Xikonmachti mokoneuan maj kichiuakan itekiyo Dios
1. Kemej kijtoua Salmo 148:12, 13 ¿toni kinolinia tetatmej maj kichiuakan?
1 Jiova kinyoleua konemej maj kiueyichiuakan yejuatsin (Sal. 148:12, 13). Yejika tetatmej tein kichiuaj kemej Cristo, amo sayoj kinmachtiaj imin koneuan iTajtol Dios uan itanauatiluan tein kijtoua maj se chipaujkanemi. Ta no kinmachtiaj maj uelikan kitetapouikan kuali tanauatilmej. ¿Keniuj yolik uelis nankichiujtiyaskej nejon?
2. ¿Keniuj uelis kinpaleuis konemej kuali neskayot tein kikauaj tetatmej?
2 Se kuali neskayot. Tamelaujkej Gedeón kiniluij 300 takamej tein kipaleuiayaj: “Xikchiuakan tein nankiitaskej nikchiua” (Jue. 7:17). Konemej kinitaj imin tatuan uan kichiuaj kemej yejuan. Se tepopaj maski youak tekiti amo youi kochiti keman ajsi kalijtik sábado kualkan, ta kinuika ikoneuan itech tanojnotsalis maski tel sioujtok. Maski amo kiniluia nion se tajtol, kinmachtijtok konemej ke tanojnotsalis tel tayekantok (Mat. 6:33). ¿Mitsonitaj mokoneuan ke mitsonyolpaktia tikonchiuas nochi taman itekiyo Dios, kemej tikonchiuas netataujtil, tikonixtajtoltis Biblia, tiontanankilis itech nechikolmej uan tiontanojnotsas? Kemej tikmatij, amo uelis tikonkauilis konemej se tel kuali neskayot. Sayoj ke okachi kiseliskej keman tionmochikauas tikonmachtis maj kiueyichiuakan Jiova, komo kiitaj tikontekitilia Jiova kemej moneki (Deu. 6:6, 7; Rom. 2:21, 22).
3. ¿Toni tekimej tein ika titaueyichiuaj uelis kiixtaliskej tetatmej maj kiajsikan imin koneuan?
3 Tekimej tein uelis kiajsitiyaskej. Tetatmej kisentokaj kinmachtiaj konemej maj nejnemikan, maj tajtokan uan maj motakentikan hasta maj uelikan. Keman se konet uelikya kichiuak se taman itech ineiskaltilis, okseki yankuik taman kiixtaliaj maj kiajsi. Uan komo tetatmej kichiuaj kemej Cristo, no kinpaleuiaj imin koneuan maj kiixtalikan kiajsiskej tekimej tein mouika iuan totaueyichiualis ijkon kemej xiujmej tein kipiaskej, uan kemej kiixejekoskej ke uelis kichiuaskej (1 Cor. 9:26). ¿Tikonmachtijtok mokoneuan maj tanankilikan ika imin tajtoluan uan maj imin selti kichijchiuakan tamachtilis tein kipanoltiskej itech Escuela tein Techmachtia iTekiyo Dios? (Sal. 35:18.) ¿Tikonmachtijtok maj kichiuakan tataman itekiyo Dios? ¿Tikonpaleuijtok maj kiixtalikan moauiskej oso maj mochiuakan precursores oso okse tekit? Konemej uelis kinyolchikauas komo mosentiliaj imiuan tanojnotsanij tein yolpakij uan kinejnekij tekitiskej, yejika, ¿tikonchiua tein tapaleuis maj mokoneuan mosentilikan imiuan? (Pro. 13:20.)
4. Ijkuak tetatmej kinmachtiaj imin koneuan keman pilimejok maj kichiuakan itekiyo Dios, ¿keniuj kinpaleuia nejon?
4 Salmista kijtoj: “Tejua Dios peuak tinechmachtia keman katka nitelpoch, uan hasta axkan niksentoka niktetapouia mouejueyi tachiualisuan” (Sal. 71:17). Xikonmachti mokoneuan keman pilimejok maj mochiuakan itekitikauan Dios. Komo tikonmachtia maj kichiuakan itekiyo Dios senkis tikneltokaj ke kinpaleuis keman uejueyiaskej (Pro. 22:6).