¿Mitsonpaleuiaj nauin akin youij ipanko caballos?

Mokaki keniuj motalojtokej caballos. Biblia ininka tajtoua nauin akin youij ipanko caballos uan caballos tein semi se kinmoujkaita. Yekinika caballo istak uan ipanko youi se ueyi tekiuaj akin yekin kiixtalijkej. Kitojtoka se caballo chichiltik uan akin youi ipanko kichiua maj amo onka yolseuilis noyampa taltikpak. Taikampa uitse se caballo tiltik kemej youal uan akin youi ipanko kimaketstiuj se balanza uan mokaki se tajtol tein kitematiltia ke tasojtis takual. Naujpatika caballo apochiktik uan kichiua maj miakej kokolispeuakan uan maj momikilikan ika okseki taman, uan akin youi ipanko yejua Mikilis. Uan Miketekoch kitojtoka uan kinmiktijtiuj tel miakej (Apocalipsis [Revelación] 6:1-8).

“Keman yekinika nikixtajtoltij amatajkuilol Apocalipsis kampa ika tajtoua nauin akin youij ipanko caballos, semi nimouik. Niknemilij ke ejkotoyaya ixpoliuilis uan kemej amo nikchiujtoya tein monekia, amo nimomakixtiskia.” (Crystal.)

“Nikteluelitaya kampa ika tajtoua nauin akin youij ipanko caballos tein tataman tapal kipiaj. Keman nikajsikamatik toni kijtosneki, nikitak ke taixejekol.” (Ed.)

¿No tiontanemilia kemej Crystal oso Ed? Senkis tikmatij ke miakej kiixmatij amatajkuilol tein ika tami Biblia, Revelación oso Apocalipsis kampa ika tajtoua nauin akin youij ipanko caballos. ¿Tikonmatia ke uelis mitsonpaleuis komo tikonajsikamati tein kijtosneki? Dios motenkaua ke uelis yekmelauj tionyolpakis itech monemilis komo tikonixtajtoltia nejin amatajkuilol tein kijtoua tein panos satepan, tikonajsikamati tein kijtosneki uan tikonchiua tein kijtoua (Apocalipsis 1:1-3).

Keman sekin kiixtajtoltiaj Biblia kampa ika tajtoua nauin akin youij ipanko caballos kimouiliaj, sayoj ke Biblia amo kitemoua nejon. Tein melauj, moajsij millones akin kinpaleuiani maj mochikaua inintakuaujtamatilis uan maj kichiakan tein kuali satepan. Uan no ijkon uelis mitsonpaleuis. Itech okse tamachtilis tikitaskej okachi.