1 TESALONICENSES

1 Nejua Pablo, nietok iuan Silvano* uan no iuan Timoteo. Namechtitanilia nejin amatajkuilol namejuan tokniuan akin nanpouij iuan toTajtsin Dios uan toTekotsin Jesucristo ompa Tesalónica:

Maj Dios namechmaka tatiochiualis tein amo technamiki uan maj namechpaleui kuali iuan ximouikakan.

2 Nochipa tiktasojkamatiliaj Dios keman tamechelnamikij nanochin itech tonetataujtiluan, 3 porin iixpan toTajtsin Dios nochipa tikelnamikij tekit tein nankichiuaj porin nantakuaujtamatij uan nantetasojtaj, uan keniuj nantaxikouaj porin nantakuaujtamatij iuan toTekotsin Jesucristo. 4 Nokniuan akin Dios namechtasojta, tikmatij ke yejua namechijitak,* 5 porin kuali tanauatilmej* tamechixmatiltijkej amo sayoj ika tein tamechiluijkej, ta no Dios techpaleuij ika ichikaualis uan tikyekmatiaj ke tein tamechiluiayaj katka melauak uan nejon semi namechpaleuij. Uan namejuan nankimatij tein tikchiujkej para tamechpaleuiskej. 6 Uan no, namejuan nankichiujkej kemej toTekotsin uan kemej tejuan, porin maski semi nantajyouijtoyaj, ika yolpakilis tein Dios kitemaka ika ichikaualis namejuan nankineltokakej itajtol. 7 Ijkon nochin taneltokanij akin yetokej Macedonia uan Acaya, peujkej kichiuaj ijkon kemej namejuan.

8 Tein melauj, amo sayoj nankiteixmatiltianij itajtol Jehová* ompa Macedonia uan Acaya ta itech nochi xolalmej, uan no miakkan momati ke semi nantakuaujtamatij iuan Dios, yejua ika amo monekiok tamechiluiskej teisa. 9 Porin yejuan kisentokaj ika tajtouaj keman timoixmatkej uan keniuj namejuan nankinixtopeujkej namotatadiosuan* uan peujkej nankitekitiliaj Dios akin melauak uan nochipa yoltok 10 uan no nankichixtokej* maj uiki de ne iluikak iKoneuj, akin yejua kichiuak maj oksepa nemi,* Jesús akin techmakixtis keman Dios kinextis iueyi kualanyo tein amo uejkaua kinextiti.

2 Nokniuan, namejuan kuali nankimatij ke amo nenkaj tamechkalpanojkej. 2 Kemej nankimatij, titajyouijkej uan toka mauiltijkej ompa Filipos, sayoj ke Dios techyolchikauak* para tamechixmatiltiskej kuali tanauatilmej* maski semi techixnamikiaj.* 3 Porin keman tamechyolmajxitiaj, amo timopolouaj uan tamechiluiaj tein chipauak uan amo tamechkajkayauaj, 4 uan kemej Dios techixtalij maj tikteixmatiltikan kuali tanauatilmej, amo tamechnojnotsaj para tikinyolpaktiskej oksekin, ta para tikyolpaktiskej Dios, akin kiyekita toyolo.

5 Tein melauj, namejuan nankimatij ke amo keman tamechueyitalijkej, nion titaixkajkayaujkej para xitechmakakan tomin. ¡Dios kiitstok ke amo ijkon! 6 Amo no tiktemouanij maj techueyitalikan, nion namejuan nion oksekin, maski ueliskia tamechiluiskej xitechtekipanokan porin tiitatitaniluan Cristo. 7 Amo tikchiujkej nejon, ta tamechtasojtakej uan tamechyekpiakej, ijkon kemej se temomaj kinchichitia ikoneuan uan kinyekpia porin kintasojta. 8 Yejua ika, kemej semi tamechtasojtaj, ika miak pakilis tamechixmatiltijkej ikuali tajtoluan Dios, uan no hasta timotemakakej timikiskej para tamechpaleuiskej.

9 Nokniuan, nikyekmattok ke nankielnamikij ke chikauak titekitikej uan amo timoseuijkej. Keman tamechixmatiltijkej ikuali tajtoluan Dios, titekitikej youalintonal para amo monekis nantechtekipanoskej. 10 Tein melauj nokniuan, keman tietoyaj namouan tichipaujkanenkej, timelaujkanenkej uan amo nantechajxilijkej nion teyi tein amo kuali. Namejuan nankiyekmatij nejon uan no Dios. 11 Kuali nankimatij ke ijkon kemej se tepopaj kichiua iniuan ikoneuan, tejuan tamechyolmajxitiayaj, tamechyolseuiayaj uan tamechnejmachtiayaj nansejsemej 12 para xiksentokakan xinemikan kemej moneki nemiskej akin kitekitiliaj Dios, akin namechnotstok para xikalakikan itech iTaixyekanalis uan para namechueyitalis.

13 Yejua ika tejuan nochipa tiktasojkamatiliaj Dios, porin keman namejuan nankikakkej itajtol Dios, tein tejuan tamechmatiltijkej, amo nankineltokakej kemej inintajtol takamej, ta kemej yekmelauj itajtol Dios, tein no namechpaleuijtok namejuan akin nantaneltokaj. 14 Nokniuan, namejuan nankichiujkej kemej imomachtijkauan Cristo Jesús akin pouij itech inechikoluan Dios ompa Judea. Porin namejuan no namechtajyouiltijkej akin nemij itech namoaltepeuj, ijkon kemej judíos no kintajyouiltijtokej tokniuan ompa Judea. 15 Judíos hasta kimiktijkej toTekotsin Jesús uan tanauatianij,* uan no techtajyouiltijkej tejuan. Uan no, yejuan amo kiyolpaktijtokej Dios, uan tein kichiuaj amo akin kipaleuia, 16 porin kitemouaj maj amo tikinixmatiltikan akin amo judíos keniuj uelis momakixtiskej. Ijkon yejuan nochipa tajtakolchiujtokej. Sayoj ke iueyi kualanyo Dios inintech uetsikoya.

17 Nokniuan, keman monekik tamechkauaskej* seki tonalmej (amo uelia tamechitayaj, sayoj ke tiksentokayaj tamechelnamikiaj), uan kemej tiktelnekiaj tamechitaskej, tikchiujkej nochi tein tiuelkej para tamechitaskej. 18 Yejua ika tiknekiaj tamechkalpanotiuij. Kemaj, nejua Pablo, niktemoj nias amo sayoj sepa, ta ojpa. Sayoj ke Satanás techtsakuilij. 19 Porin keman toTekotsin Jesús mokepasya,* ¿toni tikchiaskej, toni techyolpaktis oso toni taxtauil* ika timoueyitaliskej iixpan? ¿Amo namejuan? 20 Kemaj, namejuan nankichiuaj maj timoueyitalikan uan maj tiyolpakikan.

3 Yejua ika, kemej semi tamechtemouayaj, tiknemilijkej ke okachi kuali maj timokauakan toselti ompa Atenas, 2 uan tiktitankej toknitsin Timoteo. Yejua itekitikauj* Dios akin kiteixmatiltia kuali tanauatilmej* tein ika tajtoua Cristo. Tiktitankej maj namechyolchikauati uan maj namechyolseuiti para okachi xitakuaujtamatikan, 3 para maj amo akin mosenkaua* porin nankiixnamikij nejin ouijkayomej. Porin namejuan nankimatij ke moneki tikijyouiskej nejin.* 4 Tein melauj, keman namouan tietoyaj, miakpa tamechiluiayaj ke tikixnamikiskiaj ouijkayomej, uan kemej nankimatij, ijkon mochiuani. 5 Yejua ika, kemej semi namechtemouaya, niktitanik Timoteo para nikmatis ox namejuan nantakuaujtamatiajok. Nechtekipachouaya maj in Amokuali kichiuani ximotajtakolmakakan, porin komo ijkon yeskia, nenkaj titekitikej.

6 Sayoj ke Timoteo yekin mokepak uan techmatiltij miak taman tein kuali. Techiluij ke nankisentokaj nantakuaujtamatij uan nantetasojtaj. No techiluij ke nochipa nanyolpakij keman nantechelnamikij uan ke nankitelnekij nantechitaskej ijkon kemej tejuan no tiktelnekij tamechitaskej. 7 Yejua ika nokniuan, maski timotekipachojtokej* uan titajyouijtokej, semi techyolseuiani tikmatiskej ke nankisentokaj nantakuaujtamatij. 8 Porin tejuan kemej yeskia timoyolkuij komo namejuan amo namotsinkixtiaj kemej itatojtokakauan toTekotsin. 9 Namejuan semi nankichiuaj maj tiyolpakikan, yejua ika yekmelauj tiktasojkamatiliaj Dios. 10 Youalintonal chikauak timotataujtiaj ika nochi toyolo maj tiuelikan tamechitatij uan maj tamechpaleuikan ika tein namechpoloua para okachi nantakuaujtamatiskej.

11 Maj toTajtsin Dios uan toTekotsin Jesús techkauakan maj tamechkalpanotij. 12 Uan maj toTekotsin kichiua okachi ximotasojtakan se iuan okse uan no xikintasojtakan oksekin, ijkon kemej tejuan semi tamechtasojtaj, 13 para namoyolchikauaskej, amo nankipiaskej nion teyi tein amo kuali uan nanyeskij nanchipaujkej iixpan toTajtsin Dios keman toTekotsin Jesús mokepasya* iniuan nochin akin Dios moinxelouilij.*

4 Uan axkan nokniuan, tamechnextilijkejya keniuj moneki nanemiskej para nankiyolpaktiskej Dios, uan ijkon nankichiujtokej. Sayoj ke axkan tamechyoleuaj uan tamechtataujtiaj itokaykopa toTekotsin Jesús okachiok ijkon xikchiujtokan. 2 Namejuan nankimattokejya toni tamechnauatijkej itokaykopa toTekotsin Jesús.

3 Yejua nejin tein Dios kineki: xichipaujkanemikan uan amo xiauilnemikan.* 4 Nansejsemej moneki nankimatiskej keniuj nankikuiskej namonakayo para nanyeskij nanchipaujkej iixpan Dios uan nankiyolpaktiskej,* 5 uan amo nankichiuaskej kemej akin amo kiixmatij Dios, porin yejuan kitelnejnektokej motekaskej iuan aksa* uan amo keman ixuij. 6 Maj amo akin kichiuili iikniuj tein amo kuali nion maj ika mauilti ijkon, porin Jehová* kintatsakuiltis akin kichiuaj nochi nejin tajtakolmej, ijkon kemej tamechiluijkejya uan tamechnejmachtijkej. 7 Porin Dios amo technotsak para maj tikchiuakan tein pitsotik, ta para maj tichipaujkej. 8 Yejua ika, akin kiixtopeua nejin tamachtilis, amo techixtopeujtok tejuan, ta Dios, akin namechmaka ichikaualis.

9 Sayoj ke, amo moneki maj tamechijkuilouilikan ke moneki namotasojtaskej kemej yeskia naniknimej, porin Dios namechmachtijtok ximotasojtakan se iuan okse. 10 Tein melauj, nankintasojtajya nochin tokniuan akin moajsij Macedonia. Sayoj ke nokniuan, tamechyoleuaj okachi xitetasojtakan. 11 Ijkon kemej tamechnauatijkej, xikixtalikan nanyolseujkanemiskej, amo namokalakijtinemiskej kampa amo namotekiuj uan nantekitiskej, 12 para maj akin amo taneltokaj kiitakan ke namejuan nanchipaujkanemij uan para maj amo teyi namechpolo.

13 Uan no nokniuan, tiknekij xikmatikan tein kinpanos akin momikilijkejya,* para amo xitayokoyakan kemej akin amo kichiaj tein kuali. 14 Porin komo titakuaujtamatij ke Jesús momikilij uan oksepa nemik,* no titakuaujtamatij ke Dios no kinuikas iuan akin momikilijkejya* uan amo kikaujkej* Jesús. 15 Tein axkan tamechiluiaj, yejua tein Jehová* kijtoua: akin tiyoltoskejok keman toTekotsin mokepasya* amo tikinyekanteuaskej akin momikilijkejya;* 16 porin toTekotsin ualpantemos de ne iluikak ika se tanauatil,* uan tajtos kemej akin kinixyekana ángeles uan maaktiualas itrompeta Dios, uan itatojtokakauan Cristo akin momikilijkejya, achto oksepa nemiskej.* 17 Satepan, akin tiyoltoskejok uan timokauaskejok, techkuiteuaskej mixtsalan para iniuan tietoskej uan iuan timonamikiskej toTekotsin ne ejekaixko, uan ijkon nochipa tietoskej iuan toTekotsin. 18 Yejua ika, xiksentokakan ximoyolseuijtokan se iuan okse ika nejin tajtolmej.

5 Nokniuan, amo moneki maj aksa* ika namechtajkuilouili horas uan tonalmej tein Dios kiixtalij, 2 porin namejuan kuali nankimatij ke itonal Jehová* ejkotiuetsis ijkon kemej se tachtekkej kistiuetsiki youak. 3 Keman yejuan kijtojtoskej “¡Axkan tiyolseujkanemijya uan amo timouijok!”, ijkuak ixpoliujtiuetsiskej. Nejon ixpoliuilis ejkotiuetsis, kemej ijkuak se siuat tajyouia porin kipiati ikonetsin, uan amo uelis choloskej. 4 Sayoj ke namejuan nokniuan amo nanyetokej tayouayan, uan nejon tonal amo namechajsikiuj kemej ijkuak tachtekinij tachtektokej uan tanestiuetsi, 5 porin nochin namejuan namechtauilijkejya uan nanemij kampa tatanestok. Tejuan amo tinemij kampa tayouayan.

6 Yejua ika, maj amo tikochtokan kemej oksekin, ta maj tiijsatokan* uan maj tiksentokakan tiyektalnamiktokan. 7 Akin kochij, kochij youak, uan akin tauanaj, uintitokej youak. 8 Sayoj ke tejuan, akin tinemij kampa tatanestok, maj tiksentokakan tiyektalnamiktokan. Uan maj nochipa titakuaujtamatikan uan maj titetasojtakan ijkon kemej timotaliliskiaj se teposkoton tein teyolixtsakua.* Uan no, maj tiknemilikan keniuj Dios techmakixtiti, nejin kemej yeskia timokuataliliskiaj teposkuatsakuiloni, 9 porin Dios amo techijitak* para techtatsakuiltis,* ta para techmakixtis itechkopa toTekotsin Jesucristo. 10 Yejua toka momikilij para maj iuan tinemikan, maski tiijsatoskej* oso tikochtoskej.* 11 Yejua ika xiksentokakan ximoyolchikauakan uan ximopaleuijtiakan se iuan okse, ijkon kemej nankichiujtokejya.

12 Axkan nokniuan, tamechiluiaj xikintakachiuakan* akin chikauak tekitij namouan, namechixyekanaj itech itekiuj toTekotsin uan namechyolmajxitiaj. 13 Semi xikinpatiuitakan uan xikintasojtakan porin ijkon tekitij. No xiyolseujkanemikan se iuan okse. 14 Nokniuan, sayoj ke no tamechtataujtiaj xikinnejmachtikan akin amo tatakamatij,* xikinyolseuikan akin semi tayokoxtokej,* xikinpaleuikan akin amo chikaujkej uan amo xiyolijsiuikan iuan nion akin. 15 Kuali xikitakan maj amo akin momakepa, ta nochipa ximochikauakan nankinchiuiliskej tein kuali tokniuan uan nochin oksekin.

16 Nochipa xiyolpaktokan. 17 Nochipa xikchiujtokan netataujtil. 18 Xiktasojkamatikan nochi. Yejua nejin tein Dios kineki xikchiuakan kemej itatojtokakauan Cristo Jesús. 19 Amo xiktsakuilikan ichikaualis Dios maj tekiti namotech.* 20 Amo xikixtopeuakan tein Dios kitematiltia itechkopa aksa. 21 Xikyekitakan nochi uan nochipa xikchiuakan tein kuali. 22 Amo xikchiuakan nion se taman tein amo kuali.

23 Maj Dios akin teyolseuia senkis namechxelo para nankitekitiliskej. Uan nokniuan, nochi kuali tanemilil tein nankinextiaj, namonemilis* uan namonakayo maj kisentoka chipauak hasta keman toTekotsin Jesucristo mokepasya.* 24 Akin namechnotsa nochipa kichiua tein kijtoua uan yekmelauj ijkon kichiuas.

25 Nokniuan, xiksentokakan toka ximotataujtikan.

26 Xikintajpalokan nochin tokniuan ika se beso* kemej yeskia naniknimej.

27 Namechtataujtia itokaykopa toTekotsin xikinixtajtoltilikan* nejin amatajkuilol nochin tokniuan.

28 Maj toTekotsin Jesucristo namechmaka tatiochiualis tein amo technamiki.