COLOSENSES

1 Nejua Pablo, niitatitanil Cristo Jesús porin Dios ijkon kinekik, uan nouan yetok tokniuj Timoteo. 2 Namechtitanilia nejin amatajkuilol namejuan tokniuan akin nanyetokej Colosas, namejuan akin Dios namechxeloj* uan amo nankikauaj Cristo:

Maj toTajtsin Dios namechmaka tatiochiualis tein amo technamiki uan maj namechpaleui kuali ximouikakan iuan Dios.

3 Keman namoka timotataujtiaj, nochipa tiktasojkamatiliaj Dios, iTajtsin toTekotsin Jesucristo, 4 porin tikakinij keniuj nantakuaujtamatij iuan Cristo Jesús uan keniuj nankintasojtaj nochin akin Dios moinxelouilij* 5 porin nankichixtokej* tatiochiualis tein Dios namechmakas ne iluikak. Namejuan namechixmatiltijkej nejin tatiochiualis keman ika namechnojnotskej tamachtilis tein melauak, kuali tanauatilmej* 6 tein nankikakkej. Ijkon kemej kiteixmatiltijtokej itech nochi taltikpak uan miakej kineltokatokej kuali tanauatilmej, no ijkon mochiujtok kampa nanyetokej desde keman nankikakkej uan senkis nankimatkej keniuj Dios yekmelauj kinextia itatiochiualis tein amo technamiki. 7 Yejua nejon tein namechmachtij Epafras, totakeualiknitsin akin nochipa kitekitilia Cristo, akin kichiua tein tejuan tikchiuaskiaj komo namouan tietoskiaj. 8 Yejua no techiluij ke ichikaualis Dios namechpaleuia xitetasojtakan.

9 Yejua ika, desde ke tikmatkej nejon, tiksentokaj namoka timotataujtiaj uan titajtanij maj kuali xikixmatikan tein Dios kineki, yekmelauj xitamattokan uan maj ichikaualis namechpaleui xikajsikamatikan nochi. 10 Ijkon uelis nanemiskej kemej moneki nemiskej akin kitekitiliaj Jehová* uan nankiyolpaktiskej itech nochi. No nankichiuaskej tein kuali uan nankisentokaskej okachi kuali nankiixmatiskej Dios. 11 No titajtanij maj Dios ika iueyi chikaualis semi namechchikaua para nankixikojtiaskej nochi ika nejmachkayot uan nanyolpakiskej. 12 Uan xiktasojkamatilikan toTajtsin, porin namechpaleuij xikchiuakan tein moneki para nankiseliskej tein kinmakas akin moinxelouilij* uan yetokej kampa tanestok.

13 Dios techkixtij kampa tayouayan,* uan techuikak itech itaixyekanalis itasojKonetsin, 14 akin taxtauak para techmakixtis uan para maj techtapojpoluilikan totajtakoluan. 15 Yejua tamati kemej Dios akin amo ueli tikitaj. Yejua tayekankakonet de nochi tein Dios kichijchiuak; 16 porin itechkopa, Dios kichijchiuak nochi okseki taman ne iluikak uan nikan taltikpak, tein moita uan tein amo moita, taixyekanalis, tanauatil, tekiuanij oso taixyekananij. Nochi okseki taman Dios kichijchiuak itechkopa uan para yejua. 17 Uan no, yejua nemi desde achto ke nochi okseki taman, uan itechkopa, Dios kichiuak maj onka nochi okseki taman, 18 uan yejua taixyekana itech* nechikol, oso inakayo. Yejua akin itech peuak nochi, akin achto oksepa nemik. Ijkon yejua tayekantoskia itech nochi; 19 porin Dios kinekik maj itech iKoneuj yeto nochi tein kuali 20 uan itechkopa Cristo, oso itechkopa iesyo tein mimilauik itech kouit,* Dios kichiua maj nochi okseki taman tein onkak nikan taltikpak uan ne iluikak oksepa kuali mouikakan iuan.

21 Tein melauj, namejuan achto amo nanpouiaj iuan Dios uan nankiixnamikiaj porin sayoj nantanemiliayaj itech tein amo kuali. 22 Sayoj ke itechkopa inakayo akin momikilij, axkan yejua kichiuak oksepa kuali ximouikakan iuan, ijkon iixpan Dios nanyeskij nanchipaujkej, amo nankipiaskej tein amo kuali uan amo teyi ika uelis namechteluiliskej. 23 Sayoj ke moneki xiksentokakan xitakuaujtamatikan, kuali ximotakitskilikan itech tatsineualoni uan amo ximotsinkixtikan, amo xikauakan tatiochiualismej tein nankichiaj porin nankikakkej kuali tanauatilmej tein moteixmatiltijkejya itech nochi taltikpak. Nejua Pablo, nechixtalijkej maj nikteixmatilti nejin kuali tanauatilmej.

24 Axkan niyolpaki namoka nitajyouijtos, uan nitajyouijtok kemej Cristo, sayoj ke poliuiok nitajyouis uan nejon kipaleuis inakayo Cristo, oso inechikol. 25 Peuak nitekiti itech nejin nechikol porin Dios nechixtalij, uan nejon namechpaleuia. Yejua ika nikteixmatiltia itajtol Dios nochi tein niueli, 26 nikteixmatiltia tein Dios amo kitematiltijtoya* nochi nejin tonalmej* nion kinmatiltij akin nenkej ne uejkauj. Sayoj ke axkan Dios kinmatiltij akin moinxelouilij.* 27 Uan no Dios kinekik kinmatiltis akin amo judíos uejueyi tatiochiualismej tein poui itech tein amo kitematiltijtoya.* Nejin tein amo kitematiltijtoya yejua Cristo akin poui namouan, tein kijtosneki ke nankichiaj maj iuan namechueyitalikan. 28 Tikteixmatiltijtokej, titanejmachtijtokej uan kemej yekmelauj titamattokej tikinmachtijtokej oksekin para maj kiixmatikan Cristo, uan ijkon tikinuikaskej iixpan Dios kemej itatojtokakauan Cristo akin semi takuaujtamatij. 29 Yejua ika chikauak nitekititok uan nimochikaujtok, nitakuaujtamati itech ichikaualis tein notech tekiti.

2 Porin nikneki xikmatikan keniuj semi nimochikaua namechpaleuis namejuan, uan no nikinpaleuis akin yetokej Laodicea uan nochin akin ayamo nechixmatij. 2 Niktemoua nikinyolseuis yejuan uan namejuan uan maj nochin xisenyetokan porin namotasojtaj. Uan no niktemoua xikpiakan nochi tatiochiualismej porin nankiyekmatij ke melauak tein nankiajsikamatij, para kuali xikixmatikan tein Dios amo kitematiltijtoya:* Cristo. 3 Uan itech Cristo kuali kitatijkej* nochi tamatilis tein semi kipia ipatiuj uan tein uelis se kiixmatis. 4 Namechiluia nejin para maj amo akin namechkajkayaua ika tanemililmej tein ika tetaneltoktiaj. 5 Maski amo nietok namouan, namotech nitanemilijtok uan niyolpaki nikmatis ke nankichiuaj nochi kemej moneki uan ke nantakuaujtamatij iuan Cristo ika nochi namoyolo.

6 Yejua ika, ijkon kemej nantakuaujtamatkej iuan toTekotsin Cristo Jesús, xiksentokakan xiktakamatikan. 7 Ijkon kemej namechmachtijkej, kuali ximotakitskilijtokan itech Cristo kemej se kouit tein uejkatan toktok, xiyekijkatokan itech Cristo uan xiyektakuaujtamatikan, uan no, nochipa ximotasojkamatikan.

8 Ximotachilikan para maj amo akin namechkajkayaua* ika inintamachtilis tamatinij uan ika tein kinemiliaj ke tapaleuia. Nochi nejon yejua tein kinmachtijkej ininuejkaujtatuan oso tein kitayekanaltiaj nikan taltikpak uan amo tein tamachtia Cristo. 9 Porin itech Cristo yetok nochi tein kuali tein Dios kipia. 10 Yejua ika itechkopa nankipiajya nochi. Yejua kinixyekana* nochin tekiuanij uan akin kipiaj tanauatil. 11 Kemej nanpouij iuan Cristo namejuan no namechtekkej,* amo kemej kichiuaj nikan taltikpak, ta kemej kichiuaj akin kitojtokaj Cristo. Yejuan motekij keman kikauaj tein kinejneki ininnakayo. 12 Porin namejuan kemej yeskia namechtokkej keman namoauijkej kemej yejua, uan kemej nanpouij iuan, oksepa nanenkej* uan iuan namechsentilijkej porin nantakuaujtamatij itech tein Dios kichiua ika ichikaualis. Tein melauj Dios kichiuak maj oksepa nemi.

13 Uan no, maski namejuan kemej yeskia namomikilijkajya porin nankichiuayaj miak taman tein amo kuali uan porin amo namechtektoyaj,* Dios kichiuak xinemikan uan namechsentilij iuan Cristo. Techtapojpoluilij nochi totajtakoluan ika nochi iyolo, 14 uan kiixpoloj nochi tataman tanauatilmej tein moijkuilojkej tein kinextiaya totajtakoluan. Dios kiixpoloj keman Cristo kikoujpampilojkej.* 15 Ika nejin,* kintamikuilij nochi tein kipiayaj taixyekananij uan tekiuanij uan senteixtenoj kinuikatinemik para kinextis ke tapolojkej.

16 Yejua ika, maj amo akin namechijijto ika tein nankikuaj uan tein nantayij, uan amo akin moneki namechiluis xiiluitikan xijxiujtika, keman ajsi selik metsti oso ximoseuikan itech tonal sábado.* 17 Nejon sayoj kiixnextiaya tein monekia mochiuas, sayoj ke Cristo kinextia tein melauak. 18 Sekin kiuelitaj taixkajkayauaskej uan kinextiskej ke yolyemankej uan kiuelitaj kinueyichiuaskej ángeles,* sayoj ke amo xikauakan maj nion akin namechkuili tein Dios namechtayokolis. Yejuan sayoj kitayekanaltiaj tein kiitaj uan sayoj kinemiliaj tein kinejneki ininnakayo uan ika nejon moueyimatij* 19 uan amo kitojtokaj Cristo akin kemej yeskia inintsontekon. Cristo kimaka inakayo nochi tein kipoloua uan kichiua maj nochi kuali sajsaliujto uan maj moskalti ika ichikaualis Dios.

20 Komo nankiixtopeujkej tein kitayekanaltiaj nikan taltikpak uan namomikilijkej iuan Cristo, ¿keyej nanemij kemej yeskia nanpouijok iniuan akin nemij nikan taltikpak? ¿Keyej nankisentokaj nankitakamatij nejin tanauatilmej: 21 “amo xikitski, amo xikyeko, amo xikmatoka?”.* 22 Nochi nejin ixpoliui keman se kikua oso se tayi. Nejin sayoj tanauatilmej tein takamej tamachtiaj. 23 Majya moita ke tepaleuiaj maj se tamatkej, sayoj ke tein melauj amo akin kipaleuia maj kiixtopeua tein kinejneki inakayo, porin sejse kiixtalia keniuj kiueyichiuas Dios, taixkajkayaua uan kinextia ke yolyemanik uan motajyouiltia.

3 Sayoj ke komo namejuan namomikilijkajya uan Dios kichiuak oksepa xinemikan* iuan Cristo, xiksentokakan xiktemokan tein yetok ne iluikak kampa Cristo tokotsyetok iyekmakopa Dios. 2 Xitanemilijtokan itech tein yetok ne iluikak uan amo itech tein onkak nikan taltikpak. 3 Porin namejuan namomikilijkej, uan namonemilis motatijtok* iuan Cristo, akin poui iuan Dios. 4 Keman monextis Cristo, akin kichiuak maj tinemikan,* namejuan no iuan namonextiskej uan namechueyitaliskej kemej yejua.

5 Yejua ika, xikmiktikan tein amo kuali tein namotech yetok, uan ijkon amo nanauilnemiskej,* amo nankichiuaskej tein pitsotik, amo nankitelnejnektoskej namotekaskej iuan aksa,* amo nankinejnekiskej nankichiuaskej tein amo kuali uan amo nankitelixnejnekiskej tein teaxka,* porin nejin kemej yeskia se kinueyichiujtoskia tatadiosmej.* 6 Dios kinnextilis iueyi kualanyo akin kichiuaj nejin. 7 Keman nanemiaj kemej yejuan, namejuan no nankichiuayaj nejon. 8 Sayoj ke axkan amo fiero xikualanikanok, amo xitauelmiktinemikanok, amo xikchiuakanok tein amo kuali uan amo xikijtokanok tein teyolkokos,* uan nion teyi tein pitsotik. 9 Amo ximokajkayauakan se iuan okse. Xikpatakan kemej achto nankatkaj uan amo xikchiuakanok tein achto nankichiuayaj, 10 uan xipeuakan xinemikan* kemej Dios kineki. Uan nejin uelis okachi kuali nankichiujtiaskej ijkon kemej okachi nankiixmattiaskej Dios. Uan ijkon nankichiuaskej tein yejua kichiua.* 11 Uan keman se nemi kemej Dios kineki, amo tayekantokok ox aksa griego oso judío, ox kitekkejya* oso amo, ox analtekoj oso nemi koujtaj,* ox temako yetok oso amo, porin Cristo yetok itech nochi uan tinochin iuan tipouij.

12 Yejua ika, kemej Dios namechijitak,* nanchipaujkej iixpan uan namechtasojta, xiteyoliknelikan,* xiyolkualmej, xiyolyemankej, xiyolnejmachmej uan amo xiyolijsiuikan. 13 Xiksentokakan ximoxikojtokan se iuan okse uan ximotapojpoluijtokan ika nochi namoyolo maski aksa namechchiuilis tein amo kuali. Jehová* namechtapojpoluij ika nochi iyolo, yejua ika no ijkon xikchiuakan iniuan oksekin. 14 Uan amo sayoj nejon, ta xitetasojtakan,* porin keman titetasojtaj yekmelauj kualtsin timouikaj se iuan okse.

15 Uan maj Cristo nochipa namechyolseuijto,* porin Dios namechnotsak para nansenpouiskej uan nanyolseujtoskej. Uan nochipa ximotasojkamatikan. 16 Maj itajtol Cristo senkis yeto namotech uan maj namechpaleui xitamattokan. Keman namomachtiskej uan namoyolchikauaskej* se iuan okse xikuikan salmos, xikueyitalikan Dios uan xikuikan tatsotson tein ika nantaueyichiuaj uan namotasojkamatij, uan ijkon xiksentokakan. Xikueyichiuakan Jehová* namoyolijtik ika tatsotson. 17 Tein yeski taman tein nankijtoskej uan tein nankichiuaskej, xikchiuakan nochi itokaykopa toTekotsin Jesús, uan itechkopa xiktasojkamatilikan toTajtsin Dios.

18 Siuatsitsin, ximokauakan maj namechixyekana namotakauj, porin nejon kiyolpaktia toTekotsin. 19 Takamej, xiksentokakan xikintasojtakan namosiuauan, uan amo eliuis iniuan xikualantokan.* 20 Konemej, xikintakamatikan namotatuan itech nochi, porin nejon kiyolpaktia toTekotsin. 21 Tetatmej,* amo xikinkualantikan* namokoneuan, para maj yejuan amo moyolkokokan. 22 Takeualmej, xikintakamatikan namotekouan itech nochi, amo sayoj keman yejuan namechitstokej para maj kuali namechitakan oksekin, ta xikintakamatikan ika nochi namoyolo, porin nankimojkatokaj Jehová.* 23 Tein yeski taman tein nankichiuaskej, xikchiuakan ika nochi namoyolo kemej yeskia nankitekitilijtoskiaj Jehová* uan amo oksekin, 24 porin nankimatij ke Jehová* namechtayokolis tein kiixtalijtok namechmakas. Xiktekitilikan namoTeko, Cristo. 25 Akin kichiuas teisa tein amo kuali kitaxtaualtiskej tein kichiuak, uan Dios amo techichikotasojta.*

4 Namejuan akin nankinpiaj takeualmej, xikinchiuilikan tein kuali namotakeualuan uan amo xikinchichikotasojtakan.* Xikelnamikikan ke namejuan no nankipiaj se namoTeko ne iluikak.

2 Nochipa xikchiujtokan netataujtil; xiijsatokan* uan ximotasojkamatikan. 3 Uan no, xiktataujtikan Dios maj techpaleui maj tiuelikan tikteixmatiltikan itajtol uan tein Dios amo kitematiltijtoya* tein ika tajtoua Cristo. Kemej nikteixmatiltia nejin, nitsaktok uan niilpitok* ika cadena. 4 No xiktajtanikan Dios maj nechpaleui maj niyektajto keman nikteixmatiltis, ijkon kemej moneki nikchiuas.

5 Xiknextikan ke nantamatinij keman nanyetoskej iniuan akin amo taneltokaj uan kuali xikuikan namotiempo.* 6 Nochipa kualtsin xitenojnotsakan kemej ijkuak nankipoyeliaj se tapalol para maj uelia, uan ijkon nankimatiskej keniuj moneki nantanankiliskej.

7 Noknitsin Tíquico namechtapouis keniuj nietok. Yejua takuaujtamach uan nouan kitekitilia toTekotsin kemej takeual. 8 Namechtitanilia para maj namechmatilti keniuj tietokej uan para maj namechyolseui. 9 Iuan yas noknitsin Onésimo, akin takuaujtamach uan namouan yetoya. Yejuan namechtapouiskej nochi tein nikan panotok.

10 Aristarco, akin nouan tsaktok, namechontajpaloua uan no Marcos, iprimo Bernabé (akin moneki nankiseliskej ika pakilis komo namechitati, ijkon kemej tamechnauatijkej), 11 uan Jesús akin kiluiaj Justo no namechontajpaloua. Yejuan judíos.* Sayoj yejuan nouan tekititokej uan nouan kiteixmatiltiaj iTaixyekanalis Dios, uan semi nechpaleuianij uan nechyolchikauanij. 12 No namechontajpaloua Epafras, akin namouan yetoya uan kitekitilia Cristo Jesús. Yejua nochipa chikauak namoka motataujtia, para xiksentokakan semi xitakuaujtamatikan uan senkis xikyekmatikan ke melauak nochi tein Dios kineki. 13 Uelis nikyekijtos ke yejua chikauak tekiti para namechpaleuis namejuan, uan no akin yetokej Laodicea uan Hierápolis.

14 Lucas, tapajtijkej akin tiktasojtaj uan no Demas, namechontajpalouaj. 15 Xinechintajpalouilikan tokniuan akin yetokej Laodicea, toknitsin Ninfa uan tokniuan akin mosentiliaj ichan. 16 Satepan ke moixtajtoltis* nejin amatajkuilol, maj no moixtajtolti itech nechikol ompa Laodicea, uan amatajkuilol tein nikintitanilij yejuan, xikixtajtoltikan* namejuan. 17 Uan no, xikiluikan Arquipo: “Xiksentoka chikauak xitekiti para tiktamichiuas tekit tein toTekotsin mitsmakak”.

18 Nejua Pablo, nikmaijkuiloua nejin tajtolmej tein ika namechtajpaloua. Xikelnamiktokan ke nitsaktok uan niilpitok* ika cadena. Maj Dios namechmaka itatiochiualis tein amo technamiki.