¿Tikonmatia?

¿Keyej kinmetspostekiaj akin amo yolkualmej akin kinpilouayaj itech se kouit?

Amatajkuilol Juan kijtoua ke ijkuak Jesús uan omen akin amo yolkualmej kinpilojkej itech sejse kouit kampa tajyouijkej, judíos kitajtanijkej Pilato maj kinmetspostekinij, uan keman mikiskiajya, maj kintemouianij (Juan 19:31).

Tanauatil tein kiselij Moisés kinextiaya ke komo kipilouayaj itech se kouit aksa akin amo yolkuali, “amo moneki[a] mokauas nochi youal” ompa (Deuteronomio 21:22, 23). Moita ke judíos kitojtokayaj nejon tanauatil keman romanos kinmiktiayaj akin amo yolkualmej. Komo Jesús uan ome takamej kinmetspostekiskiaj, okachi ijsiujka mikiskiaj uan ueliskiaj kinpachoskej achto ke pankalakiskia Tonaltsin, tein ika peuaya tonal sábado.

Miakpa, keman kijtouayaj ke aksa monekia mikis kitaliliayaj clavos imetsko uan imako itech se kouit tein uetstoya talpan, uan keman kiajokuiaj, inakayo sayoj mopilouaya ika clavo tein kichiuaya maj kimachiliani se ueyi tekokojkayot. Keman ijkon moajsiaya, amo uelia mijyotiaya uan sayoj ueliskia kichiuas komo mometstsakuiliaya, uan sayoj uelia kichiuaya nejon ika clavo. Keman kimetspostekiaj amo ueliaok mometstsakuiliaya, uan ijsiujka mikia porin ijyotsakuia oso motsakuiliaya iesyo.

¿Keniuj ne uejkauj kikuiaj ateuitats itech neteuilis?

David kimiktij Goliat akin katka tel uejkapantik ika se ateuitats oso honda. Nesi ke momachtij kikuis nejin manamik itech xiujmej keman katka ichkatajpixkej (1 Samuel 17:40-50).

Ateuitats ixnesi itech taixkopimej tein kipiayaj egipcios uan asirios itech tonalmej keman moijkuilojtoya Biblia. Katka se tsikitsin kuetax oso tasal tein kiilpiliayaj inajnakasko ome kuetaxtamalin oso mekat. Akin kikuia nejin manamik kitaliaya itech kuetax oso tasal se tet alaxtik tein katka kemej se xokot. Satepan kikuia ika se imay ome mekat, kiuitatsouaya ikuapan uan kimajkauaya se mekat, uan tet kistikisaya tel ijsiujka uan kikuiltiaya tein kinekia.

Itech talmej kampa ika moajsia xolal Israel, kiichkuanij miak tet tein kikuiaj ika ateuitats keman moteuiayaj ne uejkauj. Se tateuijkej akin kuali kitekitiltiaya nejin manamik uelia kitamotaya tet tein ijsiujka yaya kemej 160 hasta 240 kilómetros itech se hora. Amo moyekmati ox ateuitats no ijkon tel uejka ajsia kemej arco, sayoj ke no ijkon ueliskia temiktis (Jueces 20:16).