¿Tikonmatia?
¿Kiyektaliayaj kuejmolmej itech xolal Israel ika Tanauatil tein kiselijka Moisés?
KEMANSA kemaj. Maj tikitakan se neskayot. Deuteronomio 24:14, 15 kijtoua: “Moneki amo timokauilis taxtauil tein kinamiki kiselis se tonaltekitikej akin kipolojtok uan moajsi itech tatasojtilis, yeski semej mokniuan oso se akin okseko kayot akin mokaltaliko motalpan”. Jiova kiitaskia ke iteko tonaltekitikej tajtakojtoya komo amo kitaxtauiaya uan tonaltekitikej kitataujtiaya Jiova maj kipaleui.
Seki takoton komit kampa ijkuiliujtok ke se tatokkej moteiluilij
Ompakauin itech xolal Asdod, kiajsikej seki takoton komit tein kichijchiujkaj achto ke ajsiskia xiuit 600 achto itech totonaluan. Ompa ijkuiliujtoya tein ika moteiluiliaya aksa porin kichiuilijkej se taman kemej tein ika motajtoua itech Deuteronomio 24. Nesi ke kijkuilouilijkej se tatokkej akin kipantijkej ke amo kitemakak tatet tein ixyetoya kitemakas. Ompa kijtoua: “Satepan ke motakeual [akin teteiluilia] kitamisentilij tatet seki tonalmej achto, Hoshayahu ikoneuj Shobay ualaj uan kiuikak itaken motakeual. [...] Nochin akin nouan kisentilijtoyaj tatet keman chikauak tonatoya kiyekijtoskej [...] ke melauak tein nikijtoua. Amo teyi nikchiuak tein amo kuali. [...] Komo tekiuaj kiita ke amo moneki kichiuas maj motakeual kikepilikan itaken, xikonchiua porin tionteiknelia. Moneki tiontajtos porin motakeual kikuilijkej itaken”.
Tajkuilojkej Simon Schama kijtoua ke nejin amo sayoj kiteajsikamatiltia ke takeual kitelnekia maj kikepilikan itaken. No kijtoua: “No kiteajsikamatiltia ke akin teteiluilia tepitsin kiixmatia keniuj moyektaliskiaj kuejmolmej kemej ixyetok itech Biblia, okachiok tanauatilmej tein moajsij itech Levítico uan Deuteronomio kampa moijtouaya ke tel amo kuali yetoya maj kintajyouiltianij akin kipanouayaj tatasojtilis”.