¡Moneki okachi tamachtianij!
1. ¿Keyej noyampa taltikpak motemaka cursos tein ika kinmachtiaj maj ijsiujka uelikan se yankuik tajtol?
1 Jiova techpaleuijtok maj ‘tikinnojnotsakan ika in yankuik Tajtoltsinʼ taltikpakneminij tein tajtouaj “tataman tajtolismej” (Hech. 20:24; Apo. 7:9). Uan no, ‘takeual takuaujtamach uan tamatkejʼ kichiua nochi taman tein tapaleuis maj kikakikan kuali tanauatilmej nochin tein tajtouaj okseki tajtolmej (Mat. 24:45). Yejika, noyampa taltikpak motemaka cursos tein ika kinmachtiaj maj ijsiujka uelikan se yankuik tajtol. Sayoj ke achto ke motemakas cursos, kinmachtiaj miakej tamachtianij nochi xiujmej.
2. ¿Keyej moneki oksekinok tamachtianij?
2 Itech makuil xiuit tein tiualpanokej, nikan México kinmachtijkej 144 tamachtianij itech 34 maseual tajtolmej. Ika nejon, panoua 13,000 tanojnotsanij kinmachtijkejya maj tanojnotsakan itech se tajtol tein amo kiixmatiaj. Sayoj ke nikan México motajtoua 68 maseual tajtolmej uan 364 variantes. Nejin kinextia ke onkak miak tekit tein moneki mochiuasok. Yejika, komo tejuatsin tiontajtoua se maseual tajtol, ¿no ijkon uelis tikonijtos kemej tanauatijkej Isaías: “¡Nikan niyetok! Nejua xinechtitani”? (Isa. 6:8.) ¿Toni kintajtaniaj maj kipiakan akin kinekij mochiuaskej tamachtianij? ¿Akonimej kinpaleuiaj yejuan?
3. ¿Toni kintajtaniaj maj kipiakan akin kinekij mochiuaskej tamachtianij?
3 Tein motajtani. Tein okachi tayekantok, moneki maj chikaujkej espiritualmente. Yejika, kinixpejpenaj tayekananij uan tapaleuianij maj mochiuakan tamachtianij. Maski amo moijtoua hasta kanachi xiuit moneki kipiaskej, mochia maj amo kipiakan kokolis. Uelis eski tokniuan tein imin selti oso tein monamiktijkejya. Maski moneki maj imin tajtol akin tamachtiskej, okachi moneki maj kuali kiixmatikan tajtol. Akin kinekij mochiuaskej tamachtianij, moneki kimatiltiskej tokniuj takalpanojkej, uan yejua kititanis itech sucursal recomendación tein yejua kichiuas uan oloch tayekananij itech inechikol.
4. ¿Toni tekit kichiuaj tein tekitij sucursal uan tokniuj takalpanojkej tein tapaleuia maj motemaka cursos?
4 Tekit tein kichiua inechikol Dios. Tein tekitij sucursal, kinnotsaskej tokniuan tein kinixpejpenkej uan kintajtaniskej ox uelisok kichiuaskej nejon tekit. Satepan kinyoleuaskej maj yakan sucursal kampa kinnextiliskej keniuj tamachtiskej. Ompa, tein tekitij sucursal kiiluiskej tokniuj takalpanojkej maj kinixpejpena se oloch tayekananij tein tapaleuiskej maj mochiua curso. Ijkon, tamachtijkej sayoj kitemakas curso uan amo ika mouejkauas okseki taman. Tokniuj takalpanojkej no kinixpejpenas hasta 26 momachtianij tein yetoskej itech se curso (1 Cor. 14:40).
5. ¿Kanachpa semana uan kanachi horas uelis motamachtis?
5 Tekit tein kichiua tamachtijkej. Tamachtijkej kimatiltis tokniuj takalpanojkej toni tonal uan hora uelis tamachtis. Mochia maj tamachti maski sayoj se tonal itech se semana uan maj uejkaua se, ome oso eyi hora. Moneki maj amo pano chikuasen metsti nejon curso. Sayoj ke komo tamachtijkej ueli tamachtia okachi tonalmej itech se semana, curso uelis uejkauas se metsti oso niono ajsis se metsti.
6. ¿Toni tein kipanok se tokniuj kinextia ke Jiova kintatiochiuia akin motemakaj mochiuaskej tamachtianij maski ouij?
6 ¿Uelis titechonpaleuis? Xa miakej tokniuan kimachiliaj ke amo uelis kitenextiliskej imin tajtol, oso ke semi ouij tajtoskej imin ixpan miakej. Sayoj ke yektikatsin espíritu uelis kinpaleuis maj kichiuakan itanejnekilis Jiova (Juan 14:16). Yejua nejon kinextia se carta tein se tamachtijkej kititanik sucursal: “Nikneki namechiluis ke amo nimomachtij itech nion se escuela. Niueli nitaixtajtoltia uan nitajkuiloua porin nechpaleuijkej tokniuan itech nechikol. Achto ke nikseliskia curso tein kinmakaj tamachtianij, nikmachiliaya ke amo ueliskia nikchiuaskia nejon tekit. Sayoj ke Jiova nechpaleuijtok maj nimochiua okachi kuali nitamachtijkej. Keman nitamachtia, nikita keniuj tekiti iespíritu Jiova uan keniuj nechpaleuia nejua. Ninemi tel uejka itech se xolalkonet kampa semi ouij se moixpanoltia. Sayoj ke tiitekitikauan Jiova tikpiaj miak taman espiritualmente”.
7. ¿Keniuj uelis tikchiuaskej ijkon kemej tiktajtaniaj Jiova itech netataujtil maj kintitani okachi tekitinij?
7 Jiova kinankilijtok tonetataujtiluan kampa tiktajtaniaj maj kintitani okachi tekitinij (Mat. 9:38). Kemaj, kinolinia tel miakej precursores uan tanojnotsanij, maj tapaleuitij kampa semi poliuiok maj moteixmatilti iTekiuajyo Dios itech okseki tajtolmej. ¿Kemaj tikonneki tikonmachtis motajtol nejin tokniuan? Komo ijkon, senkis xikonneltoka ke Jiova kitiochiuas nochi tein tikonchiuas maski ouij (Mal. 3:10).