Tetsaujmej: ¿kinextiaj ke dios semi amo teiknelia?

TEIN SEKIN KIJTOUAJ: “Dios kichiua maj onka tetsaujmej porin yejuatsin taixyekantok nikan taltikpak; yejua ika semi amo teiknelia”.

TEIN KIJTOUA BIBLIA: “Nochi in taltikpakuani kinyekana [...] yejua in amokuali” (1 Juan 5:19). Biblia kijtoua ke nejon “amokuali”, yejua Satanás (Mateo 13:19; Marcos 4:15). ¿Tikonnemilia ke ouij se kineltokas nejon? Xikonnemili nejin: komo Satanás taixyekantok nikan taltikpak, no ueli kichiua maj taltikpakneminij sayoj kiitakan inintanejnekilis, maj xijxikuimej uan maj amo kiajsikamatikan teisa kemej yejua. ¿Melauj ke nejon techmelauilia keyej taltikpaknenkej amo kuali kitekitiltia tein kipia taltikpak? Miakej tamatinij tanejmachtiaj ke nejon tein kichiuaj, kiualkui tetsaujmej, kichiua maj okachi onkakan oso maj okachi amo ouij mochiuakan.

¿Uan keyej Dios kikauani maj Amokuali kipia ueyi chikaualis? Moneki tikmatiskej tein panok keman peuak ininnemilis taltikpakneminij uan ijkon uelis tiknankiliskej nejin netajtanil. Adán uan Eva kiixnamikkej Dios, tein kijtosneki ke kiixnamikkej kemej taixyekankej, uan itech nejon tonalmej hasta axkan tel miakej no ijkon kichiuanij. Keman kiixpejpenaj taixnamikiskej, nochin yejuan mokauaj maj kinixyekana Satanás akin kitauelita Dios. Yejua ika Jesús kijtoj ke Amokuali “tayekanke [...] nikan taltikpak” (Juan 14:30). Maski ijkon, amo nochipa taixyekantos.

Sayoj ke Jiovaa kiyolkokoua tajyouilis tein Satanás kiualkui. Kemej neskayot, Biblia kijtoua keniuj momachilij keman kiitak ouijkayomej tein kipanotoya xolal Israel: “Keman yejuan tajyouijtoyaj yejuatsin no tajyouiaya” (Isaías 63:9). Yejua ika, kemej kipia ueyi teiknelilis, kiixtalij kitamis itaixyekanalis Satanás akin semi amo teiknelia uan amo uejkaua kichiuas. Uan no, kiixtalij iKonetsin Jesucristo akin yolmelauak maj tekiuajti nochipaya.

TONI TECHUALKUILIA NEJON: Satanás amo kinyekpiani taltikpakneminij keman mochiuani tetsaujmej, sayoj ke Jesús kemaj kichiuas. Keman yetoya nikan taltikpak, kinyekpiak imomachtijkauan ijkuak mochiuak se tetsaujkaejekat. Biblia kimelaua: “Kitakaualtij in tetsaukaejekat uan kilij ne ueyiat ijkuin: Ximotamatili uan amo ximoolini ok. Uan ijkuakon motamatilij in ejekat”. Imomachtijkauan kimoujkaitakej nejon uan motajtaniayaj: “¿Akoni nijin tagat? Hasta nochi in ejekat uan in mar kitakamatij” (Marcos 4:37-41). Nejon tein panok techpaleuia maj titakuaujtamatikan ke Jesús kinyekpias nochin akin tatakamatiskej keman tekiuajtitos (Daniel 7:13, 14).