TAMACHTILIS ITECH IPEUJYAN AMAIX | ¿AKONIMEJ ITAIXPANTIJKAUAN JIOVA?
¿Keniuj monejnemiltiaj?
Totaneltokalis amo sentekiti iuan okse taltikpaknechikol, timoajsij itech nochi taltikpak uan nion teyi techsentilia iuan okseki taneltokalismej. Ueyi kali kampa moixyekana tekit moajsi itech altepet Estados Unidos. Sayoj ke, miakej tiitaixpantijkauan Jiova tinemij itech okseki altepemej. Noyampa taltikpak timoajsij kemej chikueyi millones uan tiktemakaj nemachtilmej ika Biblia itech panoua 230 tataman altepemej uan xolalmej. Ijkon tikchiuaj tein Jesucristo kijtoj: “Nejin kuali tanauatilmej ika tekiuajyot motetapouis semanauak taltikpak kampa nemij uan ijkon nochin kimatiskej” (Mateo 24:14, TNM).
Kampa yeski tinemiskej, tikpoujkaitaj uan tiktakamatij tanauatilmej tein kiixtaliaj tekiuanij itech altepet, sayoj ke amo titapaleuiaj itech política. Ijkon tikchiuaj tein Jesús kinnauatij akin kitojtokayaj keman kiniluij: “Namejuan amo nanpoutinemiske ok iuan in taltikpakuani”. Yejua ika amo tikpaleuiaj política nion neteuilismej (Juan 15:19; 17:16). Yejua ika, itech Ojpatika Neteuilis tein Mochiuak itech Nochi Taltikpak miakej itaixpantijkauan Jiova kintsakkej, kintajyouiltijkej uan sekin hasta kinmiktijkej. Se akin tekitia kemej ueyi tiopixkat akin kayot Alemania kijkuiloj: “Uelis kijtoskej ika melaujkayot ke sayoj yejuan kemej ueyi nechikol amo tapaleuijkej keman nazis taixyekantoyaj ompa Alemania”.
“[Itaixpantijkauan Jiova] kixikouaj miak taman tein se kimoujkaita. Kemej yejuan kiuelitaj kinpaleuiskej oksekin ueliskiaj kipiaskej se ueyi tekit itech política, sayoj ke amo keman uelis tikchiuaskej maj kiselikan. [...] Kiajsikamatij ke taixyekananij kipiaj tanauatil, sayoj ke kineltokaj ke sayoj itaixyekanalis Dios uelis kitamis nochi kuejmolmej tein onkak nikan taltikpak.” (Periódico Nová Svoboda, República Checa)
Sayoj ke, nejon amo kijtosneki ke amo titajtouaj iniuan oksekin. Keman Jesús kitataujtij Dios maj kinpaleui akin kitojtokayaj, kijtoj: “Nimitsontajtanilia ke amo xikinajchiua nomomachtijkauan de nikan taltikpak” (Juan 17:15). Yejua ika, titekitij, titakouatij uan tiyouij kaltamachtiloyan ijkon kemej oksekin.