¿Keniuj kimatiaj hora?
¿TONI tikchiuaj keman tiknekij tikmatiskej hora? Xa tikitaskej se reloj. Komo aksa techtajtania toni hora, ¿keniuj tiknankiliaj? Onkak miak taman kemej uelis tiknankiliskej.
Kemej neskayot, maj tiknemilikan ke panokya nepantaj, uan panokya se hora uan tajko. Ueliskia tikijtoskej ke ajsikya se hora tiotak ika treinta minutos oso ke poliui tajko hora achto ke ajsis ome hora tiotak. Oso komo tinemij kampa kipouaj veinticuatro horas, xa tikijtoskej ke 13:30.
Keman tikixtajtoltianij Biblia, xa timotajtanianij: “¿Keniuj kimatiaj hora ne uejkauj?”. Kemej tejuan, no kipiayaj miak taman kemej kijtouayaj. Itech Escrituras Hebreas mokui tajtolmej “kualkampa”, “nepantaj”, “tiotakpa” uan “tapoyauitiya” (Gén. 8:11; 19:27; 43:16; Juec. 19:9). Sayoj ke kemansa itech Biblia mokuij okseki tajtolmej.
Tel miak xiujmej achto ke yoliskia Jesús, israelitas exkan kixelouayaj youal (Sal. 63:6). Uan itech itonaluan Jesús, judíos kichiuayajya kemej griegos uan romanos, akin naujkan kixelouayaj youal.
Nejin miakpa ika motajtoua itech Evangelios. Kemej neskayot, Jesús nejnemik aixko keman kinajsito imomachtijkauan itech barco “kuak tanestiualaya ya”, nejin yejua naujpatika kemej kixelouayaj youal (Mat. 14:25). Uan se tonal, kijtoj: “Takan kimatiskia in tetat de ke toni hora ualaskia in tachteke, ijkuakon ne tetat acha moyejyektalijtoskia, uan ijsatoskia, uan amo mokauaskia ma kikaltapokan para kitachtekiske” (Mat. 24:43).
Jesús kinextij keniuj kixelouayaj youal keman kiniluij imomachtijkauan: “Xiixpetantokan porin amo nankimatij keman nejuatsin nipatrón de nijin kali niejkos, takan tapoyauteno, oso takan tajkoyouan, oso keman tsajtsis in piotsin, oso kuak ne tanestiuits ya” (Mar. 13:35). Yekinika katka “tapoyauteno” uan peuaya keman pankalakia Tonaltsin hasta kemej chiknaui hora youak. Ojpatika katka “tajkoyouan” uan peuaya kemej chiknaui hora youak hasta tajkoyouan. Expatika katka “keman [tsajtsia] in piotsin” uan peuaya tajkoyouan hasta kemej eyi hora kualkan. Xa itech nejin hora se “piotsin [...] tsajtsik” youak keman kikitskijkej Jesús (Mar. 14:72). Uan naujpatika katka “kuak ne tanestiuits ya” uan peuaya kemej eyi hora kualkan hasta keman kisaya Tonaltsin.
Kemej tikitaj, maski ne uejkauj amo kipiayaj reloj kemej axkan, kemaj onkaya keniuj kimatiaj toni hora katka.