NEHEMÍAS

1 Yejua nejin tein kijtoua Nehemías* iokichpil Hacalías. Itech metsti kislev,* nejua ninemia ompa Susa itech ueyi kali kampa nemia tekiuaj.* Ijkuak, Artajerjes tekiuajtitoyaya 20 xiujmej.* 2 Itech nejon tonalmej, se nokniuj akin monotsa Hananí nechkalpanoto iniuan seki takamej de Judá uan nikintajtanij keniuj yetoyaj judíos akin kiskaj de Babilonia kampa kinuikakaj. No nikintajtanij keniuj moitaya Jerusalén. 3 Yejuan nechiluijkej: “Akin kiskej de Babilonia kampa kinuikakaj uan axkan nemij Judá amo kuali yetokej uan semi tepinaujtij kemej moajsij. Tepamit tein kiyoualouaya Jerusalén kixitinijkej uan puertas tein kipiaya kinchichinojkej uan kisentoka ijkon yetok”.

4 Keman nikakik nejon, nimotalij uan peuak nichoka. Seki tonalmej nitayokoxtoya, amo nitakuaj uan niktataujtijtoya Dios akin taixyekana ne iluikak. 5 Nikiluij: “Jehová, akin titaixyekana ne iluikak, Dios akin semi tiueyi uan tikchiua miak taman tein se kimojkaita. Tejua tikchiua tein timotenkaua uan nochipa tikintasojta akin mitstasojtaj uan kitakamatij tein titanauatia. 6 Nimitstataujtia kuali xinechkaki uan xinechita. Xikaki tein nejua nimotekitikauj nimitstataujtia, xikaki tein axkan nimitsiluijtok. Tonayan uan youak nimitstataujtia xikinpaleui israelitas akin motekitikauan, uan nimitsiluia keniuj tajtakolchiuanij akin pouij itech xolal Israel. Semi titajtakolchiuanij nejua uan ichankauan nopaj. 7 Timopitsotilijkej uan titajtakolchiujkej moixpan porin amo tiktakamatkej tein titanauatia, tein titamachtia uan tein tikixtalia. Nochi nejin tiknauatij motekitikauj Moisés maj kitematilti.

8 ”Nimitstataujtia xikelnamiki tein tikiluijka motekitikauj Moisés: ‘Komo namejuan amo nanechtakamatijok namechmoyauas* itech tataman xolalmej. 9 Sayoj ke komo namopataj uan nankitakamatij notanauatiluan, nejua oksepa namechsentilis maski semi uejka namechmoyauaskej uan namechualkuis kampa nikixtalij maj kiueyitalikan notokay’. 10 Yejuan motekitikauan uan mokoneuan.* Tejua tikinmakixtij ika moueyi chikaualis. 11 Jehová, nimitstajtania kuali xikaki tein nejua nimotekitikauj nimitstataujtia, uan tein mitstataujtiaj motekitikauan akin kinyolpaktia kiueyitaliskej* motokay. Nimitstataujtia xikchiua maj tekiuaj nechikneli uan maj nechkaua maj nikchiua tein niktajtanis axkan”.

Ijkuak, nejua nikmakaya vino tekiuaj.

2 Itech metsti nisán,* tekiuaj kiualkuilijkej vino. Ijkuak, Artajerjes tekiuajtitoyaya 20 xiujmej. Nikuik vino uan nikmakak kemej ipa nikchiuaya. Sayoj ke ijkuak nitayokoxtoya uan tekiuaj amo keman ijkon nechitstoya. 2 Yejua ika tekiuaj nechtajtanij:* “¿Toni mitspanoua? Nikita ke semi titayokoxtok, sayoj ke amo timokokoua. Nimoluia ke teisa mitstekipachoua”. Keman nechiluij nejon semi nimomoujtij.

3 Uan nikiluij tekiuaj: “¡Maj Dios nochipa mitstiochiua notekiuaj!* Nitayokoxtok porin kixitinijkej ueyi xolal kampa toktokej nouejkaujtatuan, puertas kinchichinojkej uan kisentoka ijkon yetok”. 4 Tekiuaj nechtajtanij: “¿Toni tikchiuasneki?”. Niman niktataujtij Dios akin taixyekana ne iluikak. 5 Uan niknankilij: “Notekiuaj, komo tikita ke kuali yetok uan mitsyolpaktia tein nejua nimotekitikauj nikchiua, nikneki xinechtitani Judá kampa toktokej nouejkaujtatuan para maj ueli nikyekchijchiua ueyi xolal”. 6 Tekiuaj nechtajtanij: “¿Tiuejkauatiuj? ¿Kemanian timokepas?”. Ijkuak, isiuatsin tekiuaj tokotsyetoya inakastan. Uan tekiuaj nechkauak maj niouj uan nejua nikiluij kanachi tiempo amo nietoskia.

7 Satepan nikiluij tekiuaj: “Notekiuaj, komo tikita ke kuali yetok, nimitstajtania maj kinijkuilouilikan amamej akin taixyekanaj nepaka den ueyiat Éufrates kampa pankalaki tonaltsin. Itech nejon amamej maj kinnauatikan maj amo nechtsakuilikan, ta maj nechkauakan maj nipano hasta Judá. 8 Uan maj no nechmakakan se amat para nikmakas Asaf akin tajpia motalpan kampa tikinpia koujmej.* Itech nejon amat maj kinauatikan maj nechmaka kouit para tikixtiskej vigas tein ika tikchijchiuaskej puertas den ueyi kali tein amo uejka moajsi de ichan Dios. Nejon ueyi kali kikuiskej soldados, uan vigas no tikuiskej para tepamit tein kiyoualoua ueyi xolal uan para kali kampa nichanchiuas”. Uan tekiuaj nechmakak amamej tein niktajtanij porin noDios akin yolkuali nechpaleuijtoya.

9 Seki tonalmej satepan niejkok nikampa den ueyiat Éufrates kampa pankalaki tonaltsin uan amamej tein nechmakak tekiuaj nikinmakak akin taixyekanayaj ompa. Uan no, tekiuaj nouan kinualtitanka takamej akin kinixyekanayaj soldados uan soldados akin ualayaj itech caballos. 10 Sayoj ke Sanbalat akin katka de Bet-Horón uan ueyichiujkej* Tobías akin katka de Ammón semi kualankej keman kitekakilijkej ke se takat kinpaleuiko israelitas.

11 Satepan niejkok Jerusalén uan eyi tonal satepan, 12 nimeuak youak uan nikinkuiteuak seki takamej. Amo akin nikiluij ke noDios kichiujka maj niknemili nikyekchijchiuas* Jerusalén. Nejua uan nejon takamej amo tikinuikayaj okseki tapialmej, ta sayoj nejua niaya itech se burro. 13 Uan nejon youak nikisak itech puerta tein monotsa Valle, nipanok taixpan de kampa yetok ameyal tein monotsa Ueyi Kouat uan niajsik hasta puerta tein monotsa Koujnex tein Montontentok. Nikitato keniuj mokaujka tepamit tein kiyoualouaya Jerusalén tein kixitinijkaj uan puertas tein kintamichichinojkaj. 14 Niajsik hasta puerta tein monotsa Fuente uan satepan hasta kampa yetok ueyi tanque tein iaxka tekiuaj, sayoj ke burro tein itech niaya amo uelikok panok. 15 Maski ijkon, nejon youak nejua niksentokak nipankisak tanakastan den tal tamanis* uan nikitstiajki keniuj mokaujka tepamit. Satepan nimokepak uan nikalakik itech puerta tein monotsa Valle para nimokepas nochan.

16 Okseki taixyekananij amo kimatiaj kani niajka nion kimatiaj toni nikchiujtoya, porin ayamo teyi nikiniluijtoya judíos, tiopixkamej, uejueyi chiuanimej, okseki taixyekananij nion tekitinij. 17 Satepan nikiniluij: “Namejuan nankiitstokej ke semi amo kuali kemej timoajsij. Jerusalén kixitinijkej uan puertas tein kipiaya kinchichinojkej uan kisentoka ijkon yetok. Maj tikyekchijchiuakan tepamit tein kiyoualoua Jerusalén, para maj amo techpinaujtikanok”. 18 Uan nikiniluij keniuj noDios akin yolkuali nechpaleuijka uan nikintapouij tein tekiuaj nechiluijka. Keman kikakkej tein nikiniluij, kijtojkej: “¡Maj titekitikan!”. Yejua ika moyojyolchikaujkej para peuas tekitiskej.

19 Sayoj ke keman kimatkej nejon, Sanbalat akin katka de Bet-Horón, ueyichiujkej* Tobías akin katka de Ammón uan Guésem akin katka de Arabia peuak techkejkelouaj uan techpijpinaujtiaj. Yejuan techiluiayaj: “¿Toni nankichiujtokej? ¿Nankinekij nankiixnamikiskej tekiuaj?”. 20 Sayoj ke nejua nikinnankilij: “Dios akin taixyekana ne iluikak techpaleuis maj mochiua tein tikixtalijtokej. Uan tejuan akin tiktekitiliaj, tikchijchiuaskej tepamit. Sayoj ke namejuan amo teyi moneki nankichiujtoskej nikan Jerusalén, namouejkaujtatuan amo nenkej nikan nion namoaxka nejin ueyi xolal”.

3 Tayekankatiopixkat Eliasib uan okseki tiopixkamej peuak kiyekchijchiuaj puerta tein monotsa Ichkamej. Satepan kimaktilijkej Dios uan kiketskej puerta. Uan no kimaktilijkej Dios tepamit tein peuaya desde puerta tein monotsa Ichkamej hasta uejkapan kali tein monotsa Meá uan desde ompa hasta uejkapan kali tein monotsa Hananel. 2 Takamej akin katkaj de Jericó tekitikej inakastan Eliasib uan okseki tiopixkamej. Yejuan kiyekchijchiujkej okse tramo den tepamit. Zacur iokichpil Imrí tekitik ininnakastan takamej akin katkaj de Jericó uan kiyekchijchiuak okse tramo den tepamit.

3 Ikoneuan* Hasenaá kiyekchijchiujkej puerta tein monotsa Pescado. Kitalijkej vigas, ompa kipilojkej* puerta uan kitalilijkej teposmej tein kitaliliaj puerta para kitsakuaskej. 4 Meremot tekitik ininnakastan ikoneuan Hasenaá uan kiyekchijchiuak okse tramo den tepamit. Itat Meremot katka Uriya uan iueyitat katka Hacoz. Inakastan Meremot tekitik Mesulam uan kiyekchijchiuak okse tramo den tepamit. Itat Mesulam katka Berekías uan iueyitat katka Mesezabel. Uan Sadoc iokichpil Baaná tekitik inakastan Mesulam uan kiyekchijchiuak okse tramo den tepamit. 5 Akin kayomej Tecoa tekitikej inakastan Sadoc uan kiyekchijchiujkej okse tramo den tepamit, sayoj ke takamej akin uejueyi chiuanimej katkaj semi moueyimatiaj uan amo kinekkej maj kinixyekanakan akin kiitayaj maj mochiua tekit.

6 Joiadá iokichpil Paséah uan Mesulam iokichpil Besodeya kiyekchijchiujkej puerta tein monotsa Ciudad Vieja. Kitalijkej vigas, ompa kipilojkej puerta uan kitalilijkej teposmej tein kitaliliaj puerta para kitsakuaskej. 7 Melatías uan Jadón kiyekchijchiujkej okse tramo den tepamit. Yejuan tekitikej ininnakastan Joiadá uan Mesulam. Melatías katka de Gabaón uan Jadón katka de Meronot tein amo uejka yetok de Mizpá. Nejin takamej de Gabaón uan Mizpá kitekitiliayaj akin taixyekanaya nepaka den ueyiat Éufrates kampa pankalaki tonaltsin. 8 Uziel kiyekchijchiuak okse tramo den tepamit uan tekitik ininnakastan Melatías uan Jadón. Uziel ika tekitia plata uan oro uan itat katka Harhaya. Uan Hananías akin kichijchiuaya perfumes tekitik inakastan Uziel uan kiyekchijchiuak okse tramo den tepamit. Ompa Jerusalén yejuan kipepechojkej tet talpan uan tamitoj kampa yetoya tepamit tein okachi patauak. 9 Refayá iokichpil Hur tekitik inakastan Hananías uan kiyekchijchiuak okse tramo den tepamit. Refayá taixyekanaya tajko den ueyi xolal Jerusalén. 10 Jedayá iokichpil Harumaf kiyekchijchiuak okse tramo den tepamit tein yetoya taixpan de ichan, uan tekitik inakastan Refayá. Uan Hatús iokichpil Hasabneya tekitik inakastan Jedayá uan kiyekchijchiuak okse tramo den tepamit.

11 Malkiya iokichpil Harim uan Hasub iokichpil Pahat-Moab kiyekchijchiujkej uejkapan kali tein monotsa Hornos, uan no kiyekchijchiujkej okse tramo den tepamit. 12 Tanakastan de Malkiya uan Hasub tekitikej Salum uan isiuapipiluan. Yejuan kiyekchijchiujkej okse tramo den tepamit. Itat Salum katka Halohés. Salum taixyekanaya okse tajko den ueyi xolal Jerusalén.

13 Hanún uan akin nemiaj Zanóah kiyekchijchiujkej puerta tein monotsa Valle. Keman kitamichijchiujkej, kipilojkej puerta uan kitalilijkej teposmej tein kitaliliaj puerta para kitsakuaskej. No kiyekchijchiujkej kemej 445 metros* de tepamit uan tamitoj itech puerta tein monotsa Koujnex tein Montontentok. 14 Malkiya iokichpil Recab kiyekchijchiuak puerta tein monotsa Koujnex tein Montontentok. Keman kitamichijchiuak, kipiloj puerta uan kitalilij teposmej tein kitaliliaj puerta para kitsakuaskej. Malkiya taixyekanaya Bet-Hakerem.

15 Salún iokichpil Colhozé akin taixyekanaya Mizpá kiyekchijchiuak puerta tein monotsa Fuente. Keman kitamichijchiuak, kikuatsakuak, kipiloj puerta uan kitalilij teposmej tein kitaliliaj puerta para kitsakuaskej. No kiyekchijchiuak tepamit den ueyi tanque tein monotsa Canal uan tamito hasta Escalera tein temoua hasta ueyi xolal tein iaxka David. Ueyi tanque yetok tanakastan den tal tein iaxka tekiuaj kampa onkak tataman koujmej uan xochimej.

16 Nehemías iokichpil Azbuc kiyekchijchiuak okse tramo den tepamit uan tekitik inakastan Salún. Kiyekchijchiuak tepamit tein yetok taixpan de kampa kintokkaj ichankauan David, tamito hasta ueyi tanque tein kichijchiujkaj uan hasta kampa yetok kali kampa nemiaj soldados.

17 Levitas tekitikej inakastan Nehemías uan kiyekchijchiujkej okse tramo den tepamit. Kinixyekanak Rehúm iokichpil Baní. Hasabías tekitik ininnakastan levitas uan kiyekchijchiuak okse tramo den tepamit. Hasabías tekitik para kinpaleuis akin nemiaj Queilá uan taixyekanaya tajko de nejon ueyi xolal. 18 Okseki levitas tekitikej inakastan Hasabías uan kiyekchijchiujkej okse tramo den tepamit. Kinixyekanak Bavái iokichpil Henadad. Okse tajko den ueyi xolal Queilá taixyekanaya Bavái.

19 Ininnakastan okseki levitas tekitik Ézer iokichpil Jesúa akin taixyekanaya Mizpá. Yejua kiyekchijchiuak okse tramo den tepamit taixpan de kampa se pankisa para se ajsis kali kampa kitaliaj tein ika tateuiaj, kampa yetok kalikxit tein kichikaua tepamit.

20 Inakastan Ézer tekitik Baruc iokichpil Zabái. Yejua chikauak tekitik uan kiyekchijchiuak okse tramo den tepamit. Kiyekchijchiuak desde kampa yetok kalikxit tein kichikaua tepamit hasta ikaltenoj tayekankatiopixkat Eliasib kampa yetok puerta.

21 Meremot tekitik inakastan Baruc uan kiyekchijchiuak okse tramo den tepamit. Itat Meremot katka Uriya uan iueyitat katka Hacoz. Meremot tekitik desde puerta de ichan Eliasib hasta kampa tamia ichan.

22 Tiopixkamej akin ualeuayaj den tal tamanis* tein poui Jordán* tekitikej inakastan Meremot uan kiyekchijchiujkej okse tramo den tepamit. 23 Benjamín uan Hasub kiyekchijchiujkej okse tramo den tepamit tein yetoya ininkalixpan uan tekitikej ininnakastan tiopixkamej. Azarías kiyekchijchiuak okse tramo den tepamit tein amo uejka yetoya de ichan uan tekitik ininnakastan Benjamín uan Hasub. Itat Azarías katka Maaseya uan iueyitat katka Ananíah. 24 Inakastan Azarías tekitik Binuí iokichpil Henadad uan kiyekchijchiuak okse tramo den tepamit. Peuak desde ichan Azarías, kisentokak hasta kampa yetok kalikxit tein kichikaua tepamit uan tamito hasta esquina.

25 Palal iokichpil Uzái tekitik inakastan Binuí uan kiyekchijchiuak okse tramo den tepamit. Peuak desde taixpan den kalikxit tein kichikaua tepamit uan uejkapan kali tein mokuitok iuan ichan tekiuaj. Nejin uejkapan kali yetok itech patio kampa tajpiaj soldados uan okachi uejkapantik. Pedaya iokichpil Parós tekitik inakastan Palal uan kiyekchijchiuak okse tramo den tepamit.

26 Akin tekitiaj templo* uan nemiaj Ofel kiyekchijchiujkej okse tramo den tepamit. Tamitoj hasta puerta tein monotsa At de kampa ualkisa tonaltsin uan uejkapan kali tein nalkistok.

27 Akin kayomej Tecoa kiyekchijchiujkej okse tramo den tepamit uan tekitikej ininnakastan akin tekitiaj templo. Peujkej desde taixpan den uejkapan kali tein nalkistok uan tamitoj hasta tepamit tein yetok Ofel.

28 Tiopixkamej kiyekchijchiujkej tepamit tein yetok nepaka den puerta tein monotsa Caballos. Sejse tiopixkat tekitik ikalixpan.

29 Sadoc iokichpil Imer tekitik ininnakastan tiopixkamej uan kiyekchijchiuak okse tramo den tepamit tein yetoya ikalixpan.

Uan Semaya iokichpil Secanías tekitik inakastan Sadoc uan kiyekchijchiuak okse tramo den tepamit. Semaya tajpiaya itech puerta tein monotsa Oriental.

30 Hananías uan Hanún kiyekchijchiujkej okse tramo den tepamit. Yejuan tekitikej inakastan Semaya. Itat Hananías katka Selemías uan itat Hanún katka Zalaf. Hanún katka chikuasentika iokichpil Zalaf.

Uan ininnakastan Hananías uan Hanún tekitik Mesulam iokichpil Berekías. Yejua kiyekchijchiuak okse tramo den tepamit tein yetoya ikalixpan.

31 Malkiya akin ika tekitia plata uan oro tekitik inakastan Mesulam. Kiyekchijchiuak okse tramo den tepamit tein ajsi hasta ininchan akin tekitiaj templo* uan tanamakanij. Ompaka yetok puerta tein monotsa Inspección. Malkiya tamito hasta esquina kampa yetok cuarto tein kichijchiujkej kalkuako.*

32 Uan desde esquina kampa yetok cuarto tein kichijchiujkej kalkuako hasta puerta tein monotsa Ichkamej tekitikej tanamakanij uan akin ika tekitiaj plata uan oro.

4 Keman Sanbalat kitekakilij ke tikyekchijchiujtoyaj tepamit tein kiyoualouaya Jerusalén, tel kualanik uan semi kinkejkelouaya judíos. 2 Uan kiniluij akin iuan tekitiaj uan soldados de Samaria: “¿Toni kinemilijtokej kichiuaskej nejin judíos, ta nion siquiera miakej? ¿Xe ininselti uelis kichiuaskej nejin tekit? ¿Kimaktiliskej Dios tapialmej? ¿Xe matamiskej itech sayoj se tonal? ¿Kinemiliaj ke uelisok kikuiskej tet tein chichinauik tein montontentok?”.

3 Tobías akin katka de Ammón uan yetoya inakastan Sanbalat, kijtoj: “Hasta komo se kuekti* ompa ajkotsikuini, uelis kixitinis tepamit tein kichijchiujtokej”.

4 Yejua ika niktataujtij Dios: “ToDios, xikaki keniuj techuijuikaltiaj uan xikchiua maj no kinuijuikaltikan ijkon kemej yejuan kichiuaj. Xikchiua maj akin kintauelitaj kintanikan uan maj kinuikakan okse altepet. 5 Amo xikixpanaui tein amo kuali tein kichiujtokej nion xikintapojpolui, porin yejuan kinuijuikaltijkej akin kichijchiujtokej tepamit”.

6 Uan tiksentokakej titamitatsakkej kampa tatapotoya itech tepamit uan de uejkapan titamitoj hasta tatajko. Uan judíos kisentokakej chikauak tekitikej.

7 Sayoj ke Sanbalat, Tobías, árabes, ammonitas uan asdoditas tel kualankej keman kimatkej ke uejka tikchiujkajya tepamit tein kiyoualouaya Jerusalén uan ke titamitatsakkajya kampa tatapotoya. 8 Yejua ika nochin mosenkuikej para ualaskej Jerusalén uan techteuiskej, uan no para takuejmolchiuaskej itech ueyi xolal. 9 Yejua ika tejuan tiktataujtijkej toDios maj techpaleui. Uan no tikinnauatijkej takamej maj tajpiakan tonayan uan youak para maj amo teyi techchiuilianij akin techtauelitayaj.

10 Sayoj ke sekin akin nemiaj Judá kijtouayaj: “Tekitinij* sioujkejya uan tentokok miak tet tein monekiok tiksakaskej. Amo keman uelis tiktamichijchiuaskej tepamit”.

11 Akin techtauelitayaj kijtouayaj: “Nion kimatiskej uan nion techitaskej keman tiajsiskej kampa yetokej uan tikinmiktiskej. Ijkon tikintsakuiliskej para maj amo tekitikanok”.

12 Uan judíos akin amo uejka nemiaj de akin techtauelitayaj, miakpa* techiluiayaj keman ualayaj: “De miakkan ualaskej techteuikiuij”.

13 Taikampa den tepamit ueliskia ijsiujka kalakiskej akin techtauelitayaj. Yejua ika nikintalij takamej para maj tajpianij ompa uan nikintalij amo uejka de ininfamilias. Yejuan kipiayaj ininespada,* ininlanza* uan ininarco.* 14 Keman nikitak ke mouiaj, niman nikinitato uejueyi chiuanimej, okseki taixyekananij uan oksekin akin tekititoyaj uan nikiniluij: “Amo ximouikan, xikelnamikikan ke Jehová semi ueyi uan kichiua miak taman tein se kimojkaita. Yejua ika xitateuikan para nankinpaleuiskej namoparientes, namookichpipiluan, namosiuapipiluan uan namosiuauan uan no xitateuikan para maj amo teyi kipano namochan”.

15 Akin techtauelitayaj kimatkej ke tikinmatilijkej tein kinekiaj kichiuaskej uan ke toTajtsin Dios kintauejuelouilijka. Yejua ika tinochin oksepa peuak tikchijchiuaj tepamit. 16 Sayoj ke desde ijkuak, seki* takamej kichijchiuayaj tepamit uan oksekin* kipiayaj ininlanza, ininescudo uan ininarco uan aktoyaj ininteposkoton. Uan taixyekananij kinpaleuijtoyaj* nochin judíos 17 akin kichijchiujtoyaj tepamit. Akin tasakayaj kikuiaj sayoj se ininmay uan ika okse ininmay kikitskijtoyaj tein ika tateuiayaj. 18 Akin kichijchiujtoyaj tepamit tajkoilpitoyaj* ika ininespada. Uan nonakastan yetoya akin monekia kipitsas kuaomit para tanejmachtis.

19 Yejua ika nikiniluij uejueyi chiuanimej, okseki taixyekananij uan oksekin akin tekititoyaj: “Titelxejxeliujtokej porin semi ueyi tepamit tein tikchijchiujtokej. 20 Yejua ika xitechajsikij keman nankikakiskej ke kipitsaj kuaomit. ToDios tateuis para techmakixtis”.

21 Desde kualkantsin hasta youak keman kisaj sitalimej, sekin* tikchijchiuayaj tepamit uan oksekin* maaktoyaj ininlanza. 22 Uan nikiniluij akin tekititoyaj: “Takamej uan inintakeualuan maj kalakikan Jerusalén uan maj ompa youalpanokan. De youak tajpiaskej uan de tonayan tekitiskej”. 23 Yejua ika nion timotapatiliayaj, nion nejua, nion noparientes, nion notakeualuan uan nion soldados akin nechyekpiayaj. Uan tinochin tikpiayaj toyekmakopa tein ika titateuiskiaj.

5 Sayoj ke seki takamej judíos uan ininsiuauan peuak kinteluiliaj ininjudíosikniuan. 2 Sekin kijtouayaj: “Tikinpiaj miakej tookichpipiluan uan tosiuapipiluan, yejua ika moneki tiktemoskej tein tikuaskej para tiksentokaskej tiyoltoskej”. 3 Oksekin kijtouayaj: “Para maj techmakakan tein tikuaskej keman tatasojti moneki tikiniluiskej akin techtaneujtiaj ke uelis mokuiliskej talmej kampa tiktokaj trigo, talmej kampa onkak uvas uan tochan komo amo tikixtauaj tein techmakaskej”. 4 Oksekin no kijtouayaj: “Titaneujkej tomin para tikixtauaskej impuesto tein tajtani tekiuaj uan titeiluijkej ke uelis mokuiliskej talmej kampa tiktokaj trigo uan talmej kampa onkak uvas komo amo tikepaj tomin tein techtaneujtijkej. 5 Tejuan tiininparientes akin techtaneujtijkej tomin uan ininkoneuan amo okachi ueyichiuanimej ke tokoneuan. Maski ijkon, moneki tikinmaktiliskej tookichpipiluan uan tosiuapipiluan para maj kintekitilikan. Uan seki tosiuapipiluan kintekitiliajya. Sayoj ke amo teyi ueli tikchiuaj, porin talmej kampa tiktokaj trigo uan talmej kampa onkak uvas teaxkaya”.

6 Keman nikakik tein kijtouayaj, nitelkualanik. 7 Keman kuali nitanemilij itech kuejmol tein mochiujtoya, nikinajuak uejueyi chiuanimej uan okseki taixyekananij. Nikiniluij: “Namejuan nankintajtanijtokej namoparientes maj namechtaxtauikan okachi ke tein nankintaneujtijkej”.

Uan no, nikinsentilij nochin para tikyektaliskej kuejmol. 8 Nikiniluij: “Timochikaujkej nochi tein tiuelkej para tikinkouaskej toparientes judíos akin kinnamakakaj itech okseki altepemej uan ijkon tikinmakixtijkej. ¿Uan keyej axkan namejuan nankinnamakatij namoparientes? Kemej nankinnamakatij, tejuan moneki tamechinkouiliskej para tikinmakixtiskej”. Keman nikiniluij nejon, yejuan amo teyi kijtojkej porin amo kimatiaj toni nechnankiliskej. 9 Uan no nikiniluij: “Amo kuali yetok tein nankichiujtokej. Monekiskia nankimojkatokaskej toDios, para maj amo techkejkelokan akin techtauelitaj akin nemij itech okseki altepemej. 10 Nejua, noparientes uan notakeualuan titetaneujtiaj tomin uan trigo, uan amo titajtanij maj techkepilikan okachi ke tein titetaneujtiaj. Yejua ika namechtataujtia amo no xitajtanikan maj namechkepilikan okachi ke tein nantetaneujtiaj. 11 Keman nantetaneujtijkej tomin, trigo, vino tein yankuik uan aceite nantajtankej maj namechkepilikan okachi, namechtataujtia xikepakan nochi nejon tein nantajtankej. No namechtataujtia xikepakan talmej kampa onkak uvas, talmej kampa onkak olivojkoujmej, okseki talmej uan kalmej”.

12 Yejuan tanankilijkej: “Tikepaskej nochi uan amo teyi titajtaniskej. Tikchiuaskej tein titechtajtania”. Yejua ika nikinnotsak tiopixkamej uan nikiniluij takamej akin kichiujkaj nejon tein amo kuali maj motenkauanij ininixpan tiopixkamej ke kichiuaskiaj tein kijtojkej. 13 Uan no, niktsetseloj notasal* uan nikiniluij: “Maj toTajtsin Dios ijkon kitsetselo takat akin amo kichiuas tein motenkauak uan maj kikuili ichan uan nochi tein kipia. Maj ijkon kitsetselo uan maj amo kikauili nion teyi”. Keman kikakkej nejin, nochin akin mosentilijkaj* kijtojkej “¡Maj ijkon mochiua!”.* Satepan peuak kiueyichiuaj Jehová. Uan nochin kichiujkej tein motenkaujkaj.

14 Uan no, desde keman tekiuaj nechixtalij maj nitaixyekana itech talmej tein pouij Judá, nion nejua nion notakeualuan tikuanij tein kinamiki kimakaskej taixyekankej. Panokejya 12 xiujmej desde keman tekiuaj Artajerjes nechixtalij. Ijkuak, 20 xiujmejya tekiuajtitoya uan axkan kiajxitijya 32 xiujmej. 15 Sayoj ke akin achto taixyekanayaj kintajtanijkaj israelitas miak taman uan mojmostaj kintaxtaualtiayaj 456 gramos* de plata para kikouaskej pantsin uan vino. Uan inintakeualuan no kintajyouiltijkaj israelitas. Sayoj ke nejua amo ijkon nikchiuak porin nikmojkatoka Dios.

16 Uan hasta no nitapaleuij keman moyekchijchiuak tepamit. Nochin notakeualuan tekitikej ompa uan amo timokouilijkej nion se tal. 17 Nouan takuayaj 150 judíos uan okseki taixyekananij. Uan no nouan takuayaj oksekin akin ualeuayaj de okseki altepemej akin techkalpanouayaj. 18 Mojmostaj nechchijchiuiliayaj se kuakouej, chikuasen ichkamej* tein okachi tomaujkej uan no totomej uan nejua nikixtauaya. Uan nitanauatiaya maj cada majtakti tonal techmakanij tataman vino uan maj miak techmakanij. Maski ijkon, amo nitajtanik maj nechmakanij takual tein kinamiki kimakaskej taixyekankej porin israelitas ipa kichiujtoyajya miak taman tein tajtani tekiuaj. 19 NoDios, xinechelnamiki uan xinechtatiochiui por nochi tein nikchiuani para nikinpaleuis israelitas.

6 Sanbalat, Tobías, Guésem akin katka de Arabia uan oksekin akin techtauelitayaj kimatkej ke nikyekchijchiujkaya tepamit tein kiyoualoua Jerusalén. No kimatkej ke itech tepamit amo tatapotoyaok (maski nechpolouayaok nikinpilos puertas). 2 Sanbalat uan Guésem niman tanauatijkej maj nechiluitij: “Maj tikixtalikan kemanian timosentiliskej itech semej xolaltsitsin tein yetokej itech tal tamanis* Onó”. Sayoj ke tein melauj, kinekiaj nechmiktiskej. 3 Yejua ika nikintitanik seki takamej maj kiniluitij: “Nikchiujtok se ueyi tekit uan amo ueli nitemoua. Komo niouj namechitati motsakuilis tekit uan amo nikneki maj pano nejon”. 4 Yejuan naujpa tanauatijkej maj nechiluitij maj nitemo uan nejua nochipa nikinnankilij ke amo niaskia.

5 Yejua ika Sanbalat kititanik itakeual maj oksepa nechiluiti maj nitemo, uan maaktiaya se amat tein amo tetekuiniujtoya nion kipiaya sello.* 6 Amat kijtouaya: “Akin nemij itech okseki altepemej uan Guésem kijtojtinemij ke tejua uan judíos nankinekij nankiixnamikiskej tekiuaj, yejua ika tikyekchijchiujtok tepamit uan no kijtouaj ke tejua timochiuas inintekiuaj. 7 Uan no tikinixtalij tanauatianij* para maj yakan nochi ueyi xolal Jerusalén uan maj kitematiltikan nejin: ‘¡Nikan Judá tikpiaj se yankuik tekiuaj!’. Nochi nejin kimatis tekiuaj, yejua ika xiuiki para maj ika titajtokan tein panotok”.

8 Sayoj ke nitanauatij maj kiluitij: “Amo melauj tein tikijtojtok, tixolopij”. 9 Yejuan kinekiaj techmojmoujtiskej uan kijtouayaj: “Mosenkauaskej* uan amo matamiskej tekit”. Yejua ika noDios, xinechyolchikaua.*

10 Satepan nikitato Semaya akin ijkuak amo kisaya de ichan. Itat Semaya katka Delayá, uan iueyitat katka Mehetabel. Semaya nechiluij: “Maj tikixtalikan kemanian timoajsiskej taijtik de ichan toTajtsin Dios porin youak ualaskej mitsmiktikiuij. Yejua ika, keman ompa tietoskej titatsakuaskej para maj amo mitsmiktikan”. 11 Sayoj ke nikiluij: “Nejua nitaixyekankej, amo monekiskia nicholos. ¿Xe uelis nikalakis ichan Dios uan niksentokas niyoltos? ¡Ipa amo nikalakis!”. 12 Uan nikajsikamatik ke Dios amo kititanka nejon tanauatijkej, ta Tobías uan Sanbalat kitaxtauijkaj para maj nechkajkayaua. 13 Kitaxtauijkaj para nechmojmoujtiskej uan kichiuaskej maj nitajtakolchiua. Ijkon ueliskia kichiuaskej maj amo kuali nechitakan uan maj amo kuali noka tajtokan.

14 NoDios, amo xikelkaua nochi tein Tobías uan Sanbalat kichiuanij. No xikelnamiki ke tanauatijkej Noadías uan okseki tanauatianij miakpa kitemojkej nechmojmoujtiskej.

15 Tepamit tiktamichijchiujkej itech tonal 25 den metsti elul.* Tiuejkaujkej 52 tonalmej.

16 Akin techtauelitayaj kimatkej ke tiktamichijchiujkajya tepamit uan akin ompaka nemiaj kiitakej, yejua ika nochin semi mopinaujmatkej. Kiajsikamatkej ke timatankaj porin toDios techpaleuijka. 17 Itech nochi nejon tonalmej, uejueyi chiuanimej de Judá kijkuilouayaj miak amamej uan kititaniliayaj Tobías, uan Tobías kinnankiliaya. 18 Miakej akin nemiaj Judá motenkaujkaj iuan Tobías ke kipaleuiskiaj porin katka imontikauj Secanías iokichpil Ará. Uan Jehohanán iokichpil Tobías monamiktijka iuan isiuapil Mesulam iokichpil Berekías. 19 Uan no, yejuan nochipa kuali ika tajtouayaj Tobías keman nechnojnotsayaj uan satepan yayaj kiluitij tein nikijtouaya. Yejua ika, Tobías nechualtitaniliaya amamej kampa kijkuilouaya miak taman para nechmojmoujtis.

7 Keman tiktamichijchiujkej tepamit tein kiyoualoua Jerusalén, niman nikintalij puertas. Satepan nikinixtalij akin tajpiaskiaj puertajtenoj, akin cantaroskiaj uan nikiniluij levitas toni tekit kichiuaskiaj. 2 Satepan nikixtalij nokniuj Hananí maj taixyekana Jerusalén uan no nikixtalij Hananías akin taixyekanaya itech ueyi kali tein kikuiaj soldados. Nikixtalij Hananías porin katka takuaujtamach uan okachi kimojkatokaya Dios ke okseki takamej. 3 Uan nikiniluij: “Akin tajpiaj puertajtenoj moneki kitaposkej puertas de Jerusalén hasta nepantaj.* Uan akin tajpixtoskej keman tapoyauis moneki kuali tatsakuaskej. Xikinixtalikan maj tajpiakan akin nemij Jerusalén, sekin maj moketsakan kampa ipa se tajpia uan oksekin maj moketsakan ininkalixpan”. 4 Maski Jerusalén semi ueyi katka, amo miakej nemiaj ompa uan kalmej ayamo kinyekchijchiuayaj.

5 Satepan noDios kichiuak maj niknemili nikinsentilis* uejueyi chiuanimej, okseki taixyekananij uan nochin judíos para tikinijkuiloskej nochin por familias. Uan nikajsik amatajkuilol kampa ijkuiliujtoyaj akonimej yekinika pankiskaj Jerusalén. Ompa kijtouaya nejin:

6 “Yejuan nejin judíos akin kiskej de Babilonia kampa tekiuaj Nabucodonosor* kinuikaka. Keman mokepkej Judá, mokaltalitoj Jerusalén uan okseki uejueyi xolalmej kampa achto nemiaj ininuejkaujtatuan. 7 Akin kinixyekanayaj nejin judíos katkaj Zorobabel, Jesúa, Nehemías, Azarías, Raamías, Nahamaní, Mardoqueo, Bilsán, Mispéret, Bigvái, Nehúm uan Baaná.

”Nikan ixnesi kanachi takamej israelitas katkaj: 8 de ikoneuan Parós katkaj 2,172; 9 de ikoneuan Sefatías katkaj 372; 10 de ikoneuan Ará katkaj 652; 11 de ikoneuan Jesúa uan Joab katkaj 2,818 (Jesúa uan Joab katkaj ikoneuan Pahat-Moab); 12 de ikoneuan Elam katkaj 1,254; 13 de ikoneuan Zatú katkaj 845; 14 de ikoneuan Zacái katkaj 760; 15 de ikoneuan Binuí katkaj 648; 16 de ikoneuan Bebái katkaj 628; 17 de ikoneuan Azgad katkaj 2,322; 18 de ikoneuan Adonicam katkaj 667; 19 de ikoneuan Bigvái katkaj 2,067; 20 de ikoneuan Adín katkaj 655; 21 de ikoneuan Ater akin pouia iniuan ichankauan Ezequías katkaj 98; 22 de ikoneuan Hasum katkaj 328; 23 de ikoneuan Bezái katkaj 324; 24 de ikoneuan Harif katkaj 112; 25 de ikoneuan Gabaón katkaj 95; 26 takamej akin katkaj de Belén uan Netofá katkaj 188; 27 takamej de Anatot katkaj 128; 28 takamej de Bet-Azmávet katkaj 42; 29 takamej de Quiryat-Jearim, Kefirá uan Beerot katkaj 743; 30 takamej de Ramá uan Gueba katkaj 621; 31 takamej de Micmás katkaj 122; 32 takamej de Betel uan Hai katkaj 123; 33 takamej den ueyi xolal tein no monotsa Nebo katkaj 52; 34 de ikoneuan takat akin no monotsa Elam katkaj 1,254; 35 de ikoneuan Harim katkaj 320; 36 takamej de Jericó katkaj 345; 37 de ikoneuan Lod, Hadid uan Onó katkaj 721 38 uan de ikoneuan Senaá katkaj 3,930.

39 ”De ikoneuan Jedayá mokepkej 973 tiopixkamej. Yejuan no katkaj ichankauan Jesúa. 40 De ikoneuan Imer katkaj 1,052 tiopixkamej; 41 de ikoneuan Pasjur katkaj 1,247 tiopixkamej 42 uan de ikoneuan Harim katkaj 1,017 tiopixkamej.

43 ”De ikoneuan Jesúa akin pouiaj iniuan ichankauan Cadmiel mokepkej 74 levitas. Yejuan no katkaj ikoneuan Hodevá. 44 De ikoneuan Asaf akin cantarouayaj katkaj 148. 45 Yejuan nejin levitas akin tajpiayaj puertajtenoj: ikoneuan Salum, ikoneuan Ater, ikoneuan Talmón, ikoneuan Acub, ikoneuan Hatitá uan ikoneuan Sobái. Yejuan katkaj 138.

46 ”Yejuan nejin akin tekitiaj templo* akin mokepkej: ikoneuan Ziha, ikoneuan Hasufá, ikoneuan Tabaot, 47 ikoneuan Querós, ikoneuan Sia, ikoneuan Padón, 48 ikoneuan Lebaná, ikoneuan Hagabá, ikoneuan Salmái, 49 ikoneuan Hanán, ikoneuan Guidel, ikoneuan Gahar, 50 ikoneuan Reayá, ikoneuan Rezín, ikoneuan Necodá, 51 ikoneuan Gazam, ikoneuan Uzá, ikoneuan Paséah, 52 ikoneuan Besái, ikoneuan Meunim, ikoneuan Nefusesim, 53 ikoneuan Bacbuc, ikoneuan Hacufá, ikoneuan Harhur, 54 ikoneuan Bazlit, ikoneuan Mehidá, ikoneuan Harsá, 55 ikoneuan Barcos, ikoneuan Sísara, ikoneuan Témah, 56 ikoneuan Nezías uan ikoneuan Hatifá.

57 ”Sekin akin mokepkej katkaj ininkoneuan akin kitekitiliayaj Salomón. Yejuan katkaj: ikoneuan Sotái, ikoneuan Soféret, ikoneuan Peridá, 58 ikoneuan Jaalá, ikoneuan Darcón, ikoneuan Guidel, 59 ikoneuan Sefatías, ikoneuan Hatil, ikoneuan Pokéret-Hazebaim uan ikoneuan Amón. 60 Nochin akin tekitiaj templo* uan ininkoneuan akin kitekitiliayaj Salomón katkaj 392.

61 ”Akin pankiskej de Tel-Mélah, Tel-Harsá, Kerub, Adón uan Imer amo uelik kinextijkej ke yejuan nion ininueyi familia katkaj israelitas. Akin pankiskaj katkaj: 62 ikoneuan Delayá, ikoneuan Tobías uan ikoneuan Necodá. Yejuan katkaj 642. 63 Uan tiopixkamej akin no pankiskej katkaj: ikoneuan Habaya, ikoneuan Hacoz uan ikoneuan Barzilái. Barzilái monamiktij iuan semej isiuapipiluan Barzilái akin galaadita uan peuak kiixmatij kemej motokaytiaya imontat. 64 Yejuan kitemojkej itokay de ininueyi familia kampa ijkuiliujtokej nochin uejueyi familias sayoj ke amo kiajsikej, yejua ika amo kinkaujkej maj tekitikan kemej tiopixkamej. 65 Taixyekankej* kinnauatij maj amo kikuakan nion teyi tein kimaktilijkaj Dios, hasta maj ualani se tiopixkat akin ueliskia kikuis Urim uan Tumim* para kitajtanis Dios ox yekmelauj katkaj tiopixkamej.

66 ”Nochin akin mokepkej katkaj 42,360. 67 No mokepkej 7,337 takamej uan siuamej akin katkaj takeualmej uan 245 takamej uan siuamej akin cantarouayaj. 68 Kinuikakej 736 caballos, 245 mulas, 69 435 camellos uan 6,720 burros.

70 ”Sekin akin kinixyekanayaj uejueyi familias kitetayokolijkej seki taman para tekit tein mochiujtoya. Taixyekankej* kitetayokolij chikueyi kilo uan tajko* de oro, 50 kaxit uan 530 tasal tein ueyak tein kikuiaj tiopixkamej. Nochi nejon kitalijkej kampa kisentiliayaj tein mokuiskia itech templo. 71 Okseki takamej akin kinixyekanayaj uejueyi familias kitetayokolijkej 168 kilos* de oro uan 1,254 kilos* de plata. Nochi nejon kitalijkej kampa kisentiliayaj tein mokuiskia itech templo. 72 Uan nochin okseki judíos kitetayokolijkej 168 kilos* de oro, 1,140 kilos* de plata uan 67 tasal tein ueyak tein kikuiaj tiopixkamej.

73 ”Uan tiopixkamej, levitas, akin tajpiayaj puertajtenoj, akin cantarouayaj, akin tekitiaj templo* uan nochin okseki israelitas mokaltalitoj itech uejueyi xolalmej kampa achto nemiaj ininuejkaujtatuan. Itech metsti tisri,* israelitas ipa chanchiuayajya itech nejon uejueyi xolalmej”.

8 Uan nochin israelitas sekosan mosentilijkej itech plaza tein yetok taixpan den puerta tein monotsa At. Satepan kiluijkej Esdras akin kimaijkuilouaya itajtol Dios maj kiualkui amatajkuilol kampa ijkuiliujtoya Tanauatil tein Jehová kimakaka Moisés. Nejon Tanauatil katka para nochin israelitas. 2 Yejua ika tiopixkat Esdras kiuikak iTanauatil Dios kampa mosentilijkaj takamej, siuamej uan nochin akin kiajsikamatiajya tein kikakiaj. Yejua kichiuak nejon itech yekinika tonal den metsti tisri.* 3 Uan Esdras peuak kinlerouilia takamej, siuamej uan nochin akin ueliajya kiajsikamatiaj tein kikakiaj. Yejuan yetoyaj itech plaza tein yetok taixpan den puerta tein monotsa At. Esdras kinlerouilij amatajkuilol kampa ijkuiliujtoya Tanauatil desde keman tanesik hasta nepantaj, uan nochin kuali takaktoyaj. 4 Esdras akin kimaijkuilouaya itajtol Dios ijkatoya itech se tarima tein kichijchiujkaj para nejon nechikol. Iyekmakopa ijkatoya Matitías, Sema, Anaya, Urías, Hilquías uan Maaseya, uan iopochmakopa ijkatoya Pedaya, Misael, Malkiya, Hasum, Has-Badaná, Zacarías uan Mesulam.

5 Esdras kiixtapoj amatajkuilol uan nochin kiitstoyaj porin uejkapan ijkatoya. Keman kiixtapoj, nochin akin mosentilijkaj moketskej. 6 Esdras kiueyitalij toTajtsin Dios Jehová akin semi chikauak uan nochin akin mosentilijkaj kijtojkej “¡Maj ijkon mochiua!”* “¡Maj ijkon mochiua!”, uan momaajokkej. Satepan motankuaketskej iixpan Jehová uan moixpilojkej hasta talpan. 7 Uan levitas Jesúa, Baní, Serebías, Jamín, Acub, Sabetái, Hodías, Maaseya, Quelitá, Azarías, Jozabad, Hanán uan Pelayá kinmelauilijkej nochin akin ompa ijkatoyaj tein kijtosnekia Tanauatil. 8 Uan Esdras uan okseki levitas kisentokakej kinlerouilijkej amatajkuilol kampa ijkuiliujtoya iTanauatil toTajtsin Dios uan kuali kinmelauilijkej toni kijtosnekia. Ijkon kinpaleuijkej nochin maj kiajsikamatikan tein kinlerouilijtoyaj.

9 Uan Nehemías, Esdras uan levitas kiniluijkej nochin akin mosentilijkaj: “Nejin se tonal tein xeliujtok para tikueyitaliskej toDios Jehová. Amo xichokakan nion ximotayokoltikan”. Kiniluijkej nejon porin nochin chokatoyaj keman kikaktoyaj tein kijtouaya Tanauatil. Nehemías katka taixyekankej,* Esdras katka tiopixkat uan kimaijkuilouaya itajtol Dios uan levitas tamachtiayaj. 10 Uan Nehemías kiniluij: “Xiakan xikuatij tapalol tein okachi uelik* uan xitayitij vino tein tsopek. Uan no xikinuantitij tapalol akin amo kipiaj tein kikuaskej, porin nejin tonal xeliujtok para tikueyitaliskej toTeko. Amo xitayokoxtokan, porin Jehová kichiua xiyolpakikan uan namejuan kuali nanyetoskej”. 11 Uan levitas kinekiaj kinyolseuiskej nochin akin mosentilijkaj, yejua ika kiniluiayaj nejin: “Amo xichokakan, porin nejin tonal xeliujtok para tikueyitaliskej Dios. Amo xitayokoxtokan”. 12 Nochin akin mosentilijkaj kiajsikamatkej tein kinmachtijkaj, yejua ika yajkej takuatoj, tatayitoj, kinuantitoj tapalol akin amo kipiayaj tein kikuaskej uan semi yolpakkej nochi nejon tonal.

13 Mostika, takamej akin kinixyekanayaj uejueyi familias, tiopixkamej uan levitas kiitatoj Esdras* porin kinekiaj okachi kiajsikamatiskej tein kijtouaya Tanauatil. 14 Uan kiitakej ke itech Tanauatil tein Jehová kimakaka Moisés, kijtouaya ke israelitas monekia nemiskej itech kaltsitsin keman iluichiuaskiaj itech metsti tisri.* 15 No kijtouaya ke monekia yaskej itech nochi uejueyi xolalmej uan ueyi xolal Jerusalén para kitematiltiskej nejin: “Xiakan kampa tepeyoj xikmatekitij olivojkouit, pinojkouit, mirtojkouit, palmajkouit uan okseki kouit tein onkas. Xikinmatekikan tein kualtsin maxiujyojkej para nankichijchiuaskej kaltsitsin ijkon kemej ijkuiliujtok”.

16 Yejua ika nochin israelitas yajkej kimatekitoj koujmej uan mochijchiuilijkej kaltsitsin ininkalkuako,* ininkalixpan uan itech patios de ichan toTajtsin Dios. No kichijchiujkej kaltsitsin itech plaza tein yetok taixpan den puerta tein monotsa At uan plaza tein yetok taixpan den puerta tein monotsa Efraín. 17 Nochin akin kiskaj de Babilonia kampa kinuikakaj mochijchiuilijkej kaltsitsin uan ompa mokauayaj. Uan nochin israelitas semi yolpakiaj porin amo ijkon iluititoyajok desde keman nemia Josué iokichpil Nun. 18 Uan mojmostaj kilerojkej amatajkuilol kampa ijkuiliujtoya iTanauatil toTajtsin Dios, desde keman peuak iluit hasta keman tamik. Iluit uejkauak chikome tonal, uan mostika nochin mosentilijkej para kiueyichiuaskej Dios ijkon kemej kijtouaya Tanauatil.

9 Israelitas mosentilijkej itech tonal 24 den metsti tisri.* Nejon tonal amo takuajkej, motalilijkej tasal tein teajuayotia uan mokuatemilijkej talnex. 2 Ijkuak, akin katkaj israelitas moxelojkej de akin amo katkaj israelitas uan amo iniuan mouikakejok. Moketskej uan kijtojkej tein amo kuali tein kichiujkej yejuan uan ininuejkaujtatuan. 3 Oksepa moketskej uan chikauak kilerojkej amatajkuilol kampa ijkuiliujtok iTanauatil ininDios Jehová. Talerojtoyaj eyi hora uan okseki eyi hora kijtojtoyaj tein amo kuali tein kichiujkej. Yejuan motankuaketskej uan miakpa moixpilojkej iixpan ininDios Jehová.

4 Jesúa, Baní, Cadmiel, Sebanías, Buní, Serebías, Baní uan Kenaní tejkokej* itech tarima tein kikuiaj levitas uan chikauak kitataujtijkej ininDios Jehová. 5 Uan levitas Jesúa, Cadmiel, Baní, Hasabneya, Serebías, Hodías, Sebanías uan Petahías kijtojkej: “Ximoketsakan uan nochipaya xikueyichiuakan toDios Jehová. ToDios, maj kiueyitalikan motokaytsin tein semi ueyi, tein kinamiki maj kiueyitalikan uan maj kuali ika tajtokan.

6 ”Jehová, sayoj tejua yekmelauj tiDios. Tejua tikchijchiuak iluikak tein semi uejkapan moajsi uan nochi tein ompa onkak.* Tikchijchiuak taltikpak uan nochi tein nikan onkak, no tikchijchiuak mares uan nochi tein ompa onkak. Tejua tikchiua maj nochi yolto uan nochi tein onkak iluikak* moixpiloua moixpan. 7 ToTajtsin Jehová, sayoj tejua yekmelauj tiDios. Tejua tikijitak Abrán para maj mitstekitili, tikixtij de Ur, ueyi xolal kampa nemiaj caldeos uan tiktokaytij Abrahán. 8 Kemej tikitak ke mitstakamatia ika nochi iyolo, timotenkauak iuan ke tikmakaskia yejua uan ikoneuan inintal cananeos, hititas, amorreos, perizitas, jebuseos uan guirgaseos. Uan tikchiuak tein timotenkauak porin nochipa tikchiua tein kuali.

9 ”Uan keman tikitak ke touejkaujtatuan tajyouijtoyaj ompa Egipto, uan keman tikakik ke mitstsajtsilijtoyaj xikinpaleui keman yetoyaj tatenoj den mar Rojo, 10 tikchiuak seki taman tein amo keman mochiujtoya para tiktatsakuiltis faraón, itakeualuan uan nochin akin nemiaj Egipto. Tikchiuak nejon porin tikmatia ke yejuan kintajyouiltijkaj touejkaujtatuan. Uan tikteixmatiltij motokay tein kisentoka moixmati hasta axkan. 11 Motekitikauan kiitakej keman tiktajkoxeloj mar uan yejuan panokej kampa tauaktoya. Akin kintokatiayaj tikinpantamotak itech mar kampa okachi uejkatan, kemej se tet tein se kipantamota itech mar tein chikauak moolinijtok. 12 Tonayan tikinyekantiaya motekitikauan ika se mixti, uan de youak tikinyekantiaya ika tit.* Ika nejon tit tikintauilijtiajki itech ojti kampa monekia yaskej. 13 Tiualpantemok itech tepet Sinaí uan tikinnojnotsak desde iluikak. Tikinmakak tanauatilmej para kiixtaliskej tein kinamiki mochiuas uan tanauatilmej tein amo mopataj.* No tikinmachtij tein kuali yetok. 14 Tikinmachtij maj moseuikan sábado porin timoxelouilij nejon tonal. Tikixtalij seki taman tein kichiuaskiaj, tikinmachtij tein kuali uan tikinmakak tanauatilmej tein tiknauatij motekitikauj Moisés maj kinmatilti. 15 Keman mayankej, tikinmakak pantsin de ne iluikak uan keman amikkej tikinkixtilij at den tepejxit. Tikiniluij maj kalakikan itech tal tein timotenkaujka tikinmakas uan maj moaxkatilikan.

16 ”Sayoj ke touejkaujtatuan moueyimatkej uan amo takakkej nion kitakamatkej motanauatiluan. 17 Amo kinekkej mitstakamatiskej nion kielnamikkej milagros tein tikchiujka para tikinpaleuis. Yejuan amo kinekkej takakiskej, ta kiixtalijkej okse takat maj kinixyekana para mokepaskej Egipto uan maj oksepa kintekitiltikan. Sayoj ke tejua toDios tikneki titetapojpoluis, titeiknelia uan tiyolkuali, amo niman tikualani* uan nochipa titetasojta, yejua ika amo tikinkauak. 18 Touejkaujtatuan mochijchiuilijkej se kuakuejkonet de tepos uan peuak kijtouaj: ‘Yejua nejin moDios tein mitskixtij de Egipto’. Uan tel amo mitstakachiujkej* ika nochi tein kichiujkej. 19 Maski ijkon, tiksentokak tikinpaleuij keman yetoyaj kampa tauaktok porin semi titeiknelia. Amo tikajchiuak mixti tein kinixyekanaya tonayan nion tikajchiuak tit tein kintauilijtiaya youak itech ojti kampa monekia yaskej. 20 Uan no, tikinmakak mochikaualis para maj mochiuanij tamatinij. Nochipa tikinmakak maná uan tikinmakak at keman amikiaj. 21 Nochipa tikintamakak keman yetoyaj 40 xiujmej kampa tauaktok. Amo teyi kinpoloj. Inintasal amo patik nion metsposauayakej.*

22 ”Tikinpaleuij maj kintanikan tekiuanij uan akin nemiaj itech xolalmej, uan tikinxejxelouilij talmej tein kipiayaj. Yejua ika moaxkatilijkej tal kampa taixyekanaya Sehón uan tal kampa taixyekanaya Og. Sehón nemia Hesbón uan Og taixyekanaya Basán. 23 Tikchiuak maj kinpiakan tel miakej ininkoneuan. Tel miakej katkaj kemej sitalimej tein onkak iluikak. Satepan tikinuikak itech tal tein moaxkatiliskiaj ijkon kemej timotenkaujka iniuan ininuejkaujtatuan. 24 Uan ininkoneuan kalakkej itech nejon tal uan moaxkatilijkej. Tikinpaleuij maj kintanikan akin nemiaj Canaán uan maj kintanikan tekiuanij akin ompa taixyekanayaj uan akin nemiaj itech nejon xolalmej. Tikinpaleuij israelitas para maj kinchiualtikan tein kinekiskiaj. 25 Moaxkatilijkej uejueyi xolalmej kampa tatsaktoya ika uejueyi tepamit uan talmej kampa moteltachiua. No moaxkatilijkej kalmej tein kipiayaj miak taman tein kuali, uejueyi talkoyokmej kampa kisentiliayaj at, talmej kampa onkaya uvas, olivojkoujmej uan okseki koujmej tein takiaj. Yejua ika takuajkej, ixuikej uan motomaujkej. Yolpakiaj porin tikinnextilij ke semi tikintasojtaya.

26 ”Maski tikchiuak nochi nejon, touejkaujtatuan amo mitstakamatkej, mitsixnamikkej uan amo kichiujkej tein kijtoua moTanauatil. Kinmiktijkej motanauatijkauan* akin semi kiniluiayaj maj oksepa mitsueyichiuakan. Uan tel amo mitstakachiujkej ika nochi tein kichiujkej. 27 Yejua ika tikchiuak maj akin kintauelitayaj kintanikan, uan yejuan kisentokakej kintajyouiltijkej. Sayoj ke yejuan mitstsajtsiliayaj xikinpaleui keman tajyouijtoyaj uan tejua tikinkakia desde ne iluikak. Kemej semi titeiknelia, tikinixtaliaya takamej para maj kinmakixtikan uan maj amo kintajyouiltianijok akin kintauelitayaj.

28 ”Sayoj ke keman touejkaujtatuan oksepa kualtsin nemiaj, yejuan oksepa kichiuayaj tein amo mitsyolpaktia. Yejua ika tikauaya maj akin kintauelitayaj kintanikan uan maj kintajyouiltikan. Yejuan oksepa mitstataujtiayaj xikinpaleui uan tejua miakpa tikinkakik desde ne iluikak uan tikinmakixtij porin semi titeiknelia. 29 Tejua miakpa tikiniluiaya maj oksepa kitakamatikan moTanauatil, sayoj ke yejuan moueyimatiaj uan amo kinekiaj kikakiskej tein titanauatia. Tajtakolchiujkej porin amo kichiujkej tein tikixtalia, maski tein tikixtalia kichiua maj kisentokakan nemikan akin kitakamatij. Kiixtalijkej kisentokaskej mitsixnamikiskej uan tel amo kinekkej takakiskej. 30 Miak xiujmej tikchiak maj mopatakan, uan tikintitanik motanauatijkauan akin tikinmakak mochikaualis para maj kinnejmachtikan, sayoj ke amo kinekkej takakiskej. Yejua ika tikchiuak maj akin ompaka nemiaj kintanikan. 31 Uan kemej semi titeiknelia, amo tikinixpoloj nion tikinsenkauak porin tiyolkuali toDios uan titeiknelia.

32 ”ToDios, tejua semi tiueyichiujkej, semi tichikauak, tikchiuani miak taman tein se kimojkaita, tikchiuak tein timotenkauak uan nochipa titetasojta. Nochipa xikelnamiki nochi tein tikijyouianij desde keman peuak techtajyouiltiaj akin tekiuajtikej Asiria hasta axkan. Techtajyouiltianij tejuan, tekiuanij uan uejueyi chiuanimej akin techixyekanaj, totiopixkauan, totanauatijkauan, touejkaujtatuan uan nochin oksekin akin pouij itech moxolal. 33 Tejua tikchiuani tein kinamiki maski semi titajyouianij, porin tikchiuani ijkon kemej tikijtoj. Tejuan timotemolianij porin tikchiuanij miak taman tein amo kuali. 34 Tekiuanij uan uejueyi chiuanimej akin techixyekanaj, totiopixkauan uan touejkaujtatuan amo kitakamatkej moTanauatil, amo kichiujkej tein tikinmachtij nion kikakkej tein tikinnejmachtij. 35 Yejuan amo mitstekitilijkej uan kisentokakej kichiujkej tein amo kuali maski akin kinixyekanayaj katkaj israelitas, maski tikinmakaya miak taman tein kuali uan maski nemiaj itech se tal tein tejua tikinmakak kampa semi taueyika uan moteltachiua. 36 Uan xikitasan, tejuan titakeualmej itech nejin tal tein tikinmakak touejkaujtatuan. Tejua tikinmakaka nejin tal para maj kikuanij nochi tein kuali tein mochiua nikan. 37 Kemej semi titajtakolchiuanij, nochi tein mochiua nikan mokuiliaj tekiuanij akin tikinkauak maj techixyekanakan. Yejuan techchiuaj* kemej kinekij uan no ijkon kinchiuaj totapialuan. Semi titajyouijtokej.

38 ”Nochi nejin kichiua maj axkan timotenkauakan ke tikchiuaskej seki taman. Tein timotenkauaj tikijkuilojtokej uan uejueyi chiuanimej akin techixyekanaj, levitas uan totiopixkauan kitaliliskej sello* para maj nochin kiitakan ke kualtia”.

10 Amat kampa kijkuilojkej tein motenkaujkej kitalilijkej sello* para maj kualtia. Yejuan nejin takamej akin kitalilijkej ininsello:

9 Uan levitas akin kitalilijkej ininsello katkaj: Jesúa, Binuí uan Cadmiel. Itat Jesúa katka Azanías uan Binuí katka semej iokichpipiluan Henadad. 10 Uan okseki levitas katkaj Sebanías, Hodías, Quelitá, Pelayá, Hanán, 11 Micá, Rehob, Hasabías, 12 Zacur, Serebías, Sebanías, 13 Hodías, Baní uan Beninú.

14 Uan takamej akin kinixyekanayaj israelitas akin kitalijkej ininsello katkaj: Parós, Pahat-Moab, Elam, Zatú, Baní, 15 Buní, Azgad, Bebái, 16 Adonías, Bigvái, Adín, 17 Ater, Ezequías, Azur, 18 Hodías, Hasum, Bezái, 19 Harif, Anatot, Nebái, 20 Magpías, Mesulam, Hezir, 21 Mesezabel, Sadoc, Jadúa, 22 Pelatías, Hanán, Anaya, 23 Hosea, Hananías, Hasub, 24 Halohés, Pilhá, Sobec, 25 Rehúm, Hasabná, Maaseya, 26 Ahíya, Janán, Anán, 27 Maluc, Harim uan Baaná.

28 Uan no motenkaujkej ke kichiuaskej tein kijtouaya amat nochin okseki tiopixkamej, levitas, akin tajpiayaj puertajtenoj, akin cantarouayaj uan akin tekitiaj templo.* No motenkaujkej nochin akin moxelojkaj uan amo mouikayajok iniuan akin amo israelitas akin ompaka nemiaj, porin kinekiaj kitakamatiskej iTanauatil toTajtsin Dios. Ijkon motenkaujkej kichiuaskej iniuan ininsiuauan, ininokichpipiluan uan ininsiuapipiluan. Motenkaujkej nochin akin kiajsikamatiajya tein monekia kichiuaskej. 29 Nejin israelitas no kichiujkej kemej ininparientes akin katkaj uejueyi chiuanimej. Yejuan motenkaujkej kitakamatiskej iTanauatil toTajtsin Dios uan kitajtanijkej Dios maj kintatsakuilti komo amo kitakamatiaj. ToTajtsin Dios kimakaka nejon Tanauatil itekitikauj Moisés. No motenkaujkej senkis kitakamatiskej nochi itanauatiluan toTeko Jehová, nochi tein kiixtalia uan tein tamachtia. Yejuan kijtojkej: 30 “Amo tikinnamiktiskej tosiuapipiluan iniuan ininokichpipiluan akin amo israelitas akin nikauin nemij, nion tikinnamiktiskej tookichpipiluan iniuan ininsiuapipiluan.

31 ”Uan komo akin amo israelitas akin nikauin nemij uitsej itech tonal sábado kinamakakij tataman takual uan okseki taman, amo tikintakouiskej nion itech tonal sábado nion okse tonal tein xeliujtok para Dios. Uan itech chikometika xiuit amo titatokaskej, ta tikauaskej maj moixseui tal uan akin techtauikiliaj amo tikintajtaniskejok maj techkepilikan.

32 ”Uan no, tisejsemej timotenkaujkej tiktemakaskej xijxiujtika naui gramo de plata* para tekit tein mochiua ichan toDios, 33 para pantsitsin, trigo uan okseki taman tein kimaktiliaj Dios. Nejon plata no mokuis para tapialmej tein kichichinouiliaj Dios itech tonal sábado uan keman mochiua iluit porin peua selik metsti. No mokuis para iluimej tein ixyetokya mochiuas, para nochi tein kimaktiliaj Dios, para tein kimaktiliaj para maj kintapojpolui israelitas porin tajtakolejkej uan para nochi tein moneki mochiuas ichan toDios.

34 ”No tiktatamotkej tetsitsin* para tikixtaliskej kemanian sejse ueyi familia kiuikas kouit tein kichichinoskej itech ialtar toDios Jehová, ijkon kemej ijkuiliujtok itech Tanauatil. Ininueyi familias tiopixkamej, levitas uan nochin israelitas kiuikaskej kouit ichan toDios. Ijkon kichiuaskej xijxiujtika. 35 Uan no, xijxiujtika tikuikaskej ichan Jehová trigo uan okseki taman tein yekinika chikauayas uan takilot tein yekinika yoksis. 36 No tikinuikaskej ichan toDios tookichpipiluan akin tayekanaj uan totapialuan, tokuakuejuan, toichkauan* uan tochivos tein achto yolkej ijkon kemej ijkuiliujtok itech Tanauatil. Nochi tein tikuikaskej tikinmakaskej tiopixkamej akin tekitij ichan toDios. 37 Uan no, tikinuikiliskej tiopixkamej harina xaxakachtik tein tikchijchiuaskej ika tatok tein yekinika tiktekiskej. No tikinuikiliskej tein tiknekij titetayokoliskej, itakilo tataman koujmej, vino tein yankuik uan aceite. Nejin kitaliskej itech cuartos de ichan toDios kampa kitaliaj nochi tein titetayokoliaj.* Levitas no tikinuikiliskej tepitsin* de nochi tein mochiua kampa titatokaj, porin ixyetok maj yejuan kikuitij itech uejueyi xolalmej kampa titatokaj tepitsin de nochi tein mochiua.

38 ”Uan se tiopixkat akin ikoneuj Aarón moneki yetos iniuan levitas keman kisentiliskej tepitsin* de nochi tein mochiuas kampa tatokaj israelitas. De nejon tein kisentiliskej, levitas moneki kitemakaskej tepitsin* para ichan toDios uan kitaliskej itech cuartos kampa kitaliaj nochi tein kitetayokoliaj.* 39 Israelitas uan levitas moneki kikauatiuij trigo, vino tein yankuik uan aceite itech cuartos kampa kitaliaj nochi tein kitetayokoliaj.* Ompa yetok nochi tein mokui ichan Dios uan no ompa mokauaj tiopixkamej akin tekititokej, akin tajpiaj puertajtenoj uan akin cantarouaj. Amo tiksenkauaskej ichan Dios”.

11 Akin kinixyekanayaj israelitas nemiaj Jerusalén, sayoj ke nochin okseki israelitas nemiaj itech okseki uejueyi xolalmej. Yejua ika kitatamotkej tetsitsin* para kinijitaskej seki familias uan kinuikaskej Jerusalén. De majtakti familias kijitaskiaj se familia para mokaltalitiuj Jerusalén, ueyi xolal tein Dios kijitak, uan okseki chiknaui familias mokauaskiaj itech okseki uejueyi xolalmej. 2 Uan no, israelitas kitajtanijkej Dios maj kintatiochiui takamej akin kiixtalijkej mokaltalitiuij Jerusalén.

3 Nikan ixnesij katiyejua uejueyi chiuanimej nemiaj Jerusalén. (Itech okseki uejueyi xolalmej de Judá nemiaj okseki israelitas, tiopixkamej, levitas, akin tekitiaj templo* uan ininkoneuan itakeualuan Salomón. Nochin yejuan nemiaj itech ininueyi xolal kampa kipiayaj inintal.

4 Ompa Jerusalén no nemiaj sekin akin pouiaj iniuan ikoneuan Judá uan Benjamín). Ataya katka semej uejueyi chiuanimej akin pouia iniuan ikoneuan Judá. Itat Ataya katka Uzías, itat Uzías katka Zacarías, itat Zacarías katka Amarías, itat Amarías katka Sefatías uan itat Sefatías katka Mahalalel. Mahalalel katka semej ichankauan Pérez. 5 Maaseya no katka semej uejueyi chiuanimej akin pouia iniuan ikoneuan Judá. Itat Maaseya katka Baruc, itat Baruc katka Colhozé, itat Colhozé katka Hazaya, itat Hazaya katka Adaya, itat Adaya katka Joiarib uan itat Joiarib katka Zacarías. Iuejkaujtat Zacarías katka Selá. 6 Ikoneuan Pérez akin nemiaj Jerusalén katkaj 468. Nejin takamej kuali tateuiayaj.

7 Salú katka semej uejueyi chiuanimej akin pouia iniuan ikoneuan Benjamín. Itat Salú katka Mesulam, itat Mesulam katka Joed, itat Joed katka Pedaya, itat Pedaya katka Colaya, itat Colaya katka Maaseya, itat Maaseya katka Itiel uan itat Itiel katka Jesayá. 8 Okseki uejueyi chiuanimej akin pouiaj iniuan ikoneuan Benjamín katkaj Gabái uan Salái. Yejuan katkaj 928 uejueyi chiuanimej. 9 Joel iokichpil Zicrí kinixyekanaya uejueyi chiuanimej akin yetoyaj itech ueyi xolal, uan Judá iokichpil Hasenuá kipaleuiaya maj taixyekana.

10 Tiopixkamej katkaj Jedayá uan Jakín. Itat Jedayá katka Joiarib. 11 Seraya no katka semej tiopixkamej. Itat Seraya katka Hilquías, itat Hilquías katka Mesulam, itat Mesulam katka Sadoc, itat Sadoc katka Merayot uan itat Merayot katka Ahitub. Ahitub katka semej takamej akin taixyekanaya ichan toTajtsin Dios. 12 Uan no nemiaj Jerusalén okseki tiopixkamej akin no tekitiaj ichan Dios. Yejuan katkaj 822. Adaya no katka semej tiopixkamej. Itat Adaya katka Jeroham, itat Jeroham katka Pelalías, itat Pelalías katka Amzí, itat Amzí katka Zacarías, itat Zacarías katka Pasjur uan itat Pasjur katka Malkiya. 13 Uan okseki tiopixkamej akin iuan tekitiaj Adaya kinixyekanayaj uejueyi familias. Yejuan katkaj 242. Amashái no katka semej tiopixkamej. Itat Amashái katka Azarel, itat Azarel katka Ahzái, itat Ahzái katka Mesilemot uan itat Mesilemot katka Imer. 14 Uan okseki tiopixkamej akin iuan tekitiaj Amashái katkaj yolchikaujkej uan kuali tateuiayaj. Yejuan katkaj 128 uan Zabdiel kinixyekanaya. Ichankauan Zabdiel katkaj uejueyi chiuanimej.

15 Semaya katka semej levitas. Itat Semaya katka Hasub, itat Hasub katka Azricam, itat Azricam katka Hasabías uan itat Hasabías katka Buní. 16 Okseki levitas katkaj Sabetái uan Jozabad. Yejuan kinixyekanayaj levitas uan tekitiaj kalampa de ichan toTajtsin Dios. 17 Okseki levitas katkaj Matanías, Bacbuquías uan Abdá. Matanías kinixyekanaya akin cantarouayaj uan no kiueyichiuaya Dios keman kitataujtiayaj. Bacbuquías kipaleuiaya Matanías maj taixyekana. Itat Matanías katka Miqueas, itat Miqueas katka Zabdí uan itat Zabdí katka Asaf. Itat Abdá katka Samúa, itat Samúa katka Galal uan itat Galal katka Jedutún. 18 Itech ueyi xolal tein Dios moxelouilijka nemiaj 284 levitas.

19 Uan akin tajpiayaj puertajtenoj katkaj Acub, Talmón uan oksekin akin iniuan tekitiaj. Yejuan katkaj 172.

20 Okseki israelitas, tiopixkamej uan levitas yetoyaj itech okseki uejueyi xolalmej de Judá, itech tal tein kinmakakaj. 21 Uan akin tekitiaj templo* nemiaj Ofel. Ziha uan Guispá kinixyekanayaj.

22 Uzí kinixyekanaya levitas akin nemiaj Jerusalén. Itat Uzí katka Baní, itat Baní katka Hasabías, itat Hasabías katka Matanías uan itat Matanías katka Micá. Yejuan katkaj ichankauan Asaf akin cantarouayaj. Uzí kiixyekanaya tekit tein mochiuaya ichan toTajtsin Dios. 23 Tekiuaj kiixtalijka maj mojmostaj kinmakanij akin cantarouayaj nochi tein kinpoloskia. 24 Petahías iokichpil Mesezabel kiyolmajxitiaya tekiuaj keniuj monekia taixyekanas. Mesezabel katka ichankauj Zérah iokichpil Judá.

25 Yejua nejin xolaltsitsin uan talmej tein kinyoualouaj. Sekin akin pouiaj iniuan ikoneuan Judá nemiaj Quiryat-Arbá, Dibón uan Jecabzeel uan xolaltsitsin tein ompa pouij.* 26 No nemiaj ompa Jesúa, Moladá, Bet-Pélet, 27 Hazar-Sual uan Beer-Seba uan xolaltsitsin tein ompa pouij. 28 Oksekin ikoneuan Judá no nemiaj Ziclag, Meconá uan xolaltsitsin tein ompa pouij. 29 No nemiaj ompa En-Rimón, Zorá, Jarmut, 30 Zanóah, Adulam uan xolaltsitsin tein ompa pouij, Lakís uan talmej tein kiyoualouaj uan Azecá uan xolaltsitsin tein ompa pouij. Akin nemiaj Judá mokaltalijkej itech talmej tein yetokej Beer-Seba hasta tal tamanis* tein moixmati kemej Hinón.

31 Akin pouiaj iniuan ikoneuan Benjamín yetoyaj Gueba, Micmash, Aya, Betel uan xolaltsitsin tein ompa pouij. 32 No nemiaj ompa Anatot, Nob, Ananíah, 33 Hazor, Ramá, Guitaim, 34 Hadid, Zeboím, Nebalat, 35 Lod uan Onó. Onó katka se tal tamanis tein monotsa Tamachijchiuanij.* 36 Uan seki grupos de levitas akin achto nemiaj Judá yajkej nemitoj kampa kintaxejxelouilijkaj ikoneuan Benjamín.

12 Yejuan nejin tiopixkamej uan levitas akin pankiskej Jerusalén iuan Zorobabel uan Jesúa. Itat Zorobabel katka Sealtiel. Tiopixkamej katkaj: Seraya, Jeremías, Esdras, 2 Amarías, Maluc, Hatús, 3 Secanías, Rehúm, Meremot, 4 Idó, Guinetói, Abías, 5 Mijamín, Maadías, Bilgá, 6 Semaya, Joiarib, Jedayá, 7 Salú, Amoc, Hilquías uan Jedayá. Yejuan nejin takamej akin kinixyekanayaj tiopixkamej uan okseki tiopixkamej akin iniuan tekitiaj keman Jesúa katka tayekankatiopixkat.

8 Uan levitas katkaj Jesúa, Binuí, Cadmiel, Serebías, Judá uan Matanías. Matanías uan akin iniuan tekitia kinixyekanayaj takamej akin cantarouayaj para kitasojkamatiliskej Dios. 9 Oksekin akin iniuan tekitiaj katkaj Bacbuquías uan Uní. Yejuan kiyekpiayaj templo uan moixnajnamiktoyaj iniuan levitas. 10 Itat Joiaquim katka Jesúa, itat Eliasib katka Joiaquim, uan itat Joiadá katka Eliasib. 11 Itat Jonatán katka Joiadá uan itat Jadúa katka Jonatán.

12 Yejuan nejin tiopixkamej akin kinixyekanayaj uejueyi familias keman Joiaquim katka tayekankatiopixkat: Meraya kinixyekanaya ichankauan Seraya; Hananías kinixyekanaya ichankauan Jeremías; 13 Mesulam kinixyekanaya ichankauan Esdras; Jehohanán kinixyekanaya ichankauan Amarías; 14 Jonatán kinixyekanaya ichankauan Malukí; José kinixyekanaya ichankauan Sebanías; 15 Adná kinixyekanaya ichankauan Harim; Helcái kinixyekanaya ichankauan Merayot; 16 Zacarías kinixyekanaya ichankauan Idó; Mesulam kinixyekanaya ichankauan Guinetón; 17 Zicrí kinixyekanaya ichankauan Abías; [...]* kinixyekanaya ichankauan Miniamín; Piltái kinixyekanaya ichankauan Moadías; 18 Samúa kinixyekanaya ichankauan Bilgá; Jehonatán kinixyekanaya ichankauan Semaya; 19 Matenái kinixyekanaya ichankauan Joiarib; Uzí kinixyekanaya ichankauan Jedayá; 20 Calái kinixyekanaya ichankauan Salái; Éber kinixyekanaya ichankauan Amoc; 21 Hasabías kinixyekanaya ichankauan Hilquías uan Netanel kinixyekanaya ichankauan Jedayá.

22 Keman Eliasib, Joiadá, Johanán uan Jadúa katkaj tayekankatiopixkamej, kinijkuilojkej akin kinixyekanayaj uejueyi familias den levitas uan tiopixkamej. Uan ijkon kinijkuilojtiajkej hasta keman Darío akin katka de Persia tekiuajtitoya.

23 Levitas akin kinixyekanayaj uejueyi familias kinijkuilojkej itech amatajkuilol kampa moijkuilouaya tein mochiuaya itech nejon tonalmej. Uan ijkon kinijkuilojtiajkej hasta keman Johanán iokichpil Eliasib katka tayekankatiopixkat. 24 Hasabías, Serebías uan Jesúa iokichpil Cadmiel kinixyekanayaj levitas. Uan oksekin akin iniuan tekitiaj kinxejxelojkaj por grupos, ijkatoyaj uan moixnajnamiktoyaj para kiueyichiuaskej Dios uan kitasojkamatiliskej ijkon kemej tanauatijka David. David katka itekitikauj toTajtsin Dios. 25 Matanías, Bacbuquías, Abdías, Mesulam, Talmón uan Acub tajpiayaj puertajtenoj kampa yetoyaj cuartos kampa kitaliayaj tein kitetayokoliayaj. Nejin cuartos yetoyaj tanakastan den puertas tein kipiaya ichan Dios. 26 Yejuan kichiujkej nejin tekit keman Joiaquim katka tayekankatiopixkat. Ijkuak, Nehemías taixyekanaya uan Esdras katka tiopixkat uan kimaijkuilouaya itajtol Dios. Itat Joiaquim katka Jesúa uan iueyitat katka Jozadac.

27 Keman yayaj iluichiuatij porin matankaj tepamit tein kiyoualoua Jerusalén, kintemotoj levitas kampa nemiaj uan kinualkuikej Jerusalén para iluichiuaskej porin semi yolpakiaj. Yejuan kitatsotsoniliskiaj Dios para kitasojkamatiliskej, kinkakistiltiskiaj címbalos* uan kitsotsonaskiaj cítaras* uan arpas. 28 Uan mosentilijkej akin cantarouayaj* akin ualeuayaj den tal tamanis* tein poui Jordán, akin nemiaj tanakastan de Jerusalén uan akin yetoyaj itech xolalmej kampa nemiaj netofatitas. 29 No mosentilijkej akin ualeuayaj de ueyi xolal Bet-Guilgal, akin nemiaj itech talmej tein yetokej tanakastan de Gueba uan Azmávet. Nejon xolalmej amo uejka yetokej de Jerusalén uan neskej keman akin cantarouayaj ompa mokaltalitoj. 30 Tiopixkamej uan levitas kichiujkej tein monekia para maj Dios kinita ke chipaujkej uan no kinpaleuijkej israelitas para maj Dios no ijkon kinita. Uan no kichiujkej tein monekia para maj Dios kiita ke chipauakya puertas uan tepamit tein kiyoualouaya ueyi xolal.

31 Satepan nikchiuak maj taixyekananij de Judá tejkonij* ikuapan tepamit. Uan no ojkan nikinxeloj akin cantarouayaj para kitasojkamatiliskej Dios, uan no ojkan nikinxeloj nochin akin mosentilijkaj para maj kitojtokakan* sejse grupo de akin cantarouayaj. Sekin akin cantarouayaj yajkej ininyekmakopa uan kisentokakej nejnenkej ikuapan tepamit hasta puerta tein monotsa Koujnex tein Montontentok. 32 Sekin akin kintojtokayaj katkaj Hosaya uan seki* taixyekananij de Judá. 33 No kintojtokayaj Azarías, Esdras, Mesulam, 34 Judá, Benjamín, Semaya uan Jeremías. 35 Uan no kintojtokatiayaj sekin tiopixkamej akin kipitstiayaj trompetas. Yejuan katkaj Zacarías uan iparientes. (Itat Zacarías katka Jonatán, itat Jonatán katka Semaya, itat Semaya katka Matanías, itat Matanías katka Micaya, itat Micaya katka Zacur uan itat Zacur katka Asaf). 36 Iparientes Zacarías akin iuan yayaj katkaj Semaya, Azarel, Milalái, Guilalái, Maái, Netanel, Judá uan Hananí. Yejuan kiuikayaj címbalos, arpas uan okseki taman tein ika tatsotsonayaj kemej tein David kinchijchiujka. David katka itekitikauj toTajtsin Dios. Uan Esdras akin kimaijkuilouaya itajtol Dios yaya taixpan. 37 Desde puerta tein monotsa Fuente nejnentiajkej ikuapan tepamit uan pankistiajkej. Panokej ikuapan Escalera tein temoua hasta ueyi xolal tein iaxka David uan no panokej kampa yetok ichan David uan yajkej hasta puerta tein monotsa At tein yetok kampa ualkisa tonaltsin.

38 Oksekin akin no cantarouayaj para kitasojkamatiliskej Dios nejnentiajkej ininopochmakopa ikuapan tepamit. Nejua nikintojtokatiaya uan no nouan yayaj okseki* israelitas akin mosentilijkaj. Tikpanauijkej uejkapan kali tein monotsa Hornos uan tepamit tein okachi patauak, 39 tipanokej kampa yetok puerta tein monotsa Efraín uan tiajkej hasta puerta tein monotsa Ciudad Vieja, tipanokej kampa yetok puerta tein monotsa Pescado uan tiajkej hasta uejkapan kali tein monotsa Hananel uan uejkapan kali tein monotsa Meá. Satepan tiksentokakej hasta puerta tein monotsa Ichkamej* uan tiajsikej kampa yetok puerta kampa tajpiaj soldados uan ompa timotsakuilijkej.

40 Satepan nochin ome grupos akin cantarouayaj para kitasojkamatiliskej Dios motsakuilijkej taixpan de ichan toTajtsin Dios. Nejua uan seki* taixyekananij akin nouan yayaj no ompa timotsakuilijkej. 41 Uan no motsakuilijkej tiopixkat Eliaquim, Maaseya, Miniamín, Micaya, Elioenái, Zacarías uan Hananías. Yejuan kipitstiayaj trompetas. 42 No motsakuilijkej Maaseya, Semaya, Eleazar, Uzí, Jehohanán, Malkiya, Elam uan Ézer. Akin cantarouayaj kisentokayaj chikauak cantarouayaj uan kinixyekanaya Izrahías.

43 Ijkuak, kimaktilijkej Dios miak tapialmej uan nochin semi yolpakkej porin toTajtsin Dios kintatiochiuij. Siuamej uan nochin siuapipil uan okichpipil no semi yolpakiaj. Semi uejka mokakia keniuj yolpakiaj akin yetoyaj Jerusalén.

44 Nejon tonal kinixtalijkej akin taixyekanaskiaj itech kalmej kampa mosentiliskia tein israelitas kitetayokoliskiaj, nochi tein yekinika chikauaya uan tepitsin* de nochi tein kitokkaj. Ompa mosentiliskia nochi tein mochiuaskia itech talmej tein kipiaj uejueyi xolalmej. Tanauatil kijtouaya ke nochi nejon monekia kinmakaskej tiopixkamej uan levitas. Nochin akin nemiaj Judá kichiujkej nejon porin semi yolpakiaj maj tiopixkamej uan levitas tekititonij ichan Dios. 45 Tiopixkamej uan levitas peujkej kichiuaj tekit tein kipiayaj ichan Dios uan tein monekia kichiuaskej para maj Dios kiita ke nochi chipauak. Uan akin cantarouayaj uan akin tajpiayaj puertajtenoj no peujkej kichiuaj tekit tein kipiayaj ijkon kemej tanauatijkaj David uan Salomón, iokichpil David. 46 Porin ne uejkauj, keman David uan Asaf nemiaj, kinixtalijkaj sekin maj kinixyekanakan akin cantarouayaj. Uan no kiitayaj maj kuali cantarokan canciones tein ika kiueyichiuayaj uan kitasojkamatiliayaj Dios. 47 Uan keman Zorobabel uan Nehemías taixyekantoyaj, nochin israelitas mojmostaj kinmakayaj tein ipa ixyetoya kinmakaskej akin cantarouayaj uan akin tajpiayaj puertajtenoj. Uan no kinmakayaj levitas tein ipa ixyetoya kinmakaskej uan levitas no kinxelouiliayaj ikoneuan Aarón tein ipa ixyetoya kinmakaskej.

13 Nejon tonal, akin mosentilijkaj kinlerouilijkej amatajkuilol tein Moisés kichijchiuak. Keman kilerojtoyaj kiitakej ke amo keman monekia kinkauaskej ammonitas uan moabitas maj pouikan iniuan akin kiueyichiuaj toTajtsin Dios, 2 porin yejuan amo kinmakakaj israelitas pantsin nion at. Uan hasta kitaxtauijkaj Balaam para maj kitajtaniani Dios maj kinpano tein amo kuali. Sayoj ke Dios amo kichiuak nejon, ta kintatiochiuij. 3 Yejua ika keman israelitas kikakkej tein kijtouaya Tanauatil, peuak kinxelouaj nochin akin ininuejkaujtat amo katka israelita.

4 Achto ke panoskia nejon, tiopixkat Eliasib taixyekanaya itech cuartos de ichan toDios kampa kitaliayaj tein kitetayokoliayaj.* Eliasib katka ipariente Tobías. 5 Eliasib kikauilijka Tobías se ueyi cuarto tein achto kikuiaj para kisentiliskej tein kitetayokoliayaj.* Ompa kisentiliayaj trigo uan okseki taman tein kimaktiliayaj Dios, istak kopal uan tein mokuia ichan Dios. No ompa kitaliayaj tepitsin* trigo uan cebada, tepitsin vino tein yankuik uan aceite tein ipa ixyetoya kinmakaskej levitas, akin cantarouayaj uan akin tajpiayaj puertajtenoj. Itech nejon cuarto no kitaliayaj tein ixyetoya kinmakaskej tiopixkamej.

6 Nejua amo nietoya Jerusalén keman panok nochi nejon porin nimokepka kampa yetoya tekiuaj. Ijkuak, tekiuaj Artajerjes 32 xiujmejya tekiuajtitoya Babilonia. Sayoj ke satepan oksepa niktajtanij maj nechkauani maj nimokepa Jerusalén. 7 Keman nimokepak Jerusalén nikitak tein amo kuali tein kichiujka Eliasib, porin kikaujka maj Tobías kikuini se cuarto tein yetoya itech patio de ichan toTajtsin Dios, tein achto kikuiaj para kisentiliskej tein kitetayokoliayaj. 8 Nechtelkualantij tein kichiuak, yejua ika nikalantamotak nochi tein Tobías kikalakijka itech nejon cuarto. 9 Satepan nitanauatij maj kinchipauanij cuartos kampa kisentiliayaj tein kitetayokoliayaj* uan oksepa ompa niktalij nochi tein mokuia ichan toTajtsin Dios. No ompa niktalij trigo, cebada uan istak kopal tein motemaktiskia.

10 No nikmatik ke amo kinmakatoyaj levitas tein ipa ixyetoya kinmakaskej. Nejon kichiuak maj levitas uan akin cantarouayaj akin ompa tapaleuijtoyaj maj yanij tekititij inintalpan. 11 Yejua ika nikinajuak okseki taixyekananij uan nikiniluij: “¿Keyej nankisenkaujkej ichan toTajtsin Dios?”. Satepan nikinsentilij nochin levitas akin kikaujteujkaj inintekiuj uan nikiniluij maj oksepa tekitikan. 12 Uan nochin akin nemiaj Judá kiuikakej tepitsin* trigo uan cebada, tepitsin vino tein yankuik uan aceite. Nochi nejon kiuikakej itech cuarto kampa kisentiliayaj tein kitetayokoliayaj. 13 Uan nikinixtalij tiopixkat Selemías, Sadoc uan Pedaya para maj taixyekanakan itech cuartos kampa kisentiliayaj tein kitetayokoliayaj. Sadoc kimaijkuilouaya itajtol Dios uan Pedaya katka semej levitas. Uan no nikixtalij Hanán maj kinpaleui. Nochin nejin takamej katkaj takuaujtamachmej. Uan nikiniluij ke monekia kinmakaskej ininparientes tein ipa ixyetoya maj kinmakakan. Itat Hanán katka Zacur uan itat Zacur katka Matanías.

14 NoDios, nochipa xinechelnamiki por nochi tein nikchiuani. Amo xikelkaua ke semi nimitstasojtani uan keniuj niknextiani ke nikpatiuita mochan uan tekit tein ompa mochiua.*

15 Nejon tonalmej no nikitak ke akin nemiaj Judá kichijchiuayaj vino,* kisentiliayaj trigo uan kinmamaltiayaj burros itech tonal sábado. No nikitak ke kiualkuiaj Jerusalén vino, uvas, higos uan okseki taman itech tonal sábado. Yejua ika nikinyekiluij maj amo tanamakanijok nejon tonal.* 16 Uan no, akin kayomej Tiro uan nemiaj Jerusalén kiualkuiaj pescado uan okseki taman uan kinnamakiltiayaj akin nemiaj Judá uan Jerusalén itech tonal sábado. 17 Yejua ika nikinajuak uejueyi chiuanimej de Judá uan nikiniluij: “¿Keyej nankichiujtokej tein tel amo kuali? ¿Keyej nankichiujkej tein amo monekia nankichiuaskej itech tonal sábado? 18 Yejua nejon tein kichiujkej namouejkaujtatuan, yejua ika Dios techtatsakuiltij uan kikauak maj akin techtauelitaj kiixpolouanij ueyi xolal. Uan axkan namejuan nankichiujtokej tein amo monekia nankichiuaskej itech tonal sábado. ¿Xe nankinekij maj Dios okachi kualani iniuan israelitas?”.

19 Yejua ika nitanauatij maj kitsakuakan puertas tein kipiaya ueyi xolal Jerusalén achto ke tapoyauiskia, porin ijkuak peuaya tonal sábado. No nitanauatij maj amo tatapokan hasta keman tamiskia nejon tonal. No nikinnauatij sekin akin nechpaleuiayaj maj tajpiakan itech puertas para maj amo akin tanamakani itech tonal sábado. 20 Yejua ika akin kinamakayaj miak taman, sepa oso ojpa mokaujkej nochi youal kalampa de Jerusalén. 21 Uan nikinyekiluij: “¿Toni nankichiuaj nikan? Komo oksepa namokauaj nochi youal kalampakopa den tepamit, namechtitilatsakiuj para namechtokas”.* Desde ijkuak, amo ualajkejok itech tonal sábado.

22 Yejua ika nikiniluij levitas maj kichiuakan tein monekia para maj Dios kinita ke chipaujkej uan maj ualakan tajpiakij para maj tonal sábado xeliujto para Dios. NoDios, no xikelnamiki nejin tein nikchiuak. Xinechikneli, tejua akin nochipa titetasojta.

23 Nejon tonalmej no nikitak ke seki judíos monamiktijkaj iniuan siuamej asdoditas, ammonitas uan moabitas. 24 Seki* ininkoneuan tajtouayaj asdodeo uan oksekin tajtouayaj kemej tajtouaj itech okseki xolalmej. Sayoj ke nion se ininkoneuj tajtouaya inintajtol judíos. 25 Yejua ika nikinajuak nejon judíos uan niktajtanij Dios maj kintatsakuilti. Sekin nikinmagak, nikinkuatsonuiuitak* uan nikiniluij: “Ximotenkauakan itokaykopa Dios ke amo nankinnamiktiskej namookichpipiluan iniuan ininsiuapipiluan. Uan amo no nankinnamiktiskej namosiuapipiluan iniuan ininokichpipiluan nion namejuan namonamiktiskej iniuan ininsiuapipiluan. 26 ¿Xe amo nankielnamikij ke yejua nejon tein kichiuak maj Salomón akin tekiuajtia Israel tajtakolchiua? De nochin akin tekiuajtikej itech okseki altepemej amo akin tekiuajtik kemej yejua. IDios kitasojtaya uan yejua ika kiixtalij maj tekiuajti itech xolal Israel. Maski ijkon, siuamej akin amo katkaj israelitas kichiujkej maj tajtakolchiua. 27 ¿Uan keyej namejuan no nankichiujkej nejin ueyi tajtakol? ¿Keyej nankiixnamikkej Dios uan namonamiktijkej iniuan siuamej akin amo israelitas?”.

28 Uan niktokak* semej iokichpipiluan Joiadá porin katka imontikauj Sanbalat akin katka de Bet-Horón. Itat Joiadá katka tayekankatiopixkat Eliasib.

29 NoDios, amo xikelkaua tein kichiujkej uan xikintatsakuilti porin kipitsotilijkej tekit tein kichiuaj tiopixkamej. Uan no kitapanauilijkej tein timotenkauak iniuan tiopixkamej uan levitas.

30 Nejua amo nikinkauakok israelitas maj kisentokanij kichiuanij tein amo kuali tein kichiuaj akin nemij itech okseki altepemej. Uan no nikitak keniuj tekitiskiaj tiopixkamej uan levitas ijkon kemej ixyetoya tekitiskej. 31 No nikitak maj ichan Dios kiualkuinij kouit keman ixyetoya maj kiualkuikan uan maj kiualkuinij tatok tein yekinika chikauaya.

NoDios, xikelnamiki nochi tein nikchiuak uan xinechtatiochiui.