“Ven, sé mi seguidor”
1. ¿Toni uelis tikchiuaskej amo uejkaua itech Nemachtil ika Biblia itech Nechikol?
1 Naui Evangelios tel kualtsin techtapouiaj keniuj iKonetsin Dios kitekitilij Jiova keman moajsia nikan taltikpak. Uan kemej tejuan tiknekij tiktojtokaskej “neskayot [...] ika miak nejmachkayot”, moneki achto kuali timomachtiskej uan kuali titakakiskej keman timomachtiskej amaix “Ven, sé mi seguidor” itech Nemachtil ika Biblia itech Nechikol tein peuas itech semana 1 metsti marzo (1 Ped. 2:21, NM; Mar. 10:21). Okachiok tikitaskej tein techyolchikauas itech tanojnotsalis.
2. ¿Toni uelis techpaleuis maj titaxikokan ijkon kemej Jesús?
2 Neskayot tein kikauak Jesús. ¿Keniuj tionmomachilia keman mitsonajuaj ijkuak tiontanojnotsa kajkalpan? Xa tikonelnamiki nejin itajtoluan Jesús: “Kemej Nejuatsin nechtauelitstinenkej [...], no ijkon namejuan namechtauelitstinemiskej” (Juan 15:20). Sayoj ke ijkuak tikpanouaj ouijkayomej kemej nejon, amo nochipa kijtosneki se taixnamikilis. Maski Jesús kipanok nochi tataman tayejyekolis, kemaj uelik kixikoj porin kimatia ke kipiaskia ueyi yolpakilis. No ijkon tejuan, komo tiknemiliaj ke Jiova kiyolpaktia tein tikchiuaj uan techtatiochiuis komo amo keman tikauaj, no techpaleuis maj amo tisiyouikan niono maj timosenkauakan (Heb. 12:2, 3; Pro. 27:11). Komo tiksentokaj titanojnotsaj, uelis senkis tikneltokaskej ke tikpiaskej inepaleuil Cristo Jesús (Mat. 28:20).
3. ¿Keniuj uelis tikitaskej tanojnotsalis kemej kiitaya Jesús?
3 “Yejika ya Dios nechualtitanik.” Jesús kitayekanaltij tanojnotsalis ika iTekiuajyo Dios (Luc. 4:43). Senkis motemakak itech tanojnotsalis. Kemej kiitaya ke monekia kichiuas ijsiujka, nochipa kitemoj tanojnotsas ika iTekiuajyo Dios. Uan tejuan tein tiktojtokaj Jesús, ¿toni techolinia maj tikchiuakan? Kampa timoajsij mojmostaj, ¿yetokej akin uelis tikintapouiskej kuali tanauatilmej? Tiknekij maj inetasojtalis Cristo techolini maj titetapouikan kuali tanauatilmej nochi tein uelis (2 Cor. 5:14).
4. ¿Keniuj no uelis timochiuaskej okachi kuali titamachtianij?
4 ‘Amo keman akaj ijkon tikakilijtoyaj.ʼ Nochin kimoujkakakiaj itamachtilis Jesús (Juan 7:46; Mat. 7:28, 29). ¿Keyej? ¿Toni kichiuaya Jesús tein amo kichiuayaj oksekin tamachtianij? Yejua kitasojtaya tamachtilis tein kitenextiliaya, kintasojtaya taltikpakneminij uan keman tamachtiaya, kikuia neskayomej, netajtanilmej uan okseki tamanok. Komo tikchiuaj kemej Ueyi Tamachtijkej, uelis timochiuaskej okachi kuali titamachtianij (Luc. 6:40).
5. Keman timomachtiskej amaix “Ven, sé mi seguidor”, ¿toni moneki ika timotaliskej tiktemoskej?
5 Axkan tikitakej sayoj ome eyi taman tein kichiuak Jesús keman kitekitilij Dios. Uan nejon semi techpaleuia. ¿Toni okseki taman uelis tikonajsis? Keman tikitaskej amaix itech Nemachtil ika Biblia itech Nechikol, maj ika timotalikan tikixmatiskej “tetasojtalis de Cristo”, uan maj tiktojtokakan ika tajtol uan ika tachiualis (Efe. 3:19).