Miakej momakixtiskej. ¿Uan tejuatsin?

Biblia technejmachtia ke keman ejkos ixpoliuilis onkas ueyi tajyouilis. Ompa tikixtajtoltiaj: “Nejon tonalmej onkas ueyi tajyouilis kemej amo keman mochiuani ijkuak peuak taltikpak hasta axkan [...]. Tein melauj, komo amo motokotsoskiaj nejon tonalmej, amo akin momakixtiskia” (Mateo 24:21, 22, TNM). Sayoj ke no kijtoua ke moajsiskej akin momakixtiskej: “Taltikpak panotiuj, [...] sayoj ke akin kichiua itanejnekilis Dios mokaua sennochipaya” (1 Juan 2:17, TNM).

¿Toni moneki tikchiuaskej uan ijkon uelis timomakixtiskej? ¿Monekiskia tipeuaskej tiksentiliskej tein techpaleuis nejon tonal? Amo. Yejua nejin tein Biblia tayolmajxitia: “Keme nochi ten ongak ipan in taltikpak tami patis ya, ika ya nojon namejuan semi moneki xichipaukanemikan uan xikmouistilijtiyakan Dios. Uan xikyolikachixtokan ne tonal” tein Jiova kiixtalijtok (2 Pedro 3:10-12). Tajkuilolmej techpaleuiaj maj tikajsikamatikan ke tein “tami patis ya” yejuan tekiuajyomej tein taixyekanaj nikan taltikpak kampa mochiujtok tein amo melauak uan nochin akin kipaleuiaj nejon tekiuajyomej uan kiixtopeuaj iTekiuajyo Dios. Kemej tikitaj, se kisentilis miak taman amo techmakixtis keman ejkos ixpoliuilis.

Tein melauj, timomakixtiskej sayoj komo timomachtiaj timonejnemiltiskej kemej Dios kineki uan komo nochipa tiktakamatij (Sofonías 2:3). Maj amo tikchiuakan tein nochin kichiuaj, nion maj tikixpanauikan nochi taman tein kinextia ke tinentokej itech itamian tonalmej, moneki maj ‘tikyolikachixtokan ne tonal’ tein Jiova kiixtalijtok. Itaixpantijkauan Jiova uelis mitsonmachtiskej ika Biblia tein moneki tikonchiuas uan ijkon tionmomakixtis.