Letra hebrea tein okachi tsikitsin senkis techyolseuia

¿Uelis senkis titakuaujtamatiskej ke Dios kichiuas nochi tein motenkauani? Jesús senkis kimatia ke kemaj uan ika itamachtilisuan kichikauak inintakuaujtamatilis akin kikakiaj. Xiontanemili itech tamachtilis tein kitemakak itech se tepet tein moajsi itech Mateo 5:18: “Yek melau ten namechilia ke mientras yetok ok in eluiyak uan in taltikpak amo mosekokauas nion se letra de nochi den tanauatilme. Ta, ma motamichiua nochi in tamachilis ten kuika in tanauatilme”.

Letra tein okachi tsikitsin tein kipia tajtol hebreo yejua י (yod), yekinika letra tein kipia Tetragrámaton, itokay Dios tein yektik, Jiova.a Escribas uan fariseos senkis kiitayaj ke motelnekia, amo sayoj tajtolmej uan letras tein kipia iTanauatil Dios, ta no “letra de nochi den tanauatilme”.

Jesús kijtojtoya ke okachi ueliskia ixpoliuis iluikak uan taltikpak ke se tajtol tein kipia iTanauatil Dios maj amo senkis mochiua. Uan Biblia senkis techiluia ke iluikak uan taltikpak amo keman ixpoliuiskej (Salmo 78:69). Ika tein kijtoj Jesús, senkis kiteajsikamatiltij ke nochi tein kijtoua iTanauatil Dios senkis mochiuas.

¿Kiita Jiova nochi taman tein amo uejueyi? Kemaj. Xiontanemili itech nejin: israelitas kiniluijkej ke amo monekia kipostekiliskej nion se iomiyo ichkatsin tein kimiktiayaj keman kielnamikiaj pascua (Éxodo 12:46). Nejin ueliskia moitas ke amo motelneki. ¿Kiajsikamatiaj keyej amo monekia kipostekiliskej nion se iomiyo? Xa amo. Sayoj ke Jiova kimatia ke nejin kiixnextiaya se taman tein mochiuaskia satepan: ke Mesías amo kipostekiliskiaj nion se iomiyo keman kimiktiskiaj itech tajyouilis kouit (Salmo 34:20; Juan 19:31-33, 36).

Itajtoluan Jesús senkis kichiua maj tikneltokakan ijkon kemej yejua kineltokaya ke nochi tein Jiova motenkauani senkis mochiuas. ¡Letra tein okachi tsikitsin techmatiltia ke senkis mochiuas tein Jiova kijtoua!