2 CRÓNICAS*

1 Akin kipaleuiayaj tekiuaj Salomón iokichpil David okachi momiakilijtiayaj. IDios Jehová kipaleuiaya uan semi kiueyitalij.

2 Salomón kinsentilij nochin israelitas, takamej akin kinixyekanayaj mijmil soldados uan akin kinixyekanayaj ciejcien soldados. No kinsentilij jueces, taixyekananij israelitas uan nochin akin kinixyekanayaj uejueyi familias. 3 Salomón uan nochin akin mosentilijkaj yajkej Gabaón kampa yayaj kiueyichiuatij Dios. Ompa yetoya kaltsin kampa kiueyichiuayaj toTajtsin Dios* tein Moisés akin kitekitiliaya Jehová kichijchiujka taluakyan. 4 Tatiochiualkaxon* tein iaxka toTajtsin Dios achto yetoya Quiryat-Jearim, uan David kikuito para kipankixtis Jerusalén uan kitalij kampa kitachijchiuijka. Yejua kichijchiuilijka se kaltsin ompa Jerusalén. 5 Bezalel kichijchiujka se altar de cobre. Bezalel katka iokichpil Urí uan iueyitat katka Hur. Altar tein kichijchiujka kitalijkaj taixpan den kaltsin kampa kiueyichiuayaj Jehová. Salomón uan nochin israelitas yayaj kitataujtitij Dios taixpan den altar. 6 Salomón ompa kimaktilij Jehová miak taman. Kichichinouilij mil tapialmej itech altar de cobre tein yetoya taixpan den kaltsin kampa kiueyichiuayaj Dios.

7 Nejon youak, Dios kichiuak maj Salomón takochita* uan kinojnotsak. Yejua kiluij: “Xinechilui toni tikneki maj nimitsmaka”. 8 Salomón kinankilij Dios: “Tejua nochipa tiktasojtak nopaj David, uan tinechixtalij para maj nikixpata kemej tekiuaj. 9 Yejua ika noDios Jehová, nimitstataujtia xikchiua tein timotenkauak iuan nopaj David porin tikchiuani maj semi miakej nikinixyekana. Yejuan semi miakej kemej yeskia talnex tein onkak itech taltikpak. 10 Xinechpaleui maj nikmati miak taman uan maj nitamatkej para uelis nikinixyekanas israelitas. Semi miakej akin pouij itech moxolal uan noselti amo uelis nikixejekos tein nechixpantiliskej”.

11 Uan Dios kiluij Salomón: “Amo tinechtajtanij maj nikchiua ximotominti nion xikpia miak taman, uan amo no tinechtajtanij maj mitsueyitalikan oso maj mikikan akin mitstauelitaj nion maj nikchiua uejkauak xinemi,* ta tikneki maj nimitspaleui xikmati miak taman uan xitamatkej. Kemej yejua nejon tein tikneki para kuali tikixejekos tein mitsixpantiliskej akin pouij itech noxolal akin nikchiuak xikinixyekana, 12 nimitspaleuis xikmati miak taman uan xitamatkej. Uan no nikchiuas ximotominti, xikpia miak taman uan maj mitstelueyitalikan. Nion se tekiuaj akin achto taixyekanak kipiani nochi nejin uan amo no kipias akin taixyekanas satepan”.

13 Salomón mokepak de Gabaón kampa yetoya kaltsin kampa kiueyichiuayaj Dios. Yajki Jerusalén uan desde ompa peuak kinixyekana israelitas. 14 Salomón kisentokak kinsentilij carros tein kikuiaj para tateuiskej uan caballos.* Kinajxitij 1,400 carros uan 12 mil caballos. Icaballos uan icarros kinpiaya itech uejueyi xolalmej kampa kintachijchiuijka carros uan ompa Jerusalén kampa yejua nemia. 15 Tekiuaj kichiuak maj ompa Jerusalén tel onkani plata uan oro kemej yeskia tel miak tet, uan maj tel onkani cedrojkouit kemej higojkouit tein tel onkak ompa Sefelá. 16 Caballos tein Salomón kinpiaya kinualkuiaj de Egipto. Tekiuaj kintitania takamej maj kikouilitij caballos. Yejuan kinsenolochkouayaj* uan kinixtauayaj kemej ipa ixyetoyaya. 17 Se carro tein kiualkuiaj de Egipto kikauayaj a chikome kilo* plata, uan se caballo kikauayaj kemej a ome kilo* plata. Satepan nejon caballos uan carros kinnamakiltiayaj nochin tekiuanij akin kinixyekanayaj hititas uan akin tekiuajtiaj Siria.

2 Salomón tanauatij maj kichijchiuakan se kali para ompa kiueyitaliskej itokay Jehová uan se kali para taixyekanas desde ompa. 2 Salomón kinsentilij 70 mil takamej para tamamaskej, 80 mil takamej para kikixtiskej tet kampa tepeyoj uan 3,600 takamej para kinixyekanaskej nochin tekitinij. 3 Uan no, Salomón tanauatij maj kiluitij Hiram akin tekiuajtia Tiro: “Tejua kuali timouikaya iuan nopaj David uan tiktitanilij cedrojkouit para mochijchiuilis ichan. Yejua ika nimitstajtania no ijkon xinechpaleui. 4 Nikchijchiuiliti noDios Jehová se kali kampa kiueyitaliskej itokay. Nikxelojya nejin kali para ompa kichichinouiliskej kopal tein ajuiyak, para nochipa ompa kitaliskej pantsitsin tein kimaktiliskej Dios uan para ompa kichichinouiliskej tapialmej. Nochi nejon kichiuaskej iixpan Dios kualkan uan tiotak itech tonal sábado, keman peuas selik metsti uan keman kiiluichiuiliskej toDios Jehová. Nejin se taman tein israelitas nochipa moneki kichiuaskej. 5 Kali tein nikchijchiuati semi ueyi yeski uan semi kualtsin, porin toDios okachi ueyichiujkej ke tatadiosmej* tein onkakej. 6 Uan maski nikchijchiuas se kali tein semi ueyi uan semi kualtsin, Dios amo uelis ompa nemis porin nion ne iluikak semi taueyika para ompa nemis. Yejua ika nejua amo teyi nichiujkej para nikchijchiuas se kali para Dios, ta sayoj uelis nikchijchiuilis se kali kampa kichichinouiliskej tapialmej uan okseki taman. 7 Yejua ika xinechualtitanili aksa* akin ueli kimachijchiua miak taman ika oro, plata, cobre uan tepos, maj ueli tajkiti ika hilo morado, chichiltik uan azul. Uan no maj kimati keniuj kixijximas kouit uan keniuj kitejtekis tet para kichijchiuas dibujos. Yejua tekitis nikan Judá uan Jerusalén iniuan notakeualuan akin uelij tamachijchiuaj. Nopaj David kinixtalijka nejin takeualmej. 8 No xinechualtitanili cedrojkouit, enebrojkouit uan sándalojkouit tein onkak Líbano, porin nikmati ke motakeualuan kuali kimatij keniuj kitekiskej kouit tein ompa onkak. Notakeualuan uan motakeualuan sentekitiskej. 9 Yejuan kitekiskej miak kouit porin kali tein nikchijchiuati semi ueyi yeski uan semi kuakualtsin. 10 Nejua nikinmakas tein kikuaskej motakeualuan uan akin kitekiskej kouit. Nikinmakas tres millones doscientos mil kilos* de trigo, dos millones seiscientos mil kilos* de cebada, 440 mil litros de vino uan 440 mil litros de aceite”.*

11 Uan Hiram akin tekiuajtia Tiro kijkuilouilij Salomón nejin: “Jehová mitsixtalij xikixyekana ixolal porin kintasojta akin ompa pouij”. 12 Hiram no kijtoj: “Maj se kiueyitali Jehová, ininDios israelitas akin kichijchiuak iluikak uan taltikpak, porin kichiuak maj tekiuaj David kipia se iokichpil akin semi tamatkej, akin kuali taixejekoua uan kiajsikamati miak taman. Yejua kichijchiuiliti Jehová se kali uan no mochijchiuiliti se kali para taixyekanas desde ompa. 13 Nimitstitanilia Hiram-Abí, akin kuali kimachijchiua miak taman. 14 Inan poui iniuan ikoneuan Dan, sayoj ke itat katka de Tiro. Hiram-Abí kuali kimati keniuj kichijchiuas miak taman ika oro, plata, cobre, tepos, tet uan kouit. No kimati tajkitis ika hilo morado, azul uan chichiltik uan no kimati keniuj kikuis lino tein okachi kuali. Hiram-Abí kimati keniuj kixijximas kouit uan keniuj kitejtekis tet para kichijchiuas tein yeski dibujo tein kimakaskej. Tekitis iniuan motakeualuan akin kuali kimachijchiuaj teisa uan iniuan itakeualuan mopaj David akin no kuali tamachijchiuaj. 15 Noteko, nimitstataujtia xikinualtitanili notakeualuan trigo, cebada, aceite uan vino tein timotenkauak tikinmakas. 16 Uan tejuan tiktekiskej kouit tein onkak Líbano, nochi kouit tein tiknekis uan timitstitaniliskej itech mar. Tiksenilpiskej* uan tikuikaskej aixko hasta Jope. Keman tikajxitiskej, tejua tikpankixtisya Jerusalén”.

17 Uan Salomón kinpouak nochin takamej akin amo katkaj israelitas akin nemiaj ompa Israel uan katkaj ciento cincuenta y tres mil seiscientos. Kichiuak ijkon kemej kichiujka David akin katka itat porin yejua no kinpoujka takamej akin nemiaj Israel. 18 Uan Salomón kinixtalij 70 mil de nejon takamej para tamamaskej, 80 mil takamej para kikixtiskej tet kampa tepeyoj uan 3,600 takamej para kinixyekanaskej nochin akin tekitiskiaj.

3 Uan Salomón peuak kichijchiua ichan Jehová ompa Jerusalén. Kichijchiuak itech tepet Moria kampa Jehová monextijka* iixpan David akin katka itat Salomón. Ompa yetoya tal kampa kichipauayaj xinach tein katka iaxka Ornán akin kayot Jebús. David ompa kiixtalijka maj mochijchiua ichan Dios. 2 Salomón peuak kichijchiua ichan Dios itech ojpatika tonal den metsti iyar* keman naui xiuitya tekiuajtitoya. 3 Uan cimientos tein Salomón kinchijchiuak para ichan toTajtsin Dios katkaj de 27 metros* de ueyak uan chiknaui metro* de patauak, kitamachiujkej ijkon kemej ne uejkauj tatamachiuayaj.* 4 Kampa se kalakteuaya ichan Dios kichijchiuak se cuarto tein no kipiaya chiknaui metro* de patauak ijkon kemej ichan Dios uan kipiaya chiknaui metro* de uejkapan. Taijtikkopa kitamipepechouilij oro tein okachi kuali. 5 Nochi tepamit den cuarto tein okachi ueyi* kitamitalilij enebrojkouit uan satepan kitamipepechouilij oro tein okachi kuali. No kikualtsintilij ika dibujos de palmajkouit uan cadenas. 6 Uan no kikualtsintilij ichan Dios ika tetsitsin tein patiyoj. Nochi oro tein kikuik kiualkuiaj de Parvaim. 7 Kitamipepechouilij oro nochi in kali, vigas, kaltenkoujmej, tepamit uan puertas. Uan itech tepamit kinchijchiuak dibujos de querubines.

8 Satepan kichijchiuak cuarto* tein monotsa Santísimo. Nejin cuarto patauak katka kemej cuarto tein monotsa Santo, kipiaya chiknaui metro* de patauak uan chiknaui metro* de ueyak. Kitamipepechouilij 20,520 kilos* de oro tein okachi kuali. 9 Clavos kipiayaj 570 gramos* oro uan cuartos tein yetoyaj kalkuako kintamipepechouilij oro.

10 No kinmachijchiuak ome querubines uan kintamipepechouilij oro para kinketsas itech cuarto* tein monotsa Santísimo. 11 De iajtapal se querubín hasta iajtapal okse querubín kipiaya chiknaui metro.* Iajtapal se querubín kipiaya 225 centímetros* de ueyak uan ajsia hasta tepamit, uan okse iajtapal no kipiaya 225 centímetros uan iuan monamikia iajtapal okse querubín. 12 Iajtapal okse querubín kipiaya 225 centímetros de ueyak uan ajsia hasta tepamit tein yetoya den okse lado, uan okse iajtapal no kipiaya 225 centímetros uan iuan monamikia iajtapal okse querubín. 13 Querubines ajtapaltajtapotoyaj uan de iajtapal se querubín hasta iajtapal okse querubín kipiaya chiknaui metro. Yejuan ijkatoyaj uan tachixtoyaj kampa yetoya cuarto tein monotsa Santo.

14 No kichijchiuak cortina ika hilo azul, morado, chichiltik uan ika linojtasal. Uan itech cortina kimaijtsomak seki querubines.

15 Uan kalixpan de ichan Dios kinchijchiuak ome kalikximej tein kipiayaj 16 metros* de uejkapan. Ininkuapan nejon kalikximej kinchijchiuak ome uejueyi konmej tein kipiayaj ome metro uan tajko.* 16 Uan no kinchijchiuak cadenas tein moitayaj kemej koskamej uan kinpijpiloj itech uejueyi konmej tein yetoyaj ininkuapan kalikximej. No kinchijchiuak ika cobre seki taman tein moitayaj kemej granadas. Kinchijchiuak se ciento uan kinpijpiloj itech cadenas para kinkualtsintilis. 17 Kalixpan den templo kinkejketsak kalikximej, se de se lado* uan okse den okse lado.* Kalikxit tein ijkatoya iyekmakopa aksa* akin kisaya de ichan Dios monotsaya Jakín* uan kalikxit tein ijkatoya iopochmakopa monotsaya Boaz.*

4 Satepan kichijchiuak altar de cobre. Kipiaya chiknaui metro* de ueyak, chiknaui metro* de patauak uan naui metro uan tajko* de uejkapan.

2 Kichijchiuak ueyi tanque* de cobre uan katka youaltik. De se lado de itenoj hasta okse lado kipiaya naui metro uan tajko.* De uejkapan kipiaya ome metro uan tajko* uan para se kitamiyoualos monekia se mekat de 13 metros uan tajko* de ueyak. 3 Tanitsin* de itenoj kinchijchiujtiajki ayojmej uan ika kikualtsintilij. Kitamachiujtiajki 45 centímetros* uan ompa kintajtalijtiajki majtakti ayojmej uan kichiuak ome hilera. Ijkon kitamiyoualoj itenoj ueyi tanque. Ueyi tanque uan ayojmej kinsenchijchiuak. 4 Doce kuakuejmej kimamajtoyaj ueyi tanque. Eyi kuakuejmej tachixtoyaj ajkokopa,* eyin tachixtoyaj kampa pankalaki tonaltsin, eyin tachixtoyaj tanikopa* uan eyin tachixtoyaj kampa ualkisa tonaltsin. Kuakuejmej kimamajtoyaj ueyi tanque uan moikannajnamiktoyaj. 5 Ueyi tanque tilauak katka kemej chikome centímetro* uan itenoj katka kemej itenoj se copa uan kemej se xochit tein moixmati kemej lirio. Itech ueyi tanque akia 66 mil litros* de at.

6 Uan no kinchijchiuak majtakti pailas. Makuil kintalij de se lado de ichan Dios uan makuil kintalij den okse lado. Ompa kipakayaj tein kikuiaj keman kinchichinouayaj tapialmej. Sayoj ke at tein yetoya itech ueyi tanque kikuiaj tiopixkamej para mopakaskej.

7 Satepan kinchijchiuak ika oro majtakti tauilketsalonimej ijkon kemej moixtalijka mochijchiuas. Keman kintamichijchiuak, kinkauato ichan Dios. Makuil kinketsak de se lado uan makuil den okse lado.

8 No kinchijchiuak majtakti mesas uan kinkauato ichan Dios. Makuil kintalij de se lado uan makuil den okse lado. No kichijchiuak ika oro se ciento kaxit.

9 Satepan kichijchiuak patio kampa tekitiskiaj tiopixkamej. Uan no kichijchiuak patio kampa okachi taueyika uan kitalilij puertas. Nejon puertas kintamipepechouilij cobre. 10 Ueyi tanque* kiketsak tanakastan de ichan Dios kampa ualkisa tonaltsin.

11 Hiram no kinchijchiuak cubetas, palas uan seki kaxit.

Ijkon kitamichijchiuak nochi tein tekiuaj Salomón kitajtanij maj kichijchiua para ichan toTajtsin Dios. Hiram kichiuak nochi nejin: 12 kinchijchiuak ome kalikximej, ome uejueyi konmej tein kintalij ininkuapan kalikximej uan ome mallas de cobre tein ika kinpanpikik* uejueyi konmej tein yetoyaj ininkuapan kalikximej. 13 No kinchijchiuak 400 granadas tein kinpepechouilij ome mallas. Kitalij ome hilera de granadas itech sejse malla. Nejon mallas kinpikiaj ome uejueyi konmej tein yetoyaj ininkuapan kalikximej. 14 No kinchijchiuak majtakti carritos* uan majtakti pailas. Nejon pailas kintalij itech carritos. 15 Kichijchiuak ueyi tanque,* uan 12 kuakuejmej tein kimamajtoyaj ueyi tanque, 16 cubetas, palas, teposmej tein puntajyejkej uan nochi okseki taman tein mokuiskia. Hiram-Abiv kichijchiuak nochi nejin ika cobre tein milinia. Yejua kichijchiuak nochi tein tekiuaj Salomón kitajtanij para ichan Jehová. 17 Tekiuaj tanauatij maj kiatilikan cobre uan maj kipantekakan itech moldes tein chijchiujtoyaj ika sokit. Nochi nejin kichiujkej itech tal tamanis* tein yetok tatajko de Sucot uan Zeredá, amo uejka den ueyiat Jordán. 18 Salomón kichijchiuak nochi nejin tein mokuiskia ichan Dios. Kemej tel miak kichijchiuak, amo momatik kanachi cobre mokuik.

19 Salomón kichijchiuak nochi tein mokuiskia ichan toTajtsin Dios. Kichijchiuak altar de oro uan mesas kampa kitaliayaj pantsin tein kimaktiliayaj Dios. 20 No kinchijchiuak tauilketsalonimej uan candilmej ika oro tein okachi kuali. Candilmej yetoskiaj taixpan den cuarto tein monotsa Santísimo uan ompa tauijtoskiaj ijkon kemej Dios kijtojka. 21 No kinchijchiuak xochimej, candilmej uan pinzas* ika oro tein okachi kuali. 22 No kinchijchiuak tijeras,* seki kaxit, copas uan tapalkamej para tekol. Kinchijchiuak ika oro tein okachi kuali. No kinchijchiuak ika oro puertas tein kipiaya cuarto tein monotsa Santísimo uan tein kipiaya ichan Dios.*

5 Salomón kitamichijchiuak ichan Jehová uan nochi tein ompa mokuiskia. Satepan kiualkuik templo nochi tein itat David kimaktilijka Dios. Kitalij plata, oro uan nochi okseki taman itech cuartos tein kipiaya ichan toTajtsin Dios kampa kitaliayaj nochi tein patiyoj. 2 Ijkuak, Salomón kinsentilij taixyekananij israelitas: akin kinixyekanayaj uejueyi kalyetonij uan akin kinixyekanayaj uejueyi familias akin pouiaj itech xolal Israel. Ualajkej Jerusalén para kipankixtiskej tatiochiualkaxon* tein iaxka Jehová uan kiuikaskej templo. Tatiochiualkaxon yetoya itech ueyi xolal tein iaxka David, tein no moixmati kemej Sion. 3 Nochin takamej israelitas kiitatoj tekiuaj keman mochiujtoya iluit.* Iluichiujkej itech metsti tisri.*

4 Yejua ika nochin taixyekananij israelitas ualajkej uan levitas kimamajkej tatiochiualkaxon. 5 Kipankixtijkej tatiochiualkaxon, kaltsin kampa kiueyichiuayaj Dios* uan nochi tein yetoya taijtik tein kikuiaj keman kitekitiliayaj Dios. Tiopixkamej uan levitas* kipankixtijkej nochi nejin kampa yetoya templo. 6 Tekiuaj Salomón uan nochin israelitas akin kiniluijkaj maj mosentilikan yetoyaj iixpan tatiochiualkaxon. Kemej tel miak ichkamej* uan kuakuejmej kichichinouilijtoyaj Dios, nion uelia se kinpouaya. 7 Tiopixkamej kikauatoj tatiochiualkaxon tein iaxka Jehová kampa kitachijchiuijkaj. Kitalijkej itech cuarto tein yetoya okachi taijtik tein monotsa Santísimo, ininajtapaltampa querubines. 8 Querubines ijkatoyaj kampa yetoya tatiochiualkaxon. Yejuan ajtapaltajtapotoyaj uan kipantsakuayaj tatiochiualkaxon uan koujmej tein ika kimamayaj. 9 Nejon koujmej semi ueueyakej katkaj uan tepitsin nalkistoyaj, yejua ika uelia se kinitaya desde cuarto tein monotsa Santo, sayoj ke amo moitayaj desde kampa se kalakteua ichan Dios. Uan ompa yetokejok hasta axkan. Cuarto tein monotsa Santo yetoya taixpan den cuarto tein monotsa Santísimo. 10 Taijtik den tatiochiualkaxon sayoj yetoyaj ome lajas tein Moisés kinkalakijka ompa Horeb, keman Jehová motenkauak iniuan israelitas ke kinpaleuiskia uan yejuan motenkaujkaj ke kitakamatiskiaj. Nejon mochiuak satepan ke kiskej de Egipto.

11 Tiopixkamej kiskej den cuarto tein monotsa Santo. (Nochin tiopixkamej akin pouiaj itech tataman grupos mochipaujkej para kitekitiliskej Dios). 12 Nochin levitas akin cantarouayaj motalilijkaj inintasal tein okachi kuali. Asaf, Hemán, Jedutún, ininkoneuan uan ininparientes kinixyekanayaj nejon levitas akin cantarouayaj. Levitas kitsotsontoyaj cítaras,* arpas uan kikakistiltiayaj címbalos.* Ijkatoyaj tanakastan den altar kampa ualkisa tonaltsin uan yetoyaj iniuan 120 tiopixkamej akin kipitstoyaj trompetas. 13 Nochin akin kipitstoyaj trompetas uan cantarojtoyaj kisenueyichiujtoyaj Jehová uan kitasojkamatilijtoyaj. Trompetas, címbalos uan okseki taman tein kitsotsontoyaj kakistiaj keman kiueyichiujtoyaj Jehová uan kijtouayaj: “Porin yolkuali. Yejua nochipa techtasojtas”. Ijkuak, mixti sentakuik* ichan Jehová. 14 Kemej mixti sentakuik ichan Jehová, tiopixkamej amo uelik mokaujkej ompa para kisentokaskej tekitiskej porin iueyi chikaualis toTajtsin Dios sentakuik ichan.

6 Uan Salomón kijtoj: “Jehová, tejua tikijtoj ke tinemiskia mixijtik. 2 Nimitschijchiuilij se ueyi kali tein semi kualtsin, se kali kampa tinemis nochipaya”.

3 Keman kitamiijtoj nejin, tekiuaj Salomón moixkepak para kinitas israelitas uan peuak kitataujtia Dios maj kintatiochiui. 4 Uan kijtoj: “Maj tikueyitalikan toDios Jehová, ininDios israelitas, akin kichiuak* tein motenkaujka* iuan nopaj David keman kijtoj: 5 ‘Desde ke nikinkixtij de Egipto akin pouij itech noxolal, amo keman nikijitatoya nion se xolal tein ininaxka uejueyi kalyetonij para nikchijchiuas se kali kampa kiueyitaliskej notokay. Amo no nikijitak se takat para maj kinixyekana israelitas akin pouij itech noxolal. 6 Sayoj ke axkan nikijitak ueyi xolal Jerusalén para maj ompa kiueyitalikan notokay uan nikijitak David para maj kinixyekana israelitas akin pouij itech noxolal’”. 7 Salomón no kijtoj: “Nopaj David kitelnekia kichijchiuilis toDios Jehová* se kali kampa kiueyitaliskej itokay. 8 Sayoj ke Jehová kiluij nopaj David: ‘Tiktelneki tinechchijchiuilis se kali kampa kiueyitaliskej notokay, uan semi kuali tein tikneki tikchiuas. 9 Sayoj ke amo tejua tinechchijchiuilis kali kampa kiueyitaliskej notokay, ta nechchijchiuilis mookichpil akin yolitiok’. 10 Jehová kichiuak tein motenkaujka, porin nejua nikixpatak nopaj David uan nimotalij itech iueyi silla para nikinixyekanas israelitas ijkon kemej motenkaujka Jehová. No nikchijchiuilij Jehová ininDios israelitas se kali para ompa tikueyitaliskej itokay. 11 Uan ompa niktalij tatiochiualkaxon tein kipia lajas kampa ijkuiliujtok tein Jehová motenkauak iniuan israelitas akin pouij itech ixolal”.

12 Satepan Salomón moketsak iixpan ialtar Jehová, kampa nochin israelitas ueliskiaj kiitaskej uan momaajkoketsak. 13 (Salomón mochijchiuilijka se caja de cobre kampa ueliskia moketsas uan kitalij tatajko patio. Nejon caja kipiaya ome metro uan tajko* de ueyak, ome metro uan tajko de patauak uan se metro uan tajko* de uejkapan. Yejua tejkok* itech nejon caja). Salomón motankuaketsak ininixpan nochin israelitas akin mosentilijkaj uan momaajkoketsak para kitataujtis Dios. 14 Yejua kijtoj: “ToDios Jehová,* amo moajsi nion se Dios kemej tejua ne iluikak nion nikan taltikpak. Tikchiua tein timotenkaua uan nochipa tikinnextilia ke tikintasojta motekitikauan akin kiuelitaj mitstekitiliskej.* 15 Tikchiuak tein timotenkaujka iuan nopaj David akin katka motekitikauj. Nejin tonal tikchiuak tein timotenkaujka. 16 Uan axkan noDios Jehová,* nimitstataujtia xikchiua tein timotenkaujka iuan nopaj David. Tejua tikiluijka: ‘Komo mokoneuan kuali kiitaj tein kichiuaj uan kitakamatij nochi tein nitanauatia, ijkon kemej tejua tiktakamatini nochi tein nitanauatia, nikauas maj nochipa semej mokoneuan tekiuajti itech xolal Israel’. 17 Uan axkan noDios Jehová,* nimitstataujtia xikchiua nejin tein timotenkaujka iuan David akin katka motekitikauj.

18 ”Sayoj ke noDios ¿xe uelis tinemis nikan taltikpak? Nion ompa iluikak semi taueyika para ompa tinemis. Yejua ika, nion nejin kali tein nikchijchiuak semi ueyi para uelis nikan tinemis. 19 NoDios Jehová, xinechkaki keman nimitstataujtia uan nimitstajtania xinechikneli. Xinechkaki keman nimitstataujtia xinechpaleui. NoDios, nimitstataujtia xikaki nejin netataujtil. 20 Mojmostaj xikitsto nejin kali kampa tejua tikijtoj ke kiueyitaliskej motokay, para uelis tinechkakis keman niualtachias kampa yetok nejin kali para nimitstataujtis. 21 Xinechkaki keman nimitstataujtis xinechikneli. Uan xikinkaki israelitas akin pouij itech moxolal keman ualtachiaskej nikan para mitstataujtiskej xikinikneli. Xitechkaki desde ompa iluikak kampa tinemi. Xitechkaki uan xitechtapojpolui.

22 ”Komo se israelita kichiuilia tein amo kuali okse israelita uan kiluiaj maj kiyekijto ox kichiuak uan yejua kijtoua ke amo kichiuak, yejua iselti motemolis maj kitatsakuiltikan komo momati ke takajkayauak. Uan komo satepan uitse itech nejin kali kampa yetok moaltar, 23 nimitstataujtia xikaki desde ompa iluikak uan tejua xijuez. Xikixtali tein kinnamiki maj kinpano motekitikauan: akin kichiuak tein amo kuali xiktatsakuilti porin kichiuak tein amo kuali, uan akin kichiuak tein kuali xiktatiochiui porin kichiuak tein kuali.

24 ”Uan komo akin kintauelitaj israelitas kintanij porin yejuan kisentokaj tajtakolchiuaj, sayoj ke israelitas oksepa peua mitstakamatij, kiueyitaliaj motokay uan uitsej nikan mitstataujtikij xikinikneli, 25 nimitstajtania xikinkaki desde ompa iluikak, xikintapojpolui israelitas uan xikinpaleui maj mokepakan itech tal tein tikinmakak yejuan uan ininuejkaujtatuan.

26 ”Keman tikchiuas maj amo kioui porin israelitas kisentokaj tajtakolchiuaj, sayoj ke yejuan ualtachiaj nikan para mitstataujtiskej, kiueyitaliaj motokay uan amo tajtakolchiuajok porin tikintatsakuiltij,* 27 nimitstataujtia xikinkaki desde ompa iluikak uan xikintapojpolui. Xikinmachti israelitas akin mitstekitiliaj maj kichiuakan tein kuali, uan xikchiua maj kioui itech tal tein tikinmakak.

28 ”Komo akin nemij itech xolal Israel amo kipiaj tein kikuaskej, tamikokolispeuaj,* chikauak tonalejeka uan kiuatsa tein kitokkej, taokuiloua oso sentakuij chapolimej uan tatamiaj, oso komo akin kintauelitaj israelitas kitamiyoualouaj ininueyi xolal uan amo kinkauaj maj kisakan, oso kintajyouiltia se kokolis oso okse taman, 29 tein yeski tein aksa* mitstajtanis oso komo mitstataujtia xikikneli oso komo nochin israelitas ualtachiaj nikan kampa yetok nejin kali uan momaajkoketsaj para mitstataujtiskej (porin sejsemej kimatij toni kintajyouiltia uan toni kinyolkokoua), 30 nimitstataujtia xikinkaki desde ompa iluikak kampa tinemi uan xikintapojpolui. Xikintatsakuilti oso xikintatiochiui por tein kichiuaskej sejsemej, porin tejua kuali tikinixmati, (sayoj tejua kuali tikmati tein kinemiliaj uan tein kimachiliaj), 31 para maj mitsmojkatokakan uan maj mitstakachiuakan* nochi in tiempo keman nemiskej itech tal tein tikinmakak touejkaujtatuan.

32 ”Uan komo aksa akin okseko kayot uan amo poui itech moxolal Israel kitekakilia motokay uan kitekakilia keniuj tikchiuani miak taman ika mochikaualis, yejua ika uitse uan ualtachia nikan kampa yetok nejin kali para mitstataujtis, 33 nimitstajtania xikaki desde ompa iluikak kampa tinemi uan xikchiua nochi tein mitstajtanis. Ijkon nochin akin nemij itech okseki xolalmej kiixmatiskej motokay uan mitsmojkatokaskej ijkon kemej kichiuaj israelitas akin pouij itech moxolal. Uan no kimatiskej ke nejin kali tein nikchijchiuak kiueyitalia motokay.

34 ”Komo tikintitani israelitas maj kinteuitij akin kintauelitaj kampa yeski yetoskej, uan keman israelitas yajtoskej ualtachiaj itech nejin ueyi xolal tein tikijitak uan mitstataujtiaj, porin nikan yetok kali tein nikchijchiuak para maj kiueyitalikan motokay, 35 nimitstajtania xikinkaki desde ompa iluikak keman mitstataujtiskej uan mitstajtaniskej xikinikneli. Uan no nimitstataujtia xikinpaleui.

36 ”Komo israelitas tajtakolchiuaj (porin tinochin titajtakolchiuaj) uan tejua tikualani iniuan uan tikchiua maj akin kintauelitaj kinteuikan uan maj kinuikakan okse altepet, maski nejin altepet uejka yetos oso amo, 37 sayoj ke komo yektanemiliaj uan moyolpataj keman yetoskej kampa kinuikakej, oksepa mitstakamatij uan desde ompa mitstataujtiaj xikinikneli uan kijtouaj ‘Titajtakolchiujkej uan timopolojkej, tikchiujkej tein tel amo kuali’, 38 uan ompa kampa kinuikakej mochikauaj oksepa senkis mitstakamatiskej* uan mitstataujtiaj, uan keman mitstataujtiaj ualtachiaj itech nejin tal tein tikinmakak ininuejkaujtatuan, itech nejin ueyi xolal tein tikijitak uan kampa yetok nejin kali tein nikchijchiuak para kiueyitaliskej motokay, 39 nimitstajtania xikinkaki desde ompa iluikak kampa tinemi keman mitstataujtiskej uan mitstajtaniskej xikinikneli. Xikinpaleui uan xikintapojpolui israelitas akin tajtakolchiujkej.

40 ”Uan axkan noDios, keman timitstataujtiskej nikan mochan xitechita uan xitechkaki. 41 NoDios Jehová, nikan xinemi uan maj nikan yeto tatiochiualkaxon tein kinextia ke semi tichikauak. NoDios Jehová, maj tiopixkamej akin mitstekitiliaj kinextikan ke sayoj tejua ueli tikinmakixtia akin pouij itech moxolal. Uan maj yolpakikan akin mitstakamatij porin tikchiua miak taman tein kuali. 42 NoDios Jehová, amo xikixtopeua tekiuaj akin tikijitak. Xikelnamiki ke nochipa tiktasojtak motekitikauj David”.

7 Keman Salomón kitamitataujtij Dios, ualpantemok tit* den iluikak uan kintamichichinoj tapialmej uan nochi tein kimaktilijkaj Dios. Uan iueyi chikaualis Jehová sentakuik ichan. 2 Tiopixkamej amo uelik kalakkej ichan Jehová porin iueyi chikaualis Jehová sentakuik ichan Jehová. 3 Nochin israelitas kiitakej tit tein ualpantemok uan keniuj iueyi chikaualis Jehová sentakuik ichan. Uan israelitas motankuaketskej, moixpilojkej hasta talpan uan kitasojkamatilijkej Jehová. Yejuan kijtouayaj: “Porin yolkuali. Yejua nochipa techtasojtas”.

4 Tekiuaj Salomón uan nochin israelitas kimaktilijkej Jehová miak tapialmej. 5 Salomón kimaktilij Dios 22 mil kuakuejmej uan 120 mil ichkamej.* Tekiuaj uan nochin israelitas ijkon iluichiujkej para kimaktiliskej toTajtsin Dios kali tein kichijchiuilijkej. 6 Tiopixkamej uan levitas ijkatoyaj kampa ipa moketsayaj. Levitas maaktoyaj tein ika kitatsotsoniliayaj Jehová keman kicantarouiliayaj. (Tekiuaj David kichijchiujka nochi tein kikuiaj para kitatsotsoniliskej Jehová. Yejua kikuia para kitasojkamatilis uan kiueyichiuas Dios iniuan.* Yejuan kijtouayaj: “Porin yejua nochipa techtasojtas”). Nochin israelitas ompa ijkatoyaj keman tiopixkamej chikauak kipitstoyaj trompetas ininixpan levitas.

7 Itech altar de cobre tein yetoya taixpan de ichan Jehová amo akkej nochin tapialmej tein kichichinouilijtoyaj nion ininmantecayo. Amo no akik trigo uan okseki xinach tein kimaktilijkaj Dios. Yejua ika Salomón kixeloj tatajkoyampa den patio para kichichinouiliskej Dios tapialmej, trigo uan okseki xinach uan para kimaktiliskej ininmantecayo tapialmej para iuan sentakuaskej.* 8 Ijkuak, Salomón uan nochin israelitas kiiluichiuilijkej Dios chikome tonal. Tel miakej mosentilijkej uan semi uejuejka ualeuayaj, sekin katkaj de Lebó-Hamat* uan sekin ualeuayaj tanakastan den atauit* tein yetok Egipto. 9 Iluichiujkej chikome tonal porin kitamichijchiujkej altar uan chikome tonal kichiujkej iluit itech sakakaltsitsin, sayoj ke keman ajsik chikueyitika tonal* nochin mosentilijkej para kiueyichiuaskej Dios. 10 Itech tonal 23 den metsti tisri,* Salomón kintitanik ininchan nochin israelitas. Yejuan yajkej uan semi yolpaktiayaj porin Jehová semi kitatiochiuijka David, Salomón uan nochin israelitas akin pouiaj itech ixolal.

11 Uan Salomón kitamichijchiuak ichan Jehová uan kali kampa yejua nemiskia. Uan kuali kisak nochi tein Salomón kiixtalij kichiuas para ichan Jehová uan para yejua ichan. 12 Jehová kichiuak maj Salomón takochita* uan kinojnotsak. Yejua kiluij: “Nimitskakik keman tinechtataujtij uan nikijitak nejin kali para maj nikan nechinmaktilikan tapialmej. 13 Komo nikchiua maj amo kioui kampa nemij akin pouij itech noxolal, komo nikinnauatia chapolimej maj tatamikan itech nochi altepet uan komo nikchiua maj nochin fiero kokolispeuakan* uan maj miakej mikikan, 14 uan akin pouij itech noxolal, akin kinixmatij ika notokay, moyolyemaniaj, nechtataujtiaj, nechtemouaj uan amo kichiuajok tein amo kuali, nejua nikinkakis desde iluikak uan nikintapojpoluis uan nikchiuas maj oksepa motachiua kampa nemij. 15 Desde axkan nochipa nikinitas akin nikan nechtataujtiskej uan nochipa nikinkakis. 16 Nejua nikijitak uan nikxelojya nejin kali para maj nochipa nikan kiueyitalikan notokay, uan nochipa nikitas uan nikyekpias nejin kali.

17 ”Uan komo nochipa tikchiua tein nejua nikneki ijkon kemej kichiuak mopaj David uan tikchiua nochi tein nitanauatia, tein nitamachtia uan tein nikixtalia, 18 nejua nikchiuas uejkauak xitekiuajti. Nikchiuas ijkon kemej nimotenkauak iuan mopaj David keman nikiluij: ‘Nikauas maj nochipa semej mokoneuan tekiuajti itech xolal Israel’. 19 Sayoj ke komo namejuan amo nankichiuajok tein nejua nikneki uan amo nankitakamatijok tein nitanauatia uan tein nitamachtia, uan komo peua namotankuaketsaj ininixpan tatadiosmej* uan nankinueyichiuaj, 20 nejua namechajchiuas de nejin tal tein noaxka uan tein namechmakak uan nikixpolos nejin kali tein nikxeloj para maj nikan kiueyitalikan notokay. Uan akin nemij itech okseki xolalmej namechueuetskiliskej* uan namechkejkeloskej keman kiitaskej tein kipanok nejin kali. 21 Uan nejin kali kitamixitiniskej uan sayoj montontentos tet. Nochin akin panoskej kampa ijkatoya nejin kali, kimojkaitaskej uan tajtaniskej:* ‘¿Keyej Jehová kintatsakuiltij akin nikan nemiaj uan keyej kiuejueloj nejin kali?’. 22 Uan kinnankiliskej: ‘Ijkon kinpanok porin kiixtopeujkej Jehová, ininDios ininuejkaujtatuan, Dios akin kinkixtijka de Egipto. Kinuelitakej tatadiosmej, motankuaketskej ininixpan uan kinueyichiujkej. Yejua ika Dios kintatsakuiltij’”.

8 Salomón uejkauak 20 xiujmej para kitamichijchiuas ichan Jehová uan kali kampa yejua nemiskia. 2 Satepan, Salomón kinyekchijchiuak uejueyi xolalmej tein Hiram kimakaka uan kintitanik seki israelitas* maj ompa chanchiuatij. 3 Uan no, Salomón kinteuito akin nemiaj Hamat-Zobá uan moaxkatilij inintal. 4 Satepan kiyekchijchiuak ueyi xolal Tadmor tein yetok kampa taseltijkan. Uan no kinyekchijchiuak nochi in uejueyi xolalmej kampa kitaliaya takual. Nejon uejueyi xolalmej kinchijchiujka ompa Hamat. 5 No kinchijchiuak Bet-Horón Alta uan Bet-Horón Baja. Nejin uejueyi xolalmej kinchijchiuilij uejueyi tepamit, kintalilij puertas uan kinchijchiuak teposmej para kinixtapaltalilis puertas. 6 Salomón no kichijchiuak ueyi xolal Baalat uan uejueyi xolalmej tein iaxka kampa kisentiliskia takual. No kinchijchiuak uejueyi xolalmej kampa kinketsaskia icarros uan kampa nemiskiaj akin yayaj itech caballos. Uan Salomón no kichijchiuak okseki taman ompa Jerusalén, Líbano uan itech nochi in talmej kampa taixyekanaya. Yejua kichijchiuak nochi tein kinekik.

7 Itech xolal Israel mokauayajok sekin akin amo katkaj israelitas. Katkaj ininkoneuan hititas, amorreos, perizitas, heveos uan jebuseos. 8 Yejuan ompa mokaujkej porin israelitas amo kinixpolojkej. Salomón kinsentilij uan kinchikaujkauij maj kitekitilikan uan kisentokaj kitekitiliaj hasta axkan. 9 Sayoj ke Salomón amo kichikaujkauij nion se israelita maj kitekitili, ta sekin katkaj isoldados, sekin kinixyekanayaj takamej akin kinixyekanayaj soldados uan oksekin kinixyekanayaj akin kinuikayaj carros uan akin yayaj itech caballos. 10 Tekiuaj Salomón kinixtalijka 250 takamej akin katkaj uejueyi chiuanimej para kinixyekanaskej tekitinij.

11 Iichpoch faraón chanchiuaya itech ueyi xolal tein iaxka David, sayoj ke Salomón kiuikak* maj chanchiuati itech kali tein kichijchiuilijka. Salomón kijtoj: “Kampa yetoni tatiochiualkaxon* tein iaxka Jehová semi chipauak, yejua ika maski yejua nosiuatsin, amo moneki nemis ichan David akin tekiuajtik itech xolal Israel”.

12 Uan Salomón kichichinouilij Jehová tapialmej itech ialtar Jehová. Nejon altar kichijchiujka taixpan den cuarto kampa se kalakteua ichan Dios. 13 Ijkon kemej kijtouaya Tanauatil tein Dios kimakaka Moisés, Salomón mojmostaj kimaktiliaya Dios tapialmej uan no kimaktiliaya itech tonal sábado. No kimaktiliaya keman iluitiaj porin peuaya selik metsti uan keman kichiuayaj eyi iluimej tein ixyetoya kichiuaskej xijxiujtika: iluit keman kikuaj pantsin tein amo kipia levadura, iluit keman peua kitekij tein mochiuak inintalpan uan iluit tein kichiuaj itech sakakaltsitsin. 14 Uan no, Salomón kiixtalij keniuj tekitiskiaj tiopixkamej ijkon kemej xejxeliujtoyaj. Kichiuak kemej tanauatijka itat David akin kitekitiliaya toTajtsin Dios. No kinnauatij levitas katiyejua tekit kichiuaskiaj. Levitas mojmostaj kicantarouiliskiaj Dios uan kinpaleuiskiaj* tiopixkamej. Uan akin tajpiayaj puertajtenoj kintitanik maj tajpiatij ijkon kemej xejxeliujtoyaj. Kichiuak nejon porin yejua tein David tanauatijka maj mochiua. 15 Tiopixkamej uan levitas kichiujkej nochi tein tanauatij tekiuaj. Kichiujkej ijkon kemej tanauatij uan tein kiixtalij maj mochiua itech kalmej kampa kitaliayaj tein kikuaskej. 16 Salomón kichiujtiajki nochi tekit tein ixyetoya mochiuas desde keman kitsineualtij ichan Jehová hasta keman matamik. Ijkon kitamichijchiuak ichan Jehová.

17 Satepan Salomón yajki Ezión-Guéber uan Elat tein yetokej tanakastan den mar uan pouij Edom. 18 Hiram kintitanik itakeualuan maj kiuikilikan Salomón barcos uan no kintitanik takamej akin kuali kimatiaj keniuj kinuikaskej barcos itech mar. Yejuan yajkej Ofir iniuan itakeualuan tekiuaj Salomón uan kiualkuilijkej 15,390 kilos* de oro.

9 Siuatsin akin tekiuajtia Saba* kitekakilij ke Salomón semi kiixmatiaj, yejua ika ualaj Jerusalén para kitajtanis* miak taman tein ouij uan ijkon kimatis ox yekmelauj semi tamatkej katka. Tel miakej itakeualuan iuan ualajkej uan kinualkuikej camellos tein kimamajtiualayaj aceite tein monotsa bálsamo. No kiualkuikej tel miak oro uan miak tetsitsin tein patiyoj. Siuatsin kiitako Salomón uan kitajtanij nochi tein kinekia kimatis. 2 Salomón uelik kinankilij siuatsin nochi tein kitajtanij. Amo kiouijmakak nion se taman tein kitajtanij, ta nochi kimelauilij.

3 Keman siuatsin akin tekiuajtia Saba kiitak ke Salomón semi tamatkej katka uan kiitak kali tein kichijchiujka, semi kimojkaitak. 4 No semi kimojkaitak nochi tein kipiayaj para kikuaskej, keniuj motaliayaj uejueyi chiuanimej akin kitekitiliayaj, keniuj tekitiaj uan keniuj takentoyaj akin takualtekayaj, keniuj moitayaj akin kitekiliayaj vino tekiuaj uan tasal tein motaliliayaj. Uan no semi kimojkaitak maj tekiuaj nochipa yani ichan Jehová para kichichinouilis semi miak tapialmej. 5 Yejua ika siuatsin kiluij tekiuaj Salomón: “Kampa nikayot niktekakilijka nochi tein tikchiuak uan ke semi titamatkej. Uan axkan nikitakya ke yekmelauj nochi nejon. 6 Sayoj ke nejua amo nikinneltokilij nochi tein kijtouayaj hasta ke niualaj uan nikitak. Nikitakya ke amo nochi nechtamiiluijkaj porin okachi titamatkej ke tein niktekakilij. 7 ¡Yolpakij akin tikinixyekana uan motakeualuan porin mojmostaj kikaktokej keniuj semi titamatkej! 8 Maj kiueyitalikan moDios Jehová akin kiyolpaktia tein tikchiua, yejua ika mitsixtalij xitaixyekana itech xolal Israel. Kemej moDios Jehová kintasojta israelitas uan kineki maj nochipa nemikan, mitsixtalij xikinixyekana para tikixtalis tein monekis keman israelitas mitsixpantiliskej teisa uan para tikinpaleuis”.

9 Siuatsin akin tekiuajtia Saba kimakak Salomón 4,104 kilos* de oro, tel miak aceite tein monotsa bálsamo uan tel miak tetsitsin tein patiyoj. Amo kemanok kiualkuikej tel miak aceite tein monotsa bálsamo kemej tein siuatsin akin tekiuajtia Saba kiualkuilij tekiuaj Salomón.

10 Uan no, itakeualuan Hiram uan itakeualuan Salomón akin yayaj Ofir kikuitij oro, no kiualkuiaj kouit tein moixmatia kemej sándalo uan tetsitsin tein patiyoj. 11 Ika nejon kouit, Salomón kichijchiuilij escaleras ichan Jehová uan no kichijchiuak okseki escaleras para kitalis itech kali kampa yejua nemia. No kinchijchiuilij arpas uan cítaras* akin cantarouayaj. Amo keman moitstoya ompa Judá tel kuajkuali kouit kemej nejon sándalojkouit.

12 Tekiuaj Salomón no kimakak siuatsin akin tekiuajtia Saba nochi tein kinekik uan tein kitajtanij. Kimakak okachi ke* tein yejua kiualkuilijka tekiuaj. Satepan siuatsin mokepak ialtepeuj iniuan itakeualuan.

13 Tekiuaj Salomón kimakayaj xijxiujtika 22,777 kilos* de oro. 14 No kiualkuiliayaj oro akin tanamakatinemiaj uan akin sekosan tanamakayaj. No kiualkuiliayaj plata uan oro akin tekiuajtiaj Arabia uan akin Salomón kinixtalij maj taixyekanakan itech seki uejueyi xolalmej.

15 Tekiuaj Salomón kinchijchiuak 200 uejueyi escudos. Nejin escudos kinchijchiuak ika oro tein kimaneloj ika okse taman tepos (sejse escudo kipiaya chikome kilo* oro tein maneliujtoya ika okse taman tepos). 16 No kinchijchiuak 300 escudos tein tsikitsitsin.* Katkaj de oro tein kimaneloj ika okse tepos (sejse escudo kipiaya ome kilo* oro). Tekiuaj kintalij nejon escudos itech kali tein kitokaytijka Koujmej den Líbano.

17 Uan no, tekiuaj kikuik inintenomiyo elefantes para mochijchiuilis se ueyi silla uan kitamipepechouilij oro tein okachi kuali. 18 Kinchijchiuak chikuasen escalones para se pankisas kampa yetoya ueyi silla uan imetstsintan kichijchiuak se banquito de oro para mometstajtalis. Ueyi silla kipiaya kampa momatajtalis tekiuaj uan tajtanakastan den ueyi silla kitalij se león tein kikualtsintilij ika oro. 19 Uan no kinchijchiuak 12 leones uan kintalij tajtanakastan den chikuasen escalones. Nion se tekiuaj kipiaya se ueyi silla kemej tein Salomón mochijchiuilijka. 20 Nochin copas tein tekiuaj Salomón kipiaya katkaj de oro, uan no katkaj de oro tapalkamej uan nochi okseki taman tein kipiaya itech kali tein kitokaytijka Koujmej den Líbano. Keman Salomón tekiuajtia onkaya tel miak oro, yejua ika amo kipiaya nion se taman de plata porin plata amo patiyoj katka. 21 Itakeualuan Salomón yayaj itech barcos hasta Tarsis iniuan itakeualuan Hiram. Ejeyi xiujtika yayaj Tarsis uan kiualkuiaj oro, plata, inintenomiyo elefantes, monos uan pavos reales.

22 Tekiuaj Salomón okachi tominpiaya uan okachi tamatkej katka ke nochin okseki tekiuanij. 23 Akin tekiuajtiaj itech okseki altepemej kinekiaj ualaskej kikakikiuij Salomón porin semi tamatkej katka. Totajtsin Dios kichiujka maj Salomón semi tamatkej. 24 Nochin akin xijxiujtika ualayaj kiitakij kiualkuiliayaj teisa. Yejuan kiualkuiliayaj miak taman tein chijchiujtoya ika plata uan oro. No kiualkuiliayaj tasal, aceite tein monotsa bálsamo, caballos, mulas uan teposmej tein ika tateuiayaj. 25 Uan Salomón kinpiaya naui mil kaltsitsin kampa kinkalakiayaj caballos tein kitilanayaj icarros uan 12 mil caballos.* Icaballos uan icarros kinpiaya itech uejueyi xolalmej kampa kintachijchiuijka carros uan ompa Jerusalén kampa yejua nemia. 26 Salomón no kinixyekanaya nochin akin tekiuajtiaj desde ueyiat Éufrates hasta kampa nemiaj filisteos uan hasta kampa peuaya Egipto. 27 Tekiuaj kichiuak maj ompa Jerusalén tel onkani plata kemej yeskia miak tet, uan maj tel onkani cedrojkouit kemej higojkouit tein tel onkak ompa Sefelá. 28 Uan Salomón no kiualkuiliayaj caballos de Egipto uan de okseki altepemej.

29 Nochi okseki taman tein kipanok Salomón keman tekiuajtik kijkuiloj tanauatijkej* Natán, tanauatijkej Ahíya akin kayot Siló uan tanauatijkej Idó akin Dios kimatiltij tein kichiuaskia Jeroboán iokichpil Nebat. 30 Salomón nemia Jerusalén uan desde ompa kinixyekanak israelitas 40 xiujmej. 31 Salomón momikilij* uan kitokkej itech ueyi xolal tein iaxka David akin katka itat. Uan Rehoboam akin katka iokichpil Salomón peuak tekiuajti.

10 Rehoboam yajki Siquem porin nochin israelitas ompa mosentilijkaj para kiixtaliskej kemej tekiuaj. 2 Keman Jeroboán iokichpil Nebat kimatik ke Rehoboam kiixtalijkaj kemej tekiuaj, niman mokepak de Egipto. (Yejua yetoyaok Egipto porin cholojka keman tekiuaj Salomón kinekia kimiktis). 3 Israelitas kintitankej seki takamej para maj kikuitij Jeroboán. Satepan, Jeroboán uan nochin israelitas kiitatoj Rehoboam uan kiluijkej: 4 “Mopaj semi techtajyouiltij, sayoj ke komo tejua amo semi titechtekitiltiaok uan amo titechtajyouiltiaok kemej mopaj kichiuak, tejuan timitstekitiliskej”.

5 Rehoboam kinnankilij: “Oksepa xinechitakij uipta”. Uan israelitas yajkej. 6 Tekiuaj Rehoboam kintajtanij* taixyekananij* israelitas toni maj kichiua. Yejuan kipaleuiayaj itat Salomón keman nemia. Yejua kintajtanij: “¿Toni uelis nikinnankilis israelitas?”. 7 Yejuan kinankilijkej: “Komo tikaki tein mitsiluiaj israelitas, kuali tikinnankilia uan tikiniluia ke tikchiuas tein mitstajtaniaj, yejuan nochipa mitstekitiliskej”.

8 Sayoj ke Rehoboam amo kinkakik taixyekananij* israelitas, ta kintajtanito telpochmej akin iuan moskaltijkaj toni maj kichiua. Yejuan kitekitiliayaj Rehoboam. 9 Yejua kintajtanij: “¿Toni nankinemiliaj ke moneki tikiniluiskej israelitas? Yejuan nechiluijkej maj amo nikintajyouiltiok kemej kintajyouiltij nopaj”. 10 Telpochmej akin iuan moskaltijkaj kiluijkej: “Akin mitsiluikoj: ‘Mopaj semi techtajyouiltij yejua ika timitstajtaniaj tejua amo semi xitechtajyouiltiok’, xikinnankili nejin: ‘Nejua okachi namechtekitiltis* ke nopaj. 11 Nopaj semi namechtajyouiltij sayoj ke nejua okachiok namechtajyouiltis. Nopaj namechtatsakuiltij ika kuetaxmekat, sayoj ke nejua namechtatsakuiltis ika kuetaxmekat tein okachi namechkojkokos’”.*

12 Jeroboán uan nochin okseki israelitas kiitatoj Rehoboam uiptika, porin yejua kiniluijka: “Oksepa xinechitakij uipta”. 13 Sayoj ke Rehoboam amo kichiuak tein kiluijkaj taixyekananij,* ta kintauelnankilij israelitas. 14 Rehoboam kichiuak tein kiluijkej telpochmej uan kiniluij israelitas: “Ipa namechtajyouiltianij, sayoj ke nejua okachiok namechtajyouiltis. Nopaj namechtatsakuiltij ika kuetaxmekat, sayoj ke nejua namechtatsakuiltis ika kuetaxmekat tein okachi namechkojkokos”. 15 ToTajtsin Dios taolinij para maj tekiuaj Rehoboam amo kinkaki israelitas. Ijkon mochiuaskia tein Jehová kiluijka Ahíya maj kimatilti Jeroboán iokichpil Nebat. Ahíya katka kayot Siló.

16 Kemej tekiuaj amo kinekik kinkakis israelitas, yejuan kinankilijkej Rehoboam: “David amo topariente para tikpaleuijtoskej. Iokichpil Jesé amo teyi techmakas. ¡Tiouij oksepa tikinueyichiuatij totatadiosuan!* Ompa ximoitakanya namejuan ikoneuan David”. Uan nochin israelitas yajkej ininchan.*

17 Sayoj ke Rehoboam kisentokak kinixyekanak seki israelitas. Nejin israelitas nemiaj itech uejueyi xolalmej kampa kintaxejxelouilijkaj ikoneuan Judá.

18 Tekiuaj Rehoboam kititanik Hadoram maj kinitati israelitas. Hadoram kinixyekanaya takamej akin tekiuaj kinchikaujkauiaya maj kitekitilikan. Sayoj ke israelitas kitetenkej* Hadoram uan kimiktijkej. Tekiuaj Rehoboam uelikok tejkok* itech icarro para cholos uan yajki Jerusalén. 19 Uan israelitas kisentokaj kinixnamikij ichankauan David hasta axkan.

11 Keman Rehoboam ajsik Jerusalén, niman kinsentilij nochin israelitas akin pouiaj iniuan ikoneuan Judá uan Benjamín. Katkaj 180 mil soldados akin kuali tateuiayaj.* Rehoboam kinsentilij para kinteuitiuij akin nemiaj itech xolal Israel uan ijkon Rehoboam oksepa kintamiixyekanaskia nochin israelitas. 2 Sayoj ke Jehová kinojnotsak tanauatijkej* Semaya uan kiluij: 3 “Xikitati Rehoboam iokichpil Salomón akin tekiuajti Judá, uan no xikinitati israelitas akin nemij kampa kintaxejxelouilijkej ikoneuan Judá uan Benjamín, uan xikinilui: 4 ‘Yejua nejin tein kijtoua Jehová: “Amo xipankisakan para nankinteuiskej namokniuan. Ximokepakan namochan porin nejua nikchiuak maj pano nejin”’”. Yejua ika yejuan kitakamatkej Jehová uan mokepkej ininchan. Amo kiteuitojok Jeroboán.

5 Rehoboam chanchiuak ompa Jerusalén, uan kinchijchiuilij uejueyi tepamit seki uejueyi xolalmej tein yetoyaj ompa Judá. 6 Uejueyi xolalmej tein kinchijchiuilij uejueyi tepamit katkaj: Belén, Etam, Tecoa, 7 Bet-Zur, Socó, Adulam, 8 Gat, Maresá, Zif, 9 Adoraim, Lakís, Azecá, 10 Zorá, Ayalón uan Hebrón. Yejua nejin uejueyi xolalmej tein yetoyaj kampa kintaxejxelouilijkej ikoneuan Judá uan Benjamín tein kinchijchiuilij uejueyi tepamit. 11 Uan no, itech uejueyi xolalmej kampa kinchijchiujka uejueyi tepamit kinmakak akin ompa nemiaj nochi tein monekia para ueliskia kinixnamikiskej akin kinekiskiaj kinteuiskej. No kintalij takamej akin kinixyekanayaj soldados para maj tajpiakan uan akin ompa nemiaj kinmakak aceite, vino uan miak taman tein kikuaskej. 12 No kinmakak akin nemiaj itech nejon uejueyi xolalmej uejueyi escudos uan lanzas.* Yejua kichiuak miak taman para kinpaleuis akin ompa nemiaj maj kinixnamikikan akin kintauelitayaj. Uan Rehoboam kisentokak kinixyekanak akin pouiaj iniuan ikoneuan Judá uan Benjamín.

13 Uan tiopixkamej uan levitas akin chanchiuayaj itech xolal Israel kiskej uan chanchiuakoj Judá para kipaleuiskej Rehoboam. 14 Levitas chanchiuakoj Judá uan Jerusalén. Kikaujkej tein kipiayaj uan talmej kampa kinpiayaj inintapialuan. Kichiujkej nejon porin Jeroboán uan ikoneuan amo kinkaujkejok maj kitekitilikan Jehová kemej tiopixkamej. 15 Jeroboán kinixtalij tiopixkamej akin tekitiskiaj kampa tachijchiujkaj para taueyichiuaskej. No tekitiskiaj kampa kinueyichiuayaj amokuali ejekamej tein moitayaj kemej chivos uan kampa yetoyaj kuakuejkonemej tein kinchijchiujka. 16 Sekin akin pouiaj iniuan uejueyi kalyetonij* kinekiaj kiueyichiuaskej Jehová ininDios israelitas. Yejua ika no yajkej Jerusalén iniuan tiopixkamej uan levitas para kimaktiliskej Jehová, ininDios ininuejkaujtatuan, tapialmej uan okseki taman. 17 Eyi xiuit kitakamatkej Rehoboam iokichpil Salomón uan nejon kipaleuij itaixyekanalis ompa Judá. Nejon israelitas eyi xiuit kitakamatkej Dios kemej kichiujkaj David uan Salomón.

18 Rehoboam monamiktij iuan Mahalat akin katka isiuapil Jerimot. Jerimot katka iokichpil David. Inan Mahalat monotsaya Abihail akin katka isiuapil Eliab iokichpil Jesé. 19 Rehoboam uan Mahalat kinpiakej konemej. Yejuan monotsayaj Jeús, Semarías uan Zaham. 20 Satepan Rehoboam monamiktij iuan Maacá akin katka iixuiuj Absalón uan kinpiakej konemej. Yejuan monotsayaj Abías, Atái, Zizá uan Selomit. 21 Rehoboam monamiktij iniuan 18 siuamej. No katkaj isiuauan 60 siuamej* akin kitekitiliayaj, sayoj ke okachi kitasojtaya Maacá iixuiuj Absalón. Kinpiak 28 iokichpipiluan uan 60 isiuapipiluan. 22 Rehoboam kiixtalij Abías iokichpil Maacá maj kinixyekana iikniuan porin kinekia maj yejua kiixpata kemej tekiuaj. 23 Sayoj ke kinextij ke katka tamatkej, yejua ika kintitanik* seki ikoneuan maj chanchiuatij itech uejueyi xolalmej kampa tatsaktoya ika uejueyi tepamit. Nejin uejueyi xolalmej yetoyaj kampa kintaxejxelouilijkej ikoneuan Judá uan Benjamín. No kinmakak miak taman tein kikuaskej uan kintemolij miak siuamej para maj iniuan monamiktikan.

12 Rehoboam amo kitakamatikok itanauatil Jehová tepitsin satepan ke mochiuak ueyichiujkej uan peuak senkis taixyekana. Israelitas akin kinixyekanaya no ijkon kichiujkej. 2 Keman Rehoboam makuil xiuitya tekiuajtitoya, Sisac akin tekiuajtia Egipto pankisak Jerusalén para kinteuis israelitas. Kinpanok nejon porin tajtakolchiujkej uan kiixtopeujkej Jehová. 3 Sisac kinualkuik de Egipto 1,200 carros tein kikuia para tateuis uan 60 mil soldados akin ualayaj itech caballos. No kinualkuik tel miakej soldados akin katkaj de Libia, Etiopía uan oksekin akin moixmatiaj kemej sukiyim. 4 Moinaxkatilij uejueyi xolalmej tein yetoyaj Judá kampa tatsaktoya ika uejueyi tepamit, uan satepan ejkok Jerusalén.

5 Akin taixyekanayaj Judá mosentilijkej Jerusalén iuan Rehoboam porin kimouiliayaj Sisac. Tanauatijkej* Semaya kinitako uan kiniluij: “Yejua nejin tein kijtoua Jehová: ‘Kemej namejuan nanechkaujkej, nejua no namechkauak. Yejua ika Sisac uitse namechteuiki’”. 6 Keman akin taixyekanayaj Israel* uan tekiuaj kikakkej nejon, moyolyemanijkej uan kijtojkej: “Kuali yetok tein Jehová kiixtalij”. 7 Keman Jehová kiitak ke moyolyemanijkej, Jehová kinojnotsak Semaya uan kiluij: “Amo nikinixpolos porin moyolyemanijkej uan amo uejkaua nikinmakixtis. Amo nikauasok maj Sisac kinixpolo akin nemij Jerusalén porin amo nikualantokok iniuan. 8 Sayoj ke mochiuaskej itakeualuan. Ijkon kimatiskej ke okachi kuali komo nejua nechtekitiliaj uan amo komo kintekitiliaj akin tekiuajtij itech okseki altepemej”.

9 Sisac akin tekiuajtia Egipto pankisak Jerusalén para kinteuis israelitas. Kitamiuikak nochi tein patiyoj tein onkaya ichan Jehová uan nochi tein patiyoj tein onkaya ichan tekiuaj. Kiuikak nochi, hasta escudos de oro tein Salomón kinchijchiujka. 10 Yejua ika tekiuaj Rehoboam kinchijchiuak okseki escudos de cobre, uan kinnauatij akin kinixyekanayaj soldados akin tajpiayaj maj kinyekpianij nejon escudos. Yejuan tajpiayaj puertajtenoj de ichan tekiuaj. 11 Keman tekiuaj ualaya ichan Jehová, soldados akin tajpiayaj iuan ualayaj uan kinualkuiaj nejon escudos. Satepan mokepayaj uan oksepa kintaliayaj escudos kampa yejuan mokauayaj. 12 Kemej tekiuaj moyolyemanij, Jehová moyolseuij uan amo kintamiixpolojok kemej kiixtalijka. Uan amo no kintamiixpolojok porin sekin kichiujtoyaj tein kuali ompa Judá.

13 Tekiuaj Rehoboam mochiuak okachi ueyichiujkej ompa Jerusalén uan kisentokak kinixyekanak israelitas. Inan tekiuaj Rehoboam monotsaya Naamá uan katka kayot Ammón. Rehoboam kipiaya 41 xiujmej keman peuak tekiuajti, nemia Jerusalén uan tekiuajtik 17 xiujmej. Jehová kijitak ueyi xolal Jerusalén para maj ompa kiueyitalikan itokay. Kijitak Jerusalén de nochin uejueyi xolalmej tein ininaxka uejueyi kalyetonij israelitas. 14 Sayoj ke Rehoboam kichiuak tein amo kuali porin amo kiixtalijka kitemos maj Jehová kiixyekana.

15 Nochi tein kichiuak Rehoboam keman tekiuajtik, ijkuiliujtok kampa ixnesij akonimej katkaj ichankauan. Ompa no ijkuiliujtok tein kijtojkej tanauatijkej Semaya uan Idó akin Dios kiitaltiaya tein kinekia maj kitematilti. Rehoboam uan Jeroboán nochipa moteuijkej keman tekiuajtitoyaj. 16 Rehoboam momikilij* uan kitokkej itech ueyi xolal tein iaxka David. Uan Abías iokichpil Rehoboam peuak tekiuajti.

13 Abías peuak tekiuajti ompa Judá keman Jeroboán 18 xiujmejya tekiuajtitoya. 2 Abías nemia Jerusalén uan tekiuajtik eyi xiuit. Inan monotsaya Micaya. Itat Micaya monotsaya Uriel uan katka kayot Guibeá. Abías uan Jeroboán nochipa moteuijkej keman tekiuajtitoyaj.

3 Abías yajki tateuito uan kinuikak 400 mil soldados akin semi chikaujkej katkaj uan semi kuali tateuiayaj.* Jeroboán uan isoldados motejtekpankej para moteuiskej iuan Abías. Yejua kinuikaya 800 mil soldados akin semi chikaujkej katkaj uan semi kuali tateuiayaj. 4 Abías moketsato itech tepet Zemaraim tein yetok kampa tepeyoj kampa kintaxejxelouilijkaj ikoneuan Efraín. Abías kijtoj: “¡Xinechkaki Jeroboán uan no xinechkakikan israelitas! 5 ¿Xe amo nankimatij ke toDios Jehová* kiixtalij David uan ikoneuan maj nochipa kinixyekanakan israelitas? Tein motenkauak iniuan amo keman mopatas.* 6 Sayoj ke Jeroboán iokichpil Nebat akin kitekitiliaya Salomón* kiixnamikik iteko. 7 Jeroboán mouikaya iniuan takamej akin amo yolkualmej katkaj uan tatsiujkanentinemiaj. Yejuan kiixnamikkej Rehoboam iokichpil Salomón uan kitankej. Rehoboam katka telpochok uan amo semi yolchikauak katka, yejua ika amo uelik kinixnamikik.

8 ”Jehová kinixtalij ikoneuan David para maj yejuan taixyekanakan. Uan axkan namejuan nankinemiliaj ke uelis nankiixnamikiskej itaixyekanalis Dios porin semi namiakej uan porin nankipiaj kuakuejkonemej de oro. Nejon kuakuejkonemej Jeroboán kinchijchiuak para maj yejuan namodiosuan. 9 Namejuan nankintokakej* levitas uan itiopixkauan Jehová akin ikoneuan Aarón, uan nankinixtalijkej namotiopixkauan ijkon kemej kichiuaj akin nemij itech okseki altepemej. Akin ualaya kitemaktiki se kuakouej tein yekin moskaltijtoya uan chikome ichkaueuetkej* uelia mochiuaya tiopixkat para kintekitilis namodiosuan. 10 Sayoj ke tejuan toDios yejua Jehová uan amo tikauanij. Tiopixkamej akin ikoneuan Aarón kitekitilijtokej Jehová uan levitas kinpaleuiaj maj kichiuakan tekit tein kipiaj. 11 Mojmostaj kualkan uan tiotak kichichinouiliaj Jehová tapialmej uan okseki taman uan no kimaktiliaj kopal tein ajuiyak. Pantsitsin tein kimaktiliaj Dios yetokej itech mesa tein chijchiujtok ika oro tein okachi kuali uan mojmostaj tiotak kixotaltiaj candilmej tein yetokej itech tauilketsalonimej. Tejuan tikchiujtokej tekit tein toDios Jehová techmakak, sayoj ke namejuan nankikaujkej toDios. 12 ToTajtsin Dios techpaleuijtok uan techixyekantok. Tiopixkamej akin kitekitiliaj nikan yetokej para kipitsaskej trompetas uan ijkon tikmatiskej ke peuasya timoteuiskej namouan. Takamej israelitas, amo ximoteuikan iuan Jehová ininDios namouejkaujtatuan porin ipa amo nankitaniskej”.

13 Sayoj ke Jeroboán kintitanik seki soldados taikankopa para kinichtakauiskej soldados akin katkaj de Judá. Seki isoldados Jeroboán yetoyaj ininixpan soldados akin katkaj de Judá uan okseki isoldados yetoyaj taikankopa. 14 Keman soldados akin katkaj de Judá moixkepkej, kiitakej ke yayaj kinteuitij taikankopa uan taixpankopa. Yejua ika peuak kitataujtiaj Jehová maj kinpaleui keman tiopixkamej chikauak kipitstoyaj trompetas. 15 Soldados akin katkaj de Judá chikauak tsajtsikej para peuas tateuiskej. Uan keman chikauak tsajtsikej, toTajtsin Dios kichiuak maj Abías uan soldados akin katkaj de Judá kintaninij Jeroboán uan nochin soldados israelitas. 16 Isoldados Jeroboán kincholuijkej soldados akin katkaj de Judá uan Dios kichiuak maj kintanikan. 17 Abías uan isoldados kinmiktijkej tel miakej isoldados Jeroboán. Kinmiktijkej 500 mil soldados israelitas akin kuali tateuiayaj. 18 Soldados israelitas akin kipaleuiayaj Jeroboán kinpinaujtijkej keman kintankej. Sayoj ke soldados akin katkaj de Judá tatankej porin takuaujtamatkej iuan Jehová, ininDios ininuejkaujtatuan. 19 Abías kisentokak kiteuij Jeroboán uan kikuilij nejin uejueyi xolalmej: Betel, Jesaná uan Efrén uan xolaltsitsin tein pouij itech nejon uejueyi xolalmej. 20 Keman Abías tekiuajtitoya, Jeroboán amo uelikok mochiuak ueyichiujkej kemej achto. Uan Jehová kichiuak maj Jeroboán miki.

21 Sayoj ke Abías mochiuak okachi ueyichiujkej. Yejua kinpiak 14 isiuauan, 22 iokichpipiluan uan 16 isiuapipiluan. 22 Uan tanauatijkej* Idó kijkuiloj nochi okseki taman tein kichiuak Abías uan tein kijtoj.

14 Abías momikilij* uan kitokkej itech ueyi xolal tein iaxka David uan Asá iokichpil Abías peuak tekiuajti. Yekinika majtakti xiujmej keman Asá tekiuajtitoya, israelitas kualtsin nenkej.

2 Asá kichiuak tein iDios Jehová kiyolpaktia. 3 Kinixpoloj altares kampa kinueyichiuayaj tatadiosmej* uan tauejueloj kampa tachijchiujkaj para taueyichiuaskej. No kintatapatsak temej tein kinkejketskaj para taueyichiuaskej uan kintamotak koujmej tein ika taueyichiuayaj.* 4 Uan no, kiniluij akin nemiaj Judá maj kiueyichiuanij Jehová, ininDios ininuejkaujtatuan uan maj kitakamatinij Tanauatil tein Dios kimakaka Moisés uan nochi tein Dios kinnauatij maj kichiuakan. 5 Yejua ika, itech nochi uejueyi xolalmej tein yetokej ompa Judá tauejueloj kampa tachijchiujkaj para taueyichiuaskej uan kinajchiuak altares kampa tapopochuiayaj. Nochin kualtsin nemiaj keman Asá tekiuajtitoya. 6 Kemej kualtsin nemiaj ompa Judá, Asá peuak kinchijchiua uejueyi xolalmej uan kinchijchiuilij uejueyi tepamit. Amo akin kinteuij itech nochi nejon xiujmej porin Jehová kichiuak maj kualtsin neminij. 7 Asá kiniluij akin nemiaj Judá: “Maj tikinchijchiuakan uejueyi xolalmej, maj tikinyoualokan ika uejueyi tepamit uan uejkapan kalmej, maj tikintalilikan puertas uan maj tikinchijchiuakan teposmej para tikinixtapaltaliliskej puertas. Nejin altepet toaxkaok porin tikueyichiuanij toDios Jehová. Kemej tikueyichiuanij, yejua kichiuani maj noyan* kualtsin tinemikan”. Uan yejuan uelik kichijchiujkej nochi tein kiixtalijkej.

8 Asá kinpiaya 300 mil soldados akin pouiaj iniuan ikoneuan Judá. Yejuan kipiayaj uejueyi escudos uan lanzas.* Uan kinpiaya 280 mil soldados akin pouiaj iniuan ikoneuan Benjamín. Yejuan kuali tateuiayaj uan kipiayaj escudos tein tsikitsitsin* uan arcos.*

9 Panok tiempo uan Zérah akin etíope ualaj kinteuiko akin nemiaj Judá. Kinualkuia se millón de soldados uan 300 carros tein kikuiaj keman tateuiayaj. Keman Zérah ejkok Maresá, 10 Asá kiixnamikiko itech tal tamanis* tein moixmati kemej Zefata tein yetok tanakastan de Maresá. Nochin soldados motejtekpankej ompa para moteuiskej. 11 Asá kitataujtij iDios Jehová uan kiluij: “Jehová, tejua ueli tikinpaleuia akin chikaujkej* uan no ueli tikinpaleuia akin amo chikaujkej. ToDios Jehová, timitstataujtiaj xitechpaleui porin mouan titakuaujtamatij uan motokaykopa tikinixnamikikoj nejin soldados akin tel miakej. Jehová, tejua titoDios. Amo xikaua maj mitstanikan nejin takamej akin amo teyi chiuanimej”.

12 Uan Jehová kichiuak maj Asá uan soldados akin katkaj de Judá kintanikan etíopes. Yejua ika soldados etíopes cholojkej. 13 Asá uan isoldados motalojkej para kintokatiaskej etíopes hasta Guerar uan kinmiktijtiajkej. Jehová uan isoldados kintamiixpolojkej etíopes. Satepan, soldados akin katkaj de Judá mouikilijkej nochi tein kiualkuikaj etíopes. 14 Uan no kinteuijkej akin nemiaj itech uejueyi xolalmej tein yetoyaj tajtanakastan de Guerar. Akin nemiaj itech nejon uejueyi xolalmej semi kimouilijkej Jehová. Yejuan kipiayaj miak taman, yejua ika soldados akin katkaj de Judá mouikilijkej nochi tein kipiayaj. 15 Uan no kinteuijkej ichkatajpianij akin nemiaj itech kaltsitsin.* Kinkuilijkej tel miak ichkamej* uan camellos. Satepan mokepkej Jerusalén.

15 Dios kimakak ichikaualis Azarías akin katka iokichpil Oded. 2 Azarías kinamikito Asá uan kiluij: “¡Xinechkaki Asá uan no xinechkakikan nochin ikoneuan Judá uan Benjamín! Komo nankisentokaj nankitekitiliaj Jehová, yejua nochipa namechpaleuis. Komo nankitemouaj, yejua mokauas xikajsikan, sayoj ke komo nankikauaj yejua no namechkauas. 3 Israelitas miak xiujmej* amo kitekitilijkej toTajtsin Dios, amo onkayaj tiopixkamej akin ueliskia kinmachtiskej uan amo kitakamatkej itanauatiluan Dios. 4 Sayoj ke keman israelitas tajyouijtoyaj oksepa peuak kitemouaj toDios Jehová* uan oksepa peuak kiueyichiuaj, uan yejua mokauak maj kiajsikan. 5 Ijkuak, akin okseko yaya ueliskia kipanos teisa porin noyan* miakej semi takuejmolchiuayaj. 6 Dios kichiujtoya maj itech nochi altepemej nochin kipianij miak ouijkayomej, yejua ika amo kimatiajok toni kichiuaskej. Akin nemiaj itech se altepet tamitaixpolouayaj itech okse altepet. Uan akin nemiaj itech se ueyi xolal tamitaixpolouayaj itech okse ueyi xolal. 7 Sayoj ke namejuan ximoyolchikauakan uan amo xitayokoyakan* porin Dios kitiochiuas tein nankichiuaskej”.

8 Asá moyolchikauak keman kikakik tein Azarías kijtoj uan tein Dios kiluijka tanauatijkej* Oded maj kitematilti. Yejua ika kinajchiuak tatadiosmej* tein Dios semi kitajyaltiaj tein yetoyaj kampa kintaxejxelouilijkaj ikoneuan Judá uan Benjamín. No kinajchiuak tatadiosmej tein yetoyaj itech uejueyi xolalmej tein moinaxkatilijka. Nejon uejueyi xolalmej yetoyaj kampa tepeyoj kampa kintaxejxelouilijkaj ikoneuan Efraín. No kiyekchijchiuak ialtar Jehová tein yetoya kalixpan den cuarto kampa se kalakteua ichan Jehová. 9 Uan kinsentilij nochin akin pouiaj iniuan ikoneuan Judá uan Benjamín uan nochin akin pouiaj iniuan ikoneuan Efraín, Manasés uan Simeón akin iniuan nemiaj. Miakej kiskej den ueyi xolal Israel uan peuak kipaleuiaj Asá porin kiitakej ke iDios Jehová kipaleuijtoya. 10 Mosentilijkej ompa Jerusalén itech metsti siván* keman Asá 15 xiujmejya tekiuajtitoya. 11 Nejon tonal kimaktilijkej Jehová 700 kuakuejmej uan chikome mil ichkamej.* Nochi nejon tapialmej kinkuilijkaj akin kintankaj. 12 Uan no motenkaujkej senkis kitekitiliskej Jehová,* ininDios ininuejkaujtatuan. 13 Akin amo kitekitiliskia Jehová, ininDios israelitas, kimiktiskiaj maski konetok katka oso ueyiya,* maski katka takat oso siuat. 14 Uan chikauak kiluijkej Jehová ke kichiuaskiaj tein motenkaujkaj. Chikauak tsajtsiaj porin yolpakiaj uan kipitsayaj trompetas uan kuaomimej. 15 Nochin akin nemiaj Judá semi yolpakiaj porin motenkaujkej kitekitiliskej Dios. Yolpakiaj porin yejua nejon tein kitelnekiaj kichiuaskej. Mochikaujkej kitemoskej Jehová uan yejua mokauak maj kiajsikan uan kichiuak maj noyan kualtsin nemikan.

16 Maacá akin katka iueyinan Asá kichijchiujka se tatadios tein tel pitsotik para ika kiueyichiuaskej kouit tein kiketskaj.* Yejua ika tekiuaj Asá kikuilij tekit tein kipiaya kemej ueyichiujkej, uan kiuejueloj nejon tatadios tein tel pitsotik, kixaxamatsak uan kichichinoto itech tal tamanis* tein moixmati kemej Cedrón. 17 Sayoj ke ompa Israel amo tauejuelojkej kampa tachijchiujkaj para taueyichiuaskej. Maski ijkon, Asá nochipa senkis kitekitilij Dios.* 18 Uan kiualkuik ichan toTajtsin Dios nochi tein yejua uan itat kimaktilijkaj. Kiualkuik plata, oro uan okseki taman tein ompa mokuiskia. 19 Amo akin kinteuito akin nemiaj Judá hasta keman Asá 35 xiujmejya tekiuajtitoya.

16 Keman Asá 36 xiujmejya tekiuajtitoya ompa Judá, Baasá akin tekiuajtia itech xolal Israel kinteuito akin nemiaj Judá. No peuak kiyekchijchiua Ramá porin amo kinekia maj nion akin kisani de Judá kampa taixyekanaya tekiuaj Asá uan maj nion akin kalakini. 2 Keman Asá kimatik nejon, kikuito plata uan oro tein kitalijkaj itech cuartos tein yetoyaj ichan Jehová kampa kikalakiayaj nochi tein patiyoj, uan no kikuik plata uan oro tein kipiaya ichan. Nochi nejon kititanilij Ben-Hadad akin tekiuajtia Siria. Asá kiluij Ben-Hadad akin nemia Damasco: 3 “Tejua uan nejua timotenkaujkaj ke timopaleuiskej uan no ijkon motenkaujkaj totatuan. Yejua ika nimitstitanilia nejin plata uan oro. Uan nimitstajtania amo xikchiuaok tein timotenkauak iuan Baasá akin tekiuajti Israel para maj amo nechixnamikiok”.

4 Ben-Hadad kichiuak tein kitajtanij tekiuaj Asá. Yejua ika kintitanik takamej akin kinixyekanayaj isoldados maj kinteuitij akin nemiaj itech uejueyi xolalmej tein pouiaj Israel. Isoldados Ben-Hadad moaxkatilijkej Ijón, Dan, Abel-Maim uan nochi uejueyi xolalmej tein kinmakakaj ikoneuan Neftalí. Itech nejon uejueyi xolalmej kisentiliayaj takual uan okseki taman. 5 Keman Baasá kimatik tein kichiuak Ben-Hadad, amo kitamichijchiuakok Ramá. 6 Tekiuaj Asá kinkuiteuak nochin akin nemiaj Judá uan yajkej Ramá. Yejuan kikuitoj tet uan kouit tein Baasá kikuika para kiyekchijchiuas Ramá. Asá kikuik nejon tet uan nejon kouit para kiyekchijchiuas ueyi xolal Gueba uan ueyi xolal Mizpá.

7 Ijkuak, tanauatijkej Hananí* kiitako Asá akin tekiuajtia Judá uan kiluij: “Kemej amo titakuaujtamatik* iuan moDios Jehová, ta titakuaujtamatik* iuan akin tekiuajti Siria, amo tikintanik isoldados akin tekiuajti Siria. 8 Soldados akin kayomej Etiopía uan Libia okachi miakej katkaj uan kinualkuiaj miak carros tein kikuiaj keman tateuiayaj, uan no kinualkuiaj miak soldados akin ualayaj itech caballos. Sayoj ke Jehová mitspaleuij xikintani porin iuan titakuaujtamatik. 9 Jehová ualtachixtok nikan taltikpak para kinextis ke semi chikauak uan ijkon kinpaleuis akin sayoj yejua kitekitiliaj.* Sayoj ke axkan tiknextij ke amo titamati, yejua ika desde axkan miakej mitsixnamikiskej”.

10 Asá tel kualanik iuan tanauatijkej Hananí* uan kitsakuak. Uan no peuak kintajyouiltia sekin akin nemiaj Judá. 11 Nochi tein kipanok Asá keman tekiuajtik, ijkuiliujtok itech amatajkuilol kampa ininka tajtoua nochin akin tekiuajtikej Judá uan Israel.

12 Keman Asá 39 xiujmejya tekiuajtitoya, kikuik se kokolis* itech imetsuan uan okachi tanauik.* Sayoj ke amo kitemoj maj Jehová kipaleui, ta kintemoj tapajtianij. 13 Asá momikilij* keman 41 xiujmejya tekiuajtitoya. 14 Asá kualtsin motachijchiuijka kampa kitokaskiaj itech ueyi xolal tein iaxka David uan ompa kitokkej keman momikilij. Kimanelojkej miak taman xiujtsitsin tein ajuiyak uan kitalijkej kampa kitekkej Asá, no kitalijkej aceite tein monotsa bálsamo. Uan kichichinojkej miak taman para kiueyitaliskej keman kitokkej.

17 Uan Jehosafat akin katka iokichpil Asá peuak tekiuajti uan mochiuak ueyichiujkej. 2 Ompa Judá kintalij soldados para maj tajpiakan. Sekin kinnauatij maj tajpiakan itech nochi uejueyi xolalmej kampa tatsaktoya ika uejueyi tepamit uan sekin miakkan kintitanik maj tajpiatij. No kintitanik seki soldados itech uejueyi xolalmej kampa kintaxejxelouilijkaj ikoneuan Efraín. Nejon uejueyi xolalmej moinaxkatilijka Asá akin katka itat Jehosafat. 3 Jehová kisentokak kipaleuij Jehosafat porin kichiuak ijkon kemej kichiujka iuejkaujtat David uan amo kitemoj Baal.* 4 Jehosafat kitemoj Dios akin itat kiueyichiuak uan kitakamatik* itanauatiluan. Yejua amo kichiuak kemej akin tekiuajtikej itech xolal Israel. 5 Jehová kipaleuij Jehosafat para maj senkis yejua taixyekana. Nochin akin nemiaj Judá kitayokoliayaj Jehosafat miak taman, yejua ika semi tominpiaya uan semi kitakachiuayaj.* 6 Yejua katka yolchikauak uan kitakamatik Jehová. Hasta tauejueloj kampa tachijchiujkaj para taueyichiuaskej ompa Judá uan kintamotak koujmej tein ika taueyichiuayaj.*

7 Keman Jehosafat eyi xiuitya tekiuajtitoya, tanauatij maj kinnotsatij uejueyi chiuanimej akin kitekitiliayaj para tamachtiskej itech uejueyi xolalmej ompa Judá. Yejuan monotsayaj Ben-Hail, Abdías, Zacarías, Netanel uan Micaya. 8 Iniuan yajkej nejin levitas: Semaya, Netanías, Zebadías, Asahel, Semiramot, Jehonatán, Adonías, Tobiya uan Tob-Adonías. Uan no iniuan yajkej tiopixkat Elisamá uan Jehoram. 9 Yejuan kiuikayaj amatajkuilol kampa ijkuiliujtoya iTanauatil Jehová uan peuak tamachtiaj ompa Judá. Yajtinenkej itech nochi uejueyi xolalmej tein yetoyaj Judá para kinmachtiskej nochin akin ompa nemiaj.

10 Uan nochin akin tekiuajtiaj itech uejueyi xolalmej tein kiyoualouayaj Judá semi kimouilijkej Jehová, yejua ika amo kiteuitoj Jehosafat. 11 Filisteos kiualkuiliayaj Jehosafat tomin uan miak taman tein kiixtalijka maj kimakakan. Akin nemiaj Arabia kiualkuiliayaj 7,700 ichkaueuetkej* uan 7,700 chivos.

12 Jehosafat mochiuak okachi ueyichiujkej. Ompa Judá kisentokak kinchijchiuak uejueyi kalmej kampa kuali tajtatsakuak uan uejueyi xolalmej para ompa kisentiliskej takual. 13 Kichiuak miak taman tekit itech uejueyi xolalmej tein yetoyaj Judá. Uan ompa Jerusalén kinpiaya soldados akin kuali tateuiayaj. 14 Nejin soldados kinxejxelojkej por familias. De ikoneuan Judá moajsiaj akin kinixyekanayaj mijmil soldados. Semej katka Adná uan kinixyekanaya 300 mil soldados akin kuali tateuiayaj. 15 Adná kiixyekanaya Jehohanán uan Jehohanán kinixyekanaya 280 mil soldados. 16 Adná no kiixyekanaya Amasíah akin katka iokichpil Zicrí. Amasíah kiteluelitaya kitekitilis Jehová uan yejua kinixyekanaya 200 mil soldados akin kuali tateuiayaj. 17 Uan de ikoneuan Benjamín moajsia Eliadá. Yejua kuali tateuiaya uan kinixyekanaya 200 mil soldados akin kipiayaj arcos* uan escudos. 18 Eliadá kiixyekanaya Jehozabad uan Jehozabad kinixyekanaya 180 mil soldados akin kipiayaj tein ika tateuiskej. 19 Nochin nejin soldados kitekitiliayaj tekiuaj Jehosafat. No kitekitiliayaj okseki soldados akin kinnauatijka maj tajpiakan itech uejueyi xolalmej kampa tatsaktoya ika uejueyi tepamit ompa Judá.

18 Maski Jehosafat semi tominpiaya uan semi kitakachiuayaj,* kichiuak maj semej ichankauan monamikti iuan se ichankauj Acab. 2 Seki xiujmej satepan Jehosafat temok Samaria kiitato Acab. Acab kimaktilij Dios miak ichkamej* uan kuakuejmej para maj kinpaleui Jehosafat uan akin iuan yayaj. Satepan Acab kitataujtij Jehosafat maj iuan yani kinteuiti akin nemiaj Ramot-Galaad. 3 Uan Acab akin tekiuajtia itech xolal Israel kiluij Jehosafat akin tekiuajtia Judá: “¿Nouan tias Ramot-Galaad?”. Jehosafat kinankilij: “Nias mouan, uan akin nikinixyekana yaskej iniuan akin tikinixyekana uan mitspaleuiskej keman titateuis”.

4 Sayoj ke Jehosafat kiluij Acab akin tekiuajtia itech xolal Israel: “Nimitstataujtia achto xiktajtani* Jehová ox kuali yetok tein tikchiuati”. 5 Yejua ika Acab* kinsentilij 400 tanauatianij* uan kiniluij: “Keniuj nankiitaj, ¿maj tiakan tikinteuitij akin nemij Ramot-Galaad oso amo?”. Yejuan kinankilijkej: “Kemaj, xipankisa porin toTajtsin Dios mitspaleuis xikintani”.

6 Uan Jehosafat kitajtanij tekiuaj Acab: “¿Xa tikmati ox nikan moajsi se itanauatijkauj Jehová? Maj tikiluikan maj no kitajtani Dios keniuj kiita tein tikchiuasneki”. 7 Acab* kiluij Jehosafat: “Yetokok se takat akin uelis tikiluiskej maj kitajtani Jehová. Monotsa Micaya iokichpil Imlá. Sayoj ke nejua niktauelita porin nochipa kijtoua ke nechpanos tein amo kuali”. Jehosafat kiluij: “Amo monekiskia ijkon titajtos tejuatsin”.

8 Uan Acab akin tekiuajtia itech xolal Israel kinotsak se ueyichiujkej akin kitekitiliaya uan kiluij: “Xikuitiuetsiti Micaya iokichpil Imlá”. 9 Acab akin tekiuajtia itech xolal Israel uan Jehosafat akin tekiuajtia Judá, tokotsyetoyaj puertajtenoj de Samaria kampa kichipauayaj trigo akin ompa nemiaj. Sejse tekiuaj tokotsyetoya itech iueyi silla uan aktoyaj tasal tein kikuij tekiuanij. Uan nochin tanauatianij yetoyaj ininixpan uan tajtojtoyaj kemej tajtouaj tanauatianij. 10 Uan Sedequías iokichpil Kenaaná mochijchiuilij ome kuaomimej de tepos uan kijtoj: “Yejua nejin tein kijtoua Jehová: ‘Ika nejin kuaomimej tikintopeujtias sirios hasta tikintamiixpolos’”. 11 Nochin okseki tanauatianij no kiluiayaj nejon. Kijtouayaj: “Xipankisa Ramot-Galaad porin titataniti. Jehová mitspaleuis xitatani totekiuaj”.

12 Takat akin kinotsato Micaya kiluij: “Nochin okseki tanauatianij kiluijtokej tekiuaj ke tataniti. Nimitstataujtia no xikijto tein yejuan kiluijtokej, xikilui ke tataniti”. 13 Sayoj ke Micaya kiluij: “Nimitsyekiluia itokaykopa Jehová akin nochipa yoltok ke sayoj nikijtos tein noDios nechiluis”. 14 Micaya ajsik kampa yetoya tekiuaj Acab, uan tekiuaj kitajtanij: “Keniuj tikita Micaya, ¿maj tiakan tikinteuitij akin nemij Ramot-Galaad oso amo?”. Micaya kinankilij: “Kemaj, xipankisa porin titatanis. Dios namechpaleuis xikintanikan”. 15 Keman tekiuaj Acab kikakik nejon, kiluij: “Miakpaya nimitsiluiani ximotenkaua itokaykopa Jehová ke sayoj tinechiluis tein yekmelauj kijtoua”. 16 Yejua ika Micaya kiluij: “Nikinitak nochin israelitas moyaujtoyaj itech tepemej kemej yeskiaj ichkamej tein amo akin kinyekpia. Jehová kijtoj: ‘Amo akin kinixyekanaok. Maj nochin kualtsin mokepakan ininchan’”.

17 Acab akin tekiuajtia itech xolal Israel kiluij Jehosafat: “Ipa nimitsiluijkaya ke yejua nochipa kijtoua ke nechpanos tein amo kuali”.

18 Uan Micaya kijtoj: “Xikaki tein Jehová kijtoua. Nikitak ke Jehová tokotsyetoya itech iueyi silla uan nochin iangeluan ijkatoyaj inajnakastan. 19 Jehová kintajtanij: ‘¿Akoni kikajkayauas Acab akin tekiuajti itech xolal Israel para maj pankisa tateuiti Ramot-Galaad uan maj ompa kimiktikan?’. Uan se ángel kijtouaya se taman uan okse ángel kijtouaya okse taman. 20 Uan se ángel moketsak iixpan Jehová uan kiluij: ‘Nejua nikajkayauas’. Jehová kitajtanij: ‘¿Keniuj tikajkayauati?’. 21 Ángel kinankilij: ‘Nias uan nikchiuas maj itanauatijkauan kikajkayauakan’. Yejua ika Dios kiluij: ‘Kualtias tein tiknemilijtok tikchiuas porin kineltokas. Xiouj xikchiuati’. 22 Yejua ika Jehová kiualtitanik se ángel maj kichiuaki maj motanauatijkauan mitskajkayauakan, sayoj ke Jehová kitematiltijya ke mitspanoti tein amo kuali”.

23 Sedequías iokichpil Kenaaná kiajsito Micaya, kiixtatsinij uan kiluij: “¿Tikijtosneki ke Jehová nechkuilij ichikaualis uan ke axkan tejua mouan tajtoua?”. 24 Micaya kinankilij: “Tikyekmatis ke melauj tein nikijtoua keman timotatitiuj* itech cuarto tein okachi taijtik yetok”. 25 Uan Acab akin tekiuajtia itech xolal Israel kijtoj: “Xikitskikan Micaya uan xikuikilikan Amón akin taixyekana itech ueyi xolal uan Joás iokichpil tekiuaj.* 26 Xikiniluikan nejin: ‘Tekiuaj namechiluia: “Xiktsakuakan nejin takat uan sayoj xikmakakan tsikitsin pantsin uan tepitsin at hasta keman nitatanis uan nimokepas”’”. 27 Sayoj ke Micaya kiluij: “Komo titatani uan timokepa, kijtosneki ke Jehová amo nouan tajtoj”. Uan no kijtoj: “Namejuan akin nikan nanyetokej, xikelnamikikan tein nikijtoj”.

28 Uan Acab akin tekiuajtia itech xolal Israel uan Jehosafat akin tekiuajtia Judá pankiskej Ramot-Galaad. 29 Tekiuaj Acab* kiluij Jehosafat: “Nimotaliliti okse notasal para maj amo nechixmatikan keman nitateuitiuj. Sayoj ke tejua ximotalili motasal tein ipa tikui kemej tekiuaj”. Uan tekiuaj Acab motalilij okse tasal uan yajkej tateuitoj. 30 Akin tekiuajtia Siria kinnauatijka akin kinixyekanayaj soldados akin kiuikayaj carros: “Amo ximoteuikan iniuan okseki soldados, ta sayoj xikteuikan akin tekiuajti itech xolal Israel”. 31 Keman akin kinixyekanayaj soldados akin kiuikayaj carros kiitakej Jehosafat, moiluijkej: “Ne takat yejua akin tekiuajti itech xolal Israel”. Yejua ika yajkej kiteuitoj. Uan Jehosafat peuak kitsajtsilia Jehová maj kipaleui uan yejua kipaleuij. Dios niman kichiuak maj kikauakan uan maj amo kiteuikanok. 32 Keman akin kinixyekanayaj soldados akin kiuikayaj carros kiitakej ke amo katka tekiuaj Acab, niman kikaujkej uan amo kiteuijkejok.

33 Sayoj ke se soldado kitamotak se flecha uan kikuiltij* Acab akin tekiuajtia itech xolal Israel maski amo kimatia ke kikuiltiskia. Flecha motokato tatsalan de iteposkoton, yejua ika Acab kiluij akin kiuikaya icarro: “Ximokepa uan xinechkixti de nikan porin semi nechkokojkej”. 34 Nochin tonal fieroj moteuijtoyaj. Tekiuaj kikitskijtoyaj itech icarro para ueliskia ijkatos uan kinitstos sirios. Ijkon kipaleuijtoyaj hasta keman tiotakik uan mikik keman tapoyauik.

19 Jehosafat akin tekiuajtia Judá kualtsin mokepak ichan ompa Jerusalén porin amo teyi kipanok. 2 Uan Jehú iokichpil Hananí akin Dios kiitaltiaya tein kinekia kitematiltis, kinamikito tekiuaj Jehosafat uan kiluij: “¿Keyej tikinpaleuia akin amo yolkualmej uan tikintasojta akin kitauelitaj Jehová? Yejua ika Jehová kualantok mouan. 3 Sayoj ke Dios mitsitilij seki taman tein kiyolpaktia, porin tikinixpoloj koujmej tein ika taueyichiuaj uan porin senkis tikixtalij* tiktekitilis toTajtsin Dios”.

4 Jehosafat chanchiuaya ompa Jerusalén uan oksepa yajki kinkalpanoto israelitas. Peuak desde Beer-Seba uan tamito hasta kampa tepeyoj kampa kintaxejxelouilijkaj ikoneuan Efraín. Jehosafat yajki kinitato para kinyolchikauas maj oksepa kiueyichiuakan Jehová ininDios ininuejkaujtatuan. 5 Kinixtalij jueces ompa Judá itech nochi uejueyi xolalmej kampa tatsaktoya ika uejueyi tepamit. 6 Uan kiniluij jueces: “Kuali xiknemilikan tein nankiixtaliskej porin nankichiuaskej itokaykopa Jehová uan amo itokaykopa se takat. Yejua namechpaleuis keman nankiixtaliskej teisa. 7 Xikmojkatokakan Jehová uan kuali xiknemilikan tein nankichiuaskej, porin toDios Jehová amo kiyolpaktia maj se kichiua tein amo kuali yetok, maj se techichikoui nion maj tetaxtauikan para se kipaleuis aksa”.*

8 Uan no, ompa Jerusalén Jehosafat kinijitak seki levitas, tiopixkamej uan seki takamej akin kinixyekanayaj uejueyi familias de Israel. Yejuan kitekitiliskiaj Jehová kemej jueces uan kinpaleuiskiaj akin nemiaj Jerusalén keman yaskiaj kinixpantilitiuij ininkuejmoluan. 9 Jehosafat kinnauatij nejin: “Xiktakachiuakan Jehová keman nankitekitiliskej kemej jueces, sayoj yejua xiktekitilikan uan sayoj yejua xiktakamatikan:* 10 keman namoparientes akin nemij itech okseki uejueyi xolalmej namechixpantilikiuij se kuejmol porin aksa kimiktijkej, namechtajtanikiuij keniuj moneki kichiuaskej teisa, keniuj kitakamatiskej se tanauatil oso keniuj kichiuaskej se taman tein ipa moixtalijkaya, moneki nankinyekiluiskej toni moneki kichiuaskej para maj amo motajtakolmakakan iixpan Jehová. Komo amo ijkon nankichiuaj, Dios kualanis namouan uan no iniuan namoparientes. Yejua nejin tein moneki nankichiuaskej para amo namotajtakolmakaskej. 11 Nikixtalia tayekankatiopixkat Amarías para maj namechixyekana. Yejua namechpaleuis xikmatikan keniuj kineki Jehová xikueyichiuakan. Zebadías iokichpil Ismael kinixyekanas akin pouij iniuan ikoneuan Judá uan kiitas maj mochiua tein tekiuaj tanauatia. Uan levitas namechpaleuiskej kemej taixyekananij. Ximoyolchikauakan uan xitekitikan uan maj Jehová kinpaleui akin kichiuaj tein kuali yetok”.

20 Satepan moabitas, ammonitas uan sekin akin moixmatiaj kemej ammonim* ualajkej para kiteuiskej Jehosafat. 2 Yejua ika kiluitoj Jehosafat: “Miakej soldados ualajtokej mitsixnamikikij. Uitsej desde tanakastan den mar Muerto uan desde Edom uan yetokej ne Hazazón-Tamar tein no moixmati kemej En-Guedí”. 3 Keman Jehosafat kimatik nejon, mouik uan kiixtalij kitemos Jehová para maj kipaleui. Yejua ika kinnauatij nochin akin nemiaj Judá maj amo takuakan. 4 Nochin akin nemiaj Judá mosentilijkej para kitajtaniskej Jehová maj kinpaleui. Ualajkej de nochin uejueyi xolalmej de Judá para kitajtaniskej* Jehová toni maj kichiuakan.

5 Nochin akin nemiaj Judá uan Jerusalén mosentilijkaj ichan Jehová kampa yetoya patio tein yankuixtok kichijchiujkaj. Jehosafat moketsak ininixpan 6 uan kitataujtij Dios:

“Jehová, ininDios touejkaujtatuan, sayoj tejua tiDios ompa iluikak. Tejua tikinixyekana akin tekiuajtij itech nochin altepemej. Tejua semi tichikauak uan amo akin mitstani. 7 ToDios, tejua tikinkixtij akin nemiaj itech nejin talmej para tikinpaleuis israelitas akin pouij itech moxolal, uan tikinmakak nejin talmej ikoneuan motasojikniuj Abrahán para maj nochipa ininaxka. 8 Yejuan nikan chanchiuakoj uan mitschijchiuilijkej se templo kampa kiueyitaliskej motokay uan kijtouayaj: 9 ‘Komo titajyouiaj porin techteuikij akin techixnamikij, oso porin techtatsakuiltiaj, oso porin titamikokolispeuaj* oso porin tatasojti, tiualaskej timoketsakiuij moixpan kampa yetok nejin kali (porin itech nejin kali tikueyitaliaj motokay). Uan nikan timitstataujtiskej xitechpaleui porin semi titajyouijtokej. Tejua titechkakis uan titechmakixtis’. 10 Uan axkan xikita tein kichiujtokej takamej akin ualeuaj Ammón, Moab uan ompa Seír kampa tepeyoj. Keman israelitas kiskej de Egipto amo tikinkauak maj kintalkuilianij, ta sayoj kinpanauijkej uan amo kinixpolojkej. 11 Maski amo teyi kinchiuilijkej, axkan kinekij techkuiliskej tal tein moaxka tein tejua titechmakak. 12 ToDios, ¿xe amo tikintatsakuiltiti? Tejuan amo uelis tikintaniskej nochin nejin soldados akin semi miakej uan amo tikmatij toni tikchiuaskej, sayoj ke titachixtokej kampa tietok porin tiknekij xitechpaleui”.

13 Keman Jehosafat kitataujtijtoya Dios nochin akin nemiaj Judá ijkatoyaj iixpan Jehová. Yetoyaj iniuan ininsiuauan uan nochin ininkoneuan hasta akin pilimejok.

14 Keman nochin ompa senyetoyaj, Jehová kimakak Jahaziel ichikaualis. Itat Jahaziel katka Zacarías, itat Zacarías katka Benaya, itat Benaya katka Jeiel uan itat Jeiel katka Matanías. Matanías katka levita uan pouia iniuan ikoneuan Asaf. 15 Jahaziel kijtoj: “¡Kuali xinechkakikan nochin akin nanemij Judá uan Jerusalén, uan no xinechkaki tekiuaj Jehosafat! Yejua nejin tein namechiluia Jehová: ‘Amo xikinmouilikan nochin akin namechixnamikikij maski semi miakej porin nejua namoDios nitateuiti uan amo namejuan. 16 Mosta xitemokan para nankinixnamikiskej. Yejuan ualpankistoskej itech ojti tein moixmati kemej Ziz uan nankinnamikiskej kampa tami tal tamanis* taixpan de Jeruel kampa amo teyi onkak. 17 Namejuan amo monekis iniuan namoteuiskej. Amo teyi xikchiuakan, ta sayoj ximotejtekpanakan uan xikitakan keniuj namechmakixtia Jehová. Namejuan akin nanemij Judá uan Jerusalén amo ximouikan. Mosta xiakan xikinixnamikitij porin Jehová namechpaleuis’”.

18 Jehosafat niman motankuaketsak uan moixpiloj hasta talpan. Uan nochin akin nemiaj Judá uan Jerusalén no motankuaketskej iixpan Jehová uan moixpilojkej hasta talpan para kiueyichiuaskej Jehová. 19 Uan levitas akin katkaj ikoneuan Cohat uan Coré moketskej uan chikauak kicantarouilijkej Jehová ininDios israelitas para kiueyichiuaskej.

20 Mostika, kualkan meujkej uan yajkej tanakastan de Tecoa kampa amo teyi onkak. Keman israelitas kistiayaj, Jehosafat moketsak ininixpan uan kiniluij: “¡Xinechkakikan nochin akin nanemij Judá uan Jerusalén! Xitakuaujtamatikan iuan namoDios Jehová para namoyolchikauaskej.* Xitakuaujtamatikan iniuan namotanauatijkauan* uan Dios namechpaleuis xitatanikan”.

21 Jehosafat kinixtalij akin kicantarouiliskiaj Jehová satepan ke kintajtanij akin mosentilijkaj akonimej maj kinixtali. Akin cantaroskiaj motalilijkaj inintasal tein okachi kualtsin uan kinyekantiaskiaj soldados. Yejuan cantaroskiaj ijkon: “Xiktasojkamatilikan Jehová porin yejua nochipa techtasojtas”.

22 Keman peujkej cantarouaj ika miak pakilis para kiueyitaliskej, Jehová kinichtakauij soldados akin ualeuayaj Ammón, Moab uan Seír kampa tepeyoj uan peuak ininselti momijmiktiaj. Nejon soldados ualayaj kinteuikij akin nemiaj Judá. 23 Ammonitas uan moabitas peuak kinmiktiaj uan kinixpolouaj akin ualeuayaj Seír kampa tepeyoj. Keman kintamimiktijkej akin ualeuayaj Seír, peuak yejuan momijmiktiaj.

24 Akin nemiaj Judá ajsikej kampa amo teyi onkak kampa yetoya uejkapan kali tein kichijchiujkaj para tajpiaskej. Keman pantachiakej, kinitakej uejuetstokej miakej mikemej, amo makisak nion se soldado. 25 Jehosafat uan nochin akin iuan yetoyaj yajkej kampa uejuetstoyaj mikemej para mokuiliskej nochi tein kipiayaj. Peuak mokuiliaj tasal, miak taman tein patiyoj uan okseki taman tein kipiayaj. Kinuikilij eyi tonal kisentiliskej nochi porin tel miak katka, sayoj ke amo uelik kitamiuikakej. 26 Keman panokaya naui tonal mosentilijkej itech tal tamanis tein moixmati kemej Beracá uan ompa kiueyichiujkej* Jehová. Yejua ika ompa tatokaytijkej tal tamanis Beracá* uan ijkon kiixmatijok hasta axkan.

27 Jehosafat uan nochin takamej akin nemiaj Judá uan Jerusalén mokepkej Jerusalén uan Jehosafat kinixyekantiaya. Yejuan semi yolpaktiayaj porin Jehová kichiujka maj kintanikan akin kintauelitayaj. 28 Keman ajsikej Jerusalén kitsotsontiayaj cítaras,* arpas uan kipitstiayaj trompetas. Yejuan yajkej ichan Jehová. 29 Nochin akin nemiaj itech okseki altepemej kimatkej ke Jehová kinteuijka akin kintauelitayaj israelitas, uan semi kimouilijkej Dios. 30 Yejua ika, Jehosafat uan nochin akin kinixyekanaya kualtsin nenkej uan ininDios kichiuak maj amo teyi kinchiuilianij akin kintauelitayaj.

31 Uan Jehosafat kisentokak kinixyekanak akin nemiaj Judá. Kipiaya 35 xiujmej keman peuak tekiuajti, nemia Jerusalén uan tekiuajtik 25 xiujmej. Inan monotsaya Azubá akin katka isiuapil Silhí. 32 Jehosafat kichiuak kemej Asá akin katka itat. Kichiuak nochi tein Jehová kiyolpaktia. 33 Sayoj ke amo tauejuelojkej kampa tachijchiujkaj para taueyichiuaskej. Uan israelitas ayamo senkis kiixtaliayaj* kiueyichiuaskej ininDios ininuejkaujtatuan.

34 Nochi okseki taman tein kipanok Jehosafat keman tekiuajtik, kijkuiloj Jehú iokichpil Hananí uan ijkuiliujtok itech amatajkuilol kampa ininka tajtoua nochin akin tekiuajtikej itech xolal Israel. 35 Satepan Jehosafat akin tekiuajtia Judá peuak iuan tekiti Ocozías akin tekiuajtia Israel. Ocozías kichiuaya tein tel amo kuali. 36 Jehosafat kiluij Ocozías maj sentekitikan para kichijchiuaskej barcos tein yaskiaj Tarsis. Kinchijchiujkej nejon barcos ompa Ezión-Guéber. 37 Sayoj ke Eliezer iokichpil Dodavahu akin katka kayot Maresá kijtojka tein kipanoskia Jehosafat. Eliezer kijtojka: “Kemej peuak titekiti iuan Ocozías, Jehová kitamiixpolos tein tikchijchiuak”. Yejua ika tamiuejueliujkej barcos uan amo uelik yajkej Tarsis.

21 Jehosafat momikilij* uan kitokkej itech ueyi xolal tein iaxka David, kampa no kintokkaj iuejkaujtatuan. Uan Jehoram akin katka iokichpil Jehosafat peuak tekiuajti. 2 Iikniuan Jehoram katkaj Azarías, Jehiel, Zacarías, Azarías, Miguel uan Sefatías. Nochin yejuan katkaj ikoneuan Jehosafat akin tekiuajtika itech xolal Israel. 3 Jehosafat akin katka inintat kintayokolijka miak taman tein chijchiujtoya ika plata uan oro. No kintayokolijka okseki taman tein patiyoj uan uejueyi xolalmej kampa tatsaktoya ika uejueyi tepamit ompa Judá. Sayoj ke kiixtalij Jehoram maj tekiuajti porin yejua tayekanaya.

4 Keman Jehoram kiixpatak itat uan peuak tekiuajti, kinmiktij nochin iikniuan ika machete tein ojkan tenej* uan no kinmiktij sekin taixyekananij israelitas. Kichiuak nejon para maj amo kiixpatanij kemej tekiuaj. 5 Jehoram kipiaya 32 xiujmej keman peuak tekiuajti, nemia Jerusalén uan tekiuajtik chikueyi xiuit. 6 Tajtakolchiuak ijkon kemej tajtakolchiujkaj akin tekiuajtikaj itech xolal Israel. Kemej monamiktij iuan iichpoch Acab, kichiuak ijkon kemej kichiujkaj ichankauan Acab. Jehoram kichiuaya tein Jehová amo kiyolpaktia. 7 Sayoj ke Jehová amo kinekik kinixpolos ichankauan David porin motenkaujka iuan David ke nochipa semej ikoneuan taixyekanaskia.*

8 Keman Jehoram tekiuajtitoyaok Judá, akin nemiaj Edom amo kinekkejok maj kinixyekanakan akin nemiaj Judá uan kinixnamikkej. Satepan kiixtalijkej se tekiuaj para maj kinixyekana. 9 Yejua ika Jehoram yajki Edom iniuan takamej akin kinixyekanayaj soldados uan kinuikak nochi icarros tein kikuia keman tateuiaya. Keman ompa yetoyaya, soldados edomitas kiyoualojkej Jehoram uan no kinyoualojkej akin kinixyekanayaj soldados akin kiuikayaj carros. Sayoj ke Jehoram meuak de youak, kinteuito soldados edomitas uan kintanik. 10 Sayoj ke akin nemij Edom kisentokaj kinixnamikij akin tekiuajtij Judá hasta axkan. Ijkuak, akin nemiaj Libná no kiixnamikkej Jehoram. Nochi nejon panok porin Jehoram amo kitakamatikok Jehová, ininDios iuejkaujtatuan. 11 Jehoram no tachijchiujka itech tepemej tein onkayaj ompa Judá para maj nochin akin nemiaj Jerusalén kikauanij Dios uan maj kinueyichiuanij tatadiosmej.* Uan kichiuak maj akin nemiaj Judá amo kiueyichiuanijok Dios.

12 Satepan tanauatijkej* Elías kijkuilouilij se amat uan kititanilij. Amat kijtouaya: “Yejua nejin tein kijtoua Jehová, iDios mouejkaujtat David: ‘Tejua amo tikchiuani tein kichiuak mopaj Jehosafat nion tein kichiuak Asá akin tekiuajtik Judá, 13 ta tikchiuani kemej kichiujkej akin tekiuajtikej itech xolal Israel. Uan tikchiujtok maj akin nemij Judá uan Jerusalén kikauakan Dios uan maj kinueyichiuakan tatadiosmej ijkon kemej kichiujkej ichankauan Acab. Hasta tikinmiktij mokniuan akin katkaj ikoneuan mopaj. Yejuan okachi yolkualmej katkaj. 14 Yejua ika Jehová kintatsakuiltiti akin tikinixyekana, mokoneuan uan mosiuauan. Uan no kiixpoloti nochi tein tikpia. 15 Uan mitskuis miak taman kokolis,* hasta mitskuis se kokolis moijtik uan mojmostaj okachi titanauis* hasta tikuitaxkolkisas’”.*

16 Uan Jehová kichiuak maj filisteos uan árabes kiixnamikikan Jehoram. Filisteos uan árabes nemiaj tanakastan de kampa nemiaj etíopes. 17 Yejuan kinteuitoj akin nemiaj Judá, sentakuikej inintal uan mouikilijkej nochi tein patiyoj tein kiajsikej ichan tekiuaj. No kinuikakej ikoneuan uan isiuauan Jehoram, sayoj mokauak Jehoacaz* iokichpil akin xokoyot. 18 Satepan, Jehová kichiuak maj Jehoram kikui se kokolis itech ikuitaxkol uan amo pajtikok. 19 Keman panok ome xiuit, okachi tanauik uan kuitaxkolkisak. Nejon kokolis semi kitajyouiltij hasta ke momikilij. Uan israelitas akin kinixyekanaya amo kichichinouilijkej miak taman para kiueyitaliskej kemej kichiujkaj keman momikilijkej iuejkaujtatuan. 20 Jehoram kipiaya 32 xiujmej keman peuak tekiuajti, nemia Jerusalén uan tekiuajtik chikueyi xiuit. Amo akin tayokoyak keman momikilij. Kitokkej itech ueyi xolal tein iaxka David, sayoj ke amo kitokkej kampa kintokayaj tekiuanij.

22 Akin nemiaj Jerusalén kiixtalijkej Ocozías kemej tekiuaj para maj kiixpata Jehoram. Ocozías katka iokichpil Jehoram akin xokoyot. Keman árabes kinteuikoj akin nemiaj Judá kampa kitalijkaj ininkaltsitsin,* iniuan ualayaj seki tachtekinij. Yejuan kinmiktijkej ikoneuan Jehoram akin tayekanayaj. Yejua ika kiixtalijkej Ocozías kemej tekiuaj uan yejua peuak tekiuajti ompa Judá. 2 Ocozías kipiaya 22 xiujmej keman peuak tekiuajti. Nemia Jerusalén uan tekiuajtik se xiuit. Inan monotsaya Atalía uan katka iixuiuj* Omrí.

3 Ocozías no tajtakolchiuak ijkon kemej tajtakolchiujkaj ichankauan Acab. Kichiuaya nejon porin inan kiyolchikauaya maj kichiua tein amo kuali. 4 Satepan ke momikilij itat Ocozías, ichankauan Acab peuak kiyolmajxitiaj, yejua ika kichiuak tein Jehová amo kiyolpaktia ijkon kemej kichiujkaj ichankauan Acab. Uan nochi nejon kichiuak maj kimiktikan. 5 Kemej kichiuak tein kiyolmajxitijkej, Ocozías yajki Ramot-Galaad iuan Jehoram para kiteuiskej Hazael akin tekiuajtia Siria. Itat Jehoram katka Acab akin tekiuajtika itech xolal Israel. Keman moteuijtoyaj, akin kitamotayaj flechas kimotkej Jehoram uan kikokojkej. 6 Jehoram mokepak Jezreel para moseuis uan pajtis porin kikokojkaj ompa Ramá keman moteuito iuan Hazael akin tekiuajtia Siria.

Kemej Jehoram iokichpil Acab kikokojkaj,* Ocozías* iokichpil Jehoram temok Jezreel para kiitatiuj. Ocozías tekiuajtia Judá. 7 Keman Ocozías kiitato Jehoram, Dios taolinij para maj Ocozías miki. Keman ajsik ompa, yajki iuan Jehoram kinamikitoj Jehú iixuiuj* Nimsí. Jehová kiixtalijka Jehú para maj kinixpolo ichankauan Acab. 8 Keman Jehú peuak kintatsakuiltia ichankauan Acab, moinnamikilij taixyekananij de Judá uan isobrinos Ocozías akin kitekitiliayaj Ocozías uan kinmiktij. 9 Satepan Jehú uan isoldados kitemotoj Ocozías. Soldados kikitskijkej ompa Samaria kampa motatijtoya,* kiuikakej kampa yetoya Jehú uan kimiktijkej. Satepan kitokkej porin moiluijkej: “Yejua katka iixuiuj Jehosafat akin senkis kitekitilijka Jehová”.* De nochin ichankauan Ocozías amo akin uelik mochiuak tekiuaj.

10 Keman Atalía akin katka inan Ocozías kiitak ke iokichpil momikilijkaya, kinmiktij nochin akin kinnamikia mochiuaskej tekiuanij ompa Judá. 11 Sayoj ke keman yaya kinmiktitij iokichpipiluan Ocozías, Jehosabeat kitatij Jehoás akin katka iokichpiltsin Ocozías para maj amo kimiktikan. Kikalakito itech se cuarto iuan siuatsin akin kiiskaltijtoya. Yejua ika Atalía amo kiajsik Jehoás uan amo kimiktijkej. Jehosabeat katka iichpoch tekiuaj Jehoram, itakatsin katka tiopixkat Jehoiadá uan katka iikniuj Ocozías. 12 Jehoás kitatijtoyaj ichan toTajtsin Dios chikuasen xiuit. Ijkuak, Atalía tekiuajtitoya ompa Judá.

23 Keman ajsik chikome xiuit, tiopixkat Jehoiadá moyolchikauak uan kiniluij takamej akin kinixyekanayaj ciejcien soldados maj motenkauanij ke kipaleuiskiaj. Yejuan katkaj Azarías iokichpil Jeroham, Ismael iokichpil Jehohanán, Azarías iokichpil Obed, Maaseya iokichpil Adaya uan Elisafat iokichpil Zicrí. 2 Satepan yajtinenkej itech nochi uejueyi xolalmej tein yetoyaj Judá uan kinsentilijkej levitas uan nochin takamej akin kinixyekanayaj uejueyi familias. Keman ajsikej Jerusalén, 3 nochin akin mosentilijkaj ichan toTajtsin Dios motenkaujkej iuan tekiuaj ke kipaleuiskiaj. Satepan Jehoiadá kiniluij:

“Iokichpil tekiuaj taixyekanas ijkon kemej Jehová motenkaujka ke kichiuaskiaj ikoneuan David. 4 Yejua nejin tein namejuan nankichiuaskej: exkan ximoxejxelokan. Seki tiopixkamej uan levitas akin tekititoskej itech tonal sábado tajpiaskej puertajtenoj, 5 oksekin tajpiaskej ichan tekiuaj uan oksekin tajpiaskej itech puerta tein monotsa Fundamento. Uan nochin akin mosentiliskej yetoskej itech patios de ichan Jehová. 6 Sayoj xikinkauakan maj kalakikan tiopixkamej uan levitas akin tekititoskej ichan Jehová. Yejuan uelis kalakiskej porin kinxelojkejya para kitekitiliskej Dios. Uan oksekin moneki kitakamatiskej tein Jehová tanauatia uan mokauaskej kalampa. 7 Levitas kitamiyoualoskej tekiuaj uan maaktoskej ininlanza* uan ininmachete tein ojkan tenej.* Komo aksa* kalaki ichan Dios xikmiktikan. Iuan xiakan tekiuaj kampa yeski yas”.*

8 Levitas uan nochin akin nemiaj Judá kichiujkej nochi tein kinnauatijka tiopixkat Jehoiadá. Akin taixyekanayaj kinsentilijkej nochin levitas akin tekitiskiaj nejon sábado uan akin ixyetoya amo tekitiskej, porin tiopixkat Jehoiadá amo kinkauak tiopixkamej uan levitas maj kikaujteuanij tekit tein kipiayaj. 9 Tiopixkat Jehoiadá kinmakak akin kinixyekanayaj ciejcien soldados lanzas, escudos tein tsikitsitsin* uan escudos youaltikej tein iaxka katkaj tekiuaj David. Nejon lanzas uan escudos yetoyaj ichan toTajtsin Dios. 10 Keman nochin maaktoyajya tein ika tateuiskej, Jehoiadá kinnauatij maj motejtekpanakan kalixpan, desde se lado den kali hasta okse lado. Sekin moketskej tanakastan den altar uan oksekin tanakastan den kali, uan kitamiyoualojkej tekiuaj. 11 Ijkuak kikixtijkej iokichpiltsin tekiuaj, kikuatalilijkej corona uan iTanauatil Dios.* Jehoiadá uan iokichpipiluan kikuatekilijkej aceite uan kiixtalijkej kemej tekiuaj. Satepan kijtojkej: “¡Maj Dios nochipa kitiochiua totekiuaj!”.*

12 Keman Atalía kikakik ke miakej motalojtinemiaj uan kiueyitalijtoyaj tekiuaj, niman yajki ichan Jehová kampa miakej mosentilijkaj. 13 Uan ompa kiitak tekiuaj, ijkatoya kalixpan inakastan se kalikxit.* Taixyekananij uan akin kipitsayaj trompetas ijkatoyaj iuan tekiuaj. Nochin akin nemiaj Judá semi yolpakiaj uan kipitsayaj trompetas. Uan akin tatsotsonayaj uan cantarouayaj kinixyekantoyaj akin chikauak tsajtsiaj porin yolpakiaj. Keman Atalía kiitak nejon, kitsayanak itasal uan chikauak kijtoj: “¡Nanechichtakauijkej! ¡Nanechichtakauijkej!”. 14 Sayoj ke tiopixkat Jehoiadá kinnauatij takamej akin kinixyekanayaj ciejcien soldados maj kisakan. Yejuan kinixyekanayaj nochin soldados. Tiopixkat Jehoiadá kinnauatij: “¡Xikixtikan de nikan, uan komo aksa kipaleuisneki, xikmiktikan ika machete tein ojkan tenej!”. Yejua tanauatij nejon porin achto kijtojka: “Amo xikmiktikan ichan Jehová”. 15 Yejua ika soldados kikitskijkej uan kiuikakej. Kimiktijkej keman ajsikej itech puerta tein monotsa Caballos tein yetok ichan tekiuaj.

16 Jehoiadá, israelitas uan tekiuaj motenkaujkej ke nochipa kitekitiliskiaj Jehová. 17 Satepan, nochin akin nemiaj Judá yajkej templo kampa kiueyichiuayaj Baal uan kixitinijkej. No kinxitinijkej ialtares uan kintatapatskej tatadiosmej.* Uan taixpan den altares kimiktijkej Matán, tiopixkat akin kitekitiliaya Baal. 18 Satepan Jehoiadá kinixtalij tiopixkamej uan levitas para maj kiixyekanakan tekit tein mochiuaya ichan Jehová. David kinxejxelojka tiopixkamej uan levitas para tekitiskej ichan Jehová. Yejuan kichichinouiliskiaj Jehová tapialmej ijkon kemej ijkuiliujtok itech Tanauatil tein Dios kimakaka Moisés. Kichiuaskiaj ika pakilis uan cantaroskiaj ijkon kemej tanauatijka David. 19 Jehoiadá no kinnauatij akin kinixtalijkaj maj tajpiakan puertajtenoj maj moketsakan inakastan puertas de ichan Jehová. Ijkon amo kalakiskia aksa akin Dios kiitaskia ke amo chipauak. 20 Satepan kinsentilij takamej akin kinixyekanayaj ciejcien soldados, uejueyi chiuanimej, nochin akin nemiaj Judá uan akin taixyekanayaj itech ueyi xolal. Iuan temok tekiuaj desde ichan Jehová hasta ichan tekiuaj. Kalakkej itech puerta tein okachi uejkapantik uan ajsikej ichan tekiuaj. Keman ajsikej, kitokotstalijkej tekiuaj itech ueyi silla kampa motaliayaj tekiuanij. 21 Nochin akin nemiaj Judá tel yolpakiaj uan kualtsin nemiajya itech ueyi xolal porin kimiktijkaj Atalía ika machete tein ojkan tenej.

24 Jehoás kipiaya chikome xiuit keman peuak tekiuajti. Nemia Jerusalén uan tekiuajtik 40 xiujmej. Inan monotsaya Zibíah uan katka kayot Beer-Seba. 2 Jehoás kichiuak tein Jehová kiyolpaktia keman tiopixkat Jehoiadá yoltoya. 3 Jehoiadá kitemolij Jehoás ome isiuauan uan iniuan kinpiak okichpipil uan siuapipil.

4 Panok tiempo uan Jehoás kiixtalij* kiyekchijchiuas ichan Jehová. 5 Yejua ika kinsentilij tiopixkamej uan levitas uan kiniluij: “Xiakan nochi uejueyi xolalmej de Judá uan xikintajtanikan tomin nochin israelitas. Ika nejon tomin tikyekchijchiuaskej ichan Dios xijxiujtika. Niman xiakan xiksentilitij”. Sayoj ke levitas amo niman kichiujkej tein kinnauatij. 6 Yejua ika tekiuaj Jehoás kinotsak tiopixkat Jehoiadá uan kiluij: “¿Keyej amo tikinnauatiani levitas maj yakan Judá uan Jerusalén para kisentiliskej tomin tein israelitas ipa moneki kimakaskej Dios? Nejon tomin tein Moisés itekitikauj Jehová tanauatij maj kitemakakan mokuis para kaltsin kampa yetok tatiochiualkaxon.* 7 Ikoneuan Atalía* mokalakitoj ichan toTajtsin Dios uan kikuikej nochi tein onkaya ichan Jehová para ika kiueyichiuaskej Baal”.* 8 Yejua ika tekiuaj tanauatij maj kichijchiuakan se kaxontsin uan kitalijkej kalampakopa de ichan Jehová, kampa yetoya puerta. 9 Satepan kinnauatitoj nochin akin nemiaj Judá uan Jerusalén maj kiuikilikan Jehová tomin tein ixyetoya kimakaskej. Moisés itekitikauj toTajtsin Dios kinnauatijka israelitas maj kitemakakan nejon tomin keman yetoyaj taluakyan. 10 Nochin akin nemiaj Judá uan Jerusalén uan nochin taixyekananij yolpakkej. Kiualkuiaj tomin uan kipantaliayaj itech kaxontsin hasta kipexontiayaj.*

11 Keman levitas kiitayaj ke mosentilijkaya miak tomin itech kaxontsin kiuikiliayaj tekiuaj. Satepan itajkuilojkauj tekiuaj uan akin kipaleuiaya tayekankatiopixkat kikixtiliayaj nochi in tomin uan oksepa kitaliayaj kaxontsin kampa ipa yetoya. Mojmostaj ijkon kichiuayaj uan ijkon kisentilijkej miak tomin. 12 Tekiuaj uan Jehoiadá kinmakayaj nejon tomin akin kiixyekanayaj tekit tein mochiujtoya ichan Jehová. Uan yejuan kintakeuayaj akin kitapanayaj tet uan akin tamachijchiuayaj para maj kiyekchijchiuakan ichan Jehová. No kintakeuayaj akin kimatiaj kichijchiuaskej miak taman ika tepos uan cobre para maj kiyekchijchiuakan ichan Jehová. 13 Akin kinixtalijkaj maj taixyekanakan peuak tekitij uan kiitstiayaj maj mochiuani tekit tein monekia mochiuas. Kiyekchijchiujkej ichan toTajtsin Dios kemej ipa chijchiujtoya uan kuali kiketskej. 14 Keman kitamiyekchijchiujkej ichan Dios, kiualkuilijkej tekiuaj uan Jehoiadá tomin tein mokaujka. Nejon tomin mokuik para kichijchiuaskej nochi tein mokuiskia ichan Jehová uan tein mokuiskia keman kimaktiliskiaj miak taman. No kichijchiujkej copas uan okseki taman de oro uan plata. Keman Jehoiadá nemia, tiopixkamej mojmostaj kichichinouiliayaj Jehová miak taman ompa ichan.

15 Jehoiadá momikilij keman kipiaya 130 xiujmej. Yejua semi yolpakia porin nemik miak xiujmej. 16 Kitokkej itech ueyi xolal tein iaxka David kampa kintokayaj tekiuanij porin kinpaleuijka israelitas maj oksepa yakan ichan toTajtsin Dios para kiueyichiuaskej.

17 Satepan ke Jehoiadá momikilij, taixyekananij de Judá kiitakoj tekiuaj uan motankuaketskej iixpan, uan tekiuaj kikakik tein kiluijkej. 18 Akin nemiaj Judá uan Jerusalén kisenkaujkej ichan Jehová ininDios ininuejkaujtatuan, uan peuak kinueyichiuaj tatadiosmej* uan koujmej.* Kemej semi tajtakolchiujkej, kitelkualantijkej Dios. 19 Jehová kinekia maj oksepa kiueyichiuakan, yejua ika kisentokaya kintitania itanauatijkauan* para maj kinpaleuikan. Tanauatianij kinnejmachtiayaj akin nemiaj Judá uan Jerusalén, sayoj ke yejuan amo kinekiaj kinkakiskej.

20 Dios kimakak Zacarías ichikaualis. Itat Zacarías katka tiopixkat Jehoiadá. Zacarías moketsak okachi uejkapan kampa nochin kiitaskiaj uan kiniluij: “Yejua nejin tein kijtoj toTajtsin Dios: ‘¿Keyej amo nankitakamatij tein Jehová tanauatia? Ijkon sayoj namoselti namokuejmolkalakiaj. Kemej namejuan nankikaujkej Jehová, yejua no namechkauas’”. 21 Sayoj ke kiixejekojkej toni kichiuiliskej uan tekiuaj tanauatij maj kitetemakan.* Kitetenkej itech patio tein kipiaya ichan Jehová. 22 Tekiuaj Jehoás nion tepitsin kielnamikik ke Jehoiadá nochipa kitasojtak, ta kimiktij Zacarías iokichpil Jehoiadá. Keman Zacarías miktoyaya, kijtoj: “Maj Jehová kiita tein tikchiua uan maj mitstatsakuilti”.

23 Ipeujyan xiuit, soldados sirios pankiskej para kiteuiskej Jehoás. Sentakuikej Judá uan Jerusalén uan kinmiktijkej nochin akin ompa taixyekanayaj. Kinkuilijkej miak taman tein patiyoj uan kititanilijkej akin tekiuajtia Damasco. 24 Soldados sirios amo miakej katkaj, sayoj ke Jehová kinpaleuij maj kintanikan tel miakej soldados akin nemiaj Judá uan Jerusalén. Jehová ininDios ininuejkaujtatuan kichiuak nejon porin akin nemiaj Judá uan Jerusalén kikaujkaj. Sirios kichiujkej tein Dios kijtojka ke kipanoskia Jehoás. 25 Sirios kitelkokojkej Jehoás uan keman yajkej,* itakeualuan Jehoás kiixnamikkej porin kinmiktijka ikoneuan* tiopixkat Jehoiadá. Kimiktijkej itech icama uan satepan kitokkej itech ueyi xolal tein iaxka David, sayoj ke amo kitokkej kampa kintokayaj tekiuanij.

26 Akin kiixnamikkej Jehoás monotsayaj Zabad uan Jehozabad. Inan Zabad monotsaya Simeat uan katka kayot Ammón uan inan Jehozabad monotsaya Simrit uan katka kayot Moab. 27 Nochi tein itanauatijkauan Dios kinejmachtijkej Jehoás, keniuj kiyekchijchiuak ichan toTajtsin Dios uan tein kichiujkej ikoneuan, ijkuiliujtok itech amatajkuilol kampa ininka tajtoua nochin tekiuanij. Uan Amasías akin katka iokichpil Jehoás peuak tekiuajti.

25 Amasías kipiaya 25 xiujmej keman peuak tekiuajti. Nemia Jerusalén uan tekiuajtik 29 xiujmej. Inan monotsaya Jehoadán uan katka kayot Jerusalén. 2 Maski Amasías kichiuaya tein Jehová kiyolpaktia, amo nochipa ijkon kichiuak.* 3 Keman Amasías senkis kinixyekanayaya akin nemiaj Judá, kinmiktij takamej akin kimiktijkaj itat keman tekiuajtitoya. 4 Sayoj ke amo kinmiktij ininokichpipiluan porin kitakamatik tein ijkuiliujtok itech amatajkuilol kampa ixnesi Tanauatil tein Dios kimakaka Moisés. Jehová ompa tanauatij: “Tetatmej amo moneki mikiskej ika tein kichiuaskej ininkoneuan nion konemej moneki mikiskej ika tein kichiuaskej inintatuan. Komo semej tajtakolchiua yejua moneki mikis”.

5 Uan Amasías kinsentilij nochin takamej akin nemiaj Judá. Satepan kintejtekpanak por uejueyi familias nochin akin pouiaj iniuan ikoneuan Judá uan ikoneuan Benjamín. Takamej xejxeliujtoyaj por grupos uan itech sejse grupo moajsia akin kinixyekanaya mil soldados uan akin kinixyekanaya cien soldados. Amasías kinijkuiloj nochin takamej akin kipiayaj 20 xiujmej uan akin kipanauiayajya. Keman kintamiijkuiloj, kiitak ke katkaj 300 mil takamej akin ueliskiaj mochiuaskej soldados. Yejuan kimatiaj keniuj kikuiskej se lanza* uan se ueyi escudo. 6 Uan no kintakeuak 100 mil soldados akin kuali tateuiayaj akin nemiaj itech xolal Israel uan kintaxtauij 3,420 kilos* de plata. 7 Sayoj ke se itekitikauj toTajtsin Dios kiluiko Amasías: “Amo xikinuika soldados akin pouij itech xolal Israel, porin Jehová amo kinpaleuijtok akin ompa nemij. Yejua amo kinpaleuia nion semej akin pouij iniuan ikoneuan Efraín. 8 Xiouj xitateuiti sayoj iniuan mosoldados uan amo ximoui, porin komo amo titatakamati, toTajtsin Dios uelis kichiuas maj mitstanikan akin mitsixnamikij, porin Dios ueli tepaleuia maj se tatani uan ueli kichiua maj se tapolo”. 9 Amasías kiluij itekitikauj toTajtsin Dios: “¿Uan notomin? Nikinmakak soldados akin pouij itech xolal Israel 3,420 kilos* de plata”. Itekitikauj toTajtsin Dios kinankilij: “Jehová uelis mitsmakas okachi ke tein tikinmakak”. 10 Yejua ika Amasías kiniluij soldados akin ualeuayaj de Efraín maj mokepakan ininchan. Sayoj ke yejuan semi kinkualauijkej akin nemiaj Judá uan semi kualantiayaj keman mokepkej ininchan.

11 Amasías moyolchikauak uan kinuikak isoldados tal tamanis* tein moixmati kemej Sal. Ompa kinmiktij 10 mil soldados akin katkaj de Seír. 12 Uan soldados de Judá kinkitskijkej okseki 10 mil takamej. Kinuikakej tepejxikuapan uan ompa kinpankajkaujkej. Nochin tamikokotokakej keman uetsitoj. 13 Sayoj ke soldados akin Amasías kinyolojpachoj uan amo kinuikakok maj iuan tateuitij, peuak kinteuiaj akin nemiaj itech uejueyi xolalmej de Judá, desde Samaria hasta Bet-Horón. Kinmiktijkej eyi mil uan mouikilijkej miak taman tein patiyoj.

14 Satepan ke Amasías kintanik edomitas, mokepak uan kinualkuik tatadiosmej* tein kinueyichiuayaj akin nemiaj Seír uan peuak kinita kemej idioses. Peuak motankuaketsa ininixpan uan no peuak kinchichinouilia tapialmej uan okseki taman.* 15 Yejua ika Jehová tel kualanik iuan Amasías uan kititanik se tanauatijkej* maj kiluiti: “¿Keyej tikinueyichiua inintatadiosuan? ¿Xe nejon tatadiosmej uelik kinmakixtijkej akin ompa nemiaj keman tikinteuito?”. 16 Keman tanauatijkej tajtojtoya, tekiuaj kiluij: “¿Xe timitsixtalijkej para tikyolmajxitis tekiuaj? ¡Ximotentsakuaya! ¿Oso tikneki maj mitsmiktikan?”. Achto ke tanauatijkej motentsakuaskia, kiluij: “Nikyekmati ke Dios kiixtalijya mitsixpolos porin tikinueyichiuak tatadiosmej uan amo tinechkakik”.

17 Amasías akin tekiuajtia Judá kintajtanij akin kiyolmajxitiayaj toni ueliskia kichiuas. Satepan tanauatij maj kiluitij Jehoás akin tekiuajtia itech xolal Israel: “Xiuiki uan maj timoteuikan”. Itat Jehoás katka Jehoacaz uan iueyitat katka Jehú. 18 Jehoás akin tekiuajtia itech xolal Israel tanauatij maj kiluitij Amasías akin tekiuajtia Judá: “Xiuit tein uitsyoj tein onkak Líbano tanauatij maj kiluitij cedrojkouit tein onkak Líbano: ‘Xikaua maj mosiuapil monamikti iuan nookichpil’. Sayoj ke ualkisak se koujtajtapial tein nemi Líbano uan kitsojtsoniksak* xiuit tein uitsyoj. 19 Tejua tikijtoj: ‘Nejua nikintanik* akin nemiaj Edom’. Yejua ika timoueyimati uan tikneki maj mitsueyitalikan. Sayoj ke okachi kuali ximokaua mochan. ¿Keyej tiktemojtok kuejmol? Sayoj tikneki timokuejmolkalakis uan tikinkuejmolkalakis nochin akin nemij Judá keman titapolos”.

20 Sayoj ke Amasías amo kikakik Jehoás porin toTajtsin Dios ipa ijkon kiixtalijkaya. Dios kinekia maj kintanikan akin nemiaj Judá keman kinteuiskiaj porin peuak kinueyichiuaj tatadiosmej tein kinueyichiuayaj akin nemiaj Edom. 21 Jehoás akin tekiuajtia itech xolal Israel pankisak para moteuis iuan Amasías akin tekiuajtia Judá. Moteuijkej ompa Bet-Semes tein poui Judá. 22 Akin katkaj de Israel kintankej akin katkaj de Judá. Yejua ika nochin akin katkaj de Judá cholojkej uan mokepkej ininchan.* 23 Jehoás akin tekiuajtia itech xolal Israel kikitskij Amasías akin tekiuajtia Judá ompa Bet-Semes. Itat Amasías katka Jehoás uan iueyitat katka Jehoacaz.* Keman Jehoás kikitskij Amasías kiualkuik Jerusalén uan kixitinij kemej 180 metros* den tepamit tein kiyoualouaya Jerusalén. Kixitinij desde puerta tein monotsa Efraín hasta puerta tein monotsa Esquina. 24 Jehoás kikuiteuak nochi oro, plata uan nochi tein onkaya ichan toTajtsin Dios tein kiyekpiaya* Obed-Edom. No kikuiteuak nochi tein onkaya ichan tekiuaj itech cuartos kampa kitaliaya nochi tein patiyoj. Uan no kinkuiteuak sekin akin ompa nemiaj. Satepan mokepak Samaria.

25 Amasías iokichpil Jehoás akin tekiuajtika Judá nemikok 15 xiujmej satepan ke momikilij Jehoás akin tekiuajtika itech xolal Israel. Jehoás katka iokichpil tekiuaj Jehoacaz. 26 Nochi okseki taman tein kipanok Amasías keman tekiuajtik, ijkuiliujtok itech amatajkuilol kampa ininka tajtoua nochin akin tekiuajtikej Judá uan itech xolal Israel. 27 Desde keman Amasías kikauak Jehová, kiixnamikkej uan kitemouayaj kimiktiskej ompa Jerusalén, yejua ika choloj uan yajki Lakís. Sayoj ke kintitankej seki takamej maj kitemotij ompa Lakís uan kimiktijkej. 28 Satepan kiuikakej itech se carro tein kitilantiayaj caballos, uan kitokkej kampa kintokkaj iuejkaujtatuan itech ueyi xolal tein poui Judá.*

26 Nochin akin nemiaj Judá kiixtalijkej Uzías* para maj kiixpata Amasías akin katka itat uan maj yejua peua tekiuajti. Uzías kipiaya 16 xiujmej keman peuak tekiuajti. 2 Uzías moaxkatilij Elat para maj oksepa poui Judá uan kiyekchijchiuak. Kichiuak nejin satepan ke tekiuaj Amasías momikilij.* 3 Uzías kipiaya 16 xiujmej keman peuak tekiuajti. Nemia Jerusalén uan tekiuajtik 52 xiujmej. Inan monotsaya Jecolías uan katka kayot Jerusalén. 4 Uzías kichiuaya tein Jehová kiyolpaktia ijkon kemej kichiujka Amasías akin katka itat. 5 Keman Zacarías yoltoya, Uzías kisentokak kitekitilij toTajtsin Dios porin Zacarías kimachtij maj kimojkatoka. Keman Uzías kitekitilij Jehová, toTajtsin Dios kitatiochiuij.

6 Uzías yajki kinteuito filisteos uan kintanik akin nemiaj Gat, Jabné uan Asdod uan moaxkatilij nejon uejueyi xolalmej. Satepan kinchijchiuak okseki uejueyi xolalmej tanakastan de Asdod uan kampa nemiaj filisteos. 7 Totajtsin Dios kisentokak kipaleuij Uzías maj kintani filisteos uan no maj kintani árabes akin nemiaj Gurbaal. No kipaleuij maj kintani akin moixmatiaj kemej meunim. 8 Ammonitas peuak kitaxtauiaj Uzías tein yejua kiixtalijka maj kimakakan. Kemej semi ueyichiujkej katka, semi moteixmatiltij, hasta ompa Egipto kitekakilijkej tein kichiujka. 9 Uan no, Uzías kinchijchiuak uejkapan kalmej ompa Jerusalén uan kuali kintsakuak. Kinchijchiuak tanakastan den puerta tein monotsa Esquina uan tanakastan den puerta tein monotsa Valle. No kinchijchiuak tanakastan den kalikxit tein kichikauaya tepamit. 10 No kinchijchiuak uejkapan kalmej itech talmej kampa amo akin nemia. No kinchijchiuak uejueyi talkoyokmej* para kisentiliskej at porin kinpiaya miak tapialmej. No ijkon kichiuak ompa Sefelá uan itech tal tamanis.* Kinpiaya takeualmej akin tekitiaj itech tepemej uan ompa Carmelo akin tatokayaj uan tekitiaj kampa kitokayaj uvas. Kichiuak nochi nejon porin semi kiuelitaya tatokas.

11 Uan no, Uzías kinpiaya tel miakej soldados akin kipiayaj tein ika tateuiskej. Keman yayaj tateuitij moxejxelouayaj por grupos. Tajkuilojkej Jeiel uan taixyekankej Maaseya kinpoujkej uan kinijkuilojkej soldados. Hananías, semej taixyekananij akin kitekitiliaya tekiuaj, kinixyekanaya Jeiel uan Maaseya. 12 Takamej akin kinixyekanayaj uejueyi familias katkaj 2,600 uan yejuan kinixyekanayaj soldados akin kuali tateuiayaj. 13 Nejon takamej kinixyekanayaj trescientos siete mil quinientos soldados akin kipiayaj tein ika tateuiskej. Katkaj tel miakej soldados akin kipaleuiayaj tekiuaj keman kiixnamikiaj akin kitauelitayaj. 14 Uzías no kinmakak nochin soldados ininescudos, ininlanzas,* inincascos de tepos, ininteposkoton, ininarcos* uan tet tein kitamotaj ika honda.* 15 Uan no, Uzías kinnauatij takamej akin kuali kichijchiuayaj uejueyi teposmej tein kikuiaj para tateuiskej maj kichijchiuakan teposmej tein ueliskia ika kitamotaskej flechas uan uejueyi tet. Nejin teposmej kintalijkej itech uejkapan kalmej uan itech esquinas den uejueyi tepamit tein kiyoualouaya Jerusalén. Yejua ika miakkan kiixmatkej porin Dios kipaleuij uan semi ueyichiujkej katka.

16 Sayoj ke niman keman mochiuak ueyichiujkej, moueyimatik uan yejua iselti motajyouiltij. Tajtakolchiuak iixpan iDios Jehová porin kalakik ichan Jehová para tapopochuis itech altar kampa ipa tapopochuiayaj. 17 Keman tiopixkat Azarías uan okseki 80 tiopixkamej akin kitekitiliayaj Jehová uan katkaj yolchikaujkej kiitakej tekiuaj, niman kitojtokateujkej.* 18 Kitakaualtijkej tekiuaj Uzías uan kiluijkej: “¡Uzías, tejua amo mitsnamiki xiktapopochuili Jehová! Sayoj tiopixkamej akin ikoneuan Aarón uelij tapopochuiaj porin Dios kinxeloj para maj kichiuakan nejon tekit. Xikisa de ichan Dios. Amo tiktakamatik toDios Jehová uan yejua amo mitsueyitalis porin tikchiuak nejin”.

19 Sayoj ke Uzías akin maaktoya se tekolkaxit para tapopochuis, kualantikisak. Uan keman Uzías kintauelnankilijtoya tiopixkamej, iixkuako kikisak pitsotik kokolis* tein monotsa lepra. Uzías yetoya ichan Jehová inakastan altar kampa tapopochuiayaj uan tiopixkamej ompa kiitstoyaj. 20 Keman tayekankatiopixkat Azarías uan okseki tiopixkamej kiixitakej Uzías, kiitakej ke iixkuako kikiska lepra. Yejua ika niman kikixtijkej de ompa uan yejua no niman kisak porin Jehová kitatsakuiltijka.

21 Tekiuaj Uzías kisentokaya kipiaya lepra hasta keman momikilij. Kemej kipiaya lepra, nemia iselti itech se kali uan amo kikaujkejok maj youi ichan Jehová. Jotán akin katka iokichpil Uzías taixyekanaya ichan tekiuaj uan akin nemiaj Judá kiixpantiliayaj ininkuejmoluan.

22 Uan nochi okseki taman tein kipanok Uzías keman tekiuajtik kijkuiloj tanauatijkej* Isaías iokichpil Amoz. 23 Uzías momikilij* uan kitokkej kampa kintokkaj iuejkaujtatuan. Yejuan kitokkej itech tal tein ininaxka katka tekiuanij porin kijtojkej: “Kipia lepra”. Uan Jotán akin katka iokichpil peuak tekiuajti.

27 Jotán kipiaya 25 xiujmej keman peuak tekiuajti. Nemia Jerusalén uan tekiuajtik 16 xiujmej. Inan monotsaya Jerusá uan katka isiuapil Sadoc. 2 Jotán kichiuaya tein Jehová kiyolpaktia, ijkon kemej kichiujka Uzías akin katka itat, sayoj ke Jotán amo kalakik ichan Jehová. Maski Jotán kichiuaya tein kuali, nochin akin nemiaj Judá kisentokayaj kichiuayaj tein amo kuali. 3 Jotán kichijchiuak puerta tein okachi uejkapantik tein kipiaya ichan Jehová uan kiyekchijchiuak tepamit tein yetok Ofel. 4 No kinchijchiuak uejueyi xolalmej kampa tepeyoj ompa Judá, uan koujtaj kinchijchiuak uejueyi kalmej kampa kuali tajtatsakuak uan no kinchijchiuak uejkapan kalmej. 5 Moteuij iuan akin kinixyekanaya ammonitas uan kitanik. Yejua ika nejon xiuit ammonitas kimakakej 3,420 kilos* de plata, un millón seiscientos mil kilos* de trigo uan un millón trescientos mil kilos* de cebada. Uan ammonitas ijkon kichiujkej eyi xiuit. 6 Uan Jotán mochiuak okachi ueyichiujkej porin kiixtalij nochipa kitakamatis iDios Jehová.

7 Nochi okseki taman tein kipanok Jotán, akonimej iniuan moteuij uan tein kichiuak, ijkuiliujtok itech amatajkuilol kampa ininka tajtoua nochin akin tekiuajtikej itech xolal Israel uan Judá. 8 Jotán kipiaya 25 xiujmej keman peuak tekiuajti. Nemia Jerusalén uan tekiuajtik 16 xiujmej. 9 Jotán momikilij* uan kitokkej itech ueyi xolal tein iaxka David kampa no kintokkaj iuejkaujtatuan. Uan Acaz akin katka iokichpil Jotán peuak tekiuajti.

28 Acaz kipiaya 20 xiujmej keman peuak tekiuajti. Nemia Jerusalén uan tekiuajtik 16 xiujmej. Acaz amo kichiuak tein Jehová kiyolpaktia. Yejua amo kichiuak kemej iuejkaujtat David akin kichiujka tein Dios kiyolpaktia. 2 Acaz kichiuak tein amo kuali ijkon kemej kichiujkaj akin tekiuajtikaj itech xolal Israel, hasta mochijchiuilij uejueyi tatadiosmej* de tepos tein moixmatij kemej Baal.* 3 No kinchichinouilij itatadiosuan tapialmej uan okseki taman* itech tal tamanis tein moixmati kemej Hinón* uan no ompa kinchichinoj ikoneuan. Kichiuak nejon tein tel amo kuali ijkon kemej kichiujkaj akin nemiaj itech altepemej akin Jehová kintalkuilijka para maj israelitas ompa neminij. 4 Uan no kinchichinouiliaya itatadiosuan tapialmej uan okseki taman kampa tachijchiujkaj para taueyichiuaskej uan kinmaktiliaya pokti tein pankisaya. No kichiuaya nejon itech tepetsitsin uan inintampa uejueyi koujmej.

5 Yejua ika iDios Jehová kichiuak maj akin tekiuajtia Siria kiteui uan maj kitani, uan miakej akin nemiaj Judá kinuikakej Damasco. No kichiuak maj akin tekiuajtia Israel kiteui Acaz uan maj kitani uan kinmiktij tel miakej isoldados. 6 Itech sayoj se tonal, Pécah iokichpil Remalías kinmiktij ompa Judá 120 mil soldados akin katkaj yolchikaujkej. Kinpanok nejon porin kikaujkej Jehová, ininDios ininuejkaujtatuan. 7 Uan Zicrí, se soldado akin pouia iniuan ikoneuan Efraín kimiktij Maaseya, Azricam uan Elcaná. Maaseya katka iokichpil tekiuaj, Azricam taixyekanaya ichan tekiuaj uan Elcaná kipaleuiaya tekiuaj para taixyekanas. 8 Uan no, akin nemiaj itech xolal Israel kinuikakej 200 mil akin nemiaj Judá akin katkaj ininparientes. Kinuikakej siuamej, okichpipil uan siuapipil. No kinkuilijkej miak taman tein patiyoj uan kiuikakej Samaria.

9 Ompa Samaria yetoya se itanauatijkauj Jehová akin monotsaya Oded. Yejua kinnamikito soldados akin mokepayajya Samaria uan kiniluij: “Jehová ininDios namouejkaujtatuan semi kualanik iniuan akin nemiaj Judá, yejua ika namechpaleuij xikintanikan. Sayoj ke namejuan fiero nankinmiktijkej uan Dios kiitak tein nankichiujkej. 10 Uan axkan nankinekij maj namechtekitilikan akin nankinualkuikej de Judá uan Jerusalén. Sayoj ke namejuan no nantajtakolchiuanij iixpan namoDios Jehová. 11 Xinechkakikan uan xikinkepakan namoparientes akin nankinualkuikej porin Jehová tel kualantok namouan”.

12 Seki takamej akin kinixyekanayaj efraimitas kinnamikitoj soldados akin yajkaj tateuitoj para kintakaualtiskej. Nejin takamej katkaj Azarías akin katka iokichpil Jehohanán, Berekías akin katka iokichpil Mesilemot, Jehizquías akin katka iokichpil Salum uan Amasá akin katka iokichpil Hadlái. 13 Yejuan kiniluijkej soldados: “Amo xikinualkuikan nikan akin nankinualkuikej de Judá porin nejon kichiuas maj timotajtakolmakakan iixpan Jehová. Ipa semi titajtakolchiujkejya uan tein nankichiuasnekij kichiuas maj okachi timotajtakolmakakan. Dios ipa tel kualantokya iniuan akin nemij itech xolal Israel”. 14 Uan soldados kinkauilijkej taixyekananij uan nochin akin mosentilijkaj nochi tein patiyoj tein kinkuilijkaj akin nemiaj Judá. No kinkauilijkej nochin akin kinualkuikaj de Judá. 15 Uan takamej akin kinixtalijkaj maj kinpaleuikan akin kinualkuikaj de Judá kikixtijkej tasal de nochi tein kinkuilijkaj akin nemiaj Judá para kinmakaskej akin amo kipiayaj inintasal. Yejuan kinmakakej tasal, huaraches, kintamakakej, kinmakakej tein tayiskej, kinmakakej aceite para moojxiliskej uan kinuikakej Jericó* kampa yetoyaj ininparientes. Uan akin amo taxikouayajok kinuikakej itech burros. Satepan mokepkej Samaria.

16 Ijkuak, tekiuaj Acaz kiniluij akin tekiuajtiaj Asiria maj kipaleuikan. 17 Akin nemiaj Edom oksepa kinteuijkej akin nemiaj Judá uan kinuikakej Edom. 18 Uan filisteos no kinteuitoj akin nemiaj itech uejueyi xolalmej tein yetoyaj Sefelá uan Négueb tein poui Judá. Moaxkatilijkej Bet-Semes, Ayalón, Guederot, Socó, Timná uan Guimzó uan xolaltsitsin tein ompa pouij. Satepan ompa mokaltalijkej. 19 Jehová kinpinaujtij akin nemiaj Judá porin Acaz akin tekiuajtia Israel* kinkauak maj kisentokanij kichiuanij tein amo kuali. Nejon kichiuak maj akin nemiaj Judá semi tajtakolchiuanij iixpan Jehová.

20 Uan Tilgat-Pilnéser akin tekiuajtia Asiria amo kipaleuij Acaz, ta kiixnamikik uan kitajyouiltij. 21 Acaz kitamikixtij nochi tein patiyoj tein onkaya ichan Jehová, ichan tekiuaj uan tein onkaya ininchan uejueyi chiuanimej para kimakas akin tekiuajtia Asiria, sayoj ke nejon amo kipaleuij. 22 Uan keman Acaz tajyouijtoya okachi amo kitakamatik Jehová. 23 Peuak kinmaktilia miak taman tatadiosmej tein kinueyichiuayaj akin nemiaj Damasco akin kitankaj. Acaz moluiaya: “Kemej inindioses akin tekiuajtij Siria kinpaleuijtokej, nikinmaktilis miak taman para maj nejua nechpaleuikan”. Sayoj ke kemej kinueyichiuak nejon tatadiosmej, akin tekiuajtia Israel uan nochin israelitas tajyouijkej. 24 Uan no, Acaz kisentilij uan kitatapatsak nochi tein mokuia ichan toTajtsin Dios. Tatsakuak ichan Jehová uan kinchijchiuak altares itech nochi ojmej tein onkayaj ompa Jerusalén. 25 Uan itech nochi uejueyi xolalmej de Judá tachijchiuak kampa kinueyichiuaskej tatadiosmej. Tachijchiuak para kinchichinouiliskej tatadiosmej tapialmej uan okseki taman* uan kikualantij Jehová ininDios iuejkaujtatuan.

26 Nochi okseki taman tein kipanok Acaz keman tekiuajtik uan nochi tein kichiuak, ijkuiliujtok itech amatajkuilol kampa ininka tajtoua nochin akin tekiuajtikej Judá uan itech xolal Israel. 27 Acaz momikilij* uan kitokkej itech ueyi xolal Jerusalén. Sayoj ke amo kitokkej kampa kintokayaj akin tekiuajtikaj itech xolal Israel. Uan Ezequías akin katka iokichpil peuak tekiuajti.

29 Ezequías peuak tekiuajti keman kipiaya 25 xiujmej. Nemia Jerusalén uan tekiuajtik 29 xiujmej. Inan monotsaya Abías akin katka isiuapil Zacarías. 2 Ezequías kichiuaya tein Jehová kiyolpaktia ijkon kemej kichiujka David akin katka iuejkaujtat. 3 Itech yekinika xiuit keman peuak tekiuajti, itech metsti nisán* tatapoj ichan Jehová uan kinyekchijchiuak puertas. 4 Satepan kinualkuik tiopixkamej uan levitas uan kiniluij maj mosentilikan plaza tein yetoya itech ueyi xolal kampa ualkisa tonaltsin. 5 Ezequías kiniluij: “Xinechkakikan levitas. Xikchiuakan nochi tein moneki para nankiueyichiuaskej Dios uan xikchipauakan ichan Jehová ininDios namouejkaujtatuan. Uan xikixtikan de ichan Dios nochi in tatadiosmej* tein tetajyaltiaj. 6 Porin totatuan amo kitakamatkej toDios Jehová uan kichiujkej tein amo kiyolpaktia. Kikaujkej Jehová, amo kitakachiujkej kaltsin kampa kiueyichiuayaj* uan kiixtopeujkej. 7 No kintsakkej puertas de ichan Dios* uan kinseuijkej candilmej. Amo kitapopochuilijkejok ininDios israelitas nion kichichinouilijkejok tapialmej kampa kiueyichiuayaj Dios. 8 Yejua ika Jehová semi kualanik iniuan akin nemiaj Judá uan Jerusalén uan kintatsakuiltij. Kichiuak nejon para maj akin kikakiskiaj tein kinpanok momoujtiskiaj, kinmojkaitaskiaj uan kinpijpinaujtiskiaj* ijkon kemej namejuan nankiitstokejya. 9 Yejua ika kinmiktijkej touejkaujtatuan ika machete tein ojkan tenej,* uan tookichpipiluan, tosiuapipiluan uan tosiuauan kinuikakej uan kintsakkej. 10 Yejua ika nikneki nimotenkauas iuan Jehová ininDios israelitas ke tiktakamatiskej para maj amo kualantook touan. 11 Uan axkan nokoneuan, amo tiempo para namoseuijtoskej porin Jehová namechijitak para nanijkatoskej iixpan, para nankitekitiliskej uan para nankichichinouiliskej tapialmej”.

12 Yejua ika levitas peuak tekitij. Levitas akin pouiaj iniuan ikoneuan Cohat katkaj Máhat uan Joel. Itat Máhat katka Amasái uan itat Joel katka Azarías. De ikoneuan Merarí katka Quis uan Azarías. Itat Quis katka Abdí uan itat Azarías katka Jehalelel. De ikoneuan Guersón katka Joá. Itat Joá katka Zimá uan itat Edén katka Joá. 13 De ikoneuan Elizafán katkaj Simrí uan Jeuel. De ikoneuan Asaf katkaj Zacarías uan Matanías. 14 De ikoneuan Hemán katkaj Jehiel uan Simeí. De ikoneuan Jedutún katkaj Semaya uan Uziel. 15 Yejuan kinsentilijkej ininparientes, kichiujkej tein monekia para kiueyichiuaskej Jehová uan kichipauakoj ichan ijkon kemej kinnauatijka tekiuaj. Jehová kinauatijka tekiuaj maj kichiuakan nochi nejon. 16 Tiopixkamej kalakkej ichan Jehová para kichipauaskej, kinkixtijkej nochi in tatadiosmej tein kinajsikej ichan Jehová uan kinuikakej itech patio tein kipia ichan Jehová. Satepan levitas kinkixtijkej tatadiosmej uan kinuikakej tal tamanis* tein moixmati kemej Cedrón. 17 Peuak tachipauaj itech yekinika tonal den metsti nisán* uan chikueyitika tonal ajsikej itech cuarto kampa se kalakteua ichan Jehová. Chikueyi tonal kichipaujtoyaj ichan Jehová uan matankej itech tonal 16 den metsti nisán.*

18 Satepan kiitatoj tekiuaj Ezequías uan kiluijkej: “Tiktamichipaujkejya ichan Jehová, altar kampa kichichinouiliskej tapialmej, tapalkamej uan okseki taman tein ompa mokuis. No tikchipaujkejya mesa kampa kitaliskej pantsitsin tein kimaktiliaj Dios, tapalkamej uan okseki taman tein ompa mokuis. 19 Uan no tikinchipaujkejya nochi in tapalkamej uan okseki taman tein tekiuaj Acaz kinajchiuak keman tekiuajtitoya, keman kiixnamikik Dios. Axkan yetokejya itech ialtar Jehová”.

20 Uan tekiuaj Ezequías kualkan meuak, kinsentilij akin taixyekanayaj itech ueyi xolal uan pankiskej ichan Jehová. 21 Kinuikakej chikome kuakuejmej, chikome ichkaueuetkej,* chikome ichkatsitsin uan chikome chivos para kimaktiliskej Dios. Kimaktilijkej para maj kintapojpolui akin nemiaj ichan tekiuaj, akin tekitiaj templo uan akin nemiaj Judá porin tajtakolejkej. Uan Ezequías kiniluij tiopixkamej akin katkaj ikoneuan Aarón maj kintemaktikan nejon tapialmej itech ialtar Jehová. 22 Yejua ika tiopixkamej kinmiktijkej kuakuejmej, kisentilijkej ininesyo uan kipijpisuijkej itech altar. No kinmiktijkej ichkaueuetkej uan kipijpisuijkej ininesyo itech altar. Satepan kinmiktijkej ichkatsitsin uan kipijpisuijkej ininesyo itech altar. 23 Satepan kinuikakej chivos kampa yetoya tekiuaj uan akin mosentilijkaj uan tiopixkamej kitalijkej ininmauan itech chivos. Nejon chivos kitemaktijkaj porin tajtakolejkej. 24 Satepan tiopixkamej kinmiktijkej nejon chivos uan kitemaktijkej ininesyo itech altar para maj Dios kintapojpolui nochin israelitas porin tajtakolejkej. Ijkon kichiujkej porin tekiuaj kijtoj ke tapialmej tein kichichinouiliskiaj Dios uan tein kimaktiliskiaj yeskia para maj Dios kintapojpolui nochin israelitas.

25 Uan no, Ezequías kinnauatij levitas maj motejtekpananij ichan Jehová uan maj kipianij címbalos* uan arpas tein uejueykej uan tein tsikitsitsin ijkon kemej tanauatijka David, Gad uan tanauatijkej* Natán. Dios kiitaltiaya Gad seki taman para maj kimatilti tekiuaj. Jehová kiniluijka itanauatijkauan maj kitematiltianij keniuj monekia cantaroskej. 26 Yejua ika levitas ompa ijkatoyaj uan maaktoyaj címbalos uan arpas tein uejueykej uan tein tsikitsitsin tein David kinmakaka levitas, uan tiopixkamej maaktoyaj inintrompetas.

27 Satepan Ezequías tanauatij maj kichichinouilikan Dios in tapialmej itech altar. Keman peuak kinchichinouaj tapialmej, levitas peuak kicantarouiliaj Jehová. No peuak kitsotsonaj arpas tein uejueykej uan tein tsikitsitsin uan kikakistiltiaj címbalos tein David akin tekiuajtika Israel kinmakaka levitas. Uan tiopixkamej no peuak kinpitsaj trompetas. 28 Uan nochin akin mosentilijkaj moixpilojkej keman levitas uan tiopixkamej cantarojtoyaj uan kipitstoyaj trompetas. Kichiujtoyaj nejin hasta keman kintamichichinojkej tapialmej. 29 Keman kintamichichinojkej tapialmej, tekiuaj uan akin iuan yetoyaj motankuaketskej uan moixpilojkej hasta talpan. 30 Tekiuaj Ezequías uan taixyekananij kiniluijkej levitas maj kicantarouilianij Jehová para kiueyichiuaskej. Kiniluijkej maj cantarouanij tein kijkuilojkej David uan Asaf akin Dios kiitaltiaya tein kinekia kitematiltis. Yejua ika levitas kiueyichiujkej Dios ika miak pakilis uan motankuaketskej uan moixpilojkej hasta talpan.

31 Uan Ezequías kijtoj: “Axkan ke namechxelojkejya para nankitekitiliskej Jehová, xiualakan ichan Jehová uan xikinualkuikan tapialmej para nankimaktiliskej uan okseki taman para nankitasojkamatiliskej”. Yejua ika nochin akin mosentilijkaj kinualkuikej tapialmej para kimaktiliskej Dios uan okseki taman para kitasojkamatiliskej. Uan oksekin kinualkuikej tapialmej para kichichinouiliskej Dios porin ijkon kinekkej kichiuaskej. 32 Tapialmej tein kinualkuikej akin mosentilijkej para kichichinouiliskej Jehová katkaj 70 kuakuejmej, 100 ichkaueuetkej uan 200 ichkatsitsin. 33 Uan no kinualkuikej 600 kuakuejmej uan eyi mil ichkamej para kimaktiliskej Dios. 34 Sayoj ke tiopixkamej amo miakej katkaj para kintamixipeuaskej* nochi in tapialmej tein kinchichinoskiaj. Yejua ika levitas akin katkaj ininparientes tiopixkamej kinpaleuijkej maj kintamixipeuakan nochi in tapialmej. Kinpaleuijkej hasta keman okseki tiopixkamej motamichipaujkej, porin levitas okachi kiajsikamatiaj ke monekia* mochipauaskej ke tiopixkamej. 35 Kichichinouilijkej Dios miak tapialmej uan no kimaktilijkej ininmantecayo tapialmej tein kintemaktijkaj para sentakuaskej iuan Dios.* Uan no kipantekkej vino para kimaktiliskej Dios keman kichichinouilijtoyaj in tapialmej. Ijkon oksepa peuak tekitij ichan Jehová. 36 Ezequías uan nochin akin nemiaj Judá semi yolpakiaj porin toTajtsin Dios kinpaleuijka. Yolpakiaj porin semi ijsiujka peujkaj oksepa kiueyichiuaj Dios.

30 Ezequías kintitanik seki takamej maj kinitatij akin nemiaj itech xolal Israel uan Judá uan hasta kinijkuilouilij amamej akin pouiaj iniuan ikoneuan Efraín uan Manasés para maj ualakan ichan Jehová. Kinyoleuak maj ualakan Jerusalén para kichiuaskej Pascua para kiueyichiuaskej Jehová ininDios israelitas. 2 Sayoj ke tekiuaj, taixyekananij uan nochin akin nemiaj Jerusalén kiixtalijkej kichiuaskej Pascua itech metsti iyar.* 3 Kemej miakej tiopixkamej amo mochipaujkaj uan israelitas amo mosentilijkaj ompa Jerusalén, amo uelik kichiujkej Pascua itech metsti keman ixyetoya kichiuaskej. 4 Tekiuaj uan nochin akin nemiaj Jerusalén kiuelitakej tein moixtalij. 5 Yejua ika kiixtalijkej maj kinitatij nochin israelitas akin nemiaj Beer-Seba hasta Dan para kinyoleuaskej maj ualakan Jerusalén. Ompa Jerusalén kichiuaskiaj Pascua para kiueyichiuaskej Jehová ininDios israelitas, porin akin nemiaj Judá uan Israel amo mosentilijtoyaj para kichiuaskej Pascua ijkon kemej moijtouaya itech iTanauatil Dios.

6 Yejua ika, seki takamej yajkej Israel uan Judá ijkon kemej tanauatij tekiuaj uan kiuikakej amamej tein tekiuaj uan taixyekananij kijkuilojkej. Yejuan kijtouayaj: “Israelitas, ximokepakan iuan Jehová ininDios Abrahán, Isaac uan Israel para maj yejua mokepa namouan, namejuan akin amo teyi namechchiuilijkej tekiuanij de Asiria. 7 Amo xikchiuakan kemej namouejkaujtatuan nion kemej namoparientes. Yejuan amo kitakamatkej Jehová ininDios ininuejkaujtatuan, yejua ika Dios kintatsakuiltij. Kichiuak nejon para maj momoujtikan akin kikakiskiaj tein kinpanok, ijkon kemej namejuan nankiitstokejya. 8 Yejua ika amo xikchiuakan kemej namouejkaujtatuan, ta namejuan xitakakikan. Uan para maj namoDios Jehová amo kualantook namouan xikauakan maj namechixyekana, xiualakan ichan tein moxelouilijya para maj nochipa iaxka uan xiktekitilikan Jehová. 9 Keman namejuan oksepa nankitekitiliskej Jehová, akin kinuikakej namoparientes uan namokoneuan kinikneliskej uan kinkauaskej maj mokepakan nikan kampa tikayomej, porin namoDios Jehová semi teiknelia uan amo namechixtopeuas komo oksepa nankitekitiliaj”.

10 Yejua ika, takamej akin kintitankej maj kinitatij israelitas yajtinenkej itech nochi uejueyi xolalmej tein yetoyaj kampa kintaxejxelouilijkaj ikoneuan Efraín uan Manasés uan hasta kampa kintaxejxelouilijkaj ikoneuan Zabulón. Miakej akin kinkakiaj kinueuetskiliayaj* uan kinkejkelouayaj. 11 Sayoj ke sekin akin pouiaj iniuan ikoneuan Aser, Manasés uan Zabulón moyolyemanijkej uan ualajkej Jerusalén. 12 ToTajtsin Dios no kintatiochiuij akin nemiaj Judá uan kinpaleuij maj nochin kinemilianij* kichiuaskej tein tekiuaj uan taixyekananij tanauatijkaj, ijkon kemej Jehová kijtojka maj kichiuakan.

13 Miakej mosentilijkej ompa Jerusalén para kichiuaskej iluit keman kikuaj pantsin tein amo kipia levadura. Mosentilijkej itech metsti iyar* uan tel miakej katkaj. 14 Peuak kinajchiuaj nochi in altares kampa kinueyichiuayaj tatadiosmej* uan altares kampa tapopochuiayaj tein yetoyaj ompa Jerusalén. Satepan kintamotatoj itech tal tamanis* tein moixmati kemej Cedrón. 15 Uan itech tonal 14 den metsti iyar* kinmiktijkej tapialmej tein kintemaktiayaj para Pascua. Tiopixkamej uan levitas semi mopinaujmatiaj, yejua ika mochipaujkej uan kinualkuikej tapialmej ichan Jehová para kichichinouiliskej. 16 Tiopixkamej uan levitas moketskej kampa ixyetoya moketsaskej ijkon kemej kijtouaya Tanauatil tein Dios kimakaka Moisés akin katka itekitikauj toTajtsin Dios. Levitas kinpanoltiliayaj esti tiopixkamej uan yejuan kipijpisuiayaj itech altar. 17 Miakej akin ijkuak mosentilijkaj amo mochipaujkaj para kiueyichiuaskej Dios, yejua ika levitas kinmiktijkej nochi in tapialmej tein kintemaktijkaj para Pascua. Kichiujkej nejon para kinpaleuiskej akin amo mochipaujkaj para maj Jehová kinitani ke chipaujkejya katkaj. 18 Miakej akin mosentilijkaj amo mochipaujkaj, okachiok akin pouiaj iniuan ikoneuan Efraín, Manasés, Isacar uan Zabulón, uan ijkon kikuajkej tapial tein kitemaktiayaj itech Pascua uan kiixpanauijkej tein kijtouaya Tanauatil. Sayoj ke Ezequías kitataujtij Dios maj kinikneli. Ezequías kijtoj: “Maj Jehová akin semi yolkuali kintapojpolui 19 nochin akin kiixtalijkej kitekitiliskej toTajtsin Jehová, ininDios ininuejkaujtatuan, maski amo mochipaujkej para iluichiuaskej ijkon kemej motanauatia”. 20 Uan Jehová kikakik Ezequías uan kintapojpoluij* israelitas.

21 Israelitas akin mosentilijkaj Jerusalén semi yolpakiaj keman iluichiujkej chikome tonal. Yejuan kichiujkej iluit keman kikuaj pantsin tein amo kipia levadura. Levitas uan tiopixkamej mojmostaj chikauak kitatsotsoniliayaj Jehová para kiueyichiuaskej Jehová. 22 Uan no, Ezequías kinnojnotsak uan kinyolchikauak* nochin levitas akin kitekitiliayaj Jehová uan kuali taixejekouayaj. Nochi nejon chikome tonal keman iluititoyaj, nochin tatakuajtoyaj, kimaktilijtoyaj Dios tapialmej para iuan sentakuaskej* uan kitasojkamatilijtoyaj Jehová ininDios ininuejkaujtatuan.

23 Uan nochin akin mosentilijkaj kiixtalijkej iluichiuaskej chikome tonalok. Yejua ika iluichiujkej chikome tonalok uan semi yolpakiaj. 24 Ezequías akin tekiuajtia Judá kinmakak akin mosentilijkaj mil kuakuejmej uan chikome mil ichkamej,* uan taixyekananij kinmakakej akin mosentilijkaj mil kuakuejmej uan 10 mil ichkamej. Uan ijkuak miakej tiopixkamej mochipaujtoyaj. 25 . Mosentilijkaj akin nemiaj Judá, tiopixkamej, levitas uan akin ualeujkaj de Israel. No mosentilijkaj akin amo katkaj israelitas akin ualeujkaj de Israel uan akin nemiaj Judá. Uan nochin semi yolpakiaj. 26 Nochin akin mosentilijkaj ompa Jerusalén semi yolpakiaj, porin desde keman Salomón tekiuajtik amo keman ijkon iluichiujtoyaj ompa Jerusalén. Salomón tekiuajtika itech xolal Israel uan itat katka David. 27 Keman matankej, tiopixkamej akin katkaj levitas moketskej uan kitajtanijkej Dios maj kintatiochiui nochin akin mosentilijkaj, uan Dios kinkakik. Ininnetataujtil ajsik hasta iluikak kampa Dios nemi.

31 Satepan ke iluitikej, nochin israelitas akin mosentilijkaj yajkej itech uejueyi xolalmej tein yetoyaj ompa Judá uan kintatapatskej temej tein kinkejketskaj para taueyichiuaskej. No kintamotkej koujmej tein ika taueyichiuayaj,* tauejuelojkej kampa tachijchiujkaj para taueyichiuaskej uan kinxitinijkej altares. Kitamichiujkej nochi nejin kampa kintaxejxelouilijkaj ikoneuan Judá, Benjamín, Efraín uan Manasés. Satepan, nochin israelitas mokepkej itech ueyi xolal kampa nemiaj.

2 Ezequías kinxejxeloj tiopixkamej uan levitas ijkon kemej ixyetoya tekitiskej. Yejuan kichichinouiliskiaj Dios tapialmej uan kimaktiliskiaj okseki taman para sentakuaskej iuan.* No kitekitiliskiaj Jehová, kitasojkamatiliskiaj uan kiueyichiuaskiaj itech puertas tein yetoyaj itech patios de ichan Dios. 3 Ezequías kintemakak seki itapialuan para kichichinouiliskej Dios. Kinchichinoskiaj kualkan uan tiotak, itech tonal sábado, keman peuaya selik metsti uan keman iluichiuayaj ijkon kemej ijkuiliujtoya itech iTanauatil Jehová.

4 Ezequías kinnauatij akin nemiaj Jerusalén maj kinmakanij tiopixkamej uan levitas tein ipa ixyetoya kinmakaskej. Kinnauatij nejon porin kinekia maj tiopixkamej uan levitas amo teyi kintsakuiliani para maj kichiuanij tekit tein kinmakakaj ijkon kemej kijtouaya iTanauatil Jehová. 5 Keman israelitas kikakkej nejon, niman kiualkuikej miak trigo uan cebada, miak vino tein yankuixtok kikixtijkaj, miak aceite, miak miel uan okseki taman tein kitokkaj. Yejuan kiualkuikej tein yekinika kisentilijkej uan tein okachi kuali. Sejse israelita kiualkuik tepitsin* de nochi tein kipiaya uan mosentilij tel miak. 6 Uan israelitas akin nemiaj itech uejueyi xolalmej ompa Judá akin katkaj kayomej Israel uan Judá no kiualkuikej seki* kuakuejmej uan ichkamej.* Yejuan no kiualkuikej seki taman tein kimaktilijkaj ininDios Jehová. Miak taman mosentilij. 7 Itech metsti siván* peuak kiualkuij nochi tein kitemakaskiaj uan kitamisentilijkej itech metsti tisri.* 8 Keman Ezequías uan taixyekananij kiitakej nochi tein mosentilijka, kiueyichiujkej Jehová uan kitajtanijkej maj kintatiochiui israelitas akin pouij itech ixolal.

9 Ezequías kintajtanij* tiopixkamej uan levitas de kani kiska nochi tein mosentilijka. 10 Tayekankatiopixkat Azarías akin katka ichankauj Sadoc kiluij: “Desde keman peuak kiualkuij miak taman ichan Jehová nochin kuali takuaj uan ixuij uan miak taman mokauaok, porin Jehová kintatiochiuiani akin pouij itech ixolal uan mokauaniok nochi nejin”.

11 Yejua ika, Ezequías tanauatij maj yakan ichan Jehová maj kichipauatij seki cuartos para ompa kitaliskej tein mosentilijka.* Uan kichiujkej tein Ezequías tanauatij. 12 Kisentokakej kiualkuikej tein israelitas tetayokolijkaj, tepitsin* de nochi tein kitemakakaj uan tein kimaktilijkaj Dios. Kiixtalijkej Conanías maj kiyekpia nochi tein israelitas kitemakakaj uan Simeí kipaleuiaya. Conanías katka levita uan Simeí katka iikniuj Conanías. 13 Tekiuaj Ezequías tanauatij maj seki takamej kinpaleuikan Conanías uan Simeí akin katka iikniuj. Yejuan katkaj Jehiel, Azazías, Náhat, Asahel, Jerimot, Jozabad, Eliel, Ismakías, Máhat uan Benaya. Azarías taixyekanaya ichan toTajtsin Dios. 14 Coré iokichpil Imná akin katka levita kiyekpiaya tein israelitas kitayokoliayaj toTajtsin Dios uan kinxejxelouiliaya tiopixkamej nochi tein kimaktiliayaj Jehová. Yejua tajpiaya itech puerta tein yetoya kampa ualkisa tonaltsin. 15 Coré kinixyekanaya nejin takamej: Edén, Miniamín, Jesúa, Semaya, Amarías uan Secanías. Yejuan katkaj takuaujtamachmej uan kinxejxelouiliayaj ininikniuan tein israelitas kiualkuiaj itech uejueyi xolalmej kampa nemiaj tiopixkamej. Kuali kixejxelouayaj nochi uan amo akin kimakayaj okachi. Kinxejxelouiliayaj por uejueyi familias desde akin okachi ueyi hasta akin okachi piliok. 16 Uan no kinxejxelouiliayaj takual takamej akin mojmostaj ualayaj tekitikij ichan Jehová uan ininkoneuan akin kiajxitijkajya eyi xiuit uan akin kipiayaj okachi. Nejin takamej kichiuayaj tekit tein ixyetoya kichiuaskej ininuejueyi familias. Yejuan uan ininkoneuan ijkuiliujtoyaj kampa nesi akonimej katkaj ininchankauan.

17 Keman kinijkuilojkej tiopixkamej, kiitstiajkej itech katiyejua uejueyi familia pouiaj uan toni tekit ixyetoya kichiuaskej. No ijkon kichiujkej iniuan levitas akin kipiayaj 20 xiujmej uan akin kipanauiayajya. 18 No kinijkuilojkej ininsiuauan, ininokichpipiluan, ininsiuapipiluan uan hasta ininpilkoneuan. Ijkuiliujtoyaj levitas uan nochi ininfamilias porin levitas kichiuayaj tein kinnauatijkaj para kitekitiliskej Dios. 19 No kinijkuilojkej ikoneuan Aarón akin katkaj tiopixkamej akin nemiaj itech xolaltsitsin kalampa den uejueyi xolalmej. Itech nochi uejueyi xolalmej kinixtalijkaj takamej para kinxejxelouiliskej takual tiopixkamej, nochin levitas uan ininchankauan akin kinijkuilojkej.

20 Ezequías kichiuak nochi nejin ompa Judá. Kichiuak tein iDios Jehová kiita ke kuali yetok uan nochipa kitakamatik. 21 Ezequías mochikauak kichiuas miak taman ichan Dios uan kinpaleuij oksekin maj kitakamatikan Tanauatil uan tein Dios tamachtia. Nochi nejon kichiuak* porin kinekia kitekitilis Dios uan yejua kitatiochiuij.

32 Satepan ke Ezequías kichiuak nochi nejin para kinextis ke kitakamatia Dios, Senaquerib akin tekiuajtia Asiria kinteuiko akin nemiaj Judá. Yejua uan isoldados kitalijkej ininkaltsitsin* kalampa den uejueyi xolalmej kampa tatsaktoya ika uejueyi tepamit porin Senaquerib kiixtalijka kalakis uan moinaxkatilis.

2 Keman Ezequías kimatik ke Senaquerib ualaj kinixnamikiko uan kinekia kinteuis akin nemiaj Jerusalén, 3 iniuan tajtoj taixyekananij uan soldados uan kiixtalij kintsakuas ameyalmej tein onkayaj kalampakopa den ueyi xolal. Taixyekananij uan soldados kipaleuijkej. 4 Kinsentilijkej miakej akin ompa nemiaj uan peuak kintsakuaj nochi in ameyalmej uan at tein moojtiaya ompa Jerusalén. Yejuan kijtouayaj: “Amo tiknekij maj akin tekiuajtij Asiria kiajsikan miak at keman ejkoskej nikan”.

5 Ezequías kisentokak chikauak tekitik uan kiyekchijchiuak tepamit tein kiyoualouaya ueyi xolal tein xitinka. No kinchijchiuak uejkapan kalmej itech nejon tepamit. Uan kalampakopa kichijchiuak okse tepamit. Itech ueyi xolal tein iaxka David tayekchijchiuak kampa moixmati kemej Miló,* uan kinchijchiuak miak teposmej tein ika tateuiskiaj uan escudos. 6 Ezequías no kinixtalij seki takamej para kinixyekanaskej akin nemiaj itech ueyi xolal keman tateuiskiaj. Kinsentilij itech plaza tein yetoya kampa se kalakia itech ueyi xolal uan kinyolchikauak.* Yejua kiniluij: 7 “Ximoyolchikauakan uan amo ximouikan. Amo xikmouilikan akin tekiuajti Asiria nion xikinmouilikan akin iuan uitsej, porin okachi miakej akin tejuan techpaleuiaj ke akin yejua kipaleuiaj. 8 Yejua kipaleuiaj takamej,* sayoj ke tejuan techpaleuia toDios Jehová uan yejua kinteuia akin techixnamikij”. Semi kinyolchikauak tein kiniluij Ezequías akin tekiuajtia Judá.

9 Senaquerib akin tekiuajtia Asiria yetoya Lakís iniuan nochin isoldados uan uejueyi chiuanimej akin kipaleuiayaj. Yejua kinualtitanik itakeualuan maj kiitakij Ezequías akin tekiuajtia Judá uan nochin akin kayomej Judá uan nemiaj Jerusalén. Senaquerib tanauatij maj kiniluikan:

10 “Yejua nejin tein kijtoua Senaquerib akin tekiuajti Asiria: ‘¿Akoni iuan nantakuaujtamatij para amo nankisaskej de Jerusalén maski kiyoualojtokej soldados? 11 Ezequías namechkajkayaujtok keman namechiluia “toDios Jehová techmakixtis para maj amo teyi techchiuili akin tekiuajti Asiria”. Nejon amo melauj, ta namikiskej porin amo nankipiaskej tein nankikuaskej uan tein nantayiskej. 12 ¿Xe nankielkaujkejya ke yejua Ezequías tauejueloj kampa nantachijchiujkaj para nankiueyichiuaskej namoDios uan kinxitinij ialtares? ¿Uan ke satepan kiniluij akin nemij Judá uan Jerusalén “Moneki namotankuaketsaskej itech sayoj se altar uan ompa moneki nankinchichinoskej tapialmej”? 13 ¿Xe amo nankimatij tein nouejkaujtatuan uan nejua tikinchiuilijkej akin nemiaj itech okseki altepemej? ¿Xe inindioses uelik kinmakixtijkej para maj amo teyi nikinchiuiliani? 14 Nouejkaujtatuan kinixpolojkej akin nemiaj itech okseki altepemej uan nion se dios tein ompa kiueyichiuaj uelini kinmakixtiani akin ompa nemij para maj amo teyi nikinchiuili. Komo yejuan amo uelkej, ¿xe nankinemiliaj ke namoDios namechmakixtis para maj amo teyi namechchiuili? 15 ¡Amo xikauakan maj Ezequías namechkajkayaua! Amo xikneltokilikan. Nion se dios tein kiueyichiuayaj itech okseki altepemej uelik kinmakixtij akin ompa nemiaj para maj nouejkaujtatuan amo teyi kinchiuilianij, nion kinmakixtijkej para maj nejua amo teyi nikinchiuiliani. Komo yejuan amo uelkej, ¡nion xiknemilikan ke namoDios uelis namechmakixtis para maj amo teyi namechchiuili!’”.

16 Itakeualuan Senaquerib kisentokakej kiuijuikaltijkej* Jehová uan no kiuijuikaltijkej Ezequías akin katka itekitikauj toTajtsin Dios. 17 Senaquerib no kijkuiloj seki amamej kampa kiuijuikaltij Jehová ininDios israelitas uan kijtouilij miak taman tein amo kuali. Yejua kijtoj: “Dioses tein kinueyichiuaj itech okseki altepemej amo kinmakixtijkej akin ompa nemiaj para maj amo teyi nikinchiuili. Uan no ijkon namechpanos, iDios Ezequías amo no kinmakixtis akin pouij itech ixolal para maj amo teyi nikinchiuili”. 18 Seki israelitas akin nemiaj ompa Jerusalén yetoyaj tepankuako. Uan itakeualuan Senaquerib chikauak kintsajtsiliayaj itech inintajtol judíos porin kinekiaj kinmojmoujtiskej para moaxkatiliskej ueyi xolal. 19 Kijijtojkej ininDios akin nemiaj Jerusalén uan no kinijijtojkej dioses tein kinueyichiuayaj itech okseki uejueyi xolalmej, dioses tein kinmachijchiujkaj. 20 Sayoj ke tekiuaj Ezequías uan tanauatijkej* Isaías akin katka iokichpil Amoz kiluijkej Dios akin yetok iluikak tein panotoya uan kitataujtijkej maj kinpaleui.

21 Uan Jehová kititanik se ángel kampa tekiuaj de Asiria uan isoldados kitalijkaj ininkaltsitsin, uan nejon ángel kinmiktij nochin soldados akin kuali tateuiayaj, uejueyi chiuanimej uan taixyekananij. Akin tekiuajtia Asiria semi kipinaujtijkej uan ijkon mokepak kampa kayot. Se tonal keman ompa yetoyaya, yajki templo kiueyichiuato itatadios* uan seki ikoneuan ompa kimiktijkej ika machete tein ojkan tenej.* 22 Jehová ijkon kimakixtij Ezequías uan no kinmakixtij akin nemiaj Jerusalén para maj Senaquerib akin tekiuajtia Asiria amo teyi kinchiuiliani. No kinmakixtij para maj oksekin akin kinixnamikiaj amo teyi kinchiuilianij uan nochin israelitas kualtsin nenkej. 23 Uan miakej ualajkej Jerusalén kitayokolikoj Jehová miak taman. No kiualkuilijkej Ezequías akin tekiuajtia Judá miak taman tein patiyoj. Satepan ke panok nochi nejin, akin nemiaj itech okseki altepemej peuak semi kitakachiuaj* Ezequías.

24 Ijkuak, Ezequías kokolispeuak* uan yaya momikilitia. Yejua ika kitataujtij Jehová uan yejua kinankilij ika se milagro para kimatiltis ke kipajtiskia. 25 Sayoj ke Ezequías amo kitasojkamatik nochi tein Dios kichiujka para kipaleuis. Peuak moueyimati uan yejua ika Dios iuan kualanik. Uan no kualanik iniuan akin nemiaj Judá uan Jerusalén. 26 Ezequías moyolpatak uan amo moueyimatikok uan no ijkon kichiujkej akin nemiaj Jerusalén. Yejua ika Jehová amo kintatsakuiltij keman Ezequías tekiuajtia.

27 Ezequías kipiak miak taman tein patiyoj uan semi miakej kiueyitaliayaj. Uan kinchijchiuak kalmej para ompa kitalis plata, oro, tetsitsin tein patiyoj, aceite tein monotsa bálsamo, escudos uan nochi okseki taman tein patiyoj. 28 No kinchijchiuak kalmej para ompa kisentilis cebada uan trigo, vino tein yankuik uan aceite. No kinchijchiuak cuartos kampa kinkalakiskia itapialuan uan corralmej kampa yetoskiaj iichkauan.* 29 Uan no kinchijchiuak uejueyi xolalmej uan kinsentilij miak kuakuejmej, ichkamej uan chivos, porin Dios kichiuak maj kipia miak taman. 30 Yejua Ezequías akin kitsakuak ameyal tein moixmati kemej Guihon. Nejin ameyal moojtiaya ajkokopa uan kiojtij tanikopa* kampa yetoya ueyi xolal tein iaxka David. Nejin ueyi xolal moajsia kampa pankalaki tonaltsin. Nochi tein Ezequías kiixtalij kichiuas kuali kisak. 31 Uan akin taixyekanayaj Babilonia kinualtitankej seki takamej maj kiitakij Ezequías para kitajtaniskej* katiyejua milagro kichiujka Dios ompa Judá. Sayoj ke toTajtsin Dios kikauak maj iselti taixejeko para kiitaskia toni kichiuaskia uan toni yekmelauj kinemiliaya.

32 Nochi okseki taman tein kipanok Ezequías uan keniuj kinextij ke kitasojtaya Dios ijkuiliujtok kampa ixnesi tein Dios kiitaltij tanauatijkej Isaías akin katka iokichpil Amoz. Tein Dios kiitaltij tanauatijkej Isaías ijkuiliujtok kampa ininka tajtoua nochin akin tekiuajtikej Judá uan itech xolal Israel. 33 Satepan Ezequías momikilij* uan kitokkej kampa takes achto de se ajsis kampa kintokkaj ikoneuan David. Keman momikilij, nochin akin nemiaj Judá uan Jerusalén kichiujkej miak taman para kiueyitaliskej. Uan Manasés akin katka iokichpil Ezequías peuak tekiuajti.

33 Manasés kipiaya 12 xiujmej keman peuak tekiuajti. Nemia Jerusalén uan tekiuajtik 55 xiujmej.

2 Kichiuak tein Jehová amo kiyolpaktia. Kichiuak tein tel amo kuali ijkon kemej kichiuayaj akin nemiaj itech altepemej akin Jehová kintalkuilijka para maj israelitas ompa neminij. 3 Oksepa tachijchiuak kampa kinueyichiuayaj tatadiosmej* kampa tauejuelojka Ezequías akin katka itat. No kinchijchiuak altares para Baal* uan koujmej para taueyichiuaskej.* Motankuaketsak para kiueyichiuas tonaltsin, metsti uan sitalimej. 4 Manasés no kinchijchiuak altares ichan Jehová para tatadiosmej maski Jehová kijtojka: “Itech nejin kali uan itech ueyi xolal Jerusalén kiueyitaliskej notokay nochipaya”. 5 Itech ome patios de ichan Jehová kinchijchiuak altares para kiueyichiuaskej tonaltsin, metsti uan sitalimej. 6 Uan hasta iokichpipiluan kinchichinouilij tatadiosmej itech tal tamanis tein moixmati kemej Hinón.* No mochiuak naual uan adivino, kinixtalij sekin para maj kitemokan kinnojnotsaskej mikemej uan oksekin kinixtalij kemej adivinos. Kichiuak miak taman tein Jehová amo kiyolpaktia para kikualantis.

7 Kichijchiuak se tatadios uan kikalakito ichan toTajtsin Dios, maski Dios kiluijka David uan Salomón akin katka iokichpil: “De nochi in talmej kampa kintaxejxelouilijkej uejueyi kalyetonij israelitas, nikijitak Jerusalén uan nejin kali para maj nochipa nikan kiueyitalikan notokay. 8 Komo israelitas senkis kitakamatij nochi notanauatiluan tein yetok itech Tanauatil tein Moisés kinmatiltij uan tein ompa nikixtalij, amo kemanok nikinkixtis den tal tein nikinmakak ininuejkaujtatuan”. 9 Manasés kisentokak kinyekanak akin nemiaj Judá uan Jerusalén para maj kichiuakan tein tel amo kuali. Kisentokaya kinchiualtiaya israelitas tein okachi fiero ke tein kichiuayaj akin nemiaj itech altepemej tein Jehová kintalkuilijka para maj israelitas ompa neminij.

10 Jehová kiluiaya Manasés uan akin pouiaj itech ixolal maj moyolpatakan, sayoj ke amo takakkej. 11 Yejua ika Jehová kichiuak maj akin tekiuajtia Asiria kintitanini akin kinixyekanayaj isoldados maj kinteuikij. Yejuan kikitskijkej Manasés ika ganchos, kijilpijkej* ika cadenas tein chijchiujtoyaj ika cobre uan kiuikakej Babilonia. 12 Kemej semi tajyouijtoya, kiteltataujtij Jehová ininDios iuejkaujtatuan maj kiikneli uan amo moueyimatikok. 13 Kisentokak kitataujtij Dios uan yejua kiiknelij uan kikakik. Yejua ika kikauak maj oksepa tekiuajti ompa Jerusalén. Uan Manasés kimatik ke Jehová yejua yekmelauj Dios.

14 Satepan Manasés kichijchiuak okse tepamit kalampakopa den ueyi xolal tein iaxka David. Kichijchiuak tanakastan den ameyal tein moixmati kemej Guihon tein yetok itech tal tamanis tein moixmati kemej Cedrón, kampa pankalaki tonaltsin. Tepamit tein kichijchiuak semi uejkapantik katka. Kichijchiuak hasta puerta tein monotsa Pescado. Desde ompa, tepamit kiyoualouaya ueyi xolal uan ajsia hasta Ofel. Uan Manasés kinixtalij takamej para maj kinixyekanakan soldados itech nochi uejueyi xolalmej kampa tatsaktoya ika uejueyi tepamit ompa Judá. 15 Kinajchiuak tatadiosmej tein kinueyichiuayaj itech okseki altepemej uan tatadios tein kitalijka ichan Jehová. No kinajchiuak altares tein kinchijchiujka ompa Jerusalén uan itech tepet kampa yetoya ichan Jehová, uan tanauatij maj kintamotatij kalampakopa den ueyi xolal. 16 Uan no, kiyekchijchiuak ialtar Jehová uan peuak kimaktilia miak taman para iuan takuas.* No kimaktilij tapialmej para kitasojkamatilis Dios uan kiniluij akin nemiaj Judá maj kitekitilikan Jehová ininDios israelitas. 17 Akin nemiaj Judá sayoj kimaktiliayaj Jehová tapialmej uan okseki taman, sayoj ke kichiuayajok kampa tachijchiujkaj para taueyichiuaskej.

18 Nochi okseki taman tein kipanok Manasés, tein kiluij Dios keman kitataujtij uan tein kiluijkej tanauatianij* akin kintitanik Jehová ininDios israelitas, ijkuiliujtok kampa ininka tajtoua akin tekiuajtikej itech xolal Israel. 19 Uan tanauatianij no kijkuilojkej tein Manasés kiluij Dios keman kitataujtij, uan keniuj Dios kichiuak tein kitajtanij. No kijkuilojkej nochi tein amo kuali tein kichiuak uan keniuj kiixnamikik Dios. Kijkuilojkej kani kintachijchiuijka tatadiosmej para kinueyichiuaskej, kani kinketska koujmej tein ika taueyichiuayaj uan kani yetoyaj tatadiosmej tein kinchijchiujka. Nochi nejon kichijchiujka keman moueyimatia uan achto ke moyolpataskia. 20 Manasés momikilij* uan kitokkej tanakastan de ichan, uan Amón akin katka iokichpil Manasés peuak tekiuajti.

21 Amón kipiaya 22 xiujmej keman peuak tekiuajti. Nemia Jerusalén uan tekiuajtik ome xiuit. 22 Kichiuaya tein Jehová amo kiyolpaktia ijkon kemej kichiujka Manasés akin katka itat. Amón kinueyichiuaya nochi in tatadiosmej tein Manasés kinchijchiujka uan kinmaktiliaya tapialmej uan okseki taman. 23 Sayoj ke Amón amo kichiuak kemej Manasés akin katka itat. Manasés moyolpatak para maj Jehová kiikneliani uan amo moueyimatikok, sayoj ke Amón okachi tajtakolchiuak. 24 Satepan itakeualuan kiixnamikkej uan kimiktijkej ichan. 25 Sayoj ke akin nemiaj Judá kinmiktijkej nochin akin kiixnamikkaj tekiuaj Amón uan kiixtalijkej maj peua tekiuajti Josías akin katka iokichpil Amón.

34 Josías kipiaya chikueyi xiuit keman peuak tekiuajti. Nemia Jerusalén uan tekiuajtik 31 xiujmej. 2 Kichiuak tein Jehová kiyolpaktia ijkon kemej kichiujka David akin katka iuejkaujtat. Josías kitakamatik itanauatiluan Dios.

3 Uan keman chikueyi xiuitya tekiuajtitoya, keman okichpilok katka, peuak kitekitilia iDios David akin katka iuejkaujtat. Keman 12 xiujmejya tekiuajtitoya peuak kiajchiua de Judá uan Jerusalén tein amo kuali. Tauejueloj kampa tachijchiujkaj para taueyichiuaskej, kinajchiuak koujmej tein ika taueyichiuayaj* uan tatadiosmej.* 4 Uan no, iixpan Josías kinuejuelojkej nochin altares tein kichijchiuilijkaj Baal* uan kinxitinij altares kampa tapopochuiayaj tein yetoyaj tapani de nejon altares. No kintejtekik koujmej tein ika taueyichiuayaj uan kintatapatsak tatadiosmej. Kixaxamatsak nochi hasta kikauak kemej talnex uan kixinij kampa kintokkaj akin achto ompa kinueyichiuayaj tatadiosmej uan kinmaktiliayaj miak taman. 5 Uan kichichinoj ininomiyouan tiopixkamej itech altares kampa yejuan taueyichiuayaj. Ijkon kiajchiuak tein amo kuali de Judá uan Jerusalén.

6 Josías no yajka itech uejueyi xolalmej kampa kintaxejxelouilijkaj ikoneuan Manasés, Efraín, Simeón, hasta uejueyi xolalmej kampa kintaxejxelouilijkaj ikoneuan Neftalí uan tajtanakastan de nejin uejueyi xolalmej kampa tauejueliujtoya. 7 Itech nejon uejueyi xolalmej kinuejueloj altares, kintejtekik koujmej tein ika taueyichiuayaj uan kintatapatsak tatadiosmej. Kixaxamatsak nochi hasta kikauak kemej talnex. No kinuejueloj nochin altares kampa tapopochuiayaj tein kinchijchiujkaj itech nochi xolalmej de Israel. Satepan mokepak Jerusalén.

8 Josías kiajchiuak tein amo kuali de nochi in altepet uan den templo.* Satepan, keman 18 xiujmejya tekiuajtitoya kintitanik seki takamej maj kiyekchijchiuatij ichan iDios Jehová. Kititanik Safán iokichpil Azalías, Maaseya akin taixyekanaya itech ueyi xolal uan Joá iokichpil Joacaz akin kijkuilouaya nochi tein mochiuaya itech altepet. 9 Nejin takamej kiitatoj tayekankatiopixkat Hilquías uan kimakakej tomin tein israelitas kiualkuikaj ichan Dios, tein kisentilijkaj levitas akin tajpiayaj puertajtenoj. Nejon tomin kitemakakaj akin pouiaj iniuan ikoneuan Manasés, Efraín uan oksekin akin nemiaj Israel. No kitemakakaj akin pouiaj iniuan ikoneuan Judá, Benjamín uan akin nemiaj Jerusalén. 10 Nejon tomin kinmakakej akin kiixyekanayaj tekit tein mochiujtoya ichan Jehová uan yejuan kinmakakej akin tekititoyaj. Tekitinij kikuikej para kiyekchijchiuaskej ichan Jehová. 11 Akin kiixyekanayaj tekit no kinmakakej tomin akin tamachijchiuayaj uan kalchiuanij para kikouaskej tet tein kitejtekkajya uan kouit para puntalmej. No kikuiskiaj nejon tomin para kiixpataskej vigas den kalmej tein kikaujkaj maj uejueliuikan akin tekiuajtikaj Judá.

12 Nochin tekitinij kuali kichiujkej tekit tein kinmakakaj. Levitas akin kinixtalijkaj maj kinixyekanakan nejin tekitinij katkaj Jáhat, Abdías, Zacarías uan Mesulam. Jáhat uan Abdías katkaj ikoneuan Merarí uan Zacarías uan Mesulam katkaj ikoneuan Cohat. Uan levitas akin kuali tatsotsonayaj 13 kinixyekanayaj takamej akin tamamayaj* uan no kinixyekanayaj nochin akin kichiuayaj tataman tekit. Uan seki levitas katkaj tajkuilouanij, sekin katkaj taixyekananij uan oksekin tajpiayaj puertajtenoj.

14 Keman kikixtijtoyaj tomin tein israelitas kiualkuikaj ichan Jehová, tiopixkat Hilquías kiajsik amatajkuilol kampa ijkuiliujtoya iTanauatil Jehová tein Moisés kinmatiltijka israelitas. 15 Uan Hilquías kiluij tajkuilojkej Safán: “Nikajsik ichan Jehová amatajkuilol kampa ijkuiliujtok iTanauatil”. Uan Hilquías kimakak Safán nejon amatajkuilol. 16 Safán kiuikilij tekiuaj nejon amatajkuilol uan kiluij: “Motekitikauan kichiujtokej nochi tein kinnauatijkej. 17 Kisentilijkej* tomin tein kiualkuikej ichan Jehová uan kinmakakej akin kiixyekanaj tekit uan tekitinij”. 18 Tajkuilojkej Safán no kiluij tekiuaj: “Tiopixkat Hilquías nechmakak se amatajkuilol”. Uan Safán peuak kilerouilia tekiuaj.

19 Keman tekiuaj Josías kikakik tein kijtouaya iTanauatil Dios, kitsayanak itasal. 20 Uan tekiuaj tajtoj iuan Hilquías, Ahicam iokichpil Safán, Abdón iokichpil Miqueas, tajkuilojkej Safán uan Asaya akin kitekitiliaya tekiuaj, uan kinnauatij maj kichiuakan nejin: 21 “Xiakan xiktajtanitij Jehová toni kijtosneki tein ijkuiliujtok itech nejin amatajkuilol tein kiajsikej. Ijkon tikmatiskej toni nechpanos uan toni kinpanos akin mokauaj Israel uan Judá. Jehová semi kualantok touan uan techtatsakuiltiti porin touejkaujtatuan amo kitakamatkej tein Jehová kijtoua. Yejuan amo kichiujkej nochi tein kijtoua nejin amatajkuilol”.

22 Yejua ika Hilquías uan nochin akin tekiuaj kintitanka yajkej kiitatoj tanauatijkej* Huldá. Yejua chanchiuaya kampa yankuixtok kinketskaj kalmej ompa Jerusalén uan ompa kinojnotskej. Itakatsin Huldá katka Salum akin kiyekpiaya inintasal tiopixkamej.* Itat Salum katka Ticvá uan itat Ticvá katka Harhás. 23 Huldá kiniluij: “Yejua nejin tein kijtoua Jehová, ininDios israelitas: ‘Xikiluitij takat akin namechualtitanik: 24 “Yejua nejin tein kijtoua Jehová: ‘Nikintatsakuiltiti nochin akin nikan nemij uan nikixpoloti nejin ueyi xolal. Nikinchiuiliti nochi tein amo kuali tein ijkuiliujtok itech amatajkuilol tein kilerouilijkej akin tekiuajti Judá. 25 Akin nikan nemij amo nechueyichiuajok, ta kinchichinouiliaj tatadiosmej miak tapialmej uan kichiuaj okseki taman tein amo kuali para nechkualantiskej. Yejua ika nikualantikisas iniuan ijkon kemej tit* xotatikisa uan amo teyi kiseuia’”. 26 Sayoj ke xikiluikan akin tekiuajti Judá akin namechualtitanik xinechtajtanikij toni kijtoua Jehová: “Yejua nejin tein kijtoua Jehová, ininDios israelitas: ‘Tejua tikakik tein mitslerouilijkej, 27 fiero tikmatik uan timoyolyemanij noixpan. Tikchiuak nejin keman tikakik tein kipanos nejin ueyi xolal uan tein kinpanos akin nikan nemij. Uan kemej timoyolyemanij noixpan, tiktsayanak motasal uan tichokak noixpan, nejua moDios nimitskakik. Yejua tein nejua Jehová nikijtoua. 28 Yejua ika nikauas ximiki* uan mitstokaskej keman nochin kualtsin nentoskej. Uan amo tikitas keman nikintatsakuiltis nochin akin nikan nemij uan keman nikixpolos nejin ueyi xolal’”’”.

Takamej yajkej kiluitoj tekiuaj tein kijtojka tanauatijkej Huldá. 29 Yejua ika tekiuaj Josías tanauatij maj mosentilikan taixyekananij de Judá uan Jerusalén. 30 Satepan tekiuaj pankisak ichan Jehová uan iuan yajkej nochin takamej de Judá, akin nemiaj Jerusalén, tiopixkamej uan levitas. Yajkej nochin desde konemej hasta akin uejueykejya. Keman ompa yetoyajya, tekiuaj kinlerouilij amatajkuilol tein kiajsikej ichan Jehová kampa ijkuiliujtoya tein israelitas motenkaujkaj iuan Dios. 31 Tekiuaj moketsak ininixpan uan motenkauak* iuan Jehová ke kitekitiliskia Jehová uan ke senkis* kitakamatiskia tein tanauatia uan tein tamachtia. Motenkauak ke kichiuaskia tein kijtouaya amatajkuilol kampa ijkuiliujtoya tein israelitas motenkaujkaj iuan Dios ke kichiuaskiaj. 32 Uan no, kiniluij akin yetoyaj Jerusalén uan akin pouiaj iniuan ikoneuan Benjamín maj motenkauanij ke yejuan no kitakamatiskiaj itanauatil Dios. Uan akin nemiaj Jerusalén peuak kitakamatij amatajkuilol kampa ijkuiliujtoya tein ininuejkaujtatuan motenkaujkaj iuan Dios. 33 Uan Josías kinajchiuak nochin tatadiosmej tein Dios kitajyaltiaj tein yetoyaj itech talmej kampa nemiaj israelitas. Uan kinpaleuij nochin israelitas para maj kitekitilikan ininDios Jehová. Keman Josías yoltoya, yejuan kisentokakej kiueyichiujkej Jehová ininDios ininuejkaujtatuan.

35 Itech tonal 14 den metsti nisán,* Josías kichiuak Pascua ompa Jerusalén para kiueyichiuaskej Jehová. Ijkuak, kinmiktijkej tapialmej tein kintemaktijkaj para Pascua. 2 Kinnauatij tiopixkamej maj kichiuakan tekit tein ipa ixyetoya kichiuaskej uan kinyolchikauak maj kuali kichiuakan tekit tein kipiayaj ichan Jehová. 3 Uan kiniluij levitas akin Jehová moinxelouilijka akin kinmachtiayaj nochin israelitas: “Xikalakikan tatiochiualkaxon* itech kali tein kichijchiuak Salomón akin tekiuajtia itech xolal Israel akin katka iokichpil David. Amo monekiok nankimamaskej namoajkolko. Axkan xiktekitilikan namoDios Jehová uan xikinpaleuikan israelitas akin pouij itech ixolal. 4 Uan xikchiuakan tein moneki por uejueyi familias para nankichiuaskej tekit tein nankipiaj, ijkon kemej kijkuiloj David akin tekiuajtik itech xolal Israel uan Salomón akin katka iokichpil. 5 Ximotejtekpanakan por uejueyi familias itech patio para uelis nankinpaleuiskej nochin okseki israelitas. Levitas moneki xejxeliujtoskej por uejueyi familias, uan se ueyi familia de levitas moneki kipaleuis se ueyi familia de israelitas. 6 Xikinmiktikan tapialmej tein kintemaktiaj para Pascua, ximochipauakan uan xikchiuakan tein kinpaleuis namoparientes. Ijkon nankitakamatiskej tein Jehová kiluij Moisés maj namechnauati xikchiuakan”.

7 Josías kintemakak itapialuan para kintemaktiskej itech Pascua. Kinmakak ichkamej* uan chivos nochin akin mosentilijkaj, katkaj 30 mil tapialmej uan eyi mil kuakuejmej. 8 Taixyekananij akin kipaleuiayaj Josías no kitemakakej tapialmej. Kinmajmakakej tiopixkamej, levitas uan nochin akin mosentilijkaj para kimaktiliskej Dios. Hilquías, Zacarías uan Jehiel akin taixyekanayaj ichan toTajtsin Dios kinmakakej tiopixkamej 2,600 ichkamej para kintemaktiskej itech Pascua uan 300 kuakuejmej. 9 Conanías, Semaya, Netanel, Hasabías, Jeiel uan Jozabad akin kinixyekanayaj levitas kinmakakej levitas makuil mil ichkamej para kintemaktiskej itech Pascua uan 500 kuakuejmej. Semaya uan Netanel katkaj iikniuan Conanías.

10 Nochi yetoyaya para kichiuaskej Pascua. Tiopixkamej moketskej kampa ipa moketsayaj uan levitas moketskej por familias kemej ixyetoya tekitiskej. Kichiujkej ijkon kemej tanauatijka tekiuaj. 11 Kinmiktijkej tapialmej tein kintemaktijkej para Pascua. Keman levitas kinxipeujtoyaj* ichkamej, no kinpanoltilijtiayaj tiopixkamej ininesyo ichkamej uan yejuan kipijpisuiayaj itech altar. 12 Satepan no kinchiuilijkej tapialmej tein ipa kinchiuiliayaj para kichichinouiliskej Dios uan kinmajmakakej akin kinixyekanayaj uejueyi familias para kimaktiliskej Jehová ijkon kemej ijkuiliujtok itech amatajkuilol tein kijkuiloj Moisés. Uan no ijkon kinchiujkej kuakuejmej. 13 Ichkamej tein kintemaktijkej itech Pascua kinyokxitijkej* itech tit* kemej ixyetoya kichiuaskej. Uan okseki taman tein kimaktilijkaj Dios kimankej itech sartenes uan itech konmej tein uejueykej uan tsikitsitsin. Satepan nimantsin kinuikilijkej akin kinixyekanayaj uejueyi familias. 14 Satepan levitas kichijchiujkej ichkatsin tein kitemaktiaj itech Pascua para kikuaskej yejuan uan tiopixkamej. Ijkon kichiujkej porin tiopixkamej akin katkaj ikoneuan Aarón kisentokayaj kichichinouilijtoyaj Dios tapialmej hasta keman tayouak, uan no kichichinouilijtoyaj Dios ininmantecayo tapialmej. Yejua ika Levitas takualchiujkej para takuaskej yejuan uan tiopixkamej akin katkaj ikoneuan Aarón.

15 Uan ikoneuan Asaf akin cantarouayaj ijkatoyaj kampa ipa ixyetoya moketsaskej ijkon kemej tanauatijka David, Asaf, Hemán uan Jedutún. Jedutún kimatiltiaya tekiuaj tein Dios kiitaltiaya. Uan akin tajpiayaj puertajtenoj yetoyaj itech puertas kampa tajpiayaj. Yejuan amo monekik kikauaskej tekit tein kipiayaj porin okseki levitas akin katkaj ininparientes kintakualchiuijkej para kikuaskej Pascua. 16 Itech nejon tonal kitamichiujkej nochi tein Jehová tajtania para uelis kichiuaskej Pascua uan para kichichinouiliskej Jehová tapialmej itech ialtar. Kichiujkej ijkon kemej tanauatij tekiuaj Josías.

17 Ijkuak, israelitas akin mosentilijkaj kichiujkej Pascua uan iluit keman kikuayaj pantsin tein amo kipia levadura chikome tonal. 18 Desde keman nemia tanauatijkej* Samuel, israelitas amo kichiujtoyaj se Pascua kemej tein kichiujkej ijkuak. Uan nion semej akin achto tekiuajtikej itech xolal Israel kichiujkej se Pascua kemej tein kichiujkej Josías, tiopixkamej, levitas, akin nemiaj Jerusalén uan nochin akin katkaj de Judá uan Israel akin ompa mosentilijkaj. 19 Nejin Pascua kichiujkej keman Josías 18 xiujmejya tekiuajtitoya.

20 Satepan, keman Josías kiyekchijchiuak templo,* Nekó akin tekiuajtia Egipto pankisak para kinteuis akin nemiaj Carquemis. Nejin ueyi xolal yetok tanakastan den ueyiat Éufrates. Uan Josías yajki kiixnamikito Nekó. 21 Yejua ika Nekó kintitanik seki takamej maj kiluitij: “Tejua akin titekiuajti Judá, ¿keyej tinechixnamikiki? Amo tejua nimitsteuiki, ta niouj nikinteuiti akin nemij itech okse altepet uan Dios kijtoua ke moneki nimoijsiuilis. Yejua ika nimitsyekiluia amo xikixnamiki Dios akin nechpaleuijtok porin yejua mitsixpolos komo tikixnamiki”. 22 Sayoj ke Josías amo kinekik mokepas, ta motalilij okse itasal para maj amo kiixmatikan uan yajki kiteuito Nekó. Josías amo kikakik tein Dios kimatiltij Nekó maj kilui, ta yajki kiteuito itech tal tamanis* tein moixmati kemej Meguidó.

23 Akin kitamotayaj flechas kimotkej tekiuaj Josías, yejua ika Josías kiniluij isoldados: “Xinechkixtikan de nikan porin nechkokojkej”. 24 Uan isoldados kitemoltijkej de icarro tein kikuia keman tateuiaya, kitejkoltijkej itech okse carro uan kiualkuikej Jerusalén. Ijkon momikilij Josías uan kitokkej kampa kintokkaj iuejkaujtatuan. Nochin akin nemiaj Judá uan Jerusalén motayokoltijkej uan kichokilijkej Josías. 25 Jeremías kichijchiuilij se canción Josías porin momikilij, uan hasta axkan nochin takamej uan siuamej akin cantarouaj keman aksa* momikilia, kisentokaj ika tajtouaj Josías. Kiixtalijkej maj cantarokan nejin canciones ompa Israel uan ijkuiliujtok kampa ijkuiliujtokej okseki canciones tein cantarouaj keman aksa momikilia.

26 Nochi okseki taman tein kipanok Josías, nochi tein kichiuak para senkis* kitakamatis tein ijkuiliujtok itech iTanauatil Jehová, 27 uan nochi okseki taman tein kichiuak keman tekiuajtik, ijkuiliujtok itech amatajkuilol kampa ininka tajtoua nochin akin tekiuajtikej itech xolal Israel uan Judá.

36 Akin nemiaj Judá kiixtalijkej maj Jehoacaz kiixpata Josías akin katka itat uan maj yejua peua tekiuajti. Kiixtalijkej kemej tekiuaj ompa Jerusalén. 2 Jehoacaz kipiaya 23 xiujmej keman peuak tekiuajti. Nemia Jerusalén uan tekiuajtik eyi metsti. 3 Sayoj ke akin tekiuajtia Egipto kikuilij tekit tein kipiaya kemej tekiuaj ompa Jerusalén uan kintajtanij nochin akin nemiaj Judá 3,420 kilos* de plata uan 34 kilos* de oro. 4 Uan no, akin tekiuajtia Egipto kiixtalij Eliaquim iikniuj Jehoacaz maj tekiuajti ompa Judá uan Jerusalén. Nekó kipatilij itokay Eliaquim uan kitokaytij Jehoiaquim, uan kiuikak Jehoacaz ompa Egipto.

5 Jehoiaquim kipiaya 25 xiujmej keman peuak tekiuajti. Nemia Jerusalén uan tekiuajtik 11 xiujmej. Yejua kichiuaya tein iDios Jehová amo kiyolpaktia. 6 Nabucodonosor akin tekiuajtia Babilonia pankisak para kikitskis Jehoiaquim uan kiilpis* ika cadenas de cobre. Satepan kiuikak Babilonia. 7 Uan Nabucodonosor no kiuikak seki tapalkamej uan okseki taman tein yetoyaj ichan Jehová uan kintalij ichan ompa Babilonia. 8 Nochi okseki taman tein kipanok Jehoiaquim, tein pitsotik tein kichiuak uan nochi tein amo kuali tein kimatilijkej, ijkuiliujtok itech amatajkuilol kampa ininka tajtoua nochin akin tekiuajtikej itech xolal Israel uan Judá. Joaquín akin katka iokichpil Jehoiaquim peuak tekiuajti.

9 Joaquín kipiaya 18 xiujmej keman peuak tekiuajti. Nemia Jerusalén uan tekiuajtik eyi metsti uan majtakti tonalmej. Yejua kichiuaya tein Jehová amo kiyolpaktia. 10 Keman peujtiaya xiuit,* tekiuaj Nabucodonosor tanauatij maj kiuikakan Joaquín ompa Babilonia. No tanauatij maj kiuikilikan miak taman tein patiyoj tein yetoya ichan Jehová. Uan no kiixtalij Sedequías maj tekiuajti ompa Judá uan Jerusalén. Sedequías katka itío Joaquín.

11 Sedequías kipiaya 21 xiujmej keman peuak tekiuajti. Nemia Jerusalén uan tekiuajtik 11 xiujmej. 12 Sedequías kichiuaya tein iDios Jehová amo kiyolpaktia. Amo moyolpatak keman Jehová kititanik tanauatijkej* Jeremías maj kinejmachtiti. 13 No kiixnamikik tekiuaj Nabucodonosor akin kiluijka maj motenkaua itokaykopa Dios ke kitakamatiskia. Sedequías amo takakik uan amo kinekik kitakamatis Jehová ininDios israelitas. 14 Nochin akin kinixyekanayaj tiopixkamej uan akin nemiaj Judá tel amo kitakamatkej Dios, porin kichiuayaj tein Dios kitajyaltia ijkon kemej kichiuayaj akin nemiaj itech okseki altepemej. No kipitsotilijkej ichan Jehová tein moxelouilijka ompa Jerusalén para kiueyichiuaskej.

15 Jehová ininDios ininuejkaujtatuan kisentokaya kintitania itekitikauan para maj kinnejmachtikan. Miakpa kinnejmachtij akin pouiaj itech ixolal porin kinikneliaya uan amo kinekia maj kiixpolokan ichan. 16 Sayoj ke yejuan kinkejkelouayaj akin toTajtsin Dios kintitania maj kinnejmachtitij. Nion tepitsin kinekkej kikakiskej tein Dios kinnejmachtiaya uan kinkejkelojkej itanauatijkauan, yejua ika Jehová tel kualanik iniuan uan amo uelikok kinpaleuij.

17 Uan Dios kititanik akin kinixyekanaya caldeos maj kinteuiti akin pouiaj itech ixolal, uan yejua kinmiktij telpochmej kampa yetoya ichan Dios. Kinmiktij ika machete tein ojkan tenej* uan amo kiniknelij telpochmej nion ichpochmej, akin xiuejkejya nion akin mokokouayaj. Dios kipaleuij akin kinixyekanaya caldeos para maj moaxkatili nochi. 18 Nochi tapalkamej uan okseki taman tein yetoyaj ichan Dios, tein uejueykej uan tein tsikitsitsin kinuikak Babilonia. No kiuikak nochi tein patiyoj tein onkaya ichan Jehová uan nochi tein patiyoj tein kipiaya tekiuaj uan uejueyi chiuanimej. 19 Kitikuiltij ichan toTajtsin Dios, kixitinij tepamit tein kiyoualouaya Jerusalén, kintikuiltij uejkapan kalmej kampa kuali tatsaktoya uan kiixpoloj nochi tein patiyoj. 20 Uan akin amo kinmiktij ika machete tein ojkan tenej kinuikak Babilonia. Yejuan peuak kitekitiliaj akin kinixyekanaya caldeos uan ikoneuan hasta keman akin tekiuajtiaj Persia moaxkatilijkej Babilonia uan peuak tekiuajtij ompa. 21 Ijkon mochiuak tein Jehová kiluijka Jeremías maj kitematilti. Amo akin nemik ompa hasta keman tal moixseuij nochi tein monekiskia para ijkon kikepas nochi sábados tein israelitas amo kikaujkaj maj moixseui. Uan ijkon yetoya hasta keman tal moixseuij 70 xiujmej.

22 Itech yekinika xiuit* keman tekiuajtitoya Ciro akin taixyekanaya Persia, Jehová kichiuak maj kiixtali se taman uan maj motematilti noyan* kampa taixyekanaya. Ijkon mochiuaskia tein Jehová kinauatijka Jeremías maj kitematilti. Tein Ciro* kiixtalij no moamatalij uan kijtouaya nejin: 23 “Yejua nejin tein kijtoua Ciro akin tekiuajti Persia: ‘Jehová, Dios akin taixyekana ne iluikak, nechinmaktilij nochin altepemej kampa taixyekanaj okseki tekiuanij. Uan nechnauatij maj nikchijchiuili se kali ompa Jerusalén tein yetok Judá. Nochin akin nankitekitiliaj uan nanpouij itech ixolal, xipankisakan Jerusalén uan maj namoDios Jehová namechpaleui’”.