2 TIMOTEO

1 Nejua Pablo, niitatitanil Cristo Jesús porin Dios ijkon kinekik para nikteixmatiltis keniuj Dios motenkauak maj nemikan akin pouij iuan Cristo Jesús. 2 Nimitstajkuilouilia tejua Timoteo, notasojkonetsin.

Maj toTajtsin Dios uan toTekotsin Jesucristo mitsmakakan tatiochiualis tein amo technamiki, maj mitsiknelikan uan maj mitspaleuikan kuali ximouika iuan Dios.

3 Niktasojkamatilia Dios, akin niktekitilia kemej kitekitilijkej nouejkaujtatuan uan amo teyi nechyolkuejmoloua, uan nochipa nimitselnamiki keman chikauak nimotataujtia youalintonal. 4 Keman nikelnamiki keniuj tichokak, semi nikneki nimitsitas para nitelyolpakis. 5 Porin nikelnamiki ke yekmelauj titakuaujtamati,* ijkon kemej takuaujtamatkej moueyinan Loida uan momaj Eunice, uan nikyekmati ke tiksentoka ijkon titakuaujtamati.

6 Yejua ika, nimitselnamiktia ke amo xikaua maj seui tatiochiualis tein Dios mitsmakak tein tikselij keman motech niktalij nomauan. 7 Porin chikaualis* tein Dios techmaka amo kichiua maj timojkamej, ta maj tichikaujkej, maj titetasojtakan uan maj tiyektalnamiktokan. 8 Yejua ika, amo ximopinaujmati tikteixmatiltis toTekotsin nion noka ximopinaujmati porin nitsaktok. Nejua nitsaktok porin itech nitakuaujtamati. Okachi kuali, xikijyoui tein monekis tikijyouis porin tikteixmatiltia kuali tanauatilmej* uan xitakuaujtamati ke Dios mitschikauas para titaxikos. 9 Yejua techmakixtij uan technotsak para maj tichipaujkej iixpan, sayoj ke amo porin timotanilijkej, ta porin ijkon kinekik uan porin ne uejkaujya itechkopa Cristo Jesús technextilij itatiochiualis tein amo technamiki, 10 sayoj ke axkan moyekitaya porin monextij toTemakixtijkauj, Cristo Jesús. Yejua kiixpoloj* mikilis uan ika kuali tanauatilmej techmatiltij keniuj uelis tinemiskej uan tikpiaskej tonakayo tein amo uejueliui. 11 Nechixtalijkej kemej tanojnotskej, tatitanil uan tamachtijkej para nikteixmatiltis kuali tanauatilmej.

12 Yejua ika no nikijyouijtok nochi nejin, sayoj ke amo nimopinaujmati. Porin nikixmati Dios akin itech nitaneltoka, uan nitakuaujtamati ke uelis kiyekpias hasta nejon tonal nochi tein nikauilij. 13 Nochipa xikelnamikto kuali tajtolmej* tein ipa ixyetokya tein nimitsiluij uan xiksentoka xitakuaujtamati uan xitetasojta kemej se akin poui iuan Cristo Jesús. 14 Maj ichikaualis Dios tein totech yetok, mitspaleui xikyekpia nejin tein kipia ipatiuj tein tikselij.

15 Tikmattokya ke nochin akin nemij itech tal tein poui Asia nechkaujkejya, kemej Figelo uan Hermógenes. 16 Maj toTekotsin kinikneli akin nemij ichan Onesíforo, porin yejua miakpa nechyolchikauak uan amo mopinaujmatik porin nitsaktok uan niilpitok* ika cadena. 17 Keman yetoya Roma, semi nechtemojtinemik hasta ke nechajsik. 18 Maj toTekotsin Jehová* kiikneli itech nejon tonal. Kuali tikmatiya keniuj tapaleuij ompa Éfeso.

2 Yejua ika nokonetsin, xiksentoka xiktajtani Dios maj mitschikaua itechkopa tatiochiualis tein amo technamiki tein kinextia Cristo Jesús. 2 Uan tein tinechkakilij uan tein miakej kiyeknextijkej ke melauak, xikinmachti akin takuaujtamachmej, uan ijkon yejuan kuali kimatiskej keniuj kinmachtiskej oksekin. 3 Kemej se kuali isoldado Cristo Jesús, xikijyoui tein monekis tikijyouis. 4 Komo se soldado kineki kiyolpaktis akin kiixyekana, amo mokalakia itech okse tekit para motekipanos. 5 Hasta keman mauiltiaj, amo akin tatani komo amo mauiltiaj kemej ixyetok. 6 Milajtekitikej akin chikauak tekiti, moneki achto yejua kikuas tein kitokak. 7 Nochipa xitanemili itech tein nikijtojtok; toTekotsin mitsajsikamatiltis* nochi.

8 Xikelnamiki ke Jesucristo oksepa nemik* uan iuejkaujtat katka David. Yejua nejin kuali tanauatilmej* tein nikteixmatiltia, 9 uan yejua ika nitajyouijtok uan nitsaktok kemej se akin kichiuak tein amo kuali. Sayoj ke itajtol Dios amo akin uelis kitsakuilis.* 10 Yejua ika nikxikojtok nochi para nikinpaleuis akin Dios kinijitak,* para maj yejuan no momakixtikan itechkopa Cristo Jesús uan maj kinueyitalikan nochipaya. 11 Nejin tein nikijtojtok melauak: komo iuan timikij, tikyekmatij ke no iuan tinemiskej; 12 komo tiksentokaj titaxikouaj, no iuan titaixyekanaskej kemej tekiuanij; komo tikijtouaj ke amo tikixmatij, yejua no kijtos ke amo techixmati; 13 maski tejuan amo tikchiuaskej tein Dios kijtoua, yejua nochipa kichiua tein kijtoua, porin yejua amo keman motajtolpata.*

14 Xiksentoka xikinelnamikti nejin uan xikinnauati* iixpan Dios maj amo moteuikan sayoj por tajtolmej, nejon senkis amo tapaleuia, porin kinijtakoua* akin takaktokej. 15 Xikchiua nochi tein tiuelis para tikyolpaktis Dios uan timonextis iixpan kemej se tekitikej akin amo kipia toni ika mopinaujmatis, akin kitekitiltia tajtol tein melauak kemej moneki. 16 Sayoj ke xikixtopeua tajtolmej tein amo tapaleuiaj tein kiixnamiki Dios, porin nejon kichiuas maj okachi taixnamikikan, 17 uan inintajtoluan momauas kemej se kokolis* tein kipalantijtiuj se inakayo. Yejua nejin tein kichiuaj Himeneo uan Fileto. 18 Nejin takamej kikaujkej tamachtilis tein melauak uan kijtouaj ke mikemej oksepa nemijya, uan kichiujtokej maj sekin amo takuaujtamatikanok. 19 Maski ijkon, tepankalikxit tein Dios kitalij kisentoka kuali toktok uan amo teyi kiolinia, uan itech ijkuiliujtok nejin tajkuilol: “Jehová* kinixmati akin iaxkauan”, uan “Nochin akin kinotsaskej Jehová* ika itokay moneki amo kichiuaskejok tein amo kuali yetok”.

20 Itech se ueyi kali amo sayoj onkak tapalkamej tein chijchiujtokej ika oro uan plata, ta no ika kouit uan sokit. Seki kualtsitsin uan okseki mokui mojmostaj. 21 Yejua ika akin amo moneloua iniuan tapalkamej tein mokui mojmostaj yeski se tapalkat tein kualtsin, chipauak iixpan Dios, semi kipaleuis akin iaxka uan kimatis kichiuas tein yeski tekit tein kuali. 22 Amo xikchiua* tein kinejnekij telpochmej uan ichpochmej uan ximochikaua tikchiuas tein kuali yetok, titakuaujtamatis, titetasojtas uan tiyolseujtos.* Xikchiua nejin iniuan akin takuaujtamatij iuan toTekotsin uan yolchipaujkej.

23 Uan no, amo ximokalaki keman ika monojnotstoskej tein amo tapaleuia uan nenkaj, porin tikmati ke nejon kichiua maj se moteui. 24 Itekitikauj toTekotsin amo moneki moteuis, ta moneki yeski kualtakat iniuan nochin, kimatis keniuj tamachtis, amo momakepas keman kichiuiliskej tein amo kuali 25 uan yeski yolnejmach keman kinmachtis akin amo kiuelkakij tein motamachtia. Dios xa kinkauas maj moyolpatakan para maj kuali kiixmatikan tein melauak, 26 uan ijkon oksepa yektanemiliskej uan momakixtiskej imako in Amokuali, porin yejua kinkitskijtok para maj kichiuakan tein yejua kineki.

3 Sayoj ke moneki tikmatis ke itech tonalmej keman tatamitiya,* tein mochiujtos semi ouij yeski uan tamouilil. 2 Porin tel miakej sayoj yejuan motasojtaskej; semi kitemoskej motomintiskej, moueyichiuaskej ininselti, moueyimatiskej,* teuijuikaltiskej,* amo kintakamatiskej inintatuan, amo motasojkamatiskej uan tekauaskej, 3 amo kintasojtaskej ininchankauan, amo kinekiskej moyektenkauaskej iniuan oksekin, tetakajkayauiliskej, amo motsakuiliskej, kichiuaskej tein tel fiero, kiixtopeuaskej tein kuali, 4 kinchiuiliskej tein amo kuali inintasojikniuan uan amo takakiskej, senkis moueyimatiskej,* sayoj kitemoskej yejuan moyolpaktiskej uan amo Dios 5 uan kinextiskej ke semi taneltokaj,* sayoj ke ika tein kichiuaskej moitas ke amo melauak. Amo iniuan ximouika. 6 Iniuan moajsij takajkayauanij akin ika xolopijyot kalakij techan uan kintanejnektiaj siuamej akin amo chikaujkej. Nejon siuamej kinyolnotsa tajtakol uan mokauaj maj kintani tein yeski taman tein kinejnekij, 7 uan nochipa momachtijtokej sayoj ke amo keman kuali kiixmatij tamachtilis tein melauak.

8 Ijkon kemej Janes uan Jambres kiixnamikkej Moisés, yejuan no kisentokaj kiixnamikij tamachtilis tein melauak. Inintanemilil senkis uejueliujtok uan Dios kinixtopeua porin kiixnamikij tein tikneltokaj. 9 Sayoj ke, amo kuali kisas tein kichiuaskej, porin nochin kiitaskej ke amo kuatamatij, ijkon kemej kinpanok nejon ome takamej. 10 Sayoj ke tejua kuali tikchiuani tein nitamachtia, tikmati keniuj ninemi, tein nikixtalijtok nikchiuas, keniuj nitakuaujtamati, keniuj amo niyolijsiui, keniuj nitetasojta uan nitaxikoua, 11 uan tikmati keniuj nechtajyouiltijkej uan tein nikijyouij, kemej tein nechpanok ompa Antioquía, Iconio uan Listra. Nikxikoj nochi nejon, uan toTekotsin nochipa nechmakixtij. 12 Tein melauj, nochin akin kinekiskej kiueyichiuaskej Dios kemej itatojtokakauan Cristo Jesús, no kintajyouiltiskej. 13 Sayoj ke akin amo yolkualmej uan takajkayauanij okachi kichiuaskej tein amo kuali, takajkayauaskej uan kinkajkayauaskej.

14 Sayoj ke tejua, xiksentoka xikchiua tein mitsmachtijkej uan mitspaleuijkej xikneltoka, porin tikmati akonimej mitsmachtijkej. 15 No xikelnamiki ke desde ke tipiliok tikatka* tikixmati iTajkuilolamatsin Dios tein uelis mitspaleuis ximochiua xitamatkej para timakisas porin titakuaujtamati iuan Cristo Jesús. 16 Nochi tein ijkuiliujtok itech Tajkuilolamatsin ualeua imako Dios, uan tapaleuia para titamachtiskej, para technextilis tein amo kuali yetok,* para se kiyektalis nochi uan para techpaleuis maj tiktakamatikan itanauatiluan Dios, 17 ijkon akin kitekitilia Dios kimatis keniuj kuali kichiuas tein yeski uan kipias nochi tein kipaleuis maj kichiua nochi tein kuali.

4 Cristo Jesús kiixtalis tein kinnamiki kiseliskej akin yoltokej uan akin momikilijkejya keman senkis monextis uan keman yetos itech iTaixyekanalis. Iixpan Cristo Jesús uan iixpan Dios nimitsyeknauatia nejin: 2 xikteixmatilti itajtol Dios, nochipa xiktayekanalti keman nochi kuali yetok uan keman amo; xiknexti tein amo kuali yetok, xitetakaualti uan xiteyolmajxiti. Keman tikchiuas nejin amo xiyolijsiui uan kuali xitamachti. 3 Porin ejkos tonal keman yejuan amo kinekiskej kikakiskej tamachtilis tein kuali,* ta kichiuaskej tein sayoj yejuan kinejnekiskej uan kintemoskej tamachtianij akin kiniluiskej tein yejuan kinekiskej kikakiskej. 4 Amo kikakiskejok tein melauak ta kikakiskej tein amo melauak tein tetapouiskej. 5 Sayoj ke tejua xiksentoka xiyektalnamikto itech nochi, xikxiko nochi ouijkayomej, xikteixmatilti kuali tanauatilmej* uan xikyektekitili Dios.

6 Porin nimotemakatokya kemej vino tein kimaktiliayaj Dios tein kipantekayaj itech altar, uan ejkotokya tonal keman nimikis.* 7 Nitateuijya kemej se kuali soldado, nitamitsikuinikya uan niksentoka nitakuaujtamati. 8 Desde axkan toTekotsin akin kiixtalia nochi kemej moneki, nechxelouilij se corona. Nejin corona kiseliaj akin yolmelaujkej. Yejua nechtaxtauis ika nejin itech nejon tonal. Uan amo sayoj nejua, ta no nochin akin semi kichixtokej* maj monexti.

9 Xikchiua nochi tein tiuelis para niman tinechitakiuj. 10 Porin Demas nechkaujteuak. Yejua okachi kiuelitak tein onkak nikan taltikpak* uan yajki Tesalónica; Crescente yajki Galacia uan Tito yajki Dalmacia. 11 Sayoj Lucas nouan yetok. Maj mouan uiki Marcos porin yejua semi nechpaleuis maj niktekitili Dios. 12 Tíquico niktitanik Éfeso. 13 Keman tiualas, xikualkui nopantaken tein nikualkaujteuj ichan Carpo ompa Troas. No xikinualkui amatajkuilolmej,* okachiok nikneki xinechualkuili tein ijkuiliujtok itech kuetax.

14 Alejandro akin tamachijchiua ika cobre, semi nechtajyouiltij. Jehová* kimakas tein kinamiki. 15 Tejua no ximoyekpia, porin yejua semi kiixnamikik tein tikteixmatiltiaj.

16 Keman yekinika nimotajtouij ininixpan tekiuanij amo akin nechpaleuij, ta nochin nechkaujteujkej. Maj Dios kintapojpolui. 17 Sayoj ke toTekotsin kemaj nechpaleuij uan nechyolchikauak para maj nikteixmatilti nochi tein kijtoua itajtol Dios uan maj kikakikan akin nemij itech nochin altepemej, uan nechmakixtij para maj amo nechkua tekuani. 18 ToTekotsin nechpaleuis itech nochi tein amo kuali uan nechmakixtis para nechuikas itech iTaixyekanalis ne iluikak. Yejua kinamiki maj kiueyitalikan nochipaya. Maj ijkon mochiua.*

19 Xinechintajpalouili Prisca uan Áquila uan akin nemij ichan Onesíforo.

20 Erasto mokauak Corinto, uan Trófimo nikauak ompa Mileto porin mokokouaya. 21 Xikchiua nochi tein tiuelis para tiejkos achto ke taseseyas.

Eubulo, Pudente, Lino, Claudia uan nochin tokniuan mitstajpalouaj.

22 Maj toTekotsin kitiochiua kuali tanemilil tein tiknextia. Maj Dios namechmaka itatiochiualis tein amo technamiki.