1 TIMOTEO

1 Nejua Pablo, niitatitanil Cristo Jesús porin nechixtalij toTemakixtijkauj Dios uan Cristo Jesús, akin itechkopa tikchiaj tein kuali. 2 Nimitstajkuilouilia Timoteo,* nokoneuj akin tiktekitilia toTekotsin.

Maj toTajtsin Dios uan toTekotsin Jesucristo mitsmakakan tatiochiualis tein amo technamiki, maj mitsiknelikan uan maj mitspaleuikan kuali ximouika iuan Dios.

3 Keman yaya niatiya Macedonia, nimitsyolchikauak ximokaua Éfeso. Axkan no nimitsiluia ximokaua para tikinnauatis sekin maj amo tamachtikan okse taman, 4 maj amo kikakikan tein amo melauak tein tetapouiaj, nion keman ininka tajtouaj ininuejkaujtatuan. Ika nejon sayoj se tonalpoloua, kichiuaj maj oksekin kijtokan teisa tein amo uelis kinextiskej ke melauak uan amo yejua tein Dios techmaka para okachi titakuaujtamatiskej. 5 Niktemaka nejin tanauatil para maj titetasojtakan porin tiyolchipaujkej, porin amo teyi techyolkuejmoloua uan porin yekmelauj titakuaujtamatij.* 6 Kemej sekin amo kichiuaj nejin, tonalpolouaj keman nenkaj motajtolteuiaj. 7 Kinekij tamachtiskej tanauatil, sayoj ke nion kiajsikamatij tein kijtouaj nion tein semi kinekij maj mochiua.

8 Tejuan tikmatij ke iTanauatil Moisés tapaleuia komo se kitakamati kemej moneki. 9 Uan no tikmatij ke tanauatil amo moixtalij para akin yolmelaujkej, ta para akin kitapanauiliaj tanauatil uan taixnamikij, akin amo yolkualmej uan tajtakouaj, akin tekauaj* uan kiixtopeuaj tein yektik, akin kimiktiaj inintat, ininnan oso oksekin, 10 akin auilnemij,* takamej akin kitemouaj auilnemiskej* iniuan inintakaikniuan, akin teichtekij, akin takajkayauaj uan akin moyektenkauaj ika xolopijyot uan para akin kichiuaj tein yeski taman tein ika kiixnamikij tamachtilis tein kuali.* 11 Nejin tamachtilis mokixtia itech kuali tanauatilmej* tein semi kualtsitsin uan kitemaka Dios akin yolpaki. Yejua nechixtalij maj nikteixmatilti nejin kuali tanauatilmej.

12 Niktasojkamatilia toTekotsin Cristo Jesús akin nechmakak chikaualis, porin nechitak ke nitakuaujtamach uan nechmakak se tekit, 13 maski achto nitauijuikaltiaya,* nikintajyouiltiaya itekitikauan Dios uan amo nitetakachiuaya.* Sayoj ke, Cristo nechiknelij porin amo nikmatia tein nikchiuaya uan amo nitakuaujtamatia. 14 Sayoj ke toTekotsin semi nechnextilij itatiochiualis tein amo technamiki uan Cristo semi nechpaleuij maj nitakuaujtamati uan nechtasojtak porin niktojtoka. 15 Nejin tein nikijtojtok melauak uan kinamiki maj senkis se kineltoka: Cristo Jesús ualaj nikan taltikpak para kinmakixtis akin tajtakolejkej, uan nejua akin okachi niueyitajtakolej. 16 Maski nejua okachi niueyitajtakolej, Cristo Jesús nechiknelij uan ijkon kinextij ke nion tepitsin yolijsiui. Nejon tein nechpanok kinpaleuis akin nemiskej nochipaya porin iuan takuaujtamatiskej.

17 Tekiuaj akin nochipa yoltok, akin amo ueli ixpoliui, akin amo ueli tikitaj, Dios akin sayoj setsin kinamiki maj kitakachiuakan* uan maj kiueyitalikan nochipaya. Maj ijkon mochiua.*

18 Nokonetsin Timoteo, nimitsnauatia nejin, uan nikelnamiki tein achto moijtojka ke tikchiuaskia para maj nejon mitspaleui xiksentoka xitateui kemej se soldado akin kimati kuali tateuis, 19 xiksentoka xitakuaujtamati uan maj amo teyi mitsyolkuejmolo. Sekin amo teyi kichiujkej maski kinyolkuejmolouaya teisa, yejua ika amo takuaujtamatkejok. Kinpanok ijkon kemej se barco tein pankalaki. 20 Ijkon kichiujkej Himeneo uan Alejandro, akin nikinmaktilijya Satanás. Nikintatsakuiltij para maj ijkon kimatikan ke amo kuali yetok maj se kiuijuikalti* Dios.

2 Yejua ika achto namechiluia ke moneki maj ininka timotataujtikan nochin, maj tikintajtouikan uan maj semi tiktajtanikan Dios maj kinpaleui uan maj tiktasojkamatilikan, 2 uan no maj tikinelnamikikan tekiuanij uan nochin uejueyi chiuanimej, para maj tiksentokakan tiyolseujkanemikan, maj amo timotekipachokan, maj senkis tikueyichiuakan Dios ika nochi toyolo uan maj amo teyi tikauilmatikan.* 3 ToTemakixtijkauj Dios, kiita ke nejin kuali yetok uan kiyolpaktia, 4 porin yejua kineki maj akin yeski momakixti uan maj kuali kiixmati tein melauak. 5 Porin nemi sayoj se Dios, uan yetok sayoj se akin techtajtouia iixpan Dios: se takat, Cristo Jesús, 6 akin kitemakak inemilis uan ika kiixtauak tein monekia para kinmakixtis nochin porin tajtakolejkej. Nejin moteixmatiltis keman ejkos tonal. 7 Para niknextis ke melauak nejin, Dios nechixtalij kemej tanojnotskej uan kemej tatitanil, para nikinmachtis akin amo judíos maj takuaujtamatikan uan maj kiixmatikan tein melauak. Nikijtoua tein melauak, amo nitakajkayaua.

8 Yejua ika, kampa yeski namosentiliskej, nikneki maj takamej kichiuakan* netataujtil, uan moneki yeskij yolchipaujkej, amo kualantoskej nion motajtolteuiskej iniuan oksekin. 9 No ijkon, siuamej moneki motasaltiskej kemej kinamiki uan keman mochijchiuaskej maj kinextikan ke yektalnamikij uan maj amo kitelpanoltikan, uan no maj taixejekol kemej mokuaxiluiskej, amo ika oro nion tetsitsin tein patiyojkej oso tasal tein semi patiyoj, 10 ta moneki mochijchiuaskej kemej kinamiki mochijchiuaskej siuamej akin kiueyichiuaj Dios ika nochi ininyolo. Yejuan moneki mokualtsintiliskej ika nochi tein kuali tein kichiuaskej.

11 Maj siuamej sayoj takaktokan* uan maj mokauakan maj kinmachtikan.* 12 Amo nikaua maj siuamej tamachtikan nion maj kinixyekanakan takamej; ta maj sayoj takaktokan.* 13 Porin Dios achto kichijchiuak Adán, uan satepan Eva. 14 Uan no, Adán amo kikajkayaujkej, ta yejua siuat akin senkis kikajkayaujkej uan tajtakoj. 15 Sayoj ke, se siuat semi kipaleuis maj kinpia ikoneuan, porin nejon kipaleuis maj amo kichiua tein amo kuali, sayoj ke moneki maj kisentoka takuaujtamati, maj tetasojta, maj chipauak iixpan Dios uan maj yektalnamikto.

3 Tein namechiluiti melauak: komo se takat mochikaujtok yeski se tayekankej, kineki kichiuas se kuali tekit. 2 Yejua ika, tayekankej moneki kuali nemis para maj amo akin kijijto, moneki kipias sayoj se isiuatsin, kuali kiixejekos nochi tein kichiuas; moneki yektalnamiktos, kichiuas nochi kemej moneki, kuali kinselis oksekin uan moneki kimatis keniuj tamachtis. 3 Maj amo tauana, maj amo tateui, nion maj kitemo maj nochipa mochiua tein kinemilia. Maj amo kitemo motajtolteuis nion kitelnejnekis motomintis. 4 Moneki yeski se takat akin kuali kinixyekana ichankauan, maj ikoneuan tatakamatikan uan maj kichiuakan tein kuali 5 (porin komo se takat amo kimati keniuj kinixyekanas ichankauan, ¿keniuj kinyekpias akin pouij itech inechikol Dios?). 6 Maj amo se takat akin yekin peuak taneltoka, para maj amo moueyimati* uan maj amo kitatsakuiltikan kemej in Amokuali. 7 Uan no, maj kuali ika tajtokan akin amo taneltokaj, ijkon amo onkas teisa tein uelis kipantiskej uan amo uetsis imako in Amokuali.

8 No ijkon, maj tapaleuianij amo teyi kiauilmatikan; maj amo kikejkepakan tein kijtouaj* nion maj tel tayikan vino nion maj xijxikuimej,* 9 ta moneki amo kikauaskej tamachtilis tein tikneltokaj, nejin yejua tein Dios amo kitematiltijtoya,* uan maj amo teyi kinyolkuejmolo.

10 Uan no, maj achto kiitakan ox uelis kichiuaskej nejin tekit; uan komo amo teyi kichiujtokej tein ika uelis kinijijtoskej, uelis tekitiskej kemej tapaleuianij.

11 Siuamej no moneki amo teyi kiauilmatiskej uan amo tetakajkayauiliskej. Moneki kuali kiixejekoskej nochi tein kichiuaskej uan kinextiskej ke takuaujtamatij iuan Dios itech nochi tein kichiuaj.

12 Maj tapaleuianij kipiakan sayoj se ininsiuatsin uan maj kuali kinixyekanakan ininkoneuan uan ininchankauan. 13 Porin akin kuali kichiuaj inintekiuj, kinpaleuia maj oksekin kuali kinitakan uan maj amo teyi kintsakuili keman kijtoskej ke takuaujtamatij iuan Cristo Jesús.

14 Maski nikchia amo uejkaua nimitsitatiuj, nimitsijkuilouilia nejin, 15 uan ijkon, komo amo niman niouj, xikmati keniuj tinemis kemej se akin poui iniuan ichankauan Dios. Nejin yejua inechikol Dios akin nochipa yoltok, tein kemej yeskia kalikxit uan tein kipaleuia tamachtilis tein melauak. 16 Kemaj, tikyekmatij ke semi tayekantok tein Dios amo kitematiltijtoya,* tein kinextiskia akin kiueyichiuaskia Dios ika nochi iyolo: ‘Jesús mochiuako takat, Dios kiitak ke yolmelauak keman kichiuak maj oksepa ueli nemi ne iluikak,* monextij ininixpan ángeles, kiteixmatiltijkej itech altepemej, miakej itech taneltokakej, Dios kiselij ne iluikak uan kiueyitalij’.

4 Sayoj ke, Dios ika ichikaualis* kiyekijtoua ke satepan sekin kikauaskej tamachtilis tein tikneltokaj, porin kineltokaskej tein oksekin kijtoskej ke Dios kitematiltij uan no kineltokaskej inintamachtilis amokuali ejekamej. 2 Kikakiskej ininxolopijyo akin taixkajkayauaj, akin amo teyiok kinyolkuejmoloua porin inintalnamikilis* kemej yeskia kinchichinouilijkej ika se tepos. 3 Yejuan tanauatiaj maj amo se monamikti uan maj amo se kimajseua seki takual, sayoj ke Dios kichijchiuak nejin takual para maj akin takuaujtamatij uan kuali kiixmatij tein melauak kitasojkamatilikan keman kikuaskej. 4 Porin nochi tein Dios kichijchiuak semi kuali, uan amo teyi moneki se kiixtopeuas komo se kitasojkamati. 5 Takual mochipaua porin Dios kijtoua ke chipauak, uan porin tiktasojkamatij ika se netataujtil.

6 Keman tikiniluis tokniuan nejin, tiknextis ke kuali tiktekitilia Cristo Jesús, ke okachi timochikaujtiuj ika tajtolmej tein techpaleuiaj maj titakuaujtamatikan iuan Dios uan no itech in kuali tamachtilismej tein tikneltokatiuits. 7 Sayoj ke xikixtopeua tein amo melauak tein kitetapouiaj uan tein kiixnamiki Dios, kemej tein kitetapouiaj nanitajmej. Uan no, ximochikaua* tikueyichiuas Dios ika nochi moyolo. 8 Porin keman tikchikauaj tonakayo techpaleuia itech seki taman. Sayoj ke tikueyichiuaskej Dios ika nochi toyolo, techpaleuia itech nochi porin kuali tinemij axkan uan no kuali tinemiskej satepan. 9 Nejin tein nikijtojtok melauak uan kinamiki maj senkis se kineltoka. 10 Yejua ika semi titekititokej uan timochikaujtokej, porin titakuaujtamatij iuan se Dios akin nochipa yoltok, akin kimakixtia akin yeski, okachiok akin kitekitiliaj uan iuan takuaujtamatij.

11 Xiksentoka xitanauatijto uan xitamachtijto nejin. 12 Maj amo akin mitsixtopeua porin tiokichpilok, ta xikinnextili akin takuaujtamatij iuan Dios maj kichiuakan kemej tejua. Maj kiitakan keniuj titajtoua, keniuj tinemi, keniuj titetasojta, keniuj titakuaujtamati uan keniuj tichipaujkanemi. 13 Xiksentoka ximochikaua kuali titaixtajtoltis* sentaixpan, titayolmajxitis* uan titamachtis hasta keman niajsis. 14 Amo xikaua tatiochiualis tein tikpia uan tein tikselij keman tanauatianij* kijtojkaj tein tikchiuaskia uan keman oloch tayekananij kitalijkej ininmauan motech. 15 Xitanemili itech nejin; nochipa xikchiujtinemi* nejin para maj nochin kiitakan ke okachi titakuaujtamati. 16 Nochipa kuali xikita keniuj tinemi uan keniuj titamachtia. Xiksentoka xikchiua nejin porin ijkon timomakixtis tejua uan no akin mitskakij.

5 Amo xikajua se takatsin akin xiuejya,* ta xiknojnotsa kemej yeskia mopaj; akin telpochmejok, xikinnojnotsa kemej yeskia mokniuan; 2 se siuatsin akin xiuejya,* xiknojnotsa kemej yeskia momaj uan akin ichpochmejok xikinnojnotsa kemej yeskia mokniuan, uan amo xiknemilijto tein amo chipauak.

3 Xikintakachiua* uan xikinyekpia siuatsitsin akin momikilijya inintakatsin, akin yekmelauj amo akaj kinpaleuia.* 4 Sayoj ke, komo se siuatsin akin momikilijya itakatsin kinpia ikoneuan oso iixuiuan, yejuan achto moneki kinextiskej ininkalijtik ke kiueyichiuaj Dios ika nochi ininyolo uan kinmakaskej inintatuan uan ininueyitatuan tein moneki porin nejin kiyolpaktia Dios. 5 Siuatsin akin yekmelauj amo akaj kipaleuia uan amo teyi kipia,* takuaujtamati iuan Dios uan chikauak motataujtia youalintonal. 6 Sayoj ke, siuatsin akin kitemoua sayoj kichiuas tein kinejneki inakayo,* kemej yeskia momikilijya maski yoltokok. 7 Yejua ika, xiksentoka xikinnauatijto nejin para maj amo onka teisa tein ika uelis kinijijtoskej. 8 Porin komo aksa* amo kintekipanoua akin moneki kinyekpias, uan okachiok akin nemij ichan, kiixtopeua tein tikneltokaj uan okachi kichiua tein amo kuali ke se akin amo taneltoka.

9 Siuatsin akin momikilij itakatsin akin kijkuiloskej para kipaleuiskej moneki kipias panoua 60 xiujmej, akin kipiak sayoj se itakatsin 10 uan maj moixmati ke kichiua miak taman tein kuali: akin kuali kiniskaltij ikoneuan, kuali kinselij oksekin, kinmetspajpakak akin Dios moinxelouilij,* kinpaleuij akin tajyouiaj uan kiyekchiuak nochi taman tein kuali.

11 Sayoj ke, amo xikinijkuilo siuatsitsin akin momikilijya inintakatsin uan ichpochmejok. Keman yejuan kitelnekij motekaskej iuan se takat, amo kitekitiliajok Cristo uan oksepa kinekij monamiktiskej. 12 Yejuan motaniliskej maj kintatsakuiltikan porin amo kichiuaj tein motenkaujkaj kichiuaskej. 13 Uan no momatij amo teyi kichiuaskej uan sayoj takalpanojtinemij. Kemaj, amo sayoj tonalpolouaj, ta no kintenkuitinemij* oksekin uan mokalakiaj kampa amo inintekiuj uan ika tajtouaj tein amo moneki. 14 Yejua ika, nikneki maj siuatsitsin akin ichpochmejok uan momikilijya inintakatsin maj monamiktikan, maj kinpiakan konemej, maj kinitakan akin nemij ininchan para maj amo techijijtokan akin techixnamikij. 15 Tein melauj, sekin moxelojkejya uan kitojtokakej Satanás. 16 Komo se siuatsin taneltokakej kinpia ichankauan akin momikilijya inintakatsin, maj kinpaleui para maj amo kintekimakakan tokniuan itech nechikol, uan ijkon tokniuan uelis kinpaleuiskej akin yekmelauj amo akaj kinpaleuia.*

17 Maj semi kintakachiuakan* tayekananij akin kuali kinixyekanaj tokniuan itech nechikol, okachiok akin kuali tajtouaj uan tamachtiaj porin yejuan chikauak tekitij. 18 Porin Tajkuilolamatsin kijtoua: “Amo xiktenilpi* kuakouej keman ipan tajtaksatok* trigo”. Uan no kijtoua: “Akin tekiti kinamiki maj kitaxtauikan”. 19 Komo aksa kiteluilia se tayekankej,* amo xikaki. Sayoj ke komo omen oso eyin kiteluiliaj, uelis tikchiuas teisa. 20 Xiknexti senteixtenoj ke amo kuali yetok tein kichiuaj akin kichiujtinemij tajtakol para maj oksekin amo no kichiuakan nejon. 21 Nimitsyeknauatia iixpan Dios, Cristo Jesús uan ángeles taijitalmej* xikchiua nejin tein nimitsnauatia uan amo xitechikoita nion xitechichikotasojta.*

22 Amo keman xikijsiujkatali momauan itech aksa para tikixtalis maj kichiua se tekit. Amo xiteuanti itech inintajtakoluan oksekin. Xichipaujkanemi.

23 Amo xitayitook at;* ta xitayi tepitsin vino tein mitspoxpaleuis uan no porin semi* tikokolispeua.

24 Inintajtakoluan sekin nochin kimatij uan niman kintatsakuiltiaj, sayoj ke inintajtakoluan oksekin satepan momatij. 25 No ijkon, tein kuali tein se kichiua nochin kimatij uan tein amo momati amo ueli se kitatijtok.*

6 Akin moajsij temako maj nochipa kintakachiuakan* inintekouan ika nochi ininyolo, ijkon amo keman kijijtoskej itokay Dios nion tein tamachtia. 2 Uan akin inintekouan taneltokaj maj amo kinemilikan ke amo moneki kintakachiuaskej* porin tokniuan, ta moneki okachiok kinyektekitiliskej, porin akin kintekitilijtokej no taneltokaj uan no kintasojtaj.

Tejua xiksentoka xitamachti uan xikinilui maj kichiuakan nejin. 3 Akin tamachtia okse taman uan amo tamachtilis tein kuali* tein kitemaka toTekotsin Jesucristo nion tamachtilis tein kinextia keniuj moneki tikueyichiuaskej Dios ika nochi toyolo, 4 yejua semi moueyimati* uan amo teyi kiajsikamati. Semi kiuelita tenajnankilis uan moteuis sayoj por tajtolmej. Nejin kichiua maj oksekin monexikoluikan,* moteuikan, motakajkayauilikan,* maj amo takuaujtamatikan iniuan oksekin 5 uan maj nochipa motajtolteuijtokan ika tein amo semi moneki. Nejin kipeualtiaj akin amo kuali tanemiliaj akin amo kiajsikamatijok tamachtilis tein melauak. Yejuan kinekij kiueyichiuaskej Dios sayoj para kitaniskej teisa. 6 Uan tein melauj, se kiueyichiuas Dios ika nochi se iyolo kichiua maj se kitani miak taman keman se yolpaki ika tein se kipia. 7 Porin keman tiyolkej amo teyi tikualkuikej nikan taltikpak uan amo no teyi uelis tikuikaskej keman timikiskej. 8 Yejua ika, komo tikpiaj tein tikuaskej* uan tein timotaliliskej,* maj ika nejon tiyolpakikan.

9 Sayoj ke, akin kiixtalijtokej motomintiskej motajtakolmakaj uan kemej yeskia uetsij itech se trampa, kinejnekij tein kinijtakoua uan kichiuaj miak taman tein amo tapaleuia tein kinuika maj ixpoliuikan. 10 Porin se kitelnekis se motomintis kichiua maj onka nochi taman tein amo kuali, uan kemej sekin kitelnekij nejin, amo takuaujtamatijok uan semi motajyouiltianij.

11 Sayoj ke tejua, itekitikauj Dios amo xikchiua* nejon, ta ximochikaua tikchiuas tein kuali yetok, tikueyichiuas Dios ika nochi moyolo, titakuaujtamatis, titetasojtas, titaxikos uan tiyeski tiyolnejmach. 12 Xitateui kemej se kuali soldado para tikpaleuis tein tikneltoka. Amo xikaua tein mitspaleuis xinemi nochipaya. Tejua mitsnotskej para tinemis nochipaya uan yejua nejon tein kuali tikteixmatiltij ininixpan miakej.

13 Iixpan Dios, akin kichiua maj yolto nochi tein onkak, uan iixpan Cristo Jesús, akin kuali tajtoj iixpan Poncio Pilato, nimitsnauatia 14 kuali xiktakamati nochi tanauatilmej uan maj amo onka tein ika mitsijijtoskej hasta keman monextis toTekotsin Jesucristo, 15 porin keman ajsis tonal tein ixyetok, akin yolpaki uan kipia ueyi tanauatil kinextis ichikaualis. Yejua ininTekiuaj akin taixyekanaj kemej tekiuanij uan ininTeko uejueyi chiuanimej. 16 Sayoj yejua amo ueli miki, nemi itech se tanex kampa amo akaj ueli motokia, uan amo akin kiitani nion ueli kiita. Yejua kinamiki maj kitakachiuakan* uan maj iaxka chikaualis tein amo tami. Maj ijkon mochiua.*

17 Xikinnauati nejin akin tominpiaj itech nejin tonalmej:* maj amo moueyimatikan* uan maj amo takuaujtamatikan itech tomin tein tami, ta maj takuaujtamatikan iuan Dios, akin techtelmaka nochi tein ika tiyolpakij. 18 Xikinilui maj kichiuakan miak taman tein kuali, maj kitemakakan tein kipiaj uan ika miak pakilis maj tapaleuikan ika tein kipiaj, 19 uan ijkon yejuan motaniliskej tein yekmelauj kipia ipatiuj, tein Dios kinmakas para kuali nemiskej satepan, para maj amo kikauakan tein kinpaleuis maj yekmelauj kuali nemikan.

20 Timoteo, amo xikaua tein Dios mitsmakak, amo xikaki tajtolmej tein amo tapaleuiaj tein kiixnamiki Dios nion xikinkaki akin kinemiliaj ke semi taixmatij, porin nejon tein kiixmatij kiixnamiki tein melauak. 21 Kemej sekin kinneltokiliaj nejon, kichiuani maj kikauakan tamachtilis tein melauak.

Maj Dios namechmaka itatiochiualis tein amo technamiki.