ESDRAS

1 Itech yekinika xiuit* keman tekiuajtitoya Ciro akin taixyekanaya Persia, Jehová kichiuak maj kiixtaliani se taman uan maj motematiltiani noyan* kampa taixyekanaya. Ijkon mochiuaskia tein Jehová kinauatijka Jeremías maj kitematilti. Tein Ciro* kiixtalij no moamatalij uan kijtouaya:

2 “Yejua nejin tein kijtoua Ciro akin tekiuajti Persia: ‘Jehová, Dios akin taixyekana ne iluikak, nechinmaktilij nochin altepemej kampa taixyekanaj okseki tekiuanij. Uan nechnauatij maj nikchijchiuili se kali ompa Jerusalén tein yetok Judá. 3 Nochin akin nankitekitiliaj uan nanpouij itech ixolal, xipankisakan Jerusalén tein yetok Judá uan maj namoDios namechpaleui. Xiakan xikyekchijchiuatij ichan Jehová ininDios israelitas. Sayoj yejua yekmelauj Dios uan ichan yetoya ompa Jerusalén.* 4 Nochin judíos akin chanchiujtokej itech okse altepet uan kinekij mokepaskej Jerusalén, maj ininvecinos kinmakakan oro, plata, tapialmej uan okseki taman para kinpaleuiskej. Uan no maj kinmakakan tein kinekij kitetayokoliskej para ichan toTajtsin Dios tein yetoya Jerusalén’”.

5 Uan tiopixkamej, levitas uan takamej akin kinixyekanayaj uejueyi familias akin pouij iniuan ikoneuan Judá uan Benjamín kichiujkej nochi tein monekia para pankisaskej uan kiyekchijchiuaskej ichan Jehová tein yetoya Jerusalén. Yejuan kiixtalijkej nejon porin Dios kichiujka maj kinemilianij ijkon kichiuaskej. 6 Uan ininvecinos kinmakakej miak taman tein chijchiujtoya ika oro uan plata para kinpaleuiskej. No kinmakakej tapialmej, okseki taman tein kipiayaj tein patiyoj uan nochi tein kimaktiliskiaj Dios.

7 Uan no, tekiuaj Ciro tanauatij maj kikepakan ichan Jehová tapalkamej uan okseki taman tein Nabucodonosor kikixtijka de Jerusalén uan kitalijka kampa kiueyichiuaya idios. 8 Ciro akin tekiuajtia Persia kinauatij Mitrídates maj kikixtiani nochi tapalkamej uan okseki taman, maj kijkuilouani kanachi katka uan maj kimakani Sesbazar* akin taixyekanaya Judá. Mitrídates kiyekpiaya nochi tein patiyoj tein katka iaxka tekiuaj.

9 Yejua nejin tein kijkuiloj: 30 tapalkamej de oro tein chijchiujtoyaj kemej chikiujmej, mil tapalkamej de plata tein chijchiujtoyaj kemej chikiujmej uan okseki 29 tapalkamej. 10 No kijkuilojkej 30 kaxit de oro tein tsikitsitsin, 410 kaxit de plata tein tsikitsitsin uan okseki mil tapalkamej. 11 Katkaj 5,400 tapalkamej de oro uan de plata. Sesbazar kiuikak nochi nejin keman judíos akin kinuikakaj Babilonia mokepkej Jerusalén.

2 Yejuan nejin judíos akin kiskej de Babilonia kampa tekiuaj Nabucodonosor* kinuikaka. Keman mokepkej Judá, mokaltalitoj Jerusalén uan okseki uejueyi xolalmej kampa achto nemiaj ininuejkaujtatuan. 2 Akin kinixyekanayaj nejin judíos katkaj Zorobabel, Jesúa, Nehemías, Seraya, Reelaya, Mardoqueo, Bilsán, Mispar, Bigvái, Rehúm uan Baaná.

Nikan ixnesi kanachi takamej israelitas katkaj: 3 de ikoneuan Parós katkaj 2,172; 4 de ikoneuan Sefatías katkaj 372; 5 de ikoneuan Ará katkaj 775; 6 de ikoneuan Jesúa uan Joab katkaj 2,812 (Jesúa uan Joab katkaj ikoneuan Pahat-Moab); 7 de ikoneuan Elam katkaj 1,254; 8 de ikoneuan Zatú katkaj 945; 9 de ikoneuan Zacái katkaj 760; 10 de ikoneuan Baní katkaj 642; 11 de ikoneuan Bebái katkaj 623; 12 de ikoneuan Azgad katkaj 1,222; 13 de ikoneuan Adonicam katkaj 666; 14 de ikoneuan Bigvái katkaj 2,056; 15 de ikoneuan Adín katkaj 454; 16 de ikoneuan Ater akin pouia iniuan ichankauan Ezequías katkaj 98; 17 de ikoneuan Bezái katkaj 323; 18 de ikoneuan Jorá katkaj 112; 19 de ikoneuan Hasum katkaj 223; 20 de ikoneuan Guibar katkaj 95; 21 takamej de Belén katkaj 123; 22 takamej de Netofá katkaj 56; 23 takamej de Anatot katkaj 128; 24 de ikoneuan Azmávet katkaj 42; 25 takamej de Quiryat-Jearim, Kefirá uan Beerot katkaj 743; 26 takamej de Ramá uan Gueba katkaj 621; 27 takamej de Micmás katkaj 122; 28 takamej de Betel uan Hai katkaj 223; 29 de ikoneuan Nebo katkaj 52; 30 de ikoneuan Magbís katkaj 156; 31 de ikoneuan takat akin no monotsa Elam katkaj 1,254; 32 de ikoneuan Harim katkaj 320; 33 de ikoneuan Lod, Hadid uan Onó katkaj 725; 34 takamej de Jericó katkaj 345, 35 uan de ikoneuan Senaá katkaj 3,630.

36 De ikoneuan Jedayá mokepkej 973 tiopixkamej. Yejuan no katkaj ichankauan Jesúa. 37 De ikoneuan Imer katkaj 1,052 tiopixkamej; 38 de ikoneuan Pasjur katkaj 1,247 tiopixkamej 39 uan de ikoneuan Harim katkaj 1,017 tiopixkamej.

40 De ikoneuan Jesúa uan Cadmiel mokepkej 74 levitas. Yejuan no katkaj ikoneuan Hodavías. 41 De ikoneuan Asaf akin cantarouayaj katkaj 128. 42 Yejuan nejin levitas akin tajpiayaj puertajtenoj:* ikoneuan Salum, ikoneuan Ater, ikoneuan Talmón, ikoneuan Acub, ikoneuan Hatitá uan ikoneuan Sobái. Yejuan katkaj 139.

43 Yejuan nejin akin tekitiaj templo* akin mokepkej: ikoneuan Ziha, ikoneuan Hasufá, ikoneuan Tabaot, 44 ikoneuan Querós, ikoneuan Siahá, ikoneuan Padón, 45 ikoneuan Lebaná, ikoneuan Hagabá, ikoneuan Acub, 46 ikoneuan Hagab, ikoneuan Salmái, ikoneuan Hanán, 47 ikoneuan Guidel, ikoneuan Gahar, ikoneuan Reayá, 48 ikoneuan Rezín, ikoneuan Necodá, ikoneuan Gazam, 49 ikoneuan Uzá, ikoneuan Paséah, ikoneuan Besái, 50 ikoneuan Asná, ikoneuan Meunim, ikoneuan Nefusim, 51 ikoneuan Bacbuc, ikoneuan Hacufá, ikoneuan Harhur, 52 ikoneuan Bazlut, ikoneuan Mehidá, ikoneuan Harsá, 53 ikoneuan Barcos, ikoneuan Sísara, ikoneuan Témah, 54 ikoneuan Nezías uan ikoneuan Hatifá.

55 Sekin akin mokepkej katkaj ininkoneuan akin kitekitiliayaj Salomón. Yejuan katkaj: ikoneuan Sotái, ikoneuan Soféret, ikoneuan Perudá, 56 ikoneuan Jaalá, ikoneuan Darcón, ikoneuan Guidel, 57 ikoneuan Sefatías, ikoneuan Hatil, ikoneuan Pokéret-Hazebaim uan ikoneuan Amí.

58 Nochin akin tekitiaj templo* uan ininkoneuan akin kitekitiliayaj Salomón katkaj 392.

59 Akin pankiskaj de Tel-Mélah, Tel-Harsá, Kerub, Adón uan Imer amo uelik kinextijkej ke yejuan nion ininueyi familia katkaj israelitas. Akin pankiskaj katkaj: 60 ikoneuan Delayá, ikoneuan Tobías uan ikoneuan Necodá. Yejuan katkaj 652. 61 Uan ininkoneuan tiopixkamej akin no pankiskej katkaj: ikoneuan Habaya, ikoneuan Hacoz uan ikoneuan Barzilái. Barzilái monamiktij iuan semej isiuapipiluan Barzilái akin galaadita uan peuak kiixmatij kemej motokaytiaya imontat. 62 Yejuan kitemojkej itokay de ininueyi familia kampa ijkuiliujtokej nochin uejueyi familias sayoj ke amo kiajsikej, yejua ika amo kinkaujkej maj tekitikan kemej tiopixkamej. 63 Taixyekankej* kiniluij maj amo kikuakan nion teyi tein kimaktilijkaj Dios, hasta maj ualani se tiopixkat akin ueliskia kikuis Urim uan Tumim* para kitajtanis* Dios ox yekmelauj katkaj tiopixkamej.

64 Nochin akin mokepkej katkaj 42,360. 65 No mokepkej 7,337 takamej uan siuamej akin katkaj takeualmej uan 200 takamej uan siuamej akin cantarouayaj. 66 Kinuikakej 736 caballos, 245 mulas, 67 435 camellos uan 6,720 burros.

68 Keman ajsikej Jerusalén kampa achto yetoya ichan Jehová, sekin akin kinixyekanayaj uejueyi familias kitetayokolijkej miak taman para kiyekchijchiuaskej ichan toTajtsin Dios kampa ipa yetoya. 69 Yejuan kitemakakej tein uelkej para maj mochijchiua ichan Dios. Uan mosentilij 512 kilos* de oro, 2,850 kilos* de plata uan 100 ueyak tasal tein kikuij tiopixkamej. 70 Uan tiopixkamej, levitas, akin cantarouayaj, akin tajpiayaj puertajtenoj, akin tekitiaj templo* uan nochin okseki israelitas mokaltalitoj itech uejueyi xolalmej kampa achto nemiaj ininuejkaujtatuan. Nochin okseki israelitas no mokaltalitoj itech ininueyi xolal.

3 Itech metsti tisri* israelitas yetoyajya itech uejueyi xolalmej kampa achto nemiaj ininuejkaujtatuan. Itech nejon metsti nochin sekosan mosentilijkej ompa Jerusalén. 2 Jesúa uan okseki tiopixkamej, Zorobabel uan okseki judíos peuak kiyekchijchiuaj ialtar ininDios israelitas para ompa kichichinouiliskej tapialmej uan okseki taman. Ijkon kitakamatiskiaj tein ijkuiliujtok itech Tanauatil tein Dios kimakaka Moisés akin kitekitiliaya toTajtsin Dios. Itat Jesúa monotsaya Jehozadac uan itat Zorobabel monotsaya Sealtiel.

3 Uan kichijchiujkej altar kampa achto ipa yetoya maski kinmouiliayaj akin nemiaj itech xolalmej tein ompaka yetoyaj. Keman kitamichijchiujkej altar, peuak ompa kichichinouiliaj Jehová miak taman. Kualkan uan tiotak kichichinouiliayaj tein ixyetoya kimaktiliskej. 4 Uan kichiujkej iluit tein kichiuaj itech sakakaltsitsin ijkon kemej ijkuiliujtok itech Tanauatil. Uan mojmostaj kichichinouilijkej Dios tapialmej tein ixyetoya kimaktiliskej itech nejon iluit. 5 Desde ijkuak kisentokakej kichichinouilijkej Jehová tapialmej tein ixyetoya kimaktiliskej sejse tonal, tein ixyetoya kimaktiliskej porin peuaya selik metsti uan tein ixyetoya kimaktiliskej itech iluimej tein Jehová tanauatiaya maj kichiuakan. No kichichinouilijkej tein nochin kimaktilijkej porin ijkon kinekiaj kichiuaskej. 6 Desde yekinika tonal den metsti tisri* peuak kichichinouiliaj Jehová tapialmej, maski ayamo kitsineualtiayaj ichan Jehová.

7 Uan kintaxtauijkej takamej akin kitapanayaj tet uan akin tamachijchiuayaj. Uan no kinmakakej sidonios uan tirios tein kikuaskej, tein tayiskej uan aceite. Kinmakakej nochi nejon para maj yanij Líbano kikuitij cedrojkouit uan maj kiuikanij itech mar hasta Jope, ijkon kemej kiixtalijka Ciro akin tekiuajtia Persia.

8 Itech metsti iyar,* ome xiuit satepan ke mokepkej Jerusalén kampa yetoya ichan toTajtsin Dios, Zorobabel uan Jesúa peuak tekitij iniuan okseki judíos, tiopixkamej, levitas uan nochin akin mokepkaj Jerusalén keman kiskej de Babilonia kampa kinuikakaj. Nejin takamej kinnauatijkej levitas akin kipiayaj 20 xiujmej uan akin kipanauiayajya maj kiixyekananij tekit tein mochiujtoya ichan Jehová. Itat Zorobabel monotsaya Sealtiel uan itat Jesúa monotsaya Jehozadac. 9 Yejua ika Jesúa, ikoneuan uan ininparientes, Cadmiel uan ikoneuan peuak sentekitij para kinixyekanaskej akin tekititoyaj ichan toTajtsin Dios. Nochin yejuan katkaj ikoneuan Judá. Uan no kinpaleuijkej para taixyekanaskej ichankauan Henadad, ininkoneuan uan ininparientes akin no katkaj levitas.

10 Keman tekitinij kitsineualtijkej ichan Jehová, tiopixkamej aktoyaj inintasal tein kikuiaj kemej tiopixkamej uan no maaktoyaj trompetas. Uan levitas akin katkaj ikoneuan Asaf maaktoyaj címbalos.* Yejuan moketskej para kiueyichiuaskej Jehová ijkon kemej tanauatijka David akin tekiuajtia itech xolal Israel. 11 Uan peuak kiueyichiuaj uan kitasojkamatiliaj Jehová. Keman cantarouayaj, moixpapatatiayaj uan kijtouayaj nejin: “Porin yolkuali. Yejua nochipa kintasojtas israelitas”. Satepan nochin israelitas motenchikaujkej uan peuak kiueyichiuaj Jehová porin kitamitsineualtijkajya ichan Jehová. 12 Miakej tiopixkamej, levitas uan akin kinixyekanayaj uejueyi familias semi xiuejkejya katkaj uan kiitakaj keniuj chijchiujtoya kali tein achto yetoya, yejua ika peuak tel chokaj keman kiitakej ke kitsineualtijtoyaj yankuik kali. Sayoj ke oksekin chikauak ajkotsajtsiaj porin semi yolpakiaj. 13 Yejua ika amo momatia ox chikauak tsajtsiaj porin chokayaj oso porin yolpakiaj. Kemej semi chikauak tsajtsiaj, tel uejka mokakia.

4 Akin kintauelitayaj uejueyi kalyetonij de Judá uan Benjamín kitekakilijkej ke akin mokepkej de Babilonia kichijchiuilijtoyaj se kali Jehová ininDios israelitas. 2 Yejua ika niman kiitatoj Zorobabel uan akin kinixyekanayaj uejueyi familias uan kiniluijkej: “Xitechkauakan maj namouan titekitikan. Tejuan no tikueyichiuaj* namoDios uan tikmaktilianij miak taman desde keman Esar-Hadón tekiuajtia Asiria. Yejua techualkuik nikan”. 3 Sayoj ke Zorobabel, Jesúa uan oksekin akin kinixyekanayaj uejueyi familias israelitas kinnankilijkej: “Namejuan amo touan nankichijchiuaskej ichan toDios. Sayoj tejuan tikchijchiuiliskej ichan toDios Jehová* ijkon kemej technauatij Ciro akin tekiuajti Persia”.

4 Satepan, akin ompaka nemiaj kiniluiayaj judíos miak taman tein amo kinyolchikauaya. Kitemouayaj kinmojmoujtiskej para maj amo kisentokanijok kiyekchijchiuanij kali. 5 Uan kintaxtauijkej uejueyi chiuanimej akin kiyolmajxitiayaj tekiuaj para kitemoskej maj judíos amo kisentokanijok tekitinij. Peuak kichiuaj nejon desde keman Ciro tekiuajtitoya Persia uan kisentokakej hasta keman Darío no tekiuajtik Persia. 6 Keman Asuero peuak tekiuajti, akin kinixnamikiaj israelitas kijkuilouilijkej tekiuaj se amat kampa kinteluiliayaj akin nemiaj Judá uan Jerusalén. 7 Uan keman Artajerjes tekiuajtitoya Persia, takamej Bislam, Mitrídates, Tabeel uan akin tekitiaj iuan Tabeel kijkuilouilijkej se amat tekiuaj Artajerjes. Yejuan kitajtolkepkej nejon amat itech tajtol arameo uan kijkuilojkej kemej tajkuilouaj arameos.*

8 * Ueyichiujkej* Rehúm akin kitekitiliaya tekiuaj uan tajkuilojkej Simsái kititanilijkej se amat tekiuaj Artajerjes kampa kinteluiliayaj akin nemiaj Jerusalén. 9 (Akin tapaleuijkej maj moijkuilo nejon amat katkaj ueyichiujkej Rehúm, tajkuilojkej Simsái, jueces, okseki taixyekananij, tajkuilouanij, akin nemiaj Erec, akin nemiaj Babilonia uan akin nemiaj Susa akin no kinixmatiaj kemej elamitas. Nochin yejuan tekitiaj iuan Simsái. 10 No tapaleuijkej maj moijkuilo akin nemiaj itech okseki xolalmej akin Asnapar kinkixtij de kampa nemiaj uan kinuikak maj chanchiuatij itech uejueyi xolalmej de Samaria. Tekiuaj Asnapar semi kitakachiuayaj* uan semi kiixmatiaj. No tapaleuijkej maj moijkuilo akin nemiaj itech talmej tein yetokej nepaka den ueyiat Éufrates kampa pankalaki tonaltsin). 11 Amat tein kititanilijkej kijtouaya nejin:

“Tekiuaj Artajerjes, motakeualuan akin tinemij nikampa den ueyiat Éufrates kampa pankalaki tonaltsin timitstitaniliaj nejin amat: 12 Totekiuaj, timitsmatiltiaj ke judíos akin ualeujkej de kampa tejua tinemi, ualpankiskej kampa tejuan tinemij. Ejkokejya Jerusalén uan kiyekchijchiujtokej ueyi xolal. Matantokejya ueyi tepamit tein kiyoualoua ueyi xolal uan kiyekchijchiujtokej cimientos. Sayoj ke akin ompa nemij taixnamikij uan tel amo yolkualmej. 13 No timitsmatiltiaj totekiuaj ke komo kiyekchijchiuaj ueyi xolal uan kitamichijchiuaj tepamit tein kiyoualoua, amo kiixtauaskej nion se impuesto. Nejin kichiuas maj amo mosentiliok miak tomin tein kinamiki kinmakaskej tekiuanij. 14 Totaxtauil* ualeujtok de mochan uan amo kinamiki maj tikauakan maj tekiuaj kipano tein amo kuali. Yejua ika timitstitanilijkej nejin amat para timitsmatiltiskej. 15 Uan no para timitstajtaniskej maj kitemokan toni kichiuanij judíos itech amatajkuilol kampa ijkuiliujtok tein kipanokej akin tekiuajtikej achto ke tejua. Ompa tikitas ke akin nemij itech nejon ueyi xolal nochipa taixnamikinij, kintakuejmolchiuilianij tekiuanij uan takuejmolchiuanij itech okseki altepemej. No tikitas ke uejkaujya ipa takuejmolchiuaj itech ininueyi xolal, yejua ika kinixpolojkej. 16 Totekiuaj, timitsmatiltiaj ke komo yejuan kiyekchijchiuaj ueyi xolal uan kitamichijchiuaj tepamit tein kiyoualoua, amo titaixyekanasok itech talmej tein yetokej nikampa den ueyiat Éufrates kampa pankalaki tonaltsin”.

17 Tekiuaj kitajkuilouilij ueyichiujkej Rehúm akin kitekitiliaya tekiuaj, tajkuilojkej Simsái, akin nemiaj Samaria akin iniuan tekitiaj Rehúm uan Simsái uan akin nemiaj nepaka den ueyiat Éufrates kampa pankalaki tonaltsin. Tekiuaj kinnankilij:

“¡Namechontajpaloua! 18 Kuali nechlerouilijkej* amat tein nantechualtitanilijkej. 19 Nikinnauatij notakeualuan maj kitemokan toni kichiuanij judíos kampa ijkuiliujtok tein kipanokej akin tekiuajtikej achto ke nejua, uan tikitakej ke akin nemij itech nejon ueyi xolal desde uejkaujya kinixnamikinij tekiuanij, uan miakpaya takuejmolchiuanij itech ininueyi xolal. 20 Ompa Jerusalén tekiuajtikej uejueyi chiuanimej. Yejuan taixyekanayaj itech nochi in talmej tein yetokej nepaka den ueyiat Éufrates kampa pankalaki tonaltsin uan tajtaniaj maj kinixtauilikan tataman impuestos. 21 Yejua ika xikinnauatikan nejon takamej maj amo tekitikanok uan maj amo kiyekchijchiuakanok ueyi xolal hasta keman nejua nitanauatis. 22 Xikyekitakan maj mochiua tein nitanauatijtok para maj nejon takamej amo takuejmolchiuakanok kampa nitaixyekana”.

23 Satepan ke kinlerouilijkej amat tein kititanik tekiuaj Artajerjes, Rehúm, tajkuilojkej Simsái uan akin iniuan tekitiaj niman yajkej Jerusalén uan kinchikaujkauijkej judíos maj amo tekitinijok. 24 Ijkuak motsakuilij tekit uan amo kiyekchijchiujkejok ichan Dios tein yetoya Jerusalén uan ijkon kisentokak hasta keman Darío ome xiuitya tekiuajtitoya Persia.

5 Tanauatianij* Ageo uan Zacarías kinmatiltijkej judíos akin nemiaj Judá uan Jerusalén tein Dios kijtouaya. Zacarías katka iixuiuj Idó. Yejuan kinnojnotskej itokaykopa ininDios israelitas akin kinixyekantoya. 2 Yejua ika Zorobabel iokichpil Sealtiel uan Jesúa iokichpil Jehozadac oksepa peuak kiyekchijchiuaj ichan Dios tein yetoya Jerusalén. Uan itanauatijkauan Dios iniuan yetoyaj uan kinyolchikaujtoyaj. 3 Ijkuak, Tatenái, Setar-Bozenái uan akin iniuan tekitiaj yajkej Jerusalén kinitatoj judíos uan kintajtanijkej:* “¿Akoni namechnauatij xikchijchiuakan nejin kali uan xiktamiltikan nejin tekit?”.* Tatenái taixyekanaya itech talmej tein yetokej nepaka den ueyiat Éufrates kampa pankalaki tonaltsin. 4 No kintajtanijkej: “¿Keniuj monotsaj takamej akin kiixyekantokej nejin tekit?”. 5 Sayoj ke Tatenái uan okseki takamej kinkaujkej maj kisentokakan tekitikan porin Dios kinpaleuijtoya* akin kinixyekanayaj judíos. Tatenái uan okseki takamej achto kinekiaj kitajkuilouiliskej Darío para kimatiltiskej tein panotoya uan mochiaskej hasta maj tekiuaj kinnankiliani.

6 Tatenái taixyekanaya itech talmej tein yetokej nepaka den ueyiat Éufrates kampa pankalaki tonaltsin uan Setar-Bozenái uan oksekin akin iuan tekitiaj Tatenái no taixyekanayaj ompa. Yejua nejin amat tein kijkuilouilijkej tekiuaj Darío. 7 Amat tein kititanilijkej kijtouaya:

“Timitsontajkuilouiliaj tekiuaj Darío uan timitsontajpalouaj:

8 ”Timitsmatiltiaj ke tiajkaj Judá tikitatoj ichan Dios akin semi ueyi. Tikitakej ke kiyekchijchiujtokej ika uejueyi tet uan itech tepamit kitajtalijtiouij kouit. Ijsiujka matamitij porin nochin akin ompa nemij semi tapaleuijtokej uan moijsiuilijtokej. 9 Yejua ika tikintajtanijkej akin kinixyekanaj: ‘¿Akoni namechnauatij xikchijchiuakan nejin kali uan xiktamiltikan nejin tekit?’.* 10 No tikintajtanijkej keniuj monotsaj para tikinijkuiloskej uan timitsmatiltiskej akonimej kiixyekanaj tekit.

11 ”Yejuan technankilijkej: ‘Tiktekitiliaj Dios akin taixyekana ne iluikak uan nikan taltikpak. Tikyekchijchiujtokej kali tein ne uejkauj kichijchiujka se takat ueyichiujkej akin tekiuajtik itech xolal Israel. 12 Sayoj ke totatuan kikualantijkej Dios akin taixyekana ne iluikak. Yejua ika kikauak maj Nabucodonosor akin tekiuajtia Babilonia kinteuiani uan maj kintanini. Nejon tekiuaj akin katka caldeo kiixpoloj nejin kali uan akin nikan nemiaj kinuikak Babilonia. 13 Sayoj ke keman Ciro akin tekiuajtia Babilonia se xiuitya taixyekantoya, tanauatij maj kiyekchijchiuakan ichan Dios. 14 Uan no, tekiuaj Ciro tanauatij maj kinkixtianij tapalkamej de oro uan plata tein yetoyaj itech templo ompa Babilonia, uan kimakakej se takat akin monotsaya Sesbazar* akin Ciro kiixtalijka maj taixyekana. Nejon tapalkamej Nabucodonosor kinkixtijka de ichan Dios ompa Jerusalén uan kinuikak Babilonia uan kintalij itech templo tein ompa yetok. 15 Ciro kiluij Sesbazar: “Xikui nejin tapalkamej uan xikinuika ichan Dios tein yetok ompa Jerusalén, uan maj kiyekchijchiuakan ichan Dios kampa achto yetoya”. 16 Keman Sesbazar ejkok Jerusalén, kitsineualtij ichan Dios. Uan desde ijkuak peuak tikyekchijchiuaj nejin kali sayoj ke ayamo timatamij’.

17 ”Yejua ika, komo tejuatsin tikita ke kuali yetok, timitstajtaniaj xikintitani seki takamej maj yakan kampa tekiuaj kintalia amamej uan miak taman tein patiyoj ompa Babilonia, para maj kiitakan ox yekmelauj yetok amat kampa ixnesi ke tekiuaj Ciro tanauatij maj kiyekchijchiuakan ichan Dios tein yetok Jerusalén. No timitstajtaniaj xitechmatilti tein tikixtalis”.

6 Yejua ika tekiuaj Darío tanauatij maj kitemotij nejon amat kampa tekiuaj kintalia amamej uan miak taman tein patiyoj ompa Babilonia. 2 Uan kiajsikej se amatajkuilol* itech ueyi xolal Ecbátana tein poui Media kampa kuali tatsaktoya. Uan amatajkuilol kijtouaya nejin:

3 “Itech yekinika xiuit keman tekiuajtitoya Ciro, tekiuaj Ciro tanauatij maj kichiuakan nejin ompa Jerusalén kampa yetoya ichan Dios: ‘Maj judíos kiyekchijchiuakan kali para ompa uelis kimaktiliskej Dios miak taman uan maj kitsineualtikan kali. Kali kipias 27 metros de uejkapan uan 27 metros de patauak.* 4 Kitaliliskej eyi hilera de uejueyi tet uan se hilera de kouit. Tekit moixtauas ika tomin tein iaxka tekiuaj. 5 Uan no, maj kikepakan tapalkamej de oro uan plata tein Nabucodonosor kinkixtij de ichan Dios ompa Jerusalén uan kinualkuik Babilonia. Moneki kinuikaskej Jerusalén uan kintaliskej ichan Dios kampa achto yetoyaj’”.

6 “Yejua ika, tejua Tatenái akin titaixyekana itech talmej tein yetokej nepaka den ueyiat Éufrates kampa pankalaki tonaltsin uan tejua Setar-Bozenái uan akin namouan tekitij akin no ompa taixyekanaj, nejua Darío namechnauatia amo xikinkuejmolokan akin tekititokej. 7 Amo xiktsakuilikan tekit tein mochiujtok ichan Dios. Akin kinixyekana judíos uan okseki taixyekananij kiyekchijchiuaskej ichan Dios kampa achto yetoya. 8 Uan no namechnauatia xikinpaleuikan akin kinixyekanaj judíos maj kiyekchijchiuakan ichan Dios. Xikchiuakan nejin: xikuikan tomin tein iaxka tekiuaj tein mosentilij den impuesto tein kitemakakej akin nemij nepaka den ueyiat Éufrates kampa pankalaki tonaltsin, uan nejon tomin xikinmakakan takamej para maj kisentokakan tekitikan. 9 Uan mojmostaj xikinmakakan tiopixkamej akin yetokej Jerusalén nochi tein namechtajtaniskej. Xikinmakakan nochi tein monekis: kuakuejmej tein yekin moskaltijtokej, ichkaueuetkej* uan ichkamej para kichichinouiliskej Dios akin yetok iluikak. No xikinmakakan trigo, istat, vino uan aceite. 10 Ijkon yejuan nochipa uelis kimaktiliskej Dios akin yetok iluikak miak taman tein kiyolpaktis. Uan no uelis kitataujtiskej Dios maj nejua uan nookichpipiluan nochipa tipaktokan. 11 No nitanauatia ke komo aksa* amo kitakamati tein nikixtalijtok, moneki kiejkeuaskej se ueyi kouit de ichan, kiketsaskej uan ompa kisojsoskej akin taixnamikik. Uan ichan moneki kikuiskej kemej baño* por tein kichiuak. 12 Uan komo se tekiuaj oso akin nemij itech se xolal amo kitakamatij nejin tanauatil uan kinekij kiixpoloskej ichan Dios tein yetok Jerusalén, maj Dios akin kiixtalij maj ompa kiueyitalikan itokay kinixpolo. Nejua Darío nitanauatia maj ijkon mochiua. Niman xikchiuakan”.

13 Yejua ika Tatenái, Setar-Bozenái uan akin iniuan tekitiaj niman kichiujkej tein tanauatij tekiuaj Darío. Tatenái taixyekanaya itech talmej tein yetokej nepaka den ueyiat Éufrates kampa pankalaki tonaltsin. 14 Akin kinixyekanayaj judíos kisentokakej tekitikej uan uejka kichiujkej kali* porin tanauatijkej* Ageo uan Zacarías kinyolchikauayaj. Zacarías katka iixuiuj Idó. Uan kitamichijchiujkej kali ijkon kemej ininDios israelitas tanauatijka, uan kemej tanauatijkaj Ciro, Darío uan Artajerjes akin tekiuajtia Persia. 15 Kitamichijchiujkej kali itech tonal eyi den metsti adar,* keman Darío chikuasen xiuitya tekiuajtitoya.

16 Uan israelitas, tiopixkamej, levitas uan nochin oksekin akin mokepkej de Babilonia iluichiujkej keman kimaktilijkej Dios kali tein kichijchiuilijkaj uan semi yolpakiaj. 17 Keman kimaktilijkej Dios kali tein kichijchiujkaj kinmiktijkej 100 kuakuejmej, 200 ichkaueuetkej uan 400 ichkamej. Uan no kimaktilijkej Dios 12 chivos para maj kintapojpolui israelitas porin tajtakolejkej. Kimaktilijkej 12 chivos porin katkaj 12 uejueyi kalyetonij israelitas. 18 Uan kinixtalijkej tiopixkamej uan levitas maj kitekitilikan Dios ompa Jerusalén ijkon kemej achto kinxejxelojkaj. Kichiujkej ijkon kemej ijkuiliujtoya itech amatajkuilol tein kichijchiujka Moisés.

19 Akin mokepkej de Babilonia kichiujkej Pascua itech tonal 14 metsti nisán.* 20 Nochin tiopixkamej uan levitas mochipaujkaj para kitekitiliskej Dios. Yejua ika kimiktijkej ichkatsin tein kimiktiayaj itech Pascua para kitemoskej maj Dios kinpaleui nochin akin mokepkaj de Babilonia uan para maj kinpaleui okseki tiopixkamej uan yejuan. 21 Satepan, israelitas akin mokepkaj de Babilonia kikuajkej ichkatsin tein kimaktilijkaj Dios. Kikuajkej iniuan oksekin akin amo kichiuayajok tein pitsotik kemej kichiuayaj akin nemiaj itech xolalmej tein yetoyaj itech nejon talmej. Amo kichiuayajok tein pitsotik porin kinekiaj kiueyichiuaskej* Jehová ininDios israelitas. 22 Uan no kichiujkej iluit keman kikuayaj pantsin tein amo kipia levadura. Iluichiujkej chikome tonal, porin Jehová kichiujka maj semi yolpakikan uan kichiujka maj tekiuaj de Asiria kinpaleuiani keman kichijchiujtoyaj ichan toTajtsin Dios, akin ininDios israelitas.

7 Panok tiempo uan Esdras* akin yetoya Babilonia mokepak Jerusalén keman Artajerjes tekiuajtitoya Persia. Esdras katka iokichpil Seraya, itat Seraya katka Azarías, itat Azarías katka Hilquías, 2 itat Hilquías katka Salum, itat Salum katka Sadoc, itat Sadoc katka Ahitub, 3 itat Ahitub katka Amarías, itat Amarías katka Azarías, itat Azarías katka Merayot, 4 itat Merayot katka Zerahías, itat Zerahías katka Uzí, itat Uzí katka Buquí, 5 itat Buquí katka Abisúa, itat Abisúa katka Finehás, itat Finehás katka Eleazar uan itat Eleazar katka tayekankatiopixkat Aarón. 6 Esdras kisak de Babilonia uan pankisak Jerusalén. Yejua kimaijkuilouaya itajtol Dios uan kuali kiixmatia Tanauatil tein Jehová ininDios israelitas kimakaka Moisés. Kemej iDios Jehová kipaleuijtoya, tekiuaj kimakak nochi tein kitajtanij.

7 Keman tekiuaj Artajerjes chikome xiuitya tekiuajtitoya, seki israelitas pankiskej Jerusalén iuan Esdras. No iniuan pankiskej seki tiopixkamej, seki levitas, sekin akin cantarouayaj, sekin akin tekitiaj templo* uan sekin akin tajpiayaj puertajtenoj. 8 Esdras ajsik Jerusalén itech metsti ab* keman tekiuaj chikome xiuitya tekiuajtitoya. 9 Kisak de Babilonia yekinika tonal den metsti nisán* uan ajsik Jerusalén yekinika tonal den metsti ab,* porin iDios akin yolkuali kipaleuijtoya. 10 Esdras kiixtalijkaya* momachtis iTanauatil Jehová, kichiuas tein ompa kijtoua uan kinmachtis israelitas tein Dios tanauatia uan tein kiixtalia.

11 Tekiuaj Artajerjes kimakak Esdras se amat. Esdras katka tiopixkat uan kimaijkuilouaya tein Jehová kinmachtiaya israelitas uan tein kinnauatiaya maj kichiuakan. Amat kijtouaya nejin:

12 * “Nejua tekiuaj Artajerjes akin nikinixyekana nochin tekiuanij, nimitstajkuilouilia tejua tiopixkat Esdras akin tikmaijkuiloua iTanauatil Dios akin taixyekana ne iluikak: Nimitstajpaloua. 13 Nikixtalijya ke nochin israelitas akin kinekiskej uan nemij kampa nitaixyekana uelis yaskej mouan Jerusalén. No uelis yaskej tiopixkamej uan levitas komo ijkon kinekij. 14 Porin nejua uan chikome takamej akin nechyolmajxitiaj timitstitanij xikitati ox akin nemij Judá uan Jerusalén kitakamattokej iTanauatil Dios tein momako yetok. 15 No xikuika plata uan oro tein tekiuaj uan nejon takamej kinekij kitayokoliskej ininDios israelitas akin nemi Jerusalén. 16 No xikuika plata uan oro tein mitsmakaskej nochin akin nemij* Babilonia uan xolaltsitsin tein ompa pouij. Uan no xikuika nochi tein israelitas uan tiopixkamej kinekiskej kitemakaskej para ichan ininDios tein yetok Jerusalén. 17 Ika nejon tomin moneki niman tikouas kuakuejmej, ichkaueuetkej,* ichkamej, xinach uan vino tein iuan nankitemaktiaj. Nochi nejin moneki tiktemakas itech altar tein yetok ichan moDios ompa Jerusalén.

18 ”Tejua uan okseki tiopixkamej xikitakan keniuj nankikuiskej plata uan oro tein mokauas. Xikuikan ijkon kemej namoDios kineki. 19 Uan no, xikmaktili Dios ompa Jerusalén nochi tapalkamej tein mitsmakaskej, tein kikuiskej ichan moDios para kitekitiliskej. 20 Uan nochi okseki taman tein monekis tiktemakas para ichan moDios, xikixtaua ika tomin tein yetok kampa kisentiliaj nochi tein patiyoj tein iaxka tekiuaj.

21 ”Nejua tekiuaj Artajerjes nikinnauatijya nochin akin kisentiliaj tein patiyoj tein nikpia uan yetokej nepaka den ueyiat Éufrates kampa pankalaki tonaltsin, maj niman kimakakan tiopixkat Esdras nochi tein tajtanis. (Esdras kimaijkuiloua iTanauatil Dios akin taixyekana ne iluikak). 22 Uelis kimakaskej hasta 3,420 kilos* de plata, 17 mil kilos* de trigo, 2,200 litros* de vino uan 2,200 litros* de aceite uan nochi istat tein tajtanis. 23 Nochi tein Dios akin taixyekana ne iluikak tanauatis maj mochiua ichan, maj nochi kuali mochiua. Nejon tapaleuis maj Dios akin taixyekana ne iluikak amo kualani nouan, iniuan akin nikinixyekana nion iniuan nookichpipiluan. 24 Uan no namechnauatia ke amo moneki nankintajtaniskej maj kiixtauakan nion se impuesto tiopixkamej, levitas, tatsotsonanij, akin tekitij templo,* akin tajpiaj puertajtenoj uan nochin oksekin akin ompa tekitij.

25 ”Uan tejua Esdras, kemej Dios mitspaleuiani xitamatkej, nimitsnauatia xikinixtali uejueyi chiuanimej uan jueces para kinixyekanaskej nochin akin nemij nepaka den ueyiat Éufrates kampa pankalaki tonaltsin, nochin akin kiixmatij tein moDios tanauatia. Uan moneki nankimachtiskej akin amo kiixmati tein Dios tanauatia. 26 Uan akin amo kitakamatis tein moDios tanauatia uan tein tekiuaj tanauatia, moneki niman kimiktiskej, kiuikaskej okseko, kitaxtaualtiskej oso kitsakuaskej”.

27 ¡Maj tikueyitalikan Jehová ininDios touejkaujtatuan, akin kichiuak maj tekiuaj kineki kikualtsintilis ichan Jehová tein yetok Jerusalén! 28 Kemej Dios semi nechtasojta, kichiuak maj tekiuaj nechpaleui uan maj no nechpaleuikan akin kiyolmajxitiaj uan uejueyi chiuanimej akin iuan tekitij. Yejua ika nimoyolchikauak porin noDios Jehová nechpaleuijtoya uan nikinsentilij seki taixyekananij israelitas para maj nouan pankisanij Jerusalén.

8 Keman Artajerjes tekiuajtitoya, seki takamej akin kinixyekanayaj uejueyi familias uan okseki takamej nouan kiskej de Babilonia uan tipankiskej Jerusalén. Inintokay ixnesi kampa ijkuiliujtok akonimej katkaj ininchankauan. Yejua nejin inintokay takamej akin kinixyekanayaj uejueyi familias: 2 de ikoneuan Finehás pankisak Guersom; de ikoneuan Itamar pankisak Daniel; de ikoneuan David pankisak Hatús; 3 de ikoneuan Secanías akin pouia iniuan ikoneuan Parós pankisak Zacarías uan no iuan pankiskej 150 takamej. Yejuan no ixnesiaj kampa ijkuiliujtokej akonimej katkaj ininchankauan. 4 De ikoneuan Pahat-Moab pankisak Elieho-Enái iokichpil Zerahías uan no iuan pankiskej 200 takamej; 5 de ikoneuan Zatú pankisak Secanías iokichpil Jahaziel uan no iuan pankiskej 300 takamej; 6 de ikoneuan Adín pankisak Ébed iokichpil Jonatán uan no iuan pankiskej 50 takamej; 7 de ikoneuan Elam pankisak Jesayá iokichpil Atalía uan no iuan pankiskej 70 takamej; 8 de ikoneuan Sefatías pankisak Zebadías iokichpil Miguel uan no iuan pankiskej 80 takamej; 9 de ikoneuan Joab pankisak Abdías iokichpil Jehiel uan no iuan pankiskej 218 takamej; 10 de ikoneuan Baní pankisak Selomit iokichpil Josifías uan no iuan pankiskej 160 takamej; 11 de ikoneuan Bebái pankisak Zacarías iokichpil Bebái uan no iuan pankiskej 28 takamej; 12 de ikoneuan Azgad pankisak Johanán iokichpil Hacatán uan no iuan pankiskej 110 takamej. 13 De ikoneuan Adonicam mokaujkajok eyi takamej. Yejuan katkaj Elifélet, Jeiel uan Semaya. Yejuan nouan pankiskej uan no pankiskej 60 takamej. 14 Uan de ikoneuan Bigvái pankiskej Utái uan Zabbud uan no iniuan pankiskej 70 takamej.

15 Nikinsentilij atentenoj den ueyiat tein ajsi Ahavá. Ompa tikintalijkej tokaltsitsin* uan timokaujkej eyi tonal. Sayoj ke keman nitachiato kampa yetoyaj nochin takamej uan tiopixkamej amo nikajsik nion se levita, 16 yejua ika nikinnotsak seki takamej akin taixyekanayaj. Yejuan katkaj Eliezer, Ariel, Semaya, Elnatán, Jarib, Elnatán, Natán, Zacarías uan Mesulam. No nikinnotsak Joiarib uan Elnatán akin tamachtiayaj. 17 Uan nikinnauatij maj kiitatij Idó akin taixyekanaya kampa motanotsa Casifía. Nikiniluij maj kiluianij Idó uan akin iuan tekitiaj* akin yetoyaj Casifía maj techinualkuilianij takamej para tekitiskej ichan toDios. Ininuejkaujtatuan Idó uan iikniuan tekitikaj templo.* 18 Kemej Dios akin yolkuali techpaleuijtoya, kiualkuikej Serebías, iokichpipiluan uan iikniuan. Yejuan katkaj 18 takamej. Serebías katka se takat tamatkej akin pouia iniuan ichankauan Mahlí. Iueyitat Mahlí katka Leví iokichpil Israel. 19 No kiualkuikej Hasabías uan Jesayá, ininikniuan uan ininokichpipiluan. Yejuan pouiaj iniuan ichankauan Merarí. Katkaj 20 takamej. 20 Uan yejuan kinualkuikej 220 takamej akin tekitiaj templo.* Inintokay nejon takamej ixnesi kampa ijkuiliujtokej akonimej katkaj ininchankauan. Yejuan katkaj ininkoneuan takamej akin kinixtalijkaj maj kinpaleuikan levitas. Nejin takamej kinixtalijkaj David uan taixyekananij.

21 Keman tietoyaj tanakastan den ueyiat Ahavá, nitanauatij maj amo akin takua para tiknextiliskej Dios ke tiknekiaj maj techpaleui. Uan no para tiktajtaniskej maj techixyekana keman tiojtokaskiaj hasta Jerusalén uan para maj kinyekpiani tokoneuan uan nochi tein tikuikayaj. 22 Nipinauak niktajtanis tekiuaj maj touan kintitanini soldados uan soldados akin yayaj itech caballos para maj amo teyi techchiuilianij akin techixnamikiaj. Amo niktajtanij porin nikiluijka: “ToDios akin yolkuali kinpaleuia akin kitemouaj, sayoj ke tel kualani iniuan akin kikauaj”. 23 Yejua ika amo titakuajkej uan tiktajtanijkej toDios maj techyekpia uan toDios techkakik.

24 Uan nikinijitak 12 takamej akin kinixyekanayaj tiopixkamej: Serebías uan Hasabías iniuan majtakti ininparientes. 25 Uan ininixtenoj niktamachiuak plata, oro, tapalkamej uan okseki taman. Nochi nejon kitetayokolijkaj tekiuaj, akin kiyolmajxitiayaj, uejueyi chiuanimej uan nochin israelitas para ichan toDios. 26 Satepan ke niktamachiuak nikinmakak 22,230 kilos* de plata, 100 tapalkamej uan okseki taman de plata tein etik katka 68 kilos uan tajko,* 3,420 kilos* de oro, 27 20 kaxit tsikitsitsin de oro tein ipatiuj katka mil dáricos* uan ome tapalkamej tein chijchiujtoyaj ika tel kuali cobre tein milinia. Nejin tapalkamej katkaj semi patiyojkej kemej oro.

28 Uan nikiniluij: “Jehová namechxelojya namejuan uan yejua iaxka tapalkamej uan okseki taman. Plata uan oro kitetayokolijkej para tikmaktiliskej Jehová, ininDios namouejkaujtatuan. 29 Kuali xikyekpiakan hasta keman nanajsiskej Jerusalén. Uan moneki nankitamachiuaskej itech cuartos tein kipia* ichan Jehová ininixpan akin kinixyekanaj tiopixkamej uan levitas, uan ininixpan akin kinixyekanaj uejueyi familias israelitas”. 30 Uan tiopixkamej uan levitas kikuikej plata, oro uan tapalkamej tein kintamachiuilijkaj para kiuikaskej ichan toDios tein yetok Jerusalén.

31 Uan itech tonal 12 den metsti nisán* tikisteujkej den ueyiat Ahavá uan tiajkej Jerusalén. ToDios techpaleuij keman tiajtoyaj para maj amo teyi techchiuilianij akin techtauelitaj nion tachtekinij. 32 Satepan tiajsikej Jerusalén uan timoseuijkej eyi tonal. 33 Mostika tiajkej ichan toDios uan ompa tiktamachiujkej plata, oro, tapalkamej uan okseki taman. Satepan tikmakakej tiopixkat Meremot iokichpil Uriya. Ompa no yetoya Eleazar iokichpil Finehás uan Jozabad uan Noadías akin katkaj levitas. Itat Jozabad katka Jesúa uan itat Noadías katka Binuí. 34 Nochi mopouak, motamachiuak uan moijkuiloj. 35 Akin kiskaj de Babilonia kampa kinuikakaj, kichichinouilijkej ininDios israelitas 12 kuakuejmej para nochin akin pouij itech xolal Israel. No kichichinouilijkej 96 ichkaueuetkej,* 77 ichkamej uan 12 chivos para maj Dios kintapojpoluiani inintajtakoluan. Nochi nejon tapialmej kichichinouilijkej Jehová.

36 Amat tein kijkuilojka tekiuaj tikinmakakej sátrapas* akin tekiuaj kinixtalijka maj kipaleuikan uan taixyekananij. Yejuan taixyekanayaj itech talmej tein yetokej nepaka den ueyiat Éufrates kampa pankalaki tonaltsin. Uan sátrapas uan taixyekananij kinpaleuijkej israelitas uan kitemakakej nochi tein monekia para ichan toTajtsin Dios.

9 Niman keman tiktamichiujkej nochi nejin, taixyekananij nechiluikoj: “Israelitas, tiopixkamej uan levitas kisentokaj mouikaj iniuan akin nemij itech altepemej tein techyoualouaj uan kisentokaj kichiuaj tein tel amo kuali ijkon kemej kichiuaj cananeos, hititas, perizitas, jebuseos, ammonitas, moabitas, egipcios uan amorreos. 2 Yejuan uan ininokichpipiluan monamiktijkej iniuan siuamej akin pouij itech nejon altepemej. Yejua ika akin Dios moinxelouilij para maj pouikan itech ixolal maneliujtokejya iniuan akin nemij itech nejon altepemej. Uan akin okachi amo kitakamatinij Dios yejuan taixyekananij uan uejueyi chiuanimej”.

3 Keman nikakik nejin, niman niktsayanak notasal, nimokuatsonuiuitak uan nimotentsonuiuitak uan nimotalij porin semi fiero nikmachiliaya. 4 Nochin akin semi kitakachiuayaj* tein kijtoua ininDios israelitas nechajsikoj uan nechyoualojkej porin akin mokepkej de Babilonia amo kitakamatkej Dios. Kemej fiero nikmachiliaya, nitokotsyetoya hasta tiotakpa itech hora keman israelitas momattoyaj kitemaktiskej trigo uan okseki taman.

5 Nitayokoxtoya hasta tiotakpa uan nimoketsak hasta keman ajsik hora para kitemaktiskej trigo uan okseki taman. Uan ijkon ika notasal tsayaktik* nimotankuaketsak uan nimomaajokuik para niktataujtis noDios Jehová. 6 Uan nikijtoj: “NoDios, semi nimopinaujmati uan nikmachilia ke amo nechnamiki nimoixajokuis para nimitstataujtis. Tikchiuanij miak taman tein amo kuali noDios, totajtakoluan semi miakej uan komo tikinsentiliaj ajsij hasta iluikak. 7 Touejkaujtatuan uan tejuan semi timotajtakolmakanij. Kemej semi titajtakolchiuanij tikauak maj techtajyouiltikan akin tekiuajtij itech okseki altepemej. Tikauak maj techtajyouiltikan tejuan, tekiuanij akin techixyekanaj uan totiopixkauan. Akin tekiuajtij itech okseki altepemej kinmiktijkej miakej ika espada,* techuikakej okseko, techtachtekijkej uan techpinaujtijkej. Ijkon kichiuanij desde keman nemiaj touejkaujtatuan hasta axkan. 8 Sayoj ke seki tonalmej titechikneliani toDios Jehová. Tikauak maj sekin timakisakan uan titechpaleuiani maj kuali tietokan itech tal tein moaxka* para maj tiyolpakikan,* uan no para tepitsin titechyolseuis maski titakeualmej. 9 Porin maski titakeualmej amo tikauani maj ijkon tiksentokakan. Nochipa titechtasojtani toDios uan tikchiuak maj akin tekiuajtij Persia techpaleuikan. Nejon techyolchikauak para tikyekchijchiuaskej mochan tein uejueliujtoya. No tikchiuak maj Judá uan Jerusalén mochiuakan kemej se ueyi tepamit tein techmatampauia.

10 ”Uan keniuj uelis timotenpaleuiskej toDios, ta oksepa amo tiktakamatkej motanauatiluan 11 tein tikiniluij motanauatijkauan* maj techmatiltikan. Tejua titechiluijka: ‘Tal tein namoaxkatilitij amo chipauak porin nochin akin ompa nemij kichiuaj tein amo kuali. Kemej yejuan kichiuaj miak taman tein pitsotik kichiuanij maj itech nochi uejueyi xolalmej mochiua tein amo nikuelita. 12 Yejua ika, amo xikinnamiktikan namosiuapipiluan iniuan ininokichpipiluan, nion xikauakan maj ininsiuapipiluan monamiktikan iniuan namookichpipiluan. Uan amo keman xikinpaleuikan maj kualtsin nemikan nion maj kipiakan miak taman. Komo nanechtakamatij namochikauaskej, nankikuaskej tein okachi kuali tein mochiuas itech nejon tal uan uelis nankinkauiliskej namokoneuan para maj nochipaya ompa nemikan’. 13 ToDios, tejua amo titechtatsakuiltiani kemej technamiki maski semi titajtakolchiuanij, ta akin nikan tietokej titechpaleuij maj timakisakan. Tikitanijya ke semi titajyouianij porin tikchiujkej miak taman tein amo kuali uan timotajtakolmakakej, 14 ¿xe kuali yetok maj oksepa amo tiktakamatikan motanauatiluan uan maj timonamiktikan iniuan akin kichiuaj tein pitsotik? Tejua semi tikualaniskia touan komo tikchiuaj nejon, titechtamiixpoloskia uan amo akin makisaskia. 15 ToDios Jehová,* tejua semi tiyolkuali porin sekin timakiskej uan tiksentokaj tinemij hasta axkan. Tejuan titajtakolchiuanij uan axkan nikan tietokej moixpan maski amo technamiki tietoskej moixpan porin tikchiujkej miak taman tein amo kuali”.

10 Esdras chokatoya keman kitataujtijtoya Dios uan kiluijtoya nochi inintajtakoluan israelitas. Yejua uetstoya uan ixakatapachiujtoya taixpan de ichan toTajtsin Dios. Keman kitataujtijtoya, miakej takamej, siuamej uan konemej israelitas mosentilijkej uan kiyoualojkej. Yejuan semi chokatoyaj. 2 Uan Secanías iokichpil Jehiel akin pouia iniuan ikoneuan Elam kiluij Esdras: “Amo tiktakamatkej toDios porin timonamiktijkej iniuan* siuamej akin amo israelitas akin nemij itech altepemej tein techyoualouaj. Sayoj ke Dios uelisok techiknelis akin tipouij itech xolal Israel. 3 Maj timotenkauakan iuan toDios ke tikintokaskej* nochin nejon siuamej uan ininkoneuan. Ijkon tikauaskej maj Jehová techixyekana uan no maj techixyekanakan akin semi kitakachiuaj* itanauatil toDios. Maj tikchiuakan tein kijtoua iTanauatil Dios. 4 Ximoketsa Esdras, tejua moneki tikyektalis nejin kuejmol. Tejuan timitspaleuiskej. Ximoyolchikaua uan xikchiua tein moneki tikchiuas”.

5 Esdras moketsak uan kiniluij akin kinixyekanayaj tiopixkamej, levitas uan nochin israelitas maj motenkauanij ke kichiuaskiaj tein kijtojka Secanías. Uan yejuan motenkaujkej ke kichiuaskiaj. 6 Esdras yetoya taixpan de ichan toTajtsin Dios. Satepan yajki cuarto* tein Jehohanán iokichpil Eliasib kipiaya ichan Dios. Kalakik itech nejon cuarto, sayoj ke kemej semi tayokoxtoya amo kikuaj nion teyi nion tayik at. Semi tayokoxtoya porin akin mokepkaj de Babilonia amo kitakamatkaj Dios.

7 Satepan tanauatitoj ompa Judá uan Jerusalén ke nochin akin mokepkaj de Babilonia monekia mosentiliskej ompa Jerusalén. 8 Uan uejueyi chiuanimej uan taixyekananij kiixtalijkej ke kinchiaskiaj sayoj eyi tonal, uan komo aksa* amo ajsia, kitokaskiaj* uan amo pouiskiaok iniuan israelitas akin mokepkaj de Babilonia uan kikuiliskiaj nochi tein kipiaya. 9 Yejua ika nochin takamej akin pouiaj iniuan ikoneuan Judá uan Benjamín peuak aajsij Jerusalén itech nejon eyi tonal. Motamisentilijkej itech tonal 20 den metsti kislev.* Uan nochin israelitas mosentilijkej ichan toTajtsin Dios uan motalijkej itech se patio. Yejuan semi mouiaj porin kimatiaj ke kinsentilijkaj porin ueyi tajtakojkaj. No tel sekuiaj porin chikauak kioujtoya, hasta uiuiyokatoyaj* porin tel mouiaj uan tel sekuiaj.

10 Uan tiopixkat Esdras moketsak uan kiniluij: “Namejuan amo nankitakamatkej Dios porin namonamiktijkej iniuan siuamej akin amo israelitas, uan nankichiujkej maj israelitas okachi tajtakolchiuakan. 11 Axkan xikiluikan Jehová ininDios namouejkaujtatuan ke nantajtakolchiujkej uan xiktakamatikan. Amo ximouikakanok iniuan akin nemij itech nejon altepemej uan xikintokakan namosiuauan akin amo israelitas”. 12 Uan nochin akin mosentilijkaj chikauak kijtojkej: “Tikchiuatij ijkon kemej tikijtoj. 13 Sayoj ke tel miakej nikan tietokej uan nejin tonalmej semi kioui. Amo uelis kalampa tietoskej. Uan no, nejin kuejmol amo techuikilis se oso ome tonal para tikyektaliskej porin semi titajtakolchiujkej.* 14 Yejua ika timitstajtaniaj maj nikan mokauakan uejueyi chiuanimej para maj yejuan kiitakan toni mochiuas. Uan maj moixtali kemanian ualaskej takamej akin nemij itech toueyi xolal akin monamiktijkej iniuan siuamej akin amo israelitas. Keman ualaskej, maj iniuan ualakan taixyekananij uan jueces akin taixyekanaj itech ininueyi xolal. Maj tikchiuakan nejin para maj Dios amo kualantook touan”.

15 Sayoj ke Jonatán akin katka iokichpil Asahel uan Jahzeya akin katka iokichpil Ticvá amo kinekkej maj mochiua tein moijtojka. Uan Mesulam uan Sabetái akin katkaj levitas kinpaleuijkej. 16 Sayoj ke okseki judíos akin mokepkaj de Babilonia kichiujkej tein moixtalijka. Tiopixkat Esdras uan akin kinixyekanayaj uejueyi familias mosentilijkej itech yekinika tonal den metsti tebet* para kiitaskej keniuj kiyektaliskej kuejmol. Inintokay akin kinixyekanayaj uejueyi familias ijkuiliujtoya itech amatajkuilol. 17 Uan itech yekinika tonal den metsti nisán* kitamiixejekojkej toni monekia kichiuaskej takamej akin monamiktijkaj iniuan siuamej akin amo katkaj israelitas. 18 Kimatkej ke sekin ininokichpipiluan tiopixkamej monamiktijkaj iniuan siuamej akin amo katkaj israelitas. Seki nejon takamej monotsayaj Maaseya, Eliezer, Jarib uan Guedalías. Seki nejin takamej katkaj iokichpipiluan Jesúa uan sekin katkaj iikniuan. Itat Jesúa katka Jehozadac. 19 Sayoj ke Maaseya, Eliezer, Jarib uan Guedalías motenkaujkej ke kintokaskiaj* ininsiuauan. Uan kemej tajtakolchiujkaj, sejse kitemakaskia se ichkaueuet.*

20 Okseki tiopixkamej akin no tajtakolchiujkaj katkaj Hananí uan Zebadías akin katkaj iokichpipiluan Imer. 21 De ikoneuan Harim katkaj Maaseya, Elías, Semaya, Jehiel uan Uzías. 22 Uan de ikoneuan Pasjur katkaj Elioenái, Maaseya, Ismael, Netanel, Jozabad uan Eleasá. 23 Seki levitas akin tajtakolchiujkaj katkaj Jozabad, Simeí, Quelaya akin no monotsa Quelitá, Petahías, Judá uan Eliezer. 24 No tajtakolchiujkaj Eliasib akin cantarouaya, uan Salum, Télem uan Urí akin tajpiayaj puertajtenoj.

25 Uan israelitas akin no tajtakolchiujkaj katkaj Ramías, Izías, Malkiya, Mijamín, Eleazar, Malkiya uan Benaya akin katkaj iokichpipiluan Parós. 26 De iokichpipiluan Elam katkaj Matanías, Zacarías, Jehiel, Abdí, Jeremot uan Elías; 27 de iokichpipiluan Zatú katkaj Elioenái, Eliasib, Matanías, Jeremot, Zabad uan Azizá; 28 de iokichpipiluan Bebái katkaj Jehohanán, Hananías, Zabái uan Atlái; 29 de iokichpipiluan Baní katkaj Mesulam, Maluc, Adaya, Jasub, Seal uan Jeremot; 30 de iokichpipiluan Pahat-Moab katkaj Adná, Kelal, Benaya, Maaseya, Matanías, Bezalel, Binuí uan Manasés; 31 de iokichpipiluan Harim katkaj Eliezer, Isiya, Malkiya, Semaya, Shimeón, 32 Benjamín, Maluc uan Semarías; 33 de iokichpipiluan Hasum katkaj Matenái, Matatá, Zabad, Elifélet, Jeremái, Manasés uan Simeí; 34 de iokichpipiluan Baní katkaj Maadái, Amram, Uel, 35 Benaya, Bedeya, Kelúhi, 36 Vanías, Meremot, Eliasib, 37 Matanías, Matenái uan Jaasú; 38 de iokichpipiluan Binuí katkaj Simeí, 39 Selemías, Natán, Adaya, 40 Macnadebái, Sasái, Sharái, 41 Azarel, Selemías, Semarías, 42 Salum, Amarías uan José; 43 de iokichpipiluan Nebo katkaj Jeiel, Matitías, Zabad, Zebiná, Jadái, Joel uan Benaya. 44 Nochin nejin takamej monamiktijkaj iniuan siuamej akin amo katkaj israelitas. Yejua ika kintokakej nejon siuamej uan ininkoneuan.