NETAJTANILMEJ TEIN KISAJ ITECH BIBLIA
¿Keyej semi kuali maj tiktataujtikan Dios?
Jiova Dios kineki maj nochipa tiktapouikan tein techtekipachoua uan maj titakuaujtamatikan ke techkaki (Lucas 18:1-7). Yejuatsin techkaki porin toka motekipachoua. Totajtsin akin moajsi iluikak, ika netasojtalis techyoleua maj titajtokan iuan. ¿Amo tikonuelitaskia tikonselis itayoleualis? (Xikonixtajtolti Filipenses 4:6.)
Keman tiktataujtiaj Dios amo sayoj tiktajtaniaj maj techpaleui, ta no se taman tein techpaleuia maj timotokikan iuan (Salmo 8:3, 4). Nochipa keman tiktapouiaj tein tikmachiliaj, okachi kuali timouikaj iuan. (Xikonixtajtolti Santiago 4:8.)
¿Keniuj moneki tiktataujtiskej Dios?
Dios amo kineki maj tikuikan okachi kuali tajtolmej nion maj nochipa sayoj tikijtokan tein tikpiajya itech totanemilil. Amo no techiluia ke moneki timotankuaketsaskej oso tiijkatoskej, ta uelis timoajsiskej kemej yeski. Tein kemaj, kineki maj tiktataujtikan ika nochi toyolo (Mateo 6:7). Kemej neskayot, itech tonalmej keman nemiaj israelitas, Ana kitataujtij Dios maj kipaleuiani porin kipiaya se ouijkayot tein semi kitekipachojtoya. Satepan, keman Jiova kipaleuij uan kiajsik yolpakilis, kitasojkamatilij itech se netataujtil. (Xikonixtajtolti 1 Samuel 1:10, 12, 13, 26, 27 uan 2:1.)
¡Tel ueyi tatiochiualis tikpiaj! Uelis tiktapouiskej tokuejmoluan toDios Akin techchijchiuak. No uelis tikueyitaliskej uan tiktasojkamatiliskej nochi tein kichiua. Maj amo keman tikauakan nejin kualtsin tatiochiualis. (Xikonixtajtolti Salmo 145:14-16.)