Maj tikintaneltoktikan akin tikinmachtiaj
1. ¿Toni techpaleuis maj kuali tiktekitiltikan iTajtol Dios itech tanojnotsalis?
1 Tein mochiuaj kuali tanojnotsanij ijkon kemej tatitanil Pablo, kiitaj ke komo kinekij kuali ‘kitekitiltiskej in Tajtoltsin de Diosʼ, moneki maj amo sayoj kinextikan toni kijtoua Biblia (2 Tim. 2:15). ¿Keniuj uelis tikintaneltoktiskej akin tikinmachtiaj? (Hech. 28:23.)
2. ¿Keniuj uelis tikpaleuiskej akin techkaki maj okachi kipoujkaita iTajtol Dios?
2 Maj tikauakan maj tanojnotsa iTajtol Dios. Yekinika, keman tikinnextiliskej Biblia, moneki tikchiuaskej maj kipoujkaitakan itamatilis Dios tein kipia Tajkuilol. Komo tiknextiaj ke senkis tikneltokaj iTajtol Dios, uelis kinolinis akin tikinnojnotsaj maj kuali kikakikan keman tikinixtajtoltiliskej se texto (Heb. 4:12). Uelis tikijtoskej kemej nejin: “Nejua nechtelpaleuia nikmatis keniuj kiita Dios nejin. Xikonita keniuj kijtoua Biblia”. Nochipa keman uelis, maj tikinixtajtoltilikan Biblia, ijkon tikaujtoskej maj tanojnotsa iTajtol Dios.
3. Satepan ke tikixtajtoltiliskej se texto akin techkaki, ¿keniuj uelis tikpaleuiskej maj kiajsikamati?
3 Ojpatika, moneki tikinmelauiliskej textos. Miakej semi ouij kiajsikamatij se versículo keman yekinika kikakij. Moneki maj tikinmelauilikan keniuj mouika texto iuan tema tein ika titajtouaj (Luc. 24:26, 27). No moneki tiknextiskej katiyejua tajtolmej tein tayekantokej. Uan no, komo tikchiuiliaj netajtanilmej, uelis tikmatiskej ox kiajsikamatik tein moixtajtoltij (Pro. 20:5; Hech. 8:30).
4. ¿Toni okse taman moneki tikchiuaskej uan ijkon uelis tikintaneltoktiskej akin tikinmachtiaj?
4 Maj tikintanemililtikan keniuj kikuiskej tein kijtoua Biblia. Expatika, moneki tikpaleuiskej maj kinemili keniuj kikuis tein momachtia. Moneki tiknextiliskej keniuj kipaleuia tein kijtoua se texto. Komo timotaksaltiaj itech Biblia, xa uelis tiktaneltoktiskej uan kipatas itanemilil (Hech. 17:2-4; 19:8). Se neskayot, satepan ke tikixtajtoltiskej Salmo 83:18, uelis tikiluiskej ke komo tiknekij kuali timouikaskej iuan aksa, moneki tikixmatiskej itokay. Ompa, uelis tiktajtaniskej: “Komo tikonkui itokay Dios keman tikonchiua netataujtil, ¿mitsonpaleuis xiontajtani tein kisa itech moyolo?”. Keman taltikpaknenkej tikajsikamatiltiaj keniuj kipaleuia texto itech inemilis, kiitas ke itajtoluan Biblia tel tapaleuia. Keman tikintaneltoktiaj ika Biblia akin techkakij, kinolinia akin yolmelaujkej maj no kiueyichiuakan Jiova, Dios tein yoltok uan tein melauak (Jer. 10:10).