namechiknelis uan namechkixtis den altepemej kampa toDios Jehová namechkauatiuj. 4 Maski nantamitiuij hasta oksekopa den taltikpak, toDios Jehová namechkixtis de ompa uan kichiuas ximokepakan. 5 ToDios Jehová mitsuikas itech tal tein motatuan kitankej keman tateuijkej, uan ompa tinemis. Uan yejua kichiuas kualtsin xinemi uan maj mokoneuan okachi miakej ke mouejkaujtatuan. 6 ToDios Jehová mitsyolchipauas tejua uan mokoneuan. Ijkon tiktasojtas toDios Jehová ika nochi moyolo uan ika nochi tein tiuelis,* uan tiksentokas tiyoltos. 7 Uan toDios Jehová kichiuas maj kinpano nochi nejin tein amo kuali akin mitstauelitayaj uan mitskuejmolouayaj.

8 ”Uan tejua oksepa tiktajtolkakis Jehová uan tikchiuas nochi tein tanauatia, ijkon kemej axkan nimitsiluijtok. 9 ToDios Jehová semi mitstatiochiuis itech nochi tekit tein tikchiuas. Kichiuas maj motelmiakilikan mokoneuan uan motapialuan uan maj moteltachiua motalpan, porin toDios Jehová oksepa kiyolpaktis kichiuas kualtsin xinemi, ijkon kemej kiyolpaktij kichiuas maj mouejkaujtatuan kualtsin nemikan. 10 Ijkon yeski porin tiktajtolkakis toDios Jehová, tikchiuas tein tanauatia uan tein kiixtalia, ijkon kemej ijkuiliujtok itech itanauatil. Uan oksepa tikueyichiuas toDios Jehová ika nochi moyolo uan ika nochi tein tiuelis.*

11 ”Tein axkan nimitsnauatijtok amo semi ouij para tikchiuas nion para tikajsikamatis.* 12 Amo yetok ne iluikak para tikijtos: ‘¿Akoni pankisas uan techualkuilis para maj tikakikan uan maj tiktakamatikan?’. 13 Amo no yetokej oksekopa den mar para tikijtos: ‘¿Akoni panos hasta oksekopa uan techualkuilis para maj tikakikan uan maj tiktakamatikan?’. 14 Porin itajtol Dios tel amo uejka yetok, ta yetok motenoj uan itech moyolo, para uelis tiktakamatis.

15 ”Axkan xikita toni tikneki: tinemis oso timikis, maj mitspano tein kuali oso tein amo kuali. 16 Xiktasojta toDios Jehová, xinemi kemej kineki uan xikchiua tein tanauatia uan tein kiixtalia. Ijkon tiknextis ke tikaktok itanauatiluan toDios Jehová, tein axkan nimitsmakatok. Komo tikchiua nejon, tiksentokas tiyoltos, mokoneuan momiakiliskej uan toDios Jehová mitstatiochiuis itech tal tein timokuiliti.

17 ”Sayoj ke, komo nankikauaj Dios uan amo nankikakij, namokauaj maj namechtanejnektikan, namoixpilouaj ininixpan okseki dioses uan nankinueyichiuaj, 18 axkan namechyekiluia ke namikiskej. Amo uejkaua nanemiskej itech tal tein namokuilitij satepan ke nankipanauiskej ueyiat Jordán. 19 Axkan namechkaujtok xikitakan ox nankinekij nanemiskej oso namikiskej, maj namechpano tein kuali oso tein amo kuali. Akin yetokej ne iluikak uan taltikpak kiitstokej toni nankichiuaj. Uan komo nankinekij nanyoltoskej namejuan uan namokoneuan yejua nejon tein moneki nankiixtaliskej. 20 No moneki nankitasojtaskej toDios Jehová, nankitajtolkakiskej uan amo keman nankikauaskej, porin yejua kichiua xinemikan. Uan yejua uelis kichiuas uejkaua xinemikan itech tal tein Jehová kinyekiluij ke kinmakaskia namouejkaujtatuan Abrahán, Isaac uan Jacob”.

31 Uan Moisés yajki kampa yetoyaj nochin israelitas uan kiniluij: 2 “Nikpia 120 xiujmejya uan amo ueliok namechixyekana, porin Jehová nechiluij: ‘Amo tikpanauis nejin ueyiat Jordán’. 3 ToDios Jehová namechyekantias keman nankipanauiskej ueyiat. Uan yejua kinixpolos akin nemij itech xolalmej kampa nanajsitij uan namejuan nankintalkuiliskej. Josué namechixyekanas uan namechajxitis oksekopa, ijkon kemej Jehová kijtoj. 4 Jehová kinixpoloj tekiuaj Sehón uan tekiuaj Og, akin kinixyekanayaj amorreos uan kintalkuilij. Yejua no kinchiuilis nejon akin nemij kampa nanajsitij. 5 Jehová namechpaleuis xikintanikan uan namejuan moneki nankinchiuiliskej nochi tein nejua namechnauatij. 6 Xiyolchikaujkej uan amo ximouikan. Amo xikinmouilikan porin toDios Jehová namouan youi. Yejua namechpaleuis uan amo namechkauas”.

7 Uan Moisés kinotsak Josué, uan ininixtenoj nochin israelitas kiluij: “Xiyolchikauak uan amo ximoui, porin tejua tikinajxitis israelitas itech tal tein Jehová kinyekiluij ininuejkaujtatuan ke kinmakaskia. Uan tejua tikinmakas nejon tal. 8 Jehová mitsyekantias uan kisentokas mouan yetos. Mitspaleuis uan amo mitskauas. Ximoyolchikaua uan amo ximojkamiki”.

9 Uan Moisés kijkuiloj nejin tanauatilmej uan kinmakak tiopixkamej levitas, akin kiuikayaj tatiochiualkaxon* tein iaxka Jehová. No kinmakak nochin taixyekananij israelitas. 10 Uan Moisés kinnauatij: “Yejua nejin tein moneki nankichiuaskej chijchikome xiuit, itech xiuit keman amo akin kikepasok tein tauika:* keman mochiuas iluit itech sakakaltsitsin 11 moneki nankileroskej nejin tanauatilmej para maj nochin israelitas kikakikan. Yejua ika nochin moneki yetoskej iixpan toDios Jehová kampa yejua kiixtalis. 12 Xikinsentilikan nochin israelitas: takamej, siuamej, pipilkonemej uan akin amo israelitas uan nemij namouan. Maj kikakikan toDios Jehová uan maj kiixmatikan, uan para maj kimojkatokakan uan maj kichiuakan nochi nejin tanauatilmej. 13 Ijkon, ininkoneuan akin ayamo kiixmatij nejin tanauatilmej kikakiskej uan kimatiskej keniuj kimojkatokaskej toDios Jehová. Ijkon yeski keman nanemiskej itech tal tein namokuilitij satepan ke nankipanauiskej ueyiat Jordán”.

14 Satepan Jehová kiluij Moisés: “Amo uejkaua timomikiliti. Xiknotsa Josué uan xiakan itech kaltsin kampa nechueyichiuaj* para maj nikixtali kemej taixyekankej”. Yejua ika Moisés uan Josué yajkej itech in kaltsin. 15 Uan Jehová monextij itech mixti, uan nejon mixti motalito ikalakyan kaltsin.

16 Uan Jehová kiluij Moisés: “Amo uejkaua timomikiliti, uan israelitas kemej yeskia peuas auilnemiskej iniuan okseki dioses tein kinueyichiuaj akin nemij itech tal kampa ajsitij. Yejuan nechkauaskej uan amo kichiuaskejok tein nimotenkauak iniuan. 17 Ijkuak, nikualanis iniuan, nikinkauas uan amo nikinitasok hasta maj ixpoliuikan. Uan keman kipanotoskej miak taman tein amo kuali uan tajyouijtoskej, kijtoskej: ‘Titajyouijtokej porin Dios amo touan yetok’. 18 Sayoj ke niksentokas amo nikinitas nejon tonal, porin kichiujkej tein tel amo kuali keman kinueyichiujkej okseki dioses.

19 ”Axkan, xikijkuilokan nejin tatsotson uan xikinnextilikan israelitas. Maj kuali momamachtikan nejin tatsotson para maj kinelnamikti tein panoua keman amo nechtakamatij. 20 Nikinajxitis itech tal kampa moteltachiua,* tein nikinyekiluij ininuejkaujtatuan ke nikinmakas. Keman takuaskej hasta ixuiskej uan kualtsin nemiskej, peuas kinueyichiuaskej okseki dioses, nechixnamikiskej uan amo kichiuaskej tein nimotenkauak iniuan. 21 Keman kipanoskej miak taman tein amo kuali uan tajyouijtoskej, nejin tatsotson kinelnamiktis tein panoua keman amo nechtakamatij, porin nikitstokya toni kinemilijtokej desde achto ke nikinajxitis itech tal tein nikinyekiluij ke nikinmakas. Maj ininkoneuan amo kielkauakan nejin tatsotson”.

22 Nejon tonal, Moisés kijkuiloj nejon tatsotson uan kinnextilij israelitas.

23 Uan Dios* kiixtalij Josué iokichpil Nun kemej taixyekankej. Uan kiluij: “Xiyolchikauak uan amo ximoui, porin tejua tikinajxitis israelitas itech tal tein nikinyekiluij ke nikinmakas, uan nejua niksentokas nimitspaleuis”.

24 Moisés kitamiijkuiloj itech se amatajkuilol nochi nejin tanauatilmej. 25 Satepan kinnauatij levitas, akin kiuikayaj tatiochiualkaxon tein iaxka Jehová: 26 “Xikauatij nejin amatajkuilol inakastan tatiochiualkaxon tein iaxka toDios Jehová, para maj namechelnamikti tein panoua keman amo se kitakamati. 27 Porin nejua kuali nikitakya keniuj nantaixnamikij uan tel amo nantakakij. Komo yekintsin ke niyoltok nankiixnamikij Jehová, ¡okachiok nankiixnamikiskej keman nimikis! 28 Xikinsentilikan nochin taixyekananij israelitas uan uejueyi chiuanimej para maj nikinilui nochi nejin. Akin yetokej ne iluikak uan taltikpak kiitstokej ke axkan nikinnejmachtijya tein kinpanos komo amo tatakamatij. 29 Porin kuali nikmati ke satepan ke nimikis, nankichiuaskej tein amo kuali uan nankielkauaskej tein namechnauatij. Uan satepan namechpanos miak taman tein amo kuali, porin nankichiuaskej tein Jehová kiita ke amo kuali yetok uan nankikualantiskej ika nochi nejon”.

30 Uan Moisés kiniluij nochin israelitas tein kijkuilojka itech nejin tatsotson, desde kampa peua hasta kampa tami:

 3 Porin nejua nikteixmatiltis itokay Jehová.

¡Xikteixmatiltikan ke toDios semi ueyichiujkej!

 5 Namejuan nankichiujkej tein amo kuali.

Amo nanikoneuan; namejuan namotajtakol.

¡Tel amo nanyolkualmej uan nantajtakolchiuanij!

15 Keman Jesurún* motomauak kiixnamikik iteko uan peuak tatejteliksa.

(Tejua timotomauak, satichikaktik timoitaya uan tiixuik).

29 ¡Majkan yeskiaj tamatinij! Itech tanemiliskiaj nochi nejin.

Kinemiliskiaj keniuj tamiskej.

Maj yejuan namechpaleuikij.

Iniuan ximopaleuitij.

Nejua nikchiua maj aksa* miki, uan nikchiua maj aksa nemi.

44 Moisés kiniluito israelitas nochi tein kijtouaya nejin tatsotson. Uan iuan yajki Hosea* iokichpil Nun. 45 Keman Moisés kintamiiluij israelitas nochi nejin, 46 no kijtoj: “Amo xikauilmatikan nochi tein namechnejmachtijtok axkan uan xikinnauatikan namokoneuan maj kiyekchiuakan nochi nejin tanauatilmej. 47 Porin amo nenkaj nochi tein namechiluijtok, ta namechpaleuis xiyoltokan. Uan komo nankitakamatij nochi nejin, uejkaua nanemiskej itech tal tein namokuilitij keman nankipanauiskej ueyiat Jordán”.

48 Nejon tonal Jehová tajtoj iuan Moisés uan kiluij: 49 “Xipankisa itech nejin tepet de Abarim, itech tepet Nebo (tein yetok itech tal tein poui Moab, taixpan de Jericó). Ompa tikitas tal tein poui Canaán tein nikinmakati israelitas. 50 Uan timomikilis itech nejon tepet kampa tipankisati, ijkon kemej Aarón momikilij itech tepet Hor. 51 Ijkon yeski, porin tejua uan Aarón amo nanechtakamatkej ininixpan israelitas keman kisak at ompa Meribá tein yetok Cadés, itech tal kampa tauaktok uan motanotsa Zin. Amo nanechueyitalijkej ininixpan israelitas. 52 Tikuejkaitas tal tein nikinmakati israelitas, sayoj ke tejua amo tiajsis ompa”.

33 Yejua nejin tein Moisés, itekitikauj toTajtsin Dios, kintajtanilij israelitas achto ke momikiliskia. 2 Kijtoj:

 7 Yejua nejin tein kintajtanilij ikoneuan Judá:

 8 Yejua nejin tein kintajtanilij ikoneuan Leví:

12 Yejua nejin tein kintajtanilij ikoneuan Benjamín:

13 Yejua nejin tein kintajtanilij ikoneuan José:

18 Yejua nejin tein kintajtanilij ikoneuan Zabulón:

19 Yejuan kinyoleuaskej oksekin maj pankisakan itech tepet.

Tein ompa kimaktiliskej Dios kiyolpaktis.

20 Yejua nejin tein kintajtanilij ikoneuan Gad:

“Maj kitatiochiuikan akin kiueyiltia ital Gad.

Taixyekananij mosentiliskej.

22 Yejua nejin tein kintajtanilij ikoneuan Dan:

“Dan se leonkonet.

Pantsikuinis desde Basán”.

23 Yejua nejin tein kintajtanilij ikoneuan Neftalí:

Xikui in tal tein yetok kampa pankalaki tonaltsin uan tanikopa”.*

24 Yejua nejin tein kintajtanilij ikoneuan Aser:

“Dios kichiuak maj Aser kinpia miakej ikoneuan.

29 ¡Tiyolpaki tejua Israel!

34 Keman Moisés yetoya itech tal kampa amo teyi onkak ompa Moab, pankisak itech tepet Nebo ikuapan Pisgá, taixpan de Jericó. Uan Jehová kinextilij nochi in tal, desde Galaad hasta Dan, 2 nochi Neftalí, Efraín, Manasés uan nochi Judá hasta mar Grande.* 3 No kiitak tal kampa moixmati kemej Négueb uan nochi in tal tein poui Jordán, uan no tal tamanis* de Jericó kampa onkak miak palmajkoujmej, hasta Zóar.

4 Uan Jehová kiluij: “Yejua nejin tal tein nikinyekiluij Abrahán, Isaac uan Jacob ke nikinmakaskia ininkoneuan. Nimitskauak xikita nejin tal, sayoj ke amo tiajsis ompa”.

5 Uan Moisés itekitikauj Jehová momikilij ompa Moab, ijkon kemej Jehová kijtojka. 6 Yejua kitokak itech tal tamanis ompa Moab, taixpan de Bet-Peor. Hasta axkan, amo akin kimati kani mero toktok. 7 Moisés kipiaya 120 xiujmej keman momikilij. Kuali tachiayaok uan chikauakok katka. 8 Israelitas kichokilijkej Moisés se metsti ompa Moab. Satepan ke panokej nejon 30 tonalmej, amo kichokilijkejok Moisés.

9 Josué iokichpil Nun katka tel tamatkej porin Moisés kitalij imauan itech. Uan israelitas peuak kikakij Josué uan kichiujkej nochi tein Jehová kinauatijka Moisés. 10 Sayoj ke amo keman moajsini ompa Israel okse tanauatijkej* kemej Moisés, akin Jehová kuali kiixmatia. 11 Jehová kititanik Moisés ompa Egipto para maj kichiua miak taman tein amo keman mochiujtoya, uan ijkon kitatsakuiltij akin taixyekanaya Egipto, itakeualuan uan akin ompa nemiaj. 12 Uan no, Moisés kichiuak miak taman tein se kimojkaita ika ichikaualis Dios ininixpan nochin israelitas.