Titanojnotsanij semi moneki maj tikchiuakan netataujtil
1. ¿Toni moneki tikchiuaskej tein techpaleuis maj tikchiuakan itekiyo Dios?
1 Amo uelis tikchiuaskej itekiyo Dios toselti. Ika ichikaualis Jiova, yejuatsin techpaleuia maj tikchiuakan nejon tekit (Fili. 4:13). Kintitani ángeles maj techpaleuikan maj tikinajsikan tein tamatij kemej ichkamej (Apo. 14:6, 7). Yejuatsin kiiskaltia xinach tein mouika iuan iTajtol tein tejuan tiktokaj uan tikatekiaj (1 Cor. 3:6, 9). Yejika, titanojnotsanij ¡motelneki maj tiktataujtikan toTajtsin maj techpaleui!
2. ¿Toni uelis tiktajtaniskej Jiova itech tonetataujtiluan?
2 Maj timotajtanilikan tejuan. Moneki nochipa tikchiuaskej netataujtil keman titanojnotsatij (Efe. 6:18). ¿Toni uelis titajtaniskej? Maj techmaka yolchikaualis uan maj tikinpialikan se kuali tanemilil akin tikinnojnotsaj (Hech. 4:29). Uelis tiktajtaniskej Jiova maj techuika kampa moajsij akin yolmelaujkej tein kinekij momachtiskej Biblia. Keman aksa tiknojnotsaj uan techchiuilia se netajtanil, uelis tikchiujtiuetsiskej se netataujtil itech toyolo kampa tiktajtaniskej Jiova maj techpaleui maj tikmatikan titanankiliskej (Neh. 2:4). No uelis tiktajtaniskej maj techmaka tamatilis tein techpaleuis maj tiktayekanaltikan tanojnotsalis (Sant. 1:5). Uan no, Jiova kiyolpaktia maj tikiluikan tajtolmej tein kinextia ke semi tiktasojkamatij timochiuaskej tiitekitikauan (Col. 3:15).
3. Keman tikchiuaj netataujtil iminka oksekin ¿keniuj tapaleuia maj mosentoka motanojnotsa?
3 Maj tikintajtanilikan oksekin. No moneki ‘timotatataujtiliskej se iuan okseʼ uan hasta uelis tikintokaytiskej tokniuan keman monekis (Sant. 5:16; Hech. 12:5). ¿Tikonpia se kokolis uan amo ueli semi tiontanojnotsati? Komo ijkon, xikontataujti Jiova maj kinpaleui tanojnotsanij tein okachi chikaujkejok. ¡Amo keman xikonnemili ke amo teyi tapaleuia monetataujtiluan! No xikontajtani Dios maj tekiuanij kinkauakan tokniuan maj tanojnotsakan, ijkon yejuan kisentokaskej ‘yolseujkanemiskejʼ (1 Tim. 2:1, 2).
4. ¿Keyej moneki tiksentokaskej tikchiuaskej netataujtil?
4 Se tel ueyi tekit maj motetapoui kuali tanauatilmej itech nochi taltikpak. Sayoj ke komo ‘tiksentokaj timotatataujtiliaj iuan Diosʼ, yejuatsin techpaleuis maj tikchiuakan nejon tekit (Rom. 12:12).