1 JUAN

1 Itech nejin amatajkuilol ika titajtouaj akin yetoyaya* keman peuak nochi, akin tiktenkakkej, tikitakej ika toixtololouan, tikmouisojkej uan tikmachilijkej ika tomauan, yejua kiualkui tajtol tein kichiua maj tinemikan. 2 (Kemaj, tejuan tikixmatkej uan tikajsikamatkej ke toTajtsin kichiuas maj tinemikan nochipaya uan yejua tein tamechixmatiltijtokej uan ika tamechnojnotstinemij). 3 Tein tikitanij uan tikakinij no tamechmatiltijtokej namejuan, para maj namejuan no xipouikan touan. Uan tejuan tipouij iuan toTajtsin uan iKoneuj, Jesucristo. 4 Tikijkuilouaj nejin para maj senkis tiyolpakikan.

5 Yejua nejin tein tikakilijkej uan tamechixmatiltijtokej: Dios yejua tanex uan itech Dios nion tepitsin tayouayan. 6 Komo tikijtouaj “Tipouij iuan”, sayoj ke tiksentokaj tietokejok kampa tayouayan, titakajkayaujtokej uan amo tikchiujtokej tein melauak. 7 Sayoj ke komo tietokej itech tanex ijkon kemej yejua yetok itech tanex, tisenpouij se iuan okse, uan iesyo iKoneuj, Jesús, techkixtilia nochi totajtakoluan.

8 Komo tikijtouaj “Amo tikpiaj tajtakol”, sayoj tejuan timokajkayaujtokej uan amo tikneltokaj tamachtilis tein melauak. 9 Dios nochipa kichiua tein kijtoua uan kiixtalia tein kuali, yejua ika, komo tikijtouaj totajtakoluan, yejua techintapojpoluilia uan kiixpoloua tein amo kuali tein tikchiuaj. 10 Komo tikijtouaj “Amo tikchiujtokej tajtakol”, kemej yeskia tikijtojtokej ke Dios xolopij uan amo tikneltokaj tein kijtoua.

2 Nokoneuantsitsin, namechijkuilouilia nejin para amo xikchiuakan se tajtakol. Sayoj ke, komo aksa* kichiua se tajtakol, tikpiaj se akin techpaleuia* akin yetok iuan toTajtsin: Jesucristo, se akin yolmelauak iixpan Dios. 2 Yejua motemakak para techkixtilis totajtakoluan uan ijkon uelis oksepa timouikaskej iuan Dios,* uan amo sayoj para techkixtilis totajtakoluan, ta no inintajtakoluan nochin. 3 Uan yejua nejin tein kinextis ke tikixmatijya: komo tiksentokaj tiktakamatij itanauatiluan. 4 Akin kijtoua “Nejua nikixmati”, sayoj ke amo kitakamati itanauatiluan, se xolopij uan amo kineltoka tamachtilis tein melauak. 5 Sayoj ke komo aksa kitakamati itajtol, monextis ke yekmelauj kitasojta Dios. Yejua ika tikmatij ke iuan tipouij. 6 Akin kijtoua ke kisentoka iuan poui, moneki kisentokas nemis kemej nemik Jesús.

7 Nokniuantsitsin, amo namechijkuilouilia se yankuik tanauatil, ta se tein uejkaujkayot tein nankipiaj desde keman peuak nankiixmatij uan nankitojtokaj Cristo. Nejin tanauatil tein uejkaujkayot yejua tajtol tein namejuan nankikakkej. 8 Maski ijkon, namechijkuilouilia se yankuik tanauatil, se tanauatil tein yejua kitakamatik uan no namejuan, porin tayouayanilot panotokya uan tein yekmelauj tanex tauijtokya.

9 Akin kijtoua ke yetok kampa tanestok sayoj ke kitauelita iikniuj, yetokok kampa tayouayan. 10 Akin kitasojta iikniuj kisentoka kampa tanestok, uan nion teyi uelis kiuetsiltis.* 11 Sayoj ke akin kitauelita iikniuj, yetok kampa tayouayan uan nemi tayouayanijtik, uan amo kimati kani youi porin tayouayanilot amo kikaua maj tachia.

12 Nokoneuantsitsin, namechtajkuilouilia porin Dios namechintapojpoluilijya namotajtakoluan itokaykopa Cristo. 13 Tetatmej, namechtajkuilouilia porin nankiixmatkejya akin yetoyaya desde keman peuak nochi. Telpochmej uan ichpochmej, namechtajkuilouilia porin nankitankej in Amokuali. Pipiltsitsin, namechtajkuilouilia porin nankiixmatkejya toTajtsin. 14 Tetatmej, namechtajkuilouilia porin nankiixmatkejya akin yetoyaya desde keman peuak nochi. Telpochmej uan ichpochmej, namechtajkuilouilia porin nanchikaujkej uan nankineltokaj itajtol Dios, uan nankitankej in Amokuali.

15 Amo xikuelitakan kemej nemij akin amo yolkualmej nion tein kichiuaj. Komo aksa kiuelita nejin, kinextia ke amo kitasojta toTajtsin.* 16 Porin nochi tein onkak nikan taltikpak, kemej tein kinejneki tonakayo, tiknejnekiskej tein tikitaj, uan tiknextijtinemiskej tein tikpiaj para maj techueyitalikan, nochi nejon amo ualeujtok itech* toTajtsin, ta ualeujtok inintech akin amo yolkualmej. 17 Uan no, yejuan ixpoliuiskej uan no tein kinejnekij, sayoj ke akin kichiua tein Dios kineki, nemis nochipaya.

18 Pipiltsitsin, amo miak tonalmejok mokauaj. Namejuan nankimatij ke ualas akin kiixnamiki Cristo. Uan axkanya monextianij miakej akin kiixnamikij Cristo, uan yejua ika tikmatij ke amo miak tonalmejok mokauaj. 19 Yejuan touan yetoyaj sayoj ke amo yekmelauj touan pouiaj;* porin komo yekmelauj touan pouiskiaj touan mokauaskiaj. Sayoj ke kiskej para maj moyeknexti ke amo yekmelauj nochin touan pouij. 20 Namejuan namechijitak* akin yektik, uan nochin namejuan nankiixmatij tein melauak. 21 Amo namechtajkuilouilia porin amo nankiixmatij tein melauak, ta porin nankiixmatijya, uan porin tein melauak amo kipia nion se xolopijyot.

22 ¿Akoni xolopij? ¿Melauj ke akin kijtoua ke Jesús amo yejua Cristo? Yejua nejin akin kiixnamiki Cristo: akin kiixtopeua toTajtsin uan iKoneuj. 23 Akin kijtoua ke amo kiixmati iKoneuj amo no kiyolpaktia toTajtsin. Sayoj ke akin kijtoua ke takuaujtamati itech iKoneuj no kiyolpaktia toTajtsin. 24 Uan namejuan xiksentokakan xikchiuakan tein achto namechmachtijkej. Komo nankisentokaj nankichiuaj tein achto namechmachtijkej, no nankisentokaskej iuan nanpouiskej toTajtsin uan iuan iKoneuj. 25 Uan no, yejua nejin tein motenkauak touan: ke kichiuas maj tinemikan nochipaya.

26 Namechijkuilouilia nejin porin miakej kitemouaj namechkajkayauaskej. 27 Uan namejuan Dios namechijitak* ika ichikaualis uan nejon chikaualis namotech yetok uan amo moneki maj aksa namechmachtijto. Sayoj ke, Dios ika ichikaualis namechmachtijtok nochi. Nejon melauak uan amo se xolopijyot. Yejua ika xiksentokakan xipouikan iuan, ijkon kemej namechmachtij keman namechijitak. 28 Yejua ika axkan, nokoneuantsitsin, xiksentokakan xipouikan iuan, uan ijkon keman yejua monextis amo teyi techtsakuilis titajtoskej, uan keman mokepasya,* amo timotatiskej* porin timopinaujmatij. 29 Komo nankimatij ke yejua kichiua tein kuali yetok, no nankimatij ke nochin akin kichiuaj tein kuali yetok yejuan ikoneuan Dios.

3 ¡Xikitakan keniuj semi techtasojta toTajtsin Dios porin hasta techiluia ke tiikoneuan! Uan kemaj tiikoneuan. Yejua ika akin amo yolkualmej amo techixmatij, porin amo kiixmatij yejua. 2 Nokniuantsitsin, axkan tiikoneuan Dios, sayoj ke ayamo monextiani tein tiyeskij. Tikmatij ke keman yejua monextis tiyeskij kemej yejua, porin tikitaskej keniuj tamati. 3 Uan akin itech takuaujtamati moneki chipaujkanemis, porin yejua chipauak.

4 Akin kichiujtinemi tajtakol kitapanauilijtok tanauatil; porin keman se tajtakoua se kitapanauilia tanauatil. 5 Namejuan no nankimatij ke yejua monextij para techkixtilis totajtakoluan, uan yejua amo kipia tajtakol. 6 Akin kisentoka iuan poui amo kichiujtinemi tajtakol; akin kichiujtinemi tajtakol amo kiitani nion kiixmati. 7 Nokoneuantsitsin, maj amo akin namechkajkayaua. Akin kichiua tein kuali yetok, yolmelauak, ijkon kemej yejua yolmelauak. 8 Akin kichiujtinemi tajtakol kichiujtok tein kichiua in Amokuali, porin Amokuali uejkaujya tajtakolchiujtok.* IKoneuj Dios monextij para kitauejuelouilis* in Amokuali.

9 Nochin ikoneuan Dios amo kichiujtinemij tajtakol, porin ichikaualis* Dios inintech yetok, uan yejuan amo uelis kichiuaskej tajtakol porin ikoneuan Dios. 10 Ikoneuan Dios uan ikoneuan Amokuali uelis tikinixmatiskej ika nejin: akin amo kichiuaj tein kuali yetok uan akin amo kintasojtaj ininikniuan amo ikoneuan Dios. 11 Porin yejua nejin tanauatil tein nankikaktiuitsej desde ne uejkauj: maj timotasojtakan se iuan okse; 12 amo kemej Caín, akin kichiuak tein kichiua in Amokuali uan kimiktij iikniuj. ¿Uan keyej kimiktij? Porin Caín kichiuaya tein amo kuali uan iikniuj kichiuaya tein kuali.

13 Nokniuan, amo xikmojkaitakan maj namechtauelitakan. 14 Tejuan tikmatij ke timomikilijkajya, sayoj ke axkan tiyoltokej porin tikintasojtaj tokniuan. Akin amo tetasojta, miketok. 15 Akin kitauelita iikniuj, se temiktijkej, uan nankimatij ke nion se temiktijkej nemis nochipaya. 16 Yejua ika tikmatkej toni kijtosneki se tetasojtas: porin yejua toka motemaktij uan tejuan no moneki timotemaktiskej ininka tokniuan. 17 Sayoj ke komo aksa* kipia tein ika moixpanoltis uan kiita ke iiknitsin kipoloua tein ika moixpanoltis uan amo kiiknelia, ¿keniuj uelis kijtos ke kitasojta Dios? 18 Nokoneuantsitsin, maj amo sayoj tikijtokan ke titetasojtaj, ta maj tiknextikan ika tein tikchiuaj uan maj yekmelauj titetasojtakan.

19 Ijkon tikmatiskej ke tikpiaj tein melauak uan tikyekneltokaskej* ke Dios techtasojta, 20 hasta komo toyolo techtajtakoltia teisa, xikelnamikikan ke Dios okachi ueyi ke toyolo uan nochi kimati. 21 Nokniuantsitsin, komo toyolo amo teyi techtajtakoltia, amo teyi techtsakuilis maj tiknojnotsakan Dios; 22 uan nochi tein tiktajtaniaj yejua techmaka, porin tiktakamattokej itanauatiluan uan tikchiujtokej tein yejua kiyolpaktia. 23 Tein melauj, yejua nejin tein technauatia: maj itech titakuaujtamatikan* iKoneuj, Jesucristo, uan maj timotasojtakan se iuan okse ijkon kemej yejua technauatij. 24 Uan no, akin kitakamati itanauatiluan kisentoka poui iuan Dios uan Dios no kisentoka iuan poui. Uan kemej techmakak ichikaualis tikmatij ke yejua no kisentoka poui touan.

4 Nokniuantsitsin, amo xikneltokakan nion se tamachtilis* tein nesi ke Dios kitemaka, ta achto xikyekitakan ox yekmelauj Dios kitemaka, porin nikan taltikpak neskejya miakej tanauatianij akin amo melaujkej.

2 Uelis nankimatiskej ox se tamachtilis yekmelauj Dios kitemaka komo kinextia ke Jesucristo nemiko kemej takat. 3 Sayoj ke komo se tamachtilis amo kinextia ke Jesús nemiko kemej takat, nejon tamachtilis amo yekmelauj Dios kitemaka. Nejon itamachtilis akin kiixnamiki Cristo, akin namejuan nankimatij ke ualaskia uan yetokya nikan taltikpak.

4 Nokoneuantsitsin, namejuan namechixyekana Dios uan nankintankej nejon takajkayauanij, porin akin namechpaleuijtok okachi chikauak ke akin kinpaleuijtok akin nemij nikan taltikpak. 5 Nejon takajkayauanij pouij nikan taltikpak; yejua ika, kijtouaj tein nikan taltikpak kinemiliaj uan yejuan kintajtolkakij. 6 Tejuan techixyekana Dios. Akin kiixmati Dios, techkaki; akin Dios amo kiixyekana, amo techkaki. Ijkon tikyekmatij katiyejua tamachtilis tein melauak uan katiyejua tein amo melauak.

7 Nokniuantsitsin, maj tiksentokakan timotasojtakan se iuan okse, porin Dios yejua akin achto tetasojtak, uan akin tetasojta, ikoneuj Dios uan kiixmati Dios. 8 Akin amo tetasojta amo kiixmati Dios, porin Dios yejua tetasojtalis. 9 Dios technextilij ke techtasojta ijkuin: Dios kiualtitanik nikan taltikpak iKoneuj akin yojtsin para maj itechkopa, tejuan ueli tinemikan. 10 Dios kiualtitanik iKoneuj para techkixtilis totajtakoluan uan para oksepa uelis timouikaskej iuan Dios.* Yejua kichiuak nejin porin techtasojtak uan amo porin tejuan tiktasojtakej.

11 Nokniuantsitsin, komo Dios ijkon techtasojtak, tejuan no moneki timotasojtaskej se iuan okse. 12 Amo keman akaj kiitani Dios. Komo tiksentokaj timotasojtaj se iuan okse, Dios kisentoka touan yetok uan senkis kinextia ke techtasojta. 13 Nejin kinextia ke tiksentokaj iuan tipouij uan ke yejua touan poui: porin yejua techmakak ichikaualis. 14 Uan no tejuan tikitakej ke toTajtsin kiualtitanik iKoneuj maj kinmakixtiki akin nemij nikan taltikpak, uan yejua nejon tein tikteixmatiltiaj. 15 Komo aksa* kijtoua ika nochi iyolo ke Jesús yejua iKoneuj Dios, Dios kisentoka iuan poui uan yejua kisentoka poui iuan Dios. 16 Uan tejuan tikmatij ke Dios techtasojta uan tikneltokaj nejon.

Dios yejua tetasojtalis, uan akin kisentoka tetasojta kisentoka poui iuan Dios, uan Dios kisentoka iuan poui. 17 Ijkon tiknextiaj ke senkis titetasojtaj, para maj itech tonal keman Dios taixejekos amo teyi techtsakuili titajtoskej, porin nikan taltikpak tejuan titamatij kemej Cristo. 18 Akin tetasojta amo moui. Komo senkis titetasojtaj amo timouij, porin komo timouij techtsakuilia maj tikchiuakan tein ueliskia tikchiuaskej. Tein melauj, akin moui amo senkis tetasojta. 19 Tejuan titetasojtaj porin yejua achto techtasojtak.

20 Komo aksa kijtoua, “Nejua niktasojta Dios” sayoj ke kitauelita iikniuj, takajkayaujtok. Porin akin amo kitasojta iiknitsin akin kiitstok, amo uelis kitasojtas Dios, akin amo ueli kiita. 21 Yejua techmakak nejin tanauatil: ke akin kitasojta Dios maj no kitasojta iiknitsin.

5 Akin kineltokaj ke Jesús yejua Cristo, yejuan ikoneuan Dios. Uan akin kitasojtaj toTajtsin, no kintasojtaj ikoneuan. 2 Komo tiktasojtaj Dios uan tiktakamatij itanauatiluan, tikmatij ke no tikintasojtaj ikoneuan Dios. 3 Porin yejua nejin tein kijtosneki tiktasojtaskej Dios: maj tiktakamatikan itanauatiluan; uan itanauatiluan amo ouij se kitakamatis, 4 porin nochin ikoneuan Dios kixijxikouaj* tein amo kuali tein onkak nikan taltikpak. Uan kemej titakuaujtamatij, nejin techpaleuiani maj titatanikan.

5 ¿Akoni uelis kitanis tein amo kuali tein onkak nikan taltikpak? ¿Melauj ke yejua akin kineltoka ke Jesús iKoneuj Dios? 6 Jesucristo ualaj ika at uan esti; amo sayoj ika at, ta ika at uan esti. Uan Dios ika ichikaualis kiyeknextia nejin, porin ika ichikaualis kitematiltia tein melauak. 7 Porin onkak eyi taman tein kinextia akoni Jesús: 8 ichikaualis Dios, at uan esti, uan nejin eyi taman kinextiaj sayoj se taman.

9 Tejuan tikneltokaj tein oksekin kiteixmatiltiaj, sayoj ke tein Dios kiteixmatiltia okachi kuali, porin yejua kijtoua akoni iKoneuj. 10 Akin takuaujtamati itech iKoneuj Dios, kiuika itech iyolo tein Dios kimachtij. Akin amo kineltokilia Dios, kemej yeskia kijtojtok ke yejua se xolopij, porin amo kineltoka tein Dios kiteixmatiltij de iKoneuj. 11 Uan yejua nejin tein kiteixmatiltij: Dios kichiuak maj tinemikan nochipaya itechkopa iKoneuj. 12 Akin poui iuan iKoneuj Dios kichia nemis nochipaya; akin amo poui iuan iKoneuj Dios amo uelis nemis nochipaya.

13 Namechijkuilouilia nejin namejuan akin itech nantakuaujtamatij* iKoneuj Dios, para xikmatikan ke nanemiskej nochipaya. 14 Uan tikyekmatij nejin: ke uelis tiktajtaniskej nochi, uan komo yejua tein Dios kineki yejua techkaki. 15 Uan komo tikmatij ke yejua techkaki keman tiktajtaniaj tein yeski, tikmatij ke tikpiaskej tein titajtanij porin tiktajtanijkej yejua.

16 Komo aksa* kiita iikniuj kichiujtok se tajtakol tein amo ika se miki, maj kitataujti Dios maj kipaleui, uan Dios kichiuas maj nemi. Nejin sayoj kinpaleuia akin amo kichiujtokej se tajtakol tein ika se miki. Sayoj se tajtakol kichiua maj se miki. Uan amo akin nikiluia maj kitataujti Dios maj kipaleui akin kichiujtok nejon tajtakol. 17 Nochi tein amo kuali yetok, ipa tajtakol. Sayoj ke onkak se tajtakol tein amo kichiua maj se miki.

18 Tikmatij ke ikoneuan Dios amo tajtakolchiuaj, ta iKoneuj Dios kinyekpia, uan Amokuali amo teyi ueli kinchiuilia.* 19 Tikmatij ke tejuan Dios techixyekana, sayoj ke nochi in taltikpak moajsi imako in Amokuali. 20 Uan tikmatij ke iKoneuj Dios ualajya, uan techpaleuij maj tiyektanemilikan para tikixmatiskej akin yekmelauj Dios. Uan iuan tipouij itechkopa iKoneuj, Jesucristo. Yejua yekmelauj Dios uan akin kichiua maj tinemikan nochipaya. 21 Nokoneuantsitsin, ximoyekpiakan para amo nankiueyichiuaskej tein kiueyichiuaj nikan taltikpak.