¿Keyej moneki maj titajtanikan?

“¿Tikonnemilia ke amo moneki maj tiktemokan Dios? Tel miakej kijtouaj ke amo.” Nejin tajkuilol kiteixmatiltijkej seki taltikpakneminij akin kineltokaj ke amo nemi Dios. Nesi ke yejuan kiitaj ke amo moneki maj tiktemokan Dios.

Sayoj ke moajsij akin kemaj kineltokaj Dios sayoj ke monejnemiltiaj kemej yeskia amo nemi. Se ueyi tiopixkat católico akin itokay Salvatore Fisichella, kijtoj tein kichiuaj akin kinixyekana itech itaneltokalis: “Akin techitaj semi kinouijmakaskia kineltokaskej ke tiitatojtokakauan Cristo porin no ijkon tinemij kemej akin amo taneltokaj”.

Sekin kipiaj miak taman toni kichiuaskej uan amo uelijok tanemiliaj itech Dios. Kinemiliaj ke semi uejka moajsi uan amo uelis pouis itech ininnemilis. Sayoj kitemouaj keman kipiaj ouijkayot; kiitaj kemej yeskia se takeual akin kichiua tein kinauatiaj.

Oksekin kinemiliaj ke amo semi tapaleuia tein motamachtia itech taneltokalis oso amo kichiuaj tein kinmachtiaj itech inintaneltokalis. Kemej neskayot, 76% akin católicos ompa Alemania, kiitaj ke amo onkak kuejmol maj se takat uan se siuat sennemikan maski amo monamiktiaj, maski nejon amo yejua tein motamachtia itech inintiopan nion itech Biblia (1 Corintios 6:18; Hebreos 13:4). Moyekita ke amo sayoj católicos kiitaj ke akin moajsij itech inintaneltokalis amo kichiuaj kemej momachtiaj. Tayekananij itech okseki taneltokalismej no kinyolkokoua kiitaskej ke akin kinixyekanaj “nemij kemej akin amo kineltokaj Dios”.

Ika tein tikitakejya, kichiua maj timotajtanikan: ¿yekmelauj moneki maj tiktemokan Dios? Nejin amo yankuik. Peuak motajtaniaj keman moajsikej yekinika takat uan yekinika siuat. Maj tikitakan seki taman tein kimelaua Biblia itech amatajkuilol Génesis uan ijkon tikmatiskej tanankilil.