Se tekit tein okachi teyolpaktia
1. ¿Toni taman tapajtilis mochiujtok axkan?
1 Itech yekinika siglo, tel yolpakiaj keman kinitayaj ke pajtiaj akin mokokouayaj (Luc. 5:24-26). Itech nejin tonalmej techyolpaktia tikitaskej ke mochiujtok okse taman tapajtilis. Nejin kijtosneki ke kinpaleuiaj oksekin maj kiixmatikan Jiova (Apo. 22:1, 2, 17). Semi techyolpaktia tikixtajtoltiskej experiencias kampa nesi keniuj iTajtol Jiova uan iespíritu kinpaleuia taltikpakneminij maj kipatakan imin nemilis. Sayoj ke okachi tiyolpakiskej komo no titapaleuiaj itech nejon tekit keman tikmachtiaj ika Biblia aksa uan kichiua kemej momachtia.
2. ¿Keniuj timomachiliaj keman aksa tikmachtiaj tein melauak?
2 ¿Keniuj motokaytia Dios? ¿Keyej kikaua maj titajyouikan? ¿Toni kichiuas iTekiuajyo Dios tein ika kinpaleuis taltikpakneminij? Semi techyolpaktia tiknankiliskej netajtanilmej kemej nejon, uan okachiok keman moita iixko momachtijkej ke tel yolpaki ijkuak kimati tein melauak (Pro. 15:23; Luc. 24:32). Uan no, ijkon kemej momachtijkej kichiujtiuj tein momachtia, peua kikui itokay Dios, motakentia kemej moneki, kikaua tachiualismej tein teijtakoj uan peua kintapouia oksekin tein momachtijtok. Komo yejua motemaktia uan moauia, mochiua tokniuj uan totekitikaikniuj. Sejse taman tein kichiujtiuj itech ineiskaltilis, semi techyolpaktia (1 Tes. 2:19, 20).
3. ¿Toni moneki tikchiuaskej tein techpaleuis maj tikpeualtikan se nemachtil ika Biblia?
3 Keniuj uelis tiontapaleuis. Komo tikonuelitaskia no tikonchiuas tekit tein okachi teyolpaktij, xikonilui Jiova maj mitsonmaka tatiochiualis tikonyekanas se nemachtil ika Biblia, uan xiontekiti ijkon kemej tiontajtani itech netataujtil (1 Juan 5:14). Xiontanojnotsa kampa uelis tikonajsis taltikpakneminij uan keman uelis yetoskej. Xiontayoleua maj kiselikan se nemachtil ika Biblia nochipa keman tikonitas ke uelis (Ecl. 11:6). Keman tikonajsis aksa tein kineki kimatis okachi uan tikontapouia tamachtilis tein melauak, oksepa xikonkalpano (1 Cor. 3:6-9).
4. ¿Keyej moneki maj niman titayoleuakan maj kiselikan se nemachtil ika Biblia?
4 Tel miakejok moajsij akin kitelnekij kiajsiskej tein melauak. Kemej kitelnektokej kiixmatiskej Jiova, ¿akoni kinpaleuis ika se nemachtil? (Mat. 5:3, 6.) Yejika, maj timotemakakan titapaleuiskej ika miak pakilis maj noyampa motanojnotsa uan maj tikinchiuakan imomachtijkauan Jesús achto ke tamis tapixkalis (Isa. 6:8).