¿Kuali maj se kitajtani Dios keyej kikaua maj mochiua seki taman?

SEKIN kinemiliaj ke kinextiaj ke amo kipoujkaitaj Dios komo kitajtaniaj keyej kikaua maj mochiua seki taman. Xa tejuatsin no ijkon tiontanemilia.

Sayoj ke, ¿tikonmatia ke miakej taltikpakneminij akin yolkualmej kitajtanianij Dios maj kinmelauili keyej kikaua maj mochiua seki taman?

Kemej neskayot, Job akin katka yolmelauak, tajtanik: “¿Keyej kisentokaj nemij akin amo yolkualmej, ueuentsintiakej, [uan] [...] moteltomintijkej?” (Job 21:7).

Uan Habacuc, se tanauatijkej akin amo keman kikauak Dios, kitajtanij: “¿Keyej tikinita akin amo melaujkej, [uan] amo teyi tikijtoua keman akin amo yolkuali kijtakoua akin okachi yolkuali ke yejua?” (Habacuc 1:13).

Uan no, Jesucristo se tonal kijtoj: “No Dios no Dios, ¿keye tinechsenkauak?” (Mateo 27:46).

¿Kinemilij Jiovaa ke amo kipoujkaitayaj keman kichiuilijkej nejin netajtanilmej ika nochi ininyolo? Itech nejon capítulos tein kipia Biblia, amo moajsi nion se taman tein kinextia ke ijkon kinemilij. Uan amo moneki tikmoujkaitaskej. Tikmatij ke Dios amo kikuejmoloua keman tiktajtaniaj maj techpaleui maj tikpiakan tein ika timoixpanoltiskej uan ijkon kuali tiyetoskej, ta techmaka ika miak pakilis (Mateo 6:11, 33). No ijkon, techmatiltia miak taman tein techpaleuis maj tikpiakan yolseuilis uan maj kuali timomachilikan (Filipenses 4:6, 7). Tein melauj, Jesús kiniluij imomachtijkauan: “Xiksentokakan xikilikan Dios ten moneki uan [...] namechmakas” (Mateo 7:7). Tein satepan kijtoj Jesús keman ika tajtoj nejin netenkaualis kinextia ke amo sayoj ika tajtojtoya maj se kipia tein ika se moixpanoltis, ta no maj se kiseli itanankililuan netajtanilmej tein motelnekij.

Komo tejuatsin tionueliskia tikonchiuilis Dios nejin netajtanilmej, ¿katiyejua tikontajtaniskia?

• “¿Keyej niyetok nikan taltikpak?”

• “¿Toni nechpanos keman nimomikilis?”

• “¿Keyej nejua nikpanoua nejin tajyouilis?”

Kemej “nochi in Tajkuilolamatsitsin nochi yejuan Dios kichiuak ika ichikaualisuan”, ¿keyej amo tiktemouaj tanankilil tein kitemaka iTajtoltsin? (2 Timoteo 3:16.) Axkan maj tikitakan toni kinolinia taltikpakneminij maj mochiuilikan nejin netajtanilmej uan keniuj tanankilia Biblia.