“Miak ongak milajtapixkalis”

JESÚS kijtojka ke itatojtokakauan kemej yeskia kisentiliskiaj tel miak tatok itech itamian tonalmej (Mat. 9:37; 24:14). Itajtoluan mochiujtokej kemej amo keman moitstoya itech se xolalkonet tein poui Transcarpatia (Ucrania). Itech sayoj eyi xolalmej tein amo ueuejka moajsij, onkakej 50 nechikolmej uan panoua 5,400 tanojnotsanij.a Tein melauj, komo tikitaj kanachin nemij itech nejin eyi xolalmej, itech naui taltikpakneminij, se itaixpantijkauj Jiova.

¿Keniuj tanemiliaj akin ompa nemij? Vasile, se tokniuj takat, kijtoua: “Nikan taltikpakneminij kipoujkaitaj Biblia, kipatiuitaj melaujkayot, kuali mouikaj kemej kalyetouanij uan mochikauaj mosenpaleuiskej”. No kijtoua: “Amo nochipa kinyolpaktia tein tikneltokaj, sayoj ke keman se kinnextilia se tajkuilol itech Biblia kuali tekakij”.

Melauak ke tanojnotsaskej kampa moajsij tel miakej tanojnotsanij, kinualkuilia seki ouijkayomej tein amo nochin tokniuan kipiaj. Kemej neskayot, itech se nechikol moajsij 134 tanojnotsanij uan sayoj 50 kalmej kampa tanojnotsaskej. ¿Toni kichiuaj tokniuan?

Miakej mochikauaj tanojnotsatiuij kampa monekij okachi tanojnotsanij. Ionash, se tokniuj takat akin kipia 90 xiujmej, kijtoua: “Itech tonechikol se tokniuj tanojnotsa itech ome kalmej kampa ixyetok titanojnotsaskej. Axkan nitanojnotsa itech noxolal, sayoj ke achto ke okachi nikokolispeuaskia, no niyaya 160 kilómetros uejka kampa amo ixyetok maj se nechikol tanojnotsa, kampa nitanojnotsaya itech tajtol húngaro”. Tokniuan moneki kichiuaskej miak taman tein ouij uan ijkon uelis yaskej itech nejon xolalmej. Ionash kijtoua: “Monekia nimeuas naui hora kualkan uan ijkon ueliskia niyas itech tren. Uan satepan nitanojnotsaya hasta chikuasen hora tiotak, keman mokepaya tren. Nikchiuaya nejon ojpa oso expa itech semana”. ¿Kimachilia nejin tokniuj ke tapaleuij chikaujkayot tein kichiuak? Yejua kijtoua: “Nejon taman tanojnotsalis nechtelyolpaktiaya. Uan nikpiak tatiochiualis nikinmachtis seki kalyetouanij akin nemiaj kampa amo onkak se nechikol”.

Se kiajsikamati maj seki tokniuan akin pouij itech nejon nechikolmej amo uelikan yakan tel uejka, sayoj ke nochin, hasta akin xiuejkejya, mochikauaj kinnojnotsaskej nochin akin nemij kampa ixyetok tanojnotsaskej. Yejua ika, itech xiuit 2017, itech nejon eyi xolalmej mosentilijkej keman moelnamikik imikilis Cristo tajko akin ompa nemij, tein kijtosneki ke ajsitoyaya se achiok tokniuan tanojnotsanij. Kemej tikitaj, kampa yeski titapaleuijtoskej onkakok miak tekit itech “ne tekitsin ten Totekotsin Cristo technauatilij” (1 Cor. 15:58).