TEIN KIJKUILOJ JUAN

1 Keman peuak nochi, achto ke Dios tachijchiuaskia, Tajtoltsin yetoya iuan Dios uan Tajtoltsin katka se dios.* 2 Keman peuak nochi, yejua yetoya iuan Dios. 3 Dios kichijchiuak itechkopa nochi okseki taman, uan komo amo yeskia itechkopa, nion se taman mochijchiuaskia.

4 Itechkopa Tajtoltsin, Dios kichiuak maj nemi nochi tein onkak, uan inemilis kintauilij akin nemij nikan taltikpak. 5 Tanex tauia kampa tayouayan, sayoj ke tayouayanilot amo ueli kiseuia tanex.

6 Ualaj se takat akin Dios kititanik. Monotsaya Juan. 7 Nejin takat ualaj kiteixmatiltiko nejin tanex, para maj miakej taneltokakan* ika tein kijtoj. 8 Juan amo katka nejon tanex, ta ualaj kiteixmatiltiko nejon tanex.

9 Yekmelauj tanex tein kintauilia akin pouij itech nochi tataman xolalmej yaya monextitiya ininixpan oksekin. 10 Tein melauj, yejua* yetoyaya nikan taltikpak, uan Dios itechkopa kinchijchiuak akin nemij nikan taltikpak, sayoj ke yejuan amo kiixmatkej. 11 Ualaj ichan, sayoj ke akin pouij itech ixolal amo kiselijkej. 12 Sayoj ke, nochin akin itech taneltokakej kinpaleuij maj mochiuakan ikoneuan Dios, porin takuaujtamatiaj itech itokay. 13 Uan yejuan amo yolkej kemej yolij konemej nion porin tetatmej kinekkej nion porin kinekik se takat, ta yolkej porin Dios ijkon kinekik.

14 Tajtoltsin mochiuako takat, nemik touan uan tikitakej ikualtsinyo, kualtsinyot kemej tein se tepopaj kimaka ikoneuj akin ipa setsin. Uan Dios semi kitatiochiuiaya uan nochipa kijtouaya tein melauak. 15 (Juan kiteixmatiltij uan chikauak kijtoj: “¡Yejua nejin akin ika nitajtojtoya keman nikijtoj ‘Akin ualajtok noikampa nechualyekanteuak, porin ipa nemia achto ke nejua’!”). 16 Porin tinochin tikselijkej tatiochiualis tein amo technamiki tein yejua kitelpia, uan Dios nochipa techmakatoya itatiochiualis tein amo technamiki. 17 Porin Dios kitemakak Tanauatil itechkopa Moisés, sayoj ke itechkopa Jesucristo technextilij* tein melauak uan tatiochiualis tein amo technamiki. 18 Amo akin nikan taltikpak kiitani Dios. Sayoj yojtsin dios, akin yetok iuan* toTajtsin, yejua akin techmelauilij keniuj tamati.

19 Yejua nejin tein kijtoj Juan keman judíos kititanilijkej tiopixkamej uan levitas akin yetoyaj Jerusalén maj kitajtanitij* “¿Tiakoni tejua?”. 20 Yejua nimantsin tanankilij, uan kinyekiluij: “Nejua amo niCristo”. 21 Uan kitajtanijkej: “Komo ijkon, ¿tiakoni? ¿TiElías?”. Yejua tanankilij: “Amo, amo niElías”. “¿TiTanauatijkej* akin ualaskia?”. Uan tanankilij: “¡Amo!”. 22 Yejua ika kiluijkej: “Xitechilui tiakoni, para tikiniluiskej akin techualtitankej tein titechnankilij. ¿Tiakoni?”. 23 Yejua tanankilij: “Nejua nejon takat akin chikauak kijtojtok itech taluakyan ‘¡Xikchipauakan iojtsin Jehová!’,* ijkon kemej kijtoj tanauatijkej Isaías”. 24 Fariseos kintitankaj nejon takamej. 25 Uan kitajtanijkej: “Komo amo tiCristo nion tiElías nion tiTanauatijkej akin ualaskia, ¿keyej titeauia?”. 26 Juan kinnankilij: “Nejua niteauia itech at. Namouan yetok se akin amo nankiixmatij. 27 Yejua akin nechualtojtokatiuits, uan nejua amo nechnamiki niktojtomilis itekakuan”. 28 Nochi nejin panok ompa Betania, oksekopa den ueyiat Jordán, kampa Juan teauijtoya.

29 Mostika, Juan kiitak ke Jesús ualaya kiajsiki uan kijtoj: “¡Xikitakan, iIchkatsin* Dios tein techkixtilia tajtakol! 30 Yejua nejin akin ika nitajtojtoya keman nikijtoj ‘Noikampa ualajtok se takat akin nechualyekanteuak porin ipa nemia achto ke nejua’. 31 Nion nejua nikixmatia, sayoj ke niteauijtiualaj itech at para maj itech xolal Israel kimatikan akoni yejua”. 32 Uan Juan no kiteixmatiltij nejin: “Nikitak ichikaualis Dios ualpantemouaya kemej se paloma uan itech mokauaya. 33 Nion nejua nikixmatia, sayoj ke akin nechtitanik maj niteaui itech at nechiluij: ‘Tikmatis akoni teauia ika ichikaualis Dios keman tikitas ke nejon chikaualis ualpantemoua uan itech mokaua’. 34 Uan nejua nikitak nejon, uan nikteixmatiltij ke yejua nejin iKoneuj Dios”.

35 Mostika, Juan oksepa ompa yetoya iniuan ome itatojtokakauan, 36 uan keman kiitak Jesús nejnentoya, kijtoj: “¡Xikitakan, iIchkatsin Dios!”. 37 Keman nejon ome itatojtokakauan kikakilijkej nejon, kitojtokakej Jesús. 38 Uan Jesús moikankepak uan keman kiitak ke kitojtokayaj, kintajtanij: “¿Toni nankitemouaj?”. Yejuan kinankilijkej: “Rabí, ¿kani timokaujtok?”. (Rabí kijtosneki “tamachtijkej”). 39 Kiniluij: “Xiualakan uan nankiitaskej”. Yejua ika yajkej uan kiitakej kani mokaujtoya uan mokaujkej iuan nejon tonal; katka kemej naui hora tiotak.* 40 Andrés, iikniuj Simón Pedro, katka semej nejon omen akin kikakkej tein Juan kijtoj uan kitojtokakej Jesús. 41 Achto kiajsik iikniuj, Simón, uan kiluij: “Tikajsikejya Mesías” (tein kijtosneki Cristo), 42 uan kiuikak kampa yetoya Jesús. Keman Jesús kiitak, kiluij: “Tejua tiSimón, ikoneuj Juan. Tejua timonotsas Cefas” (tein kijtosneki Pedro).

43 Mostika, Jesús kinekia yas Galilea. Ompa kiajsito Felipe uan kiluij: “Xinechtojtoka”. 44 Felipe katka kayot Betsaida, ueyi xolal kampa no kayomej Andrés uan Pedro. 45 Uan Felipe kiajsito Natanael uan kiluij: “Tikajsikej Jesús ikoneuj José, akin kayot Nazaret. Ika motajtoj itech iTanauatil Moisés uan tein kijkuilojkej Tanauatianij”. 46 Sayoj ke Natanael kitajtanij: “¿Xe uelis kisas teisa tein kuali ompa Nazaret?”. Felipe kinankilij: “Xiuiki uan tikitas”. 47 Keman Jesús kiitak ke Natanael ualaya kiajsiki, kijtoj: “Xikitakan, nejin se takat israelita akin amo takajkayaua”. 48 Natanael kitajtanij: “¿Keniuj tinechixmati?”. Jesús kinankilij: “Nimitsitak keman tietoya higojkoujtampa, achto ke Felipe mitsnotsaskia”. 49 Natanael kinankilij: “Tamachtijkej,* tejua tiiKoneuj Dios, tejua tiTekiuaj itech xolal Israel”. 50 Jesús kiluij: “¿Notech titaneltoka porin nimitsiluij ke nimitsitak ke tietoya higojkoujtampa? Tikitas okseki taman tein okachi tikmojkaitas ke nejin”. 51 Uan no kijtoj: “Yekmelauj namechyekiluia ke namejuan nankiitaskej iluikak tapotok uan iangeluan Dios papankistokej uan papantemotokej hasta kampa nietok nejua akin niyolik kemej takat”.*

2 Eyi tonal satepan mochiuak se nenamiktilis itech xolal Caná tein poui Galilea, uan ompa yetoya inan Jesús. 2 Jesús uan imomachtijkauan no kinyoleujkej maj yakan.

3 Keman tantoyaya vino, inan Jesús kiluij: “Amo kipiajok vino”. 4 Sayoj ke Jesús kinankilij: “Siuatsin, ¿keyej monekiskia techtekipachos tejuan nejon?* Ayamo ejkotok nohora”. 5 Inan kiniluij akin kitemakatoyaj vino: “Xikchiuakan nochi tein yejua namechiluis”. 6 Ompa yetoyaj chikuasen tsotsokolmej tachijchiuj ika tet. Ompa kintalijkaj para maj uelikan momapajpakakan achto ke takuaskej porin ijkon moixtaliaya itech inintanauatiluan judíos. Itech sejse tsotsokol akiaj kemej 44 oso 66 litros at.* 7 Jesús kiniluij: “Xikinpexontikan* tsotsokolmej ika at”. Uan kinyekpejpexontijkej.* 8 Uan no kiniluij: “Axkan xikixtikan tepitsin uan xikuikilikan akin kiixyekana iluit”. Yejua ika, yejuan kiuikilijkej. 9 Nejon takat kiyekoj at tein mokepka vino. Sayoj ke amo kimatia kani kikuikej, maski tekitinij akin kikixtijkaj at kemaj kimatiaj. Yejua ika kinotsak novio 10 uan kiluij: “Nochin achto kitemakaj vino tein kuali, uan keman nochin uintitokejya kitemakaj vino tein amo yekkuali. Sayoj ke tejua tikixtij vino tein kuali hasta axkan”. 11 Itech xolal Caná tein poui Galilea, Jesús kichiuak yekinika milagro. Ijkon yejua kinextij ichikaualis, uan imomachtijkauan itech takuaujtamatkej.

12 Satepan ke mochiuak nejin, temok Capernaúm iuan inan, iikniuan uan imomachtijkauan, sayoj ke amo mokaujkej ompa miak tonalmej.

13 Keman amo poliuiaok miak tonalmej para mochiuas iluit tein kichiuayaj judíos tein monotsa Pascua, Jesús pankisak Jerusalén. 14 Keman ajsik itech templo kinitak akin kinamakayaj kuakuejmej, ichkamej* uan palomas. Uan no ompa tojtokotsyetoyaj akin kipatayaj tomin. 15 Yejua ika, mochijchiuilij se kuetaxmekat uan kintamikalankixtij den templo, iniuan ichkamej uan kuakuejmej, uan kinpixouilij* inintomin akin kipatayaj tomin uan kinixkepilij ininmesas. 16 Uan akin kinamakayaj palomas kiniluij: “¡Xikixtikan nochi nejin! ¡Amo xitanamakatokanok ichan noTajtsin!”. 17 Imomachtijkauan kielnamikkej ke ijkuiliujtok: “Kemej semi niktasojta mochan, nikmachilia kemej yeskia niijtitatatok”.

18 Keman judíos kiitakej nejin, kitajtanijkej:* “¿Toni uelis titechnextilis para tikmatiskej ke tikpia tanauatil para tikchiuas nejin?”. 19 Jesús kinnankilij: “Xiktamixitinikan nejin templo uan itech eyi tonal oksepa niketsas”. 20 Uan judíos kiluijkej: “Kinuikilij 46 xiujmej kitamichijchiuaskej nejin templo, ¿uan tejua tiketsas itech eyi tonal?”. 21 Sayoj ke keman ika tajtojtoya templo, tein melauj ika tajtojtoya inakayo. 22 Keman oksepa nemik,* imomachtijkauan kielnamikkej ke yejua miakpa kijtouaya nejon, uan kineltokakej tein kijtouaya Tajkuilolamatsin uan tein Jesús kijtojka.

23 Uan keman yetoya itech iluit tein monotsa Pascua ompa Jerusalén, miakej peujkej itech takuaujtamatij* keman kiitakej milagros tein kichiuaya. 24 Sayoj ke Jesús amo yektakuaujtamatia iniuan porin kinixmatia nochin 25 uan amo monekia maj nion akin kiluiani keniuj tanemilia aksa,* porin yejua kimatia tein sejse kiyolnemiliaya.

3 Moajsia se fariseo akin monotsaya Nicodemo, yejua katka se inintaixyekankauj judíos. 2 Yejua kiitato Jesús keman youak katka uan kiluij: “Tamachtijkej,* tikmatij ke Dios mitsualtitanik xitamachtiki, porin amo akin ueli kichiua milagros tein tejua tikchiua komo Dios amo kipaleuia”. 3 Jesús kinankilij: “Yekmelauj nimitsyekiluia, ke komo amo oksepa se yoli,* amo ueli se kiita iTaixyekanalis Dios”. 4 Nicodemo kiluij: “¿Keniuj uelis oksepa se yolis keman se xiuejya?* Amo uelis oksepa se mokalakis iijtik se inan uan oksepa se yolis, ¿melauj?”. 5 Jesús kinankilij: “Yekmelauj nimitsyekiluia ke komo amo se yoli itechkopa at uan itechkopa ichikaualis Dios, amo uelis se kalakis itech iTaixyekanalis. 6 Akin yolik itechkopa se takat uan se siuat, yejua poui nikan taltikpak, uan akin yolik itechkopa ichikaualis Dios, poui ne iluikak. 7 Amo xikmojkakaki porin nimitsiluij ‘Namejuan moneki oksepa nanyoliskej’. 8 Ejekat youi kampa kineki, uan maski ueli tikaki, amo tikmati kani ualeua nion kani youi. Ijkon panoua iuan akin yoli itechkopa ichikaualis Dios”.

9 Uan Nicodemo kitajtanij:* “¿Keniuj uelis mochiuas nejon?”. 10 Jesús kinankilij: “¿Tejua titamachtia nikan Israel uan amo tikmati nejin? 11 Yekmelauj nimitsyekiluia ke ika titajtouaj tein tikmatij uan tein tikitanij, sayoj ke namejuan amo nankineltokaj tein tikijtouaj. 12 Nejua ika namechnojnotsani tein ueli nankiitaj nikan taltikpak uan maski ijkon amo nanechneltokiliaj, ¿keniuj nankineltokaskej komo ika namechnojnotsa tein onkak ne iluikak? 13 Amo akin pankisani ne iluikak, ta sayoj akin ualpantemok de ompa: akin yolik kemej takat. 14 Uan ijkon kemej Moisés kiajokuik kouat itech taluakyan, ijkon moneki kiajokuiskej akin yolik kemej takat 15 para maj nemi nochipaya akin itech taneltokas.

16 ”Porin Dios semi kintasojtak akin nemij nikan taltikpak, yejua ika kitemakak iKoneuj akin yojtsin uan ijkon akin itech takuaujtamatis amo ixpoliuis, ta nemis nochipaya. 17 Porin Dios amo kiualtitanik iKoneuj para maj kiixtaliki ke moneki kintatsakuiltiskej akin nemij nikan taltikpak, ta para maj yejuan momakixtikan itechkopa. 18 Akin itech takuaujtamati amo kitatsakuiltiskej. Akin amo itech takuaujtamati kiixtalijkejya ke kitatsakuiltiskej, porin amo takuaujtamati itech* iKoneuj Dios akin yojtsin. 19 Tanex ualaj nikan taltikpak, sayoj ke miakej kiixtopeujkej tanex uan okachi kiuelitakej tayouayanilot porin kichiuayaj tein amo kuali, yejua ika kiixtaliskej tein kinnamiki kiseliskej. 20 Porin akin kichiua tein amo kuali, kitauelita tanex uan amo youi kampa tatanestok, para maj amo monexti tein amo kuali tein kichiujtinemi. 21 Sayoj ke akin kichiua tein melauak, youi kampa tatanestok, para maj moyekita ke kichiua tein Dios kineki”.

22 Satepan, Jesús ajsik iniuan imomachtijkauan itech xolaltsitsin tein pouij Judea, uan ompa mokauak seki tonalmej iniuan uan teauijtoya. 23 Sayoj ke Juan no teauijtoya ompa Enón, Salimkopa, porin ompa semi onkaya at, uan miakej ualayaj moauikij; 24 porin Juan ayamo kitsakuayaj.

25 Uan itatojtokakauan Juan motajtolteuijkej iuan se judío porin tataman kemej kiitayaj keniuj uelis se mochipauas iixpan Dios. 26 Yejua ika, kiluitoj Juan: “Tamachtijkej,* takat akin mouan yetoya oksekopa den ueyiat Jordán, akin tejua tikteixmatiltij, teauijtok uan nochin iuan yajtokej”. 27 Juan tanankilij: “Amo akaj uelis kiselis teisa komo amo Dios kimaka. 28 Namoixtenoj nikijtoj ‘Nejua amo niCristo, ta nechtitankej maj niouj iixpan’. 29 Akin kipia novia yejua novio. Sayoj ke itasojikniuj novio keman iuan yetok uan kitenkaki novio, semi yolpaki. Yejua ika, axkan senkis niyolpaki. 30 Itekiuj Cristo momiakilijtias, sayoj ke notekiuj kaxantias”.

31 Akin ualeua ne ajko okachi ueyichiujkej ke nochin. Akin poui nikan taltikpak, ika tajtoua tein onkak nikan taltikpak porin poui nikan. Akin ualeua ne iluikak okachi ueyichiujkej ke nochin. 32 Uan ika tajtoua tein kiitani uan tein kikakini, sayoj ke amo akin kineltokilia. 33 Akin kineltoka tein yejua kiteixmatiltia, kiyeknextia ke Dios kijtoua tein melauak. 34 Porin akin Dios kiualtitanik, kijtoua tein Dios kijtoua, porin toTajtsin amo tsotsokat keman kitemaka ichikaualis. 35 ToTajtsin kitasojta iKoneuj uan kimaktilij nochi. 36 Akin takuaujtamatis iuan iKoneuj Dios nemis nochipaya, sayoj ke akin amo kitakamatis iKoneuj Dios amo nemis, ta Dios kisentokas iuan kualantos.

4 ToTekotsin kimatik ke fariseos kitekakilijkaj ke yejua* kinpiaya okachi imomachtijkauan uan kinauijtoya okachi miakej ke Juan. 2 (Jesús amo teauiaya, ta imomachtijkauan). 3 Yejua ika kisak de Judea uan oksepa yajki Galilea. 4 Sayoj ke monekia panos Samariajkopa. 5 Yejua ika ajsik itech se ueyi xolal tein monotsa Sicar, tein poui Samaria, uan ompaka yetoya tal tein Jacob kimakaka ikoneuj, José. 6 Tein melauj, ompa yetoya iameyal* Jacob. Jesús sioujtoya porin ojtokaka, uan tokotsyetoya inakastan nejon ameyal. Katka kemej nepantaj.*

7 Uan se siuatsin akin kayot Samaria kikixtiko at. Jesús kiluij: “Xinechmaka tepitsin at”. 8 (Imomachtijkauan yajkaj ueyi xolal kikouatoj tein kikuaskiaj). 9 Sayoj ke siuatsin kitajtanij:* “¿Keyej tinechtajtania at, ta tejua tijudío uan nejua nikayot Samaria?”. (Porin judíos amo mouikaj iniuan akin kayomej Samaria). 10 Jesús kinankilij: “Komo tikmatiskia tein Dios mitstayokolia uan tikmatiskia akoni mitsiluijtok ‘Xinechmaka tepitsin at’, tejua tiktajtaniskia at yejua, uan yejua mitsmakaskia at tein kichiua maj se nemi”. 11 Siuatsin kiluij: “Tejuatsin, nion tikpia toni ika tikixtis at, uan ameyal semi uejkatan. ¿Kani tikuiti nejon at tein kichiua maj se nemi? 12 ¿Xe okachi tiueyichiujkej ke touejkaujtat Jacob? Yejua techkauilij nejin ameyal, kampa atikej yejua, ikoneuan uan itapialuan”. 13 Jesús kinankilij: “Akin tayis nejin at, oksepa amikis. 14 Akin tayis at tein nejua nikmakas, amo keman amikisok. Porin at tein nejua nikmakas, itech mochiuas kemej se ameyal tein mextos* para kichiuas maj nemi nochipaya”. 15 Siuatsin kiluij: “Tejuatsin, xinechmaka nejon at, para maj amo oksepa niamiki nion maj niuaualajto nikan nikixtiki at”.

16 Yejua kiluij: “Xiknotsati motakatsin uan oksepa xiuiki nikan”. 17 Siuatsin kinankilij: “Amo nikpia notakatsin”. Jesús kiluij: “Melauak keman tikijtoj ke amo tikpia motakatsin, 18 porin tikinpiakya makuilimej, uan takat akin axkan iuan tinemi amo motakatsin. Tein tikijtoj melauak”. 19 Siuatsin kiluij: “Tejuatsin, nikita ke titanauatijkej.* 20 Touejkaujtatuan kiueyichiuayaj Dios itech nejin tepet, sayoj ke namejuan nankijtouaj ke moneki se kiueyichiuatiuj ompa Jerusalén”. 21 Jesús kiluij: “Siuatsin, yekmelauj nimitsiluia: ejkos tonal keman nion itech nejin tepet nion ompa Jerusalén nankiueyichiuaskej toTajtsin. 22 Namejuan nankiueyichiuaj tein amo nankiixmatij; tejuan tikueyichiuaj tein tikixmatij, porin judíos yejuan akin yekinika kimatkej keniuj Dios temakixtis. 23 Sayoj ke ejkos hora, uan tein melauj ejkokya, keman akin yekmelauj kiueyichiuaj toTajtsin kiueyichiuaskej porin Dios kinyekanas ika ichikaualis* uan porin kiixmatiskej tein melauak. Porin toTajtsin kintemojtok akin ijkon kinekij kiueyichiuaskej. 24 Dios amo moita uan yetok ne iluikak,* uan akin kiueyichiuaj moneki kiueyichiuaskej porin Dios kinyekana ika ichikaualis uan porin kiixmatij tein melauak”. 25 Siuatsin kiluij: “Nejua nikmati ke ualas Mesías, akin kiluiaj Cristo. Keman yejua ualas, techmelauilis nochi”. 26 Jesús kinankilij: “Nejua nejon takat akin mouan tajtojtok”.

27 Nejon hora ejkokej imomachtijkauan uan kisenitakej porin yejua tajtojtoya iuan se siuatsin. Sayoj ke nion se kitajtanij “¿Toni tikneki?” oso “¿Keyej iuan titajtojtok?”. 28 Uan siuatsin kikaujteuak itsotsokol tein ika atakuia uan yajki ueyi xolal kiniluito oksekin: 29 “Xiualakan uan xikitakan se takat akin nechiluij nochi tein nikchiuani. ¿Amo yeski yejua Cristo?”. 30 Uan yejuan kiskej den ueyi xolal uan kiitatoj.

31 Achto ke ejkoskiaj, imomachtijkauan miakpa kiluiayaj: “Tamachtijkej,* xikmajseua teisa”. 32 Sayoj ke yejua kiniluij: “Nejua nikpia takual, uan namejuan amo nankimatij toni”. 33 Yejua ika imomachtijkauan moiluiayaj: “Amo akaj kiualkuilij takual, ¿melauj?”. 34 Jesús kiniluij: “Notakual yejua nejin: maj nikchiua tein kineki akin nechualtitanik uan maj niktamichiua tekit tein nechmakak. 35 ¿Amo nankijtouaj namejuan ke poliuiok naui metsti para kisentiliskej tatok? Xikakikan tein namechiluia: ximoixajokuikan uan xikitakan, tatok chikauayakya,* uelisya se kisentilis. 36 Akin kisentilia tatok kitaxtauijtokejya uan kisentilijtokya takilot. In takilot yejuan akin nemiskej nochipaya. Ijkon, akin tatoka uan akin kisentilia tatok uelis senyolpakiskej. 37 Porin ijkon mochiua tein moijtoua “Se akin tatoka uan okse kisentilia tatok”. 38 Nejua namechtitanik xiktekitij tein amo nankitokkej. Sekin chikauak tekitikej; uan tekit tein kichiujkej yejuan, namechpaleuij”.

39 Miakej akin kayomej Samaria itech takuaujtamatkej Jesús keman nejon siuatsin kiyekijtoj: “Nechiluij nochi tein nikchiuani”. 40 Yejua ika, keman kiitatoj Jesús, kiluijkej maj iniuan mokauani, uan yejua mokauak ome tonal ompa. 41 Uan keman kikakkej tein tamachtiaya, okachi miakej itech taneltokakej, 42 uan kiluijkej siuatsin: “Amo titaneltokajok sayoj ika tein tejua titechtapouij. Tejuan tikakkejya uan tikmatij ke yekmelauj yejua akin techmakixtis”.

43 Keman panok nejon ome tonal, kisak de ompa uan yajki Galilea. 44 (Jesús kijtoj ke se tanauatijkej amo kitakachiuaj* kampa kayot). 45 Keman ajsik Galilea, akin ompa kayomej kuali kiselijkej, porin yejuan no yajkaj iluit uan kiitakaj nochi tein yejua kichiujka ompa Jerusalén keman mochiujtoya iluit.

46 Jesús oksepa yajki Caná tein poui Galilea, kampa kichiujka maj at mokepa vino. Uan se itekitikauj tekiuaj kipiaya se iokichpil akin mokokouaya ompa Capernaúm. 47 Keman yejua kimatik ke Jesús ualeujka de Judea uan ajsika Galilea, kiitato uan kiluito maj temo maj kipajtiti iokichpil, porin xikaujtoyaya.* 48 Sayoj ke Jesús kiluij: “Namejuan amo keman nantaneltokaskej komo amo nankiitaj milagros uan uejueyi taman tein se kimojkaita”. 49 Nejon takat kiluij: “NoTekotsin, nouan xitemo achto ke nookichpiltsin momikilis”. 50 Jesús kiluij: “Ximokepa mochan, porin mookichpil pajtikya”. Nejon takat kineltokak tein Jesús kiluij uan yajki. 51 Uan keman temotiaya ichan, itakeualuan kinamikitoj uan kiluijkej ke iokichpil pajtikaya. 52 Yejua kintajtanij toni hora peuak nenkenti. Uan yejuan kinankilijkej: “Totonik kikauak yalua kemej se hora tiotak”.* 53 Ijkuak, nejon takat kiitak ke nejon hora Jesús kiluijka “Mookichpil pajtikya”. Uan yejua uan nochin akin nemiaj ichan taneltokakej. 54 Yejua nejin ojpatika milagro tein Jesús kichiuak satepan ke mokepak de Judea uan yajki Galilea.

5 Satepan ke mochiuak nejin, judíos kipiakej se iluit, uan Jesús pankisak Jerusalén. 2 Uan ompa Jerusalén, inakastan Ichkakalten, yetok se ueyi tanque tein itech tajtol hebreo monotsa Betzata, tein kiyoualojtokej kalikximej. 3 Ompa nakasikauetstoyaj miakej akin mokokouayaj, akin amo tachiayaj, metskoxojmej uan akin masepoujtoyaj oso metssepoujtoyaj. 4 * 5 Uan ompa yetoya se takat akin mokokouaya 38 xiujmejya. 6 Keman kiitak nejin takat ompa uetstoya uan kemej kimatik ke uejkaujya mokokouaya, Jesús kitajtanij:* “¿Tikuelitaskia tipajtis?”. 7 Takat akin mokokouaya kinankilij: “Tejuatsin, amo akin nechpaleuia maj nimopankalaki itech ueyi tanque keman at moolinia. Keman niouj nikalakiti, okse nechtani uan mopankalakia achto ke nejua”. 8 Jesús kiluij: “¡Ximoketsa! Xikajokui mopetauj* uan xinejnemi”. 9 Uan nejon takat nimantsin pajtik, kiajokuik ipetauj uan peuak nejnemi.

Nejon tonal katka tonal sábado keman moseuiayaj.* 10 Yejua ika judíos peujkej kiluiaj takat akin pajtikaya: “Axkan tonal keman se moseuia. Tanauatil kijtoua ke amo uelis tikmamas mopetauj”. 11 Sayoj ke yejua kinnankilij: “Takat akin nechpajtij nechiluij ‘Xikajokui mopetauj uan xinejnemi’”. 12 Yejuan kitajtanijkej: “¿Akoni mitsiluij ‘Xikajokui uan xinejnemi’?”. 13 Sayoj ke takat akin pajtikaya amo kimatia, porin ompa yetoyaj miakej uan Jesús yajkaya.

14 Satepan ke mochiuak nejin, Jesús kiajsik nejon takat itech templo uan kiluij: “Xikita, tipajtikya. Amo xitajtakook, amokan mitspanok teisa tein okachi amo kuali”. 15 Nejon takat yajki uan kiniluij judíos ke Jesús kipajtijka. 16 Yejua ika judíos kiixnamikiaj Jesús, porin kichiuaya nejin itech tonal sábado. 17 Sayoj ke yejua kinnankiliaya: “NoTajtsin tekititok hasta axkan, uan nejua no niksentoka nitekititok”. 18 Yejua ika judíos okachi kitemojtinenkej keniuj kimiktiskej, porin amo kichiuaya tein monekia itech tonal sábado, uan kinemiliayaj ke kinekia maj nochin kiitakan ke katka kemej Dios porin kiluiaya Dios “noTajtsin”.

19 Yejua ika, Jesús kiniluij: “Yekmelauj namechyekiluia ke iKoneuj Dios amo ueli kichiua nion se taman porin iselti ijkon kinemilia, sayoj kichiua tein kiita ke kichiua toTajtsin. Porin nochi tein kichiua toTajtsin, no ijkon kichiua iKoneuj. 20 Porin toTajtsin kitasojta iKoneuj uan kinextilia nochi tein yejua kichiua, uan kinextilis okachi uejueyi taman ke nejin para xikmojkaitakan. 21 Porin ijkon kemej toTajtsin kichiua maj oksepa nemikan* akin momikilijkejya, iKoneuj Dios no kichiua maj oksepa nemikan akin yejua kineki. 22 Porin toTajtsin amo kiixtalia tein kinamiki kiselis nion akin, ta kikauilij iKoneuj maj kichiua nochi nejon tekit, 23 para maj nochin kitakachiuakan* iKoneuj Dios ijkon kemej kitakachiuaj toTajtsin. Akin amo kitakachiua iKoneuj Dios, amo kitakachiua toTajtsin, akin kiualtitanik. 24 Yekmelauj namechyekiluia ke akin kikaki tein nikijtoua uan itech taneltoka akin nechualtitanik, nemis nochipaya uan amo kitatsakuiltiskej. Yeski kemej se akin momikilijkaya sayoj ke axkan oksepa yoltok.

25 ”Yekmelauj namechyekiluia ke ejkos hora, uan tein melauj ejkokya, keman mikemej kikakiskej itajtol iKoneuj Dios, uan akin kitakamatiskej, nemiskej. 26 Porin ijkon kemej toTajtsin kipia chikaualis para kichiuas maj oksekin nemikan, no kimakatok chikaualis iKoneuj para kichiuas maj oksekin nemikan. 27 Uan kimakak tanauatil para kiixtalis tein kinnamiki kiseliskej nochin, porin yejua akin yolik kemej takat. 28 Amo xikmojkaitakan nejin, porin ejkos hora keman nochin akin yetokej itech miketekochmej,* kikakiskej itajtol 29 uan ualkisaskej: akin kichiujkej tein kuali, nemiskej nochipaya, sayoj ke akin kichiujkej tein amo kuali, kiixtaliskej tein kinnamiki kiseliskej. 30 Noselti amo ueli teyi nikchiua. NoTajtsin nechiluia keniuj nikixtalis tein kinnamiki kiseliskej nochin, porin amo niktemoua nikchiuas tein nikneki, ta tein kineki akin nechualtitanik.

31 ”Komo sayoj noka nitajtojtinemiskia, oksekin amo kineltokaskiaj tein nikijtoua.* 32 Sayoj ke moajsi okse akin noka tajtoua, uan nikmati ke tein kijtoua melauak. 33 Namejuan nankintitankej takamej maj kiitatij Juan, uan yejua kiteixmatiltij tein melauak. 34 Amo moneki maj nion akin noka tajto, sayoj ke nikijtoua nejin para ximakisakan. 35 Nejon takat katka kemej se candil tein xotatoya uan tauiaya, uan namejuan seki tonalmej nankinekkej semi nanyolpakiskej ika itanex. 36 Juan kijtoj ke noTajtsin nechualtitanik. Sayoj ke nejua nikpia okse taman tein okachi kinextia ke noTajtsin nechualtitanik: nikchiujtok tein nechnauatij maj nikchiua. 37 Uan no, noTajtsin kijtouani ke yejua nechualtitanik. Namejuan amo keman nankitenkakinij nion nankiixitanij, 38 uan itajtol amo yetok itech namoyolo porin amo nankineltokiliaj akin yejua kiualtitanik.

39 ”Namejuan kuali namomachtiaj Tajkuilolamatsin porin nankinemiliaj ke namechpaleuis xinemikan nochipaya; uan yejua nejin Tajkuilolamatsin tein noka tajtoua. 40 Maski ijkon, namejuan amo nankinekij nanualaskej nouan para nanemiskej nochipaya. 41 Amo nikneki maj nechueyitalijtokan. 42 Sayoj ke, nikyekmati ke namejuan amo nankitasojtaj Dios. 43 Nejua niualaj itokaykopa noTajtsin uan namejuan amo notech nantaneltokaj. Sayoj ke komo okse ualaskia sayoj porin ijkon kinemilij, kemaj itech nantaneltokaskiaj. 44 ¿Keniuj nanechneltokilitij, ta namejuansan namoueueyitalijtokej uan amo nankitemouaj maj namechueyitali Dios akin sayoj setsin? 45 Amo xiknemilikan ke nejua namechteluiliti iixpan toTajtsin. Akin namechteluilia yejua Moisés, akin namejuan itech nantakuaujtamatij. 46 Tein melauj, komo nankineltokiliskiaj Moisés, no nanechneltokiliskiaj nejua, porin yejua kijkuiloj tein nikchiuaskia. 47 Sayoj ke, komo amo nankineltokaj tein kijkuiloj, ¿keniuj nankineltokatij tein nikijtoua?”.

6 Satepan ke mochiuak nejin, Jesús yajki oksekopa den ueyiat Galilea, oso Tiberíades. 2 Uan tel miakej kitojtokatiayaj porin kiitayaj milagros tein kichiuaya keman kinpajtiaya akin mokokouayaj. 3 Yejua ika Jesús pankisak itech se tepet uan ompa motalij iniuan imomachtijkauan. 4 Amo uejkaua, judíos yaya kichiuatij iluit tein monotsa Pascua. 5 Keman Jesús moixajokuik uan kiitak ke tel miakej yaya kiajsitij, kitajtanij* Felipe: “¿Kani tikouaskej pantsin para maj nochin takuakan?”. 6 Kijtoj nejin porin kinekia kimatis toni kinemiliaya Felipe, porin yejua kimattoyaya tein yaya kichiuati. 7 Felipe kinankilij: “Maski tikpiaskiaj 200 denarios* para tikouaskej pantsin uan tikinmajmakaskiaj tejtepitsitsin, ipa amo ajsiskia”. 8 Semej imomachtijkauan, akin monotsa Andrés, iikniuj Simón Pedro, kiluij: 9 “Nikan yetok se okichpiltsin akin kipia makuil pantsin tachijchiuj ika cebada uan ome pescadojtsitsin.* Sayoj ke amo kinajsis nochin”.

10 Jesús kijtoj: “Xikiniluikan nochin maj motalikan”. Kemej kampa yetoyaj semi xiujtaj katka, ompa motajtalijkej. Katkaj kemej makuil mil takamej. 11 Jesús kikuik pantsin, kitasojkamatilij Dios uan kinxejxelouilij akin ompa tokotsyetoyaj; no ijkon kichiuak ika pescadojtsitsin,* uan takuajkej hasta ixuikej. 12 Keman ixuikej, kiniluij imomachtijkauan: “Xiksentilikan tein mokauak, para maj amo teyi moauilo”. 13 Yejua ika kisejsentilijkej uan kipexontijkej* 12 chikiujmej ika pankojkotol tein kikaujkej akin kikuajkaj nejon makuil pantsin.

14 Keman akin ompa yetoyaj kiitakej milagro tein kichiuak, peuak kijtouaj: “Moyekita ke yejua nejin Tanauatijkej* akin monekia ualas nikan taltikpak”. 15 Uan kemej Jesús kimatia ke yaya ualatij para kichikaujkauikaskej uan kiixtaliskej kemej inintekiuaj, yajki oksepa itech tepet, yejua iselti.

16 Keman peuak tapoyaui, imomachtijkauan temokej ueyiatenoj, 17 tejkokej* itech se barco uan peujkej kipanauiaj ueyiat para ajsiskej Capernaúm. Youakya katka uan Jesús ayamo yaya kinajsiti. 18 Uan ueyiat peuak moajkotatamota porin chikauak taejekaya. 19 Satepan ke kiuikakej barco kemej makuil mil oso chikuasen mil metros,* kiitakej Jesús nejnentoya aixko uan kinajsitiayaya, uan momoujtijkej. 20 Sayoj ke yejua kiniluij: “¡Nejua niJesús! ¡Amo ximouikan!”. 21 Uan yejuan semi yolpakkej uan kiluijkej maj tejko itech barco, uan tepitsin satepan ajsikej kampa yayaj.

22 Mostika, akin yetoyaj oksekopa den ueyiat kiitakej ke ompa amo yetoyaok nion se barco. Achto yetoya se barco tsikitsin, sayoj ke Jesús amo tejkoka* itech nejon barco iniuan imomachtijkauan, ta yejuan yajkej ininselti. 23 Uan seki barcos tein ualeuayaj Tiberíades ajsikej kampa ika toTekotsin kitasojkamatilij Dios uan kintamakak tel miakej. 24 Yejua ika, keman yejuan kiitakej ke nion Jesús nion imomachtijkauan ompa yetoyaj, tejkokej* itech barcos uan yajkej Capernaúm kitemotoj Jesús.

25 Keman kiajsikej oksekopa den ueyiat, kitajtanijkej: “Tamachtijkej,* ¿kemanian tiejkok?”. 26 Jesús kinnankilij: “Yekmelauj namechyekiluia ke namejuan amo nanechtemouaj porin nankiitakej milagros, ta porin nankikuajkej pantsin hasta nanixuikej. 27 Amo xitekitikan para nankipiaskej takual tein uejueliui, ta para nankipiaskej takual tein amo uejueliui uan kichiua maj se nemi nochipaya, tein nejua akin niyolik kemej takat namechmakas. Porin toTajtsin Dios kiyolpaktia maj nikchiua nejon”.*

28 Yejua ika kitajtanijkej: “¿Toni tekit moneki tikchiuaskej para tikyolpaktiskej Dios?”. 29 Uan Jesús kinnankilij: “Dios kiyolpaktia nouan xitakuaujtamatikan porin yejua nechualtitanik”. 30 Yejuan kiluijkej: “¿Toni milagro tikchiuati para maj tikitakan uan maj timitsneltokilikan? ¿Toni tikchiuati? 31 Touejkaujtatuan kikuajkej maná ompa taluakyan, ijkon kemej ijkuiliujtok: ‘Kintamakak ika takual tein ualeua ne iluikak’”. 32 Uan Jesús kiniluij: “Yekmelauj namechyekiluia ke Moisés amo namechmakak takual tein ualeua ne iluikak, ta toTajtsin namechmaka yekmelauj takual tein ualeua ne iluikak. 33 Porin takual tein Dios kitemaka yejua ne tein ualpantemok de ne iluikak uan akin kikuas nemis nochipaya”. 34 Yejua ika kiluijkej: “ToTekotsin, nochipa xitechmaka nejon takual”.

35 Jesús kiniluij: “Nejua nitakual tein kichiuas xinemikan nochipaya. Akin nechtojtokas amo kemanok mayanas, uan akin notech takuaujtamatis amo kemanok amikis. 36 Sayoj ke kemej namechiluijya, namejuan nanechitanij uan maski ijkon amo nantaneltokaj. 37 Nochin akin noTajtsin nechinmaktilia nechtojtokaskej, uan akin nechtojtokas amo keman nikixtopeuas. 38 Porin amo niualpantemok de ne iluikak para nikchiuas tein nejua nikneki, ta para nikchiuas tein kineki akin nechualtitanik. 39 Yejua nejin tein kineki akin nechualtitanik: maj amo nikpolo nion se akin yejua nechinmaktiliani, ta maj nikchiua maj oksepa nemikan keman ejkos tonal. 40 Porin yejua nejin tein kineki noTajtsin: maj nemikan nochipaya nochin akin kiitaj iKoneuj Dios uan itech takuaujtamatij, uan nejua nikchiuas maj oksepa nemikan keman ejkos tonal”.

41 Uan judíos peujkej kiichtakaijijtouaj porin yejua kijtojka “Nejua nitakual tein ualpantemok de ne iluikak”. 42 Uan peujkej kijtouaj: “¿Amo yejua nejin Jesús ikoneuj José? Tejuan tikixmatij itat uan inan. ¿Keniuj axkan kijtoua ‘Nejua niualpantemok de ne iluikak’?”. 43 Keman Jesús kiitak nejin, kiniluij: “Amo ximoichtakanojnotstokan. 44 Amo akin uelis nechtojtokas komo amo nechualkuilia noTajtsin akin nechualtitanik; uan nejua nikchiuas maj oksepa nemi keman ejkos tonal. 45 Tanauatianij kijkuilojkej: ‘Nochin yejuan Jehová* kinmachtis’. Akin kikakis noTajtsin uan kineltokas tein tamachtia, nechtojtokas. 46 Nejin amo kijtosneki ke aksa* kiitani noTajtsin, ta sayoj nejua akin niualeua imako Dios; nejua kemaj nikitani noTajtsin. 47 Yekmelauj namechyekiluia ke akin taneltoka, nemis nochipaya.

48 ”Nejua nitakual tein kichiuas xinemikan nochipaya. 49 Namouejkaujtatuan kikuajkej maná ompa taluakyan, uan maski ijkon momikilijkej. 50 Sayoj ke akin kikuas nejin takual tein ualeua ne iluikak, amo mikis. 51 Nejua nitakual tein yoltok tein ualpantemok de ne iluikak. Komo aksa kikua, nemis nochipaya. Tein melauj, nejon takual yejua nonakayo tein niktemakati para maj akin nemij nikan taltikpak yoltokan”.

52 Uan judíos peujkej motajtolteuiaj uan kijtouaj: “¿Keyej nejin takat techiluia maj tikuakan inakayo?”. 53 Yejua ika Jesús kiniluij: “Yekmelauj namechyekiluia ke komo amo nankikuaj nonakayo uan amo nantayij noesyo nejua akin niyolik kemej takat, amo nanemiskej.* 54 Akin ika motamaka nonakayo uan tayi noesyo nemis nochipaya, uan nejua nikchiuas maj oksepa nemi keman ejkos tonal; 55 porin nonakayo yekmelauj takual, uan noesyo yekmelauj tayil. 56 Akin ika motamaka nonakayo uan tayi noesyo kisentoka nouan yetok, uan nejua niksentoka iuan nietok. 57 NoTajtsin, akin nochipa yoltok, nechualtitanik uan nejua ninemi porin noTajtsin kichiuak maj ninemi. No ijkon, akin ika motamakas nonakayo nemis porin nejua nikchiuas maj nemi. 58 Yejua nejin takual tein ualeuak ne iluikak. Amo kemej tein kikuajkej namouejkaujtatuan, akin momikilijkej. Akin motamakas ika nejin takual, nemis nochipaya”. 59 Kijtoj nochi nejin keman tamachtiaya kampa taueyichiuaj judíos* ompa Capernaúm.

60 Keman miakej imomachtijkauan kikakkej nejin, kijtojkej: “Nejin tamachtilis techkuejmoloua. Amo tiknekij tikaktoskejok”. 61 Sayoj ke Jesús, akin kimatia ke imomachtijkauan kijijtojtoyaj porin kijtojka nejon, kiniluij: “¿Nejin namechkuejmoloua? 62 Komo ijkon, ¿toni panoskia komo nanechitaskiaj ke nejua akin niyolik kemej takat nipankisa kampa nietoya achto? 63 Dios ika ichikaualis kichiua maj se nemi; tein uelis kichiuaskej akin nemij nikan taltikpak amo tapaleuia. Dios ika ichikaualis nechpaleuij maj nikijto nochi tein namechiluij uan nejon tein nikijtoj kichiua maj se nemi. 64 Sayoj ke nansekimej amo nantaneltokaj”. Porin Jesús ipa* kimatiaya akonimej amo taneltokayaj uan akoni yaya kitemaktiti. 65 Uan no kijtoj: “Yejua ika namechiluij ke amo akin uelis nechtojtokas komo amo noTajtsin kikaua”.

66 Yejua ika, miakej imomachtijkauan oksepa peuak kichiuaj tein achto kikaujkaj uan amo kitojtokayajok. 67 Yejua ika Jesús kintajtanij 12 tatitanilmej: “¿Namejuan no nankinekij nanyaskej?”. 68 Simón Pedro kinankilij: “NoTekotsin, ¿akoni tiktojtokaskej? Tein titamachtia kichiua maj se nemi nochipaya. 69 Tejuan titaneltokakej uan tikmatij ke Dios mitsualtitanik”.* 70 Jesús kinnankilij: “Nejua namechijitak* nandocejmej, ¿melauj? Sayoj ke nansemej tetakajkayauilia”.* 71 Ika tajtojtoya Judas ikoneuj Simón Iscariote, porin maski pouia iniuan 12 tatitanilmej, yaya kitemaktiti.

7 Satepan ke panok nejin, Jesús nentinemik Galilea. Amo kinekia takalpanotiuj Judea, porin judíos kitemojtoyaj keniuj kimiktiskej. 2 Uan ejkotoyaya tonalmej keman judíos kichiuayaj iluit itech sakakaltsitsin. 3 Yejua ika iikniuan kiluijkej: “Xiouj Judea para maj motatojtokakauan no kiitakan tein tikchiua. 4 Porin akin kineki maj nochin kiixmatikan, amo teyi kiichtakachiua. Komo tejua tikchiua nejin, xikchiua ininixpan nochin”. 5 Tein melauj, iikniuan amo itech takuaujtamatiaj. 6 Uan Jesús kiniluij: “Nohora ayamo ejko, sayoj ke para namejuan tein yeski hora kuali yetok. 7 Akin nemij nikan taltikpak amo kipiaj keyej namechtauelitaskej, sayoj ke nejua nechtauelitaj porin nikteixmatiltia ke tein kichiuaj amo kuali yetok. 8 Xipankisakan namejuan xiiluititij. Nejua ayamo nipankisati, porin nohora ayamo ejko”. 9 Kiniluij nejin uan mokauak ompa Galilea.

10 Sayoj ke, keman iikniuan pankiskej iluititoj, yejua no pankisak, sayoj ke ichtaka. 11 Yejua ika judíos peujkej kitemouaj itech iluit uan kijtouaj: “¿Kani yetos nejon takat?”. 12 Miakej akin ompa yetoyaj ika moichtakanojnotstoyaj. Sekin kijtouayaj: “Yejua se takat yolkuali”. Oksekin kijtouayaj: “Amo, yejua amo yolkuali, ta sayoj takajkayaujtinemi”. 13 Sayoj ke amo akin moixeuiaya ika tajtos senteixtenoj, porin kinmouiliayaj judíos.

14 Keman iluititoyaj kemej naui tonalya, Jesús yajki templo uan peuak tamachtia. 15 Judíos kimojkaitayaj uan kijtouayaj: “¿Keniuj nejin takat semi kiixmati Tajkuilolamatsin, ta amo kanaj momachtito?”.* 16 Uan Jesús kinnankilij: “Tein nejua nitamachtia amo noaxka, ta iaxka akin nechualtitanik. 17 Komo aksa* kineki kichiuas tein Dios kineki, kimatis ox tein nejua nitamachtia iaxka Dios, oso sayoj nejua niknemilia. 18 Akin tamachtia tein sayoj yejua kinemilia kitemoua maj kiueyitalikan, sayoj ke akin kitemoua maj kiueyitalikan akin kititanik, tamachtia tein melauak uan no kichiua tein kuali yetok. 19 Moisés namechmakak Tanauatil, ¿melauj? Sayoj ke nion semej nankitakamatij iTanauatil. ¿Keyej nankitemouaj nanechmiktiskej?”. 20 Yejuan kinankilijkej: “¡Tikpia se amokuali ejekat! ¿Akoni kitemoua mitsmiktis?”. 21 Uan Jesús kiniluij: “Sayoj nikchiuak se taman uan nanochin nankimojkaitakej. 22 Xitanemilikan itech nejin: Moisés namechnauatij ke moneki namotekiskej* (tein melauj nejon amo moixtalij keman nemia Moisés, ta keman nemiaj iuejkaujtatuan) uan namejuan nankitekij se okichpiltsin itech tonal sábado keman se moseuia. 23 Komo nankitekij* se okichpil itech tonal sábado para amo nankitapanauiliskej iTanauatil Moisés, ¿keyej axkan semi nankualanij nouan porin niktamipajtij se takat itech tonal sábado? 24 Amo xikixtalikan teisa sayoj ika tein nankiitaj, ta xikixtalikan teisa ijkon kemej kinamiki”.

25 Uan sekin akin nemiaj Jerusalén peujkej kijtouaj: “Yejua nejin takat akin kitemouaj kimiktiskej, ¿melauj? 26 Sayoj ke, xikitakan, nepa tajtojtok sentaixpan uan amo teyi kiluiaj. ¿Xe akin techixyekanaj no kinemiliajya ke yejua Cristo? 27 Sayoj ke tejuan tikmatij kani ualeuak nejin takat, uan keman ualas Cristo amo akin kimatis kani ualeuak”. 28 Uan Jesús kijtoj chikauak keman tamachtijtoya itech templo: “Namejuan nanechixmatij uan nankimatij kani niualeuak. Sayoj ke nejua amo niualaj porin nejua ijkon niknemilij. Akin nechualtitanik yekmelauj nemi, uan namejuan amo nankiixmatij. 29 Nejua kemaj nikixmati, porin yejua nechualtitanik maj nikixnextiki”. 30 Yejua ika, peujkej kitemouaj keniuj kikitskiskej, sayoj ke amo akin uelik kikitskij porin ayamo ejkoya ihora. 31 Maski ijkon, miakej akin ompa yetoyaj itech takuaujtamatkej uan kijtouayaj: “Keman ualas Cristo, amo kichiuas okachi milagros ke tein kichiuakya nejin takat, ¿melauj?”.

32 Fariseos kikakkej ke akin ompa yetoyaj ika moichtakanojnotstoyaj. Yejua ika yejuan uan uejueyi tiopixkamej kintitankej tajpianij maj kikitskitij. 33 Uan Jesús kiniluij akin ompa yetoyaj: “Namouan nietos seki tonalmejok achto ke nias nikajsitiuj akin nechualtitanik. 34 Namejuan nanechtemoskej sayoj ke amo nanechajsiskej. Amo uelis nanyaskej kampa nejua nietos”. 35 Yejua ika judíos moiluiayaj: “¿Kani kinemilia yas nejin takat kampa amo uelis tikajsiskej? ¿Amo kinemilia yas iniuan judíos akin nemij iniuan griegos uan kinmachtis griegos? 36 ¿Toni kijtosnekia keman kijtoj ‘Namejuan nanechtemoskej sayoj ke amo nanechajsiskej uan amo uelis nanyaskej kampa nejua nietos’?”.

37 Keman tantoyaya iluit, itech tonal tein okachi tayekantoya, Jesús moketsak uan kijtoj chikauak: “Komo aksa amiki maj nouan uiki uan nikmakas at para maj tayi. 38 Komo aksa notech takuaujtamati, ‘itech mextos* miak at tein kichiuas maj nemi’, ijkon kemej kijtoua Tajkuilolamatsin”. 39 Jesús ika tajtojtoya ichikaualis Dios, tein yaya kiselitij akin itech takuaujtamatiskiaj. Ayamo akin kiselijtoya ichikaualis Dios, porin Jesús ayamo kiselijtoya tanauatil. 40 Keman kikakkej nejin tajtolmej, sekin peujkej kijtouaj: “Moyekita ke yejua nejin Tanauatijkej* akin ualaskia”. 41 Oksekin kijtouayaj: “Yejua nejin Cristo”. Sayoj ke sekin kijtouayaj: “Cristo amo kayot Galilea, ¿melauj? 42 Tajkuilolamatsin kijtoua ke Cristo ualaskia itechkopa David uan ualeuaskia Belén, ixolal David, ¿melauj?”. 43 Yejua ika, nochin peuak moxexelouaj porin amo moyektenkauayaj. 44 Uan sekin kinekiaj kikitskiskej, sayoj ke amo akin uelik kikitskij.

45 Uan tajpianij oksepa yajkej kampa yetoyaj uejueyi tiopixkamej uan fariseos. Fariseos kintajtanijkej:* “¿Keyej amo nankiualkuikej?”. 46 Tajpianij kinnankilijkej: “¡Amo keman ijkon tajtojtoya se takat!”. 47 Sayoj ke fariseos kiniluijkej: “Amo no namechkajkayauak, ¿melauj? 48 ¿Xe semej totaixyekankauan oso fariseos itech takuaujtamatik? 49 Sayoj ke nejin akin amo kiixmatij iTanauatil Moisés amo kinnamiki maj Dios kintasojta”. 50 Nicodemo, akin achto yajka kiitato Jesús uan pouia iniuan, kiniluij: 51 “ITanauatil Moisés kijtoua ke amo uelis se kiixtalis tein kinamiki kiselis aksa komo amo achto se kikaki uan kuali se kimati tein kichiujtok, ¿melauj?”. 52 Keman kikakkej nejin, yejuan kiluijkej: “Tejua amo no tikayot Galilea, ¿melauj? Xiyektatemo itech Tajkuilolamatsin uan tikmatis ke ompa Galilea amo keman ualeuas nion se tanauatijkej”.*

8 12 Uan Jesús oksepa kinnojnotsak. Kiniluij: “Nejua kemej yeskia tanex tein kinpaleuia oksekin para tachiaskej. Akin nechtojtoka amo keman nemis kampa tayouayan, ta kipias tanex tein kichiua maj se nemi”. 13 Yejua ika fariseos kiluijkej: “Tejua sayoj moka titajtoua. Tein tikijtoua amo melauak”.* 14 Jesús kinnankilij: “Maski nejua noka nitajtoua, tein nikijtoua melauak, porin nejua nikmati kani niualeuak uan kani niouj. Sayoj ke namejuan amo nankimatij kani niualeuak nion kani niouj. 15 Namejuan nankiixtaliaj maj aksa kitatsakuiltikan ijkon kemej namejuan nantanemiliaj; nejua amo nikixtalijtok maj aksa kitatsakuiltikan. 16 Uan komo nikchiuaskia nejon, tein nikixtaliskia yeskia kemej moneki, porin amo nietok noselti, ta noTajtsin akin nechualtitanik nouan yetok. 17 Uan no, itech Tanauatil tein ika namoixyekanaj ijkuiliujtok: ‘Tein kiteixpantiaj omen, melauak’.* 18 Nejua noka nitajtoua, uan noTajtsin akin nechualtitanik, no noka tajtoua”. 19 Uan kitajtanijkej:* “¿Kani yetok moTajtsin?”. Jesús kinnankilij: “Namejuan amo nanechixmatij nion nankiixmatij noTajtsin. Komo nanechixmatiskiaj, no nankiixmatiskiaj noTajtsin”. 20 Nejin kijtoj keman tamachtijtoya itech templo, kampa yetoyaj kaxomej kampa kipantaliayaj tomin. Sayoj ke amo akin kikitskij porin ayamo ejkoya ihora.

21 Yejua ika oksepa kiniluij: “Nejua niouj uan namejuan nanechtemoskej, sayoj ke namikiskej porin namotajtakolmakatokej. Kampa nejua niouj, namejuan amo uelis nanyaskej”. 22 Judíos peujkej moiluiaj: “¿Momiktiti? Porin kijtoua ‘Kampa nejua niouj, namejuan amo uelis nanyaskej’”. 23 Uan no kijtoj: “Namejuan nanpouij nikan tani;* nejua niualeuak ne iluikak. Namejuan nanpouij nikan taltikpak, nejua amo. 24 Yejua ika namechiluij ‘Namikiskej porin namotajtakolmakatokej’. Porin komo amo nankineltokaj ke nejua akin moijtojka ke ualaskia, namikiskej porin namotajtakolmakatokej”. 25 Yejua ika peujkej kitajtaniaj: “¿Uan tejua tiakoni?”. Jesús kinnankilij: “Nenkaj namechnojnotstok. 26 Moneki namechiluis miak tamanok uan miak taman moneki nikixtalis ox kuali yetok oso amo kuali yetok. Tein melauj, akin nechualtitanik nochipa kijtoua tein melauak uan nejua nikijtoua tein nikakilij”. 27 Sayoj ke yejuan amo kiajsikamatkej ke ika kinnojnotstoya toTajtsin. 28 Uan Jesús kijtoj: “Keman namejuan nanechpiloskej nejua akin niyolik kemej takat, nankimatiskej ke nejua akin moijtojka ke ualaskia uan ke amo nikchiua nion teyi porin nejua ijkon niknemilia, ta ke nikijtoua tein noTajtsin nechmachtij. 29 Uan akin nechualtitanik nouan yetok, amo nechkauani noselti, porin nejua nochipa nikchiua tein yejua kiyolpaktia”. 30 Keman yejua kijtojtoya nejin, miakej itech takuaujtamatkej.

31 Uan Jesús peuak kiniluia judíos akin kineltokilijkaj: “Komo nochipa nankichiuaj tein nitamachtia, yekmelauj nanyeskij nannomomachtijkauan; 32 nankiixmatiskej tein melauak, uan tein melauak namechmakixtis”.* 33 Yejuan kinankilijkej: “Tejuan tiikoneuan Abrahán, uan amo keman timoajsinij temako. ¿Keyej tikijtoua ke techmakixtitij?”.* 34 Jesús kinnankilij: “Yekmelauj namechyekiluia ke akin tajtakolchiua moajsi imako tajtakol. 35 Uan no, takeual akin moajsi temako amo mokaua nochipaya ichan iteko; tekoneuj kemaj mokaua nochipaya. 36 Yejua ika, komo iKoneuj Dios namechkajkaua, yekmelauj amo namoajsiskejok temako. 37 Nejua nikmati ke nanikoneuan Abrahán, sayoj ke nankitemojtokej nanechmiktiskej porin amo nankiseliaj tein nitamachtia. 38 Nejua ika nitajtoua tein nikitak keman nietoya iuan noTajtsin, sayoj ke namejuan nankichiuaj tein nankikakiliaj namopaj”. 39 Yejua ika, yejuan kiluijkej: “Topaj yejua Abrahán”. Jesús kiniluij: “Komo nanyeskiaj nanikoneuan Abrahán, nankichiuaskiaj tein yejua kichiuak. 40 Sayoj ke nankinekij nanechmiktiskej, nejua akin namechiluij tein melauak tein nikakilij Dios. Abrahán amo kichiuak nejon. 41 Namejuan nankichiuaj tein kichiua namopaj”. Uan yejuan kiluijkej: “Tejuan tikpiaj sayoj se toTajtsin, Dios, uan yekmelauj tiikoneuan”.

42 Jesús kinnankilij: “Komo Dios yeskia namoTajtsin, nanechtasojtaskiaj, porin Dios nechualtitanik uan yejua ika nikan nietok. Amo niualaj porin nejua ijkon niknemilij, ta yejua nechualtitanik. 43 ¿Keyej amo nankiajsikamatij tein nikijtojtok? Porin amo nankinekij nanechkakiskej. 44 Namejuan nanikoneuan namopaj, in Amokuali, uan nankinekij nankichiuaskej tein kineki namopaj. Yejua keman peuak kitakajkayauilia Dios mochiuak se temiktijkej. Kikauak tein melauak porin itech iyolo amo kipia tein melauak. Nochipa keman takajkayaua, kijtoua tein kipia iyolijtik,* porin yejua se xolopij uan akin peuak takajkayaua.* 45 Sayoj ke, kemej nejua namechiluia tein melauak, amo nanechneltokiliaj. 46 ¿Akoni uelis kinextis ke nikchiuak se tajtakol? Komo nikijtoua tein melauak, ¿keyej amo nanechneltokiliaj? 47 Ikoneuan Dios, kikakij itajtoluan. Yejua ika namejuan amo nantakakij: porin amo nanikoneuan Dios”.

48 Keman kikakkej nejin, judíos kiluijkej: “Amo nenkaj timitsiluiaj ‘Tejua tikayot Samaria uan tikpia se amokuali ejekat’”. 49 Jesús kinnankilij: “Nejua amo nikpia nion se amokuali ejekat. Nejua niktakachiua* noTajtsin, uan namejuan amo nanechtakachiuaj. 50 Sayoj ke nejua amo niktemojtok maj nechueyitalikan; Dios kineki maj nechueyitalikan, uan yejua kiixtalia akoni kinamiki maj kiueyitalikan. 51 Yekmelauj namechyekiluia ke komo aksa* kitakamati tein nitamachtia amo keman momikilis”.* 52 Judíos kiluijkej: “Axkan tikyekmatij ke tikpia se amokuali ejekat. Abrahán momikilij uan no tanauatianij,* sayoj ke tejua tikijtoua ‘Komo aksa kitakamati tein nitamachtia amo keman momikilis’. 53 ¿Tiknemilia ke okachi tiueyichiujkej ke touejkaujtat Abrahán? Yejua momikilij uan tanauatianij no momikilijkej. ¿Tiakoni timoluijtok?”. 54 Jesús tanankilij: “Komo nimoueyitaliskia nejuasan, nenkaj nimoueyitalijtoskia. Akin nechueyitalia yejua noTajtsin, akin namejuan nankijtouaj ke namoDios. 55 Sayoj ke namejuan amo nankiixmatij; nejua kemaj nikixmati. Uan komo nikijtoskia ke amo nikixmati, niyeskia nixolopij kemej namejuan. Sayoj ke nejua kemaj nikixmati uan niktakamati tein kijtoua. 56 Namopaj Abrahán semi yolpakia keman kinemiliaya ke kiitaskia tonal keman niualaskia, uan kiitak uan yolpakik”. 57 Uan judíos kiluijkej: “Nion tikajxitia 50 xiujmej, ¿uan tikijtoua ke tikitani Abrahán?”. 58 Jesús kiniluij: “Tein melauj namechyekiluia ke, achto ke Abrahán yoliskia, nejua ipa nietoyaya”. 59 Uan kiajokkej temej porin kinekiaj kitetemaskej* Jesús, sayoj ke motatij* uan kisak den templo.

9 Keman nejnentiaya, kiitak se takat akin amo tachiaya porin ipa ijkon yolka. 2 Uan imomachtijkauan kitajtanijkej:* “Tamachtijkej,* ¿akoni tajtakoj para maj nejin takat amo tachia desde ke yolik: yejua oso itatuan?”. 3 Jesús kinnankilij: “Amo tajtakoj yejua nion itatuan. Nejin panok para maj moyekita tein Dios ueli kichiua. 4 Moneki tikchiuaskej tein kineki* akin nechualtitanik keman tanestokok, porin keman tayouayantia amo akin ueli tekitiok. 5 Keman nejua nietosok itech taltikpak, nejua kemej yeskia tanex tein kinpaleuis oksekin maj tachiakan”. 6 Keman kitamiijtoj nejin, chijchak* talpan uan ika ichijchi kichijchiuak sokit, kiojxilij itech iixtololouan nejon takat 7 uan kiluij: “Ximoixpajpakati itech ueyi tanque tein monotsa Siloam” (tein kijtosneki “tatitanil”). Yejua ika moixpajpakato, uan keman mokepak, tachiayaya.

8 Uan akin ompaka nemiaj uan akin kiitayaj ke tajtantinemia tomin peuak kijtouaj: “Yejua nejin takat akin nikan motaliaya uan tajtania tomin, ¿melauj?”. 9 Sekin kijtouayaj: “Kemaj yejua”. Oksekin kijtouayaj: “Amo yejua, sayoj ke tamati kemej yejua”.* Uan takat kijtouaya: “Kemaj, nejua”. 10 Yejua ika kitajtanijkej: “¿Uan keniuj oksepa titachiak?”. 11 Yejua kinnankilij: “Takat akin monotsa Jesús kichijchiuak sokit, nechojxilij itech noixtololouan uan nechiluij: ‘Xiouj Siloam uan ximoixpajpakati’. Uan nimoixpajpakato uan uelik nitachiak”. 12 Uan kitajtanijkej: “¿Kani yetok nejon takat?”. Yejua tanankilij: “Amo nikmati”.

13 Yejuan kiuikakej takat akin achto amo tachiaya ininixpan fariseos. 14 Keman Jesús kichijchiuak sokit uan kichiuak maj nejon takat tachia, katka tonal sábado keman moseuiaj. 15 Yejua ika fariseos no peujkej kitajtaniaj keniuj axkan uelia tachiaya. Yejua kiniluij: “Nechojxilij sokit itech noixtololouan, nimoixpajpakak uan axkan ueli nitachia”. 16 Uan seki fariseos peujkej kijtouaj: “Nejon takat amo kiualtitanik Dios, porin amo kichiua tein moneki itech tonal sábado”. Oksekin kijtouayaj: “Sayoj ke, ¿keniuj uelis se tajtakolchiujkej kichiuas milagros kemej nejon?”. Sekin kijtouayaj se taman uan oksekin okse taman. 17 Uan oksepa kiluijkej akin achto amo tachiaya: “Kemej tejua mitsixpajtij, ¿toni chiujkej nejon takat?”. Takat kinnankilij: “Yejua se tanauatijkej”.*

18 Sayoj ke judíos amo kineltokakej ke nejon takat achto amo tachiaya, hasta ke kinnotskej itatuan. 19 Kintajtanijkej: “¿Yejua nejin namookichpil akin namejuan nankijtouaj ke amo tachiaya porin ijkon yolik? Komo ijkon, ¿keniuj axkan tachiaya?”. 20 Uan itatuan kinnankilijkej: “Kemaj, yejua nejin tookichpil uan amo tachiaya porin ijkon yolik. 21 Sayoj ke, keniuj axkan tachia, amo tikmatij; uan akoni kiixpajtij, amo no tikmatij. Xiktajtanikan yejua, ta ueyiya. Maj yejua iselti tanankili”. 22 Itatuan ijkon tanankilijkej porin kinmouiliayaj judíos; porin yejuan moyektenkaujkajya ke akin kijtoskia ke Jesús yejua Cristo, amo kikauaskiajok maj mosentili kampa taueyichiuaj judíos. 23 Yejua ika itatuan kijtojkej “Ueyiya. Xiktajtanikan yejua”.

24 Yejua ika, oksepa kinotskej akin amo tachiaya uan kiluijkej: “Xikijto tein melauak iixpan Dios. Tejuan tikmatij ke nejon takat se tajtakolchiujkej”. 25 Yejua kinnankilij: “Komo se tajtakolchiujkej, amo nikmati. Tein kemaj nikmati yejua ke amo nitachiaya uan axkan kemaj nitachia”. 26 Uan kitajtanijkej: “¿Toni mitschiuilij? ¿Keniuj mitsixpajtij?”. 27 Yejua kinnankilij: “Namechiluijya, sayoj ke namejuan amo nanechkakkej. ¿Keyej nankinekij maj oksepa namechilui? Amo no nankinekij nankitojtokaskej, ¿melauj?”. 28 Keman kikakkej nejon, yejuan kikualankailuijkej: “Tejua tiktojtoka nejon takat, sayoj ke tejuan tiktojtokaj Moisés. 29 Tikmatij ke Dios kinojnotsak Moisés, sayoj ke amo tikmatij kani ualeuak nejin takat”. 30 Takat kinnankilij: “Nejin kemaj nikmojkaita, maj yejua nechixpajtiani uan maj namejuan amo xikmatikan kani ualeuak. 31 Tikmatij ke Dios amo kinkaki tajtakolchiuanij, sayoj ke akin kichiua tein Dios kineki uan kimojkatoka, yejua kemaj kikaki. 32 Amo keman tikaktoyaj maj aksa* kiixpajtiani se akin amo tachiaya porin ijkon yolik. 33 Komo nejin takat amo kiualtitanik Dios, amo ueliskia kichiuas nion teyi”. 34 Uan kiluijkej: “Tejua tiyolik ika miak tajtakol, ¿uan tikneki titechmachtis?”. Uan kikalankixtijkej.

35 Jesús kikakik ke kikalankixtijkaj uan keman kiajsik, kitajtanij: “¿Itech titakuaujtamati akin yolik kemej takat?”. 36 Yejua kinankilij: “¿Uan akoni nejon takat, tejuatsin? Xinechilui para uelis itech nitakuaujtamatis”. 37 Jesús kinankilij: “Tejua tikitakya, tein melauj iuan titajtojtok”. 38 Uan yejua kiluij: “Itech nitakuaujtamati, noTekotsin”. Uan motankuaketsak iixpan.* 39 Uan Jesús kijtoj: “Niualaj para maj moixtali tein kinnamiki kiseliskej akin nemij nikan taltikpak, para maj tachiakan akin amo tachiaj, uan akin tachiaj maj amo tachiakanok”. 40 Fariseos akin ompa iuan yetoyaj, kikakkej nejin uan kiluijkej: “¿Tiknemilia ke amo no titachiaj?”. 41 Jesús kinnankilij: “Komo amo nantachiaskiaj, namechtapojpoluiskiaj. Sayoj ke kemej nankijtouaj ‘Titachiaj’, amo namechtapojpoluiskej”.

10 “Yekmelauj namechyekiluia ke akin kalaki kampa yetokej ichkamej* sayoj ke amo kalaki puertajkopa, ta tejko itech tepamit uan ompaka ajkotsikuini, yejua se tachtekkej. 2 Sayoj ke akin kalaki puertajkopa, yejua akin kinyekpia ichkamej. 3 Uan akin tajpixtok kaltenoj kitatapouilia, uan ichkamej kitenkakij. Akin kinyekpia ichkamej kinnotsa iichkauan ika inintokay uan kinuika kalampa. 4 Keman kintamikixtia nochi iichkauan, kinyekantiuj. Ichkamej kitojtokaj porin kitenixmatij. 5 Amo keman kitojtokaskej se akin amo kiixmatij, ta choloskej porin amo kitenixmatij”. 6 Jesús kintapouij nejin, sayoj ke yejuan amo kiajsikamatkej tein kiniluijtoya.

7 Yejua ika Jesús oksepa kiniluij: “Yekmelauj namechyekiluia ke nejua kemej yeskia nipuerta kampa kalakij ichkamej. 8 Nochin akin ualanij uan kijtouanij ke yejuan yekmelauj ichkatajpianij, yejuan tachtekinij, sayoj ke ichkamej amo kintajtolkakinij. 9 Nejua kemej yeskia nipuerta; akin ualas nouan para kalakis kampa yetokej ichkamej, momakixtis; uelis kalakis uan kisas, uan kiajsis sakat. 10 Tachtekkej sayoj kinichtekiki, kinmiktiki uan kinixpoloki ichkamej. Nejua niualaj para maj yoltokan uan para maj nemikan nochipaya. 11 Nejua kuali niichkatajpixkej, uan kuali ichkatajpixkej motemaka mikis para kinmakixtis iichkauan. 12 Se tetekitilijkej, akin amo ichkatajpixkej nion iaxka ichkamej, keman kiita ke ualajtok koujtajitskuinti, kinkaujteua ichkamej uan choloua. Uan koujtajitskuinti kinkitskia uan kinmoyaua.* 13 Tetekitilijkej choloua porin sayoj kineki maj kitaxtauikan uan amo itekiuj tein kinpanoua ichkamej. 14 Nejua kuali niichkatajpixkej. Nikinixmati noichkauan uan noichkauan nechixmatij nejua, 15 ijkon kemej noTajtsin nechixmati nejua uan nejua nikixmati noTajtsin; uan nejua nimotemaka nimikis para nikinmakixtis ichkamej.

16 ”Uan nikinpia okseki ichkamej, tein amo pouij itech nejin corral; yejuan no moneki nikinualkuis uan nechtajtolkakiskej. Nochin senyetoskej uan kipiaskej sayoj se ichkatajpixkej. 17 NoTajtsin nechtasojta porin nejua nimotemakak nimikis para oksepa ninemis satepan. 18 Amo akin nechtemaktia, ta nejua nimotemaktia porin ijkon nikneki. Nikpia tanauatil para nimotemaktis uan nikpia tanauatil para oksepa ninemis. Yejua nejon tein nechnauatij noTajtsin”.

19 Ika nejon tein kijtoj, judíos oksepa moxexelojkej. 20 Miakej kijtouayaj: “Kipia se amokuali ejekat uan kuatapolojya. ¿Keyej nankitajtolkaktokej?”. 21 Oksekin kijtouayaj: “Se akin kipia se amokuali ejekat amo ijkon tajtoua. Se amokuali ejekat amo ueli kinixpajtia akin amo tachiaj, ¿melauj?”.

22 Itech nejon tonalmej, judíos kichiuayaj iluit porin kielnamikiaj keman kitemaktijkej templo ompa Jerusalén. Semi taseseyaya, 23 uan Jesús yetoya itech templo, nejnentoya kampa yetokej ikalikxiuan Salomón. 24 Judíos kiyoualojkej uan peujkej kiluiaj: “¿Hasta kemanian titechiluis tiakoni? Komo tejua tiCristo, xikyekijtoya”. 25 Jesús kinnankilij: “Namechiluijya, sayoj ke namejuan amo nankineltokaj. Tein nikchiua itokaykopa noTajtsin kinextia niakoni. 26 Sayoj ke namejuan amo nantaneltokaj porin amo nannoichkauan. 27 Noichkauan nechtajtolkakij, nejua nikinixmati uan yejuan nechtojtokaj. 28 Nejua nikchiua maj nemikan nochipaya; amo keman kinixpoloskej uan amo akin nechinmakuilis. 29 Ichkamej tein noTajtsin nechinmakak okachi kipiaj ipatiuj ke nochi okseki taman, uan amo akin uelis kinmakuilis iichkauan noTajtsin. 30 Nejua uan noTajtsin tisenpouij”.*

31 Judíos oksepa kiajokkej temej para kitetemaskej.* 32 Uan Jesús kiniluij: “Nikchiuani namoixpan miak taman tein kuali tein noTajtsin nechnauatij. ¿Katiyejua ika nankinekij nanechtetemaskej?”.* 33 Judíos kinankilijkej: “Amo timitstetematij* porin tikchiuak teisa tein kuali, ta porin titauijuikaltia;* porin tejua maski titakat, timochiua kemej se Dios”. 34 Jesús kinnankilij: “¿Amo ijkuiliujtok itech namoTanauatil ‘Nejua nikijtoj: “Namejuan nandioses”’? 35 Komo Dios kiniluij ‘namejuan nandioses’ nejon akin itech itajtol kinextij ke kinnamikia maj kintatsakuiltikan (uan Tajkuilolamatsin amo ueli se kipata), 36 ¿nanechiluiaj ‘titauijuikaltia’* porin nikijtoua ‘niiKoneuj Dios’? Ta noTajtsin nechxeloj para niktekitilis uan nechualtitanik nikan taltikpak. 37 Komo amo nikchiua tein noTajtsin kineki maj nikchiua, amo xinechneltokilikan. 38 Sayoj ke komo kemaj nikchiua, maj nejon namechpaleui xitaneltokakan, maski amo nanechneltokiliskej nejua. Ijkon nankimatiskej uan okachi nankiajsikamatiskej ke nejua nietok iuan noTajtsin, uan noTajtsin yetok nouan”. 39 Uan oksepa kinekkej kikitskiskej, sayoj ke Jesús choloj.

40 Oksepa yajki oksekopa den ueyiat Jordán, kampa achto Juan teauiaya, uan ompa mokauak. 41 Miakej kiitatoj, uan peujkej kijtouaj: “Juan amo kichiuak nion se milagro, sayoj ke nochi tein Juan kijtoj de nejin takat, melauak”. 42 Uan miakej ompa peujkej itech takuaujtamatij Jesús.

11 Itech xolal Betania nemia se takat akin monotsaya Lázaro uan yejua mokokouaya. Uan iikniuan, María uan Marta, no ompa nemiaj. 2 Nejin María, iikniuj Lázaro, yejua akin kimetstekilij toTekotsin aceite tein kualtsin ajuiyak uan kimetsuajuatsak ika itson. 3 Yejua ika iikniuan tatitankej maj kiluitij Jesús: “ToTekotsin, xikita, motasojikniuj mokokoua”. 4 Sayoj ke, keman Jesús kikakik, kijtoj: “Nejin kokolis* amo kimiktis, ta kichiuas maj moueyitali Dios uan maj iKoneuj Dios no moueyitali”.

5 Jesús kintasojtaya Marta, María uan Lázaro. 6 Sayoj ke, keman kimatik ke Lázaro mokokouaya, mokauak ome tonalok kampa yetoya. 7 Uan kiniluij imomachtijkauan: “Maj oksepa tiakan Judea”. 8 Sayoj ke imomachtijkauan kiluijkej: “Tamachtijkej,* ayamo uejkaua akin nemij Judea kinekiaj mitstetemaskej,* ¿uan tiknemilijtok oksepa ompa tias?”. 9 Jesús kinnankilij: “Itech se tonal, 12 horas tanestok, ¿melauj? Akin nejnemi tonayan, amo teyi ika mometsteloua* porin tanex kikaua maj tachia. 10 Sayoj ke akin nejnemi keman tayouayan, mometsteloua porin amo teyi kitauilia”.*

11 Keman kitamiijtoj nejin, no kijtoj: “Totasojikniuj Lázaro kochik, sayoj ke nejua niouj ompa nikijxititi”.* 12 Yejua ika imomachtijkauan kiluijkej: “ToTekotsin, komo kochtok, nenkentis”. 13 Tein melauj, Jesús kijtosnekia ke Lázaro momikilijkaya. Sayoj ke yejuan kinemiliayaj ke kijtosnekia ke kochtoya, moseuijtoya. 14 Uan Jesús kinyekiluij: “Lázaro momikilijya, 15 uan niyolpaki maj amo ompa nietoni, porin tein nikchiuati namechpaleuis xitaneltokakan. Tiouij kampa yetok”. 16 Yejua ika Tomás, akin kiluiayaj Cuate,* kiniluij okseki imomachtijkauan Jesús: “Tejuan maj no tiakan uan maj iuan timikikan”.

17 Keman Jesús ajsik, kimatik ke Lázaro kiuikayaya naui tonal itech miketekoch. 18 Betania amo uejka yetoya de Jerusalén, kemej eyi mil metro.* 19 Miakej judíos ualajkaj kinitakoj Marta uan María para kinyolseuiskej porin ininikniuj momikilijka. 20 Keman Marta kimatik ke Jesús ualajtoya, kinamikito; sayoj ke María mokauak kalijtik. 21 Uan Marta kiluij Jesús: “NoTekotsin, komo nikan tietoskia, noknitsin amo momikiliskia. 22 Maski ijkon, nikyekmati ke nochi tein tiktajtanis Dios, yejua mitsmakas”. 23 Jesús kiluij: “Mokniuj oksepa nemiti”.* 24 Marta kinankilij: “Nejua nikmati ke oksepa nemis* keman mikemej oksepa nemiskej, satepan keman ejkos tonal”. 25 Jesús kiluij: “Nejua nikchiua maj mikemej oksepa nemikan uan nejua nikinpaleuia maj miakej kisentokakan nemikan. Akin nouan takuaujtamatis, maski momikilis, oksepa nemis; 26 uan akin yoltok uan nouan takuaujtamatis amo keman momikilis. ¿Tikneltoka nejin?”. 27 Yejua kiluij: “Kemaj noTekotsin, nejua nikneltoka ke tejua tiCristo, iKoneuj Dios, akin monekia ualas nikan taltikpak”. 28 Keman kitamiijtoj nejin, kinotsato iikniuj, María uan kiichtakailuij: “Tamachtijkej nikan yetokya uan mitsnotsa”. 29 Nimantsin keman María kikakik nejin, moketsak uan kiitato.

30 Jesús ayamo kalakia itech xolal, ta kisentokaya ompa kampa Marta kinamikito. 31 Keman judíos akin kiyolseuijtoyaj María ompa kalijtik kiitakej ke moketstikisak uan yajki, kitojtokakej porin kinemilijkej ke yaya chokati kampa yetoya miketekoch. 32 Keman María ajsik kampa yetoya Jesús uan kiitak, motankuaketsak iixpan uan kiluij: “NoTekotsin, komo nikan tietoskia, noknitsin amo momikiliskia”. 33 Keman Jesús kiitak ke yejua chokatoya uan no judíos akin iuan yayaj, semi moueyiyoltayokoltij uan yoltajyouij. 34 Kintajtanij:* “¿Kani nankitalijkej?”. Yejuan kinankilijkej: “ToTekotsin, xikitaki”. 35 Jesús ixayojtemok. 36 Keman kiitakej, judíos peujkej kijtouaj: “¡Xikitakan, semi kitasojtaya!”. 37 Sayoj ke sekin kijtouayaj: “Komo nejin takat kiixpajtij akin amo tachiaya, ¿amo ueliskia no kichiuas maj Lázaro amo momikiliani?”.

38 Jesús oksepa moyoltayokoltij uan yajki kampa yetoya miketekoch. Tein melauj katka se tepekoyok, uan tentsaktoya ika se tet. 39 Jesús kijtoj: “Xikajchiuakan tet”. Sayoj ke Marta, iikniuj Lázaro, kiluij: “NoTekotsin, xa tsojyakya porin naui tonalya momikilij”. 40 Jesús kiluij: “¿Amo nimitsiluij ke komo titaneltokaya ueliskia tikitas iueyi chikaualis Dios?”. 41 Yejua ika kiajchiujkej tet. Uan Jesús moixajokuik uan kijtoj: “NoTajtsin, nimitstasojkamatilia porin tinechkaki. 42 Nejua nikmati ke tejua nochipa tinechkaki, sayoj ke nikijtoua porin nikan yetokej miakej, para maj kineltokakan ke tejua tinechualtitanik”. 43 Keman kitamiijtoj nejin, chikauak kijtoj: “¡Lázaro, xiualkisa!”. 44 Akin momikilijkaya, ualkisak. Metsilpitoya, mailpitoya* uan ixpiktoya ika seki tasal. Jesús kiniluij: “Xiktojtomakan uan xikauakan maj youi”.

45 Yejua ika, keman kiitakej tein Jesús kichiuak, miakej judíos akin ualajkaj kikalpanokoj María, itech takuaujtamatkej. 46 Sayoj ke sekin kiniluitoj fariseos tein Jesús kichiujka. 47 Yejua ika uejueyi tiopixkamej uan fariseos, kinsentilijkej Uejueyi Tamelauanij* uan kijtojkej: “¿Toni tikchiuatij? Porin nejin takat kichiua miak milagros. 48 Komo tikauaj maj ijkon kisentoka, nochin itech takuaujtamatiskej uan romanos ualaskej uan techkuiliskej totemplo uan toaltepeuj”. 49 Sayoj ke se takat akin monotsaya Caifás yetoya iniuan. Yejua katka tayekankatiopixkat nejon xiuit, uan kiniluij: “Namejuan amo teyi nankiajsikamatij. 50 Amo nankiajsikamatij ke okachi kuali maj miki sayoj se takat para kinpaleuis nochin uan amo maj kiixpolokan nochi altepet”. 51 Sayoj ke nejin amo kijtoj porin yejua ijkon kinemilij, ta kemej katka tayekankatiopixkat nejon xiuit, Dios kichiuak maj kijto ke Jesús mikiskia para kinpaleuis judíos. 52 Uan amo sayoj judíos, ta no para kinsentilis ikoneuan Dios akin moyaujtoyaj.* 53 Yejua ika, nejon tonal peujkej kiixejekouaj keniuj kimiktiskej.

54 Yejua ika Jesús amo nentinemiaok ininixpan judíos uan yajki itech se tal tein amo uejka yetoya den taluakyan, itech se ueyi xolal tein monotsa Efraín, uan ompa mokauak iniuan imomachtijkauan. 55 Amo uejkaua judíos yaya kichiuatij iluit tein monotsa Pascua, uan miakej akin nemiaj itech tataman xolaltsitsin pankiskej Jerusalén para mochipauaskej ijkon kemej kijtoua iTanauatil Moisés. 56 Yejuan peujkej kiixtemouaj Jesús. Keman yetoyaj itech templo moiluiayaj: “¿Toni nankinemiliaj? ¿Amo ualas iluitikiuj?”. 57 Sayoj ke uejueyi tiopixkamej uan fariseos tanauatijkaj ke komo aksa* kimatia kani yetoya Jesús, maj kiniluianij para ueliskia kikitskiskej.

12 Chikuasen tonal achto ke mochiuaskia iluit tein monotsa Pascua, Jesús ajsik Betania, kampa nemia Lázaro, akin Jesús kichiujka maj oksepa nemi.* 2 Uan kitakualchiuijkej ompa. Marta kintatekilijtoya uan Lázaro no takuajtoyaj iuan Jesús. 3 María kikuik kemej tajko litro aceite tein kualtsin ajuiyak uan semi patiyoj, tachijchiuj ika senkis nardo,* kimetstekilij Jesús uan kiuajuachilij ika itson. Uan itech nochi kali taajuiyayak. 4 Sayoj ke Judas Iscariote, semej imomachtijkauan Jesús akin yaya kitemaktitiya, kijtoj: 5 “¿Keyej amo tiknamakakej nejin aceite ika 300 denarios* uan tikinmakakej pobres nejon tomin?”. 6 Tein melauj, amo kijtoj nejon porin yekmelauj kinekia kinpaleuis pobres, ta porin tachtekia; kemej yejua kipiaya kaxontsin kampa kipantaliayaj tomin, kiichtekia tomin tein ompa kipantaliayaj. 7 Uan Jesús kijtoj: “Xikaua; maj kichiua nejin tein ipa mochiua, ijkon kemej kichiuaskej keman nechtokaskej. 8 Porin pobres nochipa namouan yetoskej, sayoj ke nejua amo nochipa namouan nietos”.

9 Nejon hora, tel miakej judíos kimatkej ke Jesús yetoya ompa Betania uan kiitakoj, uan amo sayoj yejua, ta no kiitakoj Lázaro, akin yejua kichiujka maj oksepa nemi.* 10 Uejueyi tiopixkamej axkan peujkej kiitaj keniuj no kimiktiskej Lázaro 11 porin keman miakej judíos ompa yayaj uan kiitayaj Lázaro, takuaujtamatiaj iuan Jesús.

12 Mostika, nochin akin iluitikoj kimatkej ke Jesús ejkotoyaya Jerusalén. 13 Yejua ika, kikuikej koujxiujmayit uan kinamikitoj, uan peujkej chikauak kijtouaj: “¡Timitstataujtiaj, xikmakixti! ¡Tatiochiual akin ualajtok itokaykopa Jehová,* Tekiuaj itech xolal Israel!”. 14 Keman Jesús kiajsik se burrito, ipanko motalij, ijkon kemej ijkuiliujtok: 15 “Amo ximoui ichpoch Sion. ¡Xikita! Ualajtok motekiuaj, tokotsyetiuits ipanko se burrito”. 16 Imomachtijkauan amo kiajsikamatiaj nejin. Sayoj ke, keman Jesús kiueyitalijkej, kielnamikkej ke nejin ipa ijkuiliujtoya ke kipanoskia uan ke yejua nejon tein kichiuilijkaj.

17 Uan akin kiitakej ke Jesús kiluij Lázaro maj ualkisani keman kichiuak maj oksepa nemi,* kitematiltijtiayaj nejon. 18 No yejua ika kinamikitoj, porin kitekakilijkaj ke kichiujka nejon milagro. 19 Yejua ika fariseos moiluijkej: “¿Nankiitakejya? Amo teyi ueli tikchiuaj. ¡Xikitakan keniuj nochin kitojtokaj!”.

20 Nejon tonal no yetoyaj seki griegos akin kiueyichiuakoj Dios itech iluit. 21 Yejuan kiajsitoj Felipe, akin katka kayot Betsaida tein poui Galilea, uan kiluijkej: “Tejuatsin, tiknekij tikitaskej Jesús”. 22 Felipe kiluito Andrés, uan Andrés uan Felipe kiluitoj Jesús.

23 Sayoj ke Jesús kinnankilij: “Ejkokya hora keman akin yolik kemej takat kiueyitalitij. 24 Yekmelauj namechyekiluia ke komo trigojtet amo uetsi talpan uan palani,* kisentoka sayoj se trigojtet. Sayoj ke komo palani, kitemaka miak takilot. 25 Akin okachi kitayekanaltia nemis,* mikis, sayoj ke akin axkan motemaka mikis,* makisas para nemis nochipaya. 26 Komo aksa* kineki nechtekitilis, maj nechtojtoka; uan kampa nejua nietos ompa no yetos notekitikauj. Komo aksa nechtekitilia, noTajtsin kitatiochiuis. 27 Axkan niyoltajyouijtok. Uan ¿toni ueliskia nikijtos? NoTajtsin, xinechmakixti itech nejin hora tein semi ouij. Sayoj ke yejua ika niejkok hasta nejin hora. 28 NoTajtsin, xikueyitali motokay”. Uan ne iluikak mokakik ke Dios kiualijtoj: “Nikueyitalijya uan oksepa nikueyitalis”.

29 Akin ompa yetoyaj kikakkej nejon, uan sekin peujkej kijtouaj ke tatikuinka. Oksekin kijtojkej: “Se ángel kinojnotsak”. 30 Uan Jesús kijtoj: “Nejin amo mokakik para maj nechpaleui nejua, ta para maj namechpaleui namejuan. 31 Axkan kiixtalijtokej tein kinnamiki kiseliskej akin nemij nikan taltikpak uan akin taixyekana nikan taltikpak kikalantamotaskej. 32 Sayoj ke nejua, keman nechajokuiskej,* nikchiuas maj nouan motokikan akin pouij itech nochi tataman xolalmej”. 33 Tein melauj, nejin kijtoj para kinextis keniuj yaya momikiliti. 34 Uan akin ompa yetoyaj kinankilijkej: “Tikmatij ke itech iTanauatil Moisés kijtoua ke Cristo nochipa nemis. ¿Keniuj tejua tikijtoua ke akin yolik kemej takat moneki kiajokuiskej? ¿Akoni nejon takat?”. 35 Yejua ika Jesús kiniluij: “Tanex yetos namouan se tepitsinok. Xinejnemikan keman nankipiaskej tanex, ijkon tayouayanilot amo namechxijxikos; akin nejnemi keman tayouayan amo kimati kani youi. 36 Keman nankipiaskej tanex, xitakuaujtamatikan itech tanex, ijkon nanemiskej kampa tatanestok”.

Keman kitamiijtoj nejin, Jesús yajki uan motatij.* 37 Maski kichiujka miak milagros ininixpan, amo itech takuaujtamatiaj, 38 para maj mochiuani nejin tein kijtoj tanauatijkej* Isaías: “Jehová,* ¿akoni takuaujtamati itech tein tikteixmatiltiaj? ¿Uan akoni kiixmatiltianij ichikaualis* Jehová?”.* 39 Isaías no kijtoj keyej amo ueliaj takuaujtamatiaj: 40 “Kichiuak maj amo tachiakan uan maj yoltakuaujkej, para maj amo tachiakan nion maj kiajsikamatikan toni moneki kichiuaskej nion maj mokepakan iuan Dios uan maj nejua nikinpajti”. 41 Isaías kijtoj nejin porin kiitak ke kipiaya ueyi tanauatil, uan ika tajtoj. 42 Maski ijkon, hasta miakej akin kinixyekanayaj judíos itech takuaujtamatkej, sayoj ke amo kijtouayaj senteixtenoj porin kinmouiliayaj fariseos, porin yejuan amo kinkauaskiajok maj mosentilikan kampa taueyichiuaj judíos. 43 Nejon taixyekananij okachi kinekiaj maj oksekin kinueyitalikan uan amo maj kinueyitali Dios.

44 Sayoj ke Jesús chikauak kijtoj: “Akin nouan takuaujtamati amo sayoj nouan takuaujtamati, ta no iuan akin nechualtitanik; 45 uan akin nechita nejua, no kiita akin nechualtitanik. 46 Niualaj nikan taltikpak kemej se tanex, ijkon akin nouan takuaujtamatis amo yetosok tayouayanijtik. 47 Sayoj ke, komo aksa kikaki tein nikijtoua uan amo kichiua, nejua amo nikixtalia maj kitatsakuiltikan; porin amo niualaj nikixtaliko maj kintatsakuiltikan akin nemij nikan taltikpak, ta nikinmakixtiko. 48 Akin nechixtopeua uan amo kineltoka tein nikijtoua, yetokya akin kiixtalis maj kitatsakuiltikan: tein nikijtoj, yejua tein kiixtalis maj kitatsakuiltikan keman ejkos tonal. 49 Porin amo nikijtouani tein nejua niknemilia, ta noTajtsin akin nechualtitanik nechnauatij tein moneki nikijtos uan tein moneki nitamachtis. 50 Uan nikmati ke se kitakamatis kichiua maj se nemi nochipaya. Yejua ika nochi tein nikijtoua, nikijtoua ijkon kemej noTajtsin nechiluij”.

13 Uan achto ke mochiuaskia iluit tein monotsa Pascua, Jesús kimatia ke ejkokaya hora keman yaskia de nikan taltikpak uan mokepaskia iuan iTajtsin. Yejua semi kintasojtak imomachtijkauan akin yetoyaj nikan taltikpak, uan kisentokak kintasojtak hasta keman momikilij. 2 Uel hora takuajtoyaj nejon youak uan Amokuali kikalakijkaya itech iyolo Judas maj kinemili kitemaktis Jesús. Nejin Judas katka ikoneuj Simón Iscariote. 3 Jesús kimatia ke toTajtsin kimaktilijka nochi uan ke ualeuak imako Dios, uan ke yaya mokepati iuan. Yejua ika, 4 moketsak, kitalij tanakastan ipantaken, kikuik se tasal tein ika tauajuatsaj uan motajkoilpilij.* 5 Kipantekak at itech se ueyi kaxit uan peuak kinmetspajpaka imomachtijkauan uan kinmetsuajuatsa ika nejon tasal tein motajkoilpilijka. 6 Keman ajsik iuan Simón Pedro, yejua kitajtanij:* “NoTekotsin, ¿tejua tinechmetspajpakati?”. 7 Jesús kinankilij: “Axkan amo tikajsikamati tein nikchiujtok, sayoj ke okachi satepan tikajsikamatis”. 8 Pedro kiluij: “Tejua amo keman tinechmetspajpakas”. Uan Jesús kinankilij: “Komo amo nimitsmetspajpaka amo uelis tipouis nouan”. 9 Simón Pedro kiluij: “NoTekotsin, komo ijkon, amo sayoj xinechmetspajpaka, ta no xinechmapajpaka uan xinechkuapajpaka”. 10 Jesús kinankilij: “Akin maltijya,* chipauakya uan sayoj moneki mometspajpakas. Uan namejuan nanchipaujkej, sayoj ke amo nanochin”. 11 Porin yejua kimatia akoni kitemaktiskia. Yejua ika kijtoj “Amo nanochin nanchipaujkej”.

12 Keman kinmetspajpakak nochin, motalilij ipantaken, oksepa motalij kampa takuajtoyaj uan kiniluij: “¿Nankimatij keyej namechmetspajpakak? 13 Namejuan nanechiluiaj Tamachtijkej uan toTekotsin, uan melauak tein nankijtouaj. 14 Yejua ika, komo nejua namoTekotsin uan namoTamachtijkauj, uan namechmetspajpakak, namejuan no moneki namometspajpakaskej se iuan okse. 15 Porin ijkon kemej nejua nikchiuak, no ijkon xikchiuakan. 16 Yekmelauj namechyekiluia ke takeual amo okachi ueyichiujkej ke iteko, nion akin kititankej okachi ueyichiujkej ke akin kititanik. 17 Axkan ke nankimatij nejin, nanyolpakiskej komo nankichiuaj. 18 Tein nikijtojtok amo para nanochin; nikinixmati akin nikinijitak.* Sayoj ke nejin panok para maj mochiuani nejin tein kijtoua Tajkuilolamatsin: ‘Akin nouan takuajtoya nechixnamikik’. 19 Axkan namechiluia nejin, achto ke mochiuas, uan ijkon keman mochiuas, namejuan nankimatiskej ke nejon tajkuilol noka tajtojtok. 20 Yekmelauj namechyekiluia ke akin kiselia akin nejua niktitanis, no nechselia nejua, uan akin nechselia nejua no kiselia akin nechualtitanik”.

21 Keman kitamiijtoj nejin, Jesús peuak yoltajyouia uan kijtoj: “Yekmelauj namechyekiluia ke nansemej nechtemaktiti”. 22 Imomachtijkauan sayoj mosenixitakej porin amo kimatiaj akoni ika tajtojtoya. 23 Semej imomachtijkauan, akin Jesús kitasojtaya, takuajtoya inakastan* Jesús. 24 Yejua ika Simón Pedro kiixnotsak uan kitajtanij: “¿Akoni ika tajtojtok?”. 25 Uan yejua monetechoj iyolixko Jesús uan kitajtanij: “NoTekotsin, ¿akoni ika titajtojtok?”. 26 Jesús tanankilij: “Yejua akin nikmakati nejin pantsin tein nikajakiti”. Uan kiajakij pantsin uan kimakak Judas ikoneuj Simón Iscariote. 27 Satepan ke Judas kikuik nejon pantsin, Satanás itech kalakik. Uan Jesús kiluij: “Xiktamichiujtiuetsiti tein tikpeualtij”. 28 Sayoj ke, nion semej akin iuan takuajtoyaj kimatia keyej kiluijka nejon. 29 Tein melauj, sekin kinemiliayaj ke kemej Judas kipiaya kaxontsin kampa kipantaliayaj tomin, Jesús kiluijtoya “Xikoua tein moneki para iluit”, oso xa maj kinmakani tepitsin tomin pobres. 30 Yejua ika, keman kikuik nejon pantsin, kisak de ompa. Nejon hora youakya katka.

31 Keman Judas amo yetoyaok, Jesús kijtoj: “Axkan Dios nechueyitaliti nejua akin niyolik kemej takat uan notechkopa nochin kiueyitaliskej Dios. 32 Dios nimantsin nechueyitaliti para maj iuan nieto. 33 Nokoneuantsitsin, namouan nietoti seki tonalmejok. Nanechtemoskej; sayoj ke tein nikiniluij judíos, axkan no namechiluia namejuan: ‘Amo uelis nanualaskej kampa nejua niouj’. 34 Namechmaka se yankuik tanauatil: ximotasojtakan se iuan okse; ijkon kemej nejua namechtasojta, namejuan no ximotasojtakan se iuan okse. 35 Ijkon nochin kimatiskej ke namejuan nannomomachtijkauan: komo namotasojtaj se iuan okse”.

36 Simón Pedro kitajtanij: “NoTekotsin, ¿kani tiouj?”. Jesús kinankilij: “Kampa niouj amo uelis tinechtojtokas axkan, sayoj ke tinechtojtokas satepan”. 37 Pedro kiluij: “NoTekotsin, ¿keyej amo uelis nimitstojtokas axkan? Nejua moka nimikis”. 38 Jesús kinankilij: “¿Tikijtoua ke noka timikis? Yekmelauj nimitsyekiluia ke amo tsajtsis se pio* hasta ke expa tikijtos ke amo tinechixmati”.

14 “Amo ximoyoltekipachokan. Xitakuaujtamatikan iuan Dios, uan no xitakuaujtamatikan nouan. 2 Ichan noTajtsin semi takaujtok kampa se nemis. Komo amo takaujtoskia, namechiluiskiaya, porin namechtachijchiuiti kampa nanemiskej. 3 Uan no, keman niasya uan namechtachijchiuis kampa nanemiskej, oksepa niualas uan namechuikas kampa nietos, uan ijkon kampa nejua nietos no nanyetoskej namejuan. 4 Uan namejuan nankiixmatij ojti para nanyaskej kampa nejua niouj”.

5 Tomás kiluij: “NoTekotsin, amo tikmatij kani tiouj. ¿Keniuj tikixmatitij ojti?”.

6 Jesús kinankilij: “Nejua niojti, nejua tein melauak uan nejua nikchiua xiyoltokan. Amo akin ueli kiajsiti noTajtsin komo amo notechkopa. 7 Komo nanechixmatij nejua, no nankiixmatiskej noTajtsin. Desde axkan nankiixmatij uan nankiitakejya”.

8 Felipe kiluij: “ToTekotsin, xitechnextili moTajtsin, uan sayoj nejon”.

9 Jesús kinankilij: “Felipe, uejkaujya nietok namouan, ¿uan ayamo tinechixmati? Akin nechitani, no kiitani noTajtsin. ¿Keyej tikijtoua ‘Xitechnextili moTajtsin’? 10 ¿Amo tikneltoka ke nejua nietok iuan noTajtsin uan ke noTajtsin nouan yetok? Nejua amo namechiluia tein nejua niknemilia, ta noTajtsin akin nochipa nouan yetok, kichiujtok tein kiixtalijtok. 11 Xinechneltokilikan keman namechiluia ke nietok iuan noTajtsin uan noTajtsin yetok nouan. Sayoj ke komo amo nankineltokaj tein nikijtoua, maj namechpaleui xitaneltokakan tein nikchiua. 12 Yekmelauj namechyekiluia ke akin nouan takuaujtamatis no kichiuas tein nejua nikchiua. Uan kichiuas okachi uejueyi taman, porin nejua niouj nikajsiti noTajtsin. 13 Uan no, tein yeski taman tein nantajtaniskej notokaykopa, nejua nikchiuas, para maj noTajtsin moueyitali itechkopa iKoneuj. 14 Komo namejuan nantajtanij teisa notokaykopa, nejua nikchiuas.

15 ”Komo nanechtasojtaj, nankitakamatiskej notanauatiluan. 16 Uan nejua niktataujtis noTajtsin uan yejua namechmakas okse tapaleuijkej* maj yeto namouan nochipaya: 17 ichikaualis Dios tein kitematiltia tein melauak, tein amo nochin ueli kinmakaj porin nion kiitaj nion kiixmatij. Namejuan nankiixmatij porin yetok namotech uan namotech mokaua. 18 Nejua amo namechkauas namoselti.* Nimokepas uan nietos namouan. 19 Amo uejkaua, nikan taltikpak amo nechitaskejok, sayoj ke namejuan nanechitaskej porin nejua niyoltok uan namejuan no nanyoltoskej. 20 Nejon tonal nankimatiskej ke nejua nietok iuan noTajtsin, ke namejuan nanyetokej nouan uan ke nejua nietok namouan. 21 Akin amo kiixtopeua notanauatiluan uan kitakamati yejua akin nechtasojta. Uan akin nechtasojta, noTajtsin kitasojtas uan nejua no niktasojtas uan nikchiuas maj yekmelauj kuali nechixmati”.

22 Judas, (amo Judas Iscariote), kitajtanij:* “NoTekotsin, ¿toni panok? ¿Keyej tikchiuati maj yekmelauj kuali timitsixmatikan tejuan uan oksekin amo?”.

23 Jesús kinankilij: “Komo aksa* nechtasojta, kichiuas tein nikijtoua. Uan noTajtsin kitasojtas, uan tiomen tiualaskej kampa yejua yetos uan iuan tinemiskej. 24 Akin amo nechtasojta amo kichiua tein nikijtoua. Tein nankikakij ke namechiluia amo noaxka, ta iaxka noTajtsin, akin nechualtitanik.

25 ”Namechiluia nejin keman niksentokaok namouan. 26 Sayoj ke tapaleuijkej, ichikaualis Dios, tein noTajtsin kiualtitanis notokaykopa, namechmachtis nochi uan namechelnamiktis nochi tein namechiluij. 27 Namechpaleuis xiksentokakan xiyolseujtokan ijkon kemej axkan nanyolseujtokej nouan. Amo namechyolseuis kemej nikan taltikpak teyolseuiaj. Amo ximoyoltekipachokan nion ximoyolmoujtikan. 28 Nankikakkej ke namechiluij: ‘Niouj uan oksepa nimokepas namouan’. Komo nanechtasojtaj nanyolpakiskej porin niouj kampa yetok noTajtsin, porin noTajtsin okachi ueyichiujkej* ke nejua. 29 Namechiluij nejin achto ke mochiuas, uan ijkon keman mochiuas, namejuan nantaneltokaskej. 30 Amo semiok namechnojnotsas, porin ualajtok akin taixyekana nikan taltikpak, maski yejua nion tepitsin ueli nechixyekana. 31 Sayoj ke para maj nochin kimatikan ke nejua niktasojta noTajtsin, senkis nikchiua tein noTajtsin nechnauatij. Ximoketsakan, tiouijya.

15 ”Nejua yekmelauj niuvajkouit uan noTajtsin yejua tekitikej. 2 Yejua kiteki nochi nomakoujyo tein amo taki, uan nochi tein kemaj taki, kichipaua para maj okachi taki. 3 Tein namechiluij namechchipauakya. 4 Xiksentokakan xietokan nouan uan nejua niksentokas namouan nietos. Ijkon kemej imakoujyo uvajkouit amo ueli taki iselti, ta moneki yetos itech uvajkouit, namejuan amo no uelis nankitemakaskej takilot komo amo nankisentokaj nouan. 5 Nejua niuvajkouit uan namejuan kemej yeskia imakoujyo uvajkouit. Akin kisentoka nouan yetok, uan nejua niksentoka iuan, yejua kitemaka miak takilot. Porin komo amo nouan nanyetokej, namejuan amo teyi ueli nankichiuaj. 6 Komo aksa* amo kisentoka nouan yetok, kitekij kemej imakoujyo se kouit uan uaki. Nejon imakoujyo kisentiliaj, kitikotamotaj uan tata.* 7 Komo nankisentokaj nouan nanyetokej uan notajtoluan kisentokaj itech namoyolo, xitajtanikan tein nankinekiskej uan namechmakaskej. 8 Nejin kiueyitalia noTajtsin: nochipa xiktemakakan miak takilot uan xiknextikan ke nannomomachtijkauan. 9 Ijkon kemej noTajtsin nechtasojta, nejua no namechtasojta; xiksentokakan xikchiuakan maj namechtasojta. 10 Komo namejuan nankitakamatij notanauatiluan, nejua nochipa namechtasojtas, ijkon kemej nejua niktakamati itanauatiluan noTajtsin uan yejua nochipa nechtasojta.

11 ”Namechiluia nejin para xiyolpakikan ijkon kemej nejua niyolpaki uan para maj senkis xiyolpakikan. 12 Yejua nejin notanauatil: ximotasojtakan se iuan okse kemej nejua namechtasojta. 13 Amo akin okachi tetasojta ke akin motemaka mikis para kinpaleuis itasojikniuan. 14 Namejuan nannotasojikniuan komo nankichiuaj tein namechnauatia. 15 Amo namechiluiaok takeualmej, porin takeual amo kimati tein kichiua iteko. Namechiluia notasojikniuan, porin namechtapouijya nochi tein nikakilij noTajtsin. 16 Namejuan amo nanechijitakej,* ta nejua namechijitak. Namechixtalij xiakan uan xiksentokakan xiktemakatokan takilot, takilot tein uejkauas. Ijkon noTajtsin namechmakas nochi tein nankitajtaniskej notokaykopa.

17 ”Namechnauatia nejin para ximotasojtakan se iuan okse. 18 Komo akin nemij nikan taltikpak namechtauelitaj, nankimattokejya ke achto nejua nechtauelitakej. 19 Komo namejuan nanyeskiaj kemej akin nemij nikan taltikpak, yejuan namechtasojtaskiaj. Sayoj ke, kemej amo nanpouij iniuan, ta nejua namechijitak,* yejuan namechtauelitaj. 20 Xikelnamiktokan tein namechiluij: takeual amo okachi ueyichiujkej ke iteko. Komo yejuan nechtajyouiltianij, no namechtajyouiltiskej namejuan; komo yejuan kichiuaj tein nikijtoua, no kichiuaskej tein nankijtoskej. 21 Kemej nantakuaujtamatij itech notokay, yejuan namechchiuiliskej nochi nejon, porin amo kiixmatij akin nechualtitanik. 22 Komo amo niualaskia uan amo nikinnojnotsaskia, yejuan amo motajtakolmakatoskiaj. Sayoj ke axkan amo ueli motenpaleuiaj. 23 Akin nechtauelita nejua, no kitauelita noTajtsin. 24 Komo nejua amo nikchiuaskia ininixpan tein amo akinok kichiuani, amo motajtakolmakatoskiaj; sayoj ke axkan nechitakejya uan nechtauelitakej nejua uan no noTajtsin. 25 Sayoj ke nejin panok para maj mochiuani tein ijkuiliujtok itech ininTanauatil: ‘Nechtauelitakej uan amo onkaya keyej’. 26 Keman ualas tapaleuijkej tein namechualtitanilis imako noTajtsin, ichikaualis Dios tein tamachtia tein melauak, tein ualeua imako noTajtsin, yejua nechteixmatiltis; 27 uan namejuan no moneki nanechteixmatiltiskej, porin nouan nanyetonij desde ke peuak nitanojnotsa.

16 ”Namechiluia nejin para amo xinechkauakan.* 2 Amo namechkauaskejok ximosentilikan kampa taueyichiuaj judíos. Tein melauj ejkos hora keman akin namechmiktis kinemilis ke kitekitilijtok Dios. 3 Sayoj ke kichiuaskej nochi nejin porin amo kiixmatij noTajtsin nion nechixmatij. 4 Namechiluia nejin para keman ejkos hora keman mochiuas, nankielnamikiskej ke ipa namechiluijkaya.

”Amo namechiluij achto nejin porin nietoya namouan. 5 Sayoj ke axkan nikajsiti akin nechualtitanik, uan nion semej nanechtajtaniaj* ‘¿Kani tiouj?’, 6 ta semi nanyoltayokoyaj porin namechiluij nejin. 7 Sayoj ke yekmelauj tein namechiluia: namechpaleuia maj niouj. Porin komo amo niouj, nejua amo namechualtitanilis ichikaualis Dios maj namechpaleui; sayoj ke komo niouj, nejua namechualtitanilis. 8 Uan keman namechualtitanilis, kinyeknextilis nochin akoni tajtakolchiujtok, akoni kichiujtok tein kuali yetok uan akoni kinamiki maj kitatsakuiltikan. 9 Achto, akoni tajtakolchiujtok, porin yejuan amo nouan takuaujtamatij; 10 uan de ompa, akoni kichiujtok tein kuali yetok, porin niouj nikajsiti noTajtsin uan namejuan amo nanechitaskejok, 11 uan satepan, akoni kinamiki maj kitatsakuiltikan, porin akin taixyekana nikan taltikpak kiixtalijkejya maj kitatsakuiltikan.

12 ”Miak tamanok namechiluiskia, sayoj ke axkan ayamo nankiajsikamatiskiaj. 13 Sayoj ke keman nankiseliskej ichikaualis Dios tein kiteixmatiltia tein melauak, namechixyekanas uan namechpaleuis xikajsikamatikan nochi tein melauak. Sayoj ke nejin chikaualis amo tekiti iselti, ta kiteixmatiltia sayoj tein Dios kiixtalia ke moneki momatis. Yejua ika nankimatiskej miak taman tein mochiuas satepan. 14 Ichikaualis Dios nechueyitalis porin namechixmatiltis nochi tein nechkakilij. 15 Nochi tein kipia noTajtsin, no noaxka. Yejua ika nikijtoj ke namechixmatiltis nochi tein nechkakilij. 16 Amo uejkaua amo nanechitaskejok, sayoj ke no, amo uejkaua nanechitaskej”.

17 Keman kikakkej nejin, seki imomachtijkauan peujkej moiluiaj: “Yejua kijtoua ke amo uejkaua amo tikitaskejok, sayoj ke no, amo uejkaua tikitaskej uan no kijtoua ke kiajsiti iTajtsin, ¿toni kijtosneki nochi nejon?”. 18 Kijtouayaj: “¿Toni kijtosneki keman kijtoua ‘Amo uejkaua’? Amo tikmatij toni ika tajtojtok”. 19 Kemej Jesús kimatia ke kinekiaj kitajtaniskej toni kijtosnekia tein kijtoj, kiniluij: “¿Namotajtanijtokej se iuan okse nejon porin nikijtoj ‘Amo uejkaua amo nanechitaskejok, sayoj ke no amo uejkaua nanechitaskej’? 20 Yekmelauj namechyekiluia ke namejuan nanchokaskej uan nantayokoyaskej, sayoj ke akin nemij nikan taltikpak yolpakiskej; namejuan nantajyouiskej, sayoj ke ejkos tonal keman nanyolpakiskej. 21 Keman se siuatsin kipiati ikonetsin, tajyouia porin ejkokya ihora. Sayoj ke keman kipiaya, yolpaki maj se konetsin yolini, uan nejon kichiua maj kielkaua nochi tein kijyouij. 22 No ijkon panoua namouan. Axkan semi nantayokoxtokej, sayoj ke nejua oksepa namechitas uan semi nanyolpakiskej uan amo akin uelis kichiuas amo xiyolpakikan. 23 Uan nejon tonal amo teyi nanechtajtaniskej. Yekmelauj namechyekiluia ke komo notokaykopa nankitajtaniaj noTajtsin tein yeski taman, yejua namechmakas. 24 Hasta axkan amo teyi nantajtantokej notokaykopa. Xitajtanikan uan namechmakaskej uan ijkon senkis nanyolpakiskej.

25 ”Keman namechiluij nochi nejin namechtapouij miak taman. Ejkos hora keman amo teyi namechtapouisok, ta namechyekiluis tein kichiujtok noTajtsin. 26 Nejon tonal, notokaykopa nankitajtaniskej teisa noTajtsin. Sayoj ke amo nikijtosneki ke nejua namechtajtanilis. 27 Porin noTajtsin namechtasojta, porin nanechtasojtaj uan nankineltokaj ke nejua niualaj nikixnextiko Dios. 28 Niualaj nikan taltikpak nikixnextiko noTajtsin. Axkan nikaujteua nejin taltikpak uan nikajsiti noTajtsin”.

29 Imomachtijkauan kiluijkej: “Axkan kemaj titechyeknojnotsa, amo titechtapouiaok miak taman. 30 Axkan tikmatij ke nochi tikmati uan amo moneki maj nion akin mitstajtani teisa porin tikmattokya tein kinemilijtok. Yejua ika tikneltokaj ke Dios mitsualtitanik”. 31 Jesús kinnankilij: “¿Axkan nantaneltokaj? 32 Xikakikan nejin. Ejkos hora, uan tein melauj ejkokya, keman sejse nancholoskej namochajchan uan nanechkauaskej noselti. Maski amo nietok noselti, porin toTajtsin nouan yetok. 33 Namechiluij nejin para xiyolseujtokan porin nouan nanpouij. Akin nemij nikan taltikpak namechtajyouiltiskej. Sayoj ke ¡ximoyolchikauakan!, nejua niktanik* tein amo kuali tein onkak nikan taltikpak”.

17 Keman kitamiijtoj nejin, Jesús ajkotachiak ne iluikak uan kijtoj: “NoTajtsin, ejkokya hora. Xikueyitali mokoneuj para maj mokoneuj mitsueyitali, 2 ijkon kemej tikmakak tanauatil para maj kinixyekana nochin, para maj yejua kichiua maj nemikan nochipaya nochin akin tejua tikinmaktilij. 3 Para nemiskej nochipaya moneki mitsixmatiskej tejua,* akin yekmelauj tiDios,* uan no moneki kiixmatiskej akin tikualtitanik, Jesucristo. 4 Nejua nimitsueyitalij nikan taltikpak; niktamichiuakya tekit tein tinechnauatij maj nikchiua. 5 Yejua ika axkan noTajtsin, xinechueyitali mouan ijkon kemej nietoya achto ke nemiskiaj akin nemij nikan taltikpak.

6 ”Nikinixmatiltij motokay akin tinechinmaktilij nikan taltikpak. Katkaj moaxkauan uan tinechinmaktilij, uan kichiuaj tein tikijtoua. 7 Axkan kimatkejya ke nochi tein tinechmakak ualeua momako; 8 porin nikinmatiltij tein tinechiluij uan yejuan kikakkej uan yekmelauj kimatkejya ke niualaj nimitsixnextiko uan kineltokakejya ke tejua tinechualtitanik. 9 Nimitstataujtia xikinpaleui yejuan; amo nimitstataujtia xikinpaleui nochin akin nemij nikan taltikpak, ta sayoj akin tinechinmaktilij, porin moaxkauan; 10 uan nochi tein nikpia moaxka, uan tein tikpia noaxka, uan yejuan nechueyitalianij.

11 ”Nejua amo nietotiok nikan taltikpak, sayoj ke yejuan mokauaj nikan taltikpak, uan nejua niouj nimitsajsiti. NoueyiTajtsin,* xikinyekpia* para maj moueyitali motokay, tein tejua tinechmakak, para maj yejuan senpouikan,* ijkon kemej tejuan tisenpouij.* 12 Keman iniuan nietoya nejua nikinyekpiaya para maj moueyitali motokay, tein tinechmakak; uan nejua nikinmatampauij uan nion semej ixpoliuini, ta sayoj akin kiixpolotij, para maj mochiua tein kijtoua Tajkuilolamatsin. 13 Sayoj ke axkan niouj nimitsajsiti, uan nikijtoua nejin keman nietokok nikan taltikpak para maj yejuan senkis yolpakikan ijkon kemej nejua. 14 Nikinmatiltij tein tinechiluij, sayoj ke akin nemij nikan taltikpak kintauelitaj porin amo pouij iniuan, ijkon kemej nejua amo no nipoui iniuan.

15 ”Amo nimitstataujtia xikinxelo para maj amo yetokan iniuan akin nemij nikan taltikpak, ta xikinmatampaui den Amokuali. 16 Yejuan amo pouij iniuan akin nemij nikan taltikpak, ijkon kemej nejua amo no nipoui iniuan. 17 Motajtol yejua tein melauak; ika motajtol ximoinxelouili* para maj mitstekitilikan. 18 Ijkon kemej tejua tinechualtitanik maj nitanojnotsaki, nejua no nikintitanik maj tanojnotsatij. 19 Nejua nimoxeloua* para nimitstekitilis, para maj yejuan no xeliujtokan* para mitstekitiliskej ika motajtol tein melauak.

20 ”Amo nimitstataujtia xikinpaleui sayoj yejuan, ta no akin nouan takuaujtamatiskej keman kikakiskej tein yejuan tamachtiaj, 21 para maj nochin yejuan senpouikan. Ijkon kemej tejua, noTajtsin, nouan tietok uan nejua mouan nietok, maj yejuan no touan yetokan; ijkon nochin kineltokaskej ke tejua tinechualtitanik. 22 Nejua nikinueyitalij ijkon kemej tejua tinechueyitalij para maj yejuan senpouikan, ijkon kemej tejuan tisenpouij: 23 nejua iniuan nietok uan tejua tietok nouan, ijkon yejuan yekmelauj senyetoskej. Ijkon nochin kimatiskej ke tejua tinechualtitanik uan tikintasojta yejuan ijkon kemej nejua tinechtasojta. 24 NoTajtsin, kampa nejua nietos nikneki maj no ompa yetokan akin tinechinmaktilij, para maj kiitakan ke tinechueyitalij porin peuak tinechtasojta achto ke peuaskiaj yoliskiaj akin nemij nikan taltikpak. 25 NoTajtsin, tejua nochipa tikchiua tein kuali yetok. Tein melauj, akin nemij nikan taltikpak amo mitsixmatij, sayoj ke nejua nimitsixmati uan akin tinechinmaktilij kimattokejya ke tejua tinechualtitanik. 26 Nikinixmatiltij motokay uan niksentokas nikteixmatiltis, para maj tetasojtakan ijkon kemej tejua tinechtasojta, uan ijkon uelis iniuan nietos”.

18 Keman kitamiijtoj nejin, Jesús yajki iniuan imomachtijkauan oksekopa den atauit Cedrón uan iniuan kalakik kampa tatokalaj. 2 Judas, akin yaya kitemaktiti, no ixmattoya ompa, porin Jesús miakpa mosentiliaya ompa iniuan imomachtijkauan. 3 Yejua ika, Judas ajsito iniuan seki soldados uan inintajpixkauan uejueyi tiopixkamej uan fariseos. Ajsitoj ika tauilmej uan teposmej tein ika tateuiaj. 4 Kemej Jesús kimatia nochi tein yaya kipanoti, kinnamikito uan kintajtanij:* “¿Akoni nankitemouaj?”. 5 Kinankilijkej: “Jesús akin kayot Nazaret”. Yejua kiniluij: “Nejua niJesús”. Uan Judas, akin kitemaktij, no iniuan yetoya.

6 Sayoj ke, keman kiniluij “Nejua niJesús”, tsinkiskej uan uejuetsitoj talpan. 7 Yejua ika, oksepa kintajtanij: “¿Akoni nankitemouaj?”. Kiluijkej: “Jesús akin kayot Nazaret”. 8 Jesús kinnankilij: “Namechiluijya ke nejua. Yejua ika, komo nejua nanechtemojtokej, xikinkauakan maj yakan nejin takamej”. 9 Nejin panok para maj mochiuani tein yejua kijtojka: “Amo nikpoloj nion se akin tinechinmaktilij”.

10 Uan Simón Pedro, akin kipiaya se machete tein ojkan tenej,* kiualkixtij uan kinakaskotonak itakeual tayekankatiopixkat. Kikotonilij inakas tein kipiaya iyekmakopa. Nejon takeual monotsaya Malco. 11 Sayoj ke Jesús kiluij Pedro: “Xikalaki machete itech icubierta. ¿Tiknemilia ke amo moneki nitayis copa tein nechmakak noTajtsin?”.

12 Soldados uan tayekankasoldado* uan inintajpixkauan judíos, kikitskijkej Jesús uan kiilpijkej.* 13 Achto kiuikilijkej Anás porin katka imontat Caifás, akin katka tayekankatiopixkat nejon xiuit. 14 Tein melauj, nejin Caifás katka akin kiniluijka judíos ke okachi tapaleuiskia maj miki sayoj se takat para kinpaleuis nochin.

15 Uan Simón Pedro uan okse imomachtijkaikniuj kitojtokatiayaj Jesús. Nejon okse imomachtijkauj, moixmatia iuan nejon tayekankatiopixkat, yejua ika kalakik iuan Jesús ikalixpan tayekankatiopixkat, 16 sayoj ke Pedro mokauak kalampa, itech puerta. Yejua ika nejon imomachtijkauj Jesús akin iuan moixmatia tayekankatiopixkat, kisak uan tajtoto iuan siuapil* akin tajpiaya kaltenoj uan kikalakij Pedro. 17 Uan siuapil akin tajpiaya kaltenoj kitajtanij Pedro: “¿Melauj ke tejua no tiktojtoka nejon takat?”. Yejua kinankilij: “Amo”. 18 Kemej taseseyaya, takeualmej uan tajpianij taxotaltijkaj* uan ompa ijkatoyaj tajtanakastan mototonijtoyaj. Pedro no iniuan mototonijtoya.

19 Ueyi tiopixkat* kitajtanij Jesús akonimej katkaj imomachtijkauan uan toni tamachtiaya. 20 Jesús kinankilij: “Nitanojnotsani ininixpan miakej. Nochipa nitamachtij kampa taueyichiuaj judíos uan itech templo, kampa nochin judíos mosentiliaj, uan amo teyi nikichtakaijtoj. 21 ¿Keyej tinechtatsintokia nejua? Xikintatsintoki akin kikakkej tein nikiniluij. Ne yetokej, yejuan kuali kimatij tein nikijtoj”. 22 Keman Jesús kijtoj nejin, semej tajpianij akin ompa yetoyaj kiixtaxkaloj uan kiluij: “¿Ijkon tiknankilia ueyi tiopixkat?”. 23 Jesús kinankilij: “Komo nikijtoj teisa tein amo kuali yetok, xinechilui toni; sayoj ke komo tein nikijtoj melauak, ¿keyej tinechixtaxkaloua?”. 24 Uan Anás kititanilij tayekankatiopixkat, Caifás. Uan Jesús ilpitoyaok.*

25 Simón Pedro kisentokaya ompa ijkatoya, mototonijtoya. Uan kitajtanijkej: “¿Melauj ke tejua no tiktojtoka?”. Yejua kijtoj: “Amo, nejua amo niktojtoka”. 26 Semej itakeualuan tayekankatiopixkat, akin katka ichankauj takat akin Pedro kinakaskotonka, kiluij: “¿Amo nimitsitak iuan kampa tatokalaj?”. 27 Sayoj ke Pedro oksepa kijtoj ke amo, uan nimantsin tsajtsik se pio.*

28 Uan kikixtijkej Jesús de ichan Caifás uan kiuikakej palacio kampa yetoya tekiuaj. Semi kualkan katka. Sayoj ke yejuan amo kalakkej palacio para amo mopitsotiliskej uan ijkon ueliskia takuaskej itech iluit tein monotsa Pascua. 29 Yejua ika Pilato kalankisak kampa yetoyaj uan kintajtanij: “¿Toni ika nankiteluiliaj nejin takat?”. 30 Yejuan kinankilijkej: “Komo nejin takat amo kitapanauiliskia tanauatil amo timitsualkuiliskiaj”. 31 Yejua ika Pilato kiniluij: “Xikuikakan uan xikixtalikan tein kinamiki kiselis ijkon kemej kijtoua namotanauatil”. Judíos kiluijkej: “Amo tikpiaj tanauatil para titemiktiskej”. 32 Nejin panok para maj mochiuani tein Jesús kijtojka keniuj yaya momikiliti.

33 Pilato oksepa kalakik palacio, kinotsak Jesús uan kitajtanij: “¿Tejua tiinintekiuaj judíos?”. 34 Jesús kinankilij: “¿Tejua tiknemilij tinechtajtanis nejin, oso oksekin noka mitsnojnotsanij?”. 35 Uan Pilato kiluij: “Tejua tikmati ke nejua amo nijudío. Akin nemij itech moaltepeuj uan uejueyi tiopixkamej mitstemaktijkej nomako. ¿Toni tikchiuak?”. 36 Jesús kinankilij: “NoTaixyekanalis amo poui nikan taltikpak. Komo noTaixyekanalis pouiskia nikan taltikpak, notapaleuijkauan tateuiskiaj para maj amo nechtemaktianij ininmako judíos. Sayoj ke, tein melauj noTaixyekanalis amo nikan poui”. 37 Yejua ika Pilato kitajtanij: “¿Kijtosneki ke tejua titekiuaj?”. Jesús kinankilij: “Kemaj, tejua tikijtojtok ke nejua nitekiuaj. Yejua ika niyolik uan yejua ika niualaj nikan taltikpak: para nikteixmatiltis tein melauak. Akin kitakamatis tein melauak, kikakis notajtol”. 38 Pilato kitajtanij: “¿Toni tein melauak?”.

Keman kitamiijtoj nejin, oksepa kalankisak kampa yetoyaj judíos uan kiniluij: “Nejua amo nikajxilia nion teyi tein amo kuali. 39 Uan no, itech Pascua namejuan namomattokej maj nikajkaua se akin tsaktok. ¿Nankinekij maj nikajkaua inintekiuaj judíos?”. 40 Yejuan oksepa peuak tsajtsij: “¡Amo, ta xikajkaua Barrabás!”. Uan Barrabás katka se tachtekkej.

19 Uan Pilato tanauatij maj kiuikakan Jesús uan maj kiuijuitekinij. 2 Uan soldados kijilpijkej uitsti uan ika kichijchiujkej se corona uan kikuatalilijkej, uan no kitalilijkej se moradojtasal. 3 Motokiayaj kampa yetoya uan kiluiayaj: “¡Timitstajpalouaj tejuatsin inintekiuaj judíos!”. Uan no, kiixtajtatsiniayaj. 4 Pilato oksepa kalankisak uan kiniluij akin ompa yetoyaj: “¡Xikakikan! Nikan namechualkuilia para xikmatikan ke amo nikajxilia nion teyi tein amo kuali”. 5 Uan Jesús kisak, kuaaktiaya corona tein kijilpijkaj ika uitsti uan aktiaya moradojtasal. Uan Pilato kiniluij: “¡Xikitakan nejin takat!”. 6 Sayoj ke keman uejueyi tiopixkamej uan tajpianij kiitakej, ajkotsajtsikej: “¡Xikoujpampilokan! ¡Xikoujpampilokan!”. Pilato kiniluij: “Namejuan xikuikakan uan xikoujpampilokan, porin nejua amo nikajxilia nion teyi tein amo kuali”. 7 Judíos kinankilijkej: “Tejuan tikpiaj se tanauatil, uan nejon tanauatil kijtoua ke moneki mikis, porin kijtoj ke yejua ikoneuj Dios”.

8 Keman Pilato kikakik tein kijtouayaj, okachi mouik, 9 uan oksepa kalakik palacio uan kitajtanij* Jesús: “¿Kani tikayot?”. Sayoj ke Jesús amo teyi kinankilij. 10 Yejua ika Pilato kiluij: “¿Amo tikneki tinechnankilis? ¿Amo tikmati ke nikpia tanauatil para nimitskajkauas uan para nimitskoujpampilos?”. 11 Jesús kinankilij: “Amo tikpiaskia nion se tanauatil para tinechchiuilis teisa komo Dios amo mitsmakaskia. Yejua ika, okachi motajtakolmakak takat akin nechtemaktij mouan”.

12 Yejua ika, Pilato kisentokak kitemoj keniuj kikajkauas. Sayoj ke judíos ajkotsajtsikej: “¡Komo tikajkaua, amo tiitasojikniuj Tekiuaj!* ¡Akin kijtoua ke tekiuaj kiixnamiki Tekiuaj!”. 13 Uan keman Pilato kikakik nejon, kikalankixtij Jesús uan motalij kampa motaliaj tamelauanij, kampa motanotsa Calzada, itech tajtol hebreo moijtoua Gábbatha. 14 Nejon tonal tachijchiuayaj para iluit tein monotsa Pascua, ajsitoyaya nepantaj.* Uan kiniluij judíos: “¡Xikitakan! ¡Namotekiuaj!”. 15 Sayoj ke yejuan ajkotsajtsikej: “¡Xikmiktikan! ¡Xikmiktikan! ¡Xikoujpampilokan!”. Pilato kintajtanij: “Komo ijkon, ¿maj nikmikti namotekiuaj?”. Uejueyi tiopixkamej tanankilijkej: “Amo tikpiaj okse tekiuaj, ta sayoj Tekiuaj ompa Roma”.* 16 Satepan, kinmaktilij Jesús para maj kikoujpampilokan.

Uan yejuan kiuikakej Jesús. 17 Yejua momamalij kouit* uan kiuikaya hasta kampa motanotsa Miketsontekomatan, tein itech tajtol hebreo monotsa Gólgota. 18 Uan kikoujpampilojkej ika clavos* iniuan ome takamej, sejse inajnakastan uan Jesús yetoya tatajko. 19 Uan no, Pilato kijkuiloj seki tajtolmej uan kitalij itech kouit. Kijtouaya: “Jesús akin kayot Nazaret, inintekiuaj judíos”. 20 Miakej judíos kiitakej nejin tajkuilol porin kampa kikoujpampilojkaj Jesús amo uejka yetoya den ueyi xolal. Uan no, nejin tajkuilol ijkuiliujtoya itech tajtol hebreo, latín uan griego. 21 Sayoj ke ininuejueyi tiopixkauan judíos kiluijkej Pilato: “Amo xikijkuilo ‘Inintekiuaj judíos’, ta xikijkuilo tein kijtoj ‘Nejua niinintekiuaj judíos’”. 22 Pilato tanankilij: “Tein nikijkuiloj, ijkuiliujtokya”.

23 Satepan ke kikoujpampilojkej Jesús ika clavos, soldados kikuikej itasal uan naujkan kikojkotonkej, se para sejse soldado, uan kikuikej itampatasal. Sayoj ke nejon tasal amo ijtsontoya, ta senkis katka tajkitil. 24 Yejua ika moiluijkej: “Maj amo tiktsayanakan, ta maj timotatanilikan* para tikitaskej akoni mokauilia”. Nejin panok para maj mochiuani tein kijtoua Tajkuilolamatsin: “Motatanilijkej uan moxejxeluijkej notasal”. Uan yejua nejon tein kichiujkej soldados.

25 Ompa inakastan kouit kampa kitajyouiltijkej Jesús, yetoya inan uan itía Jesús;* no ompa yetoya María isiuatsin Clopas uan María Magdalena. 26 Keman Jesús kiitak ke inan uan imomachtijkauj akin yejua kitasojtaya ompa yetoyaj, kiluij inan: “¡Siuatsin, ne yetok mookichpil!”. 27 Uan kiluij imomachtijkauj: “¡Ne yetok momaj!”. Uan ijkuak, nejon imomachtijkauj kiuikak ichan.

28 Satepan ke mochiuak nejin, kemej kimatia ke nochi mochiujkaya, Jesús kijtoj: “Niamiki”. Ijkon mochiuak tein kijtoua Tajkuilolamatsin. 29 Uan kemej ompa yetoya se komit tein pexontoya* ika vino tein xokok, ompa kiajakijkej se esponja, kitalijkej itech se akat uan kitentokilijkej. 30 Keman Jesús kiyekoj vino tein xokok, kijtoj: “¡Mochiuakya!”. Uan moixpiloj uan momikilij.*

31 Kemej itech nejon tonal tachijchiuayaj, judíos kiluijkej Pilato maj kinmetspostekinij takamej uan maj kintemouianij, para maj amo mokauakan itech kouit itech tonal sábado keman moseuiaj (porin nejon tonal katka se ueyi sábado). 32 Yejua ika soldados yajkej uan kinmetspostekkej takamej akin kinkoujpampilojkaj inajnakastan Jesús. 33 Sayoj ke keman ajsikej kampa yetoya Jesús, kiitakej ke momikilijkaya; yejua ika amo kimetspostekkej. 34 Sayoj ke semej soldados kielchikiujkoyonij ika se kouit tein tenpitstik,* uan nimantsin kisak esti uan at. 35 Uan imomachtijkauj akin kiitak nochi nejin, kiteixmatiltia uan tein kiteixmatiltia melauak. Yejua kimati ke tein kijtoua melauak, para maj namejuan no xikneltokakan. 36 Tein melauj, nejin panok para maj mochiuani nejin tein kijtoua Tajkuilolamatsin: “Amo kipostekiliskej nion se iomiyo”. 37 Uan Tajkuilolamatsin okseko no kijtoua: “Kiitaskej akin kikoyonijkej”.

38 Satepan ke mochiuak nejin, José akin kayot Arimatea (akin katka se imomachtijkauj Jesús, sayoj ke amo akin kiluiaya, porin kinmouiliaya judíos) kitajtanij Pilato ox ueliskia kiuikas inakayo Jesús, uan Pilato kikauak. Yejua ika, kikuiko inakayo Jesús. 39 No ejkok Nicodemo uan kiualkuia tepitsin* chokilot ajuiyak tein monotsa mirra uan koujtakuechol tein monotsa áloe tein etik kemej 33 kilos. Nicodemo yejua akin achto kiitato Jesús keman youak katka. 40 Kikuikej linojtasal uan nejon tein ajuiyak, uan ika kitetsilojkej* inakayo Jesús, ijkon kemej kichiuaj judíos keman kintokaj akin momikiliaj. 41 Kampa kimiktijkej tatokalaj katka, uan ompa yetoya se miketekoch yankuik kampa amo akin kitalijtoyaj. 42 Yejua ika, kemej nejon tonal judíos tachijchiuayaj uan miketekoch ompaka yetoya, ompa kitalijkej Jesús.

20 Itech tonal keman peua semana, kualkantsin keman tayouayanok katka, María Magdalena yajki kampa yetoya miketekoch uan kiitak ke kiajchiujkaj tet tein ika tentsaktoya. 2 Yejua ika tsikuinteuak kiitato Simón Pedro uan okse imomachtijkauj, akin Jesús kitasojtaya, uan kiniluij: “¡Kikixtijkej toTekotsin den miketekoch, uan amo tikmatij kani kitalijkej!”.

3 Uan Pedro uan okse imomachtijkauj Jesús yajkej kampa yetoya miketekoch. 4 Nochin omen peujkej motalouaj, sayoj ke okse okachi motaloj ke Pedro uan ajsik achto. 5 Keman moixpiloj uan naltachiak, kiitak linojtasal, sayoj ke amo kalakik. 6 Uan Simón Pedro, akin kitojtokatiaya, no ajsik uan kalakik itech miketekoch. Uan kiitak linojtasal. 7 Tasal tein ika kikuapikkaj* Jesús amo yetoya kampa yetoya okseki tasal, ta seko tetekuiniujtoya. 8 Satepan no kalakik okse imomachtijkauj, akin achto ajsika, uan kiitak uan kineltokak tein kiniluijkaj. 9 Porin ayamo kiajsikamatiaj Tajkuilolamatsin kampa kijtouaya ke yejua monekia oksepa nemis.* 10 Yejua ika yejuan mokepkej ininchan.

11 Sayoj ke María ijkatoya kalampa, chokatoya inakastan miketekoch. Keman chokatoya, moixpiloj uan naltachiak taijtikkopa. 12 Uan kinitak ome ángeles akin istak takentoyaj uan tokotsyetoyaj kampa achto yetoya inakayo Jesús; se yetoya itsontan uan okse iikxitan. 13 Uan yejuan kitajtanijkej:* “Siuatsin, ¿keyej tichokatok?”. Yejua kinnankilij: “Porin kiuikakej noTekotsin uan amo nikmati kani kitalijkej”. 14 Keman kijtoj nejin, yejua moixkepak uan kiitak Jesús ompa ijkatoya, sayoj ke amo kimatik ke katka Jesús. 15 Jesús kitajtanij: “Siuatsin, ¿keyej tichokatok? ¿Akoni tiktemoua?”. Kemej María kinemiliaya ke katka akin tajpia kampa tatokaj, kiluij: “Tejuatsin, komo tikuikak, xinechilui kani tiktalij uan nejua nikuitiuj”. 16 Jesús kiluij: “¡María!”. Keman María moixkepak, kinankilij itech tajtol hebreo: “¡Rabbóni!” (tein kijtosneki “tamachtijkej”). 17 Jesús kiluij: “Xinechkajkaua, porin ayamo nipankisa kampa yetok noTajtsin. Xiouj kampa yetokej nokniuan uan xikinilui: ‘Nipankisati kampa yetok noTajtsin uan namoTajtsin, kampa yetok noDios uan namoDios’”. 18 María Magdalena kinitato imomachtijkauan Jesús uan kiniluij: “¡Nikitak toTekotsin!”. Uan kintapouij nochi tein yejua kiluijka.

19 Tiotakya katka nejon tonal, keman peua semana, uan kemej imomachtijkauan kinmouiliayaj judíos, tatsakkaj ika llave kampa mosentilijtoyaj. Uan Jesús monextij ininixpan uan kiniluij: “Xiyolseujtokan”. 20 Kijtoj nejon uan kinnextilij imauan uan ielpan. Uan imomachtijkauan semi yolpakkej keman kiitakej toTekotsin. 21 Jesús oksepa kiniluij: “Xiyolseujtokan. Ijkon kemej noTajtsin nechualtitanik nejua, nejua no namechtitani namejuan”. 22 Keman kijtoj nejon, kinpitsak uan kiniluij: “Xikselikan ichikaualis Dios. 23 Komo namejuan nankitapojpoluiaj akin kichiua se tajtakol, kijtosneki ke Dios kitapojpoluijya; sayoj ke komo amo nankitapojpoluiaj akin kichiua se tajtakol, kijtosneki ke Dios amo kitapojpoluia”.

24 Sayoj ke Tomás, semej 12 tatitanilmej, akin kiluiayaj Cuate,* amo yetoya iniuan keman Jesús monextij ininixpan. 25 Yejua ika okseki imomachtijkauan kiluiayaj: “¡Tikitakej toTekotsin!”. Sayoj ke yejua kiniluij: “Komo amo nikita kampa kimakoyonijkej uan nimomajpilkalakia kampa kikoyonijkej ika clavos uan nimomakalakia ielchikiujtampa, amo keman nikneltokas”.

26 Chikueyi tonal satepan, imomachtijkauan oksepa mosentilijtoyaj kalijtik, uan Tomás no ompa yetoya. Maski tatsaktoya ika llave, Jesús monextij ininixpan uan kiniluij: “Xiyolseujtokan”. 27 Uan kiluij Tomás: “Ximomajpiltali nikan uan xikinita nomauan; ximomakalaki noelchikiujtampa. Amo xiomeyolojtook* uan xitaneltoka”. 28 Uan Tomás kijtoj: “¡NoTekotsin uan noDios!”. 29 Jesús kiluij: “¿Titaneltokak porin tinechitak? Yolpakij akin amo teyi kiitanij uan maski ijkon taneltokaj”.

30 Tein melauj, Jesús no kichiuak ininixpan imomachtijkauan okseki miak milagros tein amo ijkuiliujtokej itech nejin amatajkuilol.* 31 Sayoj ke nejin moijkuiloj para xikneltokakan ke Jesús yejua Cristo, iKoneuj Dios, uan ijkon, komo nankineltokaj uelis nanemiskej itokaykopa.

21 Satepan ke mochiuak nejin, Jesús oksepa monextij ininixpan imomachtijkauan itech ueyiatenoj Tiberíades. Monextij ijkuin. 2 Ompa senyetoyaj Simón Pedro, Tomás (akin kiluiayaj Cuate),* Natanael akin kayot Caná tein poui Galilea, ikoneuan Zebedeo uan okseki ome imomachtijkauan Jesús. 3 Simón Pedro kiniluij: “Niouj nikinkitskiti pescados”.* Uan yejuan kiluijkej: “Mouan tiouij”. Yejua ika yajkej uan tejkokej* itech barco, sayoj ke nochi nejon youal amo teyi kikitskijkej.

4 Keman tanesik, Jesús yetoya ueyiatenoj, sayoj ke imomachtijkauan amo kimatkej ox katka yejua. 5 Uan Jesús kiniluij: “Nokoneuan, amo nankipiaj tein nankikuaskej, ¿melauj?”. Yejuan kinankilijkej: “Amo”. 6 Yejua kiniluij: “Xiktamotakan atarraya* namoyekmakopa uan nankiajsiskej teisa”. Keman kitamotkej, kinkitskijkej tel miak pescados* uan amo uelia kikixtiayaj. 7 Uan imomachtijkauj Jesús akin kitasojtaya, kiluij Pedro: “¡Yejua toTekotsin!”. Keman Simón Pedro kikakik nejon, motalilij itasal, porin xipetstik* yetoya, uan moatamotak. 8 Sayoj ke okseki imomachtijkauan yajkej itech barco tein tsikitsin, kititilatstiajkej atarraya tein kipiaya tel miak pescados, porin amo uejka yetoyaj den ueyiatenoj, sayoj kemej 90 metros.*

9 Keman ajsikej ueyiatenoj, kiitakej ke taxotaltijka.* Kiteuatstoya pescado,* uan no onkaya pantsin. 10 Jesús kiniluij: “Xikinualkuikan seki pescados tein yekin nankinkixtijkej”. 11 Yejua ika, Simón Pedro tejkok itech barco uan kiualtitilatsato atarraya* hasta talpan, tein kipiaya miak uejueyi pescados: kipiaya 153. Sayoj ke maski pexontoya,* atarraya amo ixtsayanik. 12 Jesús kiniluij: “Xialmasalokij”. Nion semej imomachtijkauan moixeuiaya kitajtanis* “¿Tiakoni?”, porin kimatiaj ke katka toTekotsin. 13 Jesús motokij, kikuik pantsin uan kinmakak, uan no ijkon kichiuak ika pescado. 14 Ika nejin, Jesús expaya monextijka ininixpan imomachtijkauan satepan ke oksepa nemik.*

15 Keman tamialmasalojkej, Jesús kitajtanij Simón Pedro: “Simón ikoneuj Juan, ¿tinechtasojta okachi ke nejin?”. Yejua kinankilij: “Kemaj noTekotsin, tejua tikmati ke nimitstasojta”. Jesús kiluij: “Xikintamaka noichkatsitsin”.* 16 Oksepa kitajtanij: “Simón ikoneuj Juan, ¿tinechtasojta?”. Yejua kinankilij: “Kemaj noTekotsin, tejua tikmati ke nimitstasojta”. Jesús kiluij: “Xikinyekpia noichkatsitsin kemej se ichkatajpixkej”. 17 Uan oksepa kitajtanij: “Simón ikoneuj Juan, ¿tinechtasojta?”. Pedro tayokoyak porin expaya kitajtaniaya “¿Tinechtasojta?”. Yejua ika kiluij: “NoTekotsin, tejua tikmati nochi; tejua tikmati ke nejua nimitstasojta”. Jesús kiluij: “Xikintamaka noichkatsitsin. 18 Yekmelauj nimitsyekiluia, ke keman katka okachi tiokichpil tejua timotasaltiaya uan tinentinemia kampa tiknekia; sayoj ke keman tiueuetsintias, timomamelauas uan okse mitstasaltis uan mitsuikas kampa amo tiknekis”. 19 Kijtoj nejin para kinextis keniuj momikiliskia Pedro uan ika nejon kiueyitaliskia Dios. Uan keman kitamiiluij nejon, no kijtoj: “Xiksentoka xinechtojtoka”.

20 Pedro moixkepak uan kiitak ke kintojtokaya imomachtijkaikniuj akin Jesús kitasojtaya, yejua nejin akin monetechoj iyolixko Jesús keman tiotak tamajseujkej uan kitajtanijka “NoTekotsin, ¿akoni mitstemaktiti?”. 21 Yejua ika keman Pedro kiitak, kitajtanij Jesús: “NoTekotsin, ¿uan toni kipanos yejua?”. 22 Jesús kiluij: “Komo nikneki maj mokaua nikan hasta keman niualas, ¿keyej mitstekipachoua nejon? Tejua xiksentoka xinechtojtoka”. 23 Yejua ika, iniuan tokniuan moijtojtinemik ke nejin imomachtijkauj Jesús amo momikiliskia. Sayoj ke Jesús amo kiluijka ke amo momikiliskia, ta kijtoj: “Komo nikneki maj mokaua nikan hasta keman niualas, ¿keyej mitstekipachoua nejon?”.

24 Yejua nejin imomachtijkauj Jesús akin kiteixmatiltia nochi nejin uan akin kijkuiloj, uan tikmatij ke melauak tein kijtoua.

25 Tein melauj, Jesús kichiuak okseki miak taman, uan komo se tonal moijkuiloskia sejse taman tein kichiuak, niknemilia ke amo kanaj akiskiaj nochi amatajkuilolmej* tein moijkuiloskiaj.