Kampa monankilia netajtanilmej

◼ ¿Keniuj tetatmej moneki kinyekpiaskej ininkoneuan tein nojnelmejok keman tanojnotsatij?

Semi kuali keman tetatmej akin kichiuaj kemej Cristo kinuikaj ininkoneuan itech tanojnotsalis, ijkon kinmachtiaj keniuj kinnojnotsaskej okseki taltikpakneminij ika iTekiuajyo Dios. Sayoj ke moneki kinnejmachpiaskej porin uelis onkas tein kinijtakos kampa titanojnotsaj, maski moajsiskej kampa moita ke amo teyi panoua. Itech nejin tonalmej ouijkej kampa tinemij, okachi moita ke kinteuiaj konemej uan ininka mauiltiaj porin miakej taltikpakneminij ixkikismej uan kinekij iniuan auilnemiskej (2 Tim. 3:1-5). Tetatmej moneki kiitaskej keniuj kinnejmachpiaskej ininkoneuan tein nojnelmejok maj amo akin kinchiuili tein amo kuali. ¿Toni uelis kichiuaskej?

Biblia techyolmajxitia keniuj tiknextiskej tamatilis uan keniuj amo tiuetsiskej itech se ouijkayot (Pro. 22:3; Mat. 10:16). Amo tiknekij tiktaliskej tanauatilmej, sayoj ke semi kuali maj tetatmej oso oksekin iniuan yakan konemej itech tanojnotsalis. Komo ome tanojnotsanij akin telpochmejok sentekitij, maski kuali moyekpiajya semi kuali maj nochipa kinitstokan semej inintatuan oso se tokniuj. Keman konemej moskaltiaj uan kinextiaj ke kimatijya moyekpiaskej, tetatmej uelis kiixejekoskej ox amo semi monekisok kinitaskej (no xikonita La caja de preguntas itech Nuestro Ministerio del Reino octubre 1992).

No moneki nochipa tikitaskej maj amo teyi pano keman tiyajtoskej itech tepos oso keman tinejnentoskej. Komo tikchiuaj tein moneki amo teyi techpanos tein amo kuali, amo tikpiaskej tekokojkayot, amo monekis se kiixtauas tapajtilis, nion se taxtauatiuj iniuan tekiuanij itech nejin tonalmej kampa semi moteuisnekij.

Semi kuali maj telpochmej “kiueyichiuakan itokay Jiova” (Sal. 148:12, 13). Ininkuali tajtoluan uan kemej monejnemiltiaj keman tanojnotsatij, kimoujkaitaj taltikpakneminij uan ijkon kuali ika motajtoua Jiova. Tetatmej, xikchiuakan nochi tein nanueliskej maj nanmokoneuan nochipa kiteixmatiltikan kuali tanauatilmej, uan no nochipa xikinyekpiakan maj amo kinpano tein uelis kinijtakos.