APOCALIPSIS

1 Nejin yejua tein Dios kinextilij* Jesucristo, para maj kinnextili itakeualuan tein amo uejkaua moneki mochiuas. Uan Jesucristo nechualtitanilij iángel nejua Juan, niitakeual Dios,* maj nechiluiki tein kiixnextia nejon tein amo uejkaua mochiuas. 2 Nejua nikteixmatiltij tein Dios kijtoj uan tein Jesucristo kiteixmatiltij, kemaj, nochi tein nikitak. 3 Yolpaki akin chikauak kiixtajtoltis* tajtolmej tein kinextia tein mochiuas satepan uan yolpakij akin kikakiskej uan kitakamatiskej tein ompa ijkuiliujtok, porin ejkotokya tonal tein ixyetok.

4 Nejua Juan, nikintajkuilouilia tokniuan akin pouij itech chikome nechikolmej tein yetokej itech tal tein poui Asia:

Dios “akin axkan nemi, akin achto ipa nemia uan akin ualas”, uan chikome chikaualismej tein yetokej iixpan iueyi silla maj namechmakakan tatiochiualis tein amo technamiki uan maj namechpaleuikan kuali ximouikakan iuan Dios. 5 Uan Jesucristo, taixpantijkej akin takuaujtamach, akin achto oksepa nemik uan akin kinixyekana akin tekiuajtij nikan taltikpak, maj no namechmaka tatiochiualis tein amo technamiki uan maj namechpaleui kuali ximouikakan iuan Dios.

Akin techtasojta uan ika iesyo techkixtilij totajtakoluan, 6 uan akin kichiuak maj titaixyekanakan kemej tekiuanij uan tiopixkamej iixpan iDios uan iTajtsin, yejua kinamiki maj kiueyitalikan uan maj kipia chikaualis nochipaya. Maj ijkon mochiua.*

7 ¡Xikitakan! Ualas ika mixti uan nochin kiitaskej, hasta akin kikoyonijkej; uan yejua ika nochin akin nemij nikan taltikpak semi tayokoyaskej.* Kemaj, maj ijkon mochiua.*

8 Jehová* Dios kijtoua: “Nejua nipeua uan nejua nitami,* akin axkan nemi, akin achto ipa nemia uan akin ualas, akin kipia nochi chikaualis”.

9 Nejua Juan, namokniuj uan no nitaxikojtok, no nitajyouijtok uan namouan nitaixyekanas kemej tekiuaj porin nipoui iuan Jesús. Nietoya itech tal tein youaliujtok ika ueyiat tein monotsa Patmos porin ika nitajtoua Dios uan nikteixmatiltia Jesús. 10 Dios ika ichikaualis nechajxitij hasta itonal toTekotsin, uan nikakik noikampa ke aksa* chikauak tajtouaya, mokakia kemej se trompeta, 11 uan nechiluij: “Xikijkuilo itech se amatajkuilol* tein tikita uan xikintitanili tokniuan akin pouij itech chikome nechikolmej: Éfeso, Esmirna, Pérgamo, Tiatira, Sardis, Filadelfia uan Laodicea”.

12 Nimoixkepak para nikitas akoni nouan tajtouaya, uan keman nimoixkepak, nikitak chikome tauilketsalonimej tein chijchiujtokej ika oro. 13 Tatajko nikitak se akin tamatia kemej se akin yolik kemej takat,* takentoya ika se tasal tein ajsia hasta imetsko, uan yolixilpitoya* ika se tasal* tachijchiuj ika oro. 14 Uan no, kuapochintoya kemej ipantojmiyo ichkat* tein istak, kemej sekti, uan iixtololouan moitayaj kemej tit.* 15 Imetsuan katkaj kemej tel kuali cobre keman milini tikoijtik, uan keman tajtouaya kakistia kemej ijkuak miak at ijkoyoka. 16 Iyekmakopa kipiaya chikome sitalimej; uan itenoj kisaya se ueyak machete* tein ojkan semi tenej, uan iixko katka kemej tonaltsin keman chikauak tona. 17 Keman nikitak, niixtayouak uan niuetsito iixpan.

Uan yejua notech kitalij iyekmay uan nechiluij: “Amo ximoui. Nejua akin peuak uan akin tamik, 18 uan akin yoltok. Nimomikilijka, sayoj ke axkan niyoltok uan amo keman nimikisok, uan nikpia llaves para nikintatapouilis akin momikilijkejya uan akin yetokej itech Miketekoch.* 19 Yejua ika xikijkuilo nochi tein tikitak, tein axkan mochiujtok uan tein mochiuas satepan. 20 Dios amo kitematiltijtoya tein kijtosneki chikome sitalimej tein tikitak noyekmakopa uan chikome tauilketsalonimej tein chijchiujtokej ika oro. Sayoj ke yejua nejin tein kijtosneki: chikome sitalimej kiixnextiaj ángeles tein yetokej itech chikome nechikolmej uan chikome tauilketsalonimej kiixnextiaj chikome nechikolmej.

2 ”Xiktajkuilouili ángel tein kinyekpia tokniuan akin mosentiliaj ompa Éfeso: Yejua nejin tein kijtoua akin iyekmakopa kipia chikome sitalimej uan nejnemi kampa yetokej chikome tauilketsalonimej tein chijchiujtokej ika oro: 2 ‘Nikmattok nochi tein tikchiua, keniuj chikauak titekiti uan keniuj titaxikoua. No nikmati ke amo tikinxikoua takamej akin amo yolkualmej uan ke tikyekitak tein kichiuaj akin kijtouaj ke tatitanilmej, sayoj ke amo yekmelauj tatitanilmej, uan tikmatik ke takajkayaujtoyaj. 3 Uan no, titaxikojtok uan tikijyouijtok miak kuejmolmej porin titakuaujtamati itech notokay, uan amo timosenkaua. 4 Sayoj ke tikchiujtok teisa tein amo nikuelita: amo tinechtasojtaok kemej achto tinechtasojtaya.

5 ”’Yejua ika, xikelnamiki tein achto tikpiaya uan tikpoloj,* ximoyolpata uan xikchiua tein achto tikchiuaya. Komo amo, niualas uan nimitskuilis motauilketsaloni, uan sayoj nimitskauilis komo timoyolpata. 6 Sayoj ke tikchiujtok nejin tein kuali: tiktauelita tein kichiuaj akin kineltokaj itamachtilis Nicolás, tein nejua no niktauelita. 7 Akin kipia inakas, maj kikaki tein Dios ika ichikaualis kiniluia tokniuan itech nechikolmej: akin tatanis nikauas maj kikua itakilo kouit tein kichiua maj se nemi, tein yetok itech ixochital Dios’.

8 ”Xiktajkuilouili ángel tein kinyekpia tokniuan akin mosentiliaj ompa Esmirna: Yejua nejin tein kijtoua akin peuak uan akin tamik, akin momikilij uan oksepa nemik: 9 ‘Nikmati ke titajyouiani uan ke amo teyi tikpia, maski tein melauj tiktelpia. No nikmati keniuj mitsuijuikaltiaj* akin kijtouaj ke judíos sayoj ke amo yekmelauj judíos; yejuan pouij itech inechikol Satanás. 10 Amo xikmouili tein tikijyouiti. Xikita, in Amokuali kisentokas namechtsakuas nansekimej para senkis kitemos ximotajtakolmakakan, uan namechtajyouiltiskej majtakti tonal. Amo xinechkaua hasta ke timomikilis uan nejua nikchiuas xinemi, nejon yeski motaxtauil.* 11 Akin kipia inakas, maj kikaki tein Dios ika ichikaualis kiniluia tokniuan itech nechikolmej: akin tatanis, ojpatika mikilis amo teyi kichiuilis’.

12 ”Xiktajkuilouili ángel tein kinyekpia tokniuan akin mosentiliaj ompa Pérgamo: Yejua nejin tein kijtoua akin kipia se ueyak machete* tein ojkan semi tenej: 13 ‘Nikmati kani tinemi: kampa motalia Satanás. Maski ijkon, amo tinechkaua.* Uan no amo tinechixtopeuak uan tiksentokak titakuaujtamatik hasta keman nemik Antipas, notaixpantijkauj akin takuaujtamach, akin kimiktijkej namoixpan, kampa nemi Satanás.

14 ”’Sayoj ke tikchiujtok seki taman tein amo nikuelita: tikinkaua maj mouan yetokan akin semi kitakamatij itamachtilis Balaam, akin kitajtolmakak Balac para maj kitemo maj israelitas motajtakolmakakan uan maj kikuakan nakat tein kinmaktiliayaj tatadiosmej* uan maj auilnemikan. 15 Tejua no tikinkaua maj mouan yetokan akin semi kitakamatij itamachtilis Nicolás. 16 Yejua ika ximoyolpata. Komo amo timoyolpata, niman niualas uan nikuis ueyak machete* tein kistok notenoj uan ika nikinteuis.

17 ”’Akin kipia inakas, maj kikaki tein Dios ika ichikaualis kiniluia tokniuan itech nechikolmej: akin tatanis nikmakas maná tein kitatijtokej* uan nikmakas se tetsin istak. Itech tetsin ijkuiliujtok se yankuik tokayit tein amo akin kiixmati, ta sayoj akin kimakaj’.

18 ”Xiktajkuilouili ángel tein kinyekpia tokniuan akin mosentiliaj ompa Tiatira: Yejua nejin tein kijtoua iKoneuj Dios akin iixtololouan moitaj kemej tit* uan imetsuan kemej tel kuali cobre: 19 ‘Nikmattok nochi tein tikchiua, keniuj titetasojta, titakuaujtamati, titekiti uan keniuj titaxikoua. Uan nikmati ke axkan titekititok okachi ke achto.

20 ”’Sayoj ke tikchiujtok teisa tein amo nikuelita: tikaua maj ompa yeto siuat Jezabel, akin kijtoua ke tanauatijkej* uan ika tein tamachtia kinkajkayaua notakeualuan para maj auilnemikan* uan maj kikuakan nakat tein kinmaktiliaj tatadiosmej.* 21 Nikchixtoya maj moyolpata, sayoj ke yejua kineki kisentokas auilnemis.* 22 Xikita, nikchiuas maj kokolispeua uan maj petauetsi,* uan akin iuan auilnemij semi nikintajyouiltis komo kisentokaj kichiuaj tein yejua kichiua. 23 Ikoneuan nikinmiktis ika se kokolis* tein temiktia. Ijkon itech nochi nechikolmej kimatiskej ke nejua nikita tein nochin kinemiliaj uan tein kipiaj ininyolijtik. Uan nansejsemej namechmakas tein namechnamiki. Nikintatsakuiltis akin kichiuaj tein amo kuali uan nikintatiochiuis akin kichiuaj tein kuali.

24 ”’Sayoj ke akin nanyetokej Tiatira, nanochin akin amo nankineltokaj itamachtilis Jezabel, akin amo nankiixmatij tamachtilis tein amo melauak tein ualeua imako Satanás, namechiluia: “Amo namechnauatia xikchiuakan okse taman. 25 Sayoj ke, kemaj namechnauatia amo xikauakan tein nankipiaj hasta maj niuiki. 26 Akin tatanis uan kitakamatis notanauatiluan hasta keman tatamis, nikmakas tanauatil para maj kinixyekana altepemej, 27 ijkon kemej noTajtsin nechmakak tanauatil. Uan yejua kinixyekanas* akin nemij nikan taltikpak ika se takot tachijchiuj ika tepos, uan tatapakaskej kemej sokikomej. 28 No nikmakas sitalin tein kisa achto ke tanesis. 29 Akin kipia inakas, maj kikaki tein Dios ika ichikaualis kiniluia tokniuan itech nechikolmej”’.

3 ”Xiktajkuilouili ángel tein kinyekpia tokniuan akin mosentiliaj ompa Sardis: Yejua nejin tein kijtoua akin kipia chikome chikaualismej tein ualeuaj imako Dios uan chikome sitalimej: ‘Nikmattok nochi tein tikchiua uan nikmattok ke mitsitaj ke tiyoltok, sayoj ke tein melauj timiket. 2 Ximotachili uan xikchikaua tein yaya mikitiya, porin nikita ke amo tikchiujtok nochi tein Dios kineki xikchiua. 3 Yejua ika, nochipa xikelnamiki tein mitsmakakej uan tein tikakik. Xiksentoka xiktakamati uan ximoyolpata. Tein melauj, komo amo tiixpetani, nikistiuetsikiuj kemej se tachtekkej uan amo tikmatis toni hora niejkos.

4 ”’Sayoj ke ompa Sardis mouan yetokej sekin akin amo kipitsotilijkej inintasal, uan nouan nejnemiskej ika istak tasal, porin motanilijkej. 5 Akin tatanis, ijkon takentias, ika istak tasal, uan amo keman nikixpolos itokay tein ijkuiliujtok itech amatajkuilol kampa ixnesij akin nemiskej, ta iixpan noTajtsin uan iixpan iangeluan nikijtos ke nikixmati itokay. 6 Akin kipia inakas, maj kikaki tein Dios ika ichikaualis kiniluia tokniuan itech nechikolmej’.

7 ”Xiktajkuilouili ángel tein kinyekpia tokniuan akin mosentiliaj ompa Filadelfia: Yejua nejin tein kijtoua akin yektik, akin melauak, akin kipia illave David, akin keman tatapoua amo akin ueli tatsakua, uan keman tatsakua amo akin ueli tatapoua: 8 ‘Nikmattok nochi tein tikchiua. (Xikita, moixpan niktalij se puerta tein tapotok tein amo akin ueli kitsakua). Uan nikmati ke maski amo semi tichikauak, tinechtakamatik uan amo tikixtopeuak notokay. 9 Xikita, yejua nejin tein nikinchiualtis akin pouij itech inechikol Satanás, akin kijtouaj ke judíos sayoj ke amo judíos, ta takajkayauaj: nikchiuas maj moixpilokij moixpan,* uan nikinmatiltis ke nimitstasojta. 10 Kemej titaxikoj ijkon kemej nejua nitaxikoj,* nejua no nimitsyekpias itech hora keman tajyouiskej akin nemij itech taltikpak uan moyekitas ox kichiujtokej tein kuali oso tein amo kuali. 11 Amo uejkaua niejkos. Amo xikaua tein tikpia para maj amo akin mitskuili motaxtauil.*

12 ”’Akin tatanis, nikchiuas kemej se kalikxit tein kipia itemplo noDios, uan amo keman kisasok. Itech nikijkuilos itokay noDios, itokay Yankuik Jerusalén (iueyi xolal noDios tein ualpantemoua de ne iluikak, kampa yetok noDios), uan no nikijkuilos notokay tein yankuik. 13 Akin kipia inakas, maj kikaki tein Dios ika ichikaualis kiniluia tokniuan itech nechikolmej’.

14 ”Xiktajkuilouili ángel tein kinyekpia tokniuan akin mosentiliaj ompa Laodicea: Yejua nejin tein kijtoua akin kiluiaj Amén,* taixpantijkej akin takuaujtamach uan melauak, akin Dios achto kichijchiuak: 15 ‘Nikmattok nochi tein tikchiua uan nikmati ke amo tisesek nion titotonik. Niknekiskia majkan xisesek oso xitotonik. 16 Sayoj ke, kemej titamati kemej ayeman,* tein amo totonik nion sesek, nimitsijsotati. 17 Tejua tikijtoua: “Nitominpia, niksentilij miak taman tein patiyoj uan amo teyi nechpoloua”. Sayoj ke amo tikita ke amo tiyolpaki, ke titeikneltij, tipobre uan amo titachia uan ke tixipetstik.* 18 Yejua ika xikaki tein nimitsiluia: nejua xinechkouiliki oro tein kichipaujkej ika tit* para xitominpia, nejua xinechkouiliki istak tasal para xitakentiuj uan ijkon maj amo kiitakan ke tixipetstik* uan timopinaujtis uan nejua xinechkouiliki pajti tein timoixtololojtalilis para titachias.

19 ”’Nejua nikinnextilia tein amo kuali tein kichiujtokej akin nikintasojta uan nikinmachtia maj kipatakan tein moneki.* Yejua ika ximoyolpata uan xiktekitili Dios ika nochi moyolo. 20 Xikita, niijkatok kaltenoj uan nitanotstok. Komo aksa* nechkaki uan nechtatapouilia, nikalakis ichan uan tisentakuaskej tiotakpa. 21 Akin tatanis nikauas maj nouan motali itech noueyi silla, ijkon kemej nejua nitatanik uan nimotalij iuan noTajtsin itech iueyi silla. 22 Akin kipia inakas, maj kikaki tein Dios ika ichikaualis kiniluia tokniuan itech nechikolmej’”.

4 Satepan nikitak ke tatapotoya* ne iluikak, uan akin achto nechnojnotsak motenkakia kemej se trompeta. Nechiluij: “Xipankisa nikan, nimitsnextiliti tein moneki mochiuas”. 2 Satepan, ichikaualis Dios peuak notech tekiti. Uan nikitak se ueyi silla ne iluikak, uan aksa* ompa tokotsyetoya. 3 Akin ompa tokotsyetoya mimilinia kemej tetsin tein monotsa jaspe uan kemej se chichiltik tetsin tein monotsa sardio, uan ueyi silla youaliujtoya ika se arcoíris tein tamatia kemej se xoxoktik tetsin tein monotsa esmeralda.

4 Ueyi silla kiyoualojtoyaj 24 uejueyi sillas, uan itech nejon uejueyi sillas tojtokotsyetoyaj 24 tayekananij. Takentoyaj ika istak tasal uan ininkuako kipiayaj se corona tachijchiuj ika oro. 5 Itech ueyi silla ualtapepetania, mokakia ke tajtouayaj uan tatitikuinia; uan iixpan ueyi silla xotatoyaj chikome uejueyi candilmej, tein kiixnextiaj chikome chikaualismej tein ualeuaj imako Dios. 6 Iixpan ueyi silla moitaya teisa kemej se ueyiat tein tamatia kemej teskat.

Tatajkoyampa, kampa yetoya ueyi silla uan inajnakastan, yetoyaj naui ángeles* tein kipiayaj tel miak ininixtololouan ininixpampa uan ininikampa. 7 Yekinika ángel tamatia kemej se tekuani, ojpatika ángel tamatia kemej se kuakouej, expatika ángel iixko tamatia kemej iixko se takat uan naujpatika ángel tamatia kemej se ueyi totot* tein patantok. 8 Sejse ángel kipiaya chikuasen iajtapaluan tein kipiayaj miak ixtololomej kalampakopa uan taijtikkopa. Uan youalintonal kijtojtokej: “Yektik, yektik, yektik Jehová* Dios, akin kipia nochi chikaualis, akin axkan nemi, akin achto ipa nemia uan akin ualas”.

9 Nochipa keman ángeles kiueyitaliaj, kitakachiuaj* uan kitasojkamatiliaj akin tokotsyetok itech ueyi silla, akin nemi nochipaya uan amo keman miki, 10 nochin 24 tayekananij motankuaketsaj iixpan akin tokotsyetok itech ueyi silla uan kiueyichiuaj akin nemi nochipaya uan amo keman miki. Kitaliaj inincorona iixpan ueyi silla, uan kijtouaj: 11 “ToDios Jehová* akin semi tichikauak, tejua mitsnamiki maj mitsueyitalikan uan maj mitsueyichiuakan, porin tejua tikchijchiuak nochi, uan nochi onkak porin ijkon tiknekik”.

5 Nikitak ke akin tokotsyetoya itech ueyi silla kikitskijtoya ika iyekmay se amatajkuilol* tein ojkan* ijkuiliujtoya. Kuali pepechiujtoya ika chikome sellos. 2 Uan nikitak se chikauak ángel. Yejua chikauak kijtouaya: “¿Akoni kinamiki kitapos amatajkuilol uan kiejkeuas sellos?”. 3 Sayoj ke amo onkaya nion akin ne iluikak nion nikan taltikpak nion taltampa akin ueliskia kitapos amatajkuilol uan kiitas tein ompa ijkuiliujtoya. 4 Peuak semi nichoka porin amo akin kinamikia kitapos amatajkuilol uan kiitas tein ompa ijkuiliujtoya. 5 Sayoj ke semej tayekananij nechiluij: “Amo xichokaok. Xikita, Tekuani akin iuejkauj ixuiuj Judá, ichankauj* David, tatanikya. Yejua ika ueli kitapoua amatajkuilol uan chikueyi sellos”.

6 Tatajkoyampa, kampa yetoya ueyi silla uan naui ángeles* uan kampa yetoyaj tayekananij, nikitak se ichkatsin* tein moitaya ke kimiktijkaj. Kipiaya chikome ikuaomiyouan uan chikome iixtololouan. (Iixtololouan kiixnextiaj chikome chikaualismej tein ualeuaj imako Dios, tein yejua kintitanik itech nochi taltikpak). 7 Ichkatsin nimantsin motokij uan kikuik amatajkuilol tein kipiaya iyekmakopa akin tokotsyetoya itech ueyi silla. 8 Keman kikuik amatajkuilol, naui ángeles uan 24 tayekananij motankuaketskej iixpan Ichkatsin. Sejse tayekankej kipiaya se arpa uan uejueyi kaxit tachijchiuj ika oro uan pexontoyaj* ika kopal. (Kopal tein kichichinouaj kiixnextia netataujtil tein kichiuaj akin Dios moinxelouilij).* 9 Uan mokuikatiaj* se yankuik tatsotson tein kijtoua ijkuin: “Tejua mitsnamiki tikuis amatajkuilol uan tikixtilis sellos, porin mitsmiktijkej uan ika moesyo tikinkouak akin pouij itech tataman uejueyi kalyetonij, akin tajtouaj tataman tajtolmej, tataman ininxolal uan tataman ininaltepeuj uan tikchiuak maj iaxkauan Dios. 10 Tikchiuak maj taixyekanakan kemej tekiuanij uan tiopixkamej para kitekitiliskej toDios. Uan yejuan ualtaixyekanaskej kemej tekiuanij nikan taltikpak”.

11 Nitachiak, uan nikakik tein kijtouayaj miakej ángeles tein kiyoualouayaj ueyi silla, naui ángeles uan tayekananij. Katkaj tel miak millones, 12 uan chikauak kijtouayaj: “Ichkatsin tein kimiktijkej kinamiki kimakaskej chikaualis, tatiochiualismej, tamatilis, tanauatil, maj kitakachiuakan,* maj kiueyitalikan uan maj kitiochiuakan”.

13 Uan nikakik ke nochin akin Dios kinchijchiuak akin yetokej ne iluikak, nikan taltikpak, taltampa uan itech ueyiat, nochin yejuan kijtouayaj: “Akin tokotsyetok itech ueyi silla uan Ichkatsin kinnamiki maj kintasojkamatilikan, maj kintakachiuakan,* maj kinueyitalikan uan maj kipiakan chikaualis nochipaya”. 14 Naui ángeles kijtouayaj: “¡Maj ijkon mochiua!”.* Uan tayekananij motankuaketskej uan taueyichiujkej.

6 Nikitak keman Ichkatsin* kikixtij semej nejon chikome sellos uan nikakik ke semej naui ángeles kijtoj: “¡Ximonexti!”.* Uan tein kijtoj mokakik chikauak kemej ijkuak tatikuini. 2 Uan nikitak se istak caballo. Akin ipanko yaya kiuikaya se teisa tein ika kitamotaj flecha. Dios kimakak se corona uan kintamitanito akin kiixnamikij.

3 Keman Ichkatsin kikixtij ojpatika sello, nikakik ke ojpatika ángel kijtoj: “¡Ximonexti!”. 4 Uan nikitak ualaya okse caballo, chichiltik kemej tit.* Akin ipanko yaya kimakakej tanauatil para kichiuas maj moteuikan uan maj momijmiktikan akin nemij nikan taltikpak, uan kimakakej se ueyi machete tein ojkan tenej.*

5 Keman Ichkatsin kikixtij expatika sello, nikakik ke expatika ángel kijtoj: “¡Ximonexti!”. Uan nikitak se tiltik caballo. Akin ipanko yaya kipiaya imako se tatamachiualoni. 6 Tatajko kampa yetoyaj nejon naui ángeles, nikakik kemej yeskia aksa* kijtouaya: “Se kilo* trigo ipatiuj se denario* uan eyi kilo cebada ipatiuj se denario; amo xikauilo aceite nion vino”.

7 Keman Ichkatsin kikixtij naujpatika sello, nikakik ke naujpatika ángel kijtoj: “¡Ximonexti!”. 8 Uan nikitak se caballo ixapochiktik.* Akin ipanko yaya monotsaya Mikilis, uan Miketekoch* kitojtokatiaya. Uan taltikpak naujkan moxeloj uan kinmakakej tanauatil para taixyekanaskej itech se cacho para maj temiktikan ika se ueyak machete tein ojkan tenej,* ika mayan, ika se kokolis* uan maj kichiuakan maj koujtajtapialmej temiktikan.

9 Keman Ichkatsin kikixtij makuiltika sello, altartampa nikitak ininesyo* akin kinmiktijkej porin kitakamatkej itajtol Dios uan porin kiteixmatiltijkej. 10 Yejuan chikauak tsajtsiaj: “ToUeyi Teko, akin tiyektik uan timelauak, ¿hasta kemanian peuas tikintatsakuiltis akin nemij nikan taltikpak uan tikintaxtaualtis akin techmiktijkej?”. 11 Nochin yejuan kinmakakej se ueyak tasal tein pochiktik. No kiniluijkej maj moseuikanok tepitsin, hasta maj motamisentilikan nochin inintakeualikniuan uan ininikniuan akin yaya kinmiktitij kemej yejuan.

12 Uan nikitak keman Ichkatsin kikixtij chikuasentika sello. Chikauak talolinik, tonaltsin tileuik kemej se tiltik tasal,* uan metsti tamichichileuik kemej esti 13 uan sitalimej ualpantepeujkej nikan taltikpak, ijkon kemej tepeui higo tein selikok keman ejekat chikauak kitsetseloua higoskouit. 14 Iluikak motetekuinojtiaj kemej se amat uan ixpoliuik, uan nochin tepemej uan nochin talmej tein youaliujtokej ika ueyiat kinkixtijkej. 15 Uan akin tekiuajtij nikan taltikpak, akin kipiaj ueyi tanauatil, tayekankasoldados, tominpianij, uejueyi chiuanimej, nochin akin moajsij temako uan akin amo, mocholtijkej hasta itech tepekoyokmej uan tepejxitsalan. 16 Uan miakpa kiniluiayaj tepemej uan tepejximej: “Totech xiuetsikan uan xitechtatikan* para maj amo techita akin tokotsyetok itech ueyi silla uan para maj Ichkatsin amo technextili iueyi kualanyo, 17 porin ejkokya ueyi tonal keman kinextiskej ininueyi kualanyo, ¿uan akoni uelis makisas?”.

7 Satepan nikinitak naui ángeles ijkatoyaj naujkampa itech taltikpak. Kitsakuilijtoyaj naui tataman ejekamej para maj amo taejeka talixko, itech ueyiat uan maj ejekat amo kipitsa nion se kouit. 2 No nikitak okse ángel tein pankisaya desde kampa ualkisa tonaltsin. Maaktiaya se sello tein Dios kimakaka uan chikauak kintsajtsilij naui ángeles. Yejuan kinnauatijkaj maj kiuejuelokan taltikpak uan ueyiat. 3 Kiniluij: “¡Amo teyi xikchiuilikan taltikpak nion ueyiat nion koujmej hasta maj tikinixkuatalilikan se sello itakeualuan toDios!”.

4 Uan nikakik kanachin katkaj akin kintalilijkej sello: 144 mil akin pouij itech nochin uejueyi kalyetonij israelitas.

9 Satepan nikinitak tel miakej akin amo akaj uelia kinpouaya. Ualeuayaj itech nochin altepemej, uejueyi kalyetonij, xolalmej uan tajtouayaj tataman tajtolmej, uan ijkatoyaj iixpan ueyi silla uan iixpan Ichkatsin.* Takentiayaj ika ueyak tasal tein pochiktik uan maaktiayaj koujxiujmayit. 10 Uan chikauak tsajtsitoyaj: “¡ToDios akin tokotsyetok itech iueyi silla uan Ichkatsin, techmakixtijkej!”.

11 Nochin ángeles ijkatoyaj uan kiyoualojtoyaj ueyi silla, tayekananij uan naui ángeles. Uan motankuaketskej uan moixpilojkej hasta talpan iixpan ueyi silla uan kiueyichiujkej Dios. 12 Kijtojkej: “¡Maj ijkon mochiua!* ToDios akin semi tamatkej, akin semi chikauak uan nochi ueli kichiua, kinamiki maj kiueyichiuakan, maj kiueyitalikan, maj kitasojkamatilikan uan maj nochin kitakachiuakan* nochipaya. Maj ijkon mochiua”.*

13 Uan semej tayekananij nechtajtanij:* “¿Akonimej akin takentiouij ika ueyak tasal tein pochiktik? ¿Uan kani ualeujkej?”. 14 Yejua ika nimantsin niknankilij: “NoTekotsin, tejua tikmati”. Uan yejua nechiluij: “Yejuan akin makiskej keman mochiuak tetsaujkatajyouilis; uan ika iesyo Ichkatsin kipajpakkej ininueyak tasal uan kipochinaltijkej. 15 Yejua ika yetokej iixpan iueyi silla Dios uan kitekitiliaj youalintonal itech itemplo. Uan akin tokotsyetok itech ueyi silla kinyekpias.* 16 Amo kemanok kinpolos tein kikuaskej nion tein tayiskej; amo no tonaltataskej nion tel xiujtataskej. 17 Porin Ichkatsin tein yetok inakastan ueyi silla, kinyekpias kemej se ichkatajpixkej uan kinajxitis kampa mextok* at tein kichiua maj se nemi. Uan Dios kinuachilis nochi ininixayo”.

8 Keman Ichkatsin* kikixtij chikometika sello, tajko hora tatamatiak ne iluikak. 2 Uan nikinitak chikome ángeles tein ijkatokej iixpan Dios, uan kinmakakej chikome trompetas.

3 Ejkok okse ángel tein kiualkuia se tekolkaxit* tachijchiuj ika oro uan moketsak inakastan altar. Kimakakej miak kopal para kichichinos itech altar tachijchiuj ika oro. Nejin altar yetoya iixpan ueyi silla. Keman tapopochuijtoya, akin Dios moinxelouilij* kichiujtoyaj netataujtil. 4 Uan pokti tein kisaya keman ángel tapopochuijtoya ajsito iixpan Dios uan no ininnetataujtiluan akin Dios moinxelouilij.* 5 Sayoj ke ángel nimantsin kikuik tekolkaxit, kipexontij* ika tekol* tein yetoya itech altar uan kipantamotak tekol nikan taltikpak. Uan tatitikuinik, mokakik ke tajtouayaj, tapepetanik uan talolinik. 6 Uan chikome ángeles tein kipiayaj chikome trompetas moyejyektalijkej para tapitsaskej.

7 Yekinika ángel kipitsak itrompeta. Peuak uetsi nikan taltikpak tesiuit uan tit* tein maneliujtoya ika esti. Uan taltikpak exkan moxeloj uan se cacho tatak;* no kampa koujtaj exkan moxeloj uan se cacho tatak uan nochi tataman xiuit chichinauik.

8 Ojpatika ángel kipitsak itrompeta. Uan teisa tein tamatia kemej se ueyi tepet tein chichinaujtoya kipantamotkej itech ueyiat. Uan ueyiat exkan moxeloj uan se cacho mokepak esti; 9 Mikkej tel miak taman okuilimej tein nemiaj itech ueyiat,* uan tamiuejueliujkej tel miak barcos.*

10 Expatika ángel kipitsak itrompeta. Uan panuetsik de ne iluikak se ueyi sitalin tein xotatiualaya kemej se ueyi candil, uan nochin amej tein motalojtokej uan ameyalmej* exkan moxelojkej uan nejon sitalin uetsik itech se cacho de nejon amej. 11 Sitalin monotsaya Chichik xiuit.* Uan se cacho de nejon amej chichiyak. Miakej momikilijkej porin tayikej nejon at tein chichiyak.

12 Naujpatika ángel kipitsak itrompeta. Uan tonaltsin, metsti uan sitalimej exkan moxelojkej uan kikokojkej se cacho den tonaltsin, den metsti uan den sitalimej. Yejua ika, tileuiskiaj se cacho uan kemej naui hora tonayan amo tanestoskia uan no ijkon panoskia youak.

13 Nitachiak, uan nikakik se ueyi totot* tein patantoya ejekaixko uan chikauak kijtouaya: “¡Teikneltijkej akin nemij itech taltikpak porin semi tajyouiskej keman kinpitsaskej trompetas tein poliuij tein eyi ángeles kinpitsatijya!”.

9 Makuiltika ángel kipitsak itrompeta. Uan nikitak se sitalin tein ualpanuetska nikan taltikpak, uan Dios kimakak llave tein ika kitapos ueyi ostok* tein uejkatan. 2 In sitalin* kitapoj ueyi ostok* tein uejkatan, uan kisak pokti, kemej pokti tein kisa itech se ueyi tikomit. Tonaltsin uan ejekat tileujkej ika pokti tein kisaya itech ostok. 3 Itech pokti ualkiskej chapolimej tein pantemokej taltikpak, uan kinmakakej tanauatil, kemej tanauatil tein kipiaj alacranes nikan taltikpak. 4 Kinnauatijkej chapolimej maj amo teyi kichiuilikan sakat, nion xiuit nion koujmej, ta sayoj akin Dios amo kinixkuatalilij se sello.

5 Amo kinkaujkej chapolimej maj kinmiktikan akin nemij nikan taltikpak, ta maj kintajyouiltikan makuil metsti. Tetajyouiltiayaj kemej tetajyouiltia se alacrán keman tetipinia. 6 Itech nejon tonalmej, kitemoskej keniuj mikiskej, sayoj ke amo kiajsiskej keniuj; kitelnekiskej mikiskej, sayoj ke amo ueliskej.

7 Chapolimej tamatiaj kemej caballos tein yetokejya para tateuitiuij. Ininkuako kipiayaj teisa tein tamatia kemej se corona tachijchiuj ika oro, uan ininixko tamatia kemej iixko se takat. 8 Katkaj tsonueueyakej kemej siuamej uan inintanuan tamatiaj kemej itanuan se tekuani; 9 uan kinyolixtsakuaya se tepos. Ijkuak pataniaj ijkoyokayaj kemej ijkuak kakalakaj miak carros tein caballos kitilantiouij keman tateuitij. 10 Uan no, itech ininkuitapil kipiaj se uitsti, ijkon kemej alacranes; uan itech ininkuitapil kipiaj chikaualis para kintajyouiltiskej akin nemij nikan taltikpak makuil metsti. 11 Inintekiuaj yejua ángel tein tajpia itech ueyi ostok* tein uejkatan. Itech tajtol hebreo itokay Abadón,* uan itech tajtol griego Apolión.*

12 Yekinika ouijkayot panokya. ¡Xikitakan! Mochiuaskej omeok satepan ke mochiuas nejin.

13 Chikuasentika ángel kipitsak itrompeta. Uan nikakik aksa* ualtajtouaya kampa ualkijkisaj naui kuaomimej. Nejin kuaomimej yetokej itech altar tachijchiuj ika oro tein yetok iixpan Dios. 14 Kiluij chikuasentika ángel tein kipiaya trompeta: “Xikintojtoma naui ángeles tein ilpitokej* inakastan ueyiat Éufrates”. 15 Uan nejon naui ángeles, tein kichixtoyajya* nejon hora, tonal, metsti uan xiuit, kintojtonkej para maj kinmiktikan tel miakej.*

16 Nejua nikakik kanachi soldados yayaj ininpanko caballos: 200 millones. 17 Ijkuin moitayaj caballos uan akin yayaj ininpanko: kipiayaj teposkoton chichiltik kemej tit,* azultikej uan kostikej; inintsontekon caballos katkaj kemej inintsontekon tekuanimej uan itech ininxipoj kikisaya tit, pokti uan azufre. 18 Tel miakej kinmiktij* nejin eyi taman: tit,* pokti uan azufre tein kikisaya itech ininxipoj caballos. 19 Porin ininchikaualis caballos yetok itech ininxipoj uan itech ininkuitapil, porin ininkuitapil tamati kemej se kouat uan kipia itsontekon, uan ika ininkuitapil takojkokouaj.

20 Sayoj ke akin amo kinmiktij nejon eyi taman, amo moyolpatakej uan amo kinkaujkej tatadiosmej* tein kinmachijchiujkej. Yejuan kisentokakej kinueyichiujkej amokuali ejekamej uan tatadiosmej tein chijchiujtoyaj ika oro, plata, cobre, tet uan kouit, tein amo uelij tachiaj nion takakij nion nejnemij. 21 Amo moyolpatakej, ta kisentokakej temiktijkej, tanaualuijkej,* auilnenkej,* uan tachtektinenkej.

10 Nikitak okse chikauak ángel tein ualpantemouaya de ne iluikak uan takentiualaya ika* se mixti, uan kikuayoualouaya se arcoíris. Iixko katka kemej tonaltsin uan imetsuan katkaj kemej uejueyi kalikximej tein moitayaj kemej tit.* 2 Maaktoya se amatajkuiloltsin* tein kiixmelaujkaj. Pantaksak ika* iyekmets itech ueyiat uan ika iopochmets pantaksak itech tal. 3 Uan chikauak tsajtsik kemej ijkuak nanalka se tekuani. Uan keman tsajtsik, tajtojkej chikome tatikuinilot.

4 Keman nejon chikome tatikuinilot tajtojkej, nejua yaya nikijkuilotiya tein kijtojkej, sayoj ke nikakik ke aksa* ualtajtoj ne iluikak uan kijtouaya: “Xikeua* tein kijtojkej chikome tatikuinilot uan amo xikijkuilo”. 5 Ángel tein nikitak ke ijkatoya itech ueyiat uan itech tal, kiajokuik iyekmay ne iluikak 6 uan moyektenkauak itokaykopa akin nemi nochipaya uan amo keman miki, akin kichijchiuak iluikak uan tein ompa onkak, tal uan tein nikan onkak, uan ueyiat uan tein ompa onkak. Uan kijtoj: “Amo monekisok timochiaskej, 7 ta itech tonalmej keman chikometika ángel peuas kipitsas itrompeta, mochiuasya tein Dios amo kitematiltijtoya.* Yejua nejin kuali tanauatilmej* tein kinmatiltij tanauatianij* akin kitekitiliaj”.

8 Uan nikakik ke aksa ualtajtouaya ne iluikak uan oksepa nechnojnotsaya. Nechiluij: “Xikuiti amatajkuilol* tein ixtapotok tein maaktok ángel tein ijkatok itech ueyiat uan itech tal”. 9 Nejua nikajsito ángel uan nikiluij maj nechmaka amatajkuiloltsin. Uan yejua nechnankilij: “Xikui uan xikua. Tikyekos tsopek kemej nekti, sayoj ke mitspoxchichilis”. 10 Yejua ika nikuik amatajkuiloltsin tein maaktoya ángel uan nikuaj. Nikyekoj ke katka tsopek kemej nekti, sayoj ke keman niktoloj nipoxchichiyak. 11 Uan nechiluijkej: “Moneki oksepa tikteixmatiltis tein kinpanos xolalmej, altepemej, akin tajtouaj tataman tajtolmej uan miakej tekiuanij”.

11 Uan nechmakakej se akat tein tamatia kemej se takot tein ika se tatamachiua uan yejua nechiluij: “Ximoketsa uan xiktamachiua itemplo Dios, altar uan akin ompa taueyichiuaj. 2 Sayoj ke xikixpanaui kalixpan den templo uan amo xitatamachiua ompa, porin kinmaktilijkej akin pouij itech altepemej, uan yejuan kintajyouiltiskej akin pouij itech ueyi xolal tein yektik 42 metsti. 3 Nikchiuas maj ome notaixpantijkauan kiteixmatiltikan tein Dios kiniluis 1,260 tonalmej uan maj takentiakan ika tasal tein teajuayotia”. 4 Nejin taixpantinij kinixnextiaj ome olivojkouit uan ome tauilketsaloni, uan ijkatokej iixpan akin taixyekana itech taltikpak.

5 Komo aksa* kineki kinchiuilis teisa, inintenoj kisa tit* tein kinixpoloua akin kintauelitaj. Ijkon moneki mikis akin kinekis kinchiuilis teisa. 6 Yejuan kipiaj tanauatil para tatsakuaskej ne iluikak uan kichiuaskej maj amo kioui itech tonalmej keman kiteixmatiltiskej tein Dios kiniluis. No kipiaj tanauatil para kichiuaskej maj at mokepa esti uan maj mochiua miak taman tein amo kuali nikan taltikpak nochipa keman kinekiskej.

7 Keman kitamiteixmatiltiskej tein Dios kiniluis, koujtajtapial tein ualkisa itech ueyi ostok* tein uejkatan kinteuis, kintanis uan kinmiktis. 8 Ininnakayo uetstos itech ueyi ojti tein kipia ueyi xolal kampa ininTeko no kikoujpampilojkej, uan Sodoma uan Egipto kiixnextiaj nejin ueyi xolal. 9 Akin pouij itech tataman xolalmej, uejueyi kalyetonij, akin tajtouaj tataman tajtolmej uan akin pouij itech tataman altepemej, kiitstoskej ininnakayo nejon akin kinmiktijkej eyi tonal uan tajko, uan amo kinkauaskej maj kintokakan. 10 Uan akin nemij nikan taltikpak yolpakiskej uan iluitiskej porin kinmiktijkej uan motatayokoliskej miak taman se iuan okse, porin nejin ome tanauatianij* kintajyouiltijkaj akin nemij nikan taltikpak.

11 Keman panok nejon eyi tonal uan tajko, Dios kichiuak maj oksepa nemikan,* uan yejuan moketskej. Akin kinitakej motelmoujtijkej. 12 Uan yejuan kikakkej ke aksa chikauak ualtajtouaya ne iluikak uan kiniluiaya: “Xiualpankisakan”. Uan pankiskej ne iluikak itech se mixti, uan akin kinixnamikiaj kinitakej.* 13 Itech nejon hora chikauak talolinik. Ueyi xolal moxeloj itech majtakti cachos uan xixitikak se cacho uan chikome mil momikilijkej keman talolinik. Oksekin semi mojkakalakkej uan kiueyitalijkej Dios akin yetok ne iluikak.

14 Ojpatika ouijkayot panokya. ¡Xikitakan! Expatika ouijkayot ejkotokya.

15 Chikometika ángel kipitsak itrompeta. Uan mokakik ke chikauak tajtouayaj ne iluikak. Kijtouayaj: “Axkan Dios uan iCristo taixyekantokejya itech nochi taltikpak, uan yejua taixyekanas kemej tekiuaj nochipaya”.

16 Nochin 24 tayekananij akin tokotsyetoyaj itech ininueyi silla iixpan Dios motankuaketskej uan moixpilojkej hasta talpan uan kiueyichiujkej Dios. 17 Kijtojkej: “Timitstasojkamatiliaj toDios Jehová,* akin tikpia nochi chikaualis, akin axkan tinemi uan akin achto ipa tinemia, porin tikuik moueyi chikaualis uan peuakya titaixyekana kemej tekiuaj. 18 Sayoj ke akin pouij itech altepemej semi kualankej, uan tikinnextilij moueyi kualanyo. Uan ejkok tonal tein ixyetok para tikixtalis tein kinnamiki kiseliskej mikemej uan tikintaxtauis tanauatianij akin mitstekitiliaj, akin timoinxelouilij* uan akin kimojkatokaj motokay (akin ueyichiuanimej uan akin amo), uan para tikinixpolos akin kiixpolojtokej taltikpak”.

19 Uan tapouik itemplo Dios ne iluikak uan moitak tatiochiualkaxon* itech itemplo. Uan tapepetanik, mokakik ke tajtouayaj, tatitikuinik, talolinik uan chikauak tesiuik.

12 Moitak ne iluikak se ueyi taman tein kiixnextia teisa: se siuat mokentijtoya tonaltsin, metsti yetoya imetstampa uan kuaaktoya se corona tein kipiaya 12 sitalimej. 2 Kokoxkayetoya, uan kemej yaya tayolititiya, chikauak tsajtsia porin semi tajyouijtoya.

3 Uan ne iluikak moitak okse taman tein kiixnextia teisa: nesiko se ueyi kouat tamouilil, chichiltik kemej tit.* Kipiaya chikome itsontekonuan uan majtakti ikuaomiyouan uan itech itsontekonuan kipiaya chikome coronas. 4 Sitalimej exkan moxelojkej uan ika ikuitapil kinkuitikisak se cacho de nejon sitalimej uan kinualpantamotak nikan taltikpak. Uan ueyi kouat tamouilil ijkatoya iixpan siuat akin yaya tayolititi, ijkon keman tayolitiskia kikualiskia ikonetsin.

5 Siuat kiyolitij se okichpiltsin akin kinixyekanas* akin pouij itech nochin altepemej ika se takot tachijchiuj ika tepos. Nimantsin keman konetsin yolik, kiuikilijkej Dios akin yetok itech iueyi silla. 6 Uan siuat choloj uan yajki taluakyan, kampa Dios kitakauilijkaya uan kampa kitamakaskiaj 1,260 tonalmej.

7 Uan peujkej moteuiaj ne iluikak. Miguel* uan iangeluan moteuijkej iuan ueyi kouat tamouilil. Uan ueyi kouat tamouilil uan iangeluan no moteuijkej, 8 sayoj ke amo tatankej,* uan amo kinkaujkejok maj yetokan ne iluikak. 9 Yejua ika kiualpantamotkej ueyi kouat tamouilil. Yejua yekinika kouat* tein kiluiaj Amokuali uan Satanás, tein kinkajkayaujtok nochin akin nemij nikan taltikpak. Kiualpantamotkej nikan taltikpak uan iangeluan no kinualpantamotkej iuan. 10 Uan nikakik ke aksa* chikauak kijtouaya ne iluikak:

“¡Axkan Dios kinmakixtij akin nemij taltikpak uan kinextijya ichikaualis. Peuakya taixyekana, uan iCristo peuakya kikui itanauatil! Porin kipantamotkejya akin kinteluilia tokniuan uan kintakajkayauilia youalintonal iixpan toDios. 11 Yejuan kitankej porin kinpaleuij iesyo Ichkatsin* uan no tein kiteixmatiltijkej, uan yejuan amo moujkej mikiskej* nion keman kiitayaj ke mikitijya. 12 Yejua ika, ¡xiyolpakikan akin nanemij ne iluikak! Sayoj ke ¡teikneltij taltsin uan ueyiat! Porin Amokuali pantemok kampa nanyetokej uan semi kualantok porin kimati ke amo uejkauatiok”.

13 Keman ueyi kouat tamouilil kiitak ke kiualpantamotkej nikan taltikpak, kiikantokak siuat akin yekin kiyolitijka okichpiltsin. 14 Sayoj ke siuat kimakakej ome ajtapalmej kemej tein kipia se ueyi totot* para maj patani hasta taluakyan, kampa Dios kitakauilij, kampa moneki kitamakaskej eyi xiuit uan tajko* uan kouat amo kiajsis.

15 Uan kouat kikanpeyauak miak at iikampa siuat, kemej se ueyiat para maj moaeltsimiani. 16 Sayoj ke tal kipaleuiko siuat. Nejon tal motapoj uan kitoloj at tein ueyi kouat tamouilil kikanpeyauak. 17 Yejua ika ueyi kouat tamouilil semi kitauelitak siuat uan kinteuito ikoneuan akin mokauajok. Yejuan akin kitakamatij itanauatiluan Dios uan kiteixmatiltiaj Jesús.

13 Yejua* ijkatoya itech xal ompa ueyiatenoj.

Uan nikitak se koujtajtapial tein kisaya den ueyiat. Kipiaya majtakti ikuaomiyouan uan chikome itsontekonuan. Uan itech ikuaomiyouan kipiaya majtakti coronas uan itech itsontekonuan ijkuiliujtoya tokaymej tein ika kiuijuikaltiaj* Dios. 2 Koujtajtapial tein nikitak tamatia kemej se koujtajmiston,* sayoj ke imetsuan katkaj kemej imetsuan se oso uan ixipoj kemej ixipoj tekuani. Uan ueyi kouat tamouilil kimakak koujtajtapial ichikaualis, iueyi silla uan ueyi tanauatil.

3 Nikitak ke semi kikokojkaj itech semej itsontekonuan, uan maski ueliskia mikis, pajtik. Uan nochin kimojkaitakej uan kitojtokakej koujtajtapial. 4 Kiueyichiujkej ueyi kouat tamouilil porin yejua kimakak tanauatil koujtajtapial uan kiueyichiujkej koujtajtapial ijkuin: “¿Akoni kemej koujtajtapial? ¿Uan akoni uelis iuan moteuis?”. 5 Kimakakej tanauatil para maj kijto miak taman tein ika moueyichiuaya uan tauijuikaltiaya* uan no kimakakej tanauatil 42 metsti para kichiuas tein kinekis. 6 Uan koujtajtapial peuak kiuijuikaltia Dios, itokay, kampa nemi Dios uan akin nemij iluikak. 7 Kikaujkej maj kinteui akin Dios moinxelouilij* uan maj kintani uan kimakakej tanauatil para kinixyekanas nochin akin pouij itech tataman uejueyi kalyetonij, tataman ininxolal, akin tajtouaj tataman tajtolmej, uan tataman ininaltepeuj. 8 Uan nochin akin nemij nikan taltikpak kiueyichiuaskej. Inintokay amo ijkuiliujtok itech iamatajkuilol* Ichkatsin* tein kimiktijkej. Itech nejon amatajkuilol ixnesij akin nemiskej. Ijkon mochiuani desde keman peuak yolij akin nemij nikan taltikpak.

9 Komo aksa* kipia inakas, maj takaki. 10 Komo aksa moneki kitsakuaskej, kitsakuaskej. Komo aksa temiktia* ika machete tein ojkan tenej,* kimiktiskej ika machete. Yejua ika akin Dios moinxelouilij* moneki taxikoskej uan takuaujtamatiskej.

11 Nikitak okse koujtajtapial tein pankisaya talixko. Kipiaya ome ikuaomiyouan kemej tein kipia ichkaueuet, sayoj ke peuak tajtoua kemej se ueyi kouat tamouilil. 12 Kinextia iixpan ke kipia nochi tanauatil tein kipiaya yekinika koujtajtapial. Kichiua maj nochin kiueyichiuakan yekinika koujtajtapial tein pajtik maski semi takokol katka. 13 Uan kichiua uejueyi milagros; hasta kichiua maj uetsi tit* de ne iluikak hasta nikan taltikpak ininixpan nochin.

14 Kinkajkayaua akin nemij nikan taltikpak ika milagros tein kikaujkej maj kichiua iixpan yekinika koujtajtapial, uan no kiniluia akin nemij nikan taltikpak maj kichijchiuilikan yekinika koujtajtapial se itaixkopin tamachijchiuj. Nejin yejua koujtajtapial tein kimiktijtoyajya ika machete* sayoj ke moyolkuik. 15 Uan kikaujkej maj kijyomaka itaixkopin tamachijchiuj yekinika koujtajtapial, para maj nejon taixkopin tamachijchiuj tajtouani uan maj kichiuani maj kinmiktikan nochin akin amo kinekiskej kiueyichiuaskej.

16 Uan kinnauatia nochin, akin ueyichiuanimej uan akin amo, akin tominpiaj uan akin pobres, akin moajsij temako uan akin amo, ke moneki kinneskayotiskej ininyekmakopa oso ininixkuako 17 para maj amo akin ueli takoua oso tanamaka, ta sayoj akin kinneskayotijkej ika itokay koujtajtapial oso itapoual. 18 Sayoj akin tamattok uelis kiajsikamatis nejin: akin kuali taixejekoua, maj kiixejeko itapoual koujtajtapial, porin itapoual mokui nikan taltikpak; itapoual yejua 666.

14 Uan nikitak Ichkatsin* ijkatoya itech tepet Sion, uan iuan yetoyaj 144 mil akin ininixkuako ijkuiliujtoya itokay Ichkatsin uan itokay iTajtsin. 2 Nikakik ke teisa kakistia ne iluikak; mokakia kemej ijkuak miak at ijkoyoka uan kemej ijkuak chikauak tatikuini. Tein nikakik kakistia kemej ijkuak mokuikatiaj* akin kitsotsonaj arpa. 3 Tein yejuan mokuikatijtoyaj iixpan ueyi silla, ininixpan naui ángeles uan tayekananij, mokakia kemej se yankuik tatsotson. Amo akin kuali kimatia keniuj yaya nejon tatsotson, ta sayoj 144 mil akin pouiaj nikan taltikpak uan kinkoujkej. 4 Yejuan akin amo mopitsotilijkej iniuan siuamej; tein melauj, amo akin iuan motekanij.* Kitojtokatinemij Ichkatsin kampa yeski. Pouiaj nikan taltikpak uan kinkoujkej kemej yekinika takilot tein kimaktiliaj Dios uan Ichkatsin. 5 Amo takajkayaujkej uan amo kipiaj nion teyi tein amo kuali.

6 Nikitak okse ángel tein patantoya ejekaixko. Yejua kinixmatiltijtoya akin nemij itech taltikpak kuali tanauatilmej* tein amo keman ixpoliuij: nochin akin pouij itech tataman altepemej, itech tataman uejueyi kalyetonij, akin tajtouaj tataman tajtolmej uan tataman ininxolal. 7 Chikauak kijtouaya: “Xikmojkatokakan Dios uan xikueyitalikan porin ejkokya tonal keman tetatsakuiltis. Yejua ika xikueyichiuakan akin kichijchiuak iluikak, taltikpak, ueyiat uan ameyalmej”.*

8 Satepan nesik se ojpatika ángel, tein kijtouaya: “¡Tapolojya! ¡Ueyi Babilonia tapolojya! Nejon akin kichiuak maj nochin altepemej tayikan ivino tein kichiua maj kitelnekikan auilnemiskej”.*

9 No nesiko se expatika ángel uan chikauak kijtouaya: “Komo aksa* kiueyichiua koujtajtapial uan itaixkopin tamachijchiuj uan kineskayotiaj iixkuako oso imako, 10 no tayis ivino Dios, tein kiixnextia iueyi kualanyo. Nejon vino amo maneliujtok ika okse tayil, uan Dios kipantekas itech icopa kampa kitalia iueyi kualanyo, uan kitajyouiltiskej ika tit* uan azufre, ininixpan ángeles tein yektikej uan iixpan Ichkatsin. 11 Pokti tein kikixtia tit* tein kintajyouiltis pankistos nochipaya. Uan akin kiueyichiuaj koujtajtapial uan itaixkopin tamachijchiuj uan akin kinneskayotiaj ika itokay, youalintonal tajyouijtoskej. 12 Yejua ika akin Dios moinxelouilij* moneki taxikoskej. Yejuan akin kitakamatij itanauatiluan Dios uan takuaujtamatij iuan* Jesús”.

13 Uan nikakik ke aksa ualtajtoj ne iluikak uan kijtouaya: “Xikijkuilo nejin: ‘Yolpakij akin pouij iuan toTekotsin uan desde axkan momikiliaj; Dios kijtoua ika ichikaualis, kemaj, maj moseuikan porin chikauak tekitikej, porin tein kichiujkej amo moelkauas’”.*

14 Nikitak se istak mixti, uan ompa tokotsyetoya se akin tamatia kemej se akin yolik kemej takat; itech itsontekon kiuikaya se corona tachijchiuj ika oro, uan maaktoya se tepos tein semi tenej.

15 Okse ángel kisak den templo uan chikauak kitsajtsilij akin tokotsyetoya itech mixti: “¡Xikui tepos tein semi tenej uan xiksentili tatok. Ejkokya hora keman moneki se kisentilis tatok, porin tatok tein motemakak tamichikauayakya!”. 16 Uan akin tokotsyetoya itech mixti, peuak kisentilia tatok tein mochiuak itech taltikpak ika se tepos tein semi tenej.

17 Okse ángel kisak den templo tein yetok ne iluikak; yejua no kipiaya se tepos tein semi tenej.

18 Uan den altar kisak okse ángel, tein kipiaya tanauatil itech tit.* Uan chikauak kiluij akin kipiaya tepos tein semi tenej: “¡Xikui tepos tein semi tenej uan xikmateki uvajkouit tein mochiuak itech taltikpak uan xiksentili, porin uvas yoksikejya!”. 19 Ángel kikalakij tepos tein semi tenej itech taltikpak uan kitekik uvajkouit, uan kitamotak itech ueyi tekoch kampa kipatskaj uvas tein kiixnextia iueyi kualanyo Dios. 20 Caballos kimetspatskakej uvas ne ueyi xolaltenoj, uan peuak kisa esti itech ueyi tekoch uan ajsik hasta ininxipoj caballos, uan sentakuik* kemej 296 kilómetros.*

15 Nikitak ne iluikak okse ueyi taman tein kiixnextia teisa tein semi se kimojkaita: chikome ángeles kiuikayaj chikome tetsaujmej. Ika nejin tamij nochin tetsaujmej, porin ika nejon tamis iueyi kualanyo Dios.

2 No nikitak kemej se ueyiat tein tamatia kemej teskat tein maneliujtoya ika tit* uan no nikinitak akin kitankaj koujtajtapial uan itaixkopin tamachijchiuj, akin amo kinneskayotijkaj ika tapoual tein kipia itokay. Yejuan ijkatoyaj inakastan ueyiat tein tamatia kemej teskat; uan ininmako kipiayaj arpas tein iaxka Dios. 3 Mokuikatijtoyaj* itatsotson Moisés, itakeual Dios uan no itatsotson Ichkatsin.* Kijtouayaj:

“Jehová* Dios, akin tikpia nochi chikaualis, nochi tein tikchiua semi ueyi uan semi tikmojkaitaj. Tekiuaj akin nochipa tiyoltok, nochipa tikchiua tein kuali yetok uan titakuaujtamach.* 4 Jehová,* ¿akoni amo mitsmojkatokas? ¿Akoni amo kiueyitalis motokay? Ta sayoj tejua amo titekaua. Akin pouij itech nochin altepemej ualaskej moixpan uan mitsueyichiuaskej porin kimatkejya ke tein tikixtalia kuali yetok”.

5 Satepan nikitak nejin: ne iluikak peuak tapoui kampa okachi yektik itech takenkal kampa yetok tein Dios kiteixmatiltij. 6 Uan de kampa okachi yektik kiskej chikome ángeles tein kiuikayaj chikome tetsaujmej. Takentiayaj ika linojtasal tein chipauak uan milinia, uan yolixilpitoyaj* ika se tasal* tachijchiuj ika oro. 7 Semej naui ángeles kinmakak nejon chikome ángeles chikome kaxit tachijchiuj ika oro tein pexontoya* ika iueyi kualanyo Dios, akin nemi nochipaya uan amo keman miki. 8 Uan kampa okachi yektik pexonik ika pokti porin Dios kinextij ikualtsinyo uan ichikaualis. Amo akin uelia kalakia kampa okachi yektik hasta maj chikome ángeles kitamipantoyauanij nejon chikome tetsaujmej.

16 Nikakik ke aksa* chikauak ualtajtouaya de kampa okachi yektik uan kiniluiaya chikome ángeles: “Xiakan uan xiktoyauakan itech taltikpak iueyi kualanyo Dios tein yetok itech chikome kaxit”.

2 Yekinika ángel yajki uan kipantoyauak talixko tein kipiaya kaxit. Uan akin kinneskayotijkaj ika itokay koujtajtapial uan kiueyichiuayaj itaixkopin tamachijchiuj, kinkuik se ueyi tetsaujkakokot tein semi kinkokoj uan semi kintajyouiltij.

3 Ojpatika ángel kipantoyauak itech ueyiat tein kipiaya kaxit. Uan ueyiat mokepak esti kemej iesyo se miket uan mikik nochi tein nemia itech ueyiat.

4 Expatika ángel kipantoyauak tein kipiaya kaxit itech amej tein motalojtokej uan itech ameyalmej.* Uan at mokepak esti. 5 Uan nikakik ángel tein kipia tanauatil itech at, kijtoj: “Tejua, akin axkan tinemi uan akin achto ipa tinemia, akin amo titekaua, tiyolmelauak porin tikixtalij nejin. 6 Kemej yejuan kinmiktijkej akin Dios moinxelouilij* uan tanauatianij,* tejua tikintayiltij esti porin motemolijkej”. 7 Uan nikakik ke aksa ualtajtoj den altar uan kijtoj: “Kemaj, Jehová* Dios, akin tikpia nochi chikaualis, tein tikixtalia melauak uan kuali yetok”.

8 Naujpatika ángel kipantoyauilij tonaltsin tein kipiaya kaxit. Uan kikaujkej tonaltsin maj kinchichino akin nemij nikan taltikpak. 9 Uan yejuan tonaltatakej. Maski ijkon, kiuijuikaltijkej* itokay Dios, akin ueli kichiua maj onka nejin tetsaujmej, uan amo moyolpatakej nion kiueyitalijkej.

10 Makuiltika ángel kipantoyauilij tein kipiaya kaxit iueyi silla koujtajtapial. Uan nochi kampa taixyekana tayouayantiak. Akin nemij nikan taltikpak peuak monenepilkejtsomaj porin amo kixikouayaj tein kinkokouaya. 11 Maski ijkon, amo kikaujkej tein amo kuali tein kichiuayaj uan kiuijuikaltijkej Dios akin yetok ne iluikak porin semi tajyouiayaj uan porin kipiayaj kokomej.

12 Chikuasentika ángel kipantoyauilij ueyiat Éufrates tein kipiaya kaxit. Uan ueyiat uakik uan motapoj se ojti kampa panoskej tekiuanij akin uitsej de kampa ualkisa tonaltsin.

13 Uan nikitak ueyi kouat tamouilil, koujtajtapial uan tanauatijkej tein amo melauak. Uan sejse kijtoj se taman* tein pitsotik tein tamatia kemej kalamej tein ualkisayaj inintenoj. 14 Tein melauj, amokuali ejekamej kichiuaj maj kijtokan nejon uan nejon tajtolmej kichiuaj milagros; kinmatiltiaj akin tekiuajtij itech nochi taltikpak uan ijkon kinsentiliskej para maj moteuikan itech iueyi tonal Dios, akin kipia nochi chikaualis.

15 “¡Xikaki! Niualas kemej se tachtekkej. Yolpaki akin ijsatok* uan takentok, para maj amo xipetsnentinemi* uan mopinaujtis keman kiitaskej”.

16 Uan kinsentilijkej tekiuanij kampa motanotsa Armagedón* itech tajtol hebreo.

17 Chikometika ángel kipantoyauak ejekaixko tein kipiaya kaxit. Uan aksa chikauak ualtajtoj de kampa okachi yektik, kampa yetok ueyi silla uan kijtoj: “¡Motamichiuakya!”. 18 Uan tapepetanik, mokakik ke tajtouayaj, tatitikuinik uan chikauak talolinik kemej amo keman ijkon mochiujtoya desde ijkuak Dios kichijchiuak yekinika takat. Noyan* talolinik uan semi chikauak momachilij. 19 Ueyi xolal exkan moxeloj uan ixpoliujkej uejueyi xolalmej tein pouij itech nochin altepemej; uan Dios kielnamikik Ueyi Babilonia uan kimakak copa tein kipia vino tein pexontok* ika iueyi kualanyo. 20 Uan no, nochin talmej tein youaliujtokej ika ueyiat cholojkej uan tepemej ixpoliujkej. 21 Uan akin nemij nikan taltikpak inintech uetsik uejueyi tet kemej tesiuit. Sejse tet etik katka kemej 20 kilos.* Uan yejuan kiuijuikaltijkej* Dios porin tesiuit semi tauejueloj, porin semi ueyi katka nejon tetsauit.

17 Semej chikome ángeles tein kipiayaj chikome kaxit nechiluiko: “Xiuiki, nimitsnextiliti keniuj kitatsakuiltitij siuaauilnenkej tein taixyekantok uan motalia itech miak at. 2 Akin tekiuajtij itech nochi taltikpak auilnenkej* iuan nejon siuat, uan akin nemij nikan taltikpak mouintijkej ika ivino tein kichiua maj kitelnekikan auilnemiskej”.*

3 Uan ika ichikaualis Dios, nejon ángel nechuikak taluakyan. Uan nikitak se siuat tein tokotsyetoya ipanko se koujtajtapial chichiltik tein petani. Nejon koujtajtapial kitamipiaya tokaymej tein ika kiuijuikaltiaj* Dios uan kipiaya chikome itsontekonuan uan majtakti ikuaomiyouan. 4 Siuat takentiaya ika moradojtasal uan ika tasal chichiltik tein petani uan chijchiujtiaya ika oro, tetsitsin tein patiyojkej uan tetsitsin tein kualtsitsin. Maaktoya se copa tachijchiuj ika oro tein pexontoya* ika miak taman tein tetajyaltij uan tein pitsotik tein ika kichiua maj iuan auilnemikan.* 5 Iixkuako ijkuiliujtoya se tokayit tein amo akin kiajsikamati: “Ueyi Babilonia, ininnan nochin siuaauilneminij uan nochi tein tetajyaltij tein mochiua itech taltikpak”. 6 Uan nikitak ke siuat uintitoya ika ininesyo akin Dios moinxelouilij* uan ika ininesyo itaixpantijkauan Jesús.

Semi nikmojkaitak nejon siuat. 7 Yejua ika ángel nechiluij: “¿Keyej tikmojkaita? Nimitstapouiti tein amo akin kimati de nejin siuat uan koujtajtapial tein kiuika, tein kipia chikome itsontekonuan uan majtakti ikuaomiyouan. 8 Koujtajtapial tein tikitak achto yetoya nikan, sayoj ke axkan amo yetokok, uan maski ijkon ualkisatia den ueyi ostok* tein uejkatan, uan kiixpolotijya. Akin nemij itech taltikpak, kimojkaitaskej keniuj koujtajtapial tein achto yetoya sayoj ke axkan amo yetokok, oksepa nesikiuj. Inintokay amo ijkuiliujtok itech amatajkuilol* kampa ixnesij akin nemiskej. Ijkon mochiuani desde keman peuak yolij akin nemij itech taltikpak.

9 ”Sayoj akin tamattok uelis kiajsikamatis nejin: Chikome itsontekonuan koujtajtapial kiixnextiaj chikome tepemej, kampa motalia nejon siuat. 10 Yetokej chikome tekiuanij: makuil tapolojkejya, se taixyekantokok uan okse ayamo nesi; sayoj ke ijkuak nesis amo uejkauas. 11 Uan koujtajtapial tein achto yetoya nikan, sayoj ke axkan amo yetokok, yejua chikueyitika tekiuaj: ualkisak den chikome tekiuanij uan kiixpolotijya.

12 ”Majtakti kuaomimej tein tikitak kiixnextiaj majtakti tekiuanij tein ayamo ixyetok kani tekiuajtiskej, sayoj ke kemaj kinmakaskej tanauatil para taixyekanaskej iuan koujtajtapial sayoj se hora. 13 Yejuan kiixtalijtokej sayoj se taman.* Yejua ika kimakaj koujtajtapial ininchikaualis uan inintanauatil. 14 Iuan moteuiskej Ichkatsin,* sayoj ke Ichkatsin kintanis porin yejua ininTeko uejueyi chiuanimej uan ininTekiuaj akin taixyekanaj kemej tekiuanij. Akin iuan yetokej no tataniskej. Yejuan akin Dios kinnotsak, akin kinijitak* uan akin amo kikauaj”.

15 Yejua nechiluij: “At tein tikitak, kampa tokotsyetoya siuaauilnenkej, kinixnextia xolalmej, oloch takamej uan siuamej, altepemej uan akin tajtouaj tataman tajtolmej. 16 Majtakti kuaomimej tein tikitak uan koujtajtapial kitauelitaskej siuaauilnenkej uan kitamikuiliskej nochi tein kipia uan kixipetsoskej.* Kikuaskej inakayo uan kitamichichinoskej. 17 Porin Dios kichiuak maj kiyolnemilikan kichiuaskej tein kisenixtalijtokej,* sayoj ke tein melauj kichiuaskej tein Dios kinemilijtok, uan kimakaskej koujtajtapial nochi inintanauatil kemej tekiuanij hasta maj motamichiua tein Dios kijtoj. 18 Uan siuat tein tikitak kiixnextia ueyi xolal tein kinixyekana kemej tekiuaj nochin tekiuanij itech taltikpak”.

18 Satepan nikitak okse ángel tein ualpantemouaya de ne iluikak ika ueyi tanauatil, uan ika iueyi kualtsinyo kitauilij nochi taltikpak. 2 Yejua chikauak kijtoj: “¡Tapolojya! ¡Ueyi Babilonia tapolojya! Axkan ompa motatiaj* amokuali ejekamej, kampa teichtakauisnekij nochin ángeles tein amo yolkualmej* uan nochin totomej tein pitsotikej uan tein amo se kinitstani. 3 Porin nochin altepemej mouintijkej ika ivino tein kichiua maj kitelnekikan auilnemiskej;* akin tekiuajtij itech nochi taltikpak auilnenkej iuan nejon siuat, uan tanamakanij de nochi taltikpak semi motomintijkej porin nejon siuat kisentilij miak taman tein patiyoj. Uan amo ixpinauak kisentilis nochi nejon”.

4 Uan nikakik okse aksa* ualtajtoj de ne iluikak uan kijtouaya: “Namejuan akin nanpouij itech noxolal, xikisakan de ompa komo amo nankinekij iuan namotajtakolmakaskej uan komo amo nankinekij maj no namopan uetsi tetsaujmej tein ipan uetsis. 5 Porin itajtakoluan amo ueli se kinpoua porin tel miakej,* uan Dios kitatsakuiltis porin kichiuak miak taman tein amo kuali. 6 Xikchiuilikan ijkon kemej kichiuak. Kemaj, xikmakakan okse achiok ke nochi tein kichiuani. Itech copa kampa kimaneloj itayil, xikmanelouilikan se tayil tein okachi chikauak. 7 Ijkon kemej yejua semi moueyitalij uan amo ixpinauak kisentilis miak taman tein patiyoj, no moneki semi tajyouis uan chokas. Porin yejua kisentoka moyoliluia: ‘Nejua nitaixyekana kemej tekiuaj; amo nisiuakaual, uan amo keman nichokas’. 8 Yejua ika, itech sayoj se tonal kiejkos tetsaujmej, ixpoliuis, chokas uan mayanpanos, uan kitamichichinoskej. Porin Jehová* kitatsakuiltij. Yejua Dios akin semi chikauak.

9 ”Akin tekiuajtij itech nochi taltikpak auilnenkej* iuan nejon siuat uan moyolpaktijkej ika nochi taman tein kisentilij uan amo ixpinauak. Keman yejuan kiitaskej pokti keman tatatos,* chokaskej uan semi tayokoyaskej* porin kiitaskej tein kipanos. 10 Ijkatoskej uan kiuejkaitstoskej porin mouiskej maj no kintatsakuiltikan kemej yejua. Kijtoskej: ‘¡Semi titeikneltij! ¡Semi titeikneltij, tejua, ueyi xolal Babilonia, tein semi tichikauak! ¡Porin itech sayoj se hora mitstatsakuiltijkej!’.

11 ”Uan no, tanamakanij de nochi taltikpak kitayokolchokiliskej porin amo akajok kinkouilis nochi tein kinamakaj: 12 oro, plata, tetsitsin tein patiyojkej, tetsitsin tein kualtsitsin, linojtasal tein tel kuali chijchiujtok, moradojtasal, tasal tachijchiuj ika seda uan tasal chichiltik tein petani; miak taman tein chijchiujtok ika kouit tein ajuiyak, ika itenomiyo elefante, ika koujmej tein semi patiyojkej, cobre, tepos uan tet tein monotsa mármol; 13 uan no amo akajok kinkouilis canela, xiujtsin tein ajuiyak,* kopal, aceite tein kualtsin ajuiyak, istak kopal, vino, aceite, harina tein okachi kuali, trigo, kuakuejmej, ichkamej,* caballos, koujcarros, takeualmej uan oksekin. 14 Kemaj, nochi tein tel kuali tein tiktelnekia mitskuilijkejya uan tikpolojya nochi tein semi uelik tein monamaka uan tein semi kualtsin. Amo keman tikpiasok.

15 ”Akin kinamakayaj nochi nejin, akin ika motomintijkej, ijkatoskej uan kiuejkaitstoskej porin mouiskej maj no kintatsakuiltikan kemej yejua. Chokaskej uan motayokoltiskej 16 uan kijtoskej: ‘¡Semi teikneltij! ¡Semi teikneltij ueyi xolal, tein takentok ika linojtasal tein tel kuali chijchiujtok, ika moradojtasal uan tasal tein chichiltik tein petani, motalilij miak oro, tetsitsin tein patiyojkej uan tetsitsin tein kualtsitsin! 17 ¡Porin itech sayoj se hora ixpoliuik uejueyi taman tein patiyoj!’.

”Uan nochin akin taixyekanaj itech barcos, nochin akin youij itech barcos uan nochin akin ompa tekitij, ijkatoyaj uan kiuejkaitstoyaj. 18 Uan keman kiitstoyaj pokti keman tatatoya,* tsajtsiaj: ‘¡Amo onkak se xolal kemej nejin ueyi xolal!’. 19 Mokuatemiliayaj talnex, chokayaj, motayokoltiayaj uan tsajtsiaj: ‘¡Semi teikneltij! ¡Semi teikneltij ueyi xolal! ¡Ika nochi tein kipiaya, ompa motomintijkej akin kipiayaj barcos itech ueyiat! ¡Porin itech sayoj se hora kiixpolojkej!’.

20 ”Xiyolpakikan namejuan akin nanemij ne iluikak, namejuan akin Dios namechxeloj,* tatitanilmej uan tanauatianij,* ¡xiyolpakikan porin kiixpolojkejya! Dios kitatsakuiltijya porin namechchiuilij miak taman”.

21 Uan se chikauak ángel kiajokuik se tet tein tamatia kemej se ueyi tet tein ika takuechouaj uan kipantamotak itech ueyiat uan kijtoj: “Ijkon kipantamotaskej ueyi xolal Babilonia uan senkis ixpoliujtiuetsis. 22 Ompa Babilonia amo kemanok mokakis keniuj mokuikatiaj* akin kitsotsonaj ininarpas, nion akin tatsotsonaj, kipitsaj flauta oso trompeta. Amo kemanok yetos ompa nion se tamachijchiujkej. Amo kemanok ompa mokakis keniuj kakisti ueyi tet tein ika takuechouaj. 23 Amo kemanok ompa tauis nion se candil nion mokakisok keniuj tajtoua se novio oso se novia. Porin tanamakanij akin ompa nemiaj yejuan akin okachi tominpiayaj nikan taltikpak uan porin kinkajkayauak akin pouij itech nochin altepemej ika tataman naualot. 24 Kemaj, itech nejon ueyi xolal kiajsikej ininesyo tanauatianij, akin Dios moinxelouilij* uan ininesyo nochin akin kinmiktijkej nikan taltikpak”.

19 Satepan nikakik kemej yeskia tel miakej chikauak tajtouayaj ne iluikak. Yejuan kijtouayaj: “¡Xikueyitalikan Jah!* ToDios temakixtia, semi chikauak uan kinamiki maj kiueyitalikan, 2 porin nochi tein kiixtalia melauak uan kuali yetok; porin kitatsakuiltijya siuaauilnenkej tein taixyekantok, tein kinpitsotilij akin nemij nikan taltikpak porin auilnemik.* Dios no kitaxtaualtijya porin kinmiktij itakeualuan”. 3 Uan nimantsin oksepa kijtojkej: “¡Xikueyitalikan Jah!* Pokti tein kistos keman Babilonia tatatos* pankistos nochipaya”.

4 In 24 tayekananij uan naui ángeles motankuaketskej uan kiueyichiujkej Dios akin tokotsyetok itech ueyi silla uan kijtojkej: “¡Maj ijkon mochiua!* ¡Xikueyitalikan Jah!”.*

5 Uan no, kampa yetok ueyi silla mokakik ke aksa* kiualijtoj: “Xikueyitalikan toDios, nochin namejuan nanitakeualuan akin nankimojkatokaj, akin nanueyichiuanimej uan akin amo”.

6 Uan nikakik kemej yeskia tel miakej tajtouayaj, kakistia kemej ijkuak miak at ijkoyoka uan kemej ijkuak chikauak tatitikuini. Yejuan kijtouayaj: “¡Xikueyitalikan Jah!* ¡Porin toDios, Jehová,* akin kipia nochi chikaualis, peuakya tekiuajti! 7 Maj semi tiyolpakikan uan maj tikueyitalikan porin Ichkatsin* monamiktitiya uan isiuatsin mochijchiuakya. 8 Inovia Ichkatsin kimakakej linojtasal tein tel kuali chijchiujtok, tein petani uan chipauak, porin linojtasal kiixnextia tein kuali tein kichiujkej akin Dios moinxelouilij”.*

9 Uan ángel nechiluij: “Xikijkuilo nejin: ‘Yolpakij akin kinyoleujkej maj tatakuatij keman Ichkatsin monamiktis’”. Uan no kijtoj: “Nejin tein Dios kijtoua melauak”. 10 Keman kijtoj nejon, nimotankuaketsak iixpan para nikueyichiuas. Sayoj ke yejua nechiluij: “¡Amo! ¡Amo xikchiua nejon! ¡Xikueyichiua Dios! Porin nejua sayoj niitakeual Dios ijkon kemej tejua uan mokniuan akin kiteixmatiltiaj Jesús. Nejin semi moneki porin tein Dios kitematiltia ika tajtoua Jesús”.

11 Nikitak ke iluikak tapotoya; uan nesiko se istak caballo. Akin ipanko yaya monotsa Takuaujtamach uan Melauak uan tein kiixtalia kuali yetok uan tateuia kemej moneki. 12 Iixtololouan katkaj kemej tit,* uan itech itsontekon kipiaya miak coronas. Itech ijkuiliujtoya se tokayit tein amo akin kiixmati, ta sayoj yejua. 13 Takentiaya ika se tasal tein esyoj, uan kitokaytiayaj: ITajtol Dios. 14 Uan no, soldados de ne iluikak kitojtokatiayaj ika istak caballos uan takentiayaj ika linojtasal tein tel kuali chijchiujtoya, istak uan chipauak. 15 Itenoj kisak se ueyak machete* tein ojkan semi tenej tein ika kinixpolos akin nemij itech nochin altepemej. Uan kinixyekanas* ika se takot tachijchiuj ika tepos. Uan no, kimetspatskatoya uvas itech ueyi tekoch kampa kipatskaj uvas tein kiixnextia iueyi kualanyo Dios, akin kipia nochi chikaualis. 16 Uan ikesko itech itasal, ijkuiliujtoya se tokayit: ininTeko uejueyi chiuanimej uan ininTekiuaj akin taixyekanaj kemej tekiuanij.

17 No nikitak se ángel ijkatoya iixpan tonaltsin. Chikauak kiniluij nochin totomej tein patanij ejekaixko: “¡Xiualakan nikan! Ximosentilikan kampa Dios kichiuak se ueyi tatakualis. 18 Xikuakan ininnakayo tekiuanij, tayekankasoldados* uan akin semi chikaujkej, uan ininnakayo caballos uan akin youij ininpanko; ininnakayo nochin, akin moajsij temako uan akin amo, akin ueyichiuanimej uan akin amo”.

19 Uan nikitak ke koujtajtapial, akin tekiuajtij itech nochi taltikpak uan ininsoldados, mosentilijkej para kiteuiskej akin youi ipanko nejon caballo uan isoldados. 20 Uan akin yaya ipanko caballo kikitskij koujtajtapial uan no tanauatijkej tein amo melauak tein kichiuak milagros iixpan koujtajtapial. Ika nejon milagros kinkajkayauak akin kinneskayotijkej ika itokay koujtajtapial uan akin kiueyichiuaj itaixkopin tamachijchiuj. Uan nochin omen kinpantamotak yoltokej kampa kuakualakatok* tit. 21 Sayoj ke akin youi ipanko caballo, ika ueyak machete* tein kisaya itenoj kinmiktij akin tekiuajtij itech nochi taltikpak uan ininsoldados. Uan nochin totomej kikuajkej ininnakayo hasta ixuikej.

20 Nikitak se ángel tein ualpantemouaya de ne iluikak, maaktiualaya llave tein ika kitapoua ueyi ostok* tein uejkatan uan no maaktiualaya se ueyi cadena. 2 Kikitskij ueyi kouat tamouilil, yekinika kouat, in Amokuali uan Satanás uan kiilpij* mil xiujmej. 3 Uan kipankajkauak itech ueyi ostok* tein uejkatan, kitentsakuak uan kitalilij se sello para maj amo akinok kikajkayaua hasta maj tami mil xiujmej. Satepan kikajkauaskej seki tonalmej.

4 Nikitak uejueyi sillas, uan akin ompa motalijkej kinmaktilijkej tanauatil para kiixtaliskej tein kinnamiki kiseliskej akin nemij nikan taltikpak. Kemaj, nikitak ininesyo* akin kinmiktijkej* porin kiteixmatiltijkej Jesús uan ika tajtouayaj Dios. Yejuan amo kiueyichiujkej koujtajtapial nion itaixkopin tamachijchiuj uan amo kinneskayotijkej ininixkuako nion ininmako. Yejuan oksepa nenkej uan tekiuajtikej iuan Cristo mil xiujmej. 5 Yejuan akin yekinika oksepa nemij. (Okseki mikemej oksepa nenkej hasta ke tamik mil xiujmej). 6 Yolpakij uan yektikej akin yekinika oksepa nenkej; ojpatika mikilis amo teyi kinchiuilis, ta yeskij itiopixkauan Dios uan Cristo uan iuan tekiuajtiskej mil xiujmej.

7 Sayoj ke, keman tamis mil xiujmej, kikajkauaskej Satanás 8 uan takajkayauatiuj itech nejon altepemej tein yetokej naujkampa itech taltikpak, nejin yejuan Gog uan Magog, para kinsentilis uan maj tateuikan. Amo ueli se kinpoua porin tel miakej kemej xal tein yetok ueyi atenoj. 9 Uan yejuan momoyaujkej* itech nochi taltikpak uan kiyoualojkej inintakenkaluan akin Dios moinxelouilij* uan ueyi xolal tein Dios kitasojta. Sayoj ke ualpantemok tit* uan kintamichichinoj. 10 Amokuali, akin kinkajkayaujtoya, kipantamotkej kampa kuakualakatok* tit kampa yetoyaya koujtajtapial uan tanauatijkej tein amo melauak. Yejuan kintajyouiltiskej* youalintonal nochipaya.

11 Nikitak se ueyi silla istak uan akin ompa tokotsyetoya. Taltikpak uan iluikak cholojkej uan amo keman oksepa kinitakej. 12 Uan nikinitak akin momikilijkaj, akin ueyichiuanimej uan akin amo, ijkatoyaj iixpan ueyi silla uan motapojkej amatajkuilolmej.* Sayoj ke motapoj okse amatajkuilol, nejin yejua kampa ixnesij akin nemiskej. Uan akin tokotsyetok itech ueyi silla kiixtalij tein kinnamiki kiseliskej akin momikilijkaj por nochi tein kichiujkej, ijkon kemej ijkuiliujtoya itech nejon amatajkuilolmej. 13 Ueyiat kintemakak mikemej akin ompa yetoyaj, uan mikilis uan Miketekoch* kintemakakej mikemej akin ompa yetoyaj. Uan kiixtalijkej tein kinamiki kiselis sejse por nochi tein kichiuak. 14 Mikilis uan Miketekoch* kinpantamotkej kampa kuakualakatok* tit, tein kiixnextia ojpatika mikilis. 15 Uan no, akin amo ijkuiliujtoyaj itech amatajkuilol kampa ixnesij akin nemiskej, kinpantamotkej kampa kuakualakatok* tit.

21 Uan nikitak se yankuik iluikak uan se yankuik taltikpak; porin iluikak uan taltikpak tein achto yetoyaj ixpoliujkej, uan ueyiat amo yetokok. 2 Uan no nikitak ueyi xolal tein yektik, Yankuik Jerusalén, ualpantemouaya de ne iluikak kampa yetok Dios. Uan chijchiujtoya kemej se novia akin kichixtok* takat akin iuan monamiktiti. 3 Satepan nikakik ke aksa* chikauak ualtajtouaya den ueyi silla uan kijtouaya: “¡Xikita! Dios mokaltaliko* iniuan nochin akin nemij nikan taltikpak. Yejua iniuan nemis uan yejuan pouiskej itech ixolal. Uan Dios yekmelauj iniuan yetos. 4 Uan kinuachilis nochi ininixayo, uan amo akin momikilisok, nion tayokoyas nion chokas nion tajyouis. Tamikya nochi tein achto techtajyouiltiaya”.

5 Akin tokotsyetoya itech ueyi silla kijtoj: “¡Xikita! Nikchijchiujtok nochi yankuik”. No kijtoj: “Xikijkuilo nejin porin tein nikijtoua takuaujtamach uan melauak”. 6 Uan nechiluij: “¡Motamichiuakya! Nejua nipeua uan nejua nitami.* Akin amikis nikmakas maj tayi at tein mextok* tein kichiua maj se nemi uan amo moneki kiixtauas. 7 Akin tatanis nikmakas nejin uan nejua niyeski niiDios uan yejua yeski nokoneuj. 8 Sayoj ke akin mojkamej, akin amo takuaujtamatij, akin pitsotikej uan tetajyaltiaj, temiktianij, akin auilnemij,* akin tanaualuiaj,* akin kinueyichiuaj tatadiosmej* uan nochin akin takajkayauaj kinpantamotaskej kampa kuakualakatok* tit, tein kiixnextia ojpatika mikilis”.

9 Uan nechnojnotsako semej chikome ángeles tein kipiayaj chikome kaxit. Sejse kaxit pexontoya* ika chikome tetsaujmej tein ika tamijya nochin tetsaujmej. Yejua nechiluiko: “Xiuiki, nimitsnextiliti akin iuan monamiktiti Ichkatsin”.* 10 Yejua ika, nejon ángel, ika ichikaualis Dios nechuikak itech se ueyi tepet tein uejkapan uan nechnextilij Jerusalén, ueyi xolal tein yektik ualpantemouaya de ne iluikak kampa yetok Dios, 11 uan kipiaya ikualtsinyo Dios. Petania kemej se tetsin tein semi kualtsin, kemej se tet tein kiluiaj jaspe tein chipaktik kemej teskat. 12 Kiyoualouaya se ueyi tepamit tein uejkapan, uan kipiaya 12 puertas uan itech sejse puerta yetoya se ángel uan itech sejse puerta ijkuiliujtoya 12 inintokay uejueyi kalyetonij israelitas. 13 Kampa kisa tonaltsin kipiaya eyi puertas, ajkokopa kipiaya eyi puertas, tanikopa* kipiaya eyi puertas uan kampa pankalaki tonaltsin kipiaya eyi puertas. 14 Uan no, tepamit tein kiyoualouaya ueyi xolal kipiaya kemej tatsineualoni 12 temej uan itech sejse tet ijkuiliujtoya inintokay 12 itatitaniluan Ichkatsin.

15 Akin nouan tajtojtoya kipiaya se taman tein ika tatamachiuaya, se akat tachijchiuj ika oro, para kitamachiuas ueyi xolal, puertas uan tepamit tein kiyoualouaya. 16 Ueyi xolal kipiaya naui esquinas, ijkon kemej ueyak katka no ijkon katka patauak. Yejua kitamachiuak ueyi xolal ika akat uan ueyak, patauak uan uejkapan katka kemej 2,220 kilómetros.* Nochi kipiaya sayoj se tamachiuj. 17 No kitamachiuak tepamit tein kiyoualouaya: katka kemej 144 molikmej.* Ángel tatamachiuak ijkon kemej tejuan titatamachiuaj. 18 Tepamit chijchiujtoya ika tet tein kiluiaj jaspe uan ueyi xolal chijchiujtoya ika senkis oro, chipaktik kemej teskat. 19 Itatsineualoni tepamit tein kiyoualouaya ueyi xolal chijchiujtoya ika miak taman tetsitsin tein kualtsitsin: yekinika tatsineualoni chijchiujtoya ika jaspe, ojpatika ika zafiro, expatika ika calcedonia, naujpatika ika esmeralda, 20 makuiltika ika sardónica, chikuasentika ika sardio, chikometika ika crisólito, chikueyitika ika berilo, chiknauitika ika topacio, majtaktika ika crisoprasa, majtaktika uan se ika jacinto uan majtaktika uan ome chijchiujtoya ika amatista. 21 Uan no, 12 puertas katkaj 12 uejueyi temej tein kiluiaj perlas; sejse puerta chijchiujtoya ika sayoj se perla. Uan ueyi ojti tein kipiaya ueyi xolal chijchiujtoya ika senkis oro, chipaktik kemej teskat.

22 Amo nikitak nion se templo itech ueyi xolal, porin Jehová* Dios, akin kipia nochi chikaualis uan Ichkatsin yejuan templo. 23 Amo moneki maj tonaltsin uan metsti kitauilikan ueyi xolal, porin ikualtsinyo Dios kitauilia uan itauil yejua Ichkatsin. 24 Akin pouij itech altepemej nejnemiskej ika nejon tauil uan akin tekiuajtij itech taltikpak kikualtsintiliskej nejon ueyi xolal. 25 Nochin tonal amo tatsakuaskej, porin ompa amo tayouayantias. 26 Uan nochin kiueyitaliskej uan kitakachiuaskej nejon ueyi xolal. 27 Sayoj ke amo keman kalakis nion teyi tein amo chipauak nion akin kichiua tein tetajyaltij uan xolopij. Sayoj kalakiskej akin ijkuiliujtokej itech iamatajkuilol* Ichkatsin kampa ixnesij akin nemiskej.

22 Uan ángel nechnextilij se ueyiat kampa motalojtok at tein kichiua maj se nemi. Nejon at katka chipaktik kemej teskat uan mextoya* itech iueyi silla Dios uan Ichkatsin,* 2 uan motalouaya tatajko den ueyi ojti tein kipia ueyi xolal. Itajtatenoj ueyiat onkayaj koujmej tein kichiuaj maj se nemi, tein xijxiujtika takiaj 12 viajes, tein kijtosneki ke mejmetstika takiaj. Ininmaxiujyo tapaleuis para kinpajtiskej akin pouij itech altepemej.

3 Uan Dios amo kijtos maj pano tein amo kuali, porin iueyi silla Dios uan Ichkatsin yetos itech ueyi xolal. Uan itakeualuan Dios kitekitiliskej, 4 kiixitaskej uan itokay ijkuiliujtos ininixkuako. 5 Uan amo kemanok tayouayantias, uan amo monekis maj kintauili se tanex nion maj kintauili tonaltsin, porin Jehová* Dios kintauilis, uan yejuan tekiuajtiskej nochipaya.

6 Ángel nechiluij: “Nochi nejin tajtolmej takuaujtamachmej uan melaujkej. Kemaj, Jehová,* Dios akin kinmatiltij tein kijtojkej tanauatianij,* kititanik iángel para kinnextilis itakeualuan tein amo uejkaua moneki mochiuas. 7 Xikita, amo uejkaua niejkos. Yolpaki akin kitakamati tein Dios kiteixmatiltia itech nejin amatajkuilol”.*

8 Nejua Juan, nikakik uan nikitak nochi nejin. Satepan ke nikitak uan nikakik, nimotankuaketsak para nikueyichiuas ángel tein nechnextilijka nochi nejin. 9 Sayoj ke yejua nechiluij: “¡Amo! ¡Amo xikchiua nejon! Porin nejua sayoj niitakeual Dios ijkon kemej tejua uan mokniuan tanauatianij,* uan kemej akin kitakamatij tein ijkuiliujtok itech nejin amatajkuilol. Xikueyichiua Dios”.

10 Uan no nechiluij: “Amo xiktati* tein Dios kiteixmatiltia itech nejin amatajkuilol, porin ejkotokya tonal tein ixyetok. 11 Akin kichiua tein amo kuali yetok maj kisentoka kichiua tein amo kuali yetok, uan akin kichiua tein pitsotik maj kisentoka kichiua tein pitsotik. Sayoj ke akin yolkuali* maj kisentoka kichiua tein kuali, uan akin chipaujkanemi maj kisentoka chipaujkanemi.

12 ”‘¡Xikaki! Amo uejkaua niejkos uan niktaxtauis sejse tein motanilij por nochi tein kichiuak. 13 Nejua nipeua uan nejua nitami,* akin peuak uan akin tami. 14 Yolpakij akin kipajpakaj ininueyak tasal para uelis kikuaskej inintakilo koujmej tein kichiua maj se nemi uan kalakiskej itech ipuertas ueyi xolal. 15 Kalampa yetokej itskuimej,* akin tanaualuiaj,* akin auilnemij,* temiktianij, akin kinueyichiuaj tatadiosmej* uan nochin akin kiuelitaj takajkayauaskej ika tein kijtouaj uan ika tein kichiuaj’.

16 ”‘Nejua Jesús, niktitanik noángel maj namechixmatiltiti nejin tein kinpaleuis nochin tokniuan itech nechikolmej. Nejua niichankauj* uan niiuejkauj ixuiuj David uan sitalin tein semi petani tein kisa achto ke tanesis’”.

17 Dios ika ichikaualis uan inovia Ichkatsin kisentokaj kijtouaj “¡Xiuiki!”. Uan akin kikakis nejin maj kijto “¡Xiuiki!”. Uan akin amikis maj uiki. Akin kinekis, maj tayi at tein kichiua maj se nemi uan amo moneki kiixtauas.

18 “Akin kikaki tein Dios kiteixmatiltia itech nejin amatajkuilol, nejua nikiluia: takan aksa* kitamajxitilia nejin amatajkuilol teisa tein amo moijkuiloj, Dios no kiualtitanilis tetsaujmej tein ijkuiliujtokej itech nejin amatajkuilol; 19 uan takan aksa kikuilia teisa tein Dios kiteixmatiltia itech nejin amatajkuilol, yejua amo kimakas tatiochiualismej tein ompa ijkuiliujtok. Nejin kijtosneki ke amo kikauas maj kikua inintakilo koujmej tein kichiua maj se nemi uan maj amo kalaki itech ueyi xolal tein yektik.

20 ”Akin kiteixmatiltia nochi nejin, kijtoua: ‘Kemaj, amo uejkaua niejkos’”.

“¡Maj ijkon mochiua!* Xiuiki, toTekotsin Jesús”.

21 Maj toTekotsin Jesús kinmaka tatiochiualis tein amo technamiki akin Dios moinxelouilij.*