Ouijkayomej tein kipanouaj siuamej

TAJTOLMEJ tein ixnesij yekmakopa tein kijtoj se ichpoch, kinextia se taman tein semi tetayokoltij: noyampa taltikpak siuamej uan siuapipil semi kinteuiaj uan kinitaj ke amo teyi chiuanimej. Maj tikitakan seki taman tein kinpanoua.

• Kinitaj ke amo teyi chiuanimej. Ompa Asia, tetatmej okachi kintasojtaj okichpipil. Ika tein kijtoj Naciones Unidas itech xiuit 2011, moixejekoua ke ajsitokya 134 millones siuamej tein poliuij itech nejon ueyi altepet porin kinmiktiaj achto ke yoliskej, oso keman pilkonemej uan porin kinsenkauaj.

• Amo kiseliaj tamachtilis. Panoua tajko tein nemij itech taltikpak akin amo yajkej tamachtiloyan nion naui xiuit, yejuan siuamej uan siuapipil.

• Ininka mauiltiaj. Panoua 2,600 millones siuamej, nemij itech altepemej kampa tekiuanij amo teyi kinchiuiliaj tetakauan tein ininka mauiltiaj ininnamik.

• Amo kiseliaj kuali tapajtilis. Itech altepemej kampa tatasojti, kemej ojome minuto momikilia se siuat keman kokoxkayetok ika konet oso keman yoli ikonetsin, porin amo onkak tapajtilis tein motelneki.

• Amo kinkauaj maj kipiakan talmej. Maski yejuan siuamej akin okachi tatokaj uan kionkaltiaj panoua tajko tein onkak itech taltikpak, miakkan amo kinkauaj maj kipiakan talmej nion kiseliaj tein inintatuan kikauaj.

¿Keyej ijkon kinchiuaj siuamej? Itech seki altepemej ijkon kinchiuaj porin tein kineltokaj uan tamachtilis tein kiseliaj kinextia ke uelis kintajyouiltiskej uan kinchiuiliskej tein amo kuali, uan hasta ika motenpaleuiaj. Amaix El País itech tajtol español, ika tajtoj se tonal Amelia Valcárcel, se ueyi tamachtijkej ika Filosofía Moral uan Política, akin kijtoj: “Itech nochin taneltokalismej kinitaj ke siuamej amo teyi chiuanimej”. Uan no kijtoj: “Itech nion semej kinkauanij maj kichiuakan tein kinnamiki”.

¿No ijkon tiontanemilia? ¿Tikonnemilia ke Biblia no okse amaix tein ika tajtoua Dios tein tayolchikaua maj amo se kinyekita siuamej? Sekin kiitaj ke ijkon kiteajsikamatiltia keman kiixtajtoltiaj seki tajkuilolmej. Sayoj ke Dios akin iaxka Biblia, ¿keniuj yekmelauj kiita siuat? Maski miakej amo kuali momachiliaj keman ika se tajtoua nejin taman, semi kuali maj tiktemokan tanankilil ika se kuali tanemilil.