Peuakya takosauia
1. ¿Toni tekit tein motelneki mochiujtok axkan?
1 Satepan ke Jesús kinojnotsak se siuat samaritana, kiniluij imomachtijkauan: “[Xikyekitakan] nojon pueblojuanij ten ualajtokkej, yejuan [...] kemej yeskia takilomej ten peuak ya kosaui ya” (Juan 4:35, 36). Itech nejon tonalmej motapixkatoya espiritualmente uan Jesús kimatia ke nejon tekit mochiuaskia itech nochi taltikpak. Jesús, tein moajsi iluikak, kisentoka teuanti itech nejon tapixkalis (Mat. 28:19, 20). ¿Toni kinextia ke nejon tekit kisentoka mochiua okachi ijsiujka ijkon kemej ajsitiuj itamilis?
2. ¿Toni kinextia ke okachi onkak tekit noyampa taltikpak?
2 Motapixkatok noyampa taltikpak. Itech xiujtekit 2009, tanojnotsanij momiakilijkej 3,2% itech nochi taltikpak. Itech altepemej kampa amo kinkauaj maj tanojnotsakan, momiakilijkej 14%. Nemachtilmej ika Biblia tein mochiuak itech sejse metsti, panok 7,619,000, se tapoual okachi miak ke tanojnotsanij, uan ajsitoyaya tajko millón okachi ke nemachtilmej tein mochiuak itech xiuit tein tiualpanokej. Kemej okachi onkak tekit itech miak altepemej, okachi tajtanij maj kintitanikan misioneros tein momachtijkej itech Escuela de Galaad. Tanojnotsalis itech okseki tajtolmej no tel kuali mochiujtok itech miak altepemej. Moyekita ke Jiova taolinijtok maj ijsiujka mochiua nejon tekit itech itamian tapixkalis (Isa. 60:22). ¿Tikonita kemej moneki taltikpakneminij tein moajsij kampa titanojnotsaj?
3. ¿Keniuj sekin uelis kiitaskej tapixkalis tein mochiua kampa tinemij?
3 Motapixkatok kampa tinemij. Sekin uelis kijtoskej: “Kampa nitanojnotsa amo semi kinekijok techkakiskej”. Semi melauak ke itech seki xolalmej kampa titanojnotsaj moita ke amo semi moajsij akin kinekij momachtiskej kemej itech okseki xolalmej, oso amo semi kinekijok kemej achto. Yejika sekin tokniuan kinemiliaj ke tantokya tapixkalis itech nejon xolalmej, uan axkan sayoj moneki kitemoskej se ome eyi tein mokauaok. ¿Yekmelauj ijkon kemej tanemiliaj?
4. ¿Keniuj moneki tikitaskej tanojnotsalis uan keyej?
4 Keman peua uan hasta keman tami tapixkalis, onkak miak tekit tein moneki mochiuas. Maj tikitakan itajtoluan Jesús tein kinextia ke moneki timoijsiuiliskej: “Yek melauj miak ongak milajtapixkalis uan amo miakkej naken tekitiskej. Ika ya nojon xiktajtanilikan [...] Dios ten niaxka in tapixkalis, maj [...] kinualtitani miak tekitinij para maj kisentilikan nochi nijin takilomej” (Mat. 9:37, 38). Jiova, akin iaxka tapixkalis, kimati kemanian uan kani moajsij tein kiseliskej iTajtol (Juan 6:44; 1 Cor. 3:6-8). Komo ijkon, ¿toni tekit moneki tikchiuaskej tejuan? Biblia tanankilia: “Kualkan xiktoka moxinach uan hasta tiotak amo ximomaseui” (Ecl. 11:4-6). Kemaj, amo uelis timoseuiskej itech itamian tapixkalis.
5. ¿Keyej moneki tiktelnekiskej titanojnotsaskej uan amo tikauaskej maski nesi ke amo akin kineki momachtis?
5 Tapixkalis ayamo tami. Maski kampa titanojnotsaj miakpaya tipanokej uan nesi ke amo akin kineki momachtis, moajsi se taman keyej moneki tiktelnekiskej tikchiuaskej tekit uan timoijsiuiliskej (2 Tim. 4:2). Uejueyi taman tein mochiua itech taltikpak uan tein semi temoujtij, kinolinia miakej maj kipatakan imin tanemilil uan maj okachi monemilikan toni ualas satepan. Kemej telpochmej uan ichpochmej uejueyiaj, uelis kimachiliskej ke moneki kiajsiskej yeknemilis uan yolseuilis. Uan komo tiksentokaj titekitij uelisok kinyolpatas oksekin. Kemaj, tein achto amo kinekiaj, axkan xa kinekiskej techkakiskej. Uan moneki tikinnejmachtiskej hasta akin techixnamikij (Eze. 2:4, 5; 3:19).
6. ¿Toni techpaleuis maj tiknekikan titanojnotsakan?
6 ¿Toni techpaleuis maj tiknekikan titanojnotsakan komo semi techixnamikij kampa titanojnotsaj? Xa uelis amo sayoj tiyaskej kajkalpan, ta no uelis tiyaskej kampa no ueli se tanojnotsa, kemej kampa tanamakaj oso tikchiuaskej ika teléfono. Oso uelis tikpataskej tein ika titajtouaj, uan ijkon mokakis taman totanojnots. No uelis tikpataskej hora keman titanojnotsaj uan tiyaskej tiotak oso keman tiknemiliskej ke uelis yetoskej kalijtik. Xa no uelis timomachtiskej se yankuik tajtol uan ijkon okachi miakej uelis tikintapouiskej kuali tanauatilmej. No uelis okachi titekitiskej itech tanojnotsalis komo timochiuaj precursores regulares. Oso no uelis tiyaskej kampa amo moajsij miakej tekitinij. Komo tikitaj tapixkalis kemej moneki, timochikauaskej tikchiuaskej tekit nochi tein tiueliskej.
7. ¿Hasta kemanian monekis tiksentokaskej titapixkatoskej?
7 Tapixkanij kipiaj sayoj se tiempo keman uelis kiololoskej tatok, yejika amo yolik tekitij niono moseuiaj, ta kisentokaj hasta maj tami tekit. Tapixkalis espiritual no moneki tikchiuaskej ijsiujka. ¿Hasta kemanian monekis tiksentokaskej titapixkatoskej? “Hasta kuak tamis” nochi tein mochiujtok itech taltikpak uan hasta keman ejkos “tamilis” (Mat. 24:14; 28:20). Tiknekij timatamiskej tekit tein techkauilijtokej ijkon kemej kichiuak Yekinika iTekitikauj Jiova (Juan 4:34; 17:4). Yejika, maj tiksentokakan titanojnotsakan ika yolpakilis uan ika se kuali tanemilil hasta keman ejkos tamilis (Mat. 24:13). ¡Nejin tekit ayamo tami!
[Tajtolmej itech página 2]
Keman peua uan hasta keman tami tapixkalis, onkak miak tekit tein moneki mochiuas